ABALE ni alongo ŵajinji ŵaŵasamile ku yilambo yakusichila, aganisisye yakuwujila kumangwawo. Ligongo lyakumnonyela kwawo Yehofa soni ŵandu, jemanjaji asamile ku madela gagakusosechela ŵakulalichila ŵajinji. (Mat. 22:37-39) Ana jemanjaji ŵalijimile yindu yapi, soni ŵapatile upile wamtuli? Kuti tupate kwanga kwa yiwusyoyi, kwende tulole yaŵatesile abale ku Cameroon.

Mu 1998 m’bale Onésime jwatyosile m’chilambo chakumangwawo cha Cameroon. Kwa yaka 14 ŵaŵele ali mkutama m’chilambo chine. Lisiku line ali kumisongano ŵapikanile ngani jajasalaga ya chisyasyo chakwamba masengo gakulalichila. Jwakuŵecheta ngani jwasasile kuti, “Tuwanichisye kuti ŵandu ŵaŵili akuwulaga somba pa malo gakulekangana, kaneko jumo jukuwulaga somba syejinji kumpunda mjakwejo. Ana jwakuwulaga somba sya mnono jula nganaŵa apite kukuwulaga somba pamalo pali mjakwe jula?”

Chisyasyochi chamtendekasisye Onésime kuganichisya yakuwujila ku Cameroon kwele ŵandu ŵajinji ŵasakaga kulijiganya Baibulo. Nambope papali yakusawusya yine. Jwalakwe jwalikayichilaga naga chakakombole kutenda yindu mpela mwaŵatendelaga pandanda, ligongo paliji pali papite yaka yejinji chityochele ku Cameroon. Jwalakwe jwapite kukutama ku Cameroon kwa miyesi 6 pakusaka kumanyilila naga mpaka akombole kutama m’chilambochi. Kaneko mu 2012 ŵasamile chosope.

Onésime jwatite, “Nasosekwaga kusyoŵelela nyengo jachitukuta soni katame ka kumaloko. Ku Nyumba ja Uchimwene nasosekwagasoni kusyoŵelela kutama pa mpando wamatabwa. Nambo panatendaga chidwi ni kupikanila misongano yakuti ndemi pa mpando wamatabwa yaliŵalichikaga.”

Mu 2013, Onésime ŵalombene ni Géraldine juŵatemi ku France kwa yaka 9 kaneko ni kuwujila ku Cameroon. Ana Yehofa ŵapele upile wamtuli jemanjaji ligongo lya kukuwona kumtumichila jwalakwe kuŵa kwakusoseka mnope paumi wawo? Onésime jwatite, “Wosope twatesile nawo Sukulu ja Ŵakulalichila ya Uchimwene kaneko twatandite kutumichila pa Beteli. Pali papite chaka, ŵakulijiganya Baibulo ŵakwana 20 ŵamumpingo mwetu ŵabatisidwe. Apano ngusalipikana kuti ndili pamalo gambone ‘gakuwulajila somba.’” (Maliko 1:17, 18) Nombe Géraldine jwatite, “Mbatile yindu yejinji yanganijembecheyaga.”

Judith jwapite kukutama ku United States, nambope jwalakwe jwasakaga kutenda yejinji pakumtumichila Yehofa. Jwalakwe jwatite, “Pambite ku Cameroon kukwalola ŵandu, pakutyoka nalilaga pakuyiwona kuti ngulekangana ni ŵandu wosope ŵanajiganyaga Baibulo.” Atamose yaliji myoyo, Judith nganasakaga kusamila ku Cameroon. Jwalakwe jwakamulaga masengo mwamti ŵapochelaga mbiya syejinji syasyamkamuchisyaga pakwasamalila babagwe ŵaŵaliji mkulwala. Nambope Judith ŵamdalile  mnope Yehofa mwamti kaneko ŵasamile ku Cameroon. Jwalakwe jwasasile kuti jwayisoŵile yindu yaŵasangalalaga nayo pandaŵi jaŵaliji ku United States. Judith jwapopesile kwa Yehofa kuti amkamuchisye kuchenga kaganisye kakwe, soni jwakulolela dela ni ŵamkwakwe ŵamkamuchisye mnope.

