1. Ana ligongo chichi Ababulo ŵatendaga chidwi ni Daniele?

 JWAKULOCHESYA Daniele jwaliji jwachinyamata pandaŵi jele Ababulo ŵamtyosisye ku Yelusalemu ni kumjawusya ku Babulo mpela mkayidi. Atamose kuti Daniele jwaliji mnyamata nambo ŵakulamulila ŵa ku Babulo ŵatesile chidwi mnope ni jwalakwe. Jemanjaji ŵalolaga “ya kusa kwa chilu” mwamti ŵam’weni Daniele kuti ali ‘jwakusalala soni jwangali chilema,’ nambosoni kuti jwatyochelaga ku liŵasa lyakutenda chenene. (1 Sam. 16:7) Ligongo lya yeleyi, Ababulo ŵamjigele jwalakwe ni kumjiganya ni chakulinga chakuti atumichileje kunyumba ja mwenye.—Dan. 1:3, 4, 6.

2. Ana Yehofa ŵamwonaga chamtuli Daniele? (Esekiele 14:14)

² Yehofa nganamnonyelaga Daniele ligongo lya kawoneche kakwe kapena upile waŵakwete wakutumichila kunyumba ja mwenye. Nambo ŵamnonyelaga jwalakwe ligongo lya ndamo syakwe syambone. Nambosoni Yehofa pajwasalaga kuti Daniele ali mpela Nowa soni Yobu, komboleka kuti Danielejo jwaliji ali akwete yaka ya mma 20. Yeleyitu yikulosya kuti Yehofa jwatandite kumwona Daniele kuti ali jwakulungama kutandila ali jwachinandipile. (Gen. 5:32; 6:9, 10; Yob. 42:16, 17; aŵalanje Esekiele 14:14.) Nambosoni Yehofa ŵapitilisye kumnonyela Daniele kwa umi wakwe wosope.—Dan. 10:11, 19.

3. Ana munganiji chitukambilane chichi?

³ Munganiji chitukambilane ndamo siŵili syaŵakwete Daniele syasyamtendekasisye kuŵa jwakusosekwa mnope pameso pa Yehofa. Chandanda, chitukambilane ndamo jilijose pajikapajika soni yakutendekwa yaŵalosisye ndamojo. Kaneko, chitukambilane chachamkamuchisye Daniele kuti alosye ndamosi. Pakumalisya, chitukambilanesoni yampaka tutende pakumsyasya jwalakwe. Atamose kuti nganiji jilembedwe ni chakulinga chakuti jakamuchisye ŵachinyamata, nambope mpaka jitukamuchisye wosopewe kulijiganya kanekakwe kutyochela ku chisyasyo cha Daniele.

4. Ana Daniele jwalosisye chamtuli kulimba mtima? Apeleche chisyasyo.

⁴ Ndaŵi sine ŵandu ŵakulimba mtima mpaka wakamule woga, nambo jemanjaji ŵangakunda kuti wogawo walepelekasye kutenda yakuŵajilwa. Daniele jwaliji mnyamata jwakulimba mtima mnope. Aganichisye yakutendekwa yiŵili yakuyichisyayi yayikusalosya kuti jwalakwe jwaliji jwakulimba mtima. Chakutendekwa chandanda chatendekwe panyuma pa yaka yiŵili Ababulo ali ajonasile Yelusalemu. Mwenye Nebukadinesa jwa ku Babulo jwasagamile sagamisi syakogoya syakwamba chiwanichisyo chekulungwa mnope. Jwalakwe jwajogoyisye achalume wosope ŵalunda kupwatikapo Daniele kuti chiŵawulaje naga ngakumgopolela yaŵasagamileyo. (Dan. 2:3-5) Mwamti Daniele akaŵe kuti nganatenda yindu mwachitema nikuti ŵandu ŵajinji akawulajidwe. Jwalakwe “jwapite kwa mwenye ni kuŵenda ndaŵi jakuti agopolele sagamisisyo.” (Dan. 2:16) Yaŵatesile Danieleyi yalosisye kuti jwaliji jwakulimba mtima soni kuti jwakwete chikulupi chamachili. Nambotu pandaŵiji paliji pali pangali palipose m’Baibulo papalosyaga kuti Daniele jwaliji ali agopolelepo sagamisi. Nambope, jwalakwe jwaŵendile achimjakwe ŵaŵaliji najo ku ukapolo ku Babulo ŵaŵaliji Shadileki, Misheki soni Abedenego kuti “apopeleje kwa Mlungu jwakwinani kuti jwatendele chanasa.” (Dan. 2:18) Mwamti Yehofa jwajanjile mapopelogo. Ni chikamuchisyo cha Yehofa, Daniele jwakombwele kugopolela sagamisi sya Nebukadinesa. Yeleyi yakamuchisye kuti Daniele soni achimjakwe ŵala akawulajidwa.

