NGANI JAKULIJIGANYA 33
NYIMBO NA. 130 Tuŵeje Ŵakululuchila
Tumsyasyeje Yehofa Patukutenda Yindu ni Ŵandu Ŵatesile Ulemwa Wekulungwa
“Naga jwine akutenda chakulemwa, tukwete jwakutukamuchisya.” —1 YOH. 2:1.
CHAKULINGA CHA NGANIJI
Chitulole yatukulijiganya payawatesile mpingo wa m’yaka 100 yandanda wa ku Kolinto ni mundu juŵatesile chakulemwa chekulungwa.
1. Ana Yehofa akusasaka kuti ŵandu wosope atende chichi?
YEHOFA ŵapanganyisye ŵandu kuti akole ufulu. Myoyo mpaka akamulichisye masengo ufulu welewu pakusagula yakutenda. Nambo chindu chakusosekwa mnope champaka asagule mundu chili kulipeleka kwa Yehofa ni kuŵa m’liŵasa lya ŵakutumichila ŵakwe ŵa pachilambo chosope. Mwamti Yehofa akusasaka jwalijose ali atesile yeleyi. Yili myoyo ligongo lyakuti jwalakwe akusiŵasosela yambone ŵandu wosope. Akusasakasoni kuti jemanjajo asangalaleje ligongo lyakuŵa paunasi ŵambone ni jwalakwejo, nambosoni kuti akole upile wakutama ni umi mpaka kalakala.—Det. 30:19, 20; Agal. 6:7, 8.
2. Ana Yehofa akusasaka kuti ŵandu ŵanganaŵe kugalawuka mtima atende chichi? (1 Yohane 2:1)
2 Nambope, Yehofa jwangamkanganichisyaga jwalijose kuti amtumichileje. Jwalakwe akusasaka kuti mundu jwalijose asagule jika yakutenda. Nambi wuli naga Mklistu jwam’batisidwe akasile lilamusi lya Yehofa mwakutenda chakulemwa chekulungwa? Naga jwalakwejo ngakugalawuka mtima akusasosekwa kutyosyedwa mumpingo. (1 Akoli. 5:13) Atamose yili yitendekwe yeleyi, Yehofa akusajembecheya kuti mundujo chachiwujila kwa jwalakwe. Mwamti lyeleli ni ligongo lyakwe jwapeleche mbopesi jakutuwombola ni chakulinga chakuti yiŵe yakomboleka kumkululuchila mundu jwakulemwa jwagalawiche mtima. (Aŵalanje 1 Yohane 2:1.) Kusala yisyene Yehofa ali Mlungu jwachinonyelo, jwakusiŵalimbikasya ŵandu ŵatesile ulemwa kuti agalawuche mtima.—Sak. 1:3; Alo. 2:4; Yak. 4:8.
3. Ana chitukambilane chichi mu ngani ajino?
3 Yehofa akusatukamuchisya kumanyilila mwakusawuwonela ulemwa nambosoni mwakusiŵawonela ŵandu ŵatesile ulemwa. Mwamti jwalakwe akusasaka kuti tutendeje yakulandanayo. Ngani ajino chijitukamuchisye kumanyilila mwampaka tutendele yeleyi. Myoyo pakulijiganya nganiji, alinje kulola (1) muwatendelaga yindu mpingo wa m’yaka 100 yandanda wa ku Kolinto ni ŵandu ŵatesile ulemwa wekulungwa, (2) malangiso gaŵapeleche ndumetume Paulo ku mpingowu panyuma pakuti mundu jwakulemwa agalawiche mtima, soni (3) mwakusapikanila Yehofa, naga Mklistu atesile chakulemwa chekulungwa.
