1. Ana chakulinga cha Yehofa masiku agano chili chichi?

 MASIKU agano Mlungu akusaka kuti ngani syambone syakwamba Uchimwene silalichidwe pachilambo chosope chapasi. (Maliko 13:10; 1 Tim. 2:3, 4) Masengoga gali ga Yehofa. Sonitu yili yakusangalasya kumanyilila kuti, ŵamsagwile mwanache jwakwe jwakusamnonyela mnope kuti alongoleleje masengoga. Ligongo lyakuti jwakutulongolela ali Yesu, mpaka tuŵe ŵakusimichisya kuti masengo gakulalichilaga chigatendekwe mwakusachila Yehofa mbesi mkanijiyiche.—Mat. 24:14.

2. Ana munganiji chitukambilane chichi?

² Munganiji chitukambilane yakutenda Yesu pakamulichisya masengo kapolo “jwakulupichika ni jwalunda” kuti atupeje malangiso gakutyochela m’Maloŵe ga Mlungu. Nambosoni chitulole yakutenda pakwalongolela ŵakumkuya ŵakwe pakukamula masengo gakulalichila. Masengogatu gakukamulidwa mnope masiku agano kupundana ni kalakose. (Mat. 24:45) Chitulolesoni yampaka atende jwalijose jwetuwe pakumkamuchisya Yesu soni kapolo jwakulupichika.

3. Ana Yesu akwete ulamusi wakutenda chichi?

³ Yesu ni jwakulongolela masengo gakulalichila. Ligongo chichi tukuŵecheta yeleyi? Yesu mkanajawule kwinani jwasimene kaje ni ŵane mwa ŵakumkuya ŵakwe ŵakulupichika pa litumbi lya Galileya. Jwalakwe ŵasalile kuti, “Mbegwile ulamusi wosope kwinani ni pasi pano.” Kaneko jwasalilesoni kuti, “Ni ligongo lyakwe jemanja mjawule, mkajiganye ŵandu ŵa ngosyo syosope.” (Mat. 28:18, 19) Myoyo, kupwatika pamasengo gakusakamula, Yesu ampelesoni udindo wakulongolela masengo gakulalichila.

4. Ligongo chichi ngatukusosekwa kayichila kuti Yesu akulongolela masengo gakulalichila?

⁴ Yesu jwasasile kuti ŵakumkuya ŵakwe chachalalichila soni  kwajiganya “ŵandu ŵa ngosyo syosope.” Jwasasilesoni kuti chachiŵa ni jemanjaji “mpaka mbesi ja chilambo chapasi chino.” (Mat. 28:20) Maloŵega gakulosya kuti Yesu akupitilisya kulongolela masengo gakulalichila mpaka masiku agano.

5. Ana mpaka tutende chichi kuti tukamuchisye nawo kuti maloŵe ga pa Salimo 110:3 gakwanilichikwe?

⁵ Yesu nganadandawulaga kuti m’masiku gambesi pachiŵa ŵamasengo ŵamnono ŵachachikamulaga masengo gakulalichila. Jwalakwe jwamanyililaga kuti maloŵe gaŵasasile jwamasalimo gachikwanilichikwa. Jwamasalimoju jwasasile kuti, “Ŵandu ŵenu chachilipeleka mwakusachilila pa lisiku lyachimchilongolela asilikali ŵenu kungondo.” (Sal. 110:3, NWT.) Naga akusakamula nawo masengo gakulalichila nikuti akumkamuchisya Yesu soni kapolo jwakulupichika. Nambosoni akukamuchisya kuti maloŵe gakulochesyaga gakwanilichikwe. Masengo gakulalichila gakwawula pasogolo mnope. Nambopetu pana yakusawusya.

6. Ana masiku agano ŵakulalichila ya Uchimwene akusasimana ni yakusawusya yapi?

⁶ Chakusawusya chimo chakusasimana nacho ŵandu ŵakusalalichila ya Uchimwene chili ŵandu ŵakusisya. Ŵandu ŵampatuko, achimlongola ŵa dini soni ŵandale, akusiŵasalila ŵandu ŵajinji yindu yaunami yakwamba masengo getu. Naga ŵachibale ŵetu, ŵandu ŵakusatumanyilila soni ŵatukusakamula nawo masengo akulupilile yindu yaunamiyi, mpaka atulekasyeje kumtumichila Yehofa soni kulalichila. Mu yilambo yine, ŵandu ŵakusisyaŵa akusiŵalagasya, kwajogoya, kwataŵa soni ndaŵi sine akusiŵawugalila mundende abale ni alongo ŵetu. Ngatukusasimonga ni yakusatutendela jemanjaji. Ligongotu Yesu jwasasile kala kuti, “Mitundu josope ja ŵandu, tijichimŵenga jemanja ligongo lyakunguya une.” (Mat. 24:9) Yakusawusya yatukusasimana nayoyi yili umboni wakulosya kuti Yehofa ali kumbali jetu. (Mat. 5:11, 12) Satana ni jwakusatendekasya kuti ŵandu atusisyeje, nambope akunandipa. Jwalakwe nganakola machili gakulandana ni gakwete Yesu. Yesu akutukamuchisya kuti tulalichileje ngani syambone kwa ŵandu ŵa mitundu josope. Kwende tulole umboni wakwe.

