1-2. Ligongo chichi Malemba gane gakusaŵa gakusosekwa mnope yindu payichenjile pa umi wetu?

 PA LISIKU lya ulombela, jwamlume ni jwamkongwe akusapikanila ngani ja m’Baibulo jajikusalondesya ya ulombela. Mfundo syasikusaŵa munganiji ngasikusaŵa syachilendo kwa jemanjajo. Nambo kutandila palisikuli, mfundo syelesi sikusaŵa syakusosekwa mnope paumi wawo. Tukuŵecheta yeleyi ligongo lyakuti mfundosi chasikamulichisyeje masengo mu ulombela wawo.

² Yeleyi yikulandanasoni ni yayikusatendekwa kwa Aklistu ŵalombane pakwete ŵanache. Kwa yaka yejinji, yikusaŵa kuti jemanjaji aŵele ali mkupikanila ngani sya mwampaka alelele ŵanache. Nambo patandite kukola ŵanache nganisi sikusaŵa syakusosekwa mnope kwa jemanjaji. Pelepa jemanjaji akusakola udindo wekulungwa wakwalela ŵanache wawo. Myoyo, yindu payichenjile paumi wetu, Malemba gane gakusaŵa gakusosekwa mnope kwa m’weji. Ali ni ligongo lyakwe ŵakutumichila ŵa Yehofa akusaŵalanga Malemba ndaŵi syosope. Yeleyi yikulandana ni yaŵasalile ayimwene ŵa Chiisalaeli kuti atendeje. Jemanjaji ŵasalile kuti aŵalanjeje Maloŵe ga Mlungu kwa ‘umi wawo wosope.’—Det. 17:19.

3. Ana munganiji chitukambilane chichi?

³ Umo mwa udindo wekulungwa mnope wakwete achinangolo ŵa Chiklistu uli kwajiganya ŵanache ŵawo yakwamba Yehofa. Nambo akusasosekwa kutendasoni yejinji kupwatika pa kwajiganya yakwamba Mlungu. Akusasosekwa kwakamuchisya ŵanache ŵawo kuti amnonyeleje mnope Mlungu. Ana mpaka atende wuli kuti ŵakamuchisye ŵanache ŵawo kuti amnonyeleje mnope Yehofa? Munganiji, chitukambilane mfundo mcheche sya m’Baibulo  syampaka syakamuchisye jemanja achinangolo. (2 Tim. 3:16) Chitulolesoni umbone wapatile achinangolo ŵane ŵa Chiklistu ligongo lyakamulichisya masengo malangiso ga m’Baibulo.

4. Ana ni mfundo japi jandanda jampaka jakamuchisye achinangolo kwajiganya ŵanache ŵawo kuti amnonyeleje Yehofa? (Yakobo 1:5)

⁴ Mfundo jandanda: Amŵendeje Yehofa kuti ŵakamuchisye. Amŵendeje Yehofa lunda lwampaka asosechele kuti akombole kwakamuchisya ŵanache ŵawo kutanda kumnonyela jwalakwe. (Aŵalanje Yakobo 1:5.) Jwalakwe ni jwali jwakuŵajilwa kutupa malangiso. Ligongo chichi Yehofa ali jwakuŵajilwa kutupa malangiso? Pana magongo gejinji, nambo kwende tugambe kulola gaŵilipe. Ligongo lyandanda, Yehofa ali nangolo jwakusamanyilila yejinji. (Sal. 36:9) Ligongo lyaŵili, malangiso galunda gakusapeleka jwalakwe gakusakamuchisya ndaŵi syosope.—Yes. 48:17.

5. (a) Ana gulu ja Yehofa jikusapeleka yindu yapi pakusaka kwakamuchisya achinangolo? (b) Mwakamulana ni fidiyo, ana yaŵatesile M’bale ni Mlongo Amorim pakwalela ŵanache ŵawo yajiganyisye chichi?

