NGANI JAKULIJIGANYA 48
“Meso Genu Galoleje Msogolo”
“Meso genu galoleje msogolo ni chikulupi chisyesyene, mloleje pasogolo ngagalawukagalawuka.”—MIS. 4:25.
NYIMBO NA. 77 Lilanguka M’chilambo Chachipi
YACHITULIJIGANYE *
1-2. Ana mpaka tukuye chamtuli maloŵe gagali pa Misyungu 4:25? Apeleche chisyasyo.
AGANICHISYE yakutendekwa ayi. Mlongo jwachikulile akuganichisya mnope yaŵatiga kusangalala paumi wakwe kalakala ali kamsikana. Atamose kuti apano akusimana ni yakusawusya yejinji paumi wakwe, nambope akutenda yosope yampaka akombole pakumtumichila Yehofa. (1 Akoli. 15:58) Jwalakwe lisiku lililyose akusaliwanichisya ali m’chilambo chasambano yimpepe ni achalongo achimjakwe. Mlongo jwine akukumbuchila yaŵatesile Mklistu mjakwe, yele yayamkuŵesye mnope. Nambope jwalakwe asagwile kuti akatamilaga kuyiganichisya yeleyi. (Akolo. 3:13) Pele m’bale jwine akukumbuchila yakulemwa yaŵatesile kalakala, nambope akutenda yosope yampaka akombole kuti apitilisye kuŵa jwakulupichika kwa Yehofa.—Sal. 51:10.
2 Ana ni yindu yapi yakulandana Aklistu wosope ŵatatuŵa? Wosope akukumbuchila yindu yayatendekwe kalakala. Nambope ngakutamila kuyiganichisya mnope yeleyo. Mmalo mwakwe jemanjaji ‘meso gawo gakulola’ yamsogolo.—Aŵalanje Misyungu 4:25.
3. Ligongo chichi yili yakusosekwa kuti ‘meso getu galoleje’ yamsogolo?
3 Ligongo chichi yili yakusosekwa kuti ‘meso getu galoleje’ yamsogolo? Mundu pakwenda kwawula kusogolo, nganaŵa akombwele kwenda chenenepe naga akutamila kulola yindu yayili munyuma. Mwakulandana ni yeleyi, m’wejisoni mpaka yiŵe yakusawusya kumtumichila chenene Yehofa naga tukusatamila kuganichisya yindu yakala.—Luk. 9:62.
4. Ana chitukambilane chichi munganiji?
4 Munganiji chitukambilane yindu yitatu yayili mpela yitega yampaka yitutendekasye kuti tuganichisyeje mnope yindu yakala. * Yindu yakwe yili (1) kuganichisya mnope yindu yambone yakala, (2) kwasunjila ŵane chakulukosi, soni (3) kulijimba magambo ligongo lya yakulemwa yatwatesile kalakala. Pachitukambilaneje chindu chilichose, chitulole kuti yiwundo ya m’Baibulo mpaka yitukamuchisye kuti ‘tuliŵalileje yindu yamunyuma’ ni kulinjililaga kuti tukayipate ‘yayili msogolo.’—Afil. 3:13.
KUGANICHISYA MNOPE YINDU YAMBONE YAKALA
Ana chichi champaka chitulepelekasye kuti tuŵicheje nganisyo syetu pa yindu yamsogolo? (Alole ndime 5, 9, 13) *
5. Ana lilemba lya Jwakulalichila 7:10, likutukalamusya kuti tukusosekwa kuŵambala chitega chapi?
5 Aŵalanje Jwakulalichila 7:10. Mpaka ayiwone kuti palilembali nganaŵecheta kuti kuli kulemwa kuwusya kuti, “Ana ligongo chichi kalakala yindu yaliji chenene?” Mmalo mwakwe patite, “Mkawusya kuti, ‘Ana ligongo chichi kalakala yindu yaliji chenene kulekangana ni masiku agano?’” Kukumbuchila yindu yambone wuli mtuka wakutyochela kwa Yehofa. Nambope chikusaŵa chitega naga tukuyiwona kuti yindu yaliji chenene paumi wetu kalakala kulekangana ni mwayiŵelele apano soni kuyiwonaga kuti apano pangali chachikwenda ata panandi.
