1. Ana chichi champaka chitukamuchisye kuti tunonyeleje kulijiganya yakulochesya ya m’Baibulo?

 JWACHINYAMATA jwine lina lyakwe Ben jwasasile kuti, “Ngusanonyela kuŵalanga yakulochesya ya m’Baibulo.” Ana wawojosoni akusanonyela kuŵalanga yakulochesya ya m’Baibulo? Kapena akusayiwona yakulochesya ya m’Baibulo kuti yili yakusawusya kuyipikanichisya? Komboleka mpaka alipikaneje kuti kulijiganya yakulochesya ya m’Baibulo kuli kwakupesya. Nambope, pakulijiganya yejinji yakwamba Yehofa soni kumanyilila ligongo lyakwe jwalakwe jwakundile kuti yakulochesyayi yilembedwe m’Baibulo, mpaka yakamuchisye kuti atande kunonyela mnope kuŵalanga yakulochesya.

2. Ana munganiji chitukambilane chichi?

² Munganiji, chitukambilane ligongo lyakwe tukusosekwa kulijiganya yakulochesya ya m’Baibulo, nambosoni yampaka tutende kuti tuyipikanichisyeje. Chitukambilanesoni yakulochesya yiŵili yayili m’buku ja Daniele soni chitulole yampaka yijile pakutukamuchisya apano.

3. Ana tukusosekwa kutenda chichi kuti tuyipikanichisyeje yakulochesya ya m’Baibulo?

³ Kuti tuyipikanichisyeje yakulochesya ya m’Baibulo tukusasosekwa kuŵenda chikamuchisyo. Aganichisye chakutendekwa achi: Tuwanichisye kuti ajesile ni mjawo jwinejwakwe ni apite kumalo kwele wawojo ngakukumanyilila chenene, nambo mjawojo akukumanyilila chenene. Mwamti mjawojo akumanyilila chenene kwali nambosoni akumanyilila kwakwinjilila. Ngatukukayichila kuti mpaka asangalale kuti mjawojo jwakundile kwapechesya. Nombe Yehofa ali mpela mjetu  jweleju. Jwalakwe akusamanyilila yiliyose yayikututendechela. Myoyo kuti tupikanichisyeje yakulochesya ya m’Baibulo tukusasosekwa kulinandiya soni kumŵenda Yehofa kuti atukamuchisye.—Dan. 2:28; 2 Pet. 1:19, 20.

4. Ligongo chichi Yehofa jwakundile kuti m’Baibulo mulembedwe yakulochesya? (Yelemiya 29:11) (Alole chiwulili.)

⁴ Mpela mwakusatendela nangolo jwambone, nombe Yehofa akusasaka kuti ŵanache ŵakwe akole sogolo jambone. (Aŵalanje Yelemiya 29:11.) Nambo mwakulekangana ni achinangolo, Yehofa mpaka asale yakutendekwa yamsogolo ni kutendekwa ndendende. Yehofa ŵasagwile achalume kuti alembe yakulochesya yayili m’Baibulo ni chakulinga chakuti tumanyilileje yakutendekwa yakusosekwa mnope mkaniyiŵe kutendekwa. (Yes. 46:10) Yakulochesya ya m’Baibulo uli mtuka wakutyochela kwa Atati ŵetu ŵakwinani. Nambo ana chichi champaka chitukamuchisye kusimichisya kuti yajikusasala Baibulo yichitendekwa?

5. Ana ŵachinyamata mpaka alijiganye chichi kutyochela kwa Max?

⁵ Ŵachinyamata ŵetu pali kusukulu akusakungulukaga ni achimjawo ŵangakusachimbichisya yajikusasala Baibulo. Yakusatenda jemanjaji mpaka yatendekasye ŵanache ŵetu kutanda kukayichila yakusakulupilila. Aganichisye yaŵasimene nayo M’bale Max. Jwalakwe jwatite, “Panaliji mwanache natandite kayichila yaŵanjiganyaga achinangolo ŵangu yakwamba dini jisyesyene soni yakuti Baibulo jatyochele kwa Mlungu.” Ana achinangolo ŵakwe ŵatesile yamtuli? Jwalakwe jwasasile kuti, “Jemanjaji ŵatendaga yindu mwakuwusimana mtima atamose kuti namanyililaga kuti akudandawula.” Achinangolo ŵa Max ŵajangaga yiwusyo ya mwanache jwawoju pakamulichisya masengo Baibulo. Nombe najo Max jwatendagapo kandu pakusaka kupikanichisya yaŵamjiganyaga achinangolo ŵakwe. Jwalakwe jwasasile kuti, “Natandite kulijiganya yakulochesya ya m’Baibulo pajika nambosoni nakambilanaga ni achimjangu yindu yanalijiganyagayo.” Ana yakuyichisya yakwe yaliji yamtuli? Max jwatite, “Panyuma pakulijiganyaku nasimichisye kuti Baibulo jili maloŵe ga Mlungu.”

