1-3. Ana cakusawusya cacapali pasikati pa Yuodiya ni Suntuke komboleka kuti catandite ligongo cici, soni ana mpaka tuŵambale catuli yakusawusya mpela yeleyi masiku agano? (Alole ciwulili cacili penanipa.)

ŴAKUTUMICILA ŵa Yehofa akusaŵa ŵakusacilila kupikanila yajikusasala buku jeswela ja Mlungu, jajili Baibulo. Nambo pakuŵa tuli ŵangali umlama, ndaŵi sine mpaka tupocele camuko ca m’Malemba. Ana tucitenda yatuli patupocele camukoci? Aganicisye yayatendekwe pasikati pa Yuodiya ni Suntuke ŵaŵaliji acakongwe ŵasagulwe ŵa m’yaka 100 yandanda. Baibulo jikusasala kuti acakongwe ŵeleŵa ŵakanganile mnope ndaŵi jine, nambo jangasala ligongo lyakwe. Nambo mpaka tuwanicisye kuti yakuyicisyayi ni yayatendekwe.

² Tuwanicisye kuti Yuodiya ŵaŵilasile abale ni alongo ŵane ku nyumba kwakwe kuti akalile yimpepe soni kunguluka. Suntuke nganaŵilanjidwa nawo, nambo jwalakwe ŵapikene yakuti ŵanduwo ŵasangalele mnope kweleko. Komboleka kuti Suntuke ŵaŵecete kuti, ‘Nambo yisyene Yuodiya ngambilanga une? Mbelaga jwejula ali mjangu jwapamtima?’ Ligongo lyakutumbila, Suntuke ŵatandite kumkayicila Yuodiya. M’yoyo, nombe najo ŵalinganyisye yakuti abale ni alongo ŵalaŵala ayice kumangwakwe, nambo Yuodiya nganam’ŵilanga. Cakusawusya  cacapali pasikati pa Yuodiya ni Suntuke cikasokonasisye mtendele wa mpingo wosope. Baibulo jangatusalila kuti papali yakuyicisya yatuli, nambope komboleka kuti alongoŵa ŵapikanile camuko cacinonyelo caŵapocele kwa ndumetume Paulo.—Afi. 4:2, 3.

³ Yakusawusya yakulandanayi yikusatendekwasoni m’mipingo ja ŵandu ŵa Yehofa masiku agano. Nambope yakusawusya yeleyi mpaka tuyimasye atamose kuyiŵambala kwene naga tukukuya yagakusatusalila Maloŵe ga Mlungu, Baibulo. Nambosoni, naga tukusasacilila kupikanila yajikusasala Buku ja Yehofa, tucilingalinga kutenda yindu mwakamulana ni yatukusalijiganya m’Bukuji.—Sal. 27:11.

4, 5. Ana Maloŵe ga Mlungu gakusapeleka camuko catuli pangani jakulamulila nganisyo syetu?

⁴ Ŵandu ŵane pakutuŵambala kapena patutendele yindu yangali cilungamo, yikusaŵa yakusawusya kuti tulamulile nganisyo syetu. Mpaka yiŵe yakupweteka ŵandu ŵane pakututendela yindu yangali cilungamo ligongo lyakuti tuli ŵakulekangana nawo kwakutyocela, mtundu, kapena yindu yine. Nambo mpaka yiŵe yakupweteka mnope naga ŵakututendela yeleyi ali Aklistu acimjetu. Ana Maloŵe ga Mlungu gakusatusalila yatuli yampaka yitukamucisye patusimene ni yakusawusya yeleyi?

⁵ Kutandila pandaŵi jaŵapali ŵandu, Yehofa aŵele ali mkumanyilila yampaka yitendekwe naga ŵandu ngakulamulila nganisyo syawo. Naga tutumbile mnope, mpaka tutende soni kuŵeceta yakulemweceka yampaka yitutendekasye pasogolo pakwe kuligamba. Mpaka luŵe lunda kamulicisya masengo camuko ca m’Baibulo cacikusatusalila mwampaka tuŵambalile kutumbila citema. (Aŵalanje Miyambo 16:32; Mlaliki 7:9.) Kusala yisyene, wosopewe tukusasosekwa kulingalinga kuti twakululucileje ŵane. Yehofa soni Yesu akusajiwona ngani jakwakululucila ŵane kuŵa jakusosekwa mnope. (Mat. 6:14, 15) Ana ali ŵakusacilila kwakululucila ŵane kapena kulamulila nganisyo syawo?

