1. Ana ŵani ŵaŵatesile yakomboleka kuti kupagwe mpingo wasambano ku Filipi?

PAŴAKOPOCELE mumsinda wa Filipi wawaliji pasi paulamusi wa Loma, ndumetume Paulo, Sila, Luka soni Timoteo ŵasimene ŵandu ŵajinji ŵaŵatendaga lung’wanu ni ngani syakwamba Ucimwene. Abale mcece ŵakulipelekaŵa ŵakamucisye pakutamilikasya mpingo. Mwamti ŵakulijiganyawo ŵatandite kusongana ku nyumba ja Lidiya juŵaliji jwakwapocela cenene acalendo.—Mase. 16:40.

2. Ana mpingo wa ku Filipi wasimene ni yakusawusya yamtuli?

² Mkanipapite ndaŵi mpingo wasambanowu wasimene ni cakusawusya. Satana ŵatendekasisye kuti ŵandu ŵaŵaŵenganaga ni usyesyene atande kwalagasya Aklistu ŵakulupicikawo. Paulo ni Sila ŵataŵidwe, kwapulidwa ni yikoti, nambosoni ŵawugalile m’ndende. Ali ŵagopwele, jemanjaji ŵapite kuja kukuwonegana ni ŵakulijiganya ŵala kuti akalimbikasye. Kaneko Paulo, Sila ni Timoteo ŵatyosile mu msinda mula, nambo Luka ŵasigele kukoko. Ana abale ni alongo ŵaŵaliji mumpingo wasambanowo akatesile cici? Ni cikamucisyo ca msimu wa Yehofa, ŵakulupilila ŵasambanowo ŵapitilisye kumtumicila jwalakwe mwakulipeleka. (Afil. 2:12) Paulo jwakwete magongo gambone gakusangalalila ligongo lya yaŵatesile jemanjaji.

3. Mwakamulana ni yayili pa Afilipi 1:9-11, ana Paulo jwapopesile ya cici?

³ Panyuma pa yaka 10, Paulo ŵawulembele cikalata mpingo wa ku Filipi. Patukuŵalanga cikalataci, mpaka yiŵe yangasawusya kulola cinonyelo caŵakwete Paulo kwa abalewo. Jwalakwe jwalembile kuti, “Ngusinamnonyela ni mtima wangu wosope,  pakusyasya cinonyelo ciŵalosisye Klistu Yesu.” (Afil. 1:8) Jwalembelesoni kuti jwapopelelaga jemanjajo. Jwalakwe jwamŵendaga Yehofa kuti ŵakamucisye kuŵa ŵakunonyelana mnope, kusagula yambone mnope, kuŵa ŵangali cileŵi cilicose, kuŵambala kwakuŵasya ŵane, soni kupitilisya kusogola yisogosi yakulungama. Mwangakayicila m’wejisoni mpaka tulijiganye yejinji kutyocela pa maloŵe ga Paulo gakutyocela pasi pamtimaga. (Aŵalanje Afilipi 1:9-11.) Munganiji, citukambilane yindu yaŵasasile Paulo, soni citulole mwampaka tuyikamulicisye masengo.

4. (a) Mwakamulana ni 1 Yohane 4:9, 10, ana Yehofa jwalosisye camtuli cinonyelo cakwe kwa m’weji? (b) Ana tukusosekwa kumnonyela Mlungu mpaka papi?

⁴ Yehofa ŵatulosisye cinonyelo cakwe cekulungwa mwakutumisya Mwanace jakwe pacilambo capasi kuti awe ligongo lya m’weji. (Aŵalanje 1 Yohane 4:9, 10.) Cinonyelo cekulungwa caŵatulosisye Mlunguci cikusatutendekasya kuti m’wejisoni tumnonyeleje. (Alo. 5:8) Ana tukusosekwa kumnonyela Mlungu mpaka papi? Yesu jwajanjile ciwusyoci paŵamsalile Mfalisi jwine kuti, ‘Mwanonyeleje Ambuje Mlungu jwenu ni mtima wenu wosope, ni umi wenu wosope ni macili genu gosope.’ (Mat. 22:36, 37) Tukusasosekwa kumnonyela Mlungu ni mtima wetu wosope. Kupwatika pelepa, lisiku lililyosye tukusasosekwa kulimbisya cinonyelo cetu pa jwalakwe. Paulo ŵasalile ŵandu ŵa ku Filipi kuti ‘amnonyeleje mnope’ Mlungu. Ana mpaka tutende cici kuti tulimbisye cinonyelo cetu pa Mlungu?

