Ngani Jakulijiganya 45
Ana Msimu Weswela Ukusatukamuchisya Chamtuli
“Mu yindu yosope, ngusapataga machili kutyochela kwa jwele jwakusamba machili.”—AFIL. 4:13, NW.
NYIMBO 104 Mtuka wa Mlungu wa Msimu Weswela
YACHITULIJIGANYE *
1-2. (a) Ana chichi chachikusatukamuchisya kuti tukomboleje kupilila yakusawusya ya lisiku lililyose? Alondesye. (b) Ana munganiji chitukambilane chichi?
ANA pakwete pasimene ni yakusawusya ni kuliŵechetela maloŵe gakuti, “Ngumanyilila kuti pajika ngamkaningombola kupilila yakusawusyayi”? Ŵajinji mwa m’weji yatutendechele yeleyi. Komboleka twaliŵechetele maloŵega patwaganichisyaga yatwatesile kuti tukombole kupilila yakusawusya mpela ulwele wekulungwa kapena chiwa cha mundu jwatukusamnonyela. Patuganichisya ya chakusawusyacho, tukusalipikana kuti twakombwele kuchipilila ligongo lyakuti msimu weswela wa Yehofa watupele “machili gakupunda gachipagwa.”—2 Akoli. 4:7-9, NW.
2 Tukusasosekwasoni msimu weswela kuti tukombole kulimbana ni yakutendekwa ya m’chilambo chakusakalachi. (1 Yoh. 5:19) Kupwatika pelepa, tukusasosekwasoni machili kuti tukombole kulimbana ni “misimu jakusakala.” (Aef. 6:12) Myoyo, chitukambilane matala gaŵili kuti tulole yawukusatenda msimu weswela pakutukamuchisya pa yakusawusya yosopeyi. Kaneko chitulolesoni yampaka tutende kuti msimu weswela utukamuchisyeje mwakwanila.
MSIMU WESWELA UKUSATUPA MACHILI
3. Ana Yehofa akusakamulichisya masengo litala lyapi pakutukamuchisya kuti tukombole kupilila yakusawusya?
3 Atamose kuti tukusasimana ni yakusawusya, msimu weswela wa Yehofa ukusatupa machili kuti tukombole kutenda masengo getu. Atamose kuti jwasimanaga ni yakusawusya, ndumetume Paulo jwamanyililaga kuti jwakombolaga kumtumichila Yehofa ligongo lyakuti jwadalilaga “machili ga Klistu.” (2 Akoli. 12:9) Paulendo wakwe waŵili wa umishonale, ngaŵa kuti Paulo jwagambaga kulimbichila kulalichilape, jwalakwe jwasosekwagasoni kukamula masengo kuti apateje yakusosechela ya paumi wakwe. Pajwaliji ku Kolinto, jwalakwe jwatamaga kunyumba ja Akwila ni Pulisila. Jemanjaji ŵakamulaga masengo gakutota matenti. Ligongo lyakuti Paulo jwagamanyililagasoni masengoga, masiku gane jwakamulaga nawo yimpepe. (Mase. 18:1-4) Msimu weswela wampele Paulo machili kuti akombole kulalichila soni kulipatila yakusosechela ya paumi.
4. Mwakamulana ni 2 Akolinto 12:7b-9, ana Paulo jwakwete chakusawusya chamtuli?
4 Aŵalanje 2 Akolinto 12:7b-9. Ana Paulo jwagopolelaga chichi mundime syelesi pajwaŵechete kuti jwalagaga ni “chakusoma mpela miŵa m’chilu” mwakwe? Mundu akusapikana kupweteka mnope pajimsomile miŵa. Myoyo Paulo, jwasasile kuti jwapikanaga kupweteka ligongo lya chakusawusya chine chakwe. Jwalakwe jwasasile kuti chakusawusya chelechi chaliji mpela “jwa utenga jwa Satana” ‘akumputa’ jwalakwe mwangalechesya. Ngaŵa kuti Satana soni yiŵanda ni yayatendekasyaga kuti Paulo akole chakusawusya chachaliji mpela miŵa m’chilu mwakwe. Nambo misimu jakusakala pajachimanyi chakusawusya cha Paulo, komboleka jajonjechesyaga chakusawusyacho kuti Paulo apikaneje kupweteka mnope. Yeleyi yaliji mpela kuti jwine akutwinyichisya miŵa kuti jijinjile mnope. Ana Paulo jwatesile chichi?
