NGANI JAKULIJIGANYA 34
NYIMBO NA. 107 Mlungu Ŵalosisye Chinonyelo
Yampaka Atende Achakulungwa Pakwalosya Chinonyelo Soni Chanasa Ŵandu Ŵatesile Ulemwa
“Mlungu akumlosya umbone mtima pakusaka kumkamuchisya kuti mgalawuche mtima.”—ALO. 2:4.
CHAKULINGA CHA NGANIJI
Chitulole yampaka atende achakulungwa ŵa mumpingo pakwakamuchisya ŵandu ŵatesile ulemwa wekulungwa.
1. Ana ŵandu ŵane ŵatesile ulemwa wekulungwa mpaka akombole kutenda chichi?
MUNGANI jipite jila twayiweni yiŵatesile ndumetume Paulo pakumkamuchisya mundu juŵatesile chakulemwa chekulungwa mu mpingo wa ku Kolinto. Ligongo lyakuti mundu jwakulemwajo nganagalawuka mtima, ŵamtyosisye mumpingo. Nambope, mpela mwaliŵechetele lilemba lyakulongolela nganiji ŵandu ŵatesile ulemwa wekulungwa mpaka yikomboleche kwakamuchisya kuti agalawuche mtima. (Alo. 2:4) Ana achakulungwa ŵa mumpingo mpaka ŵakamuchisye chamti uli jemanjaji kuti agalawuche mtima?
2-3. Ana tukusosekwa kutenda chichi patumanyilile kuti Mklistu mjetu atesile ulemwa wekulungwa, ligongo chichi tukusosekwa kutenda yeleyo?
2 Naga achakulungwa ŵa mumpingo ngakumanyilila kuti jwine atesile ulemwa wekulungwa, jemanjajo nganaŵa akombwele kumkamuchisya. Sambano ana tukusosekwa kutenda chichi naga tumanyilile kuti Mklistu mjetu atesile ulemwa wekulungwa yampaka yimtendekasye kuti atyosyedwe mumpingo? Tukusosekwa kumlimbikasya mundujo kuti akaŵende chikamuchisyo kwa achakulungwa ŵa mumpingo.—Yes. 1:18; Mase. 20:28; 1 Pet. 5:2.
3 Nambi uli naga mundu jwatesile ulemwajo akukana kuja kuŵechetana ni achakulungwa ŵa mumpingo? Naga yili myoyo m’wejo tukusosekwa kuja kwasalila nganijo achakulungwa ŵa mumpingo kuti amkamuchisye mundujo. Kutenda yeleyi mpaka kulosye kuti tukusamnonyela Mklistu mjetujo. Ligongo tukumanyilila kuti achakulungwa ŵa mumpingowo mpaka amkamuchisye jwalakwejo mwakuŵajilwa. Naga mundu jwakulemwajo akupitilisya kutenda yakusakala unasi wakwe ni Yehofa mpaka usokonechele. Konjechesya pelepa, jwalakwejo mpaka asakasye mbili ja mpingo wosope. Myoyo, tukusajawula kukwasalila achakulungwa ŵa mumpingo ya nganijo atamose kuti kutenda yeleyi kukusaŵa kwakusawusya. Tukusatenda yeleyi, ligongo lyakuti tukusamnonyela Yehofa soni Aklistu achimjetu.—Sal. 27:14.
