1. Ana tukusasangalala ni upile wapi?

WULI upile wekulungwa kuŵa mumpingo wa Yehofa. Ŵanduwe tuli pamtendele ligongo lyakuti tukusalambila Yehofa pampepe ni abale ni alongo mumpingo. Ana wawojo akusakamula masengo gamtuli mumpingo?

2. Ana ni chisyasyo chapi chaŵakamulichisye masengo Paulo mu yikalata yakwe yine yayikusimanikwa m’Baibulo?

² Chitulijiganye yejinji panganiji kutyochela mu chisyasyo chaŵakamulichisye masengo Paulo paŵalembaga yikalata yakwe yakulekanganalekangana yaŵasalilidwe ni Mlungu. M’yikalatayi Paulo ŵaŵanichisye mpingo ni chilu cha mundu. Jwalakwe jwalandanyaga ŵandu ŵali mumpingo ni yiŵalo ya chilu cha mundu.—Alo. 12:4-8; 1 Akoli. 12:12-27; Aef. 4:16.

3. Ana munganiji chitulijiganye yindu yitatu yapi?

³ Munganiji chitulijiganyesoni yindu yitatu yakusosekwa mnope kutyochela mu chisyasyo chaŵachisasile Paulo. Chandanda chitulijiganye kuti mundu jwalijose akwete yakutenda * mumpingo wa Yehofa. Chaŵili chitukambilane yampaka tutende naga tukusaliwonaga kuti nganitukola yakutenda mumpingo. Chatatu chitulole ligongo lyakwe tukusosekwa kutanganidwa ni masengo gatupele Yehofa kuti tutende mumpingo.

4. Ana tukulijiganya chichi pa Aloma 12:4, 5?

⁴ Chindu chandanda chatukulijiganya m’chisyasyo cha Paulochi chili chakuti mundu jwalijose ali jwakusosekwa m’gulu ja  Yehofa. Paulo pajwasalaga chisyasyochi, jwatandite ni maloŵe gakuti, “Mchilu chetu chimpepechi tukwete yiŵalo yejinji, nipo yiŵalo yeleyi yikusakamula masengo gakulekanganalekangana. Myoyo uwesoni, atamose kuti tuli ŵajinji tuli chilu chimpepe ŵakulumbikanyidwa mwa Klistu, nipo jwalijose ali chiŵalo cha mjakwe.” (Alo. 12:4, 5) Ana pelepa Paulo jwagopolelaga chichi? Jwalakwe jwagopolelaga kuti atamose mumpingo ŵandu akusakola yakutenda yakulekangana nambo jwalijose ali jwakusosekwa.

5. Ana Yehofa apeleche mituka japi mumpingo?

⁵ Pakuganichisya ya ŵandu ŵakwete yakutenda mumpingo, komboleka kuti munganisyo mwawo akusaganisya mwachitema ya ŵandu ŵakusalongolelaga mumpingo. (1 Ates. 5:12; Aheb. 13:17) Yili yisyene kuti Yehofa apeleche mituka ja achalume mumpingo wakwe kupitila mwa Klistu. (Aef. 4:8) Mituka jachalumeji jikupwatikapo abale ŵakusatumichila m’Likuga Lyakulongolela pampepe ni ŵakwakamuchisya ŵawo, abale ŵakusatumichila mu Komiti sya Nyambi, ŵakulolela madela, abale ŵakusajiganya m’masukulu gakwiganya ya Baibulo, achakulungwa ŵa mumpingo nambosoni atumiki ŵakamuchisya. Wosopeŵa akusasagulidwa ni msimu weswela kuti ŵasamalileje ŵandu ŵakusamtumichila Yehofa soni kuwulimbikasya mpingo.—1 Pet. 5:2, 3.