5. Ana Yehofa jwajanjile chamtuli mapopelo ga Paulo?
5 Pandanda, Paulo jwasakaga kuti Yehofa amtyochesye chakusawusyacho. Jwalakwe jwasasile kuti, “Naŵendile Ambuje [Yehofa] katatu . . . kuti andyochesye chelechi.” Atamose kuti Paulo jwapopesile, chakusawusyacho nganichimala. Ana yeleyi yikugopolela kuti Yehofa nganajanga mapopelo ga Paulo? Iyayi, jwalakwe jwajanjile mapopelogo. Yehofa nganatyosya chakusawusyacho, nambo ŵampele Paulo machili kuti akombole kupilila. Yehofa jwatite, “Machili gangu gakusawoneka kusyesyene kwa ŵandu ŵakulepetala.” (2 Akoli. 12:8, 9) Soni ni chikamuchisyo cha Mlungu, Paulo jwakombwele kupata chisangalalo soni mtendele wamumtima.—Afil. 4:4-7.
6. (a) Ana Yehofa mpaka ajanje chamtuli mapopelo getu? (b) Ana Baibulo jikwete maloŵe gapi gakulimbikasya?
6 Ana pakwete paŵamŵendile Yehofa kuti ŵatyochesye chakusawusya mpela muyaŵelele ni Paulo? Naga panyuma pakupopela kutyochela pasi pamtima ŵayiweni kuti chakusawusyacho ngachikutyoka, ana ŵalipikene kuti Yehofa ngakusangalala ni wawojo? Naga yaliji myoyo, aganichisye chisyasyo cha Paulo chila. Mpela yaŵatite Yehofa pakwanga mapopelo ga Paulo, jwalakwe chachijangasoni mapopelo gawo. Komboleka Yehofa nganaŵa atyosisye chakusawusyacho. Nambo kupitila mwa msimu weswela, jwalakwe mpaka ŵape machili kuti akombole kupilila chakusyawusyacho. (Sal. 61:3, 4) Mpaka ‘tugwisidwe pasi,’ nambo Yehofa ngasatuleka.—2 Akoli. 4:8, 9; Afil. 4:13.
MSIMU WESWELA UKUSATUKAMUCHISYA KUTI TUPITILISYE KUMTUMICHILA YEHOFA
7-8. (a) Ana msimu weswela akuwulandanya chamtuli ni mbungo? (b) Ana Petulo jwasasile kuti msimu weswela ukusakamula masengo chamtuli?
7 Ana msimu weswela ukusatukamuchisya mmatala gane gapi? Msimu weswela mpaka tuwuwanichisye ni mbungo. Liboti mpaka likamulichisye masengo mbungo jajikwawula kumbali jakusaka mundu. Yeleyi mpaka yimtendekasye mundujo kuti akayiche chenene kwakwawulako atamose kuli kwana matumbela gamachili. Mwakulandana ni yeleyi, msimu weswela mpaka utukamuchisye kupitilisya kumtumichila Yehofa mpaka kuja kwinjila m’chilambo chasambano atamose kuti tukusimana ni yakusawusya.
8 Ndumetume Petulo jwamanyililaga chenene maulendo gapanyasa ligongo jwaliji jwakuwulaga somba. Ni ligongo lyakwe jwalakwe jwalandenye mwawukusakamulila masengo msimu weswela ni maulendo ga panyasa. Jwalakwe jwalembile kuti, “Pajatu maloŵe ga ŵakulochesya nganigayika mwa lisosa lya mundu, nambo msimu weswela waŵechetekasisye jemanjajo maloŵe gakutyochela kwa Mlungu.” Liloŵe lya Chigiliki lyaŵaligopolele kuti “waŵechetekasisye” likusagopolela “kulongolela.”—2 Pet. 1:21.
