1, 2. Alondesye ligongo lyakwe kulimbikasya kuli kwakamucisya.

CRISTINA, ^[1] jwakwete yaka 18 ŵasasile kuti, “Acinangolo ŵangu nganalimbikasyeje, nambo akusatamila kunyosya. Maloŵe gawo gakusaŵa gakupweteka mnope. Jemanjajo akusasala kuti ndili jwangakomangala nganisyo, soni kuti ngasingombola kulijiganya yindu. Akusatisoni ndili jwakwimbala. M’yoyo ndaŵi syejinji ngusatamila kulila soni jwangasaka kuŵeceta nawo. Ngusinalipikana kuŵa jwangali mate.” Kusala yisyene, umi ukusaŵa wakusawusya mnope naga pangali jwakukulimbikasya.

² Nambope, kulimbikasya kuli kwakamucisya mnope. Rubén ŵasasile kuti, “Kwa yaka yejinji mbele ndili mkulimbana ni nganisyo syakuliwona kuŵa jwangali mate. Nambo lisiku line, nalalicilaga ni jwamkulungwa jwa mumpingo jwine juŵamanyilile kuti yindu nganiyinjendelaga cenene palisikulyo. Jwalakwe ŵambikanilaga mwacinonyelo panamlondecesyaga mwanapikanilaga mumtima. Kaneko jwalakwe ŵangumbwisye yindu yambone yanatendaga. Ŵangumbwisyesoni maloŵe ga Yesu gakuti jwalijose jwetuwe ali jwapenani mnope kupunda yijuni. Ngusinalikumbucila lilemba lyeleli ndaŵi ni katema, soni likusangwaya mumtima. Yaŵasasile jwamkulungwa jwa mumpingojo yangamucisye mnope.”—Mat. 10:31.

3. (a) Ana ndumetume Paulo ŵasasile yatuli pakwamba ya kulimbikasyana? (b) Ana citutagulilane yatuli munganiji?

 ³ Nganiyiŵa yakusimonjesya kuti Baibulo jikusagombelecesya mnope kusosekwa kwa kulimbikasyana ndaŵi syosope. Ndumetume Paulo ŵalembele Aklistu ŵacihebeli kuti, ‘Asamale abale, kogopela kuti akasimanikwa jwine julijose mwa jemanja jwa mtima wakusakala, wakupelembela cikulupi kuti akatyoka kwa Mlungu jwaumi, nambo ajendelecele kulimbikasyana lisiku lililyose, . . . kuti akasimanikwa jwine mwa jemanja jwakumusya mtima wakwe ni macili ga ulemwa.’ (Ahe. 3:12, 13) Mpaka amanyilile kusosekwa kwa kulimbikasyana naga akukumbucila ndaŵi jele maloŵe gakulimbikasya gakamucisye paumi wawo. Kwende tuganicisye yiwusyo ayi: Ligongo cici kulimbikasyana kuli kwakusosekwa? Ana cisyasyo ca Yehofa, Yesu, soni Paulo cikutujiganya cici pangani jakwalimbikasya ŵane? Soni ana mpaka twalimbikasye catuli ŵane mwakamula mtima?

4. Ana ŵani ŵakusasosekwa kwalimbikasya, nambi ligongo cici moŵa agano ungalimbikasyana utupile?

⁴ Wosopewe tukusasosekwa kulimbikasidwa. Yeleyi yikusaŵa yakusosekwa mnope patukukula. Jwakwiganya jwine lina lyakwe Timothy Evans ŵasasile kuti, “Ŵanace . . . akusasosekwa kwalimbikasya mpela mwele yakumela yikusasosekwa mesi. Mwanace akusalipikana kuti ali jwakusosekwa mnope naga tukumlimbikasya.” Nambo ligongo lyakuti tukutama mundaŵi jakusawusya, ŵandu ali ŵakulinonyela, ŵanganonyela ŵacinasi ŵawo, nambosoni ŵangalimbikasya ŵane. (2 Tim. 3:1-5) Acinangolo ŵane ŵangayamicila ŵanace ŵawo ligongo lyakuti acinangolo ŵawo nganiŵayamicilaga jemanjajo. Ŵakamula masengo ŵajinji akusadandawulaga ligongo lyakuti ngakusalimbikasidwa kumasengo kwawo.

