JWAMLUME jwine lina lakwe Allen ŵasasile kuti, “Natendaga woga kusamila akuno.” * Jwalakwe jwajendelecele kuti, “Nganimanyililaga naga cingapoceledwe soni kupata acimjangu.” Allen jwasamile kumangwakwe ni kwawula ku mpingo wasambano wawaliji pa mkuli wa makilomita 1,400.

Naga ŵasamile ku mpingo wasambano, komboleka kuti wawosoni wakamwile woga. Ana cici campaka cakamucisye kuti asyoŵelele? Ana cici campaka cakamucisye naga akuyiwona kuŵa yakusawusya kuti asyoŵelele mpela muŵaganicisyaga? Kapena tujile kuti, yikaŵe kuti nganasama, ana akatesile wuli kuti ŵane ŵayice kwene mumpingo mwawo asangalaleje?

Agambe ganisya ya citela cacicuŵidwe ni kuja kucipandicila pamalo gane. Kusala yisyene, cikusacingangana ni yakusawusya, soni miciga jakwe jine jikusakatikaga. Pacipandicile pamalo gane, miciga jasambano jikusatanda kusipuka mwacitema. Mwakulandana ni yeleyi, kusamila ku mpingo wine mpaka kwatendekasye kusimana ni yakusawusya. Ku mpingo wawo wakala, ŵasipwice “miciga” jampaka tujiwanicisye ni acimjawo ŵapamtima nambosoni ŵakwete ndandanda jakutamilicika jakutendela yindu yausimu. Sambano pasamile akusosekwa kusipuka miciga jine kuti asyoŵelele kumaloko. Ana cici campaka cakamucisye kuti akombole kutenda yeleyi? Kamulicisya masengo songa sya m’Malemba mpaka kwakamucisye. Kwende tulole sine mwa songasi.

Mundu jwakusaŵalanga maloŵe ga Mlungu mwakutamilicika akusaŵa ‘mpela citela cepande pa sulo sya mesi, cacikusasogola mu ndaŵi jakwe, soni masamba gakwe ganganyala, soni yosope yakutenda yikusamjendela cenene.’—Sal. 1:1-3.

Mwakulandana ni citela cacikusakula cenene ligongo lyakuti ciŵandicile mesi, nombe Mklistu kuti alimbe mwausimu akusosekwa kulya cakulya causimu mwakutamilicika. M’yoyo, lisiku lililyose aŵalanjeje Baibulo, soni asimanikweje pamisongano ja mpingo mwakutamilicika. Akolejesoni ndandanda jakutamilicika jakutendela kulambila kwa peŵasa soni lijiganyo lyapajika. Yiliyose yaŵatendaga ku mpingo wawo wakala kuti aŵe paunasi wakulimba ni Yehofa akusosekwasoni kwendelecela kutenda yeleyo.

“Mundu jwakwakamucisya acimjakwe nombe najo tacipocela cikamucisyo.”—Miy. 11:25.

Naga akujigala nawo mbali mnope mu undumetume wa mumgunda yiciŵa yangasawusya kuti asyoŵelele kumaloko. Kevin jwalisoni jwamkulungwa jwa mumpingo jwasasile kuti, “Cacakamucisye ŵamkwangu nambosoni une caliji upayiniya wakamucisya watwatesile tuli tugambile kwika kwene mu mpingo wetu wasambano.” Jwalakwe jwasasilesoni kuti, “Mwacitema twamanyilile abale, apayiniya, nambosoni twawumanyi cenene mkuli wa mpingo wetu.” Nombe najo Roger juŵasamile kwawula ku mkuli wa makilomita 1,600, jwasasile kuti, “Litala lyambone kuti tusyoŵelele ku mpingo wasambano lili kwinjila nawo mu undumetume wa mumgunda ndaŵi syosope. Nambosoni tukusosekwa kwamanyisya acakulungwa ŵa mumpingo kuti mpaka tukamucisye nawo pa masengo galigose. Mwambone kuswejesya pa Nyumba ja Ucimwene, kujigala nawo mbali pa misongano ja mpingo, kapenasoni kwakamucisya ŵane ŵakusalaga kajende pakwawula kumisongano. Naga abale ni alongo ayiweni kuti mundu jwine jwakwe jwasambano akwete msimu wakulipeleka, jemanjajo cacisacilila kuti aŵe mjawo.”

“Awugule mtima wawo.”—2 Akoli. 6:13.