6. Ligongo cici tukusosekwa kulingalinga kuti tulamulileje nganisyo syetu?

⁶ Ŵandu ŵakusalepela kulamulila nganisyo syawo akusaŵa ŵakusawusya kutenda nawo yindu. Yakuyicisya yakwe, ŵandu ŵane mpaka ŵaŵambaleje. Mundu jwakusawusya mpaka asokonasye mpingo ligongo lya ndamo jakweji. Mundu jweleju mpaka alinjeje kulisisa, nambope mkupita kwa ndaŵi nganisyo syakusakala syakusakola mumtima mwakwe ‘sikusawonecela mumpingo.’ (Miy. 26:24-26) Acakulungwa ŵa mumpingo mpaka akamulicisye masengo camuko cacili m’Buku ja Yehofa pakwakamucisya ŵandu ŵati m’yiyi kuyiwona kuti kwaŵenga ŵane soni kwasunjila ŵane cakulukosi sili ndamo syangasosekwa mu likuga lya Mlungu. (Lev. 19:17, 18; Alo. 3:11-18) Ana wawojo akwiticisya yeleyi?

7, 8. (a) Ana Yehofa akujilongolela catuli mbali ja pacilambo capasi ja likuga lyakwe? (b) Ana ni yine yapi yajikusasala Baibulo yatukusosekwa kuyikuya, soni ligongo cici?

⁷ Yehofa akwalongolela soni kwalisya ŵandu ŵali mbali ja pacilambo capasi ja likuga lyakwe kupitila mwa “kapolo jwakulupicika ni jwalunda.” Kapoloju akulongoleledwa ni Yesu Klistu, jwali “mtwe wa Mpingo.” (Mat. 24:45-47; Aef. 5:23) Mpela muyaŵelele ni likuga lyakulongolela lya m’yaka 100 yandanda, kapoloju akusakamulicisya masengo maloŵe gakusalilidwa ga Mlungu mwakusacilila mnope. (Aŵalanje 1 Atesalonika 2:13.) Ana Baibulo jikusatusalila yindu yine yapi yampaka yitukamucisye?

⁸ Baibulo jikusatusalila kuti tusimanikweje pamisongano mwakutamilicika. (Ahe. 10:24, 25) Jikusatulimbikasyasoni kuti tukulupilileje yakulandana. (1 Akoli. 1:10) Maloŵe ga Mlungu gakusatusalila kuti tulongosyeje ucimwene wa Mlungu paumi wetu. (Mat. 6:33) Malemba  gakusatulimbikasyasoni kuti tulalicileje ku nyumba ni nyumba, malo gakusimanikwa ŵandu ŵajinji, nambosoni mwaupile. (Mat. 28:19, 20; Mase. 5:42; 17:17; 20:20) Buku ja Mlungu jikusasalila acakulungwa ŵa mumpingo kuti alolecesyeje kuti mpingo uŵeje weswela. (1 Akoli. 5:1-5, 13; 1 Tim. 5:19-21) Soni Yehofa akusalamula kuti jwalijose jwali m’likuga lyakwe akusosekwa kuŵa jwamswela mwakucilu soni mwausimu.—2 Akoli. 7:1.

9. Ana Yesu akusakamulicisya masengo litala lyapi pakutukamucisya kujipikanicisya cenene Baibulo?

⁹ Ŵandu ŵane akusaganisya kuti mpaka akomboleje kupikanicisya pajika yayili m’Baibulo. Nambope Yesu ŵasagwile ‘kapolo jwakulupicika’ kuŵa litala limopelyo lyakutupela cakulya causimu. Kutandila mu 1919, Yesu Klistu aŵele ali mkukamulicisya masengo kapoloju kuti ŵakamucisyeje ŵakumkuya ŵakwe kupikanicisya yajikusasala Baibulo soni kuyikuya. Patukupikanila yatukusalijiganya m’Baibulo tukusakamucisya kuti mpingo uŵeje weswela, wamtendele, soni wakamulana. Jwalijose jwetuwe mpaka atende cenene kuliwusya kuti, ‘Ana ngusakuya mwakulupicika yakusatusalila kapolo jwakulupicika?’