YAŴATENDAGA M’YAKA 100 YANDANDA MKLISTU PATESILE ULEMWA WEKULUNGWA
4. Ana mumpingo wa ku Kolinto mwatendekwe ngani jamti uli? (1 Akolinto 5:1, 2)
4 Aŵalanje 1 Akolinto 5:1, 2. Paulendo wakwe watatu wa umishonale, Paulo jwapikene ngani jakutesya chanasa jajatendekwe mumpingo wa ku Kolinto wawaliji uli ugambile kutamilikasidwa kwene. M’bale jwine jwa mumpingowu ŵagonaga ni ŵakongwe wa babagwe. Ndamoji jaliji jakutesya sooni soni jaliji jakuti “atamose ŵandu ŵamitundu jine ŵangatenda.” Nambo Aklistu ŵa mumpingowu, ŵayiwonaga kuti pangali chakusawusya chilichose kuti apitilisyepe kuŵa mumpingowo. Komboleka ŵane mwa jemanjaji ŵaganisyaga kuti kumkunda mundujo kuŵape mumpingo, kwaliji kulosya chanasa mpela mwakusatendela Yehofa pakwalosya chanasa ŵandu ŵangali umlama. Nambotu Yehofa jwangasangalalaga ni kutenda ulemwa pasikati pa ŵandu ŵakwe. Mwamti ndamo jakusakala jaŵatesile jwamlumeju jasakesye mbili ja mpingo wosopewo. Nambosoni yikaŵe kuti jwalakwe akupitilisya kuŵa mumpingomo, komboleka akalimbikasyaga Aklistu ŵane ŵaŵakungulukaga nawo kutendasoni ndamo jakusakalaji. Sambano, ana Paulo jwawusalile mpingowu kuti utende chichi ni nganiji?
5. Ana Paulo jwawusalile mpingo wa ku Kolinto kuti utende chichi? Ana jwalakwe jwagopolelaga chichi pelepa? (1 Akolinto 5:13) (Alolesoni chiwulili.)
5 Aŵalanje 1 Akolinto 5:13. Mwakusalilidwa ni Yehofa, Paulo jwawulembele chikalata mpingowu, kuwusalila kuti akusosekwa kumtyosya mundu jwakulemwajo mumpingo. Ana Aklistu ŵasosekwaga kumwona chamti uli mundu jweleju? Paulo jwasalile jemanjaji kuti “mleche kukamulana” ni mundu jweleju. Ana yeleyi yagopolelaga chichi? Paulo jwasasile kuti yeleyi yapwatikagaposoni ‘ngalyaga najo mundu jwelejo.’ (1 Akoli. 5:11) Patukulya yimpepe ni mundu jwine, tukusakolasoni upile wakambilana ni mundujo ngani syakulekanganalekangana. Apatu, Paulo jwakamuchisyaga Aklistu ŵa mumpingowu kuti ngakusosekwa kukunguluka ni munduju m’litala lililyose. Kutenda yeleyi kukakamuchisye Aklistu ŵa mumpingowo kuti akajigalila ndamo jakwe jakusakalajo. (1 Akoli. 5:5-7) Konjechesya pelepa kuŵambala kukunguluka najo mundu jweleju, kukamkamuchisye jwalakwejo kumanyilila kuti amlemwechesye mnope Yehofa, mwamti akatandite kutenda sooni yayikamkamuchisye kuti agalawuche mtima.
Yehofa ŵamsalile Paulo kuti awulembele chikalata mpingo wa ku Kolinto, chakwasalila kuti amtyosye mumpingo mundu jwakulemwa jwanganagalawuka mtima (Alole ndime 5)
6. Ana Aklistu ŵa mumpingo wa ku Kolinto ŵatesile wuli ni malangiso gaŵapeleche Paulo? Ana malangisogo gamkamuchisye chamti uli mundu jwaŵatesile chakulemwa jula?
6 Panyuma pakuti Paulo ŵatumichisye chikalata Aklistu ŵampingo wa ku Kolinto, jwalakwe jwatandite kudandawula yachajile abale ŵa mumpingowo panyuma pakupochela malangisoga. Nambo kaneko, Tito ŵamsalile Paulo ngani jakusangalasya mnope. Aklistu ŵa mumpingo wa ku Kolinto ŵachipochele chenene chikalata chaŵalembele Paulo. (2 Akoli. 7:6, 7) Mwamti jemanjajo ŵakuyisye malangiso gosope gagaliji m’chikalacho. Konjechesya pelepa, pali pagambile kupita myesi kutyochela paŵapochele chikalata chakutyochela kwa Paulochi, mundu jwaŵatesile chakulemwa jula jwagalawiche mtima. Jwalakwe jwachenjile ndamo syakwe syakusakala, soni jwatandite kukuya mfundo syakulungama sya Yehofa. (2 Akoli. 7:8-11) Ana kaneko Paulo jwawusalile mpingowo kutenda chichi?