Pakukumbuchila mwayaŵelele yindu pandaŵi jaŵasamile ku Cameroon, Judith jwatite, “Pakumala kwa yaka yitatu naliji jwakusangalala ligongo lyakuti nakamuchisye ŵandu mcheche kulijiganya Baibulo.” Kaneko Judith jwatandite kutumichila mpela mpayiniya jwapadela. Apano jwalakwe akutumichila yimpepe ni ŵamkwakwe Sam-Castel mpela ŵakulolela dela. Nambo ana yamasile uli ni baba ŵawo Judith ŵala? Judith pampepe ni ŵachibale ŵakwe ŵakombwele kupata mbiya syakwajigalila baba ŵawo kuchipatala cha m’chilambo chine kwele kwaŵatesile opaleshoni. Chakusangalasya chili chakuti opaleshoniji jakombweleche.

M’bale Victor jwapite kukutama m’chilambo cha Canada. Ali aŵalasile Sanja ja Mlonda jajasalaga ya majiganyo gapenani, jwalakwe jwaganichisye chenene ya majiganyo gaŵatendaga. Jwalakwe jwalesile majiganyo ga ku yunifesite ni jwatandite kulijiganya pa sukulu jine jakwiganya masengo gapayala. Victor jwatite, “Yanalijiganyisye pa sukuluji yangamuchisye kuti mbate masengo mwangasawusya soni napataga mpata ŵakutenda upayiniya.” Pali papite ndaŵi, Victor jwalombele Caroline, kaneko jemanjaji ŵapite kukwalola ŵandu ku Cameroon. Jemanjaji ŵapite kukulola ofesi ja nyambi ja ku Cameroon, ali kweleko abale ŵalimbikasisye kuti aganichisye yakutumichila m’chilambochi. Victor jwatite, “Ali atusalile yeleyi nganitukana, ligongo pandaŵiji twaliji tuli tusagwile kala kuti tukakola yindu yejinji.” Atamose kuti pandaŵiji Caroline nganasimanaga chenene mchilu, nambope ŵasagwilepe yakutenda utumikiwu.

Victor ni Caroline ŵatandite upayiniya wakutamilichika pakusaka kwakamuchisya ŵandu ŵajinji m’chilambochi. Jemanjaji ŵasunjile mbiya syakwanila ni chakulinga chakuti akaja kwichila kamula masengo. Kuti akombole kupata mbiyasi, jemanjaji ŵakamwile masengo ku Canada kwa miyesi jamnono kaneko ŵapite ku Cameroon kukupitilisya upayiniya. Ana jemanjaji ŵapatile yindu yambone yapi? Jemanjaji ŵajinjile nawo Sukulu ja Ŵakulalichila ya Uchimwene, ŵatumichile mpela apayiniya ŵapadela, soni apano akukamula masengo ga yakutaŵataŵa. Victor jwasasile kuti, “Pandaŵi jatwatyosile ku Canada twamdalile mnope Yehofa kuti atukamuchisyeje ligongo umi wetu wachenjile, soni jwalakwe aŵele ali mkutusamalila.”

Mu 2002, Alain, juŵalijiganyaga pa yunifesite jine ku Germany, jwaŵalasile kapepala ka kuti Achinyamata—Kodi Moyo Wanu Mudzaugwiritsa Ntchito Bwanji? Yaŵaŵalasile mukapepalaka yamtendekasisye kuti akole yakulinga yakumtumichila Mlungu. Mu 2006, ŵajinjile mu Sukulu Jakwiganya Undumetume mwamti kaneko ŵamtumisye ku Cameroon kwakwaliji kumangwakwe.

Alain paŵaliji ku Cameroon ŵapatile masengo gaŵakamulaga kwa maawala gamnono. Kaneko ŵapatile masengo gambiya syejinji nambo yeleyi ŵayiweni kuti mpaka yimmalileje ndaŵi jakwe jakutendela utumiki. Pandaŵi jaŵamŵendile kuti akatumichile mpela mpayiniya jwapajika jwalakwe nganakana. Abwana ŵakwe ŵamsalile kuti chamjonjechesye malipilo, nambope Alain jwakanile pakusaka kuti atande upayiniya wapadela. Kaneno Alain jwalombene ni Stéphanie, jwele juŵatemi ku France kwa yaka nditu. Ana Stéphanie jwasimene ni yakusawusya yamtuli paŵaliji ku Cameroon?