5. Ana cinonyelo cetu cikusalimba camtuli?

⁵ Kuti tumnonyeleje Mlungu tukusosekwa kummanyilila kaje. Baibulo jikusati, “Mundu jwangali cinonyelo nganaŵa mwanace jwa Mlungu pakuti Mlungu ali cinonyelo.” (1 Yoh. 4:8) Ndumetume Paulo jwalosisye kuti cinonyelo cetu pa Mlungu mpaka cilimbe naga ‘tukumanyilila yayili yakuwona’ yakwamba jwalakwe. (Afil. 1:9) Patwatandite kulijiganya Baibulo, twatandite kumnonyela Yehofa atamose kuti nganitumanyililaga yejinji ya jwalakwe. Kaneko patwalijiganyisye yejinji yakwamba Yehofa, cinonyelo cetu pa jwalakwe calimbile mnope. Ni ligongo lyakwe yili yakusosekwa mnope kulijiganya Baibulo mwakutamilicika soni ganicisya yatulijiganyisyeyo.—Afil. 2:16.

6. Mwakamulana ni 1 Yohane 4:11, 20, 21, ana mpaka tulosye camtuli kunonyelana mnope?

⁶ Cinonyelo cekulungwa cakusatulosya Mlungu cikusatulimbikasya m’wejisoni kwanonyela abale ŵetu. (Aŵalanje 1 Yohane 4:11, 20, 21.) Komboleka tukusayiwona kuti kwanonyela abale soni alongo ŵetu kuli kwangasawusya. Yeleyi yili myoyo ligongo lyakuti tukusamlambila Yehofa soni kusyasya ndamo syakwe syambone. Tukusamsyasya Yesu juŵalosisye cinonyelo cekulungwa mwakupeleka umi wakwe ligongo lya m’weji. Nambope, ndaŵi sine mpaka tuyiwone kuŵa yakusawusya kupikanila lilamusi lyakuti tunonyelaneje. Kwende tulole yayatendekwe mumpingo wa ku Filipi.

7. Ana tukulijiganya cici kutyocela pa msyungu waŵapelece Paulo kwa Yuwodiya ni Sintike?

⁷ Yuwodiya ni Sintike ŵaliji alongo ŵakulimbicila ŵaŵatumicile “pamo” ni ndumetume Paulo. Nambope komboleka kuti jemanjaji ŵakundile kuti yindu yine yatendekasye kuti agaŵikangane. M’cikalata cakwe cakwawula kumpingo waŵatumicilaga alongoŵa, Paulo ŵakolasile Yuwodiya ni Sintike soni ŵapele msyungu wangapita mumbali kuti akusosekwa kuŵa ‘ŵakamulana.’ (Afil. 4:2, 3) Paulo jwayiwenisoni kuti yaliji yakamucisya kuwusalila mpingo wosope kuti, “Mtendeje yosope yene mwanganyinyilika ni mwangasisya.” (Afil. 2:14) Mwangakayicila, msyungu wangapita mumbali waŵapelece Paulo nganiwugamba kamucisya  alongo ŵakulupicikaŵa, nambo mpingo wosope kuti apitilisye kunonyelana mnope.

