1. Ana wosopewe tukusakumbila ŵacibale wetu ali atesile wuli?

MLONGO jwine lina lyakwe Pauline * jwatite, “Kutandila panagambile kulijiganya usyesyene, nasacililaga kuti jwalijose jwa mwiŵasa mwangu akasimanikwe m’Paladaiso. Nasacililagasoni kuti une ni ŵamkwangu (Wayne) soni mwanace jwangu tumtumicileje yimpepe Yehofa.” Ana wawojo akwete ŵacibale ŵanganammanyilile Yehofa soni kumnonyela? Mwakulandana ni Pauline komboleka kuti wawojo akusasacilila kuti ŵacibale ŵawo wosope amtumicileje Yehofa.

2. Ana mungani ajino citukambilane yiwusyo yapi?

² Nganituŵa twakanganicisye ŵacibale ŵetu kupikanila ngani syambone kuti akapate umi wangamala. Nambo mpaka twalimbikasye kuti awugule nganisyo soni mitima jawo kuti apikanile utenga wa m’Baibulo. (2 Tim. 3:14, 15) Ligongo cici tukusosekwa kwalalicila ŵacibale ŵetu? Ligongo cici tukusosekwa kwapikanicisya ŵacibale ŵetu? Ana mpaka twakamucisye camtuli ŵacibale ŵetu kuti atande kumnonyela Yehofa mpela m’weji? Ana abale ni alongo ŵa mumpingo mwetu mpaka atukamucisye camtuli?

3. Mwakamulana ni 2 Petulo 3:9, ligongo cici tukusosekwa kwalalicila ŵacibale ŵetu?

³ Pacangakaŵapa Yehofa cajonanje cilambo cakusalaci. Nambo ŵandu ŵali “ŵakuŵajilwa umi wangamala” cacikulupuka. (Mase. 13:48) Tukusamalila ndaŵi soni macili gejinji tuli mkwalalicila ŵandu ŵakuti ngatukwamanyilila. Myoyo yili yakupikanika kuti tukusasakaga kuti ŵacibale ŵetu atumicileje Yehofa ni m’weji. Atati  ŵetu ŵacinonyelo Yehofa, “ngakusaka kuti ŵane ajonanjidwe, nambo kuti apitikuce mtima.”—Aŵalanje 2 Petulo 3:9.

4. Ana yindu yapi yampaka tulemwesye patukwalalicila ŵacibale ŵetu?

⁴ Tukumbucileje kuti utenga wakulupusya mpaka ulalicidwe m’litala lyakuŵajilwa kapena iyayi. Mwacisyasyo, patukumlalicila mundu jwangatukummanyilila tukusaŵeceta mwacinonyelo, nambo patukumlalicila jwacibale jwetu mpaka tuŵecete mwangapita mumbali.

5. Ana tukusosekwa kukumbucila cici mkanitwalalicile ŵacibale ŵetu?

⁵ Ŵajinji mwa m’weji patukuganicisya ya ndaŵi jandanda jatwalalicile ŵacibale ŵetu, mwine tukusalijimba magambo. Mwine tukusayikana paganisya kuti tukakamulicisye masengo litala line. Ndumetume Paulo ŵasalile Aklistu kuti, “Maloŵe genu gaŵeje ndaŵi syosope gakusangalasya ni kupatisya pindu ŵane, pakutenda myoyo tim’manyilile mwele mumkwenelela kumjanjila mundu julijose.” (Akolo. 4:5, 6) Ndaŵi syosope patukuŵecetana ni ŵacibale ŵetu tukusosekwa kumbucila maloŵe gelega. Ligongo naga ngasamala mpaka tutande kwanyosya jemanjaji mmalo mwakwakamucisya kuti apikanile yatukwasalila.

6-7. Apelece cisyasyo cacikulosya kusosekwa kwa kumpikanicisya mjetu jwa mu ulombela jwali jwangakulupilila.

⁶ Twapikanicisyeje. Pauline jwatumsasile jula jwatite, “Pandanda nagambaga kusaka kuti mbeceteje ni ŵamkwangu yakwamba Mlungu soni Baibulo, mwamti nganituŵecetanaga yindu yine.” Nambope, ŵamkwakwe Pauline (Wayne), nganamanyililaga yindu yejinji ya m’Baibulo soni nganayipikanicisyaga yaŵaŵecetaga ŵamkwawo. Ŵalumeŵa ŵayiwonaga kuti ŵamkwakweŵa ŵagambaga ganisya ya dini jawo basi. Ŵalumeŵa ŵadandawulaga kuti ŵamkwakwe  ajinjile m’kagulu kakogoya mnope soni kuti alambusidwe.