5. Ana ni ndaŵi jine japi jele Daniele jwasosekwaga kulosya kulimba mtima?

⁵ Panyuma pakuti Daniele agopolele sagamisi syakwamba chiwanichisyo chekulungwa mnope, patendekwesoni chindu chaŵili chachalinjile chikulupi chakwe. Nebukadinesa jwasagamilesoni sagamisi sine syakutesya woga mnope. Sagamisi syaŵasagamile pandaŵiji syasalaga ya chitela chekulungwa mnope. Nambo Daniele mwakulimba mtima jwagopolelesoni mwenyewo sagamisisyo. Mwamti jwasalile mwenyewo kuti chalwale masoka soni ngasaŵa mwenye kwa yaka nditu. (Dan. 4:25) Yajwasasile Danieleyi yikatendekasisye kuti mwenyewo atande kumwona jwalakwe mpela mmagongo jwakwe yayikaŵisile umi wa Daniele pangosi. Nambope, yeleyi nganiyimlepelekasya Daniele kugopolela sagamisisyo.

6. Ana chichi chachamkamuchisye Daniele kuŵa jwakulimba mtima?

⁶ Ana chichi chachamkamuchisye Daniele kuŵa jwakulimba mtima paumi wakwe wosope?  Ngatukukayichila kuti Daniele paŵaliji mwanache ŵalijiganyisye kuŵa jwakulimba mtima kutyochela kwa achinangolo ŵakwe. Achinangoloŵa ŵapikanilaga malangiso gele Yehofa ŵapeleche kwa achinangolo ŵa Chiyisalayeli gakuti ŵajiganyeje ŵanache ŵawo Chilamusi cha Mlungu. (Det. 6:6-9) Daniele nganagambaga kumanyilila yindu yakwamba Malamusi 10 nambo jwamanyililagasoni yejinji yakwamba chilamusicho. b (Lef. 11:4-8; Dan. 1:8, 11-13) Jwalakwe jwalijiganyisyesoni mbili ja ŵandu ŵa Mlungu soni jwamanyililaga chenene yayatendechelaga jemanjajo paŵalepelaga kukuya malamusi ga Yehofa. (Dan. 9:10, 11) Yindu yaŵasimene nayo Daniele paumi wakwe yamkamuchisye jwalakwe kumanyilila kuti malayika soni Yehofa ali kumbali jakwe soni akumkamuchisya.—Dan. 2:19-24; 10:12, 18, 19.

