Ana akusasaka kupata mfundo syakamuchisya pakulijiganya pajika? Mpaka alinje kutenda yakuyichisyayi kuti yakamuchisye kuŵika nganisyo syawo pa ngani syakulijiganya:

• Asaguleje malo gambone. Naga yakomboleka, apateje malo gelinganye chenene soni pamalopo paŵe pakuti pana lilanguka. Mpaka yiŵe chenenesoni kutama pamalo pakuti pana tebulo kapena mpaka akatame pamalo gambone pasa.

• Atameje pajika. Yesu jwalinganyaga ya kupopela “chakumasikusiku” soni “Kumalo kwajika.” (Maliko 1:35) Naga yili yakusawusya kutama pajika, mpaka atende chenene kwamanyisya ŵandu ŵa mwiŵasa mwawo kapena achimjawo ŵakusatamaga nawo kuti atendeje yindu mwakwaganichisya pandaŵi jakusaka kulijiganya.

• Aŵambaleje yakusokonasya. Naga akukamulichisya masengo foni kapena tabuleti pakulijiganya, ajitendeje kuti jikasokonasya. Naga pandaŵi jakulijiganya akusosekwa kutenda yineyakwe, agambeje kuyilemba panepakwe kuti chakumbuchile kuyitenda ndaŵi jine. Naga atandite kupela, mpaka atende chenene kupumulila panandi kapena kongola ngongolo kwene.