⁷ Pauline jwaŵecete kuti kwandaŵi jelewu jwaŵele juli mkumalila ndaŵi jejinji mnope juli mkukunguluka ni abale ni alongo kumisongano, kukulalicila soni yindu yine. Jwalakwe jwatite, “Ndaŵi sine ŵamkwangu nganamsimanaga jwalijose pamlango, mwamti lyakamulaga lipowo.” Yili yakupikanika kuti ŵalumeŵa ŵalisoŵaga liŵasa lyakwe. Jwalakwe nganiŵamanyililaga ŵandu ŵaŵakungulukaga ni Pauline, soni ŵatandite ganisya kuti Pauline jwawonaga acimjakwewo kuŵa ŵakusosekwa kupunda jwalakwe. Ŵalumeŵa ŵajogoyisye ŵamkwawo kuti ciŵalece ulombela. Ana akuganisya kuti mlongoju akatesile cici kuti ŵapikanicisye ŵamkwakweŵa?

8. Mwakamulana ni 1 Petulo 3:1, 2, ana pakusasosekwa cici kuti ŵacibale ŵetu acenje ndamo syawo?

⁸ Tukoleje ndamo syambone. Ndaŵi syejinji yatukusatenda yikusiyakwayaga ŵacibale ŵetu kupunda yatukusaŵeceta. (Aŵalanje 1 Petulo 3:1, 2.) Panyuma pakwe Pauline ŵayiweni kuti yeleyi yili yisyene. Jwalakwe jwatite, “Namanyililaga kuti ŵamkwangu akusatunonyela soni kuti nganakola cakulinga cakundeka ulombela. Nambo yaŵasasile yandendekasisye kuti ndande kutenda yindu mwakusasacila Yehofa. Mmalo mwakuŵeceta yindu yejinji, nayiweni kuti ngusosekwa kuŵa jwacisyasyo cambone kupitila mu ndamo syangu.” Pauline jwalesile yakwakanganicisya ŵamkwakwe kuti agambeje kuŵecetana nawo yindu ya m’Baibulope, mmalo mwakwe ŵaŵecetanaga nawo yine. Wayne ŵatandite kwawona ŵamkwakweŵa kuti ali mundu jwamtendele nambosoni mwanace jwawo jwatandite kwacimbicisya. (Mis. 31:18, 27, 28) Wayne paŵayiweni kuti liŵasa lyakwe litandite kwenda cenene ligongo lya utenga wa m’Baibulo, jwaganisisye yakutanda kupikanila utengawu.—1 Akoli. 7:12-14, 16.

9. Ligongo cici tukusosekwa kupitilisya kwakamucisya ŵacibale ŵetu?

 ⁹ Alinjejelinjejepe kwakamucisya ŵacibale ŵawo. Yehofa ŵapelece cisyasyo kwa m’weji. Ndaŵi syosope jwalakwe ‘aŵele’ ali mkwapa ŵandu upile ŵakupikanila ngani syambone kuti apate umi wangamala. (Yel. 44:4) Ndumetume Paulo ŵamsalile Timoteyo kuti akusosekwa kupitilisya kwakamucisya ŵane. Ligongo cici jwasasile yeleyi? Ligongo lyakuti yeleyi yikamkamucisye kuti akulupusye umi wakwe soni wa ŵandu ŵakumpikanila. (1 Tim. 4:16) Tukusitwanonyelaga ŵacibale ŵetu soni tukusasakaga kuti awumanyilile usyesyene wawukusasimanikwa m’Maloŵe ga Mlungu. Mkupita kwa ndaŵi, yaŵaŵecetaga Pauline nambosoni yitendo yakwe yacenjile mnope liŵasa lyakwe. Apanopano jwalakwe akusangalala mnope kutumicila Yehofa yimpepe ni ŵamkwakwe. Wosopeŵa apano akutenda upayiniya, soni kupwatika pelepa Wayne ali jwamkulungwa jwa mumpingo.