7. Ana ni yindu yapi yayikulosya kuti lilemba lya Chiwunukuko 14:6, 7 likukwanilichikwa?

⁷ Mpela ŵakulalichila ya Uchimwene, chakusawusya chine chatukusasimana nacho chili kulekangana yiŵecheto. M’buku ja Chiwunukuko, Yesu ŵamsalile ndumetume Yohane kuti tuchikombola kumalana ni chakusawusyachi patukulalichila ngani syambone. (Aŵalanje Chiwunukuko 14:6, 7.) Ana yeleyi yikukomboleka mwamtuli? Tukusatenda yampaka tukombole kuti twakamuchisye ŵandu ŵajinji kupikana ngani sya Uchimwene. Masiku agano, ŵandu pachilambo chosope mpaka aŵalanje ngani syakusala ya m’Baibulo m’yiŵecheto yakupunda 1,000 pa webusayiti jetu ja jw.org. Sonitu Likuga Lyakulongolela lyajitichisye kuti tugopolele buku ja Asangalaleje Mpaka Kalakala m’yiŵecheto yakupunda 700. Bukuji ni jatukujikamulichisya masengo apano pakwajiganya ŵandu Baibulo. Tukwetesoni mafidiyo gakulondesya ngani sya m’Baibulo gagakusigakamuchisya ŵandu ŵangapikana soni tukwete mabuku ga ŵandu ŵangalola. Kusala yisyene tukuyiwona yakulochesya ya m’Baibulo yili mkukwanilichikwa. Ŵandu ŵakutyochela “ku mitundu ja ŵandu ŵakuŵecheta yiŵecheto yakulekangana” akulijiganya “chiŵecheto cheswela” chachili usyesyene wa m’Baibulo. (Sak. 8:23; Sef. 3:9, NWT.) Yosopeyi yikukomboleka ligongo lyakuti Yesu Klistu ni jwakutulongolela.

8. Ana paŵele yakuyichisya yamtuli pamasengo getu gakulalichila?

⁸ Masiku agano ŵandu ŵakupunda 8,000,000 ŵakusatyochela m’yilambo 240 ali mbali ja gulu ja Yehofa. Sonitu chaka chilichose ŵandu ŵajinji akusabatisidwa. Chakusosekwa mnope nganichiŵa winji wa ŵanduŵa. Nambo  chili chakuti jemanjajo akuwala “umi wasambano.” (Akolo. 3:8-10) Ŵajinji ŵalesile ndamo syakusala, yachiwawa, lusagu soni ŵalesile kuchiwona chilambo chawo kuŵa chakusosekwa mnope kupunda yilambo yine. Yakulochesya ya pa Yesaya 2:4 yikukwanilichikwa. Jemanjaji ‘ngakulijiganyasoni kuputa ngondo.’ Patukulingalinga kuwala umundu wasambano tukusaŵa tuli mkwakamuchisya ŵandu kuti ayiche mgulu ja Yehofa. Sonitu tukusalosya kuti tukumkuya Yesu Klistu jwali jwakutulongolela. (Yoh. 13:35; 1 Pet. 2:12) Yosopeyitu ngayikutendekwa mwangosi. Nambo yikukomboleka ligongo lyakuti Yesu akutukamuchisya.

9. Mwakamulana ni Mateyu 24:45-47, ana Yesu jwasasile kuti m’masiku gambesi kuchitendekwa chichi?

⁹ Aŵalanje Mateyu 24:45-47. Yesu jwasasile kala kuti m’masiku gambesi chachisagula kapolo “jwakulupichika ni jwalunda” kuti atupeje malangiso gakutyochela m’Maloŵe ga Mlungu. Myoyo tukwembecheya kuti m’masiku getu gano kapoloju chakamuleje masengoga mwakulimbichila. Sonitu yeleyi ni yayikutendekwa. Yesu akukamulichisya masengo kagulu kamwana ka abale ŵasagulwe pakwapa ŵandu ŵa Mlungu soni ŵakusaka kummanyilila Mlungu “yakulya yawo [yausimu] mu ndaŵi jakwe.” Abale ŵeleŵa ngakusaliwona kuti ali ŵakulamulila chikulupi cha Aklistu achimjawo. (2 Akoli. 1:24) Mmalomwakwe, jemanjaji akumanyilila kuti Yesu Klistu ali “mlongola soni jwakulamulila” ŵandu ŵakwe.—Yes. 55:4.