9. Ana Petulo jwagopolelaga chichi kusyesyene pajwasalaga ya “kulongoleledwa”?
9 Ana Petulo jwagopolelaga chichi kusyesyene pajwasalaga ya “kulongoleledwa”? Liloŵe line lya Chigiliki lyakulandana ni lyeleli ŵalikamulichisye masengo Luka juŵalembile buku ja Masengo pakusala ya liboti ‘lyalikulongoleledwa’ ni mbungo. (Mase. 27:15) Namatetule jwa Baibulo jwine jwasasile kuti, Petulo pajwalembaga kuti ŵakulemba Baibulo ŵalongoleledwaga ni msimu weswela, jwakamulichisye masengo maloŵe gakwatendekasya ŵandu kuti aganichisyeje ya kajende kapanyasa. Pelepa Petulo jwasalaga kuti mpela mwayikusaŵela ni mbungo jajikulongolela liboti kuti likayiche kwalikwawula, nombesoni ŵakulochesya soni ŵakulemba Baibulo ŵalongoleledwe ni msimu weswela kuti akombole kutenda masengo gawo. Namatetuleju, jwasasilesoni kuti ŵakulemba Baibulo ŵaliji mpela yinguwo yetambasukule yakamuchisya kuti maboti gajende. Jwalakwe jwatite, “Jemanjaji ŵaliji ŵakoseka kamula masengo gele msimu weswela walongolelaga.” Pelepatu Yehofa jwatesile mbali jakwe. Jwalakwe ŵapeleche “mbungo,” kapena kuti msimu weswela. Nombesoni ŵakulemba Baibulo ŵatesile mbali jawo. Jemanjaji ŵakamwile masengo gaŵasosekwaga kutenda mwakulongoleledwa ni msimu weswela.
SITEPE 1: Tukamuleje mwakutamilichika masengo gatupele Yehofa
SITEPE 2: Tulipelecheje mnope pa yindu yausimu (Alole ndime 11) *
10-11. Ana tukusosekwa kutenda yindu yiŵili yapi kuti msimu weswela utulongoleleje? Apeleche chisyasyo.
10 Yisyene kuti apano Yehofa ngakukamulichisya masengo msimu weswela pakwalongolela ŵandu kulemba Baibulo. Nambope, Yehofa akukamulichisyape masengo msimu weswela pakwalongolela ŵakutumichila ŵakwe. Jwalakwe akutendape mbali jakwe. Ana msimu weswela wa Mlungu mpaka utukamuchisye chamtuli? Tukusosekwa kulolechesya kuti tukutenda mbali jetu. Ana mpaka tutende yeleyi chamtuli?
11 Aganichisye ya chisyasyo achi. Jwakwenda panyasa akusasosekwa kutenda yindu yiŵili kuti mbungo jimkamuchisye. Chandanda, akusasosekwa kulilosya liboti lyakwe kwajikwawula mbungo. Naga jwalakwe ngakwenda mwakamulana ni kwajikwawula mbungo nikuti libotilyo nganiliŵa lijesile. Chaŵili, akusosekwa kulolechesya kuti atambasukwile yinguwo pakwenda. Mwangakayichila, kuti liboti lijende yikusadalila kuti mbungojo jipute yinguwoyo. Mwakulandana ni yeleyi, mpaka tukombole kupitilisya kumtumichila Yehofa naga msimu weswela ukutukamuchisya. Kuti msimu weswela utukamuchisye tukusosekwa kutenda yindu yiŵili. Chandanda, tukusosekwa kutendaga yindu yele msimu wa Mlungu ukwalongolela ŵakutumichila ŵakwe kutenda. Chaŵili, tukusosekwa kutenda yindu yeleyi mwakulipeleka mnope. (Sal. 119:32) Patukutenda yinduyi, msimu weswela uchitututa kapena kuti kutukamuchisya kuti tukombole kupilila yakusawusya mpaka kuja kwinjila m’chilambo chasambano.
12. Ana chitukambilane chichi?
12 Sambano tugaweni matala gaŵili gawukusatenda msimu weswela pakutukamuchisya. Msimu weswela ukusatupa machili soni kutukamuchisya kuŵa ŵakulupichika patusimene ni yakusawusya. Ukusatulongolelasoni mwakutukamuchisya kupitilisya kwenda palitala lyakwawula ku umi wangamala. Sambano chitukambilane yindu mcheche yatukusosekwa kutenda kuti tupinduleje mnope ni msimu weswela.
YATUKUSOSEKWA KUTENDA KUTI TUPINDULEJE MNOPE NI MSIMU WESWELA
13. Mwakamulana ni 2 Timoteo 3:16, 17, ana Maloŵe ga Mlungu mpaka gatukamuchisye wuli, soni m’wejo tukusosekwa kutenda chichi?