10. Ana buku ja Ezekieli jikusasala yatuli pakwamba ya mbali jakwinani ja likuga lya Yehofa?

¹⁰ Baibulo jikusatukamucisya kujimanyilila cenene mbali jakwinani ja likuga lya Yehofa. Mwambone, jwakulocesya Esekiyeli ŵagaweni mesomkulola gakulosya mbali jakwinani ja likuga lya Mlungu jajikusajimilidwa ni ligeleta lyakwinani. (Ezek. 1:4-28) Yehofa ni jwakwendesya ligeletali, soni likusajawula kulikose kwawusacile msimu wakwe kuti lijawule. Mbali jakwinani ja likuga lya Mlunguli jikusatendekasya kuti mbali ja pacilambo capasi jijawulejesoni pasogolo. Kusala yisyene, ligeletali likuwutuka mnope. Agambe ganicisya mwayicenjele yindu m’likuga lya Yehofa yaka 10 yipiteyi. Tukumbucileje kuti Yehofa ni jwatendekasisye kuti yindu yicenjeje. Pacangakaŵapa Klistu pampepe ni malayika cajonanje cilambo cakusakalaci. M’yoyo apano ligeleta lya Yehofa likuwutuka mnope kuti lilosye kuti ulamusi wakwe wuli wakuŵajilwa soni kuswejesya lina lyakwe lyeswela.

11, 12. Ana yine mwa yindu yalitesile likuga lya Yehofa ni yapi?

¹¹ Aganicisye yajitesile mbali ja pacilambo capasi ja likuga lya Mlungu m’masiku gambesi gano. Yakutaŵataŵa. Abale ni alongo ŵajinji ŵakamwile masengo mwamtawu mnope paŵataŵaga likulu lyasambano lya Mboni sya Yehofa ku Warwick, mu msinda wa New York, m’cilambo ca United States. Nambosoni abale ni alongo pacilambo cosope akukamula masengo gakutaŵa Nyumba sya Ucimwene soni kusya maofesi ga nyambi mwakulongoleledwa ni Dipatimenti japacilambo cosope jakulolela yakulinganya mapulani soni yakutaŵataŵa. Tukusayamicila mnope abale ni alongo ŵakusalipeleka pakamula masengo gelega. Tukumbucileje kuti Yehofa akwajaliwa ŵakulalicila ya Ucimwene pacilambo cosope ŵakulingalinga kamucisya pamasengo gelega mwakupeleka mbiya.—Luk. 21:1-4.

 ¹² Majiganyo. Aganicisye ya masukulu gakwiganya Baibulo gagapali. (Yes. 2:2, 3) Pana Sukulu ja Undumetume wa Upayiniya, Sukulu ja Ŵakulalicila ya Ucimwene, Sukulu ja Gileadi, Sukulu ja Ŵakwika Kwene pa Beteli, Sukulu ja Ŵakulolela Mkuli ni Aciŵamkwawo, Sukulu ja Acakulungwa ŵa Mumpingo, Sukulu ja Undumetume wa Ucimwene, soni Sukulu ja Ŵakulolela Nyambi ni Aciŵamkwawo. Kusala yisyene, Yehofa akusanonyela kwajiganya ŵandu ŵakwe. Mpaka tulijiganyesoni Baibulo kupitila pa webusayiti jetu ja jw.org, papakusasimanikwa mabuku gakusala ya Baibulo m’yiŵeceto yejinji. Pa webusayitiji pana mbali syapajika sya ŵanace soni maŵasa. Panasoni malo gakusala ngani syakwayana ni Mboni sya Yehofa. Ana wawojo akusakamulicisya masengo webusayitiji mu undumetume soni pakulambila kwa peŵasa?

13. Ana ŵakulambila ŵa Yehofa ŵakulupicikawe tukwete ukumu watuli?

¹³ Uli upile wekulungwa mnope kuŵa m’likuga lya Yehofa. Nambope, tukwete ukumu wakutenda yakumsangalasya Mlungu soni kwesya ulamusi wakwe wekulungwa ligongo lyakuti tukumanyilila yakusasaka jwalakwe. Ŵandu ŵajinji m’cilamboci pakunonyela mnope kutenda yakusakala, m’weji tukusosekwa ‘kuyiŵenga yakusakalayo’ mpela mwakusatendela Yehofa. (Sal. 97:10) Ngatukusosekwa kutenda yindu mpela ŵandu ŵakusakala mwakuŵeceta kuti, “Yambone yili yakusakala, soni yakusakala yili yambone.” (Yes. 5:20) Ligongo lyakuti tukusasaka kumsangalasya Mlungu, tukusosekwa kulingalinga kuti tuŵeje ŵaswela mwakucilu, mundamo, soni mwausimu. (1 Akoli. 6:9-11) Tukusamnonyela soni kumkulupilila mnope Yehofa. Tukusalosya yeleyi mwakutenda yindu mwakamulana ni yajikusasala Buku jakwe. Tukusalingalinga kutama ni umi welewu patuli kunyumba, kumpingo, kumasengo, kusukulu, soni kwine kulikose. (Miy. 15:3) Kwende tulole matala gane gampaka tulocesye kuti tuli ŵakulupicika kwa Mlungu.