Ana Aisalaeli ŵatandite kutenda yindu yakulemwecheka yapi paŵatyosile ku Iguputo? (Alole ndime 6)
6. Ligongo chichi mpaka uŵe ungali lunda naga tukusatamila kuganisya kuti umi wetu waliji chenene kalakala? Apeleche chasyasyo.
6 Ligongo chichi wuli ungali lunda ganisya kuti kalakala yindu yaliji chenene mnope paumi wetu? Kutenda yeleyi kuli kwakogoya ligongo mpaka kutendekasye kuti tugambeje ganichisya yindu yambonepe yayatendekwaga paumi wetu ni kuliŵalila kuti pandaŵijo twasimanagasoni ni yakusawusya. Mwachisyasyo aganichisye ya Aisalaeli. Jemanjaji ali agambile kutyoka ku Iguputo, ŵaliŵalile yakusawusya yosope yaŵasimanaga nayo pandaŵi jiŵaliji m’chilambocho. Mmalo mwakwe ŵatandite kuganichisya mnope ya yakulya yambone yaŵasangalalaga nayo pandaŵi jiŵaliji ku Iguputo. Jemanjaji ŵatandite kuŵecheta kuti, “Mu Iguputo twasyoŵelele kulya somba syamitundumitundu sitwasisosaga, nipo nganitusumaga kose. Aganichisye mangaka, matichiti ni anyesi jwamitundu jitatu jula.” (Num. 11:5) Nambo ana yili yisyene kuti jemanjaji ŵayipataga mwalulele yakulya yeleyi? Yawunani. Pajatu jemanjaji ŵapataga yakulyayi mwakwakamulisya masengo mwangasa ligongo ŵaliji achikapolo. (Eks. 1:13, 14; 3:6-9) Myoyo jemanjaji ŵaliŵalile masengo gosope gakupweteka gaŵakamulaga ku Iguputo. Mmalo mwakuti aganichisye yindu yambone yaŵatendele Yehofa, ŵatandite ganisya kuti umi wawo waliji chenene pandaŵi jiŵaliji ku Iguputo. Yaŵatendagayi, yamsakalisye mnope Yehofa.—Num. 11:10.
7. Ana chichi chachamkamuchisye mlongo jwine kuti akagambaga kutamila ganisya yindu yayamtendechele kalakala?
7 Ana mpaka tuŵambale chamtuli kuganichisya mnope yindu yambone yakala? Aganichisye chisyasyo cha mlongo juŵatandite kutumichila ku Beteli ja ku Brooklyn mu 1945. Pali papitile yaka, jwalakwe jwalombedwe ni m’bale jwine juŵatumichilagasoni pa Beteli. Jemanjaji ŵaŵele ali mkutumichila yimpepe kwa yaka yejinji. Nambope mu 1976, m’balejo ŵatandite kulwala. Mlongoju jwasasile kuti ŵamkwakwe paŵamanyilile kuti asigele panandi kuwa, ŵamsalile yampaka yimkamuchisye kumalana ni kulagasika nganisyo ligongo lyakuti chasigale jikape. M’baleju jwatite, “Tuŵele tuli mkusangalala mnope mwiŵasa mwetu. Nambo ŵandu ŵajinji nganasangalaleje myiyi. Myoyo mkatamilaga ganisya yindu yakala, atamose kuti ndaŵi sine chimkumbuchilejepe yeleyi. Nambope ndaŵi pajimaleje, chanasa chenu chichitanda kunandipa. Mkadandawulaga mnope ligongo lya yayimtendechele. Mŵeje ŵakusangalala ligongo lya yindu yatuŵele tuli mkutenda patutumichileje yimpepe Yehofa. . . . Kukumbuchila yeleyi wuli mtuka watupele Yehofa.” Ana wawojo ngakwitichisya kuti gelega gali maloŵe gakamuchisya?