6. Mwakamulana ni 1 Atesalonika 2:6-8, ana abale ŵaŵasagulidwe ni msimu weswela akusalingalinga kutenda chichi?

⁶ Abale ŵakusakola maudindo akusasagulidwa ni msimu weswela kuti akamuleje masengo gakulekanganalekangana. Chilu cha mundu chikwete yiŵalo yakulekanganalekangana. Nambo yosopeyi yikusakamula masengo pakuchikamuchisya chilu chosope. Mwakulandana ni yeleyi, abale ŵaŵasagulidwe ni msimu weswela akusakamula masengo gakulekanganalekangana gakuwukamuchisya mpingo wosope. Jemanjaji ŵangatendaga yindu pakusaka kuti ŵane ŵayamichileje. Mmalo mwakwe, akusalingalinga kwakamuchisya abale ni alongo kuti aŵe ŵakulimba. (Aŵalanje 1 Atesalonika 2:6-8) Tukusamyamichila mnope Yehofa ligongo lyakutupa abale ŵeleŵa ŵakusatenda yindu mwangalinonyela.

7. Ana ŵandu ŵakutenda utumiki ŵandaŵi syosope akusasangalala ni yindu yapi?

⁷ Abale ni alongo ŵane akusasagulidwa kuti atumichile mpela amishonale, apayiniya ŵapadela kapena apayiniya ŵakutamilichika. Abale ni alongo ŵajinji, asagwile kuti alalichileje kwandaŵi syosope nambosoni kwajiganya ŵandu. Yeleyi yitendekasisye kuti ŵakamuchisye ŵandu ŵajinji kuŵa ŵakulijiganya ŵa Klistu Yesu. Atamose kuti ŵakulalichila ŵandaŵi syosopeŵa nganakola yindu yejinji, Yehofa ŵapele jemanjaji upile wekulungwa. (Maliko 10:29, 30) Tukusanonyela abale ni alongoŵa, soni tukusawuwona kuti uli upile wekulungwa kuŵa nawo mumpingo.

8. Ligongo chichi mpaka tujile kuti jwakulalichila jwalijose ali jwakusosekwa kwa Yehofa?

⁸ Ana abale wakwete udindo nambosoni ŵakusatenda utumiki wandaŵi syosope ni ŵali ŵakusosekwa mumpingo? Iyayi ngayikusaŵa myoyo. Mlungu akusamwona jwakulalichila jwalijose mumpingo kuti ali jwakusosekwa. (Alo. 10:15; 1 Akoli. 3:6-9) Yeleyi yili myoyo ligongo chakulinga chetu chisyesyene chili kwakamuchisya ŵandu kuti aŵe ŵakulijiganya ŵa Yesu. (Mat. 28:19, 20; 1 Tim. 2:4) Ŵandu wosope ŵali mumpingo chinga ŵabatisidwe kapena iyayi, akusalingalinga kugawona masengo gelega kuŵa gakusosekwa.—Mat. 24:14.

9. Ligongo chichi tukusitwawona alongo kuti ali ŵakusosekwa mnope?

⁹ Yehofa ŵapele alongo masengo gakusosekwa mnope mumpingo. Akusiŵawonasoni  alongo ŵakusamtumichila jwalakwe mwakulupichika kuti ali ŵakusosekwa, chinga ali ŵalombele kapena ŵangalombela. Baibulo jikusasala ya achakongwe ŵajinji ŵaŵatesile yakumsangalasya Mlungu. Jemanjaji akusiŵakolanga kuti ŵaliji ŵalunda, ŵakulupichika, ŵakulipeleka, ŵakulimba mtima, ŵakoloŵa magasa nambosoni ŵakamulaga masengo gambone. (Luk. 8:2, 3; Mase. 16:14, 15; Alo. 16:3, 6; Afil. 4:3; Aheb. 11:11, 31, 35) Kusala yisyene, tukusamyamichila mnope Yehofa pakutupa alongo ŵakwete ndamo syambone mpela syaŵakwete achakongwe ŵakalakalaŵa.