YAMPAKA ATENDE ACHAKULUNGWA ŴA MUMPINGO PAKWAKAMUCHISYA ŴANDU ŴATESILE ULEMWA WEKULUNGWA
4. Ana achakulungwa ŵa mumpingo akusakola chakulinga chamti uli pakusimana ni mundu jwatesile ulemwa wekulungwa?
4 Naga mundu jwine mumpingo atesile ulemwa wekulungwa, likuga lya achakulungwa ŵa mumpingo likusasagula achakulungwa ŵatatu ŵakuŵajilwa kuti aŵe mu komiti a jakuti jiwonegane ni mundujo. Achakulungwaŵa akusasosekwa kuŵa ŵakulinandiya soni ŵakuwusimana mtima. Jemanjaji pakulingalinga kumkamuchisya mundu jwakulemwa kuti agalawuche mtima, akusamanyilila kuti ngakusosekwa kumkanganichisya mundujo kuti achenje. (Det. 30:19) Achakulungwaŵa akusamanyilila kuti ŵandu wosope ŵalemwisye nganaŵa agalawiche mtima mpela mujwatendele Mwenye Daudi. (2 Sam. 12:13) Ŵandu ŵane ŵatesile ulemwa mpaka asagule ngapikanila malangiso ga Yehofa. (Gen. 4:6-8) Atamose yili myoyo, chakulinga cha achakulungwa ŵa mumpingo chikusaŵa kumkamuchisya mundu jwakulemwajo kuti agalawuche mtima naga yili yakomboleka. Ana achakulungwa ŵa mumpingo akusosekwa kumbuchilaga chichi pakusimana ni mundu jwatesile ulemwa wekulungwa?
5. Ana achakulungwa akusosekwa kulosya ndamo syapi pakumkamuchisya mundu jwatesile ulemwa wekulungwa? (2 Timoteyo 2:24-26) (Alolesoni chiwulili.)
5 Achakulungwa ŵa mumpingo akusamanyilila kuti atamose mundu ali atesile ulemwa wekulungwa, akusaŵaga jwakusosekwa mnope pameso pa Yehofa. (Luk. 15:4, 6) Myoyo, achakulungwa ŵa mumpingo pasimene ni munduju, akusaŵambala kumŵechetela yachipongwe kapena kutenda yindu mwangamganichisya. Konjechesya pelepa, achakulungwaŵa chakulinga chawo chikagambaga kuŵa chakusaka kumanyililape yisyesyene ya nganijo, mmalomwakwe, jemanjaji akusasosekwa kulosya ndamo syasikusasimanikwa pa 2 Timoteyo 2:24-26. (Aŵalanje.) Achakulungwaŵa akusasosekwa kuŵa ŵakufasa, ŵakuwusimana mtima soni ŵachanasa kuti akombole kumkamuchisya mundu jwakulemwajo kuchenga kaganisye kakwe.
Mpela muŵatendelaga abusa ŵa mundaŵi jakala nombe achakulungwa ŵa mumpingo akusalingalinga kujisosasosa ngondolo jesokonechele (Alole ndime 5)
6. Ana achakulungwa ŵa mumpingo akusajikosechelesya chamti uli mitima jawo mkanaŵe kusimana ni mundu jwatesile ulemwa? (Aloma 2:4)
6 Achakulungwa ŵa mumpingo akusakosechelesya mitima jawo. Jemanjaji pakutenda yindu ni mundu jwatesile ulemwa akusalingalinga kumsyasya Yehofa kwineku ali mkukumbuchila maloŵe ga Paulo gakuti, “Mlungu akusamlosya umbone mtima pakusaka kumkamuchisya kuti mgalawuche mtima.” (Aŵalanje Aloma 2:4.) Achakulungwa ŵa mumpingo ali abusa mwamti akusasosekwa kukuya malangiso ga Klistu soni kumsyasya jwalakwejo pakukamula masengo gawo. (Yes. 11:3, 4; Mat. 18:18-20) Komiti ja achakulungwa ŵa mumpingo mkanijiŵe kusimana ni mundu jwatesile ulemwa, jikusapopela kwa Yehofa kuti ŵakamuchisye kukola chakulinga chakumkamuchisya mundujo kugalawuka mtima. Jemanjajo akusawungunya m’Baibulo, m’mabuku getu soni akusamŵenda Yehofa kuti ŵape lunda. Achakulungwa ŵa mumpingo akusasosekwa kummanyilila chenene mundujo ni chakulinga chakuti apikanichisye chichamtendekasisye kutenda ulemwa.—Mis. 20:5.
7-8. Ana achakulungwa ŵa mumpingo mpaka amsyasye chamti uli Yehofa pangani jakulosya kuwusimana mtima pakumkamuchisya mundu jwatesile ulemwa?
