1. Ana Yehofa akusatukunda kutenda chichi?

YEHOFA akusatukunda kusagula mwachitutendeleje yindu paumi wetu. Jwalakwe akusatujiganya mwampaka tusagulile yindu mwalunda, soni akusatukamuchisya kuti yatusagwileyo yikomboleche. (Sal. 119:173) Myoyo kuti tusaguleje yindu mwalunda, tukusasosekwa kamulichisya masengo Maloŵe ga Mlungu paumi wetu.—Aheb. 5:14.

2. Ana ni yakusawusya yapi yampaka tusimane nayo panyuma pakusagula yindu?

² Ndaŵi sine mpaka yiŵe yakusawusya kumalisya kutenda yatwasagwileyo atamose tuli tusagwile yindu mwalunda. Aganichisye yisyasyo yakuyichisyayi. M’bale jwachinyamata alinganyisye yakuŵalanga Baibulo josope. Jwalakwe akutanda kuŵalanga, nambo kaneko akuleka kuŵalangako. Mlongo akusagula yakutenda upayiniya wakutamilichika, nambo akwamba kuŵecheta kuti chachitendape kusogolo. Likuga lya achakulungwa ŵa mumpingo likulinganya yakutenda maulendo gakuchinga, nambo pakumala miyesi jejinji mkanatande masengogo. Yakutendekwayi yili yakulekangana, nambo mumbali jine yikulandana. Ŵanduŵa asagwile yindu nambo ngakuyikwanilisya. Nombe Aklistu ŵa ku Kolinto mu yaka 100 yandanda ŵasimene ni chakusawusya mpela chelechi. Kwende tulole yampaka tulijiganye kwa jemanjaji.

3. Ana Aklistu ŵa ku Kolinto ŵasagwile kutenda chichi, nambo ana yakuyichisya yakwe yaliji yamtuli?

³ Cha mu 55 C.E., Aklistu ŵa ku Kolinto ŵasagwile chindu chakusosekwa mnope. Jemanjaji ŵapikene kuti abale ŵawo ku Yelusalemu ni ku Yudeya akulaga ni usawuchi. Ŵapikenesoni kuti mipingo jine jikupeleka mbiya syakwakamuchisya. Aklistu ŵa ku Kolinto ŵaliji  ŵachanasa soni ŵakoloŵa magasa, myoyo ŵamŵendile Paulo kuti ŵasalile yampaka atende kuti akamuchisye nawo. Paulo ŵasalile yampaka atende soni ŵamtumisye Tito kuti akakamuchisye kulokotela yakupelekayo. (1 Akoli. 16:1; 2 Akoli. 8:6) Pali pagambile kumala miyesi jamnono, Paulo jwapikene kuti Aklistu ŵa ku Kolinto ngakupeleka chilichose. Yeleyi yatendekasisye kuti yindu yaŵasakaga kupeleka yikajawula pandaŵi jakwe ku Yelusalemu pampepe ni yakupeleka yine yakutyochela kumipingo jine.—2 Akoli. 9:4, 5.

4. Mwakamulana ni 2 Akolinto 8:7, 10, 11, ana Paulo ŵalimbikasisye Aklistu kutenda chichi?

⁴ Jemanjaji ŵasagwile chenene, soni Paulo ŵayamichile ligongo lyakola mtima wakwaganichisya ŵane. Nambosoni ŵalimbikasisye jemanjaji kuti akusosekwa kumalisya kapena kwanilisya yindu yaŵasagwile. (Aŵalanje 2 Akolinto 8:7, 10, 11.) Yeleyi yikutujiganya kuti atamose Aklistu ŵakulupichika mpaka alaje kwanilisya yindu yaŵasagwile.