10. Ligongo chichi abale ni alongo ŵachikulile ali ŵakusosekwa mnope mumpingo?

¹⁰ Tuli ŵakusangalala kuti tukwetesoni ŵandu ŵachikulile mumpingo mwetu. M’mipingo jine mwana abale ni alongo ŵachikulile ŵaŵele ali mkumtumichila Yehofa mwakulupichika kwandaŵi jelewu. Nambo panasoni ŵachikulile ŵane ŵagambile kulijiganya kwene usyesyene. Mulimose mwampaka yiŵele, nambope jemanjaji akusalwalalwala ligongo lya uchekulu. Yakusawusya yeleyi, mpaka yalepelekasyeje kulalichila kapena kutenda yindu yine mumpingo. Atamose yili myoyo, jemanjaji akusatenda yampaka akombole kuti alalichileje. Nambosoni akusalinjilila kwalimbikasya ŵane, mwamti tukusalijiganya yejinji kutyochela kwa jemanjaji. Yehofa pampepe ni m’weji tukusitwanyadilaga.—Mis. 16:31.

11-12. Ana yakusatenda ŵachinyamata ŵa mumpingo mwawo yikusiyalimbikasya chamtuli wawojo?

¹¹ Kwende tuganichisyesoni ya ŵachinyamata ŵetu. Jemanjaji akusimana ni yakusawusya yejinji ligongo akutama m’chilambo cha Satana chegumbale ni yakusakala. (1 Yoh. 5:19) Nambope, patukwawona jemanjaji ali mkwanga pamisongano, ali mkulalichila, nambosoni ali mkwasalila ŵane ya chikulupi chawo yikusatulimbikasya mnope. Yeleyitu yikulosya kuti ŵachinyamataŵa ali ŵakusosekwa mnope mumpingo wa Yehofa.—Sal. 8:2.

¹² Nambo pana abale ni alongo ŵane ŵakusaliwona kuti ali ŵangasosekwa mumpingo. Ana chichi champaka chitukamuchisye wosopewe kuliwonaga kuti tuli ŵakusosekwa mumpingo? Kwende tukambilane yeleyi.

13-14. Ligongo chichi ŵane mpaka atande kuliwona kuti nganaŵa ŵakusosekwa mumpingo?

¹³ Kwende tulole chindu chaŵili champaka tulijiganye pachisyasyo chaŵasasile Paulo chila. Jwalakwe jwasasile chakusawusya chakwete ŵandu ŵajinji masiku agano. Ŵajinji yikusiyasawusya kuliwona kuti ali ŵakusosekwa mumpingo. Paulo jwalembile kuti, “Naga lusajo lukaŵechete kuti, ‘ligongo lyakuti une nganimba ligasa myoyo une nganimba chiŵalo cha chilu,’ ana lusajolo ngaluŵa chiŵalo cha chilu ligongo lyelelyo? Naga lipikanilo likaŵechete kuti, ‘ligongo lyakuti une nganimba liso myoyo une nganimba chiŵalo cha chilu,’ ana lipikanilolyo nganiliŵa chiŵalo cha chilu ligongo lya yeleyo?” (1 Akoli. 12:15, 16) Ana Paulo jwagopolelaga chichi pelepa?

¹⁴ Naga akutanda kulilandanya ni mwakusatendela ŵane mumpingo, mpaka atande kuliwona kuti ali ŵangasosekwa. Ŵandu ŵane mumpingo, mpaka aŵe ŵakuti akusakombola kwiganya chenene, akusatenda yindu mwadongosolo. Kapenasoni mwine akusatenda maulendo ga ubusa gakamula mtima. Komboleka kuti ndaŵi sine mpaka tutande kulipikana kuti ngatukusakombola kutenda yindu mpela jemanjaji. Naga akusalipikana myoyo, nikuti wawojo ali ŵakulinandiya. (Afil. 2:3) Nambo akusosekwa kusamala. Tukuŵecheta myoyo ligongo lyakuti, naga akutamila kuliŵanichisya ni mwakusatendela yindu ŵandu ŵane mpaka yatendekasye kuti aŵeje ŵangasangalala. Mpela mwaŵaŵechetele Paulo, yeleyi mpaka yatendekasyesoni kuti atande ganisya kuti nganaŵa ŵakusosekwa mumpingo. Ana mpaka atende chichi kuti amalane ni nganisyosi?

