1. Ana ŵandu ŵane asagwile kutenda chichi? Ligongo chichi asagwile kutenda yeleyi?

MASIKU agano ŵakutumichila ŵajinji akulijima m’matala gakulekanganalekangana. Mwachisyasyo, abale ni alongo ŵane asagwile kutama ngalombela. Ŵane ŵali paulombela asagwile kuti akakola ŵanache, soni maŵasa gane galesile kusosasosa yindu yapenani. Ŵandu wosopeŵa akutenda yeleyi kuti akombole kumtumichila Yehofa mwakwanila. Jemanjaji akusaŵa ŵakusangalala soni ŵangakayichila kuti Yehofa chachakamuchisya. Ana ŵanduŵa asagwile chenene? Elo. Tukuŵecheta yeleyi ligongo Yehofa ŵampele upile Abulahamu jwaŵaliji “nangolo jwa ŵandu wosope ŵakumkulupilila Mlungu.”—Alo. 4:11.

2. (a) Mwakamulana ni Ahebeli 11:8-10, 16, ligongo chichi Abulahamu nganadandawula pandaŵi jiŵatyokaga ku Uli? (b) Ana chitulijiganye chichi munganiji?

² Abulahamu nganadandawula ligongo lyakuleka yindu yapenani yaŵakwete mumsinda wa Uli. Jwalakwe jwatesile yeleyi ligongo lyakuti jwajembecheyaga “msinda wa yilimbilimbi yakutamilichika” kapena kuti fendeshoni jakulimba. (Aŵalanje Ahebeli 11:8-10, 16.) Ana “msinda” welewu wuli wapi? Ana Abulahamu jwasimene ni yakusawusya yapi pandaŵi jiŵajembecheyaga kuti msindawu wutaŵidwe? Ana mpaka tumsyasye chamtuli Abulahamu soni ŵakutumichila ŵane ŵa Yehofa ŵaŵakuyiye chisyasyo chakwe?

3. Ana Abulahamu ŵajembecheyaga “msinda” wapi?

³ Msinda waŵajembecheyaga Abulahamu waliji Uchimwene wa Mlungu. Yesu ni jwali jwakulamulila mu Uchimwenewu pampepe ni ŵa 144,000. Paulo jwasasile kuti Uchimwenewu wuli “msinda wa Mlungu jwachijumi ku Yelusalemu jwa kwinani.” (Aheb. 12:22;  Chiw. 5:8-10; 14:1) Yesu jwasalile ŵakulijiganya ŵakwe kuti apopeleje kuti Uchimwene wa Mlungu uyiche. Jemanjaji ŵasosekwagasoni kupopela kuti chakulinga cha Mlungu chitendekwe pachilambopa mpela mwakuŵelele kwinani.—Mat. 6:10.

4. Mwakamulana ni Genesesi 17:1, 2, 6, ana Abulahamu jwamanyililaga yindu yapi yakwamba Uchimwene wa Mlungu?

⁴ Ana Abulahamu jwamanyililaga yosope yakwamba mwawuchiŵela uchimwene wa Mlungu? Iyayi. Kwa yaka yejinji, yindu yakwamba Uchimwenewu yaliji “yakusisika.” (Aef. 1:8-10; Akolo. 1:26, 27) Yaŵamanyililaga Abulahamu yaliji yakuti ŵane mwa ŵanache ŵakwe chachiŵa mamwenye. Yili myoyo ligongo lyakuti Yehofa ŵaliji ali amsalile kala yeleyi. (Aŵalanje Genesesi 17:1, 2, 6.) Abulahamu nganakayichila atapanandi yaŵamsalile Mlungu. Mwamti jwalakwe yaliji mpela kuti akumwona Mesiya juŵaliji kuti chachiŵa Mwenye jwa Uchimwene wa Mlungu. Ni ligongo lyakwe pandaŵi jine Yesu ŵasalile Ayuda kuti, “Atati ŵenu jemanja Abulahamu ŵasengwile kuti akajiweni ndaŵi jakwika kwangu. Myoyo ŵajiwonele chile ni ŵasangalele.” (Yoh. 8:56) Kusala yisyene, Abulahamu jwajembecheyaga ndaŵi jele Yehofa chachikwanilisya yaŵamsalile, kuti ŵane mwa ŵanache ŵakwe chachiŵa mamwenye mu Uchimwene wa Mlungu.