YAŴASOSEKWAGA KUTENDA AKLISTU ŴA MUMPINGO WA KU KOLINTO NI MUNDU JWAŴAGALAWICHE MTIMA
7. Ana kumtyosya mumpingo mundu jwakulemwa kwakwete yakuyichisya yambone yapi? (2 Akolinto 2:5-8)
7 Aŵalanje 2 Akolinto 2:5-8. Paulo jwasasile kuti yaŵatesile ŵandu “ŵajinji mwa jemanja pakumjamuka mundujo [yaliji] yakwanila.” Kuŵecheta kwine mpaka tujile kuti, chamuko chajwapochele munduju chakamwile masengo gakwe. Ana masengo gakwe galiji gamti uli? Galiji kumkamuchisya jwalakwejo kuti agalawuche mtima.—Aheb. 12:11.
8. Ana Paulo jwasalile chichi Aklistu ŵa mumpingo wa ku Kolinto, panyuma pakuti mundu jwakulemwa jula agalawiche mtima?
8 Pakwamba ya mundu jwaŵatesile chakulemwa jula, Paulo wawusalile mpingo wa ku Kolinto kuti, “Mumkululuchile ni mtima wosope soni mumlimbikasye” nambosoni “mumsimichisye mundujo kuti mkusimumnonyela.” Pelepatu Paulo ŵasakaga kuti Aklistu ŵa mumpingowo atende yejinji kupunda kwamba kumwuchisya mundujo pasikati pa ŵakutumichila ŵa Yehofa. Paulo jwasakaga kuti jemanjajo amsimichisye mundu jwaŵagalawiche mtimajo kutyochela m’maloŵe gawo, soni yitendo yawo kuti amkululuchile yisyesyene nambosoni kuti akusamnonyela mnope. Kutenda yeleyi kukamsimichisye mundujo kuti, jemanjajo ali ŵakusangalala mnope ligongo lyakuti jwalakwejo awujile mumpingo.
9. Ana chichi chachikatendekasisye Aklistu ŵane mumpingo wa ku Kolinto kuyiwona kuŵa yakusawusya kumkululuchila mlongo mjawo jwaŵagalawiche mtima?
9 Ana komboleka kuti ŵandu ŵane ŵa mumpingo wa ku Kolinto ŵayiweni kuŵa yakusawusya kumpochelasoni mundu jwaŵagalawiche mtima jula pasikati pawo? Nganiji jangasala chilichose, nambo komboleka kuti yeleyi yatendekwe. Tukuŵecheta yeleyi ligongo lyakuti yaŵatesile munduju yayikasisye yakusawusya yejinji pampingopo nambosoni yatesisye sooni ŵandu ŵajinji. Aklistu ŵa mumpingowu ŵalingagalingaga kupikanila malamusi ga Yehofa. Myoyo, komboleka ŵane mwa jemanjaji ŵayiwonaga kuti nganichiwa chilungamo kumwuchisya mumpingo mundu jwaŵatesile chakulemwa chekulungwa mpela chelechi. (Alole Luka 15:28-30.) Nambo, ana ligongo chichi yaliji yakusosekwa mnope kuti Aklistu ŵa mumpingowo, amlosye chinonyelo chisyesyene mlongo mjawo jwaŵagalawiche mtimajo?
10-11. Ana chikatendekwe chichi yikaŵe kuti achakulungwa ŵa mumpingo alepele kumkululuchila mlongo mjawo jwaŵagalawiche mtima?