15. Mwakamulana ni 1 Akolinto 12:4-11, ana tuwuwoneje chamtuli mtuka wuliwose watukwete?

¹⁵ Yehofa ŵapele msimu weswela Aklistu ŵa m’yaka 100 yandanda. Nambope, ŵane mwa jemanjaji nganatendaga yakusimonjesya. (Aŵalanje 1 Akolinto 12:4-11.) Yehofa jwapele Aklistuŵa mituka jakulekanganalekangana. Nambo Aklistu wosopeŵa ŵaliji ŵakusosekwa. Masiku agano, msimu weswela ngawukusatupa machili gakutendela yakusimonjesya. Nambo  maloŵega mpaka gakamulesoni masengo kwa m’weji. Atamose kuti wosopewe nganituŵa tumanyilile yindu yakulandana, nambope Yehofa akusatuwona kuti tuli ŵakusosekwa.

16. Ana Paulo jwasasile maloŵe gapi gatukusosekwa kugakamulichisya masengo?

¹⁶ Mmalo mwa kutamila kuliwanichisya ni Aklistu ŵane, tukusosekwa kukamulichisya masenga maloŵe gaŵasasile ndumetume Paulo gakuti, “Mundu jwalijose agalinjeje masengo gakwe mugaŵelele. Naga gali gambone, komboleka kusengwa ni masengo gakwego, pangalandanichisya ni masengo gatesile jwine.”—Aga. 6:4.

17. Ana kukuya maloŵe gaŵasasile Paulo kukwete umbone wamtuli?

¹⁷ Naga tukukamulichisya masengo maloŵe gaŵasasile Pauloga, mpaka tutande kuyiwona kuti uwejo tukwetesoni yindu yine yatukusakombola kutenda chenene. Mwachisyasyo, mpaka yisimanikwe kuti jwamkulungwa jwa mumpingo jwine ngakusaŵecheta chenene ngani pali papulatifomu. Nambo jwalakwe mpaka aŵe namatetule pakulalichila. Mwinesoni jwangatenda yindu mwadongosolo. Nambope mpaka yisimanikwe kuti jwalakwe akusatenda maulendo ga ubusa gakamula mtima. Mwamti abale ni alongo pakusaka chikamuchisyo akusawutuchila kwa jwalakwejo. Kapena mpaka yiŵe yakuti jwalakwe ali jwakoloŵa magasa soni akusiŵapochela chenene achalendo. (Aheb. 13:2, 16) Patukulola yindu yambone yatukusakombola kutenda tuchiŵa ŵakusangalala patukumtumichila Yehofa. Soni tuchiŵambala kwatendela jelasi abale ni alongo ŵakusakombola kutenda yindu yele m’weji ngatukusakombola kutenda.

18. Ana tukusosekwa kutenda chichi kuti twajiganyeje ŵane mwakamula mtima?

¹⁸ Mwangasamala kandu ya yindu yatukusatendega mumpingo, jwalijose jwetuwe akusosekwa kola mtima wakusachilila kwawula pasogolo nambosoni kumanyilila yindu yejinji. Yehofa atupele majiganyo gejinji gakutukamuchisya kwawula pasogolo. Mwachisyasyo, msongano watukusatenda mkati mwa wiki ukusatukamuchisya kuti tulalichileje mwakwayika ŵandu pamtima. Ana wawojo, akusakamulichisya masengo yindu yakusalijiganya pamsonganowu?

19. Ana mpaka atende wuli kuti akole upile wakwinjila nawo mu Sukulu ja Ŵakulalichila ya Uchimwene?

¹⁹ Yehofa akusiŵajiganyasoni ŵandu ŵakwe kupitila mu Sukulu ja Ŵakulalichila ya Uchimwene. Abale ni alongo ŵakutenda utumiki wandaŵi syosope soni ŵakwete yaka yakutandila 23 mpaka 65 ni ŵakusakola upile wakwinjila m’sukuluji. Mwine wawojo mpaka aliwoneje kuti nganaŵa akombole kwinjila nawo m’sukuluji. Nambo mmalo mwakwamba kulola yindu yampaka yalepelekasye kwinjila m’sukuluji, akusosekwa aganichisyeje umbone wakwinjila nawo m’sukuluji. Kaneko atendeje yindu yampaka yakamuchisye kuti ajinjile nawo sukuluji. Pakulimbichila kutenda yeleyi, Yehofa chachakamuchisya kuti akombole kutenda yindu yaŵayiwonaga kuti nganaŵa ayikombwele.