10. Pa mabuku gagali pa chiwuliliga, ana ni buku japi jajakamuchisye kuti atande kwenda palitala lyakwawula ku umi wangamala?

¹⁰ Kutandila mu 1919, kapolo jwakulupichika aŵele ali kukoposya mabuku gakulekanganalekangana pakusaka kwapa upile ŵandu kuti alijiganye Maloŵe ga Mlungu. Mu 1921, kapoloju jwakopwesye buku jakuti Zeze wa Mulungu pakwakamuchisya ŵandu ŵaŵasakaga kummanyilila Mlungu kuti alijiganye usyesyene wa  m’Baibulo. Mkupita kwa ndaŵi ŵakopwesyesoni mabuku gane. Ana ni buku japi jajakamuchisye wawojo kuti ŵamanyilile soni kutanda kwanonyela Atati ŵetu ŵakwinani? Ana jili buku ja Mulungu Akhale Woona, Choonadi Chimene Chimasogolela ku Moyo Wamuyaya, Mungathe Kukhala ndi Moyo Wosatha Mpaladaiso Padziko Lapansi, Chidziŵitso Chotsogolela ku Moyo Wosatha, Ana Baibulo Jikusajiganya Chichi Kusyesyene? Ana Baibulo Jikusajiganya Yamtuli? kapena buku jetu jasambano ja Asangalaleje Mpaka Kalakala? Mabuku gosopega gali gakamuchisya patukwajiganya ŵandu. Sonitu ni gatwasosechelaga mwakamulana ni ndaŵi jagakopweche.

11. Ligongo chichi wosopewe tukusosekwa kulijiganya yakwamba Yehofa soni Maloŵe gakwe?

¹¹ Wosope tukusosekwa kulijiganyaga mwakusokoka yakwamba Yehofa soni Maloŵe gakwe mwangajigalila kuti twalijiganyisye kalakala usyesyene kapena tulijiganyisye sampano. Ndumetume Paulo jwalembile kuti, “Yakulya yakulimba ni ya ŵandu ŵakomangale.” Kaneko Paulo jwajonjechesye kuti, kukamulichisya masengo yatukusalijiganya m’Baibulo mpaka kutukamuchisye “kulekanganya yambone ni yakusakala.” (Aheb. 5:14) Masiku agano ŵandu ŵajinji akusanonyela kutenda ndamo syakusakala. Myoyo mpaka yitusawusyeje kupikanila yakusatusalila Yehofa. Nambope, Yesu akusalolechesya kuti tukulijiganya yindu yakutukamuchisya kuti tukole chikulupi chakulimba. Tukusalijiganya yindu yeleyi kutyochela m’Baibulo gagali maloŵe gakusalilidwa ni Mlungu. Yesu akusamlongolela kapolo jwakulupichika kuti atujiganyeje yindu yakusosekwayi.

12. Mwakulandana ni Yesu ana tutesile yamtuli pakusaka kulichimbichisya lina lya Mlungu?

¹² Mpela mwaŵatendelaga Yesu, m’wejisoni tukusalichimbichisya lina lya Mlungu. (Yoh. 17:6, 26) Mwachisyasyo, mu 1931 twatandite kumanyika ni lina lyakutyochela m’Malemba lyakuti Mboni sya Yehofa. Kumanyika ni lina lya Atati ŵetu ŵa kwinani kwalosisye kuti tukusaliwona linali kuŵa lyakusosekwa mnope.  (Yes. 43:10-12) Sonitu kutandila mu Okotoba m’chakachi linali lyatandite kulembedwa pachikuto cha magasini ja Sanja ja Mlonda. Kupwatika pelepa mu Baibulo ja New World Translation of the Holy Scriptures ŵawuchisye lina lya Mlungu pamalo gakwe galyasosechelaga. Yeleyi yili yakulengana ni yakusatenda m’machalichi ga Chiklistu. Jemanjaji pakugopolela Baibulo akusatyosya lina lya Yehofa.