6. Ana akusosekwa kutenda chichi naga atandite kukayichila? Ligongo chichi akusosekwa kutenda yeleyo?

⁶ Naga wawojo atandite kukayichila kuti Baibulo jangasala yisyesyene mpela muyaŵelele ni Max ngakusosekwa kulijimba magambo. Mmalomwakwe, akusosekwa kutendapo kandu mwachitema. Kayichila kuli mpela mkuwo. Naga agambile kuwulechelela, mwapanandipanandi mpaka ujonanje chindu chakusosekwa mnope. Myoyo, kuti atande kutyosya mkuwo wawuli pa chikulupi chawo akusosekwa kuliwusya kuti, ‘Ana ngusakulupilila yajikusasala Baibulo pakwamba ya msogolo?’ Naga akukayichila akusosekwa kulijiganyaga yakulochesya ya m’Baibulo yayakwanilichikwe kala. Ana mpaka atende chamtuli yeleyi?

7. Ana chichi chachamkamuchisye Daniele kuti alijiganyeje yakulochesya? (Daniele 12:10) (Alole chiwulili.)

⁷ Daniele ali chisyasyo chambone mnope pangani jakulijiganya yakulochesya. Jwalakwe jwakwete nganisyo syambone paŵalijiganyaga yakulochesya soni jwasakaga kumanyilila yisyesyene. Daniele jwaliji jwakulinandiya soni jwamanyililaga kuti Yehofa mpaka amkamuchisye kupikanichisya yakulochesya naga akumpikanila soni kuŵa najo paunasi wambone. (Dan. 2:27, 28; aŵalanje Daniele 12:10.) Jwalakwe jwalosisye kuti jwaliji jwakulinandiya paŵamdalilaga Yehofa kuti amkamuchisyeje. (Dan. 2:18) Nambosoni Daniele jwalijiganyaga  mwakusamala mwamti jwawungunyaga m’Malemba gagasimanikwaga pandaŵijo. (Yel. 25:11, 12; Dan. 9:2) Ana mpaka amsyasye chamtuli Daniele?

8. Ana ligongo chichi ŵandu ŵane akusakayichila yakuti yakulochesya ya m’Baibulo yichikwanilichikwa? Ana tukusasosekwa kutenda chichi?

⁸ Amanyilileje ligongo lyalikwatendekasya kulijiganya yakulochesya ya m’Baibulo. Ana lili ligongo lyakuti akusaka kumanyilila yisyesyene? Naga yili myoyo nikuti Yehofa chachakamuchisya. (Yoh. 4:23, 24; 14:16, 17) Nambope ŵandu ŵane akusalijiganya yakulochesya ya m’Baibulo ni magongo gane. Akusatenda yeleyi pakusaka kupata umboni wakuti Baibulo nganijilembedwa ni Mlungu. Jemanjaji akusaganisya kuti naga Baibulo nganijityochela kwa Mlungu mpaka alisagulile jika yambone kapena yakusakala. Nambo tukusasosekwa kulijiganya Baibulo ni magongo gambone. Konjechesya pelepa chindu chakusosekwa mnope chili kuŵa ŵakulinandiya kuti tupikanichisyeje yakulochesya ya m’Baibulo.