7. Ana ni yindu yine yapi yayamkamuchisye Daniele kuŵa jwakulimba mtima? (Alole chiwulili.)

⁷ Daniele jwalijiganyaga yakulochesya yayasimanikwaga m’Maloŵe ga Mlungu soni ya jwakulochesya Yelemiya. Kupitila mu yaŵalijiganyagayi, Daniele jwamanyilile kuti Ayuda ŵaŵaliji ku ukapolo ku Babulo asigele panandi kwakoposya. (Dan. 9:2) Ngatukukayichila kuti Daniele paŵayiwonaga yakulochesyayi yili mkukwanilichikwa yamlimbikasisye mnope kuti amdalileje Yehofa. Nambosoni yeleyi yakamuchisye ŵandu ŵaŵamkulupililaga Mlungu kuŵa ŵakulimba mtima. (Alole Aloma 8:31, 32, 37-39.) Nambo chindu chakusosekwa mnope kwa Daniele chaliji kupopela kwa Atati ŵakwe ŵakwinani ndaŵi syosope. (Dan. 6:10) Jwalakwe jwamsalilaga Yehofa yakulemwa yakwe soni muŵapikanilaga mumtima, nambosoni jwamŵendaga chikamuchisyo. (Dan. 9:4, 5, 19) Daniele jwaliji mundu mpela m’weji soni nganapagwa ali jwakulimba mtima. Mmalomwakwe, jwalakwe jwapitilisye kukusya ndamo jakulimba mtimaji kupitila mkulijiganya, kupopela soni kumdalila mnope Yehofa.

8. Ana mpaka tukusye chamtuli ndamo jakulimba mtima?

⁸ Ana tukusasosekwa kutenda chichi kuti tukusyeje ndamo jakulimba mtima? Achinangolo ŵetu mpaka atulimbikasyeje kuŵa ŵakulimba mtima, nambope nganituŵa tujigalile ndamoji kutyochela kwa jemanjajo. Kuŵa ŵakulimba mtima kuli mpela kulijiganya chindu chasambano. Litala limo lyakutukamuchisya kuchimanyilila chenene chindu chasambano lili kulolechesya mwakusamala yakutenda mundu jwakutujiganyajo. Mwakulandana ni yeleyi, mpaka tulijiganye kuŵa ŵakulimba mtima mwakulola yakutenda ŵane pakulosya ndamoji ni kujigalilaga chisyasyo chawo. Pakwikana apano, ana tulijiganyisye chichi kutyochela kwa Daniele? Mpela muyaŵelele ni Daniele, tukusasosekwa tugamanyilileje chenene Maloŵe ga Mlungu. Tuŵeje paunasi wakulimba ni Yehofa soni tupopeleje kwa jwalakwe ndaŵi syosope. Nambosoni tulijiganyisye kuti tumdalileje mnope Yehofa soni tuŵeje ŵakusimichisya kuti jwalakwe ali jwakoseka kutukamuchisya. Mwamti kaneko chikulupi chetu pachikulinjidwa tuchiŵa ŵakulimba mtima.

9. Ana tukusapindula chamtuli patukuŵa ŵakulimba mtima?

⁹ Naga tuli ŵakulimba mtima tukusapindulaga m’matala gejinji. Kwende tukambilane yiŵasimene nayo Ben. Jwalakwe jwalijiganyaga sukulu ku Germany kwele chiŵandika jwalijose akusakulupilila kuti yaumi yatesile kuchenga kutyochela ku yindu yine. Mwamti lisiku line Ben ŵampele upile wakuti ŵasalile achimjakwe ŵa mkalasi ligongo lyakwe akusakulupilila kuti yaumi yatesile kupanganyidwa. Mwakulimba mtima jwalakwe jwasalile mwakupikanika chenene achimjakwewo yakusakulupilila kuti yaumi yatesile kupanganyidwa. Ana papali yakuyichisya yamtuli? Jwalakwe jwasasile kuti “Atichala ŵangu ŵambikanilaga mwakusamala panaŵechetaga soni ŵalembaga yanaŵechetagayi mwamti pambesi pakwe ŵampele jwalijose  mkalasimo yanaŵecheteyo.” Ana achimjakwe ŵa mkalasiŵa ŵatesile yamtuli? Jwalakwe jwasasile kuti, “Ŵajinji ŵapikanilaga yanaŵechetagayi mwamti ŵatesile nayo chidwi.” Yaŵasimene nayo Ben yikusalosya kuti ndaŵi syejinji ŵandu ŵakulimba mtima akusapochela ulemu kutyochela kwa ŵandu ŵane. Nambosoni ŵandu ŵakulimba mtima akusiŵakamuchisyaga ŵandu ŵakwete mtima wambone kuti ammanyilile Yehofa. Kusala yisyene tukwete magongo gambone gakututendekasya kukusya ndamo jakulimba mtima.