10. Ligongo cici tukusosekwa kuŵa ŵakuwusimana mtima?

¹⁰ Tuŵeje ŵakuwusimana mtima. Patusagwile kumtumicila Mlungu soni kutenda yambone, ŵacibale ŵetu mpaka ayiwone kuŵa yakusawusya kupikanicisya yatusagwileyo. Cindu candanda campaka ciyiceje munganisyo mwawo ni cakuti ngatupitilisya kutendaga nawo yindimba ya dini soni yandale. Mwamti ŵacibale ŵetuŵa mpaka atutumbilile mnope ligongo lya yeleyi. (Mat. 10:35, 36) Nambo ngatukusosekwa ganisya kuti jemanjaji nganaŵa acenjile. Naga tukuganisya myoyo mpaka yiŵe mpela tukwalamula kuti nganaŵa ŵakuŵajilwa kupocela umi wangamala. Yehofa nganatupa m’weji udindo wakwalamula ŵane, nambo apelece udindowu kwa Yesu. (Yoh. 5:22) Naga tukuŵa ŵakuwusimana mtima, yiciŵa yangasawusya kuti ŵacibale ŵetuwo apikanile yatukusitwasalila.—Alole libokosi lyakuti “ Akamulicisyeje Masengo Webusayiti Jetu Pakwiganya.”

11-13. Ana tukulijiganya cici pakwamba mwaŵatendelaga yindu Alice ni acinangolo ŵakwe?

¹¹ Tulosyeje cinonyelo nambo mwakusamala. (Mis. 15:2) Aganicisye ya cisyasyo ca mlongo jwine lina lyakwe Alice. Jwalakwe jwalijiganyisye yakwamba Yehofa pandaŵi jiŵatamaga kwakutalikangana mnope ni acinangolo ŵakwe ŵanganakulupililaga kuti kwana Mlungu soni ŵaŵayikuyaga yandale. Jwalakwe jwayiweni kuti akusosekwa kwamanyisya acinangolowo yindu yajwalijiganyaga. Jwalakwe ŵatite, “Patukucelewa kwasalila ŵandu ŵamwiŵasa mwetu yindu yatukusakulupilila ni payikusatendekasya kuti tukakamulanaga nawo mnope.” Jwalakwe jwasagwile ngani syaŵasiwonaga kuti acinangolo ŵakwe mpaka atende nasyo lung’wanu, mpelaga ngani ja cinonyelo. (1 Akoli. 13:1-13) Jwalakwe jwayamicile acinangolo ŵakwe ligongo lyakuti ŵamlelite mwamti ŵapele mbaso. Alice paŵasalile acinangoloŵa kandanda yindu yasambano yaŵakulupililaga, jemanjaji nganiyasangalasya.

¹² Alice paŵaliji kwa acinangolo ŵakwe, nganaleka kuŵalanga Baibulo lisiku lililyose. Jwalakwe jwatite, “Yeleyi yakamucisye kuti mama ŵangu apikanicisye kuti Baibulo jili jakusosekwa mnope kwa une.” Konjecesya pelepa, babagwe Alice ŵaganisisye yakuŵalanga Baibulo kuti ajipatile magongo soni kuti apikanicisye ligongo lyakwe mwanace jwawo jwacenjile. Alice jwatite, “Babaŵa napele Baibulo soni nalembile tumalaŵe twakwakamucisya kuti ajipikanicisye.” Ana yakuyicisya yakwe yaliji yamtuli? Mmalo mwakujipatila magongo Baibuloji, ŵatandite kusangalala ni yaŵaŵalasileyo.

¹³ Atamose tuli mkusimana ni yakulingwa tukusosekwa kwalosya ŵane cinonyelo nambo tuŵejesoni ŵakusamala. (1 Akoli. 4:12b) Mwacisyasyo, acinangolo ŵakwe Alice ŵamsisyaga. Jwalakwe jwatite, “Panagambile kubatiswa, mayi ŵatite ndili mwanace jwakusakala.” Ana Alice ŵatesile wuli? Jwalakwe jwatite, “Mmalo  mwakujiŵambala nganiji, mwaulemu nasalile kuti sagwile kuŵa Jwamboni sya Yehofa soni nganimba njenjile nganisyo panganiji. Nalinjile kwasimicisya kuti ngusinanonyela. Wosope twalisile, kaneko natelecele yakulya yakunong’a. Kutandila papopo, mama ŵangu ŵatandite kuyiwona kuti Baibulo jandendekasisye kuŵa mundu jwambone.”

