ANA ndaŵi sine akusalaga kuti alijiganyeje Baibulo ndaŵi syosope soni kusangalala pakulijiganya? Ndaŵi sine wosopewe yikusatutendechela yeleyi. Nambo aganichisye ya yindu yine yatukusatendaga ndaŵi syosope, mpela koga. Kuti mundu amalisye koga yikusajigala ndaŵi soni pakusasosekwa kulipeleka. Nambo ana tukusapikana uli patumalisisye koga? Nombe nako kulijiganya Baibulo kuli mpela ‘koga ni mesi, gagali Maloŵe ga Mlungu.’ (Aef. 5:26) Yindu yakuyichisyayi mpaka yakamuchisye mnope:

• Akoleje ndandanda. Kulijiganya Baibulo pajika kuli mu gulu ja yindu “yayili yakusosekwa mnope” yele Mklistu akusasosekwa kuyitenda ndaŵi syosope. (Afil. 1:10) Kuti akomboleje kujikuya ndandanda jawo, akusosekwa kujiŵika pamalo gakuwonechela. Ŵane akusajiŵika ndandanda jawo pepupa mkati mwa nyumba kapena palitanga lya filiji. Mwinesoni mpaka atende chenene kutega alamu kuti jakumbusyeje ndaŵi jakuti alijiganye.

• Aganichisyeje yindu yampaka yakamuchisye. Ana yikusaŵa yangasawusya kwa wawojo kulijiganya kwa ndaŵi jelewu kapena jamnono? Wawojo akusamanyilila chenene mwayiŵelele yindu paumi wawo. Myoyo, pakulijiganya, atende yindu mwakamulana ni mwayiŵelele yindu kwa wawojo. Naga ndaŵi jakulijiganya jikwanile nambo akuyiwona kuti nganisyo syawo ngasikutamilichika, mpaka atende chenene kwamba kulijiganya kwa ndaŵi jamnono, mwine kwa 10 minisipe. Kulijiganya kwa ndaŵi jamnono myiyi mpaka kuŵe kwakamuchisya mnope kulekangana ni ngalijiganya chilichose. Soni pagambile kutanda kulijiganya mpaka yalimbikasye kuti apitilisye kulijiganya.—Afil. 2:13.

• Asaguleje chile ngani syakusaka kulijiganya. Naga jikwanile ndaŵi jakulijiganya nambo wawojo ngakumanyilila yampaka alijiganye, nganaŵa akombwele ‘kamulichisya masengo chenene ndaŵi jawo.’ (Aef. 5:16) Myoyo, mpaka atende chenene kulembela chile mitwe ja ngani syakusaka kulijiganya. Naga akwete chiwusyo pangani jinejakwe janganajipikanichisya, mpaka atende chenene kulemba chiwusyocho kuti chawungunye kwanga kwakwe. Ndaŵi jilijose jamalisisye kulijiganya, mpaka atende chenene konjechesyaga ngani syakusaka kulijiganyasyo.

• Aŵeje ŵakoseka kuchenga. Alinjeje kuchenga ndandanda jawo, mpela ndaŵi jampaka amalile ali mkulijiganya, kapena ngani syampaka alijiganye. Akumbuchileje kuti chakusosekwa mnope chili kulijiganya ndaŵi syosope ngaŵaga ulewu wa ndaŵi kapenasoni mtundu wa ngani syakulijiganya.

Kusala yisyene yindu yikusatujendela chenene patukulijiganya ndaŵi syosope. Tukusaŵa paunasi wambone ni Yehofa, tukusalijiganya mwampaka tutendele yindu mwa lunda, nambosoni tukusaŵa ŵakusangalala mnope.—Yos. 1:8.