10. Ana kukulupichika kukusagopolela chichi?

¹⁰ M’Baibulo liloŵe lya Chihebeli liŵaligopolele kuti “kulupichika” kapena kuti “chinonyelo changamala” likusalondesya chenene chinonyelo chakulupichika chakwete Yehofa kwa ŵakutumichila ŵakwe. Liloŵe lilili akusalikamulichisyasoni masengo pakusala ya chinonyelo chakusalosya ŵakutumichila ŵa Mlungu. (2 Sam. 9:6, 7) Mwamti kulupichika kwetu kukusakulaga mkupita kwa ndaŵi. Kwende tukambilane yaŵatesile Daniele pakulosya kulupichika.

11. Ana Daniele jwalosisye chamtuli kulupichika pajwaliji jwamkalambale? (Alole chiwulili chapachikuto.)

¹¹ Kulupichika kwa Daniele pa Yehofa kwalinjikwe mmatala gejinji paumi wakwe. Nambo kulinjidwa kwekulungwa kwatendekwe ali akwete yaka ya mma 90. Pandaŵiji Amedi soni Apelesi ŵagomeche Ababulo mwamti Mwenye Daliyasi jwatandite kulamulila. Achakulungwakulungwa ŵa boma nganamnonyelaga Daniele soni nganamchimbichisyaga Mlungu juŵamtumichilaga jwalakwe. Mwamti jemanjaji ŵalinganyisye pulani jakuti Daniele awulajidwe. Jemanjaji ŵatesile yindu mwakalamuka yayikalinjile kulupichika kwa Daniele kwa Mlungu kapena kwa mwenye. Ŵalinganyisye yakuti Daniele aleche kupopela kwa Yehofa kwa masiku 30 ni chakulinga chakuti alosye kuti ali jwakulupichika kwa mwenye. Nambo Daniele jwakanile kuti akaŵa jwangakulupichika kwa Yehofa. Yakuyichisya yakwe ŵamponyisye mwisimbo lya masimba. Nambo Yehofa ŵamkamuchisye Daniele mwakumkulupusya mkamwa mwa masimba. (Dan. 6:12-15, 20-22) Ana mpaka tulosye chamtuli kuŵa ŵakulupichika kwa Yehofa mpela muŵatendele Daniele?

12. Ana Daniele jwalosisye chamtuli kuŵa jwakulupichika kwa Yehofa?

¹² Mpela mwatuŵechetele kundanda kula kulupichika kukusasaka chinonyelo chamachili. Daniele jwapitilisye kuŵa jwakulupichika kwa Yehofa ligongo jwamnonyelaga mnope Mlungu. Ngatukukayichila kuti Daniele jwakwete chinonyelo  chamachili mnopechi ligongo lyakuti jwalakwe jwamalilaga ndaŵi jakwe jejinji ali mkuganichisya ya ndamo syakwete Yehofa soni yakusati pakusilosya. (Dan. 9:4) Jwaganichisyagasoni mwakusokoka yindu yambone yosope yiŵamtendele Yehofa soni ŵandu ŵakwe.—Dan. 2:20-23; 9:15, 16.

13. (a) Ana ni yindu yine yapi yayikusalinga kulupichika kwa ŵachinyamata? Apeleche chisyasyo. (Alole chiwulili.) (b) Mwakamulana ni yaŵayiweni mu fidiyoji, ana mpaka asale yamtuli mundu jwine paŵawusisye naga ŵa Mboni sya Yehofa akusakamulana ni kugonana kwa achalumepe kapena achakongwepe?