20. Ana lilemba lya Aloma 12:6-8, likutujiganya chichi?

²⁰ Chindu chatatu champaka tulijiganye pa chisyasyo chaŵasasile Paulo chikusimanikwa pa Aloma 12:6-8. (Aŵalanje.) Apasoni Paulo jwalosisyesoni kuti mumpingo ŵandu akwete mituka jakulekanganalekangana. Pelepa jwatulimbikasisye kuti tukamulichisyeje masengo mtuka uliwose watukwete pakuwulimbikasya mpingo.

21-22. Ana tukulijiganya chichi payindu yaŵasimene nayo Robert soni M’bale Felice?

²¹ Aganichisye chisyasyo cha m’bale jwine jwatugambile kumkolanga kuti Robert. M’baleju ali atumichile m’chilambo chine kwakandaŵi,  ŵamtumisye kuti akatumichileje pa Beteli ja m’chilambo cha kumangwakwe. Atamose kuti abale ŵamsimichisye kuti nganatenda chakulemwa chilichose, jwalakwe jwatite, “Kwa miyesi jejinji naliji jwangasangalala ligongo nalipikanaga kuti nganingombola kutenda chenene utumiki wangu. Mwamti ndaŵi sine naganisyaga yakuleka kutumichila pa Beteli.” Ana chichi chachamkamuchisye m’baleju kuti atandilesoni kusangalala? Jwamkulungwa jwa mumpingo jwine ŵamkumbwisye m’baleju kuti Yehofa akusatujiganya yindu yakulekanganalekangana kuti tukomboleje kutenda utumiki wetu wasambano. Robert jwamanyililaga kuti akusosekwa kuliŵalila yakala ni kutanda ganichisya mnope yindu yasambano.

²² Nombe M’bale Felice jwasimene ni chakusawusya chakulandana ni chelechi. Jwalakwe ni ŵamkwakwe, ŵajinjile Sukulu ja Giliyadi mu 1956, kaneko ŵatandite kutumichila mpela jwakulolela dela ku Bolivia. Mu 1964 ŵakwete mwanache. M’baleju jwatite, “Twayiweni kuŵa yakusawusya mnope kuti tuleche utumiki watwawunonyelaga, mwamti pamasile chaka ndili mkudandawula yeleyi. Nambo ligongo lyakuti Yehofa ŵangamuchisye, nachenjile kaganisye kangu. Mwamti najitichisye udindo wasambanowu wakuŵa nangolo.” Ana wawojo akusalipikana mpela Robert kapena M’bale Felice? Ana apano akusadandawula mnope ligongo lyakuti ngakutenda utumiki ŵaŵatendaga kala? Naga yili myoyo akusosekwa kuliŵalila yakala, ni kutanda kuganichisya yakusosekwa kutenda apano. Yeleyi yichakamuchisya kuti aŵe ŵakusangalala mnope pakumtumichila Yehofa. Akamulichisyeje masengo ndaŵi soni machili gawo pakwakamuchisya ŵane. Yeleyi yichakamuchisya mnope pakutenda yindu ni abale ni alongo.

23. Ana tukusosekwa kupata ndaŵi jakutenda chichi? Ana tuchilijiganya chichi mungani jakuyichisya?

²³ Yehofa akusatuwona wosopewe kuti tuli ŵakusosekwa mnope. Jwalakwe akusasaka kuti tuŵe ŵandu ŵa m’liŵasa lyakwe. Myoyo naga tukupata ndaŵi jaganichisya yampaka tutende pakwalimbikasya abale ni alongo soni ni kuyitendaga yeleyo, yichitukamuchisya kuti tuliwoneje kuti tuli ŵakusosekwa mnope mumpingo. Nambo ana tukusitwawona chamtuli abale ni alongo ŵetu? Ana mpaka tulosye chamtuli kuti tukusanonyela soni kwachimbichisya jemanjaji? Mungani jakuyichisya tuchikambilana yindu yeleyi.