8. Ana yaŵatesile mlongo jwine pakuŵambala kuganichisya mnope yindu yakala yamkamuchisye chamtuli?
8 Mlongoju ŵakuyiye yaŵasasile ŵamkwakweŵa. Jwalakwe ŵapitilisye kumtumichila Yehofa mwakulupichika mpaka pandaŵi jiŵawile ali ni yaka 92. Mlongoju mkanawe jwaŵechete kuti, “Pangukumbuchila yaka yakwana 63 yambele ndili mkutumichila Yehofa munyumamu mu utumiki wandaŵi syosope, nguyiwona kuti mbele ndili mkusangalala kwabasi.” Jwalakwe jwasasile ligongo lyakwe pajwatite, “Chachikusatendekasya kuti umi wetu uŵe ŵakusangalasya mnope chili mkamulano wawuli pasikati pa ŵandu ŵa Yehofa soni chembecheyo chatukwete chakutama m’chilambo chasambano ni abale ni alongo, soni kuti tuchimtumichila Yehofa mpaka kalakala. Jwalakwe ali Mlungu jusyesyene soni jwaŵatupanganyisye.” * Mlongoju ali chisyasyo chambone pangani jakuganichisya mnope ya yindu yamsogolo yaŵasasile Yehofa kuti chachitutendela.
KWASUNJILA ŴANE CHAKULUKOSI
9. Ana lilemba lya Lefitiko 19:18, likulosya kuti ŵani ŵakusaŵa ŵangasawusya kwasunjila chakulukosi?
9 Aŵalanje Lefitiko 19:18. Ndaŵi syejinji yikusaŵa yangasawusya kwasunjila ŵane chakulukosi, mnopemnope naga mundu jwaŵatukuŵesyejo ali Mklistu mjetu, jwachibale jwetu kapena mjetu jwapamtima. Mwachisyasyo, mlongo jwine ŵamlambuchisye mjakwe kuti amjiŵile mbiya. Kaneko msyene mbiyajo ŵampepesye mjakwe juŵamlambuchisyejo. Nambope mjakwejo nganaleka kuganichisya yakumlambuchisya kwiŵa mbiyayo atamose kuti ŵampepese. Ana wawojo pakwete pasimene ni yindu yakulandana ni yeleyi? Komboleka kuti m’weji nganitusimaneje ni yindu mpela yeleyi. Nambo ŵajinjiwe mwine pakwete patutumbile ni yindu yaŵatutendele ŵane mwamti tukusasunjilape chakulukosi mpaka lelo.
10. Ana chichi champaka chitukamuchisye ŵane patutumbilikasisye?
10 Ana chichi champaka chitukamuchisye ŵane patutumbilikasisye? Tukusosekwa tukumbuchileje kuti Yehofa akusalola yosope yayikutendekwa. Jwalakwe akusamanyilila yindu yosope yatukusimana nayo, kupwatikasoni yindu yangali chilungamo yakusatutendela ŵane. (Aheb. 4:13) Jwalakwe yikusamkwaya mnope patukulagasika. (Yes. 63:9) Yehofa akusatusalilasoni kuti chachityosya yakusawusya yosope yatukusimana nayo ligongo lya yindu yangali chilungamo yaŵatutendele ŵandu ŵane.—Chiw. 21:3, 4.
11. Ana kuleka kwasunjila ŵane chakulukosi kukwete umbone wamtuli?
11 Tukusosekwa kukumbuchila kuti patulesile kwasunjila ŵane chakulukosi, yikusatukamuchisyagasoni m’wejo. Yeleyi ni yaŵayiwenisoni mlongo juŵamlambuchisye kwiŵa mbiya jula. Pali papitile ndaŵi, ŵakombwele kumkululuchila mjakwe jula mwamti nganamsunjilasoni chakulukosi. Jwalakwe jwamanyilile kuti patwakululuchile ŵane, Yehofa akusatukululuchilasoni. (Mat. 6:14) Mlongoju jwamanyilile kuti yajwatesile mjakwe jula yaliji yakulemechekwa nambo jwasagwile kuti agambe kuyileka. Yeleyi yamkamuchisye mlongoju kuŵa jwakusangalala soni kuŵika nganisyo syakwe pakumtumichila Yehofa.