7 Achakulungwa ŵa mumpingo akusasosekwa kumsyasya Yehofa mwakuŵa ŵakuwusimana mtima. Jemanjaji akusaganichisyaga yiŵatendaga Yehofa munyumamo pakwakamuchisya ŵandu ŵaŵatesile ulemwa. Mwachisyasyo, Yehofa ŵamkamuchisye Kaini mwakuwusimana mtima soni ŵamsalile yakuyichisya yayikusapagwa ligongo lyakutenda ulemwa. Konjechesya pelepa, ŵamsalile kuti naga akuchenga, yindu mpaka yimjendele chenene. (Gen. 4:6, 7) Yehofa ŵamkamuchisye Daudi kupitila mwa jwakulochesya Natani, juŵakamulichisye masengo chisyasyo chichamkamuchisye Daudijo kugalawuka mtima. (2 Sam. 12:1-7) Nambosoni Yehofa ‘jwaŵele ali mkutumisya’ ŵakulochesya kuti akakamuchisye Ayisalayeli ŵiŵatendaga yakusakala. (Yel. 7:24, 25) Yehofa nganajembecheyaga kuti ŵakutumichila ŵakwe agalawuche mtima kaneko ni kwakamuchisyaga. Mmalomwakwe, jwakamuchisyaga jemanjajo mwakwalimbikasya kuti agalawuche mtima.
8 Nombe achakulungwa ŵa mumpingo akusajigalila chisyasyo cha Yehofachi pakwakamuchisya ŵandu ŵatesile ulemwa wekulungwa. Mwakamulana ni 2 Timoteyo 4:2, achakulungwa ŵa mumpingo pakumkamuchisya mundu jwakulagasika nganisyo ligongo lya ulemwa watesile, akusatenda yindu mwakuwusimana mtima. Myoyo, ndaŵi syosope achakulungwa ŵa mumpingo akusasosekwa kuŵa ŵakuwusimana mtima kuti amkamuchisye mundu jwatesile ulemwa kutenda yakuŵajilwa. Nambo naga achakulungwa akutenda yindu mwakupya mtima kapena mwakutumbila, mundujo nganaŵa apikanile malangiso gawo soni nganaŵa agalawiche mtima.
9-10. Ana achakulungwa ŵa mumpingo mpaka amkamuchisye chamti uli mundu kuganichisya yindu yiyamtendekasisye kutenda ulemwa?
9 Achakulungwa ŵa mumpingo akusalinga kupikanichisya chichamtendekasisye mundu kuti atende ulemwa. Mwachisyasyo, ana mundujo jwatandite kuwujila munyuma ligongo lyakuti nganalijiganyaga pajika kapena jwalesile kulalichila? Ana jwalakwejo jwalesile kupopela kwa Yehofa ndaŵi syosope? Ana jwalakwe jwalesile kuŵambala kuganichisya yindu yakulemwecheka? Ana jwalepele kusagula achimjakwe ŵambone soni yakusangalasya yambone? Ana yindu yeleyi yikwayiye chamti uli kaganisye kakwe? Ana jwalakwejo akumanyilila mwakupikanila Atati ŵakwe Yehofa?
10 Achakulungwa ŵa mumpingo mpaka amwusye mundujo yiwusyo yampaka yimkamuchisye kuganichisya yindu yayatendekasisye kuti unasi wakwe ni Yehofa usokonechele soni kuti atende ulemwa. Achakulungwaŵa akusosekwa kutenda yeleyi mwachinonyelo soni akusosekwa kuŵambala kuwusya yindu yachimsisi yakwamba mundujo. (Mis. 20:5) Konjechesya pelepa, jemanjaji mpaka akamulichisye masengo yisyasyo pakusaka kumkamuchisya mundujo kumanyilila kogoya kwa yindu yatesileyo, mpela mujwatendele jwakulochesya Natani kwa Daudi. Komboleka pandaŵi jasimene ni mundujo, jwalakwejo mpaka atande kulitendela chanasa pa yindu yakulemwecheka yatesile. Mwinesoni paulendo wandanda pewu jwalakwejo mpaka ayiche pakugalawuka mtima.