¹³ Mwakulandana ni Daniele, ŵachinyamata ŵetu masiku agano asyungulilidwe ni ŵandu ŵangakusamchimbichisya Yehofa soni ŵangakusakuya mfundo syakwe. Ŵandu mpela jemanjaji ŵangakamulana ni mundu jwalijose jwakusamnonyela Mlungu. Ŵane mwajemanjaji akusayikana pakwaputa ŵachinyamata ŵetu kuti akaŵa ŵakulupichika kwa Yehofa. Mwachisyasyo, alole yayamtendechele jwachinyamata jwine lina lyakwe Graeme, jwakusatama ku Australia. Jwalakwe jwasimene ni chakusawusya paŵatendaga majiganyo gakwe ga ku sekondale. Lisiku line, atichala ŵakwe ŵawusisye yampaka atende jwalijose mkalasimo naga mjawo ali jwasalile yakuti agonene ni jwamkongwe kapena jwamlume mjakwe. Atichalawo ŵasalile ŵanache wosope kuti ŵakuyiwona kuti mjawojo nganalemwa chilichose ajime mbali jine, soni ŵakuyiwona kuti mjawojo jwalemwisye ajimesoni mbali jine. Graeme jwasasile kuti, “Ŵanache wosope ŵamkalasimo ŵajimi kumbali jakulosya kuti mjetujo nganalemwa chilichose. Nambo unejo ni mjangu jwine jwa mboni twajimi kumbali jakulosya kuti mjetujo jwalemwisye.” Kusala yisyene, kulupichika kwa jwachinyamataju kwalinjikwe mnope pandaŵi jeleji. Jwalakwe jwasasile kuti, “Kwakandaŵi nditu ŵanache wosope mkalasimo soni atichala ŵangu ŵatandite kutunyosya. Natesile yiliyose yangakombwele pakusaka kuchenjela yangusakulupilila, soni natendaga yeleyi mwakuwusimana mtima, nambope jemanjaji nganambikanilaga.” Ana Graeme jwapikene chamtuli mumtima mwakwe? Jwalakwe jasasile kuti, “Kusala yisyene yaŵaŵechetaga achimjanguyi yambweteche mnope, nambope naliji jwakusangalala ligongo lyakuŵape ŵakulupichika kwa Yehofa soni kuchenjela chikulupi changu.” c

14. Ana mpaka tulosye kulupichika kwa Yehofa m’litala limo lyapi?

¹⁴ Mpaka tulosye kuŵa ŵakulupichika kwa Yehofa mpela muŵatendele Daniele naga tukusamnonyela mnope jwalakwe. Mpaka tukusye chinonyelochi patukulijiganya ndamo syakwete Yehofa. Mwachisyasyo, mpaka tulijiganyeje yindu yiŵapanganyisye jwalakwe. (Alo. 1:20) Naga akusaka kukusya chinonyelo chawo pa Yehofa soni kumchimbichisya jwalakwe aŵalanjeje ngani syakuti, “Ana Apali Juŵayipanganyisye?” kapena alolele mafidiyo gakwe. Mpaka aŵalanjesoni tumabuku twakuti, Ana Yaumi Yatesile Kupanganyidwa? Kapena kakuti, Yiwusyo Msano Yakusosekwa Kuliwusya Yakwamba Muwatandile Umi. Apikane yaŵasasile mlongo jwine jwachisikana lina lyakwe Esther jwakusatama ku Denmark. Pakwamba ya tumabukutu jwalakwe jwatite, “Tumabukutu ŵatulembile mwakupikanika chenene mwamti tukusalondesya mfundo mwakupikanika chenene syasikusamkamuchisya mundu kuti asagule jika yakusosekwa kukulupilila.” Nombe Ben jwatumkolasile kundanda jula jwatite, “Tumabukutu tukusalimbisya chikulupi cha mundu. Tukusangamuchisya kumanyilila kuti Mlungu ni juŵapanganyisye yaumi.” Pachachilijiganya tumabuku tweletu chachikamulana ni yajikusasala Baibulo kuti, “Wawo Yehofa Mlungu jwetu ali ŵakuŵajilwa kwakwesya, ligongo lya uchimbichimbi soni machili, pakuŵa ŵapanganyisye yindu yosope.”—Chiw. 4:11. d

