YESU jwasasile kuti mundaŵi jambesi yagowola yicitupa. (Mat. 9:37; 24:14) Kwende tulole kwanilicikwa kwa maloŵe gelega mu upande wakolanjikwa kuti Transcarpathia, m’cilambo ca Ukraine. M’matawuni gane gatatu gakuŵandikana ga mu upandewu, mwana mipingo 50 nambosoni ŵakulalicila ŵakupunda 5,400. * Mu upandewu, mundu jumo mwa ŵandu mcece ŵaliwose ali Jwamboni sya Yehofa.

Ana ŵandu ŵakusatama mu upandewu ali ŵamtuli? M’bale jwine jwakusatama mu upandewu lina lyakwe Vasile, jwatite, “Ŵandu ŵa mu upandewu akusajicimbicisya Baibulo. Akusanonyela cilungamo, akwete maŵasa gakulimba, soni akusalingalinga kamucisyana jwine ni mjakwe.” M’baleju jwasasilesoni kuti, “Ndaŵi sine ngakusajiticisya yikulupi yetu. Nambo patuŵalasile nawo Baibulo, akusapikanila mwalung’wanu mnope.”

Ligongo lyakuti upandewu ukwete ŵakulalicila ŵajinji, abale ni alongo akusalaga ni yindu yine. Mwambone, mpingo wine ukwete ŵakulalicila ŵakwana 134 nambo mumkuli wa mpingowu mwana nyumba 50 basi. Ana ŵakulalicila akusatenda wuli?

Abale ni alongo ŵajinji akusalipeleka ni cakulinga cakuti akalalicile ku mkuli kwakusosecela ŵakulalicila ŵajinji. M’bale jwine jwa yaka 90 lina lyakwe Ionash, jwatite, “Mumkuli wa mpingo wetu mwana nyumba syamnono, mwamti jwakulalicila jwalijose akwete nyumba siŵilipe syakuti alalicile.” Jwasasilesoni kuti, “Ligongo lya ucekulu, apano ngusalalicila m’musi mwetu. Nambo pandanda, ciluci cili camacili, najendaga pa sitima ulendo wa makilomita 160 kwawula kumkuli wine wa kwakutalika kukulalicila. Nalalicilaga ŵandu m’ciŵeceto ca Cihangale.” Ŵakulalicila akusalipeleka mnope kuti akakamucisyeje kulalicila m’mikuli jine. M’bale Ionash jwajonjecesye kuti, “Kuti ngajisimane sitima, najimukaga m’ma 4 koloko kundaŵindaŵipe. Nalalicilaga mpaka 6 koloko kwigulo pajawujilaga sitima jila. Natendaga yeleyi kaŵili kapena katatu pa cijuma.” Ana m’baleju jwayiwonaga kuti akwamba kwasa ndaŵi? Jwalakwe jwatite, “Nasangalalaga mnope ni undumetume welewu. Cakusangalasya cine ni cakuti nakombwele kwiganya usyesyene liŵasa line lyalyatamaga kutali ni mpingo.”

Tukumanyilila kuti m’mipingo ja mu upandewu, abale ni alongo ŵane nganaŵa akombwele kuja kulalicila kwakutalika. Atamose yili m’yoyo, jwalijose akusalingalinga kulalicila mumkuli wa mpingo wakwe. Yakuyicisya yakwe, mu 2017, ciŵalanjilo ca ŵandu ŵakusimanikwa pa Cikumbucilo m’matawuni gatatuga, caliji kuwilisya kaŵili ciŵalanjilo ca ŵakulalicila ŵa m’matawuniga. Jeleji jili hafu ja ŵandu wosope m’matawuni gatatuga. Welewutu uli umboni wakuti, kulikose kwatukutumicila, tukwete “yakutenda yejinji ndaŵi syosope pamasengo ga Ambuje.”—1 Akoli. 15:58.