8. Ana cici campaka citutendekasye kuyiwona kuŵa yakusawusya kwanonyela abale ŵetu, soni cici campaka citukamucisye?

⁸ Ndaŵi sine mpaka yitusawusyeje kwanonyela abale ni alongo mwakutenda yaŵatesile Yuwodiya ni Sintike, ni kwambaga kulolecesya yakulemwa yawo. Wosopewe tukusalemwesyaga lisiku lililyose. Naga tukusagamba kutamila kulolecesya yakulemwa ya ŵane, cinonyelo cetu pa jemanjajo mpaka cinandipe. Mwacisyasyo, naga m’bale aliŵalile kutukamucisya kuswejesya m’Nyumba ja Ucimwene mpaka yitutumbilikasye. Naga tukutanda kuŵalanjila yakulemwa yaŵele ali mkutenda m’bale jwetujo nikuti mpaka tutande kumtumbilila mnope, soni cinonyelo cetu pa jwalakwe cikusanandipa. Naga yikusiyatendecela yakulandanayi mpaka yiŵe cenene kumbucila kuti Yehofa akusamanyilila ungali umlama wetu soni wa abale ŵetu. Mwangasamala ya ungali umlama welewu, jwalakwe akusapitilisyape kwanonyela abale ŵetu soni m’weji. Ligongo lya yeleyi, tukusosekwa kusyasya cinonyelo ca Yehofa mwakulola yambone mwa abale ŵetu. Naga tukulimbicila kwanonyela abale ŵetu, tucilimbisya mkamulano wetu.—Afil. 2:1, 2.

9. Ana ‘yindu yambone mnope’ yaŵayikolasile Paulo m’cikalata cakwawula ku Filipi yikupwatikapo yapi?

⁹ Mwakusalilidwa ni msimu weswela, Paulo ŵakamucisye ŵandu ŵa ku Filipi soni Aklistu wosope kuti ‘asaguleje yambone mnope.’ (Afil. 1:10) Yindu yambone yeleyi yikupwatikapo kuswejesya lina lya Yehofa, kwanilicikwa kwa yindu yaŵasasile kuti cacitenda jwalakwe, soni mtendele ni mkamulano wa mumpingo. (Mat. 6:9, 10; Yoh. 13:35) Naga tukuyiwona yinduyi kuŵa yakusosekwa mnope paumi wetu, tucilosya kuti tukusamnonyela Yehofa.

10. Ana tukusosekwa kutenda cici kuti Yehofa atuwone kuŵa ŵangali cileŵi cilicose?

¹⁰ Paulo jwasasilesoni kuti tukusosekwa kuŵa “ŵangali cileŵi cilicose.” Yeleyi ngayikugopolela kuti tukusosekwa kuŵa ŵamlama. M’weji nganituŵa tukombwele kuŵa ŵangali cileŵi cilicose mpela mwaŵelele Yehofa. Nambo Yehofa mpaka atuwone kuŵa ŵangali cileŵi cilicose naga tukukusya cinonyelo cetu soni kusagula yindu yambone mnope. Litala limo lyatukusalosya cinonyelo cetu lili kuŵambala kwakuŵasya ŵane.

11. Ligongo cici tukusosekwa kuŵambala kwakuŵasya ŵane?

¹¹ Ngani jakuti tuŵambaleje kwakuŵasya ŵane jili jakusosekwa mnope. Ana mpaka twakuŵasye ŵane camtuli? Mpaka tutende yeleyi kupitila mu yindu yatukusasagula mpela yakusangalasya, kaŵale, nambosoni masengo. Komboleka yindu yampaka tusagule pajika nganiyiŵa yakulemweceka. Nambo naga yindu yatusagwile yikwatendekasya ŵane kulaga ni cikumbumtima kapena yikwakuŵasya, nikuti nganiŵa cenene. Yesu jwasasile kuti naga mundu jwalijose akumkuŵasya jumo mwa ŵanace ŵakusamkulupilila, mpaka yiŵe cenene kuti ataŵililidwe m’lukosi mwakwe liganga lyakusyajila lyalikusawutidwa ni bulu ni kumtiŵisya m’nyasa jekulungwa.—Mat. 18:6.