5. Ana kulimbikasya kukusapwatikapo cici?

⁵ Ndaŵi syejinji kulimbikasya kukusapwatikapo kwayamicila ŵane ligongo lya yindu yambone yatesile. Mpaka twalimbikasyesoni ŵane mwakwasalila kuti akwete ndamo syambone kapena kuŵeceta ‘mwakwatondoya ŵandu ŵalopotoce.’ (1 Ates. 5:14) Maloŵe ga Cigiliki gakusagagopolela ndaŵi syejinji kuti “kulimbikasya” gakusalosya kuti “ukum’ŵilanga mundu kuti aŵe kumbali jakwe.” Patukutumicila ni abale soni alongo ŵetu, tukusapata upile wakuŵeceta yindu yakulimbikasya. (Aŵalanje Mlaliki 4:9, 10.) Ana tukusapata ndaŵi jakuŵajilwa jakwasalila ŵane ligongo lyakwe tukusanonyela soni kwayamicila? Mkanitujanje ciwusyoci, tukusosekwa kuganicisya yajikusasala Baibulo kuti, ‘Maloŵe gakuŵecetedwa pandaŵi jakuŵajilwa gakusaŵa gambone.’—Miy. 15:23.

6. Ligongo cici Satana akusasaka kututengusya? Apelece cisyasyo.

⁶ Satana akusasaka kututengusya ligongo akumanyilila kuti naga tutengwice mpaka tulopotoce mwausimu soni m’matala gane. Lilemba lya Miyambo 24:10 likusati, ‘Naga mkutenguka palisiku lya yisawusyo, macili genu gacinandipa.’ Satana ŵakamulicisye masengo yipwetesi soni kusisya pakusaka kumtengusya mundu jwakulungama Yobu, nambo yeleyi yalepelece. (Yobu 2:3; 22:3; 27:5) Mpaka tulimbane ni masengo ga Satana pakwalimbikasya ŵamwiŵasa mwetu soni abale ni alongo. Yeleyi mpaka yitutendekasye kuti tukuwoneje kunyumba kwetu soni ku Nyumba ja Ucimwene kuŵa malo gampaka gatutendekasye kuŵa ŵakusangalala soni ŵakuteteyeka.

7, 8. (a) Ana yisyasyo yapi ya m’Baibulo yayikulosya kuti Yehofa akusakuwona kusosekwa kwakwalimbikasya ŵane? (b) Ana acinangolo mpaka atende wuli pakuya cisyasyo ca Yehofa? (Alole ciwulili cacili kundanda kwa nganiji.)

⁷ Yehofa. Jwamalumbo ŵajimbile kuti, ‘Yehofa ali pakuŵandika ni ŵandu ŵakasice mtima, akusiŵakulupusya wosope ŵatengwice.’ (Sal. 34:18) Pandaŵi jele Yelemiya ŵakwete woga soni  ŵatengwice, Yehofa ŵamkamucisye jwakulocesya jwakulupicikaju kuti aŵe jwakulimba mtima. (Yer. 1:6-10) Nombenajo jwakulocesya Daniyele juŵaliji jwacikulile jwapatile macili pandaŵi jele Mlungu ŵatumisye lilayika kwa jwalakwe. Lilayikalyo lyamlimbikasisye Daniyele pakumkolanga kuti ‘mundu jwakunonyelwa mnope.’ (Dan. 10:8, 11, 18, 19) Ana wawojosoni mpaka ŵalimbikasye ŵakulalicila, apayiniya soni abale ni alongo ŵacikulile ŵangakukombolasoni kutenda yejinji mu undumetume?

⁸ Yikakombolece kuti Mlungu akamlimbikasya soni akam’yamicila Mwanace jwakwe Yesu ali pa cilambo capasi ligongo lyakuti ŵatemi najo kwandaŵi jelewu kwinani. M’malo mwakwe, maulendo gaŵili gose Yesu ŵapikene maloŵe gakutyocela kwa Atati ŵakwe ŵakwinani kuti, “Aju ali Mwanangu jwakunonyelwa, ngusasangalala najo.” (Mat. 3:17; 17:5) Ndaŵi jeleji Mlungu ŵam’yamicile Yesu nambosoni ŵamsimicisye kuti ŵatendaga cenene. Yesu ŵalimbikasidwe mnope paŵapikene maloŵega, kundanda kwa undumetume wakwe nambosoni kumbesi kwa umi wakwe wapacilambo capasi. Yehofa ŵatumisyesoni lilayika lyakwe kwa Yesu kuti likamlimbikasye paŵalagasikaga nganisyo cilo cakuti malaŵi gakwe cawulajidwe. (Luk. 22:43) Naga ali acinangolo, akuyeje cisyasyo ca Yehofa mwakwalimbikasya ŵanace ŵawo ndaŵi syosope nambosoni kwayamicila patesile cenene. Akusosekwasoni kwalimbikasyaga naga akusasimana ni yakulinga cikulupi cawo lisiku lililyose pali ku sukulu.