5. Ana ni yindu yapi yayikulosya kuti Abulahamu ŵajembecheyaga Uchimwene wa Mlungu?

⁵ Ana Abulahamu jwalosisye chamtuli kuti jwajembecheyaga “msinda” kapena kuti Uchimwene wa Mlungu? Chandanda, jwalakwe nganajigalaga nawo mbali pa kukamuchisya soni kusagula achayimwene ŵapachilambo chapasi. Kupwatika pelepa, Abulahamu nganatamilikasya uchimwene wakwewakwepe. Mmalo mwakwe jwapitilisye kumpikanila Yehofa soni kwembecheya kuti jwalakwe akwanilisye yindu yaŵamsalile. Yaŵatesileyi, yalosisye kuti ŵamkulupililaga mnope Yehofa. Sambano kwende tukambilane yakusawusya yaŵasimene nayo Abulahamu soni tulole yatukulijiganya kwa jwalakwe.

6. Ana msinda wa Uli waliji wamtuli?

⁶ Abulahamu jwalesile msinda wa Uli wele ŵandu ŵakwe ŵatamaga mwangatetemela ni chilichose. Soni ŵanduwo ŵaliji ŵalijiganye mnope soni ŵakusichila. Msindawu wakwete lutenje lwelewu soni lwakulimba nambosoni  wasungulilidwe ni lusulo. Ŵakuwukula yindu ya m’masame apatile kuti ŵandu ŵajinji ŵatendelaga mabisinesi mumsindawu. Kupwatika pelepa, ŵandu ŵamumsindawu ŵakwete nyumba syakusalala soni syekulungwakulungwa mwamti syakolaga yipinda chiŵandika 14.

7. Ligongo chichi mpaka tujile kuti Abulahamu nganakayichilaga kuti Yehofa chachimkamuchisya pampepe ni liŵasa lyakwe?

⁷ Ligongo chichi mpaka tujile kuti Abulahamu nganakayichilaga kuti Yehofa chachimkamuchisya pampepe ni liŵasa lyakwe? Agambe ganisya, Abulahamu ni Sala ŵalesile nyumba jambone ku Uli nikuja kutama m’matenti ku Kanani. Kweleku nganatamaga pamalo gakola lutenje lwakulimba nambosoni lwesungulilidwe ni lusulo mpela mwayaŵelele ku Uli. Mmalo mwakwe, malo gaŵatamagaga galiji gangasawusya kuti ŵandu ŵane ŵajimuchile.

8. Ana Abulahamu jwasimene ni yakusawusya yamtuli pandaŵi jine?

⁸ Atamose kuti Abulahamu jwaliji jwakulupichika kwa Mlungu, nambope ndaŵi jine jwasimene ni yakusawusya. M’chilambo chaŵatamaga mwapali sala. Yeleyi yatendekasisye kuti Abulahamu pampepe ni liŵasa lyakwe asamile ku Iguputo. Ali ku Iguputoko ŵasimene ni chakusawusya chine. Falawo juŵaliji jwakulamulila jwa ku Iguputoko ŵajigele ŵamkwakwe Abulahamu. Agambe ganisya mwaŵapikanilaga Abulahamu mumtima pandaŵi josope jaŵatamaga Sala ku nyumba ja Falawo.—Gen. 12:10-19.

9. Ana liŵasa lya Abulahamu lyasimene ni yakusawusya yamtuli?

⁹ Liŵasa lya Abulahamu lyasimenesoni ni chakusawusya chine chekulungwa. Sala jwaliji jwangaŵeleka, yayatendekasyaga kuti jemanjaji akasangalalaga kwa yaka yejinji. Pali papite ndaŵi, Sala ŵampeleche Hagala kwa Abulahamu kuti agone najo ni chakulinga chakuti amŵelechele mwanache. Nambo Hagala paŵagambile kola msigo ŵatandite kumtendela yachipongwe Sala. Yindu yayiche pakusawusya mwamti Sala jwayikene pakumtopola Hagala pamlangopo.—Gen. 16:1-6.