14. Ana acinangolo ŵaciklistu mpaka alosye catuli kuti ali ŵakulupicika kwa Mlungu?

¹⁴ Kulela ŵanace. Acinangolo ŵaciklistu akusalosya kuti ali ŵakulupicika kwa Yehofa mwakwajiganya ŵanace ŵawo mwakamulana ni Maloŵe ga Mlungu. Acinangolo ŵakogopa Mlungu ŵangakunda kuti ndamo jakucilambo ja kalele ka ŵanace jajambucile. Aklistu ŵakuwona ngakusosekwa kujigalila msimu wa ku cilambo. (Aef. 2:2) Mtati jwaciklistu jwam’batiswe nganaŵa aganisisye kuti, ‘Aaa, m’cilambo cetu cino acakongwe ni ŵakusiŵajiganya ŵanace.’ Baibulo jikusasala mwangapita mumbali pa ngani jeleji kuti, “Acatati, . . . ŵaleleje [ŵanace ŵawo] m’camuko ca Yehofa soni ŵajiganye kaganisye kakwe.” (Aef. 6:4) Acatati soni acimama ŵakogopa Mlungu akusasacilila kuti ŵanace ŵawo aŵeje mpela Samuyele jwele Yehofa ŵamnonyele kutandila ali mwanace mpakana ukulu wakwe.—1 Sam. 3:19.

15. Ana mpaka tulosye catuli kuti tuli ŵakulupicika kwa Yehofa patukusagula yakutenda pangani syekulungwa?

¹⁵ Kusagula yakutenda. Litala limo lyampaka tulocesye kuti tuli ŵakulupicika kwa Yehofa lili kusacilila kwetu kusosa cikamucisyo cakutyocela m’Baibulo soni ku likuga lyakwe patukusagula yakutenda pa ngani syekulungwakulungwa paumi wetu. Pakusaka kulosya kusosekwa kwa kutenda yeleyi, aganicisye ngani jakumanyika cenene jajikusakwaya acinangolo ŵajinji masiku agano. Cili cisyoŵe ca ŵandu ŵajinji ŵakusajawula ku yilambo yakusa kwatumisya ŵanace ŵawo kwa acalongo acimjawo kuti akaleleje ni cakulinga cakuti acinangolowo ajendelecele kamula masengo nambosoni kupata mbiya m’cilambo capiteco. Yili yisyene kuti mundu mpaka asagule jika kutenda yeleyi, nambo tukusosekwa kumbucila kuti jwalijose cacijanga pameso pa Yehofa mwakamulana ni yasagwile. (Aŵalanje Aloma 14:12.) Ana luli lunda kusagula yakutenda yakusosekwa mnope yakwayana ni  liŵasa lyetu kapena kapate ka mbiya mwangalola kaje yajikusasala Baibulo panganijo? Iyayi. Tukusosecela cikamucisyo ca Atati ŵetu ŵakwinani ligongo lyakuti nganituŵa tukombwele kulondesya kajende ketu.—Yer. 10:23.