Akamulaneje mnope ni abale. Mlongo jwine lina lyakwe Melissa yalumo ni liŵasa lyakwe ŵasamile ku mpingo wasambano, ali ayice kweleko ŵalinjile kuti  akole acimjawo ŵasambano. Jwalakwe jwasasile kuti, “Twakungulukaga ni acimjetu ku Nyumba ja Ucimwene misongano mkanijitande soni pambesi pamisongano. Kutenda yeleyo kwasosekwaga ndaŵi jakwanila kupunda kwamba kupeleka moni.” Yeleyi yakamucisyesoni kuti jemanjajo amanyilile mwacitema mena ga abale ni alongo ŵa kumaloko. Konjecesya pelepa, liŵasali lyaliji lyakungulucika yayawugulile upile wakamulana mnope ni acimjawo ŵasambanowo. Mlongoju jwajendelecele kusala kuti, “Twapaga manambala getu ga foni nombe nawosoni ŵatupaga gawo. Yeleyi yatendekasyaga kuti tulumbikaneje mwangasawusya pa yakutendekwa ya ku mpingo nambosoni pa yindu yine.”

Naga akutenda woga kuŵecetana ni ŵandu ŵasambano, mpaka atande ni yindu yamwanamwana. Mwambone, mpaka atande ni kumwemwetela. Atamose kutenda yeleyi mpaka kuŵe kwakusawusya, nambope kumwemwetela mpaka kwatendekasye ŵane kola lung’wanu ni wawojo. Pambesi pakwe caciyiwona kuti, ‘kumulika kwa meso kukusasangalasya mtima.’ (Miy. 15:30) Rachel juŵasamile kutali ni kumangwakwe jwasasile kuti, “Ndaŵi syosope ngusaŵa jwa sooni. Ndaŵi sine nalikanganicisyaga kuŵecetana ni abale ni alongo mu mpingo wangu wasambano. Najawulaga kwa mundu jwagambile kutama jika mu Nyumba ja Ucimwene. Naganisyaga kuti komboleka nombe najo ali jwa sooni mpela une.” Ana wuli ngakola yakulinga yakuti misongano mkanijitande kapena pambesi pakwe aŵecetaneje ni ŵandu ŵasambano?

Naga ali mlendo, komboleka kuti mpaka yasawusyeje kunguluka ni ŵandu ŵasambano pagambile kwika kwene. Nambo ndaŵi pajikwawula, cilendoco mpaka camalile. Pandaŵi jelejo ni pakusosekwa kola mtawu wa kwendelecela kupata acimjawo ŵasambano.

Yitela yine yikusajigala ndaŵi jelewu kuti yitande kusipuka payipandicile pamalo gasambano kulekangana ni yijakwe. Mwakulandana ni yeleyi, ŵandusoni akusalekangana ni acimjawo pangani ja kusyoŵelela ku mpingo wasambano. Naga pajigele ndaŵi cisamile kwawula ku mpingo wasambano nambope yikwasawusya kuti asyoŵelele, kamulicisya masengo songa sya m’Baibulo syakuyicisyasi mpaka kwakamucisye:

“M’yoyo tukaleka kutenda yambone, pakuŵa pandaŵi jakwe tucigowola naga tukapela.”—Aga. 6:9.

Akusosekwa kutama kwandaŵi jelewu kuti akusyoŵelele kumaloko kulekangana ni muŵaganicisyaga. Mwambone, amishonale ŵajinji ŵaŵalijiganyisye sukulu ja Gileadi akusatama yaka yejinji mkanajawule kumangwawo ali m’cilambo caŵatumisye. Kutenda yeleyi kukusakamucisya jemanjajo kusyoŵekana ni abale soni kusyoŵelela ndamo jakumaloko.

M’bale jwine jwaŵele ali mkusamasama lina lyakwe Alejandro jwamanyilile kuti kusyoŵelela kumalo jili ngani jekulungwa. Jwalakwe jwasasile kuti, “Tuli tugambile kusama kakumalisya, ŵamkwangu ŵaŵecete kuti, ‘Acimjangu wosope ali mu mpingo watukutyocela!’” M’baleju ŵakumbwisye ŵamkwakwewo kuti ŵaŵecetesoni yakulandanayo yaka yiŵili yipiteyo paŵasamagasoni. Nambo pandaŵi jelejo, jwalosisye lung’wanu ŵane soni ŵacilendo ŵaŵele acimjakwe ŵapamtima.

“Mkaŵecetaga kuti, ‘Ana ligongo cici kala yindu yaliji cenene kulekangana ni masiku agano?’ Pakuŵa nganiluŵa lunda kuwusya ciwusyo celeci.”—Mlal. 7:10.

