1, 2. (a) Ana kucenga kwanganitukujembeceyaga mpaka kutukwaye camtuli? (Alole ciwulili cacili penanipa.) (b) Mwakamulana ni lilemba lya Salimo 131, ana ni ndamo japi jampaka jitukamucisye kwendelecelape kukola mtendele wamumtima?

LLOYD ni Alexandra aŵele ali mkutumicila pa Beteli kwa yaka yakupunda 25. Jemanjaji ŵacenjile ni kwasalila kuti akatendeje upayiniya. Ali apikene nganiji yakuŵesye mnope. Lloyd jwasasile kuti, “Nasangalalaga ni kutumicila pa Beteli mwamti nganinganicisyaga kuti mpaka ngamule undumetume wine. Nambope, nayamicile ligongo lya kucengaku. Atamose yaliji m’yoyo, miyesi jakuyicisya natandite kulipikana kuŵa mundu jwangali mate. Yayatendekwaga yaliji yakuti kandaŵi kane cisangalale nambo ndaŵi jine ni kulipikana kuŵa jwangali mate.”

² Ndaŵi ni katema paumi wetu citusimaneje ni kucenga kwangajembeceya. Kucengaku mpaka kututendekasyeje kulaga nganisyo. (Mis. 12:25) Ndaŵi sine payitendekwe yeleyi, mpaka tuyiwoneje kuŵa yakusawusya kwiticisya. Muyakutendekwa mpela yeleyi, ana mpaka tutende wuli kuti tuŵe ‘ŵakuwusimana mtima’? (Aŵalanje Salimo 131:1-3.) Kwende tukambilane yisyasyo ya ŵandu ŵa m’Baibulo soni ya ŵakutumicila ŵa  Yehofa ŵa masiku agano, ŵaŵapakombwele kwendelecelape kukola mtendele wamumtima atamose yindu payacenjile.

3. Ana Yosefe jwasimene ni yindu yamtuli?

³ Aganicisye cisyasyo ca Yosefe. Pa ŵanace wosope ŵaŵakwete Yakobo, mwanace juŵamnonyelaga mnope jwaliji Yosefe. Yeleyi yatendekasyaga kuti acakulugwe amtendeleje jelasi. Yosefe pajwakwete yaka 17, acakulugweŵa ŵamsumisye kuti akaŵe kapolo. (Gen. 37:2-4, 23-28) Kwa yaka 13, Yosefe jwaŵele ali mkupilila ukapolo ku Iguputo soni ukayidi, atamose kuti jwaliji kwakutalikangana ni atatigwe, Yakobo ŵaŵamnonyelaga mnope. Ana cici cacamkamucisye Yosefe kuti akawujila munyuma?

4. (a) Ana Yosefe jwaganicisyaga mnope ya cici pa jwaliji mu ukayidi?(b) Ana Yehofa jwajanjile camtuli mapopelo ga Yosefe?

⁴ Atamose kuti jwaliji mu ukayidi, Yosefe jwaganicisyaga mnope ya majali ga Yehofa. (Gen. 39:21; Sal. 105:17-19) Komboleka kuti jwalakwe jwaganicisyaga mnope ya sagamisi syaŵasagamile ali mwanace. Yeleyi yamtendekasisye kuti akole cikulupi cakuti Yehofa akusamnonyela. (Gen. 37:5-11) Jwalakwe jwapopelaga kwa Yehofa kumsalila yiliyose yayamlagasyaga nganisyo. (Sal. 145:18) M’yoyo, Yehofa jwajanjile mapopelo ga Yosefe mwakumsimicisya kuti caciŵa “ni jwalakwe” mu yakulingwa yosope.—Mase. 7:9, 10. *

5. Ana “mtendele wa Mlungu” mpaka utukamucisye camtuli kwendelecela kumtumicila Yehofa?

⁵ Cinga tusimane ni yakusawusya yamtuli, mpaka tukolepe “mtendele wa Mlungu” wampaka wucenjele “nganisyo” syetu soni kututendekasya kulipikana cenene. (Aŵalanje Afilipi 4:6, 7.) Naga tukulagasika nganisyo, “mtendele wa Mlungu” mpaka utulimbikasye kwendelecela kumtumicila Yehofa soni ngawujila munyuma. Kwende tulole yampaka tulijiganye kutyocela ku yisyasyo ya abale ni alongo ŵamasiku agano ŵaŵasimene ni yeleyi.

6, 7. Ana mapopelo gakusala yatukusosecela pandaŵijo mpaka gatukamucisye camtuli kukola mtendele wamumtima? Apelece cisyasyo.

