1. Ana ŵandu akusosekwa kutenda chindu chapi chakusosekwa mnope?

 MASIKU agano, ŵandu akusosekwa kutenda chindu chakusosekwa mnope. Ana jemanjaji chachisagula kuŵa kumbali ja Yehofa Mlungu jwali Jwakulamulila jwakuŵajilwa jwa pachilambo chosope, kapena chachiŵa kumbali ja Satana? Jwalijose akusosekwa kusagula mbali jakusaka kuŵa pa mbali siŵilisi. Mbali jilijose jampaka asagule mundu jichilosya kuti chachitama ni umi mpaka kalakala kapena iyayi. (Mat. 25:31-33, 46) Pandaŵi ja “yisawusyo yekulungwa,” ni pachachimanyika ŵakuŵajilwa kupochela umi wangamala soni ŵakuŵajilwa konanjidwa.—Chiw. 7:14; 14:9-11; Esek. 9:4, 6.

2. (a) Ana pa Ahebeli 10:35-39 pakusatulimbikasya kutenda chichi? (b) Ana buku ja Chiwunukuko mpaka jitukamuchisye chamtuli?

² Aŵalanje Ahebeli 10:35-39. Naga asagwile kuŵa kumbali ja ulamusi wa Yehofa asagwile chenene. Myoyo nikuti chachiŵa ŵakusachilila kwakamuchisya ŵandu ŵane kuti nombe nawo asagule chenene. Kuti ŵakamuchisye jemanjaji, mpaka akamulichisye masengo yayili m’buku ja Chiwunukuko. Bukuji jikusasala yindu yayichatendechela ŵandu ŵakusamsisya Yehofa. Jikusasalasoni yindu yambone yachachipata ŵandu ŵakusaŵa kumbali ja ulamusi wa Mlungu. Mpaka tutende chenene kulijiganya yindu yeleyi. Kutenda yeleyi kuchikamuchisya kuti tupitilisye kumtumichila Yehofa. Kupwatika pelepa, mpaka tukamulichisye masengo yindu yatulijiganyisye kuti twakamuchisye ŵandu ŵane kuti nombe nawo asagule kumtumichila Yehofa.

3. Ana munganiji chitupate kwanga kwa yiwusyo yapi?

³ Munganiji chitukambilane yiwusyo yakuyichisyayi. Ana ŵandu ŵali kumbali ja ulamusi wa Mlungu chachipata chichi kusogoloku? Nambi ŵandu ŵali kumbali ja chilombo chechejewu chakusachikolanga m’buku ja Chiwunukuko chachisimana ni yamtuli?

4. Ana gulu japi jaŵajiweni ndumetume Yohane jili ni Yesu kwinani?

⁴ M’mesomkulola, ndumetume Yohane jwagaweni magulu gaŵili ga ŵandu gagaliji kumbali ja ulamusi wa Yehofa gali mkupochela umi wangamala. Gulu jandanda jaliji ja ŵandu ŵakwana 144,000. (Chiw. 7:4) Jemanjaji ŵajigalidwe pachilambo chapasi kuti akaŵe achayimwene kwinani yalumo ni Yesu, soni chachilamulilaga chilambo chapasi. (Chiw. 5:9, 10; 14:3, 4) M’mesomkulolaga, Yohane ŵaweni jemanjaji ali ajimi ni Yesu kwinani Petumbi lya Siyoni.—Chiw. 14:1.