Akusosekwa kuŵambala kulandanya yakutendekwa ya mpingo wawo wasambano ni wakala. Mwambone, komboleka kuti abale ŵa mumpingo wawo wasambano mpaka aŵe ŵangakungulucika kapena ŵakungulucika kulekangana ni ŵa mumpingo wawo wakala. Agambeje kulola yindu yakusatenda cenene acimjawowo, mpela mwampaka asacile kuti jemanjajo ŵatendeleje wawojo. Ŵandu ŵane ŵali ŵacilendo kumalo kwine kwakwe  aŵele ali mkuliwusya kuti, ‘Ana une ngusalinonyela yisyesyene “likuga lyosope lya abale”?’—1 Pet. 2:17.

“Ajendelecele kuŵenda, ni tacipocela.”—Luk. 11:9.

Ajendelecele kupopela kwa Yehofa kuti ŵakamucisyeje. David jwalisoni jwamkulungwa jwa mumpingo jwasasile kuti, “Akalingaga kumalana nayo yeleyi pajika. Yindu yejinji yikusakomboleka ni cikamucisyo ca Yehofa basi. M’yoyo amsalileje jwalakwe yakusakayo.” Nombe Rachel jwatumkolasile jula, jwasasile kuti, “Naga une ni ŵamkwangu tukulipikana kuti ngatukutenda yejinji ni mpingo, twamsalilaga yeleyo Yehofa mwipopelo kuti, ‘Conde atukamucisye kumanyilila naga tukutenda yineyakwe yampaka yalepelekasye ŵane kuŵa nawe pa ulongo.’ Pambesi pakupopela tukusalinga kumalila ndaŵi jejinji tuli mkukunguluka ni abale soni alongo.”

Naga ali nangolo, ni akuyiwona kuti ŵanace ŵawo akulaga kusyoŵelela kumaloko, apateje ndaŵi ni kupopelaga nawo yalumo ya nganijo. Ŵakamucisyeje kuti akole acimjawo ŵasambano mwakuŵilanjila maŵasa gane gagakwete ŵanace ku nyumba jawo.

Ana mpaka atende wuli kuti ŵakamucisye acalendo ŵayice mu mpingo mwawo? Alinjeje kuŵa nawo pa ujakwe pagambile kwika kwene. Kuti akombole kutenda yeleyi, aganicisyeje ya yindu yakasangalele kutendeledwa yikaŵe kuti wawoji ali mlendo, kaneko atendeje yeleyo. (Mat. 7:12) Ana mpaka yiŵe yakomboleka kuti ŵaŵilanjile alendo pa kulambila kwawo kwa peŵasa, kapena kuti calolele nawo yalumo pologalamu ja mwesi wuliwose ja JW Broadcasting? Ana mpaka ŵaŵilanje kuti cajende nawo yalumo mu undumetume? Naga akulinganya kacakulya ni kulya nawo yalumo, jemanjajo ngasaliŵalila kuti ŵapocele cenene. Ana cindu cine cakamucisya campaka ŵatendele acalendo cili cici?

Mlongo jwine lina lyakwe Carlos jwasasile kuti, “Patwagambile kwika kwene pa mpingo wasambano, mlongo jwine ŵatusalile magolosale gampaka tusume yindu mwakutuluka mtengo. Yeleyi yatukamucisye mnope.” Ŵandu ŵakutyocela kumkuli kwele nyengo jakwe jili jakulekangana ni kwapiteko, mpaka asangalale kwasalila mwampaka awalileje mundaŵi ja citukuta, jakusisima, nambosoni mundaŵi ja wula. Mpakasoni ŵakamucisye mwakwasalila yampaka atende kuti ŵayiceje ŵandu pamtima pali mu undumetume, mwakwasalila yikulupi ya ŵandu ŵa mu mkuliwo.

M’bale Allen jwatumkolasile kundanda kula, atemi mu mpingo wakwe wasambano kupunda caka cimo. Jwalakwe jwatite, “Kundanda kwene natesile yakomboleka kuti namanyilile cenene abale ni alongo. Nambo apano abalewo akusalipikana mpela kuti tuli mliŵasa limo, yeleyi yikusasangalasya mnope.” Allen jwayiweni kuti kusama nganikumtendekasya kusoŵa acimjakwe. Mmalo mwakwe, jwalakwe ŵapatile acimjakwe ŵasambano ŵacaciŵa acimjakwe mpaka kalakala.