JOHN akusatama mu katawuni kane ku Gujarat, m’cilambo ca India. Babagwe ŵabatiswe ni kuŵa Jwamboni sya Yehofa yaka 60 yipiteyo. Jwalakwe pampepe ni acabalegwe msano soni mama ŵawo ŵaliji ŵa dini ja Cikatolika. Jemanjaji ŵasisyaga mnope baba ŵawo.

Lisiku line, babagwe John ŵamsalile mwanagwawoju kuti akapelece cikalata kwa mjawo jwa ku mpingo. Kundaŵi kwa lisikuli, John ŵawulele mnope cala paŵawugulaga cidilamu. Nambope, pakulosya kwapikanila babagwe, ŵataŵile paliŵangapo ni kwawulaga kukupeleka cikalataco wapasi.

Kuŵamtumileko ŵasimene ŵakongwe, ŵaŵalijisoni Ŵamboni sya Yehofa. Ŵaliji ŵamkwawo ŵa mjawo babagwe ŵala. Paŵapocelaga cikalataco, ŵakongwewo ŵamanyilile kuti John awulele cala ni ŵasakaga kumkamucisya. Ŵamcapile paliŵangapo ni mtela, kaneko ŵataŵilepo. Pambesi pakwe, ŵamtelecele tiyi ni kumpa, aku ali mkunguluka najo ya m’Baibulo.

Pandaŵiji, John ŵatandite kwawona mwakuŵajilwa Ŵamboni. Kaneko ŵawusisye ŵakongwewo yiwusyo yiŵili. Candanda, naga Yesu ali Mlungu, soni caŵili, naga Aklistu akusosekwa kupopela kwa Maliya. Yaŵakulupililaga John pa ngani syelesi yaliji yakulekangana ni yaŵakulupililaga babagwe. Pakuŵa jwamkongwejo ŵalijiganyisye ciŵeceto ca Cigujarati, ŵakombwele kumjanga John kutyocela m’Baibulo ja Cigujalati soni ŵampele kabuku ka m’ciŵecetoci ka mtwe wakuti, “Ngani Syambone Syakwamba ya Ucimwene.” (“This Good News of the Kingdom”)

Paŵawujile kumangwakwe ni kuŵalanga kabukuko, John ŵayiweni kuti sano awupatile usyesyene wa m’Baibulo. Kaneko ŵapite kwa jwambopesi ni kum’wusya yiwusyo yiŵili yilayila. Jwambopesijo jwapile mnope mtima mpaka ŵamsomile ni Baibulo, ni kumkalipila kuti, “M’mwe msucile Satana basi! Mundosye m’Baibulo paŵalembile kuti Yesu ngaŵa Mlungu. Papi paŵalekasisye kupopela kwa Maliya. Papi, nguti mundosye!” John ŵasimonjile mnope ni yaŵatesile jwambopesiyi, mwamti ŵatite, “Ngasimbondasoni m’calici ca Katolika.” Soni mpaka apano nganapondeje!

John jwatandite kulijiganya Baibulo ni Ŵamboni. Kaneko, ŵasagwile kutanda kumtumicila Yehofa. Mkupita kwa ndaŵi, acabalegwe ŵane ŵaŵelesoni Ŵamboni. Apano pamasile yaka 60 kutyocela paŵawulele John pacala pala. Nambo liŵasi lyakwe lipalipe mwamti likusamkumbusya kuti ŵawupatile usyesyene ligongo lyakuti ŵamlosisye umbone mtima.—2 Akoli. 6:4, 6.