5. Ana pachangakaŵapa ŵakusigala ŵa 144,000 chichatendechela chichi?

⁵ Kutandila mundaŵi ja ŵandumetume mpaka masiku agano, ŵandu ŵajinji aŵele ali mkusagulidwa kuti aŵe mu gulu ja ŵandu ŵa 144,000. (Luk. 12:32; Alo. 8:17) Nambope, Yohane ŵasalilidwe kuti ŵandu ŵane ŵamnono mu guluji chachiŵape chiŵela pachilambo chapasi m’masiku gambesi. Mkaniyitande yisawusyo yekulungwa, ŵasagulwe “ŵakusigala” ŵeleŵa chachipochela “chimanyisyo” chakumalisya chakulosya kuti Yehofa akwajitichisya. (Chiw. 7:2, 3; 12:17, NWT.) Mkati mwa yisawusyo yekulungwa, ŵasagulwe ŵakusigalaŵa chachijigalidwa kwawula kwinani kuti akaŵe ni ŵa 144,000 ŵane, ŵaŵawile ali ŵakulupichika. Wosopeŵa chachilamulila ni Yesu mu Uchimwene wa Mlungu.—Mat. 24:31; Chiw. 5:9, 10.

6-7. (a) Ana likuga line lyapi lyaŵaliweni Yohane? Ana tukulijiganya chichi pakwamba ya jemanjaji? (b) Ligongo chichi yakusasala mu chaputala 7 cha buku ja Chiwunukuko yili yakusangalasya kwa ŵasagulwe ŵakusigala soni ku “likuga lya ŵandu ŵangaŵalanjika”?

⁶ Yohane ali ŵaweni ŵandu ŵa 144,000 ŵala, ŵaliwenisoni “likuga lya ŵandu ŵangaŵalanjika.” (Chiw. 7:9, 10) Ana tukulijiganya chichi pakwamba ya jemanjaji? Yohane ŵasalilidwe kuti, “Jemanjaji ali ŵele ŵiŵapundile mu yisawusyo yekulungwa yila. Ŵachapile mikanjo jawo ni kujiswejesya m’miasi ja Mwanache Jwangondolo.” (Chiw. 7:14) “Likuga lya ŵandu ŵangaŵalanjika” palichikulupuka pa yisawusyo yekulungwa lichitama pachilambo chapasi ni kusangalalaga ni upile wejinji.—Sal. 37:9-11, 27-29; Mis. 2:21, 22; Chiw. 7:16, 17.

⁷ Chinga tuli m’gulu jakwawula kwinani kapena jakutama pachilambo chapasi, wosopewe tukwete chikulupi chakuti yindu yakusayisala pa Chiwunukuko chaputala 7 yichitutendechela. Kusala yisyene ndaŵi jelejo jichiŵa jakusangalasya mnope kwa ŵandu wosope ŵakusamtumichila Yehofa. Tuchisangalala mnope ligongo lyakusagula kuŵa kumbali ja ulamusi wa Yehofa. Ana buku ja Chiwunukuko jikusatusalilasoni chichi pakwamba ya yisawusyo yekulungwa?—Mat. 24:21.

8. Ana yisawusyo yekulungwa yichitanda chamtuli? Nambi ŵandu ŵajinji yichakwaya wuli?

⁸ Mungani jipite jila twalijiganyisye kuti, pangakaŵapa maboma gosope ga ndale gachimjimuchila Babiloni Jwamkulungwa, jwali uchimwene wa pachilambo chosope wa dini jaunami. (Chiw. 17:16, 17) Kweleku kuchiŵa kutanda kwa yisawusyo yekulungwa. Ana yeleyi yichitendekasya kuti ŵandu ŵane atande kumtumichila Yehofa? Iyayi. Mmalomwakwe, buku ja Chiwunukuko chaputala 6 jikusalosya kuti pandaŵi jakusawusyajo, ŵandu ŵangakusamtumichila Yehofa chachisaka kuti maboma soni ŵamalonda ŵakulupusye. Maboma soni ŵamalondaŵa akusiŵawanichisya kuŵa mpela matumbi. Ligongo lyakuti ŵandu ŵangakusamtumichila Yehofaŵa nganaŵa kumbali ja Uchimwene wa Mlungu, Yehofa chachawona jemanjaji kuti ali ŵakusisya.—Luk. 11:23; Chiw. 6:15-17.