11. Ana Yesu jwatendaga wuli yindu ni ŵandu ŵakulemwa?
11 Achakulungwa ŵa mumpingo akusalingalinga kumsyasya Yesu. Yesu paŵamkamuchisyaga Saulo jwa ku Taliso ŵamwusisye chiwusyo achi: “Saulo, Saulo, ligongo chichi mkundagasya une?” Chiwusyochi chamkamuchisye Saulo kumanyilila kuti yaŵatendaga yaliji yakulemwecheka. (Mase. 9:3-6) Nambosoni pakwamba ya jwamkongwe juŵaliji mpela Yesebele, Yesu jwasasile kuti, “Une nampele ndaŵi jwalakwejo kuti agalawuche mtima.”—Chiw. 2:20, 21.
12-13. Ana achakulungwa ŵa mumpingo mpaka ampe chamti uli ndaŵi jakwanila mundu jwatesile ulemwa kuti agalawuche mtima? (Alolesoni chiwulili.)
12 Naga achakulungwa ŵa mumpingo akumsyasya Yesu, nikuti ngasawutuchila kuganisya kuti mundu jwatesile ulemwajo nganaŵa agalawiche mtima. Atamose kuti ŵandu ŵane mpaka agalawuche mtima pandaŵi jandanda jasimene ni komiti ja achakulungwa, nambope ŵane mpaka asosekwe ndaŵi jakwanila. Myoyo achakulungwa ŵa mumpingowo, mpaka alinganye yakusimanasoni ni mundu jwatesile ulemwajo kwa maulendo gejinji. Komboleka panyuma pakusimana ni achakulungwawo ulendo wandanda, mundu jwatesile ulemwajo mpaka atande kuganichisya mnope yindu yaŵamsalile achakulungwawo. Mwamti jwalakwejo mpaka alosye kulinandiya mwakumŵenda Yehofa kuti amkululuchile. (Sal. 32:5; 38:18) Yeleyi mpaka yitendekasye kuti pachachisimana ni komiti ja achakulungwa pa ulendo wakuyichisya, mundu jwakulemwajo alosye ndamo syakulekangana ni siŵalosisye pandanda.
13 Achakulungwa ŵa mumpingo akusasosekwa kutenda yindu mwachanasa soni mwachinonyelo kuti amkamuchisye mundu jwakulemwa kugalawuka mtima. Achakulungwaŵa akusamŵenda Yehofa kuti amkamuchisye mundujo kukamulichisya masengo malangiso gampele kuti gamlongolele kugalawuka mtima.—2 Tim. 2:25, 26.
Achakulungwa ŵa mumpingo mpaka asimane ni mundu jwatesile ulemwa kwa maulendo gejinji pakusaka kumkamuchisya kuti agalawuche mtima (Alole ndime 12)
14. Ana nduni jwakusosekwa kupochela uchimbichimbi mundu juŵatesile ulemwa pagalawiche mtima, ligongo chichi yili myoyo?
14 Naga mundu juŵatesile ulemwa agalawiche mtima, tukusasangalala mnope (Luk. 15:7, 10) Ana payitendekwe yeleyi nduni jwakusosekwa kumchimbichisya? Kapena ali achakulungwa ŵa mumpingo? Aganichisye maloŵe gaŵalembile Paulo pakwamba ya ŵandu ŵatesile ulemwa. Jwalakwe jwatite, “Mwine Mlungu mpaka ŵakamuchisye kugalawuka mtima.” (2 Tim. 2:25) Maloŵe gakulondesya lilembali m’Baibulo ja Chisungu jakulijiganyila gakusasala kuti, “Jemanjaji pachenjile nganisyo soni ndamo syawo, uchimbichimbi ukusasosekwa kwawula kwa Yehofa ligongo ni jwakusamkamuchisya mundu kuti achenje. Paulo jwasasilesoni umbone wine wakusapata mundu jwagalawiche mtima ligongo yikusamkamuchisya mundujo kumanyilila yijiganyo yisyesyene. Nambosoni akusatandila kuganisya chenene yayikusamkamuchisya kuti akombole kuŵambala yitega ya Satana.”—2 Tim. 2:26.