9. Ana tukulijiganya cici pakulola mwele Yesu muŵatendelaga yindu ni ŵandumetume ŵakwe?

⁹ Yesu. Cilo caŵatandisye Yesu Cikumbucilo, jwalakwe ŵayiweni kuti ŵandumetume ŵakwe ŵakwete ndamo jakulikwesya. Mwakulinandiya, Yesu ŵajojesye sajo syawo, nambo jemanjaji ŵakanganagape yakuti jwamkulungwa pasikati pawo jwaliji ŵani, nambosoni Petulo ŵalilapililaga kuti ngasamleka Yesu. (Luk. 22:24, 33, 34) Nambope, Yesu ŵayamicile ŵandumetume ŵakwe ŵakulupicikawo ligongo lyakuti nganamleka mu yakusawusya yakwe. Jwalakwe ŵasalile jemanjajo kuti cacitenda masengo gakupunda gaŵatesile jwalakwejo, soni ŵasimicisye kuti Mlungu akusiŵanonyela mnope. (Luk. 22:28; Yoh. 14:12; 16:27) Tukusosekwa kuliwusya kuti, ‘Ana ngangusosekwa kumsyasya Yesu mwakwayamicila ŵanace ŵangu soni ŵane ligongo lya yindu yakutenda cenene m’malo mwakwambaga kulola yakulepela yawo?’

10, 11. Ana ndumetume Paulo ŵalosisye catuli kuti ŵakuwonaga kwalimbikasya ŵane kuŵa kwakusosekwa mnope?

¹⁰ Ndumetume Paulo. M’yikalata yakwe, Paulo ŵaŵecetaga yindu yambone yaŵatendaga abale ŵakwe ŵaciklistu. Ŵane mwa jemanjaji ŵaliji ali ajesile nawo kwa yaka yejinji, m’yoyo mwangakayicila ŵamanyililaga yayalemaga. Nambo jwalakwe ŵaŵecetaga yambone yaŵatendaga jemanjaji. Mwambone, Paulo pakusala ya Timoteyo ŵam’wonaga mpela ‘mwanace jwakwe jwakunonyelwa nambosoni jwakulupicika mwa Ambuje,’ soni jucacisamalilaga kusyesyene yakusoŵa ya Aklistu ŵane. (1 Akoli. 4:17; Afi. 2:19, 20) Ndumetumejo pakuŵeceta ya Tito ŵatite, ‘tumlinjile jwalakwe ni tum’weni kuti ali jwakulimbicila pa yindu yejinji.’ (2 Akoli. 8:22, 23) Timoteyo ni Tito ŵalimbikasidwe mnope paŵamanyilile kuti Paulo ŵaganicisyaga jemanjajo.

¹¹ Paulo ŵaŵisile umi wakwe pangosi mwakuwujila kumalo kuŵamtendele yangalwe. Mwambone, Paulo ni Banaba ŵawujilesoni ku Lusitala kukwalimbikasya ŵakulijiganya ŵasambano kuti ajendelecele kola cikulupi atamose kuti ŵandu ŵa ku Lusitalako ŵaliji mkwasisya mnope. (Mase. 14:19-22) Paŵaliji ku Efeso, Paulo ŵasimene ni likuga lya ŵandu ŵaŵatumbile. Lilemba lya Masengo 20:1, 2 likusasala kuti, ‘Pasyamasile njojosyo, Paulo ŵaŵilasisye ŵakulijiganya, soni panyuma pakwalimbikasya soni kwalanga, ŵanyakwice ulendo wa ku Makedoniya. Ali ajesile m’maupande gelego soni kwalimbikasya ŵandu ŵakweleko, ŵajawile ku Gilisi.’ Kusala yisyene,  Paulo ŵakuwonaga kwalimbikasya ŵane kuŵa kwakusosekwa mnope.

