TUWANICHISYE kuti jwakulola ya nyengo akulola yayitendekwe pakamulichisya masengo chida chakwe. Kaneko akuchiwona chimbungo chekulungwa chili mkwawula chiŵandika mudela jakusatama ŵandu ŵajinji. Ligongo lyakuti jwalakwe akwaganichisya ŵandu ŵakutama m’delaji, akutenda yakomboleka mwakwakalamusya jemanjaji mkanipaŵe.

Mwakulandana ni yeleyi, Yehofa nombe najo akwakalamusya ŵandu wosope ŵapachilambo chapasi pakwamba ya yakusawusya yayikwika msogolo yayili yakogoya kupunda “mbungo jamachili” jampaka apikane kutyochela kwa ŵanyengo. Ana jwalakwe akutenda yeleyi chamtuli? Ana mpaka tuŵe ŵakusimichisya chamtuli kuti jwalakwe akusapeleka ndaŵi jakwanila kuti ŵandu atendepo kandu? Kuti tupate kwanga kwakwe, kwende tulole yaŵatesile munyumamu pakwakalamusya ŵandu.

Kalakala Yehofa ŵakalamwisye ŵandu ya “mbungo jamachili” kapena kuti ya chonasiko, chele chichajonasile ŵandu ŵangapikanila malamusi gakwe mwamelepe. (Mis. 10:25; Yel. 30:23) Pachakutendekwa chilichose, jwalakwe jwakalamusyaga ŵandu mkanipaŵe kuti achenje ndamo syawo kuti sikamulaneje ni mwakusasachila jwalakwe. (2 Ayi. 17:12-15; Neh. 9:29, 30) Pakusaka kuti ŵandu achenje ndamo syawo, jwalakwe jwakamulichisye masengo ŵakutumichila ŵakwe ŵakulupichika. Ŵatumaga jemanjaji kuti asale ya chonasiko soni kwakamuchisya ŵandu kupikanichisya kusosekwa kwa kuchenga mwachitema.—Amo. 3:7.

Nowa jwaliji jumo mwa ŵandu ŵakulupichikaŵa. Kwa yaka yejinji, jwalakwe mwangali woga jwaliji mkwakalamusya ŵandu ŵaŵatendaga yakusakala soni yachiwawa ya kwika kwa Chigumula. (Gen. 6:9-13, 17) Nowa jwasalilesoni ŵanduŵa yakusosekwa kutenda kuti akulupuche pandaŵi ja Chigumulaji. Jwalakwe jwalalichile mnope mwamti mpaka jwakolanjidwe kuti ali ‘jwakulalichila ya chilungamo.’—2 Pet. 2:5.

Atamose kuti Nowa jwalalichilaga, nambo ŵandu ŵa mundaŵi jakwe nganasaka kupikanila utenga wa Mlungu. Jemanjaji ŵalosisye kuti nganakola chikulupi. Yakuyichisya yakwe, wosope ŵawile pachayiche “Chigumula cha mesi ni kwajonanga wosope.” (Mat. 24:39, NW; Aheb. 11:7) Mbesi ja ŵanduŵa pajayiche, yasawisye kuti ajile kuti Mlungu nganiŵamanyisya jemanjaji mkanipaŵe.

Ndaŵi sine Yehofa ŵakalamusyaga ŵandu mkaniyitande yakusawusya yayili mpela “mbungo jamachili” jakonanga. Atamose yaliji myoyo, nambope jwalakwe jwapelekaga mpata wakwanila wakuti ŵandu atendepo kandu. Mwachisyasyo, Yehofa jwakalamwisye mkanipaŵe ŵandu ŵaŵatamaga ku Iguputo yakwamba Milili 10. Chisyasyo chimo chili cha Mose ni Aloni. Yehofa ŵatumile jemanjaji kuti ajawule kukumkalamusya Falao ni ŵakutumichila ŵakwe yakwamba mlili wa 7. Mlili wakwe waliji wa ula jamatalila, gagajonasile mnope yindu. Pakuŵa ulaji jasosekwaga kutanda lisiku lyakuyichisya, ana pelepa tujile kuti Mlungu jwapeleche ndaŵi jakwanila kuti ŵandu apate malo gakuŵa pakusaka kuti akulupuche ku chonasikochi? Baibulo jikusasala pakwamba ya nganiji kuti, “Nduna sine sya Mwenye jwa ku Iguputo syatesile woga ligongo lya maloŵe ga ŵaŵechete Ambuje, ni ŵawugalile achikapolo ŵawo m’nyumba pampepe ni yilangwa yawo, nambope ŵane nganasamala kose maloŵe giŵaŵechete Ambuje, ni ŵagambile kwaleka kusa achikapolo ŵawo pampepe ni yilangwa yawo.” (Eks. 9:18-21) Kusala yisyene, Yehofa ŵakalamwisye mwakwanila jemanjaji, ni chakulinga chakuti ŵandu ŵachatendepo kandu mwachitema akasasimana ni yakupweteka.