16. Ana jwamkongwe jwine ŵasagwile kutenda cici mwanace jwakwe ali apagwile, nambi cici cacamkamucisye kusagula cenene?

¹⁶ Jwamkongwe jwine ŵaŵelece mwanace jwamlume ali mkutama m’cilambo cine. Jwalakwe ni ŵamkwakwe ŵaganisisye yakumtumisya mwanacejo kumangwawo kuti anganga ŵakwe akamleleje. Nambo pandaŵiji, jwamkongwejo ŵatandite kulijiganya Baibulo ni jwa Mboni sya Yehofa. Jwalakwe ŵajawile pasogolo mnope soni ŵalijiganyisye kuti waliji ukumu wakwe kuti amleleje mwanacejo soni kumjiganya ya Yehofa. (Sal. 127:3; Miy. 22:6) Mpela mugakusatulimbikacisya malemba, jwamkongweju ŵapopesile kwa Yehofa kuti amkamucisye kusagula yakuŵajilwa. (Sal. 62:7, 8) Jwalakwe ŵamsalilesoni juŵamjiganyaga Baibulo soni ŵane mumpingo ya nganiji. Atamose kuti ŵacibale ŵakwe soni acimjakwe ŵamlimbikasyaga kuti amtumisye mwanacejo kwa angangagwe, nambo jwalakwe ŵayiweni kuti nganiyiŵa yakuŵajilwa kutenda yeleyo. Ŵamkwakwe ŵasangalele mnope pakuyiwona yawatite mpingo pakumkamucisya jwamkongwejo soni mwanace jwawo. Jwalakwe ŵakundile kuti amjiganyeje Baibulo soni ŵatandite kusimanikwa pamisongano pampepe ni ŵamkwakwewo soni mwanace jwawo. Ana akuganisya kuti jwamkongweju ŵayiweni kuti Yehofa ajanjile lipopelo lyakwe lyakutyocela pasi pa mtimalyo? Mwangakayicila, ŵayiweni m’yoyo.

17. Ana likuga lisasile yatuli pakwamba ya majiganyo ga Baibulo?

¹⁷ Kuya malamusi ga Mlungu. Mbali jine jakusosekwa mnope jakulocesya kuti tuli ŵakulupicika kwa Mlungu jili kuya yalikusatusalila likuga lyakwe. Mwambone, kwende tuganicisye yalisasile likuga pakwamba ya majiganyo getu ga Baibulo. Likugali lyasasile kuti patugambile kutanda kulijiganya ni mundu buku ja Ana Baibulo Jikusajiganya Cici Kusyesyene? tukusosekwa kutagulilanaga ni mundujo kwa ndaŵi jamnono yindu yakwamba likuga lyetu panyuma pa lijiganyo lililyose. Mpaka tutende yeleyi pakamulicisya masengo fidiyo jakuti, Ana ku Nyumba ja Ucimwene Kukusatendekwa Yatuli? soni kabuku kakuti, Ana Ŵani Ŵakutenda Lisosa lya Yehofa Lelo Jino? Lyasasilesoni kuti patumalisisye kulijiganya buku ja Ana Baibulo Jikusajiganya Cici Kusyesyene? ni mundu jwakwawula pasogolo, tukusosekwasoni kulijiganya najo buku jakuti, Ajendelecele Kuŵa M’cinonyelo ca Mlungu, atamose jwalakwe pabatiswe. Likugali lyasasile yeleyi ni cakulinga cakuti ŵakulijiganya ŵacasambano aŵe ‘ŵakulimba m’cikulupi.’ (Akol. 2:7) Ana akusakuya yalikusasala likuga lya Yehofa pa mbali jeleji?

18, 19. Ana gane mwa magongo gakum’yamicilila Yehofa gali gapi?

¹⁸ Tukwete magongo gejinji gakum’yamicilila Yehofa. Ligongo limo lili lyakuti jwalakwe ni juŵatupele umi. (Mase. 17:27, 28) Yehofa ŵatupelesoni mtuka wapenani mnope, wawuli Baibulo. Tukusajiwona Baibulo kuŵa utenga wakutyocela kwa jwalakwe, soni tukusawupocela utengawo mwakusangalala mpela muŵatendele Aklistu ŵa ku Tesalonika.—1 Ates. 2:13.

¹⁹ Baibulo jitukamucisye kuti tum’ŵandicile Yehofa soni kuti jwalakwe atuŵandicile. (Yak. 4:8) Atati ŵetu ŵakwinani atupele upile wekulungwa mnope wakuŵa m’likuga lyakwe. Tukusayamicila mnope upile welewu. Tukusapikana mumtima mpela muŵapikanilaga jwamalumbo juŵajimbile kuti, “Am’yamicileje Yehofa, pakuŵa jwalakwe ali jwambone. Umbone mtima wakwe wuli wangamala.” (Sal. 136:1) Yili yakutesya lung’wanu kuti mu Salimo 136, maloŵe gakuti “umbone mtima wakwe wuli wangamala” gakusimanikwa mu ndime jilijose. Naga tukuŵa ŵakulupicika kwa Yehofa soni ku likuga lyakwe, tucisimicisya kuti maloŵe gelega gali gasyesyene ligongo lyakuti tucitama kwangamala.