14. Ligongo cici ngatukusosekwa kunda kuti ŵacibale ŵetu acenje nganisyo syetu pakumtumicila Yehofa?

¹⁴ Mpaka pajigale ndaŵi jelewu ŵacibale ŵetu mkanaŵe kupikanicisya ligongo lyakwe kutumicila Yehofa tukusakuwona kuŵa kwakusosekwa. Mwacisyasyo, Alice pajwaganisisye yakutenda upayiniya mmalo mwakutenda yaŵasakaga acinangolo ŵakwe, mamagwe yakwayiye mwamti ŵalisile. Nambope Alice nganacenga. Jwalakwe ŵatite, “Naga tukukunda kuti atusagulile yakutenda ni kuti cangambeje kutusagulila yakutenda pangani jilijose. Nambo naga tukuŵa ŵacinonyelo soni ŵakulimba patukutenda yindu ni liŵasa lyetu, ŵane mwiŵasamo akusatanda kutupikanila.” Yeleyi ni yayamtendecele Alice. Apano acinangolo ŵakwe wosope akutenda upayiniya, soni babagwe ali jwamkulungwa jwa mumpingo.

15. Mwakamulana ni Mateyu 5:14-16 soni 1 Petulo 2:12, ana “ndamo syambone” mpaka syakamucisye camtuli ŵacibale ŵetu?

¹⁵ Yehofa akusiŵawutila ŵandu kwa jwalakwe kupitila mu “masengo gambone” ga mpingo wa Ciklistu. (Aŵalanje Mateyu 5:14-16; 1 Petulo 2:12.) Naga mjawo jwa mu ulombela nganaŵa Jwamboni sya Yehofa, ana pakwete pasimene ni abale ni alongo ŵa mumpingo mwawo? Pauline, jwatumkolasile jula, ŵaŵilanjilaga abale ni alongo kumangwakwe ni cakulinga cakuti amanyigane ni ŵamkwakwe. Ŵamkwakweŵa  akusakumbucila yaŵatite m’bale jwine pakwakamucisya kuti apikanicisye mwaŵelele Ŵamboni sya Yehofa. Jwalakwe jwatite, “M’balejo nganajawula kumasengo kwakwe ni cakulinga cakuti ayice kunyumba kuti tulolele mpila. Pelepo nayiweni kuti Ŵamboni akusatendagasoni yindu yine.”

16. Ligongo cici tukusosekwa kwaŵilanjila ŵacibale ŵetu kumisongano?

¹⁶ Litala lyakwakamucisya ŵacibale ŵetu lili kwaŵilanjila kumisongano jetu. (1 Akoli. 14:24, 25) Kusimanikwa kwandanda pamisongano kwa Wayne paliji pa Cikumbucilo. Jwalakwe jwasimanikwe pa msonganowu ligongo waliji wejipi soni watendekwe ali aŵelwice kumasengo. Jwalakwe jwatite, “Nganimbikanicisya yajasalaga nganijo, nambo cangusakumbucila cili ŵandu ŵakwe. Jemanjajo ŵambocele cenene soni ŵangomasisye mwakusangalala. Kusala yisyene nayiweni kuti ali ŵandu ŵambone.” Liŵasa line lyakamucisyaga ŵamkwakwe Wayne kumsamalila mwanace jwakwe pali kumisongano soni mu undumetume. Mwamti Wayne jwasagwile kuti alijiganyeje Baibulo ni jwamlume jwa m’liŵasali, pakusaka kuti ayipikanicisye yakusakulupilila ŵamkwakwe.

17. (a) Ana ngatukusosekwa kulijimba magambo pa yindu yapi? (b) Ligongo cici ngatukusosekwa kuleka kwakamucisya ŵacibale ŵetu?

¹⁷ Tukukulupilila kuti ŵacibale ŵetu tucitumicila nawo yimpepe Yehofa. Komboleka kuti tulinjilelinjile kuti ŵacibale ŵetu aŵe ŵakutumicila ŵa Yehofa, nambo ngayikukomboleka. Naga yili myoyo ngatukusosekwa kulijimba magambo ligongo lya yindu yasagwile kutenda acimsyenewo. Yili myoyo ligongo nganituŵa tumkanganicisye mundu kuti akamulane ni yatukusakulupililaga. Nambo naga ŵacibale ŵetu akulola yatukuti kasangalale patukumtumicila Yehofa, yicitendekasya kuti acenje nganisyo syawo. Twapopeleleje jemanjaji soni kuŵecetana nawo mwakusamala. Tukusosekwa kupitilisyape kwakamucisya. (Mase. 20:20) Tukakayicilaga kuti Yehofa cacitupa upile ligongo lyakulimbicila kwetu. Naga ŵacibale ŵetu akusagula kupikanila yatukwasalila nikuti cacikulupuka.