15. Ana ni litala line lyapi lyampaka litukamuchisye kuŵa paunasi ni Yehofa?

¹⁵ Litala line lyampaka litukamuchisye kuŵa paunasi ni Yehofa lili kulijiganya yakwamba umi wa  Yesu. Mlongo jwine jwachisikana lina lyakwe Samira jwakusatama ku Germany jwasasile kuti, “Nammanyilile chenene Yehofa kupitila mwa Yesu.” Pajwaliji mwanache, mlongoju yamsawusyaga kupikanichisya naga Yehofa yikusamkwayaga mwatukupikanila mumtima. Nambo jwalakwe jwamanyililaga kuti Yesu yikusamkwayaga yayikututendechela. Jwalakwe jwatite, “Ngusinamnonyela Yesu ligongo lyakuti jwalakwe jwaliji jwakunguluchika soni jwanonyelaga ŵanache.” Paŵatandite kulijiganya mnope ya Yesu unasi wakwe ni Yehofa watandite kulimba. Ligongo chichi? Jwalakwe jwatite, “Natandite kupikanichisya kuti Yesu jwasyasyaga Atati ŵakwe, mwamti pana yindu yejinji yakusalandana. Nambosoni nayikopochele kuti ligongo limo lyalyamtendekasisye Yehofa kumtumisya Yesu pachilambopa lyaliji lyakuti jwakamuchisye ŵandu kummanyilila chenene Yehofajo.” (Yoh. 14:9) Naga akusaka kuŵa paunasi wambone ni Yehofa, uli ngalinganya yakuti alijiganyeje yakwamba Yesu? Naga akutenda yeleyi chinonyelo chawo pa Yehofa soni kulupichika kwawo kwa jwalakwe kuchikula.

16. Ligongo chichi tukusasosekwa kuŵa ŵakulupichika? (Salimo 18:25; Mika 6:8)

¹⁶ Naga tukusaŵa ŵakulupichika kwa achimjetu tukusaŵa paunasi wambone ni jemanjajo. (Lut. 1:14-17) Konjechesya pelepa ŵandu ŵakusaŵa ŵakulupichika kwa Yehofa akusakola mtendele wa mumtima. Ligongo chichi? Ligongo lyakuti Yehofa akusatusalila kuti akusaŵa jwakulupichika kwa ŵandu ŵakusaŵa ŵakulupichika kwa jwalakwe. (Aŵalanje Salimo 18:25; Mika 6:8.) Agambe ganichisya ayi: Mkupanganya jwamachili gosope ali jwakusachilila kuŵa paunasi wambone ni m’weji. Mwamti naga tukuŵa paunasi wambone ni Yehofa nikuti ŵandu ŵakusisya, yakulingwa yatukusasimana nayo, nambosoni chiwa nganiyiŵa yitulepelekasye kuŵa paunasi ni Yehofa. (Dan. 12:13; Luk. 20:37, 38; Alo. 8:38, 39) Kusala yisyene yili yakusosekwa mnope kumsasya Daniele soni kupitilisya kuŵa ŵakulupichika kwa Yehofa.

17-18. Ana ni yindu yine yapi yampaka tulijiganyesoni kutyochela kwa Daniele?

¹⁷ Munganiji tulijiganyisye ndamo siŵili syaŵakwete Daniele. Nambotu pana yejinji yampaka tulijiganye kutyochela kwa jwalakwe. Mwachisyasyo, Yehofa ŵamkamuchisye Daniele kuti akombole kugawona mesomkulola soni kusagamila yindu yejinji, nambosoni ŵampele lunda kuti akomboleje kugopolela yakulochesya. Mwamti yejinji mwa yakulochesyayi yakwanilichikwe kala. Nambosoni yakulochesya yine yikusasala yindu yayichitendekwa pachilambopa kusogoloku yayichimkwaya jwalijose.

¹⁸ Mungani jakuyichisya tuchikambilana yakulochesya yiŵili yaŵayilembile Daniele. Kuyipikanichisya yakulochesyayi kuchitukamuchisya wosope chinga tuli ŵanache kapena ŵachikulile kusagula yindu mwalunda. Yakulochesya yeleyi mpaka yilimbikasye kulimba mtima kwetu soni kulupichika yampaka yitukamuchisye kukosechela yakulingwa yachitusimane nayo kusogoloku.