9. Ana tukusosekwa kola ndamo japi kuti tupikanichisyeje yakulochesya ya m’Baibulo? Alondesye.

⁹ Aŵeje ŵakulinandiya. Yehofa akusatusalila kuti akusiŵakamuchisya ŵandu ŵakulinandiya. (Yak. 4:6) Myoyo, tukusasosekwa kupopela kuti jwalakwe atukamuchisyeje kupikanichisya yakulochesya ya m’Baibulo. Naga tuli ŵakulinandiya tuchijitichisya litala lyakusakamulichisya masengo Yehofa pakutupa chakulya chausimu kupitila mwa kapolo jwakulupichika. (Luk. 12:42) Yehofa ali Mlungu jwadongosolo. Yili yakupikanika kuti Yehofa akusakamulichisya masengo litala limo pakusaka kutukamuchisya kupikanichisya yisyesyene yayikusasimanikwa m’Maloŵe gakwe.—1 Akoli. 14:33; Aef. 4:4-6.

10. Ana tukulijiganya chichi kwa Mlongo Esther?

¹⁰ Awungunyeje. Chandanda, alijiganyeje yakulochesya yayikusiyasangalasya. Yeleyi ni yaŵatesile Mlongo Esther. Jwalakwe jwatendaga chidwi ni yakulochesya yayasalaga ya kwika kwa Mesiya. Jwalakwe jwatite, “Panakwete yaka 15 natandite kuwungunya kuti mbate maumboni gakwamba yakulochesya yayalembedwe Yesu mkanayiche.” Yajwalijiganyisye mlongoju kutyochela m’mipukutu jajasimanikwe m’Nyasa Jewe yamkamuchisye mnope. Mlongoju jwatite, “Mipukutu jine jalembedwe Klistu mkanayiche nambosoni yakulochesyayi yakwete maumboni gakuti yalembedwe ni Mlungu.” Mlongoju jwasasilesoni kuti, “Nasosekwaga kuŵalanga yakulochesyayi mwakuwilisyawilisya.” Mlongo Esther jwasangalele ligongo lyakuti jwakwanilisye yakulinga yakwe. Panyuma pakulijiganya yakulochesya yejinji ya m’Baibulo jwalakwe jwasasile kuti, “Napatile maumboni gakuti yajikusasala Baibulo yili yakuwona.”

11. Ana mpaka tupate maumbone gapi patupatile yakuti yajikusasala Baibulo yili yakuwona?

¹¹ Patukuyiwona kuti yakulochesya yine yajikusasala Baibulo yakwanilichikwe kala, tukusamkulupilila mnope Yehofa soni kupikanila malangiso galigose gakusatupa jwalakwe. Konjechesya pelepa, yakulochesya ya m’Baibulo yikusatukamuchisya kola nganisyo syambone pakwamba ya chembecheyo cha msogolo, mwangasamala kandu ni yakusawusya yatukusimana nayo apano. Kwende tukambilane yakulochesya yiŵili yayikusasimanikwa m’buku ja Daniele yayikukwanilichikwa apano. Kupikanichisya yakulochesyayi mpaka kutukamuchisye kuti tusaguleje yindu mwalunda.

12. Ana sajo sya “litaka lyewanganye ni chisyano” sikwimila chichi? (Daniele 2:41-43)

¹² Aŵalanje Daniele 2:41-43. Musagamisi sya Mwenye Nebukadinesa syaŵagopolele Daniele, sajo sya chiwanichisyo chaŵachiweni mwenyeju syapanganyidwe ni “litaka lyewanganye ni chisyano.” Patukuwanichisya yakulochesya yeleyi ni yakulochesya yine yayikusasimanikwa m’buku ja Chiwunukuko, mpaka tusale kuti sajosi sikwimila mkamulano wa Britain ni America wawuli ulamusi wamachili mnope pachilambo chosope chapasi masiku agano. Pakwamba ya ulamusi wamachiliwu, Daniele jwatite, “Tiwuchiŵa wakulimba mbali jine soni mbali jine tiwuchiŵa wangalimba.” Ligongo chichi mbali jine ja ulamusiwu tiwuchiŵa wangalimba? Yili myoyo ligongo lyakuti ŵandu ŵali mu ulamusiwu, ŵakwawanichisya ni litaka akusalepela kutenda yindu mwamachili mpela chisyano. b