⁶ Ryan ni Juliette paŵasalile kuti undumetume wawo wapajika wakandaŵi umasile, jemanjaji ŵatengwice mnope. Ryan jwasasile kuti, “Twamsalile yeleyi Yehofa mwipopelo. Twamanyililaga kuti twakwete upile wapajika wakulosya kuti tukusamkulupilila jwalakwe. Mumpingo wetu ŵandu ŵajinji ŵaliji ali agambile kulijiganya kwene usyesyene, m’yoyo twapopesile kwa Yehofa kuti atukamucisye kulosya cisyasyo cambone mnope cakuŵa ŵakulupicika.”

⁷ Ana Yehofa ŵajanjile camtuli lipopelo lyawo? Ryan jwasasile kuti, “Patwagambile kumalisya kupopela, ndaŵi jijojo nganisyo syakulemwecekwa syatwakwete pandanda sila syatyosile. Mtendele wa Mlungu watucenjele mitima jetu soni twakwete macili. Twayiweni kuti Yehofa mpaka ajendelecele kutukamulicisya masengo naga tukwendelecela kola ndamo syambone.”

8-10. (a) Ana msimu wa Mlungu mpaka wutukamucisye camtuli kuti tupakombole kupilila patukulagasika nganisyo? (b) Ana Yehofa mpaka atukamucisye camtuli naga tukuŵika nganisyo syetu pa kumtumicila jwalakwe?

⁸ Kupwatika pa kututamika mtima pasi, msimu wa Mlungu mpaka utukamucisyesoni kupata Malemba gakutukamucisya kumanyilila yindu yayili yakusosecela mnope paumi wetu. (Aŵalanje Yohane 14:26, 27.) Aganicisye ya liŵasa lya Philip ni Mary, lyalyatumicile pa Beteli ciŵandika yaka 25. Mkati mwa miyesi mcece, wosopeŵa acimama ŵawo ŵajasice. Kupwatika pelepa, jwacibale jwa Philip jwajasicesoni. Panyuma pakwe, liŵasali lyatandite kwasamalila babagwe ŵa Mary ŵaŵakwete ulwele wamunganisyo.

⁹ Philip jwasasile kuti, “Naganisyaga kuti ngupakombola  kupilila, nambo kusala yisyene nasoŵecelaga cinecakwe. Naŵalasile lilemba lya Akolose 1:11 mu ngani jakulijiganya ja mu Sanja ja Mlonda. Yisyene napililaga, nambo ngaŵa mnope. Nasosekwaga ‘kupilila yindu yosope ni kuŵa jwakulitimalika soni jwakusangalala.’ Lilembali lyangumbwisye kuti umi wangu kuti uŵe wakusangalala nganiwujegamilaga pa yakutendekwa ya paumi wangu, nambo ligongo lya cikamucisyo ca msimu wa Mlungu.”

¹⁰ Ligongo lyakuti Philip ni Mary ŵaganicisyaga mnope yakumtumicila Yehofa, jwalakwe ŵapele jemanjaji majali m’matala gejinji. Pandaŵi jaŵagambile kutyoka pa Beteli pala, jemanjaji ŵapatile majiganyo ga Baibulo gakwawula pasogolo, mwamti ŵatendesyaga majiganyoga kupunda kamo pa cijuma cilicose. Pakulola ya munyuma Mary jwatite, “Majiganyoga gatutendekasyaga kuŵa ŵakusangalala soni lyaliji litala lya Yehofa lyakutusalila kuti cilicose ciciŵe cenene.”

11, 12. (a) Ana Yosefe jwatesile cici kuti Yehofa ampe majali? (b) Ana Yosefe jwapocele majali gamtuli ligongo lyakupilila kwakwe?

¹¹ Naga yindu yicenjile paumi wetu mwangajembeceya, mpaka tutande ganicisya mnope ya yakusawusyayo. Komboleka kuti yeleyi ni yayikamtendecele Yosefe. M’malo mwakwe, jwalakwe jwasagwile kutenda yindu yayaliji yambone mwakamulana ni muyaŵelele yindu paumi wakwe. Yeleyi, yatendekasisye kuti Yehofa amjaliwe. Atamose kuti jwaliji mu ukayidi, Yosefe jwakamulaga masengo galigose gaŵampaga jwamkulungwa jwa ŵakulondela nyumba ja akayidi, mpela mwajwatendelaga pakamula masengo kunyumba ja Potifala.—Gen. 39:21-23.