⁵ Kupitila m’Maloŵe gakwe soni mu gulu jakwe, Yehofa akusapeleka chakulya cha usimu chejinji champaka chakamuchisye achinangolo kwajiganya ŵanache ŵawo kuti amnonyeleje Yehofa. (Mat. 24:45) Mwachisyasyo achinangolo mpaka apate malangiso gakamuchisya mungani sya mtwe wakuti “Yakamuchisya Maŵasa” syasiŵele sili mkukopoka m’magasini ga Ajimuche! kwa yaka yejinji. Apano nganisi sikusimanikwa pa webusayiti jetu. Panasoni mafidiyo gejinji soni ma sewelo gagakusasimanikwa pa jw.org gampaka gakamuchisye achinangolo kamulichisya masengo malangiso ga Yehofa pakwalela ŵanache ŵawo. *—Mis. 2:4-6.

6. Ana mtati jwine akusapikana uli mu mtima pakwamba ya malangiso gakutyochela ku gulu ja Yehofa?

⁶ Achinangolo ŵajinji alosisye kuyamichila chikamuchisyo chakusapeleka Yehofa kupitila mu gulu jakwe. Mtati jwine lina lyakwe Joe jwatite, “Kwalela ŵanache mu usyesyene nganijiŵa ngani jamasanje. Une ni ŵamkwangu tukusamŵenda Yehofa kuti atukamuchisyeje. Pajikopweche ngani kapena fidiyo jine jakwe tukusayiwona kuti jiyiche pandaŵi jakwe kuti jitukamuchisye kumalana ni yakusawusya yatukusimana nayo. Myoyo ndaŵi syosope tukusadalila malangiso gakutyochela kwa Yehofa.” M’bale Joe ni ŵamkwakwe  ayiweni kuti malangiso ga Yehofaga gakwakamuchisya ŵanache ŵawo kuti amŵandichile Yehofa.

7. Ligongo chichi achinangolo akusosekwa kulosya chisyasyo chambone kwa ŵanache ŵawo? (Aloma 2:21)

⁷ Mfundo jaŵili: Aŵeje chisyasyo chambone. Ŵanache akusalola yakusatenda achinangolo soni akusajigalila katende kawo ka yindu. Yisyene kuti pangali nangolo jwali jwamlama. (Alo. 3:23) Atamose yili myoyo, achinangolo ŵalunda akusatenda yampaka akombole pakwalosya ŵanache ŵawo chisyasyo chambone. (Aŵalanje Aloma 2:21.) Mtati jwine jwatite, “Ŵanache ali mpela litonji, akusajigalila yiliyose.” Jwasasilesoni kuti, “Ŵanache akusasalaga naga ngatukutenda yindu yatwasalile kuti atendeje.” Myoyo naga tukusaka kuti ŵanache ŵetu amnonyeleje Yehofa, tukusosekwa kutanda m’wejo kumnonyela mnope Yehofajo.

8-9. Ana akulijiganya chichi pa yindu yaŵasasile Andrew ni Emma?

⁸ Pana matala gejinji gampaka akalamulichisye masengo achinangolo pakwajiganya ŵanache ŵawo kumnonyela Yehofa. Alole yajwasasile m’bale jwine jwa yaka 17 lina lyakwe Andrew. Jwalakwe jwatite, “Ndaŵi syosope achinangolo ŵangu aŵele ali mkusala kusosekwa kwa lipopelo. Chilo chilichose, Baba ŵayikaga kukupopela yalumo ni une atamose ndili mbopesile kala. Ndaŵi syosope achinangolo ŵetu ŵatusalilaga kuti, ‘Mpaka aŵechetane ni Yehofa ndaŵi jilijose jakusaka.’ Yeleyi yangamuchisye mnope, mwamti apano ngusapopela mwagopoka kwa Yehofa nambosoni ngusamwona kuŵa Mtati jwangu jwachinonyelo.” Myoyo, achinangolo akusosekwa kumbuchila kuti pakumnonyela mnope Yehofa yikusiyakamuchisyagasoni ŵanache ŵawo kuti nombe nawo amnonyeleje mnope Yehofa.