10 Agambe ganisya yindu yayikatendekwe yikaŵe kuti achakulungwa ŵa mumpingo akukana kumwuchisya mumpingo mundu jwaŵagalawiche mtima yisyesyene. Nambosoni panyuma pakuti awujile mumpingo Aklistu achimjakwe akulepela kumlosya chinonyelo chisyesyene. Mwangakayichila munduju akadandawulaga “ni kwika pakwasa mtima.” Komboleka akaganisyagasoni kuti nganiŵa yikomboleche kumtumichilasoni Yehofa. Konjechesya pelepa, mwine akalesilesoni kutenda yindu yakumkamuchisya kuŵasoni paunasi wambone ni Mlungu.
11 Ana ni chindu chine chapi chachikatendechele abale ni alongo ŵakalepele kumkululuchila mlongo mjawo jwaŵagalawiche mtima? Yeleyi yikasokonasisye unasi wawo ni Yehofa. Yikaliji myoyo ligongo lyakuti jemanjaji akalepele kulosya chanasa chekulungwa chakusiŵalosya Yehofa ŵandu ŵagalawiche mtima. Mmalomwakwe jemanjaji nikuti akamsyasyaga Satana jwali jwangasa soni jwangali chanasa amta panandi. Konjechesya pelepa, yikalijisoni kuti jemanjaji akundile kuti Satana ŵakamulichisye masengo pakusaka kumlepelekasya mlongo mjawoju kuti apitilisye kumtumichila Yehofa.—2 Akoli. 2:10, 11; Aef. 4:27.
12. Ana mpingo mpaka umsyasye chamti uli Yehofa?
12 Ana Aklistu ŵa mumpingo wa ku Kolinto akalosisyesoni chamti uli kuti akumsyasya Yehofa, ngaŵaga Satana? Jemanjaji akatesile yeleyi mwakusyasya mwakusatendela yindu Yehofa ni mundu jwakulemwa jwagalawiche mtima. Alole yine mwa yindu yaŵasasile ŵakulemba Baibulo ŵane pakwamba ya Yehofa. Pakusala ya jwalakwe, Daudi jwatite, ‘ali jwambone, ni jwakululuchila ŵandu ŵakwe.’ (Sal. 86:5) Nombe Mika jwalembile kuti: “Ana ŵani ŵali Mlungu mpela ŵalakwe, ŵele ŵakusakululuchila ulemwa ni kuliŵalila yakulemwa?” (Mik. 7:18) Nombesoni Yesaya jwasasile kuti, “Ŵakulemwa aleche ndamo syawo syakusakala, nipo jwangalungama aleche nganisyo syakwe syakusakala. Awujilile kwa AMBUJE kuti ŵatendele chanasa, awujilile kwa Mlungu jwetu, pakuti tachakululuchila mnope.”—Yes. 55:7.
13. Ligongo chichi yaliji yakuŵajilwa kumwuchisya mumpingo mundu jwakulemwa jwaŵagalawiche mtima jula? (Alole libokosi lyakuti “ Ana Jwamlume jwa ku Kolinto Ŵamwuchisye mu Mpingo Pali Papitile Ndaŵi Jelewu Chamti uli?”)
13 Pakusaka kumsyasya Yehofa, Aklistu ŵa mumpingo wa ku Kolinto ŵasosekwaga kumpochela ni magasa gaŵili mlongo mjawo jwaŵagalawiche mtima, nambosoni kumsimichisya kuti akusamnonyela mnope. Paulo jwasalile jemanjaji kuti naga akumkululuchila mlongo mjawo jwaŵagalawiche mtimaju nikuti jemanjajo ali “ŵakupikanila” mu yindu yosope. (2 Akoli. 2:9) Atamose kuti munduju jwagambile kuŵa kusa kwa mpingo kwa myesi jakuŵalanjikape, nambope chamuko chaŵapochele chila chamkamuchisye kuti agalawuche mtima. Myoyo, paliji pali pangali chindu chilichose chachikatendekasisye kuti achelewesoni kumwuchisya jwalakwejo mumpingo.
TUMSYASYEJE YEHOFA MWAKULOSYA CHILUNGAMO SONI CHANASA
14-15. Ana muwatendele yindu mpingo wa ku Kolinto ni ngani ja mundu juŵatesile chakulemwa yitujiganyisye chichi? (2 Petulo 3:9) (Alolesoni chiwulili.)