12. Ana tukulijiganya cici kutyocela pa cisyasyo ca liŵasa line lya apayiniya?

¹² Kwende tulole yalyatesile liŵasa line lyakwe lyalyatendaga upayiniya pakusaka kupikanila maloŵe ga Yesuga. Jemanjaji ŵatumicilaga mumpingo wine pampepe ni liŵasa line lyalyagambile kubatiswa kwene. Liŵasali lyakulile m’liŵasa mwele nganakundidwaga kutenda yindu yejinji. Jemanjaji ŵakulupililaga kuti Aklistu ŵangasosekwa kulolela mafidiyo atamose gagakusawoneka kuŵa gambone. Jemanjaji ŵatengwice paŵapikene kuti apayiniya ŵala alolelele fidiyo. Yeleyi yili yitendekwe,  apayiniya ŵala ŵalesile kwawula kukulolela mafidiyo mpaka liŵasa lyacasambano lila palyayikene pakwiganya cikumbumtima cawo kulekanganya yindu yambone ni yakusakala. (Aheb. 5:14) Ligongo lya ndamo jawo jangalinonyela, liŵasa lya apayiniyali lyalosisye kuti lyalinonyelaga liŵasa lyacasambanoli ngaŵaga m’maloŵepe nambo mu yakutenda.—Alo. 14:19-21; 1 Yoh. 3:18.

13. Ana mpaka tumtendekasye jwine kulemwa camtuli?

¹³ Litala line lyampaka twakuŵasye nalyo ŵane lili kumtendekasya jwine kutenda ulemwa. Ana yeleyi mpaka yitendekwe camtuli? Aganicisye ya cakutendekwa aci. Panyuma pakulaga kwandaŵi jelewu, jwakulijiganya Baibulo akukombola kuleka ndamo jakwe jakumwa ukana. Kaneko akusagula kuti ngasamwasoni ukana ata panandi. Jukutanda kwawula pasogolo mwausimu ni jukubatiswa. Kaneko m’bale jwine akumŵilanjila kupwando ni kumpa ukana soni kumsalila kuti, “Apano sano wawojo ali Mklistu, akwete msimu wa Yehofa. Ndamo jimo jawukusakoposya msimu weswela jili kulilekasya. Naga akwete ndamo jakulilekasyaji, nikuti cakombole kumwa mwangapundanganya.” Kusala yisyene, mpaka paŵe yakuyicisya yakusakala naga m’baleju ali apikanile yeleyi.

14. Ana misongano ja Ciklistu mpaka jitukamucisye camtuli kamulicisya masengo yayili pa Afilipi 1:10?

¹⁴ Misongano ja Ciklistu jikusatukamucisya kupikanila yayikusasimanikwa pa Afilipi 1:10 m’matala gejinji. Candanda, yindu yatukusalijiganya pamisongano yikusalosya yindu yakusayiwona Yehofa kuŵa yambone mnope. Caŵili, tukusalijiganya mwampaka tukamulicisye masengo yatulijiganyisye kuti tuŵe ŵangali cileŵi  cilicose. Soni catatu, tukusalimbikasidwa “kunonyelana ni kutenda yambone.” (Aheb. 10:24, 25) Abale ni alongo ŵetu pakutulimbikasya, cinonyelo cetu pa Mlungu soni abale ŵetu cikusakula mnope. Naga tukumnonyela Mlungu soni abale ŵetu ni mtima wosope, tucitenda yakomboleka kuti tuŵambale kwakuŵasya ŵane.