15. Ana achakulungwa ŵa mumpingo mpaka atende uli pakusaka kupitilisya kumkamuchisya mundu jwagalawiche mtima?
15 Naga mundu juŵatesile ulemwa agalawiche mtima, komiti ja achakulungwa ŵa mumpingo jikusasosekwa kulinganya ulendo wa ubusa ni chakulinga chakuti apitilisye kumsalila mundujo yindu yampaka yimkamuchisye kuŵambala yitega ya Satana soni kuti atendeje yindu yambone. (Aheb. 12:12, 13) Nambosoni achakulungwa ŵa mumpingo akusasosekwa kuŵambala kumsalila jwalijose yakwamba mundu juŵatesile ulemwajo. Nambo ana ni yindu yapi yayikusasosekwa kumanyilila mpingo?
“MWAJAMUCHE PAMESO PA WOSOPE”
16. Mwakamulana ni 1 Timoteyo 5:20, ana Paulo jwagambaga ya ŵani paŵasalaga ya “pameso pa wosope”?
16 Aŵalanje 1 Timoteyo 5:20. Paulo jwamsalilaga maloŵega Timoteyo juŵaliji jwamkulungwa jwa mumpingo mjakwe pakwamba yampaka atende ni “ŵandu ŵakwete chisyoŵe chakutenda ulemwa.” Ana jwalakwe jwagopolelaga chichi? Yikuwoneka kuti jwalakwe pajwasalaga ya “pameso pa wosope” nganagambaga ya mpingo wosope.” Mmalomwakwe jwagambaga ya ŵandu ŵamnono ŵele komboleka ŵamanyililaga ya ulemwawo. Jemanjaji mpaka aŵe ŵandu ŵiŵalolite ni meso gawo chakulemwacho chili mkutendekwa kapena ŵandu ŵele ŵatesile kusalilidwa ni msyene jwakulemwajo. Myoyo achakulungwa ŵa mumpingo akusosekwa kwamanyisya ŵandu ŵeleŵa peŵa kuti mundu juŵatesile ulemwajo apochele chikamuchisyo.
17. Naga ulemwa watesile mundu jwine umanyiche mnope mumpingo kapena uchimanyika kusogolo, ana pakusasosekwa kupelechedwa chimanyisyo chamti uli soni ligongo chichi akusasosekwa kupeleka chimanyisyochi?
17 Nambo ndaŵi sine mpaka yisimanikwe kuti ulemwa watesile mundujo ukumanyika mnope kapena chiwumanyiche kwa ŵandu ŵajinji. Naga yili myoyo maloŵe gakuti “pameso pa wosope” mpaka gajimilesoni mpingo wosope. Pelepo jwamkulungwa jwa mumpingo chachipeleka chimanyisyo chakuti m’bale kapena mlongo jwamtijwamti apochele chamuko. Ligongo chichi akusosekwa kutenda yeleyi? Paulo jwasasile kuti akusosekwa kutenda yeleyi ni “chakulinga chakuti yakalamusye ŵane wosope kuti akatenda ulemwa.”
18. Ana achakulungwa ŵa mumpingo akusosekwa kutenda uli naga mwanache jwam’batisidwe jwangakwana yaka 18 atesile ulemwa wekulungwa? (Alolesoni chiwulili.)