5. Ana munganiji chitupate kwanga kwa yiwusyo yapi?

⁵ Mwakulandana ni Aklistu ŵa ku Kolinto, m’wejisoni mpaka tuyiwone kuŵa yakusawusya kwanilisya yatwasagwile. Ligongo lya ungali umlama mpaka yiŵe yangasawusya kuŵecheta kuti tuchitendape msogolo. Kombolekasoni yindu yangayijembecheya mpaka yitulepelekasye kutenda yatwasakaga kutenda. (Jwak. 9:11; Alo. 7:18) Naga tukusaka kuchenga yatwasagwile munyumamu, ana tukusosekwa kutenda chichi? Soni ana mpaka tutende wuli kuti tulolechesyeje kuti tukumalisya yindu yatwayitandite?

6. Ana ni ndaŵi japi jatukusasosekwa kuchenga yatwasagwile?

⁶ Pana yisagula yine yangatukusasosekwa kuchenga. Mwachisyasyo, nganituŵa tuchenjile yatwasagwile kuti tuchimtumichila Yehofa, soni kuŵa ŵakulupichika kwa mjetu jwa mu ulombela. (Mat. 16:24; 19:6) Nambo mpaka tuchenje pa yindu yine yatukusasagula. Ligongo lyakwe lili lyakuti yindu yikusachengaga. Ana chichi champaka chitukamuchisye kuti tusaguleje chenene yindu?

7. Ana tukusosekwa kuŵenda chichi, soni ligongo chichi?

⁷ Tuŵendeje lunda. Yehofa ŵamsalile Yakobo kulemba kuti, ‘Naga jwine mwa jemanja jwangali lunda amŵende Mlungu, jwakusapeleka kwa mundu jwalijose mwa umbone mtima wakwe, soni mwangamnyosya.’ (Yak. 1:5) Mpaka tujitichisye kuti wosopewe tukusasosechela “lunda.” Myoyo tumŵendeje Yehofa kuti atukamuchisyeje patukusagula yindu soni patukusaka kuchenga yatwasagwile. Pelepo Yehofa chachitukamuchisya kusagula mwalunda.

8. Ana tukusasosekwa kuwungunya yindu yapi mkanitusagule yakutenda?

⁸ Tuwungunyeje mwakwanila. Tuŵalanjeje Baibulo soni mabuku getu, soni twawusyeje ŵandu ŵatukusadalila. (Mis. 20:18) Kutenda yeleyi mpaka kuŵe kwakamuchisya mkanitutende yakusagula mpela kuchenga masengo, kusama, nambosoni kusagula mtundu wa majiganyo kuti tupateje yakusosekwa ya paumi patukutenda utumiki.

9. Ana kutenda yindu mwakuwona mtima kukwete umbone wamtuli?

⁹ Tuchimanyilileje chenene chachitutendekasisye kusagula yinduyo. Yehofa akusamanyilila magongo gatukwete pa yindu yatusagwile. (Mis. 16:2) Jwalakwe akusasaka kuti tuŵeje ŵakuwona mtima pa yindu yosope yatukusatendaga. Myoyo, patukusagula yindu, tukusosekwa kutenda yindu mwakuwona mtima. Naga tukutenda yindu mwangawona mtima, mpaka yiŵe yakusawusya kukwanilisya yindu yatwasagwile. Mwachisyasyo, m’bale jwachinyamata mpaka asagule kuŵa mpayiniya jwakutamilichika. Nambo kwakandaŵi, jwalakwe akulepela kukwanilisya maawala gakusosechela ni ngakusangalala ni upayiniyawo. Komboleka mpaka aganisyeje kuti yakulinga yakwe yakutendela upayiniya yaliji kumsangalasya Yehofa. Nambo mwine yisyesyene yakwe yili yakuti jwatendaga upayiniya pakusaka kwasangalasya achinangolo ŵakwe kapena mundu jwine.

10. Ana chichi champaka chimkamuchisye mundu kuti achenje?

 ¹⁰ Aganichisye ya chisyasyo cha jwakulijiganya Baibulo jwine jwakusaka kuleka kwemba sona. Pandanda, jwalakwe akukombola kuleka kwemba sona kwa wiki jimo atamose kuti yili yakusawusya. Nambo kaneko akutandilasoni kwemba. Pamapeto pakwe akukombola kuleka kwemba sonajo. Pelepatu chinonyelo chakwe kwa Yehofa soni kusachilila kwakwe kumsangalasya Yehofajo ni kwakumkamuchisye jwalakwe kuti akombole kumalana ni ndamo jakweji.—Akolo. 1:10; 3:23.