⁹ Kwende tuganichisyesoni chisyasyo cha Emma. Babagwe paŵalekaga mamagwe Emma, ŵalesile ni ngongole jekulungwa. Emma jwatite,“Ndaŵi sine, mama nganakolaga mbiya syakwanila. Nambo ndaŵi syosope ŵaŵechetaga kuti Yehofa akusiŵasamalilaga ŵakutumichila ŵakwe. Muŵatendelaga yindu paumi wawo, yalosyaga kuti ŵayikulupililaga yeleyi. Mama ŵatendaga yindu yaŵanjiganyaga.” Ana tukulijiganya chichi pelepa? Atamose achinangolo ali mkusimana ni yakusawusya, mpaka akombole kwajiganya ŵanache ŵawo kupitila mu yakusatendaga.—Agal. 6:9.

10. Ana achinangolo ŵa Chiisalaeli ŵakwete upile wamtuli wakuŵechetana ni ŵanache ŵawo? (Detulonomo 6:6, 7)

¹⁰ Mfundo jatatu: Aŵechetaneje ni ŵanache ŵawo ndaŵi syosope. Yehofa jwasalile Aisalaeli ŵa mundaŵi jakala kuti ndaŵi syosope ŵajiganyeje ŵanache ŵawo yindu yakwamba jwalakwe. (Aŵalanje Detulonomo 6:6, 7.) Achinangoloŵa ŵakolaga ndaŵi jakwanila jakuŵechetana ni ŵanache ŵawo soni kwajiganya kuti amnonyeleje Yehofa. Mwachisyasyo, komboleka kuti jwachinyamata jwa Chiisalaeli jwamalilaga ndaŵi jakwe ali ni Atatigwe pakupanda kapena kugowola mbeju. Nombe mlumbugwe mnyamataju, komboleka kuti jwamalilaga ndaŵi jakwe ni mamagwe ali mkukamula masengo mpela kutota, kuluka nambosoni masengo gane ga panyumba. Pandaŵi jeleji akakomboleche kukambilana yakwamba ndamo syambone sya Yehofa nambosoni yakutenda jwalakwe pakwakamuchisya pa liŵasa lyawo. Achinangolo pakukamula masengo ni ŵanache ŵawo, mpaka akambilane ngani syejinji.

11. Ana achinangolo ŵa Chiklistu akusakola upile wakuŵechetana ni ŵanache ŵawo pandaŵi jine japi?

¹¹ Masiku agano yindu yachenjile. M’yilambo yejinji, achinangolo ni ŵanache ŵangamalila ndaŵi jejinji ali yalumo. Achinangolo mpaka aŵe ali kumasengo soni ŵanache mpaka aŵe ali kusukulu. Myoyo achinangolo akusasosekwa kulingalinga kupata ndaŵi jakuŵechetana ni ŵanache ŵawo. (Aef. 5:15, 16; Afil. 1:10) Kulambila kwa peŵasa jilisoni ndaŵi jambone jakuŵechetana ni ŵanache ŵawo. M’bale jwine jwachinyamata lina  lyakwe Alexander jwatite, “Ndaŵi syosope baba akusatenda yakomboleka kuti tutende kulambila kwa peŵasa, soni ngakusakunda kuti chilichose chisokonasye kulambilako. Panyuma pa kulambilaku, tukusakambilana yindu yine yakusosekwa mnope.”