18 Ana achakulungwa ŵa mumpingo akusosekwa kutenda yamti uli naga mwanache jwam’batisidwe jwangakwana yaka 18 atesile ulemwa wekulungwa? Naga yitendekwe yeleyi likuga lya achakulungwa lichilinganya yakuti achakulungwa ŵa mumpingo ŵaŵili asimane ni mwanachejo pampepe ni achinangolo ŵakwe ŵa Chiklistu. b Achakulungwawo chachisosekwa kumanyilila yindu yatesile kala achinangolowo pakusaka kumkamuchisya mwanachejo kugalawuka mtima. Naga mwanachejo akwete ndamo syambone soni achinangolo ŵakwe akulingalinga kumkamuchisya achakulungwa ŵaŵiliwo mpaka asagule gamba kujileka nganijo. Achakulungwa ŵa mumpingo akusamanyilila kuti Yehofa jwapeleche udindo kwa achinangolo wakuti ŵajamucheje ŵanache ŵawo. (Det. 6:6, 7; Mis. 6:20; 22:6; Aef. 6:2-4) Myoyo achakulungwawo chachisosekwa kuŵechetanaga ni achinangolowo kuti amanyilile naga mwanachejo akupochela chikamuchisyo chakusosechela. Nambi uli naga mwanache ngakugalawuka mtima ni akupitilisyape kutenda yakusakala? Naga yili myoyo komiti ja achakulungwa ŵa mumpingo jichisimana ni mwanachejo pampepe ni achinangolo ŵakwe ŵa Chiklistu.
Naga mwanache jwam’batisidwe jwangapunda yaka 18 atesile ulemwa wekulungwa, achakulungwa ŵa mumpingo ŵaŵili akusosekwa kusimana ni mwanachejo pampepe ni achinangolo ŵakwe ŵa Chiklistu (Alole ndime 18)
“YEHOFA AKWETE CHINONYELO CHEKULUNGWA SONI ALI JWACHANASA”
19. Ana achakulungwa ŵa mumpingo mpaka alinje chamti uli kumsyasya Yehofa pakumkamuchisya mundu jwatesile ulemwa wekulungwa?
19 Yehofa akusasaka kuti achakulungwa awuchenjele mpingo kuti upitilisye kuŵa weswela. (1 Akoli. 5:7) Achakulungwaŵa akusasosekwasoni kutenda yiliyose yampaka akombole pakumkamuchisya mundu jwatesile ulemwa kuti agalawuche mtima naga yili yakomboleka. Kuti yeleyi yikomboleche, achakulungwa ŵa mumpingo akusasosekwa kola nganisyo syakuŵajilwa. Yili myoyo ligongo lyakuti jemanjaji akusasaka kumsyasya Yehofa jwakwete ‘chinonyelo soni chanasa chekulungwa.’ (Yak. 5:11) Ndumetume Yohane jwalosyaga chinonyelo a Klistu achimjakwe. Jwalakwe jwalembile kuti, “Ŵanache ŵangu ŵapamtima, ngumlembela yindu ayi kuti mkatenda chakulemwa. Nambope, naga jwine akutenda chakulemwa, tukwete jwakutukamuchisya jwakulungama, Yesu Klistu jwali ni Atati.”—1 Yoh. 2:1.
20. Ana tuchikambilana yamti uli mungani jakuyichisya?
20 Chakutesya chanasa chili chakuti ndaŵi sine Mklistu mpaka alepele kugalawuka mtima. Naga yitendekwe yeleyi, jwalakwejo akusasosekwa kumtyosya mumpingo. Ana achakulungwa ŵa mumpingo akusatenda yamti uli payitendekwe yeleyi? Tuchikambilana yeleyi mungani jakuyichisya.
NYIMBO NA. 103 Ŵakuchinga Ali Mituka mwa Achalume
a Munyumamu, komiti jeleji jamanyikaga kuti komiti jakwelusya. Nambo ligongo lyakuti kuwelusya jili jimo mwa mbali jakusakamula achakulungwaŵa pa masengo gawo, tulesile kukamulichisya masengo maloŵega. Mmalomwakwe, patukusala ya komiti jeleji chitukamulichisyeje masengo lina lyakuti komiti ja achakulungwa ŵa mumpingo.
b Atamose kuti nganiji jikusala ya achinangolo, nambo yayisasileyi yikwakwayasoni ŵandu ŵakulela ŵanache ŵangakwana yaka 18. Ŵandu ŵeleŵa mpaka aŵe ŵachibale ŵa ŵanachewo kapena iyayi.