9. Ana pandaŵi ja yisawusyo yekulungwa yindu yichiŵa wuli kwa ŵakutumichila ŵa Yehofa?

⁹ Ana pandaŵi jakusawusya jelejo yindu yichiŵa wuli kwa ŵakutumichila ŵa Yehofa ŵakulupichika?  Jemanjajipe ni ŵachachiŵa chiŵela kumtumichila Yehofa Mlungu pachilambopa soni ngasakunda kuchikamuchisya “chilombo.” (Chiw. 13:14-17) Ligongo lya kulupichika kwawo kwa Yehofa yichitendekasya kuti ŵandu ŵakusamsisya Yehofa atumbile mnope. Yakuyichisya yakwe mkamulano wa yilambo uchajimuchila jemanjaji. Baibulo jikusasala kuti kweleku kuchiŵa kwimuchila kwa Gogi jwa chilambo cha Magogi.—Esek. 38:14-16.

10. Mwakamulana ni Chiwunukuko 19:19-21, ana Yehofa chachitenda chichi achimmagongo pachachajimuchila ŵandu ŵakwe?

¹⁰ Ana Yehofa chachitenda chichi ni kwimuchilaku? Jwalakwe akusatusalila kuti, “Lutumbilo lwangu tiluchiŵa lwekulungwa mnope.” (Esek. 38:18, 21-23) Kaneko Chiwunukuko chaputala 19 chikusasala yayichitendekwa panyuma pa yeleyi. Yehofa chachitumisya Mwanache jwakwe kuti ŵachenjele ŵandu ŵakwe soni kwajonanga achimmagongo ŵakwe. Ŵa 144,000, pampepe ni “makuga ga ngondo ga kwinani” gagali malayika gakulupichika chachikamuchisya nawo pangondoji. (Chiw. 17:14; 19:11-15) Ana yakuyichisya ya ngondoji yichiŵa yamtuli? Ŵandu soni mabungwe gosope gagakusamsisya Yehofa gachijonanjidwa.—Aŵalanje Chiwunukuko 19:19-21.

11. Ana ni chindu chapi chakusangalasya mnope chakusachikolanga m’buku ja Chiwunukuko?

¹¹ Agambe ganichisya mwachachipikanila mumtima ŵandu ŵakulupichika pachachikulupuka pandaŵi jatachijonanjidwaga achimmagongo ŵa Mlungu. Kusala yisyene ndaŵi jelejo jichiŵa jakusangalasya mnope. Kwinani kuchiŵa kwana chisangalalo pachachijonanjidwaga Babiloni Jwamkulungwa. Nambo atamose yili myoyo, pachitendekwasoni chindu chine chakusangalasya mnope kupunda yeleyi. (Chiw. 19:1-3) Mpela mwajikusaŵechetela buku ja Chiwunukuko, pachiŵa “ulombela wa Mwanache Jwangondolo.”—Chiw. 19:6-9.

12. Mwakamula ni Chiwunukuko 21:1, 2, ana ulombela wa Mwanache Jwangondolo uchitendekwa chakachi?

¹² Ana ulombelawu uchitendekwa chakachi? Ngondo ja Alimagedo mkanijitande, ŵa 144,000 wosope chachiŵa ali kwinani. Nambope, ndaŵi jelejo ngasijiŵa ndaŵi ja ulombela wa Mwanache Jwangondolo. (Aŵalanje Chiwunukuko 21:1, 2.) Myoyo ulombela wa Mwanache Jwangondolo uchitendekwa jili jitendekwe ngondo ja Alimagedo soni achimmagongo wosope ŵa Mlungu ali ŵajonasile.—Sal. 45:3, 4, 13-17.

13. Ana pa ulombela wa Mwanache Jwangondolo pachitendekwa chichi?

¹³ Ana ulombela wa Mwanache Jwangondolo uli wakusosekwa chamtuli kwa ŵa 144,000? Mpela mwayikusaŵela kuti ulombela ukasalumbikanya pampepe jwamlume ni jwamkongwe, myoyo ulombela wakuwanichisyawu uchitendekasya kuti Mwenye jwali Yesu Klistu alumbikane ni “jwamkongwe jwa ulombela” ŵali ŵa 144,000. Chakutendekwa chakusosekwa mnopechi chichikamuchisya kuti jipagwe boma jasambano jajichilamulila chilambo chapasi kwa yaka 1,000.—Chiw. 20:6.