KULIJIMBA MAGAMBO PA YAKULEMWA YAKALA
12. Ana tukulijiganya chichi pa maloŵe gagali pa 1 Yohane 3:19, 20?
12 Aŵalanje 1 Yohane 3:19, 20. Ngani jakulijimba magambo nganijiŵa jachilendo. Mwachisyasyo, ŵandu ŵane akusalijimba magambo ligongo lya yakulemwa yaŵatesile kalakala mkanalijiganye usyesyene. Ŵanesoni akusalijimba magambo ligongo lya yakulemwa yaŵatesile panyuma pakubatisidwa. Elo, yosopeyi nganiyiŵa yachilendo. (Alo. 3:23) Yili yisyene kuti tukusasaka kutenda yindu yayili yambone. Nambope paja “wosopewe tukusalemwa” ndaŵi syejinji. (Yak. 3:2; Alo. 7:21-23) Atamose kuti kulijimba magambo ngakusasangalasya, nambope kukwete umboni wakwe. Yili myoyo ligongo kukusatukamuchisya kuti tulinganye yakulemwechekayo soni kuŵa ŵakusimichisya kuti ngasitutandilasoni.—Aheb. 12:12, 13.
13. Ligongo chichi tukusosekwa kuŵambala kulijimba magambo mnope ligongo lya yakulemwa yatwatesile kalakala?
13 Ndaŵi sine mpaka yisimanikwe kuti tukulijimbape magambo mwakupundanganya ligongo lya yakulemwa yatwatesile kalakala atamose kuti twapitikwiche mtima soni Yehofa ŵatukululuchile. Kulijimba magambo mpela kweleku kuli kwakogoya mnope. (Sal. 31:10; 38:3, 4) Ligongo chichi tukuti myoyo? Aganichisye chisyasyo cha mlongo juŵalagaga ni kulijimba magambo ligongo lya yakulemwa yaŵatesile munyuma. Jwalakwe jwatite, “Ngusalipikana kuti ngangusosekwa kulipeleka mnope pa kumtumichila Yehofa ligongo ngasingulupuka.” Komboleka kuti ŵane mwa m’weji tukusalipikanasoni mpela mlongoju. Myoyo tukusosekwa kusamala kuti tukalijimbaga mnope magambo ligongo lya yakulemwa yatwatesile kalakala. Tukusosekwa kutenda myoyo ligongo Satana mpaka aŵe jwakusangalala mnope naga tukuleka kumtumichila Yehofa. Tumanyililejesoni kuti Yehofa akupitilisyape kutunonyela.—Alolesoni 2 Akolinto 2:5-7, 11.
14. Ana mpaka tusimichisye chamtuli kuti Yehofa akusatunonyelape?
14 Ndaŵi sine mpaka tuliwusyeje kuti, ‘Ana mpaka manyilile chamtuli kuti Yehofa akupitilisyape kunonyela?’ Nambotu kuliwusya chiwusyo chelechi, ukusaŵaga umboni wakulosya kuti Yehofa akwanonyelape. Yaka yayipiteyo, Sanja ja Mlonda jasasile kuti, “Ndaŵi sine mpaka yisimanikwe kuti atesile ndamo sine syakusakala syaŵatendaga kalakala. . . . Nambope ngakusosekwa kwasa mtima. Akaganisyaga kuti ŵatesile ulemwa wele Yehofa nganaŵa ali ŵakululuchile. Satana ni jwakusasaka kuti aganisyeje mwalitala lyeleli. Naga akusalitendela chanasa ligongo lya yindu yaŵatesile, uli umboni wakuti wawojo ali mundu jwambone, soni kuti Yehofa mpaka ŵakululuchile. Akusosekwa aŵe mundu jwakulinandiya soni amŵendeje Yehofa kuti ŵakululuchile soni kuti ŵakamuchisye kola chikumbumtima chambone. Ajawule kwa jwalakwe mpela mwakusatendela mwanache jwakwawula kwa babagwe pandaŵi jasimene ni yakusawusya. Yehofa mpaka ŵape wawojo chikamuchisyo chakusosechela ligongo jwalakwe ali jwambone mtima.” *
15-16. Ana ŵandu ŵane akusalipikana wuli pamanyilile kuti Yehofa nganiŵajasa?