13 Chandanda, tulijiganyeje maloŵe ga Mlungu. (Aŵalanje 2 Timoteo 3:16, 17.) Mlungu jwakamulichisye masengo msimu wakwe “pakuŵika” nganisyo syakwe mwa ŵandu ŵakulemba Baibulo. Patukuŵalanga Baibulo soni ganichisya yatuŵalasileyo, pelepo yatuŵalasileyo yikusatamilichika m’mitima jetu. Maloŵe ga Mlunguga gakusatukamuchisya kuti tutendeje yindu yayikusamsangalasya Yehofa. (Aheb. 4:12) Nambo kuti msimu weswela utukamuchisye mnope, tukusasosekwa kupata ndaŵi jakwanila jakulijiganya Baibulo soni ganichisya mnope yatuŵalasileyo. Pelepo Maloŵe ga Mlungugo gakusatukamuchisya pa yosope yatukusaŵecheta soni kutenda.
14. (a) Ligongo chichi mpaka tusale kuti msimu weswela ukusasimanikwa pamisongano jetu ja Chiklistu? (b) Ana msimu weswela mpaka utukamuchisye chamtuli patuli pamisongano?
14 Chaŵili, tumlambileje Mlungu pampepe. (Sal. 22:22) Msimu weswela wa Yehofa ukusasimanikwasoni pamisongano. (Ciw. 2:29) Ligongo chichi tukuŵecheta yeleyi? Ligongo patusongene ni abale achimjetu, tukusaŵendaga msimu weswela soni tukusajimba nyimbo sya Uchimwene sya m’Maloŵe ga Mlungu. Kupwatika pelepa, tukusapikanilasoni malangiso ga m’Baibulo kutyochela kwa abale ŵaŵasagulidwe ni msimu weswela. Soni msimu weswelawu ukusakamuchisya alongo kosechela chenene yisyasyo yakusakola pamisongano. Myoyo, kuti tupinduleje mnope ni msimu weswela patuli pamisongano, tukusosekwa tukosecheleje chenene soni kupeleka ndemanga syakutyochela pasi pa mtima. Yeleyi, yichitukamuchisya kuti patuli pamisongano tupinduleje mnope ni msimu weswela mpela mwayikusaŵela ni liboti lyalikwete yinguwo yetambasukule.
15. Ana msimu weswela ukusatukamuchisya chamtuli patukukamula masengo gakulalichila?
15 Chatatu, tukamuleje masengo gakulalichila. Patukukamulichisya masengo Baibulo pakulalichila soni kwiganya, tukusakunda kuti msimu utulongoleleje. (Alo. 15:18, 19) Kuti tupinduleje ni msimu weswela, tukusosekwa kukamula masengo gakulalichila mwakutamilichika soni kukamulichisyaga masengo Baibulo ndaŵi syosope. Litala limo lyampaka litendekasye kuti masengo getu gakulalichila gaŵe gakamuchisya lili kukamulichisya masengo yisyasyo yakalalichile yayikusasimanikwa m’kabuku ketu ka Undumetume ni Umi Wachiklistu.
16. Ana litala lyangasawusya lyakuwupatila msimu weswela lili lyapi?
16 Chamcheche, tupopeleje kwa Yehofa. (Mat. 7:7-11; Luk. 11:13) Litala lyangasawusya lyakuwupatila msimu weswela lili kumŵenda Yehofa kuti atupe. Pangali chakumlepelekasya Yehofa kuti apikane mapopelo getu kapena kulepelekasya kuti tupochele msimu weswela. Msimuwu mpaka utukamuchisye atamose tuli m’ndende. Soni pangali champaka atende Satana chakutulepelekasya kupochela msimuwu. (Yak. 1:17) Sano, ana tukusosekwa tupopeleje chamtuli kuti tupocheleje msimu weswela? Kuti tujanje chiwusyochi, kwende tukambilane chenene ngani jakwamba lipopelo mwakulola chisyasyo chachikusasimanikwa mu Ngani Syambone sya Luka. *
KUPOPELA MWANGALECHESYA
17. Ana tukulijiganya chichi pangani ja lipopelo kutyochela pa chisyasyo cha Yesu chachikusasimanikwa pa Luka 11:5-9, 13?