¹² Lisiku line, Yosefe jwapocele ukumu wakwalolela akayidi ŵaŵili ŵele pandanda ŵatumicilaga pamalo gakucimbicika mnope m’nyumba ja Falawo. Yosefe jwatendelaga akayidiŵa yindu yambone. Yeleyi yatendekasisye kuti akayidiŵa aŵe ŵagopoka mwamti mpaka ŵatandite kusala yakusawusya yawo soni sagamisi syakusawusya syaŵasagamile. (Gen. 40:5-8) Nambo Yosefe nganamanyililaga kuti kukambilanaku cikuŵe ni yakuyicisya yambone kwa jwalakwe. Atamose kuti jwalakwe jwatemi mu ukayidi kwa yaka yejinji, pambesi pakwe ŵamkopwesye. Lisiku lilyolyo ŵamsagwile kuti aŵe jwaŵili kwa mwenye Falawo.—Gen. 41:1, 14-16, 39-41.

13. Ana tukusosekwa kutenda yindu mwamtuli kuti Yehofa atupe majali, mwangasamala kandu kuti tukusimana ni yakusawusya?

¹³ Mpela muyaŵelele kwa Yosefe, m’wejisoni mpaka tusimane ni yindu yanganituŵa tukombwele kuyipilila. Nambope, naga tukwendelecela kuŵa ŵakuwusimana mtima soni tukulingalinga kutenda yambone, Yehofa cacitupa majali. (Sal. 37:5) Yisyene kuti ndaŵi sine mpaka ‘tumalilwe lunda,’ nambo “ngaŵa mkwikana pakusoŵa cakutenda.” (2 Akoli. 4:8) Naga tukuganicisya mnope ya undumetume wetu, maloŵe gaŵaŵecete Pauloga mpaka gakwanilicikwe petuwe.

14-16. Ana Filipo jwajendelecele camtuli ganicisya ya undumetume wakwe, mwangasamala kandu kuti yindu yacenjile paumi wakwe?

¹⁴ Jwakulalicila Filipo ali cisyasyo cambone. Jwalakwe jwaganicisyaga mnope ya undumetume wakwe atamose kuti yindu yacenjile paumi wakwe. Ndaŵi jine, jwalakwe jwasangalalaga ni undumetume wasambano waŵapocele ku Yelusalemu. (Mase. 6:1-6) Nambo kaneko yindu yacenjile. Aklistu ŵatandite kulagasidwa. Pandaŵiji Sitefano jwawulajidwe. Yeleyi yatendekasisye kuti Aklistu atile ku Yelusalemu. Nambope Filipo jwajendelecele kutumicila Yehofa mwamti jwapite mumsinda wa Samaliya. Kweleku ŵandu ŵaliji mkanasipikaneje ngani syambone.—Mat. 10:5; Mase. 8:1, 5.

¹⁵ Filipo jwaliji jwakusacilila kwawula kulikose kwawukamlongolele msimu wa Mlungu. M’yoyo, Yehofa jwakamulicisye masengo Filipo kuti utenga wa ngani syambone uyice m’mikuli jasambano. Filipo jwatendaga yindu mwangali lusagu, yayatendekasisye kuti Asamaliya aŵeje ŵakusangalala ligongo pandaŵiji Ayuda ŵawonaga Asamaliya kuŵa mpela ŵangali mate. Ni ligongo lyakwe likuga lya ŵandu lyapikanile utengawo ‘ni mtima umo.’—Mase. 8:6-8.

¹⁶ Kaneko msimu wa Mlungu wamlongolele Filipo ku misinda ja Asidodi soni Kaisaleya. M’misindaji mwapali ŵandu ŵajinji ŵanganaŵa Ayuda. (Mase. 8:39, 40) Panyuma pa yaka 20 cilalicile kandanda ku Samaliya, yindu paumi wa Filipo yacenjilesoni. Kaneko ni liŵasa lyakwe, jwalakwe jwatamilicice kukoko ni kulalicilaga. Mwangasamala kandu kuti yindu yacenjile paumi wakwe, jwalakwe jwajendelecele ganicisya ya undumetume wakwe. Yakuyicisya yakwe yaliji yakuti jwalakwe soni liŵasa lyakwe ŵapocele majali gamajinji kutyocela kwa Yehofa.—Mase. 21:8, 9.

17, 18. Yindu payicenjile paumi wetu, ana kuganicisya ya undumetume wetu mpaka kutukamucisye camtuli?