14 Ngani jakwamba mwaŵatendele yindu mpingo wakala wa ku Kolinto ni mundu jwaŵatesile chakulemwa chekulungwa, jalembedwe soni kusunjidwa kuti ‘jitujiganye’ m’weji. (Alo. 15:4) Kupitila mu nganiji, tukusalijiganya kuti Yehofa jwangasaka amta panandi kuti mundu jwatesile ulemwa wekulungwa jwakulepela kugalawuka mtima apitilisye kusimanikwa pasikati pa ŵakutumichila ŵakwe. Jwalakwe jwangayiwonagasoni kuti kumkunda mundu jwangakugalawuka mtima kupitilisya kusimanikwa mumpingo chili “chanasa.” Yili yisyene kuti Yehofa ali jwachanasa, nambope jwalakwe jwangalechelela yakusakala kapena kunandiya machili ga mfundo syakwe syakulungama. (Yud. 4) Yikaŵe kuti Yehofa akusiŵakunda ŵandu ŵangagalawuka mtima kupitilisya kuŵa mumpingo, yikaliji yakuti jwalakwe alepele kulosya chanasa, ligongo yeleyo yikatendekasisye kuti ŵandu ŵane mumpingomo aŵe pangosi.—Mis. 13:20; 1 Akoli. 15:33.
15 Tukusalijiganya kuti Yehofa jwangasaka kuti mundu jwalijose ajonanjidwe. Jwalakwe akusasaka kwakulupusya ŵandu naga yili yakomboleka. Yehofa akusiŵalosya chanasa ŵandu ŵachenjile mtima wawo soni akusasaka kwakamuchisya kuti aŵesoni paunasi wambone ni jwalakwe. (Esek. 33:11; aŵalanje 2 Petulo 3:9.) Myoyo, mundu jwa mumpingo wa ku Kolinto jula pajwagalawiche mtima soni kuchenga ndamo syakwe, Yehofa kupitila mwa ndumetume Paulo ŵasalile ŵanduwo kuti amkululuchile soni kumpochela ni magasa gaŵili.
Patukwapochela chenene ŵandu ŵawujile mumpingo, tukusaŵa tuli mkusyasya chinonyelo soni chanasa chakwete Yehofa (Alole ndime 14-15)
16. Ana wawojo akupikana wuli ni yawatite mpingo wa ku Kolinto pakusamalila ngani ja mundu juŵatesile chakulemwa?
16 Kukambilana ngani ja mundu jwa ku Kolinto juŵatesile chakulemwa jitukamuchisye kumanyilila kuti Yehofa ali Mlungu jwa chinonyelo, jwakulungama, soni kuti akusatenda yindu mwachilungamo. (Sal. 33:5) Kusala yisyene kulijiganya yeleyi kututendekasisye wosopewe kusaka kumchimbichisya mnope Mlungu jwetu. Tukuŵecheta yeleyi ligongo lyakuti wosopewe tuli ŵakulemwa soni tukusasaka kuti Mlungu atukululuchile. Jwalijose jwa m’weji akusosekwa kumyamichila mnope Yehofa ligongo lya mbopesi jakutuwombola jajikusatendekasya kuti yiŵeje yakomboleka kutukululuchila yakulemwa yetu. Kusala yisyene yili yakulimbikasya mnope kumanyilila kuti Yehofa akusiŵanonyela yisyesyene ŵakutumichila ŵakwe soni kuti akusiŵasosela yambone mnope.
17. Ana tuchikambilana chichi mungani syakuyichisya?
17 Nambi wuli pakwamba yakusamalila ngani sya ŵandu ŵatesile yindu yakulemwa masiku agano? Ana achakulungwa ŵa mumpingo mpaka amsyasye chamti uli Yehofa pakusaka kumkamuchisya mundu jwatesile chakulemwa kuti agalawuche mtima? Ana abale ni alongo akusosekwa kutenda wuli naga achakulungwa ŵa mumpingo asagwile yakumtyosya kapena kumwuchisya mundu mumpingo? Tuchipata kwanga kwa yiwusyoyi mungani jakuyichisya.
NYIMBO NA. 109 Twanonyele Ŵane Kutyochela Mumtima