15. Ana “kusogola yisogosi yakulungama” kukusagopolela cici?

¹⁵ Paulo jwapopelaga mwakutyocela pasi pamtima kuti ŵandu ŵa ku Filipi apitilisye “kusogola yisogosi yakulungama.” (Afil. 1:11) Mwangakayicila “yisogosi yakulungama” yeleyi yikupwatikapo cinonyelo cawo pa Yehofa soni ŵandu ŵakwe. Yikupwatikaposoni kwasalila ŵane ya cikulupi cawo mwa Yesu soni cembeceyo cakwete. Pa Afilipi 2:15 ŵakamulicisye masengo maloŵe gakuti “kulosya lilanguka mpela mwasikusaŵalila ndondwa pasi pano kutyocela kwinani.” Yeleyi yili yakupikanika ligongo Yesu ŵakolasile ŵakulijiganya ŵakwe kuti ‘ali mpela lilanguka lya cilambo cosope.’ (Mat. 5:14-16) Ŵalamwilesoni ŵakumkuya ŵakwe kuti “akajiganye ŵandu,” soni ŵasalile kuti jemanjaji ‘cacitendela umboni . . . mpaka kumbesi kwa cilambo.’ (Mat. 28:18-20; Mase. 1:8) Tukusasogola “yisogosi yakulungama” patukulipeleka pamasengo gakusosekwaga.

16. Ana pa Afilipi 1:12-14, pakulosya camtuli kuti yili yakomboleka kulosya lilanguka mpela mwasikusaŵalila ndondwa atamose kuti tukusasimana ni yakusawusya? (Alole ciwulili papeji jandanda.)

¹⁶ Mwangasamala ya yakusawusya yatukusasimana nayo, mpaka tulosye lilanguka mpela mwasikusaŵalila ndondwa. Ndaŵi sine yindu yampaka yiwonece kuti yikutulepelekasya kulalicila mpaka yitupe upile wakulalicila. Mwacisyasyo, ndumetume Paulo pajwalembaga cikalata cakwawula ku Filipi jwaliji ali pa ukayidi wapanyumba. Nambo maunyolo gakwe nganigamlepelekasya kwalalicila ŵandu ŵaŵamlolelaga  soni acalendo ŵaŵayikaga kukumlola. Paulo jwalalicile mwakulimbicila atamose kuti jwaliji mundamo jeleji, soni yeleyi yatendekasisye kuti abale ‘alalicile maloŵe ga Mlungu mwangali woga.’—Aŵalanje Afilipi 1:12-14; 4:22.

17. Ana abale ni alongo ŵane akukombola camtuli kulalicila atamose kuti akusimana ni yakusawusya?

¹⁷ Abale ni alongo ŵetu ŵajinji akombwele kulosya ndamo jakulimba mtima mpela jaŵalosisye Paulo. Jemanjaji akusatama m’yilambo yele kulalicila kwapelanga kapena kwa nyumba ni nyumba kuli kwakusawusya, mwamti akusapata matala gane gakuti alalicileje ngani syambone. (Mat. 10:16-20) Jwakulolela mkuli jwine jwa cimo mwa yilambo yeleyi, jwalinganyisye yakuti jwakulalicila jwalijose alalicileje kwa ŵacibale ŵakwe, ŵandu ŵakuŵandikana nawo, acimjawo ŵakusukulu, ŵakumasengo nambosoni ŵane ŵakumanyigana nawo. Pali pagambile kumala yaka yiŵili, ciŵalanjilo ca ŵandu m’mipingo ja delaji catupile mnope. Komboleka kuti apano tukusalalicila mwa ufulu m’cilambo cakusatamaga. Nambope, mpaka tulijiganye cindu cakusosekwa mnope kutyocela kwa abale ni alongoŵa. Ndaŵi syosyope tusosesoseje matala gakulalicilila, tuli tukwete cikulupi cakuti Yehofa catukamucisye pa yakusawusya yampaka tusimane nayo.—Afil. 2:13.

18. Ana tukusosekwa kutenda cici?

¹⁸ Kupundana ni kala kose, apano ni patukusosekwa kamulicisya masengo maloŵe gagakusasimanikwa m’cikalata ca Paulo cakwawula kwa ŵandu ŵa ku Filipi. Tukusosekwa kulolecesya kuti tukusagula yambone mnope, tukuŵa ŵangali cileŵi cilicose, tukuŵambala kwakuŵasya ŵane, nambosoni tukupitilisya kusogola yisogosi yakulungama. Kutenda yeleyi kucitukamucisya kuti tunonyelaneje mnope soni kwacimbicisya Atati ŵetu ŵacinonyelo Yehofa.