11. Ligongo chichi tukusosekwa kola yakulinga yisyesyene?

¹¹ Tukoleje yakulinga yisyesyene. Patukukola yakulinga yisyesyene, ni patuchikombolasoni kuyikwanilisya. Mwachisyasyo, mwine mpaka asache kuŵalangaga Baibulo lisiku lililyose. Nambo naga nganakola ndandanda jakuŵalanjila Baibulo, yakulinga yawoyo nganiŵa yikwanilichikwe. * Mwinesoni achakulungwa ŵamumpingo mpaka asache kutendaga maulendo gakuchinga ndaŵi syosyope, nambo mkupita kwandaŵi mpaka yisimanikwe kuti ngakukwanilisya yaŵasakaga kutendayo. Kuti akombole kutenda yaŵalinganyisyeyo, akusosekwa kuliwusya kuti, “Ana tupatile abale ni alongo ŵakusosechela mnope ulendo wakuchinga? Ana tulinganyisye chile ndaŵi jatukusosekwa kwayichila?

12. Ana tukusosekwa kutenda chichi, soni ligongo chichi?

¹² Tuŵeje ŵakusimichisya. Pangali mundu jwakusakola ndaŵi soni machili gakutendela chilichose chakusaka. Myoyo tukusosekwa tumanyilileje chatukutenda. Naga yakomboleka, mpaka tuchenje yindu yatwasagwile yanganituŵa tuyikombwele kuyitenda. (Jwak. 3:6) Tujile kuti wawojo akulolasoni yindu yaŵasagwile, kaneko akuchenga mwine ni mwine, soni akuyiwona sambano kuti chayikombole kuyitenda. Ana mpaka atende wuli? Yindu mcheche yakuyichisyayi mpaka yakamuchisye kuti akombole kumalisya yindu yaŵayitandite kala.

13. Ana mpaka agapate kwapi machili gakwakamuchisya kuti atende yindu mwakamulana ni yaŵasagwile?

¹³ Tuŵendeje machili gakutukamuchisya kutendela yindu. Mlungu mpaka atupe “machili” gakutukamuchisya kutenda soni kwanilisya yatusagwile. (Afil. 2:13, NW) Myoyo tuŵendeje msimu weswela wa Yehofa kuti utupe machili gatukusosechela. Ngatukusosekwa kuleka kupopela atamose yili mkuwoneka kuti mapopelogo gakuchelewa kwanjidwa. Yesu jwasasile kuti, “Mŵende [msimu weswela] ni Mlungu tachimpa.”—Luk. 11:9, 13.

14. Ana maloŵe ga pa Misyungu 21:5, mpaka gatukamuchisye chamtuli kwanilisya yakulinga yetu?

¹⁴ Tutendeje chile pulani. (Aŵalanje Misyungu 21:5.) Kuti amalisye yindu yaŵasagwile, akusosekwa kutenda pulani. Kaneko akusosekwa kutenda yindu mwakamulana ni pulani jawo. Myoyo, akusosekwa kulemba chilichose champaka chakamuchisye kuti akwanilisye yakulinga yawo. Naga akwete masengo gakusawusya gakuti akamule, akusosekwa kugagaŵanya kuti gakasawusya. Yeleyi mpaka yakamuchisye kumanyilila yindu yakombwele kutenda. Paulo jwalimbikasisye Aklistu ŵa ku Kolinto kuti aŵicheje kane kakwe pambali “lisiku lililyose kundanda kwa wiki” mmalo mwakupeleka yindu yawo Paulo ali ayiche. (1 Akoli. 16:2, NW) Kugagaŵanya masengo gakusawusya mpaka kututendekasye kuti tukalipikanaga kuti ngatugakombola masengogo.