12. Ana misongano jikusatukamucisya catuli kuti tulimbikasyaneje?

¹² Atati ŵetu ŵakwinani akusatusosela yambone ni ligongo lyakwe ŵalinganyisye yakuti tusonganeje ndaŵi syosope kuti tulimbikasyaneje. (Aŵalanje Ahebeli 10:24, 25.) Mwakulandana ni ŵakumkuya ŵa Yesu ŵakala, tukusasongana pampepe kuti tulijiganye soni kulimbikasidwa. (1 Akoli. 14:31) Cristina, jwatumkolasile kundanda kwa nganiji ŵasasile kuti, “Cangusanonyela mnope ku misongano cili cinonyelo soni kulimbikasidwa kungusapata. Ndaŵi sine ngusaŵa jwangasangalala pambice ku Nyumba ja Ucimwene. Nambo kaneko alongo akusambandicila, soni kungumbatila ni kusalila kuti nguwoneka cenene. Akusasalila kuti akusanonyela soni akusayamicila pakuyiwona kuti ngwawula pasogolo mwausimu. Kulimbikasya kwawo kukusandendekasya kuti sangalaleje.” Yikusaŵa yakusangalasya mnope jwalijose pakutenda mbali jakwe ‘pakulimbikasyana jwine ni mjakwe.’—Alo. 1:11, 12.

13. Ligongo cici ŵandu ŵaŵele ali mkutumicila Yehofa kwandaŵi jelewu akusasosekwasoni kwalimbikasya?

¹³ Atamose ŵandu ŵaŵele ali mkutumicila Yehofa kwa ndaŵi jelewu akusasosekwa kwalimbikasya. Aganicisye ya Yoswa. Jwalakwe ŵaŵele ali mkutumicila Yehofa kwa yaka yejinji. Nambope, Yehofa ŵamsalile Mose kuti amlimbikasye paŵatite, ‘Mum’ŵice Yoswa kuŵa jwakulongolela soni mumlimbikasye, ligongo jwalakwe ni juciŵajombosye ŵanduŵa ni kwatendekasya kuti apocele cilambo cacimciwoneco.’ (Deut. 3:27, 28) Yoswa ŵaliji ali asigele panandi kupocela ukumu wekulungwa wakwalongolela Ayisalayeli paŵajawulaga m’Cilambo ca Cilangano. Ayisalayeliwo ŵaliji ŵakuti caputeje ngondo syejinji soni cacigomekwa ulendo umo. (Yos. 7:1-9) Kusala yisyene, Yoswa ŵasosekwaga kulimbikasidwa. M’wejisoni tukusosekwa kwalimbikasyaga acakulungwa ŵa mumpingo soni ŵakulolela mkuli, ŵakusakamula masengo gamakulungwa mnope gakusamalila ngondolo sya Mlungu. (Aŵalanje 1 Atesalonika 5:12, 13.) Jwakulolela mkuli jwine ŵasasile kuti, “Ndaŵi sine abale akusatupa yikalata yakutuyamicila. Akusasalamo kuti asangalele mnope ni kwika kwetu. Tukusasunga yikalata yeleyi ni kuyiŵalangaga patutengwice. Yikalatayi yikusatulimbikasya mnope.”

14. Ana cici cacikulosya kuti kuyamicila soni kulimbikasya kuli kwakamucisya mnope patukupeleka camuko?

¹⁴ Acakulungwa ŵa mumpingo soni acinangolo akusayiwona kuti kuyamicila soni kulimbikasya kuli kwakamucisya mnope pakugombelecesya camuko ca m’Baibulo. Paulo paŵayamicile Akolinto ligongo lyakamulicisya masengo camuko cakwe, yalimbikasisye mnope jemanjajo kuti ajendelecele kutenda yakuŵajilwa. (2 Akoli. 7:8-11) Andreas, jwakwete ŵanace ŵaŵili, ŵasasile kuti, “Kulimbikasya kukusakamucisya ŵanace kuti akule mwausimu soni munganisyo.  Ukusagombelecesya camuko mwakwalimbikasya. Atamose kuti ŵanacewo akusamanyilila yayili yakuŵajilwa, nambo kuti atendeje yakuŵajilwayo tukusasosekwa kwalimbikasya mwangalecesya.”