12. Ana mtwe wa liŵasa ukusosekwa kumbuchila chichi pandaŵi ja kulambila kwa peŵasa?

¹² Naga ali mtwe wa liŵasa, ana mpaka atende uli kuti kulambila kwa peŵasa kuŵeje kwakusangalasya kwa ŵanache ŵawo? Mpaka atende chenene kulijiganya ni ŵanache ŵawo kabuku kasambano kakuti Asangalaleje Mpaka Kalakala. Kabukuka kali kangasawusya kukambilana. Mpela nangolo mpaka asache kuti ŵanache ŵawo aŵecheteje mwagopoka soni asaleje yayikwalagasya nganisyo. Myoyo ndaŵi ja kulambila kwa peŵasa jikaŵaga jakwajamuka ŵanachewo. Nambosoni akatumbilaga naga ndaŵi sine ŵanachewo asasile yindu yakutindana ni yajikusasala Baibulo. Mmalomwakwe, asangalaleje ŵanachewo pakusala mwakuwona mtima yakuganisya soni ŵatendekasyeje kuŵa ŵagopoka. Mpaka akombole kwakamuchisya ŵanache ŵawo naga akumanyilila mwakupikanila mumtima.

13. Ana ni ndaŵi jine japi jampaka akamulichisye masengo achinangolo pakwakamuchisya ŵanache ŵawo kuti amnonyeleje Yehofa?

¹³ Achinangolo akusasosekwa kamulichisya masengo ndaŵi jilijose japatile pakwakamuchisya ŵanache ŵawo kuti aŵe paunasi wambone ni Yehofa. Ngakusosekwa kwembecheya ndaŵi ja lijiganyo lya Baibulo kuti ŵajiganye ŵanache ŵawo kumnonyela Mlungu. Alole yajwasasile nangolo jwine lina lyakwe Lisa. Jwalakwe jwatite, “Twakamulichisyaga masengo yindu yiliyose yaŵapanganyisye Yehofa pakwajiganya ŵanache ŵetu yakwamba jwalakwe. Mwachisyasyo, mbwa jetu pajatendaga yindu yakwasekasya ŵanache ŵetu, twasalilaga kuti yeleyi yikulosya kuti Yehofa ali Mlungu jwakusangalala soni akusasaka kuti m’wejisoni tusangalaleje.”

14. Ligongo chichi yili yakusosekwa kuti achinangolo ŵakamuchisyeje ŵanache ŵawo kusagula achimjawo mwalunda? (Misyungu 13:20)

¹⁴ Mfundo jamcheche: Ŵakamuchisyeje ŵanache ŵawo kupata achimjawo ŵambone. Maloŵe ga Mlungu gakusasala mwakupikanika chenene kuti ŵandu ŵatukusakunguluka nawo mpaka atutendekasye kuŵa ŵandu ŵambone kapena ŵakusakala. (Aŵalanje Misyungu 13:20.) Achinangolo ana akusiŵamanyilila achimjawo  ŵa ŵanache ŵawo? Ana pakwete pasimene ni jemanjajo soni kukunguluka nawo? Ana mpaka atende wuli kuti ŵakamuchisye ŵanache ŵawo kupata achimjawo ŵakusamnonyela Yehofa? (1 Akoli. 15:33) Mpaka ŵakamuchisye ŵanache ŵawo kupata achimjawo ŵambone mwakwaŵilanjila kumangwawo ŵandu ŵali paunasi wambone ni Yehofa kuti akunguluche nawo.—Sal. 119:63.

15. Ana achinangolo akusosekwa kutenda chichi kuti ŵakamuchisye ŵanache ŵawo kupata achimjawo ŵambone?

¹⁵ Aganichisye chisyasyo cha jwamlume jwine lina lyakwe Tony. Jwalakwe jwasasile yajwatesile ni ŵamkwakwe pakwakamuchisya ŵanache ŵawo kupata achimjawo ŵambone. Jwalakwe jwasasile kuti, “Kwa yaka yejinji, une ni ŵamkwangu tuŵele tuli mkwaŵilanga abale ni alongo ŵa misingu soni ndamo syakulekanganalekangana. Tukusalila yakulya yimpepe soni kutendela yimpepe kulambila kwa peŵasa. Yeleyi yikusakamuchisya kumanyigana ni ŵandu ŵakusamnonyela soni kumtumichila Yehofa mwakusangalala. Twakwete upile wakunguluka ni ŵakulolela dela, amishonale soni ŵandu ŵane ŵaŵayikaga kunyumba jetu. Yindu yaŵasimene nayo jemanjaji, kulipeleka kwawo soni kulijima kwawo, yakamuchisye ŵanache ŵetu kuti amŵandichile Yehofa.” Achinangolo akusosekwa ŵakamuchisyeje ŵanache ŵawo kuti apateje achimjawo ŵambone.