14-15. Mwakamulana ni Chiwunukuko chaputala 21, ana ŵa 144,000 akusiŵalandanya ni chichi? (Alole chiwulili chapachikuto.)

¹⁴ Kaneko chaputala 21 cha buku ja Chiwunukuko chikusalandanya ŵa 144,000 ni msinda wakusalala wakolanjidwa kuti, “Yelusalemu Jwasambano.” (Chiw. 21:2, 9) Msindawu, ukwete maganga 12 ga yilimbilimbi papalembedwe “mena ga ŵandumetume likumi ni ŵaŵili ŵa Mwanache Jwangondolo.” Ligongo chichi Yohane jwatesile chidwi ni yeleyi? Yaliji myoyo ligongo lyakuti jwaliweni lina lyakwe lili lilembedwe pa limo mwa magangago. Kusala yisyene welewu waliji upile wekulungwa.—Chiw. 21:10-14; Aef. 2:20.

¹⁵ Kawoneche ka msinda wakuwanichisyawu kaliji kakulekangana ni msinda uliwose. Msindawu wakwete msewu wakupanganyidwa ni golidi  jwambone, yipata 12 yepanganyidwe ni liganga lyakusalala, wakwetesoni mapupa soni yilimbilimbi yakupanganyidwa ni maganga ga mtengo wapenani, kupwatika pelepa msindawu waliji wakulandana mbali syosope syene mcheche. (Chiw. 21:15-21) Nambo Yohane jwayiweni kuti papali chine chakwe chichasoŵaga. Jwalakwe jwasasile kuti, “Ngininajiwonasoni Nyumba ja AMBUJE mu msindamo, pakuti nyumba jakwe jili AMBUJE Mlungu, Ŵamachiligosope ni soni Mwanache Jwangondolo jula. Pangali ligongo lyakuti lyuŵa kapena mwesi yiŵalileje pa msindapo, pakuti lumbili lwa Mlungu ni lwele lukusaŵalilapo, nipo nyali jakwe jili Mwanache Jwangondolo jula.” (Chiw. 21:22, 23) Ŵandu ŵali mbali ja Yelusalemu Jwasambano chachiŵa ni Yehofa. (Aheb. 7:27; Chiw. 22:3, 4) Myoyo, Yehofa soni Yesu ni ŵali nyumba jakulambilila mumsindawu.

16. Ana ŵandu chachisangalala ni yindu yapi mkati mwa Ulamusi wa Yaka 1,000 wa Uchimwene wa Mlungu?

¹⁶ Ŵasagulwe pakuganichisya ya msindawu akusasangalala mnope. Nombe nawo ŵandu ŵachachitama pachilambo chapasi akwete magongo gakwatendekasya kusangalala ni yeleyi. Mundaŵi ja Ulamusi wa Yaka 1,000 wa Uchimwene wa Mlungu, msinda wa Yelusalemu Jwasambanowu uchiyikasya upile wejinji kwa ŵandu. Yohane jwawuweni upile welewu uli mkwenda mpela “lusulo lwa mesi gakupeleka umi.” Mumbali syosope sya lusulolu mwana ‘yitela yakupeleka umi’ yakola masamba ga “mtela wakuposya yilwele.” (Chiw. 22:1, 2) Myoyo, ŵandu wosope pandaŵijo chachisangalala ni yindu yambone yeleyo. Ŵandu wosope ŵakusampikanila Yehofa chachiŵaga ŵamlama mwapanandipanandi. Kuchiŵa kuli kwangali kulwala, kupikana kupweteka, nambosoni kulila.—Chiw. 21:3-5.

17. Mwakamulana ni Chiwunukuko 20:11-13 ana ŵani ŵachachipindula ni yindu yambone yayichitendekwa mu Ulamusi wa Yaka 1,000?