13. Ana ni yindu yapi yakusosekwa mnope yatukulijiganya mu yakulochesya yeleyi?

¹³ Yaŵatite Daniele pakulondesya sagamisi sya chiwanichisyo mnopemnope sajo syakwe yikusatukamuchisya kupikanichisya yindu yejinji yakusosekwa mnope. Chandanda, mkamulano wa Britain ni America ulosisye kuti uli wamachili mmatala gane. Mwachisyasyo, mkamulanowu wawinile Ngondo Jandanda soni Ngondo Jaŵili ja Pachilambo Chosope. Nambope ulamusi wamachiliwu uŵele wangali machili mumbali sine ligongo lyakuti ŵandu ŵakwe ŵangapikangana payindu yine. Chaŵili, ulamusi wa Britain ni America uchiŵa wakumalisya kulamulila pachilambopa Uchimwene wa Mlungu pawuchimasyaga ma uchimwene gosope ga ŵandu. Atamose kuti ndaŵi sine yilambo yine mpaka yilimbaneje ni ulamusi wa Britain ni America, nambo jemanjaji nganaŵa awujinjile mmalo. Tukumanyilila yeleyi ligongo lyakuti “liganga” lyalikwimila Uchimwene wa Mlungu lichikasa syajo syasikwimila mkamulano wa Britain ni America.—Dan. 2:34, 35, 44, 45.

14. Ana kupikanichisya yakulochesya yakwamba sajo sya litaka lyewanganye ni chisyano mpaka kutukamuchisye chamtuli kusagula yindu mwalunda?

¹⁴ Ana wawojo akusakulupilila yakuti yakulochesya ya Daniele yakwamba litaka lyewanganye ni chisyano yili yakuwona? Naga yili myoyo mpaka yalongolele mwakusatendela yindu paumi wawo. Mwamti nganaŵa alimbene ni kusosasosa mbiya syejinji kapena kupata katundu jwejinji ligongo akumanyilila kuti pachangakaŵapa chilambo chakusakalachi chichijonanjidwe. (Luk. 12:16-21; 1 Yoh. 2:15-17) Kupikanichisya yakulochesya yeleyi kuchakamuchisya kugawona masengo gakwiganya soni gakulalichila kuŵa gakusosekwa mnope. (Mat. 6:33; 28:18-20) Panyuma pakulijiganya yakulochesya yeleyi, mpaka atende chenene kuliwusya kuti, ‘Ana yindu yangusatendaga paumi wangu yikusalosyaga kuti ngusakulupilila kuti pachangakaŵapa Uchimwene wa Mlungu uchimasya maboma gosope ga ŵandu?’

15. Ana ŵani masiku agano ŵali “mwenye jwa kumpoto” soni “mwenye jwa kum’mwela”?

¹⁵ Aŵalanje Daniele 11:40. Buku ja Daniele chaputala 11 jikusasala ya achayimwene ŵaŵili ŵakulimbana mnope. Patukuwanichisya yakulochesyayi ni yakulochesya yine yajikusasala Baibulo tukusamanyilila kuti “mwenye jwa kumpoto” ali chilambo cha Russia ni yilambo yine yayili pamkamulano ni chilambochi. Tukusamanyililasoni kuti “mwenye jwa kum’mwela” ali ulamusi wamachili mnope wa Britain ni America. c

16. Ana ŵakutumichila ŵa Mlungu ŵali pasi pa ulamusi wa “mwenye jwa kumpoto” akusasimana ni yakusawusya yamtuli?

¹⁶ Ŵakutumichila ŵa Mlungu ŵali pasi pa ulamusi wa “mwenye jwa kumpoto” akusalagasidwa mmatala gejinji ni mwenyeju. Abale ni alongo ŵane aŵele  mkuputidwa soni kuŵichidwa mundende ligongo lya chikulupi chawo. Mmalo mwakwalekasya abale ni alongo ŵetuŵa kumtumichila Yehofa, yitendo ya “mwenye jwa kumpoto” yikusagamba kulimbisya chikulupi chawo. Ligongo chichi yikusaŵa myoyo? Yikusaŵa myoyo ligongo lyakuti abale ni alongo ŵetuŵa akusamanyilila kuti kulagasidwa kwa ŵakutumichila ŵa Mlungu kukusakwanilisya yakulochesya ya m’Baibulo yiŵasasile Daniele. d (Dan. 11:41) Kumanyilila yeleyi mpaka kutukamuchisye kulimbisya chembecheyo chetu soni kuŵa ŵakulupichika mnope kwa Yehofa.