Stéphanie jwatite, “Natandite kusimana ni yakusawusya yine mchilu mwangu, nambope napataga chikamuchisyo cha mtela chachangamuchisyaga  kuti nalipikaneje chenene.” Liŵasali lyapatile yindu yambone ligongo lya kupilila kwawo. Alain jwatite, “Patupite kukulalichila kumusi wine wakolanjidwa kuti Katé, twasimanaga ni ŵandu ŵaŵasachililaga kulijiganya Baibulo. Kaneko twatandite kulijiganya Baibulo ni jemanjaji pakamulichisya masengo foni. Ŵandu ŵaŵili ŵatwajiganyaga Baibulo ŵabatisidwe mwamti kaneko kudelaji kwapali kagulu ka ŵakulalichila.” Nombe najo Stéphanie jwasasile kuti, “Yikusaŵa yakusangalasya mnope kwawona ŵandu ŵamwajiganyisye Baibulo ali mkulipeleka kwa Yehofa soni kubatisidwa. Kutumichila ku Cameroon kuŵele kuli mkutukamuchisya kuti tuŵeje ŵakusangalala kwa ndaŵi syejinji.” Apano Alain ni Stéphanie ali ŵakulolela dela.

Gisèle jwabasitidwe pandaŵi jaŵaliji kumajiganyo ga yachipatala ku Italy. Liŵasa line lya apayiniya lyalyamjiganyaga Baibulo lyamlimbikasisye mnope, mwamti yeleyi yamtendekasisye kola nganisyo syakutenda utumiki. Gisèle jwatandite upayiniya ŵakutamilichika ali amalisisye majiganyo gakwe ga yachipatala.

Gisèle jwasachililaga kuwujila kumangwakwe ku Cameroon kuti akamtumichileje Yehofa mwakwanila, nambope papali yakusawusya yine. Jwalakwe jwatite, “Nasosekwaga kuleka kumanyika kuti ndili jwa ku Italy soni kwaleka achimjangu ni ŵachibale ŵane ŵaŵatamaga ku Italy.” Atamose yaliji myoyo, mu Meyi 2016, Gisèle jwapitepe ku Cameroon. Pali papitile ndaŵi Gisèle ŵalombene ni Léonce. Ofesi ja Nyambi ja ku Cameroon ŵalijitichisye liŵasali kuti lijawule ku tawuni ja Ayos kwakwaliji kudela jajasosechelaga ŵakulalichila ŵajinji.

Ana yindu yaliji uli ku Ayos? Gisèle jwatite, “Kwa masiku gejinji kwaliji kuli kwangali magesi mwamti ma foni getu gatamaga gali gangali moto. Nalijiganyisye kutelechela sasu, soni chilo pakwawula kukuteka mesi twajigalaga wilibala ni tochi ligongo chilochi kwaŵaga kuli kwangali ŵandu ŵajinji.” Ana chichi chachakamuchisye jemanjaji kupilila yakusawusya yeleyi? Gisèle jwatite, “Msimu wa Yehofa watukamuchisye kuti tupilile. Ŵamkwangu ŵangamuchisyagasoni mnope, ŵachibale soni achimjetu ŵatulimbikasyaga mwamti ndaŵi sine ŵatupaga mbiya. Kusala yisyene yeleyi yatukamuchisye mnope.”

Ana mpaka tujile kuti Gisèle ali jwakusangalala ligongo lyakuti ŵawujile ku chilambo chakumangwakwe? Gisèle jwasasile kuti, “Tuli ŵakusangalala mnope. Ndaŵi sine twasimanaga ni yakusawusya soni yindu yangalimbikasya nambo patukombwele kumalana ni yindu yeleyi, une ni ŵamkwangu twalipikanaga kuti twatesile yindu yatwasosekwaga kuti tuyitende. Apano tukusamdalila mnope Yehofa soni tukusalipikana kuti tuli najo paunasi wambone.” Léonce ni Gisèle ŵajinjile Sukulu ja Ŵakulalichila ya Uchimwene, mwamti apano akutumichila mpela apayiniya ŵapajika ŵakandaŵi.

Mpela jwakuwulaga somba jwakusapilila nyengo syakusawusya pakusaka kuwulaga somba syejinji, nombe nawo ŵandu ŵakusawujila ku yilambo yakumangwawo, akusalijima yindu yejinji pakusaka kwakamuchisya ŵandu ŵakusakola mtima wakupikanila utenga wa Uchimwene. Yehofa ngasiŵaliŵalila ŵakulalichila ŵakulipelekaŵa ligongo lya chinonyelo chaŵele ali mkuchilosya pa lina lyakwe. (Neh. 5:19; Aheb. 6:10) Naga wawojo akutama m’chilambo chine nambo apikene kuti m’chilambo chakumangwawo mukusosechela ŵakulalichila ŵajinji, ana ali ŵakoseka kuwujila kumangwawoko? Naga akutenda yeleyo Yehofa chachapa upile wekulungwa.—Mis. 10:22