Falao ni ŵakutumichila ŵakwe ŵakalamwisyesoni kane, mlili wakumalisya uli usigele panandi. Nambope jemanjaji nganapikanila. (Eks. 4:22, 23) Yakuyichisya yakwe ŵanache ŵawo ŵandanda kupagwa ŵachalume ŵawile. Kusala yisyene yeleyi yaliji yakutesya chanasa. (Eks. 11:4-10; 12:29) Ana jemanjaji ŵagapikene maloŵe gakwakalamusya pandaŵi jakwe? Elo. Mose ŵasalile Aisalaeli pakwamba ya mlili  wa 10 wawaliji mkwika soni ŵasalile jemanjaji yampaka atende kuti maŵasa gawo gakulupuche . (Eks. 12:21-28) Ana ŵandu ŵalingwa ŵiŵapikanile? Yikuwoneka kuti ŵandu 3,000,000 kupwatikapo Aisalaeli soni “likuga lyalikulungwa lya ŵandu ŵamitundu jine” ŵanganaŵa Aisalaeli soni Aiguputo, ŵakopweche mu Iguputo soni ŵakulupwiche.—Eks. 12:38.

Mpela mwatuyiwonele mu yisyasyoyi, ndaŵi syosope Yehofa akusapeleka ndaŵi jakwanila kuti ŵandu apikanile yakusakalamusya jwalakwe. (Det. 32:4) Ana chakulinga cha Mlungu chaliji chichi pakutenda yeleyi? Ndumetume Petulo jwasasile kuti Yehofa “ngakusaka kuti ŵane ajonanjidwe nambo kuti apitikuche mtima.” (2 Pet. 3:9) Yisyene Mlungu akusasamala ya ŵandu. Jwalakwe jwasakaga kuti jemanjaji achenje mitima jawo soni apikanile malangiso gakwe chonasiko mkanichiyiche.—Yes. 48:17, 18; Alo. 2:4.

Masiku aganosoni ŵandu akusosekwa kupikanila kalamusya kwakukutendekwa pachilambo chosope. Yesu piŵaliji pachilambo chapasi, ŵakalamwisye ŵandu kuti yindu ya mundaŵi ajino yichijonanjidwa pa “yisawusyo yakogoya mnope.” (Mat. 24:21) Pakwamba yachonasikocho, jwalakwe jwasalile ŵakumkuya ŵakwe yakulochesya yakwakamuchisya kuti chamanyilile kuti chonasikocho chiŵandichile. Yesu jwasasile yindu yekulungwakulungwa yayikutendekwa masiku agano pachilambo chosope.—Mat. 24:3-12; Luk. 21:10-13.

Mwakamulana ni chakulochesya chelechi, Yehofa akusamŵenda jwalijose kuti asagule yakumtumichila soni kumpikanila jwalakwe. Jwalakwe akusasachilila kuti ŵandu wosope ŵakumpikanila asangalaleje ni umi wambone nambosoni kuti msogolo chakole upile wakutama m’chilambo chasambano. (2 Pet. 3:13) Pakusaka kwakamuchisya ŵandu kuti akole chikulupi, Yehofa apeleche utenga wakwakamuchisya kuti akole umi. Utenga wakwe wuli “ngani syambone syakwamba ya Uchimwene,” syaŵasasile Yesu kuti “tisichilalichidwa pachilambo chosope chapasi, kuti ŵandu ŵamitundu josope asipikane.” (Mat. 24:14) Mlungu alinganyisye yakuti ŵakumlambila ŵakwe ŵasyesyene alalichile utenga wa Mlungu, wele apano ukulalichidwa m’yilambo yakwana 240. Yehofa akusaka kuti ŵandu ŵajinji atende yakomboleka mwakupikanila kalamusya kwakwe kuti akulupuche pa chonasiko chachili mpela “mbungo jamachili” jakulamula kwakwe kwa chilungamo.—Zef. 1:14, 15; 2:2, 3.

Pelepa chiwusyo chakusosekwa mnope mpaka chiŵe chakuti, Ana Yehofa ngakusapeleka mpata wakwanila kuti ŵandu apikanile kalamusya kwakwe? Maumboni galosisye kuti ndaŵi syosope akusapeleka mpata wakwanila. Nambope chiwusyo chine chakusosekwa mpaka chiŵe chakuti, Ana ŵandu chachipikanila kalamusya kwa Mlungu ndaŵiji mkanijimale? M’weji mpela ŵakutumichila ŵa Mlungu kwende twakamuchisyeje ŵandu mwampaka tukombolele kuti chakulupuche mbesi ja chilambochi.