10. Ana yindu yapi yayamtendechele Ishimaeli soni Isaki yayikalinjile chikulupi cha Abulahamu?

¹⁰ Pali papitile ndaŵi, Sala ŵakwete msigo, mwamti jwaŵeleche mwanache juŵamkolasile kuti Isaki. Abulahamu ŵanonyelaga ŵanache wosope. Nambope Ishimaeli jwamtendelaga ngasa Isaki, yayatendekasisye kuti Abulahamu amtopole jwalakwe pampepe ni mamagwe. (Gen. 21:9-14) Pali papite yaka, Yehofa ŵamsalile Abulahamu kuti akampeleche Isaki mpela mbopesi. (Gen. 22:1, 2; Aheb. 11:17-19) Mu yakutendekwa yosopeyi, Abulahamu jwasosekwaga kukulupilila kuti Yehofa chiŵasamalile ŵanache wosopeŵa.

11. Ligongo chichi Abulahamu jwasosekwaga kwembecheya mwakuwusimana mtima?

¹¹ Komboleka kuti Abulahamu paŵatyokaga ku Uli yimpepe ni liŵasa lyakwe ŵaliji ali akwete yaka 70. (Gen. 11:31–12:4) Kwa yaka chiŵandika 100, jwalakwe jwaŵele ali mkutama m’matenti m’chilambo cha Kanani. Yaka yosopeyi, Abulahamu jwalijiganyisye kwembecheya kwa Yehofa mwakuwusimana mtima. Jwalakwe jwawile ali akwete yaka 175. (Gen. 25:7) Abulahamu nganiŵawona ŵanache ŵakwe ali mkupochela chilambo chaŵasasile Yehofa kuti chachapa. Mwamti Uchimwene wa Mlungu pawatamilikasidwaga jwalakwe kwaliji kuli kwangali. Atamose yaliji myoyo, Baibulo jikusasala kuti Abulahamu jwawile ali “achekulwipe soni ali jwakwikutila ni umi wakwe.” (Gen. 25:8) Atamose kuti Abulahamu jwasimene ni yakusawusya yosopeyi, jwalakwe jwapitilisyepe kuŵa jwakusangalala soni jwakwete chikulupi chakulimba. Jwalakwe jwakombwele kupilila yakusawusya yosopeyi ligongo lyakuti Yehofa ŵapitilisyepe kumsamalila soni ŵamwonaga mpela mjakwe.—Gen. 15:1; Yes. 41:8; Yak. 2:22, 23.

12. Ana m’weji tukwembecheya chichi? Ana chitukambilane chichi?

¹² Mwakulandana ni Abulahamu, m’wejisoni  tukwembecheya msinda wakola fendeshoni jakulimba. Ngatukwembecheya kuti msindawu wutaŵidwe. Tukuŵecheta myoyo ligongo msinda wakwe wuli Uchimwene wa Mlungu wawatandite kala kulamulila kwinani mu 1914. (Chiw. 12:7-10) Yatukwembecheya apano yili yakuti Uchimwenewu utandesoni kulamulila pachilambopa. Patukwembecheya kuti yeleyi yitendekwe, pana yakusawusya yejinji yatukusosekwa kulimbana nayo mpela mwayaŵelele ni Abulahamu ni Sala. Ana pana ŵakutumichila ŵa Yehofa masiku agano ŵakombwele kumsyasya Abulahamu? Mwakulandana ni Abulahamu soni Sala, masiku aganosoni pana ŵandu ŵajinji ŵakwete chikulupi chakulimba soni ŵakusatenda yindu mwakuwusimana mtima. Tukusaŵalanga ya ŵandu ŵeleŵa mungani syakola mtwe wakuti mbili jangu, syasikusakopoka mu Sanja ja Mlonda. Kwende tukambilane sine mwa nganisi soni tulole yampaka tulijiganye.