17 Aŵalanje Luka 11:5-9, 13. Chisyasyo cha Yesuchi chikusalosya mwampaka tuŵendele msimu weswela. M’chisyasyochi munduju jwapochele yajwasosechelaga “ligongo lya mtawu kapena kuti kulimbichila kuŵenda.” Jwalakwe nganajokopa kumŵenda mjakwejo atamose kuti chaliji chilo mnope. * Ana Yesu jwasasile kuti chisyasyochi chikukamulana chamtuli ni lipopelo? Jwalakwe jwatite, “Mŵende nipo Mlungu tachimpa yimkusaka, msosesose nipo timchisimana, poposyani nipo Mlungu tachimwugulila litanga.” Sano, ana tukulijiganya chichi pachisyasyochi? Kuti tupochele chikamuchisyo cha msimu weswela, tukusosekwa kuŵenda mwangalechesya.
18. Mwakamulana ni chisyasyo cha Yesu, ligongo chichi mpaka tuŵe ŵakusimichisya kuti Yehofa chachitupa msimu weswela?
18 Chisyasyo cha Yesuchi chikusatukamuchisyasoni kulola ligongo lyakwe Yehofa chachitupa msimu weswela. Mundu jwaŵamkolasile Yesu m’chisyasyochi, jwasakaga kuti amsamalile chenene mlendo jwakwe. Jwalakwe jwasakaga kumpa chakulya mlendo jwakwe jwaŵayiche chilo, nambo nganakola chakumpa. Yesu jwasasile kuti mjakwe jwa munduju jwampele chakulya ligongo lyakuŵenda kwakwe mwangalechesya. Ana Yesu jwagopolelaga chichi pelepa? Naga mundu jwangali umlama akusasachilila kumkamuchisya mjakwe jwakusaka chikamuchisyo, nikuti Yehofa jwali Atati ŵetu ŵachanasa chachakamuchisya ŵandu ŵakusaŵenda msimu weswela mwangalechesya. Myoyo ngatukukayichila kuti Yehofa chachijanga mapopelo getu gakuŵenda msimu weswela.—Sal. 10:17; 66:19.
19. Ligongo chichi mpaka tuŵe ŵakusimichisya kuti mpaka tukombole kupilila yakusawusya?
19 Mpaka tuŵe ŵakusimichisya kuti mpaka tukombole kupilila atamose yili yakuti Satana akutulagasya mwangalechesya. Ligongo chichi tukusala yeleyi? Ligongo msimu weswela ukusatukamuchisya m’matala gaŵili. Litala lyandanda, ukusatupa machili kuti tukombole kupilila yakusawusya. Litala lyaŵili, msimuwu uchitukamuchisya kupitilisya kumtumichila Yehofa mpaka kuja kwinjila m’chilambo chasambano. Myoyo kwende tulinjelinjeje kuti tupinduleje mnope ni chikamuchisyo cha msimu weswela.
NYIMBO 41 Chonde Apikane Lipopelo Lyangu
^ ndime 5 Nganiji jikusala yawukusatenda msimu weswela pakutukamuchisya kuti tukombole kupilila yakusawusya. Chitulolesoni yampaka tutende kuti msimu weswela utukamuchisyeje mwakwanila.
^ ndime 16 Kupunda mabuku gosope ga m’Baibulo ga Ngani Syambone, buku ja Luka ni jajikusagombelechesya kuti Yesu jwakuwonaga kupopela kuŵa kwakusosekwa mnope paumi wakwe.—Luka 3:21; 5:16; 6:12; 9:18, 28, 29; 18:1; 22:41, 44.
^ ndime 17 Alole yakwamba maloŵe gakuti “kulimbichila kuŵenda” mu yakamuchisya pakulijiganya mu kabuku ka Undumetume ni Umi Wachiklistu ka Julayi 2018, peji 6.
^ ndime 60 KULONDESYA YIWULILI : SITEPE 1: M’bale ni mlongo ayiche pa Nyumba ja Uchimwene. Mwakusongana ni ŵakulupilila achimjawo, akulimbikasyana pali kumalo kwele msimu wa Yehofa ukusasimanikwa. SITEPE 2: Jemanjaji akosechele kwanga pamisongano. Panasoni yindu yine yayikolasile munganiji yayili mu sitepeji, mpela kuŵalanga Maloŵe ga Mlungu, kamula masengo gakulalichila soni kupopela kwa Yehofa.