¹⁷ Ana ŵani ŵachachipindula ni yindu yeleyi? Chandanda jili gulu ja ŵandu ŵajinji ŵachachikulupuka pa Alimagedo, nambosoni ŵanache wosope ŵachachipagwa m’chilambo chasambano. Nambo buku ja Chiwunukuko chaputala 20 jikusasalasoni kuti ŵandu ŵawe chachijimuka. (Aŵalanje Chiwunukuko 20:11-13.) Ŵandu “ŵaswela mtima” ŵaŵawile kalakala nambosoni ŵandu ŵane “ŵakusakala” ŵaŵawile mkanaŵe kulijiganya yakwamba Yehofa chachijimukasoni. (Mase. 24:15; Yoh. 5:28, 29) Ana yeleyi yikugopolela kuti jwalijose juŵawile chachijimuka ni kola umi mu Ulamusi wa Yaka 1,000? Iyayi. Ŵandu ŵaŵakanile upile wakumtumichila Yehofa mkanawe ngasajimuka. Jemanjaji ŵakwete  upile wakutama mu Paladaiso nambo ŵawukanile.—Mat. 25:46; 2 Ates. 1:9; Chiw. 17:8; 20:15.

18. Ana kumbesi kwa yaka 1,000 yindu yichiŵa wuli pachilambopa?

¹⁸ Kumbesi kwa yaka 1,000, ŵandu wosope ŵachachiŵa pachilambo chapasi chachiŵa ŵamlama. Pandaŵijo ulemwa watwajigalile kwa Adamu ngasiwukola machili kwa jwalijose. (Alo. 5:12) Yindu yiliyose yayikusatendekwa ligongo lya ulemwa wa Adamu yichiŵa yili yimasile. Pandaŵi jelejo, ŵandu wosope pachilambo chapasi chachiŵa ni umi wa mlama kumbesi kwa yaka 1,000.—Chiw. 20:5.

19. Ligongo chichi pachisosekwa kulinjidwa kwakumalisya?

¹⁹ Tukumanyilila kuti Yesu nganakunda kuti Satana asokonasye kulupichika kwakwe. Jwalakwe jwaŵele jwakulupichika atamose kuti jwasimene ni yakulingwa. Nambo ana ŵandu wosope ŵachachiŵa ŵamlama chachikombola kuŵape ŵakulupichika, Satana pachachimpa upile wakwalinga ŵandu? Jwalijose chachisosekwa kulijanjila jika chiwusyochi Satana pachachimkoposya kwisimbo panyuma pa yaka 1,000. (Chiw. 20:7) Ŵandu ŵachachiŵa ŵakulupichika pandaŵi ja kulinjidwa kwakumalisyaku chachipochela umi wangamala soni ufulu usyesyene. (Alo. 8:21) Nambo ŵandu wosope ŵachachijimuchila ulamusi wa Mlungu chachijonanjidwa pampepe ni Satana soni yiŵanda yakwe mwamti ngasasimanikwa mpaka kalakala.—Chiw. 20:8-10.

20. Ana akupikana wuli mumtima ni yakulochesya yakusangalasya yayikusasimanikwa m’buku ja Chiwunukuko?

²⁰ Ana akupikana wuli mumtima ligongo lyakambilana yayili m’buku ja Chiwunukuko? Ana ali ŵakusangalala pakuyiwona kuti yakulochesya ya m’buku ja Chiwunukuko yikwakwaya wawojo? Ngatukukayichila kuti yeleyi mpaka yitutendekasye kwasalila ŵane kuti tumlambileje yimpepe Mlungu m’litala lyakusalijitichisya. (Chiw. 22:17) Pakuŵa tukambilene yindu yayichitendekwa kusogoloku, apano tuli ŵakusangalala soni tukwete magongo gambone gakuŵecheta maloŵe mpela gaŵaŵechete Yohane gakuti, “Yiŵe myoyo, Ayiche Ambuje Yesu!”—Chiw. 22:20.