17. Ana ŵakutumichila ŵa Mlungu ŵali pasi pa ulamusi wa “mwenye jwa kum’mwela” akusasimana ni yakusawusya yamtuli?

¹⁷ Munyumamu “mwenye jwa kum’mwela” jwalagasyagasoni ŵakutumichila ŵa Mlungu. Mwachisyasyo, chakundanda kwa yaka ya mma 1900, abale ŵajinji ŵaŵiyichidwe mundende ligongo lya ungajinjilila nawo ya m’chilambo. Nambosoni ŵanache ŵa abale ŵajinji ŵatopoledwaga mmasukulu paligongo lilili. Mwamti mu yaka yapachangakaŵapa kulupichika kwa ŵandu ŵa Yehofa ŵakusatama pasi pa ulamusi wa mwenyeju kulinjidwe mmatala gejinji. Mwachisyasyo, pandaŵi ja makampeni  soni yisagula, Mklistu mpaka alinjidwe kuŵa kumbali ja mundu jwine jwakutenda nawo yisagulayo. Komboleka kuti jwalakwe nganaŵa apite kukufota nambo mumtima mwakwe mpaka asagule mundu jwakumsaka pa ŵandu ŵakupikisanawo. Kusala yisyene, kwa m’weji mpaka yiŵe chenene kuŵambala kujigala nawo mbali muyakutendekwa ya ndale mulitala lililyose chinga muyitendo kapena mkaganisye ketu.—Yoh. 15:18, 19; 18:36.

18. Ana tutendeje uli “mwenye jwa kumpoto” pakukangana ni “mwenye jwa kum’mwela”? (Alole chiwulili.)

¹⁸ Ŵandu ŵele ŵangakulupilila yakulochesya ya m’Baibulo akusakola woga mnope “mwenye jwa kum’mwela” pakulimbana ni “mwenye jwa kumpoto.” (Dan. 11:40) Achayimwene wosopeŵa akwete yida yamachili yangondo ya nyukiliya yampaka ayikamulichisye masengo pakonanga yaumi yosope pachilambopa. Nambope, tukumanyilila kuti Yehofa nganaŵa akundile kuti yeleyi yitendekwe. (Yes. 45:18) Mmalo mwakuti yeleyi yitulagasyeje nganisyo, kulimbana kwa “mwenye jwa kumpoto” ni “mwenye jwa kum’mwela” kukusalimbikasya chikulupi chetu ligongo yikusatusimichisya kuti mbesi ja chilambochi jiŵandichile.

19. Ana tukusosekwa kumanyilila yamtuli pakwamba yakulochesya ya m’Baibulo?

¹⁹ Ngatukusamanyilila yayichitendekwa pakwanilichikwa kwa yakulochesya yine ya m’Baibulo. Nombe jwakulochesya Daniele nganapikanichisyaga yakulochesya yosope yayalembedwe. (Dan. 12:8, 9) Nambope, ungamanyilila wetu yayichitendekwa pakwanilichikwa kwa yakulochesya yine ya m’Baibulo, yangagopolela kuti yakulochesyayo ngasiyikwanilichikwa. Mwangakayichila Yehofa chachitusalila yindu yatukusosechela kumanyilila pa ndaŵi jakwe mpela mwaŵele ali mkutendela munyumamu.—Amo. 3:7.

20. Ana ni yakulochesya yapi ya m’Baibulo yakusangalasya yachiyikwanilichikwe pachangakaŵapa? Ana tukusosekwa kupitilisya kutenda chichi?

²⁰ Pachangakaŵapa ŵandu chachigumila pachilambopa kuti, “Sambano tuli pamtendele soni pangali chakutujogoya!” (1 Ates. 5:3) Mwamti maboma gapachilambopa gachijimuchila soni kumasya dini syosope syaunami. (Chiw. 17:16, 17) Kaneko jemanjaji chachajimuchila ŵandu ŵa Mlungu. (Esek. 38:18, 19) Yindu yeleyi yichilongolela ku ngondo jakumalisya ja Alamagedo. (Chiw. 16:14, 16) Mwamti tuli ŵakusimichisya kuti yindu yeleyi chiyitendekwe pachangakaŵapa. Myoyo kwende tupitilisye kwayamichila Atati ŵetu ŵachinonyelo ŵakwinani mwakuganichisya yakulochesya ya m’Baibulo soni kwakamuchisya ŵane kutenda yakulandanayo.