15 Ŵandu ŵa Yehofa alimbikasidwe mnope pakumanyilila kuti Yehofa nganiŵajasa. Mwachisyasyo, m’yaka yayipiteyo, m’bale jwine yamkwayiye mnope ali aŵalasile yayamtendechele mundu jwine mungani syakuti, “Baibulo Jikusachenga Umi wa Ŵandu.” Munganiji, mlongo jwine jwasasile kuti ligongo lya yindu yine yaŵatesile paumi wakwe, akusayiwona kuti Mlungu nganaŵa amnonyele ata panandi. Jwalakwe jwalagagape ni nganisyo syelesi kwa yaka yejinji kutyochela paŵabatisidwe. Kaneko paŵaganichisye ya mbopesi jakutuwombola, jwachenjile kaganisye kakwe. *
16 Ana yaŵaŵalasile m’baleju yamkamuchisye chamtuli? Jwalakwe jwatite, “Panaliji mwanache nanonyelaga kulolela yakuŵagula, mwamti yaliji yakusawusya kuti ndeche. Nambo kaneko pali papitile ndaŵi naŵendile chikamuchisyo kutyochela kwa achakulungwa ŵamumpingo, mwamti panandipanandi natandite kuleka kulolela yakuŵagula. Achakulungwaŵa ŵasimichisye kuti Mlungu akusanonyela soni akusandendela chanasa. Ndaŵi sine ngusalipikana kuŵa jwangasosekwa, soni kuti Yehofa ngaŵa mkunonyela ata panandi. Nambo kuganichisya ya chisyasyo cha mlongo jula kwangamuchisye kwabasi. Apano nguyiwona kuti nganisyo syakuti Yehofa nganaŵa angululuchile ata panandi, yili mpela nguŵecheta kuti mbopesi jakutuwombola jaŵapeleche Mwanache jwakwe jili jangakwanila kutyosya ulemwa wangu. Najisunjile ngani janaŵalasileji ni chakulinga chakuti najiŵalanjeje pasiyiche nganisyo syakulipikana kuŵa jwangasosekwa.”
17. Ana chichi chachamkamuchisye Paulo kuŵambala kulijimba mnope magambo ligongo lya yakulemwa yaŵatesile kala?
17 Yakutendekwa mpela yeleyi yikutukumbusya yaŵasimene nayo ndumetume Paulo. Jwalakwe mkanaŵe Mklistu, jwatesile yakulemwa yejinji yekulungwakulungwa. Paulo ŵakumbuchilaga yaŵatesileyi nambope nganatamilaga kuyiganichisya mnope yeleyi. (1 Tim. 1:12-15) Jwalakwe ŵakulupililaga kuti Mlungu mpaka amkululuchile yakulemwa yakwe ligongo lya mbopesi jaŵapeleche Yesu. Soni ŵajiwonaga mbopesiji kuŵa mtuka waŵampele Mlungu. (Agal. 2:20) Yeleyi yamkamuchisyaga Paulo kuŵambala kulijimbaga magambo mnope ligongo lya yakulemwa yaŵatesile kala. Jwalakwe jwaŵikaga nganisyo syakwe syosope pakumtumichila Yehofa.