15. Ana chichi chakusosekwa kutenda panyuma pakulinganya pulani?

¹⁵ Naga akulemba mapulani gawo, mpaka yiŵe yangasawusya kuyitenda. (1 Akoli. 14:40) Mwachisyasyo, achakulungwa ŵamumpingo akusasalilidwa kuti akusosekwa kusagula jwamkulungwa jwine jwakuti alembeje yalikamulene likuga lya  achakulungwa kuti litende, kupwatikasoni jwachalongolele kapena kutenda yinduyo nambosoni ndaŵi jachachimalisya. Achakulungwa ŵa mumpingo ŵakusakuya dongosolo jeleji akusakombola kwanilisya yindu yalinganyisye. (1 Akoli. 9:26) Mpaka tukamulichisyesoni masengo litala lyeleli patukusagula yindu yine paumi wetu. Mwachisyasyo, mpaka alembe yindu yakusaka kutenda lisiku lililyose, ni kuŵika pandanda yindu yakusaka kuyitanda. Naga akutenda yeleyi, mpaka yiŵe yangasawusya kumalisya yindu yaŵayitandite, nambosoni mpaka ayitende kwandaŵi jamnono.

16. (a) Ana akusosekwa kutenda chichi kuti akwanilisye yakulinga yawo? (b) Ana lilemba lya Aloma 12:11 likusimichisya chamtuli yeleyi?

¹⁶ Tutendeje yindu mwakulipeleka. Pakusasosekwa kulimbichila kuti tukombole kwanilisya mapulani getu. (Aŵalanje Aloma 12:11.) Paulo jwamsalile Timoteo kuti ‘alipelecheje’ soni ‘kupitilisya’ kuŵa jwakwiganya jwambone. Mpaka tukamulichisyesoni masengo maloŵe ga Pauloga payindu yosope yatukusamtendela Yehofa.—1 Tim. 4:13, 16.

17. Ana mpaka tukamulichisye masengo chamtuli Aefeso 5:15, 16, pakusaka kukwanilisya yindu yatusagwile?

¹⁷ Tukamulichisyeje masengo ndaŵi jetu mwalunda. (Aŵalanje Aefeso 5:15, 16.) Tusaguleje ndaŵi jakutendela yindu yatusagwile soni tukachengaga ndaŵijo. Ngatukusosekwa kwamba kutama ni kwembecheya kuti tuchitenda yatukusaka kutenda yindu payichiŵa chenene paumi wetu, ligongo ndaŵi sine ndaŵi mpela jeleji nganijiŵa jipatikene. (Jwak. 11:4) Tusamaleje kuti yindu yangasosekwa mnope yikatujonanjilaga ndaŵi jakutendela yindu yakusosekwa. (Afil. 1:10) Naga yakomboleka, asaguleje ndaŵi jakuti pangali jwampaka ŵasokonasye. Ŵasalileje ŵane kuti ngakusosekwa kwasokonasya. Akumbuchilejesoni kusimisya foni jawo kuti jikasokonasya. *

18-19. Ana chichi champaka chitukamuchisye kukwanilisya yindu yatwasagwile kutenda atamose tusimane ni yakutusokonasya?

¹⁸ Tuganichisyeje mnope yakuyichisya yambone yampaka yipagwe. Yakuyichisya yayikusapagwaga pa chisagula chatwatesile, yikusaŵaga mpela mundu jwakuyiche kumalo kwapiteje. Myoyo naga tukusaka kuti tukayiche kumalo kwatukwawula, tukusasosekwa gambaga kwawula atamose yili yakuti chitupitile msewu wine ligongo lyakuwugalidwa kwa msewu watupitilejewo. Chatukusasaka bola kuja kwika. Mwakamulana ni yeleyi, patukuganichisya mnope ya yakuyichisya yambone yampaka yipagwe ligongo lya yatusagwile, nikuti ngasituchenga nganisyo chitema atamose tusimane ni yakutusokonasya.—Aga. 6:9.

¹⁹ Kutenda yisagula soni kuyikwanilisisya nganijiŵa ngani jamasanje. Nambo ni chikamuchisyo cha Yehofa mpaka apate lunda soni machili gakusosechela kuti akombole kumalisya yindu yiŵayitandite.