16. Ana achinangolo akusosekwa alijimbeje magambo naga mwanache jwawo alesile kumtumichila Yehofa?

¹⁶ Nambi wuli naga panyuma pakulingalinga kwajiganya ŵanache ŵawo kuti amnonyeleje Yehofa mwanache jumo akwasalila kuti ngakusaka kumtumichila Yehofa? Naga yili yitendekwe yeleyi akaganisyaga kuti ali ŵakulepela. Yehofa atupele ufulu wakusagula yakutenda wosopewe kupwatikapo ŵanache wetu. Mpaka tusagule kumtumichila jwalakwe kapena iyayi. Naga mwanache jwawo alesile kumtumichila Yehofa akajasa mtima, akoleje chikulupi chakuti lisiku line chachiwujilasoni. Akumbuchile chisyasyo cha mwanache jwamsokonechele. (Luk. 15:11-19, 22-24) Jwalakwe jwatesile yakusakala yejinji, nambo kaneko jwawujile. Nambo ŵane mpaka aŵechete kuti, “Chelechi chagambile kuŵa chisyasyo. Ana yeleyi mpaka yitendekwe paumi wa mundu?” Elo, yeleyi mpaka yitendekwe. Sonitu  yeleyi ni yayamtendechele jwachinyamata jwine lina lyakwe Elie.

17. Ana yaŵasimene nayo Elie yalimbikasisye chamtuli?

¹⁷ Pakusala yaŵatesile achinangolo ŵakwe Elie jwatite, “Achinangolo ŵangu ŵatesile yakomboleka pakunjiganya kuti namnonyeleje Yehofa soni Maloŵe gakwe Baibulo. Nambo panayiche yaka ya m’ma 15 natandite kwajimuchila achinangolo ŵangu.” Elie jwatandite kutenda yakusakala mwakusisa. Achinangolo ŵakwe ŵalinjilile kumkamuchisya nambo nganapikanila. Pajwatyosile kumangwakwe jwatandite kutenda yindu yakusakala. Atamose kuti yaliji myoyo, ndaŵi sine jwalakwe jwakambilanaga ngani sya m’Baibulo ni jumo mwa achimjakwe. Elie jwatite, “Panakambilanaga mnope yakwamba Yehofa ni mjanguju, yangamuchisyaga kuti nganichisyeje mnope ya Yehofa. Mwapanandipanandi, mbeju ja usyesyene jaŵapandile achinangolo ŵangu jatandite kukula mumtima mwangu.” Pali papitile ndaŵi, Elie jwawujile kwa Yehofa. * Kusala yisyene, achinangolo ŵakwe ŵasangalele mnope ligongo lyakumjiganya mwanache jwawo yindu yakwamba Yehofa pajwaliji mwanache.—2 Tim. 3:14, 15.

18. Ana akusiŵawona wuli achinangolo ŵakusalingalinga kwajiganya ŵanache ŵawo kuti amnonyeleje Yehofa?

¹⁸ Yehofa apeleche mtuka wakusangalasya kwa achinangolo ŵakwakamuchisya ŵanache ŵawo kuti kusogolo chaŵe mpago ŵa ŵandu ŵachachimtumichilaga Yehofa. (Sal. 78:4-6) Udindo welewutu uli wekulungwa. Myoyo, tukwayamichila jemanja achinangolo ligongo lyakulipeleka kwawo pakwakamuchisya ŵanache ŵawo. Naga akupitilisya kutenda yampaka akombole pakwakamuchisya ŵanache ŵawo kumnonyela Yehofa soni kwajiganya kuti aŵeje ŵakulupichika kwa jwalakwe, amanyilileje kuti Yehofa chachisangalala ni yeleyo.—Aef. 6:4.