AGANICHISYEJE YA CHILAMBO CHASAMBANO
Tuŵe ŵakusimichisya kuganichisya ya chilambo chasambano (Alole ndime 18-19) *
18. Ana tulijiganyisye chichi munganiji?
18 Ana tulijiganyisye chichi munganiji? (1) Kukumbuchila yindu yakala wuli mtuka wakutyochela kwa Yehofa. Nambope atamose kuti kala umi wetu waliji chenene, tukusosekwa tumanyilile kuti umi wetu uchiŵa wambone mnope m’chilambo chasambano. (2) Ŵandu ŵane mpaka atukuŵasye, nambo naga tukwakululuchila, yichitukamuchisya kuti tuŵicheje nganisyo syetu pakumtumichila Yehofa. (3) Kulijimba magambo mnope ligongo lya yakulemwa yakala, mpaka kututendekasye kuti tukasangalalaga patukumtumichila Yehofa. Mpela mwaŵatendele Paulo, tukulupilileje kuti Yehofa ŵatukululuchile.
19. Ana tukumanyilila chamtuli kuti m’chilambo chasambano ngasitulijimbaga magambo ligongo lya yindu yakala?
19 Tukwembecheya kutama ni umi mpaka kalakala m’chilambo chasambano soni ngasitulijimbaga magambo ni yindu yakala. Pakwamba ya ndaŵi jeleji, Baibulo jikusati, “Yiyatendeche kalakala ngasayikumbuchila soni, tiyichiliŵalichika nditu.” (Yes. 65:17) Agambe ganisya, ŵane mwa m’weji tuchekulwipe tuli mkutumichila Yehofa. Nambo m’chilambo chasambano tuchiŵasoni ŵachinyamata ni kumtumichilaga Yehofa. (Yob. 33:25) Myoyo, kwende wosope tusimichisye mtima kuti tukuŵambaleje kutamila ganichisya mnope yindu yakala. Mmalo mwakwe tuganichisyeje ya chilambo chasambano, nikutendaga yampaka tukombole kuti tukasimanikwe m’chilambocho.
NYIMBO NA. 142 Tulimbisyeje Chembecheyo Chetu
^ ndime 5 Yikusaŵa chenene kukumbuchila yindu yayatendekwe paumi wetu kalakala. Nambope ngatukusosekwa kuganichisya mnope yindu yakalayi mpaka kuliŵalila yindu yambone yayikutendekwa apano soni yine yatukwembecheya kusogoloku. Munganiji chitukambilane yindu yitatu yampaka yitutendekasye kuti tuganichisyeje mnope yindu yakala. Chitukambilanesoni yisyasyo ya m’Baibulo yampaka yitutendekasye kuti tukaganichisyaga mnope yindu yakala.
^ ndime 4 YAGAKUGOPOLELA MALOŴEGA: Munganiji maloŵe gakuti “kuganichisya mnope yindu yakala,” gakugopolela kutamila kuganichisya mwayaŵelele yindu paumi wetu kala, kutamila kuŵecheta ya yinduyo, kapena kuganisyaga kuti umi wetu waliji wambone kalako kulekangana ni masiku agano.
^ ndime 8 Alole Sanja ja Mlonda ja Julayi 1, 2004, peji 23-29.
^ ndime 14 Alole Sanja ja Mlonda ja Febuluwale 15, 1954, peji 123.
^ ndime 15 Alole Sanja ja Mlonda ja Ogasiti 1, 2011, peji 20-21.
^ ndime 59 KULONDESYA YIWULILI: Kuganichisya mnope yindu yambone yakala, kwasunjila ŵane chakulukosi, soni kulijimba magambo ligongo lya yakulemwa yatwatesile kalakala mpaka yitulepelekasye kwenda chenene pa litala lyakwawula ku umi wangamala.
^ ndime 66 KULONDESYA YIWULILI: Patulesile kuganichisya mnope yindu yampaka yituwujikasye munyuma, tukusatanda kusangalala soni tukusakola machili. Kaneko tukusatanda kuganichisya mnope ya yindu yamsogolo.