13. Ana chichi chachikwatendekasya kusimichisya kuti Yesu akukamulichisya masengo kapolo “jwakulupichika ni jwalunda” masiku agano? (Yohane 6:68)

¹³ Yesu jutesile yakuti pachilambo chapasi papagwe gulu jakulimbikasya kulambila kweswela. Jutesile yeleyi pakamulichisya masengo kapolo “jwakulupichika ni jwalunda.” Ana wawojo akusapikana wuli kuŵa mu gulu jeleji? Komboleka nombenawo akulipikana mpela ndumetume Petulo juŵamsalile Yesu kuti, “Ambuje mpaka tujawule kwa ŵani? Wawojo akwete maloŵe gakupeleka umi wangamala.” (Yoh. 6:68) Ana tukaliji kwapi yikaŵe kuti nganituŵa mu gulu ja Yehofa? Kupitila mu guluji, Klistu akulolechesya kuti tukwete chilichose chakutukamuchisya kuŵa ŵakulupichika kwa Mlungu. Jwalakwe akusatujiganyasoni kuti tulalichileje mwakamula mtima. Kupwatika pelepa akusatukamuchisya kuti tuwale “umundu wasambano” kuti tumsangalasyeje Yehofa.—Aef. 4:24.

14. Ana kuŵa m’gulu ja Yehofa kwakamuchisye chamtuli mu ndaŵi ja mlili wa COVID-19?

¹⁴ Patukusimana ni yakusawusya, Yesu akusatupa malangiso gakamuchisya. Umbone wa malangisoga wawonechele pandaŵi jawatandite mlili wa COVID-19. Pandaŵiji ŵandu kuchilamboku nganamanyililaga yakutenda. Nambo Yesu jwatesile yakomboleka kuti tupochele malangiso gangasawusya pakusaka kutuchenjela. Twapochele malangiso gakuti tuwaleje masiki patuli pasikati pa ŵandu ŵajinji soni kuti tukaŵandikanaga mnope ni ŵandu. Achakulungwa  ŵamumpingo ŵalimbikasisye kuti aŵechetaneje ni ŵandu ŵa mumpingo mwawo. Ŵasosekwaga kutenda yeleyi kuti amanyilileje mwayiŵelele yindu paumi wawo soni kuti ŵakamuchisyeje kulimbisya unasi wawo ni Yehofa. (Yes. 32:1, 2) Nambosoni malipoti gakutyochela ku Likuga Lyakulongolela gaŵele gali mkutulimbikasya soni kutupa malangiso gane gatwasosekwaga kukuya.

15. Ana twapochele malangiso gamtuli gakutendela misongano soni kulalichila mundaŵi ja mlili wa COVID-19? Ana papali yakuyichisya yamtuli?

¹⁵ Mundaŵi ja mlili wa COVID-19, twapochelesoni malangiso gakutusalila mwampaka tutendele misongano jampingo nambosoni mwampaka tulalichilile. Ndaŵi jijojo twatandite kukamulichisya masengo yipangiso yamakono pakutenda misongano ja mpingo, ja dela soni ja chigawo. Twatanditesoni kulalichila kupitila m’yikalata soni pafoni. Kusala yisyene Yehofa atupele upile ligongo lya kulimbichila kwetu. Nambosonitu nyambi syejinji syapeleche malipoti gakulosya kuti chiŵalanjilo cha ŵakulalichila chikukwela mnope. Yili yangalajila kuwusya kuti ŵandu ŵajinji ŵasimene ni yindu yakulimbikasya mundaŵi jeleji.—Alole libokosi lyakuti “ Yehofa Akugajaliwa Masengo Getu Gakulalichila.”

16. Ana tukakayichilaga chichi?

¹⁶ Ŵandu ŵane ŵayiwonaga kuti gulu jetu jikupeleka malangiso gakalalisya mnope mundaŵi ja mlili wa COVID-19. Nambo ndaŵi syejinji yikusalosya kuti malangiso gatukusapochela gakusaŵa gakamuchisya mnope. (Mat. 11:19) Myoyo tuganichisyeje yakutenda Yesu pakwalongolela ŵandu ŵakwe masiku agano. Yeleyi yichitukamuchisya kuti tukakayichilaga amta panandi kuti chinga chitusimane ni yamtuli kusogoloku, Yehofa soni mwanache jwakwe chachiŵa ni m’weji.—Aŵalanje Ahebeli 13:5, 6.

17. Ana akusapikana wuli ligongo lyakuti Yesu ali jwa kutulongolela jwetu?

¹⁷ Kusala yisyene tuli ŵakusangalala mnope ligongo lyakulongoleledwa ni Yesu. Tuli m’gulu jele ŵandu ŵakwe ali ŵangagaŵikangana ligongo lyakulekangana ndamo, yilambo yakutyochela soni yiŵecheto. Tukusapochela malangiso gejinji gakutyochela m’Maloŵe ga Mlungu. Sonitu tukwete yosope yakutukamuchisya patukamula masengo gakulalichila. Jwalijose akusalijiganyasoni yampaka atende kuti awale umundu wasambano soni yampaka atende kuti ŵanonyeleje ŵandu ŵane. Kusala yisyene, tukwete magongo gakututendekasya kuŵa ŵakusangalala mnope ligongo lyakuti Yesu ali jwa kutulongolela jwetu.