¹⁷ Ŵandu ŵajinji ŵali mu undumetume wandaŵi syosope mpaka ajiticisye kuti kuganicisya mnope ya undumetume kukusakamucisya kuti tuŵeje wakusangalala atamose yindu payicenjile paumi wetu. Osborne ni Polite, liŵasa lya ku South Africa, paŵatyosile pa Beteli, ŵaganisyaga kuti cakapate masengo mwacitema soni malo gakutama. Osborne jwatite, “Cakutesya canasa caliji cakuti masengo nganitugapata mwacitema mpela mwatwaganicisyaga.” Ŵamkwakwe, Polite, jwatite, “Kwa miyesi jitatu nganitupata masengo soni nganitukola likobili atamose lyepowole. Kusala yisyene yaliji yakusawusya mnope.”

¹⁸ Ana cici cacakamucisye jemanjaji kuti apilile yakusawusya yeleyi? Osborne jwatite, “Kulalicila yalumo ni mpingo ni kwakwatukamucisye mnope kuti tukole nganisyo syambone. Twaganisisye  kuti bola tutendeje yejinji pamasengo gakulalicila, m’malo mwakwamba kutama pasi ni kudandawulaga. Kutenda yeleyi kwatukamucisye kuti tuŵeje ŵakusangalala mnope. Nambope, twajendelecele kusosasosa masengo mwamti pambesi pakwe twagapatile.”

19-21. (a) Ana cici campaka citukamucisye kwendelecela kola mtendele wamumtima? (b) Ana ni yindu yapi yampaka tupate ligongo lya kucenga kwa yindu paumi wetu?

¹⁹ Yisyasyo yatukambileneyi yilosisye kuti naga tukutenda yosope yampaka tukombole kuti tukole nganisyo syambone yindu payicenjile, nambosoni kwembeceyaga mwacikulupi pa Yehofa, tucijendelecela kola mtendele wa mumtima. (Aŵalanje Mika 7:7.) Mwine ndaŵi jine mpaka tumanyilile kuti mwatwatendele yindu pandaŵi jayacenjile yindu paumi wetu, yalimbikasisye unasi wetu ni Yehofa. Polite jwatumsasile jula jwatite, “Kucenga undumetume kungamucisye kumanyilila ngopolelo ja kwegamila kwa Yehofa pasimene ni yakusawusya paumi wangu. Unasi wangu ni Yehofa sambano uli wakulimba mnope.”

²⁰ Mary, jwatumsasile jula akwendelecelape kwasamalila babagwe ŵakalambale kwineku ali mkutenda upayiniya. Jwalakwe jwatite, “Nalijiganyisye kuti pandandite kulaga nganisyo, ngusosekwa kwima kaje ni kupopela kaneko ni kupumula. Cindu cekulungwa canalijiganyisyesoni cili cakuti ngusosekwa kulekaga cilicose m’miyala mwa Yehofa, soni yeleyi ni yayiciŵa yakusosekwa mnope msogolomu.”

²¹ Lloyd ni Alexandra ŵatwasasile kundanda kwa nganiji, ŵajiticisye kuti kucenga kwaŵasimene nako kwalinjile cikulupi cawo m’litala lyanganajembeceyaga. Nambo jemanjaji ŵatite, “Yindu yakulinga cikulupi yeleyi yitukamucisye kumanyilila naga cikulupi cetu cili cakulimba kapena iyayi soni yitukamucisye kuti tuŵeje ŵakulimba patusimene ni yakusawusya. Yitukamucisyesoni kuti tuŵe ŵandu ŵambone.”

22. Yindu payicenjile paumi wetu, ana mpaka tuŵe ŵakusimicisya ya cici, naga tukwendelecelape kuŵa ŵakulupicika?

²² Umi wetu mpaka ucenje mwangajembeceya. Mwine mpaka tupocele undumetume wasambano m’likuga lya Yehofa, kusimana ni yakusawusya ya m’cilu, kapena kusamalila liŵasa lyetu m’litala lyasambano. Nambope, tukusosekwa kuŵa ni cikulupi cakuti Yehofa catusamalileje soni cacitukamucisya pandaŵi jakwe. (Aheb. 4:16; 1 Pet. 5:6, 7) Pandaŵi ajino, kwende tulinjelinje kutenda yambone mwakamulana ni mwayiŵelele yindu paumi wetu. Tupopeleje kwa Yehofa soni tulijiganyeje kumjegamila jwalakwe ni mtima wosope. Kutenda yeleyi, cinga tusimene ni kucenga kwamtuli, tucikolape mtendele wamumtima.