13. Ana akulijiganya chichi kutyochela pa chisyasyo cha M’bale Walden?

¹³ Tuŵeje ŵakoseka kumpa Mlungu yampaka tukombole. Naga tukusawuwona Uchimwene wa Mlungu kuŵa wakusosekwa mnope paumi wetu tuchitenda yindu mpela Abulahamu. Paja jwalakwe ŵamtumichile Yehofa kwa umi wakwe wosope. (Mat. 6:33; Maliko 10:28-30) Kwende tulole chisyasyo cha M’bale Bill Walden. * M’baleju paŵatandaga kulijiganya Baibulo ni ŵa Mboni sya Yehofa mu 1942, jwaliji ali asigele panandi kumalisya majiganyo gakwe ga ku Unifesite ku United States. Atichala ŵaŵamjiganyaga Bill ŵaliji ali alinganyisye kala kuti pachamalisye majiganyo gakwe akatande kukamula masengo. Nambo jwalakwe jwakanile masengogo ni chakulinga chakuti amtumichileje Yehofa. Kaneko boma jamlamwile Bill kuti akatande usilikali. Ligongo lyakuti jwakanile, ŵamlamwile kuti apeleche mbiya syakwana madola 10,000 soni kuti akatame kundende kwa yaka msano. Jwalakwe ŵamkopwesye kundendeku pali papitile yaka yitatu. Pali papite ndaŵi Bill jwajinjile nawo Sukulu ja Giliyadi soni jwatandite kutumichila ku Africa mpela m’mishonale. Bill ali alombene ni Eva, wosope ŵatumichilaga yimpepe ku Africa. Nambo kuti jemanjaji akombole kutenda  yeleyi ŵasosekwe kulijima. Mkupita kwandaŵi mamagwe Bill ŵatandite kulwala. Myoyo Bill ni ŵamkwakwe ŵawujilesoni ku United States kuti akasamalileje. Panyuma pakulondesya mbili ja umi wakwe Bili jwatite, “Ngusaŵa jwakusangalala mnope panguganichisya ya upile wanakwete wakumtumichila Yehofa kwa yaka yakupunda 70. Ngusamyamichila mnope Yehofa ligongo lyakungamuchisya kuti namtumichileje jwalakwe kwa umi wangu wosope.” Ana wawojo akwete yakulinga yakutenda utumiki wandaŵi syosope?

14-15. Ana yaŵasimene nayo M’bale ni Mlongo Apostolidis yikutujiganya chichi?

¹⁴ Akaganisyaga kuti ngasimanaga ni yakusawusya. Chisyasyo cha Abulahamu chikulosya kuti atamose ŵandu ŵakusamtumichila Yehofa mwakulupichika akusasimana ni yakusawusya. (Yak. 1:2; 1 Pet. 5:9) Yaŵasimene nayo M’bale Apostolidis, * yikulosya kuti yeleyi yisyene. Jwalakwe jwabatisidwe ku Greece mu 1946. Mu 1952, m’baleju ŵapatile mlongo lina lyakwe Eleni. Jemanjaji ŵakwete chakulinga chakuti amtumichileje Yehofa kwa umi wawo wosope. Nambo kaneko Eleni jwasimanikwe ni chakuyimba mu ututu. Madokotala gatyosisye chakuyimbachi, nambo pali pagambile kupita ndaŵi jamnono chilombanile, chakuyimba chila chatandilesoni. Madokotala galinjile kutenda opaleshoni nambo nganiyikamuchisya mwamti yagambile kumlechela yakusawusya yine. Jwalakwe jwayikene pakulepela kuŵecheta chenene. Atamose jwalwalaga soni ŵaboma ŵalagasyaga nambope jwapitilisyepe kukamula masengo gakulalichila.