15. Ana litala limo lyampaka twalimbikacisye ŵane ni lyapi?

¹⁵ Twayamicileje ŵakulambila acimjetu ligongo lya mtawu wakusalosya soni ndamo syawo syambone. (2 Mbiri 16:9; Yobu 1:8) Yehofa soni Yesu akusayamicila yatukusatenda wosopewe pakukamucisya masengo ga Ucimwene, atamose patukutenda kapena kupeleka yamnono mwakamulana ni mwayiŵelele yindu paumi wetu. (Aŵalanje Luka 21:1-4; 2 Akolinto 8:12.) Mwambone, ŵane mwa abale ni alongo ŵetu ŵali ŵacikulile akusalingalinga mwamtawu kuti asimanikweje pamisongano soni kwawula mu undumetume wamumgunda mwakutamilicika. Ana ngatukusosekwa kwayamicila soni kwalimbikasya jemanjaji?

16. Ligongo cici tukusosekwa kulingalinga kuti twalimbikasyeje ŵane?

¹⁶ Tupateje mapesa gakwalimbikacisya ŵane. Naga tuyiweni kuti jwine atesile cinecakwe cambone, ana nganituŵa tum’yamicile? Aganicisye yayatendekwe pandaŵi jele Paulo ni Banaba ŵaliji ku Antiokeya jwa ku Pisidiya. Acakulungwa ŵa m’nyumba jakupopelela ŵakweleko ŵasalile jemanjajo kuti, ‘Abale, naga akwete maloŵe galigose gakwalimbikasya ŵandu, aŵecete.’ Paulo ŵaŵecete ngani pakusaka kwalimbikasya ŵanduwo. (Mase. 13:13-16, 42-44) Tukusosekwa ndaŵi syosope kulingalinga kuti tuŵeceteje yakulimbikasya. Patukutenda yeleyi, ŵanesoni cacitulimbikasyaga.—Luk. 6:38.

17. Ana litala lyambone lyakwayamicilila ŵane lili lyatuli?

¹⁷ Asaleje mbali jisyesyene jakusaka kuyamicila. Kwamba kusala maloŵe gakulimbikasya nambosoni kuyamicila kuli kwakamucisya, nambo yaŵasasile Yesu kwa Aklistu ŵa ku Tiyatila yalosisye kuti kusala mbali jisyesyene jatukusaka kuyamicila kuli kwambone mnope. (Aŵalanje Ciunukuko 2:18, 19.) Mwambone, naga wawojo ali nangolo mpaka amsalile soni kum’yamicila mwanace jwawo mbali jisyesyene jakutenda cenene pakusaka kwawula pasogolo mwausimu. Mpaka tumsalile mlongo jwakulela ŵanace ŵakwe jika yayikututesya lung’wanu ni mwakutendela pakwalela ŵanacewo, atamose kuti akusimana ni yakusawusya paumi. Kulimbikasya soni kuyamicila mwalitala lyeleli mpaka kuŵe kwakamucisya mnope.

18, 19. Ana mpaka tukamucisyane catuli kuti tuŵe paunasi wambone ni Yehofa?

¹⁸ Yehofa nganaŵa ayice kukutusalila kuti tukamlimbikasye mundu jwine mpela muŵamsalilile Mose kuti amlimbikasye Yoswa. Nambo Mlungu akusayamicila patukuŵeceta yakwalimbikasya ŵakulupilila acimjetu soni ŵandu ŵane. (Miy. 19:17; Ahe. 12:12) Mwambone, mpaka tumsalile m’bale jwaŵecete ngani ja wosope mwajitukamucisye ngani jakwe kuti tupikanicisye lilemba line lyakwe soni kutupa camuko catukusosecela. Mlongo jwine ŵamlembele cikalata mlendo juŵayice kuŵeceta ngani pa msongano wamkuli kuti, “Atamose kuti twaŵecetene kwandaŵi jamnono, nambo ŵawuweni mtima wangu wesitopelwe ni kulimbikasya soni kungamucisya. Ngusaka amanyilile kuti mwaŵeceteleje, pa pulatifomu soni patuŵeceteneje, nawuweni kuŵa mtuka wakutyocela kwa Yehofa.”

¹⁹ Mwangakayicila, mpaka tukamucisyane kuŵa paunasi wambone ni Yehofa naga tukuŵa ŵakusacilila kuya yaŵasasile Paulo kuti, ‘Ajendelecele kulimbikasyana soni kamucisyana, mpela mwakutendelamo.’ (1 Ates. 5:11) Yehofa cacisangalala ni wosopewe naga ‘tukwendelecela kulimbikasyana lisiku lililyose.’