¹⁵ M’bale Apostolidis ŵaŵele ali mkwasamalila ŵamkwakwe ŵaŵalwalaga kwa yaka 30. Pandaŵiji jwalakwe jwatumichilaga mpela jwamkulungwa jwamumpingo nambosoni kamuchisya kutaŵa malo ga msongano soni kutumichila m’komiti jakulolela msongano. Mu 1987 pandaŵi jele ŵamkwakwe ŵalalichilaga, ŵatesile ngosi mwamti ŵaliji chikomochele kwa yaka yitatu soni kaneko ŵawile. M’baleju paŵalondesyaga mbili jakwe jwamalisisye ni maloŵe gakuti, “Kwa yaka yejinji mbele ndili mkusimana ni yakusawusya yejinji soni yine yangayijembecheya. Myoyo nasosekwaga kuyipilila yakusawusya yosopeyi, mwamti nganingunda kuti chilichose chisokonasye. Yehofa aŵele ali mkumba machili  kuti ngombole kuyipilila yakusawusya yosopeyi.” (Sal. 94:18, 19) Kusala yisyene, Yehofa akusiŵanonyela ŵandu wosope ŵakusapitilisya kumtumichila jwalakwe atamose ali mkusimana ni yakusawusya.

16. Ana M’bale Knorr mkanawe, ŵasalile chichi ŵamkwawo?

¹⁶ Aganichisyeje mnope mwayichiŵela yindu msogolo. Abulahamu ŵakombwele kupilila yindu yaŵasimanaga nawo ligongo lyakuti ŵaganichisyaga mnope yindu yaŵamsalile Yehofa kuti chachimtendela. Nombe Mlongo Hyde jwaganichisyaga mnope yamsogolo atamose kuti ŵamkwakwe lina lyakwe Nathan H. Knorr ŵawile ni ulwele wa kasa. Ŵamkwakweŵa ali awile, jwalombedwesoni ni jwamlume jwine lina lyakwe Glenn Hyde. Kaneko M’bale Hyde jwatandite kulwala ulwele wa mu ututu wawukusamtendekasya mundu kuliŵalilaliŵalila (Alzheimer’s) *. Mlongoju akusakumbuchila maloŵe gaŵasasile M’bale Knorr mkanaŵe kuwa. Maloŵe gakwe galiji gakuti, “Chembecheyo chetu chili chisyesyene, soni yakusawusya yatukusimana nayoyi yichimala. Mkusosekwa mganichisyeje mnope yindu yamsogolo. . . . soni mtendeje yindu yakwakamuchisya ŵandu ŵane, ligongo yeleyi yichimkamuchisya kuti mŵeje ŵakusangalala. Yaŵasasile m’baleju yili yakamuchisya mnope, ligongo kwakamuchisya ŵane mpaka kututendekasye kuti tusangalaleje ni chembecheyo chetu.”—Alo. 12:12.

17. (a) Ligongo chichi tukusosekwa kwembecheyape yindu yamsogolo? (b) Ana kukuya yayili pa Mika 7:7 mpaka yitukamuchisye chamtuli kuti chitusangalale ni yindu yambone yamsogolo?

¹⁷ Masiku agano tukwete yindu yejinji yakututendekasya kuti tusangalaleje ni yindu yamsogolo. Yosope yayikutendekwa m’chilambochi yikulosya kuti tukutama m’masiku gakumalisya. Pachangakaŵapa Uchimwene wa Mlungu chiwulamulile pachilambochi soni yakusawusya yatukusimana nayoyi, yichiŵa ngani jakala. Yindu yayichitendekwa mpela yakulugono yili kwawona ŵaŵawile ali mkwimuka. Pandaŵiji tuchimwona Abulahamu ali mkwimuka kuŵawe pampepe ni liŵasa lyakwe, ligongo lyakuti ŵapitilisye kuŵa ŵakulinandiya soni kumkulupilila Yehofa. Ana wawojo chachisimanikwa m’chilambo chasambano kuti akapochele jemanjaji? Yili yakomboleka kuja kusimanikwa m’chilambochi naga akulipeleka pakamuchisya Uchimwene wa Mlungu, kuŵa ŵakulupichika atamose akusimana ni yipwetesi soni kumjembecheya Yehofa mwakuwusimana mtima.—Aŵalanje Mika 7:7.