Ngani Jakulijiganya 41
Tuŵeje Ŵakulupichika Mpaka pa “Yisawusyo yakogoya”
“Mwanonyele Ambuje, jemanja ŵandu ŵaswela mtima, Ambuje akwasunga ŵakulupichika.”—SAL. 31:23.
NYIMBO 129 Chitujendelechele Kuŵa Ŵakupilila
YACHITULIJIGANYE *
1-2. (a) Ana pachangakaŵapa maboma gachipeleka chimanyisyo chamtuli? (b) Ana tukusosekwa kupata kwanga kwa yiwusyo yapi?
TUŴANICHISYE kuti maboma gagambile kupeleka kwene chimanyisyo chakuti “tuli pamtendele soni pambone.” Jemanjaji mpaka atande kuganisya kuti chilambochi chili pamtendele mnope kupundana ni kalakose. Jemanjaji chachisaka kuti m’weji tuganisyeje kuti akombwele kumasya yakusawusya yosope ya ŵandu. Nambo kusala yisyene, ngasakombola kuyilekasya yindu yayichiŵa kuti yisigele panandi kutendekwa. Ligongo chichi tukuŵecheta yeleyi? Ligongo lyakwe lili lyakuti, mwakamulana ni yajikusalochesya Baibulo, “Chonasiko chichasimana mwachisisimuchisya, . . . soni ngasapakombola kose kuti atile.”—1 Ates. 5:3.
2 Nambo tukusosekwa kupata kwanga kwa yiwusyo yakuyichisyayi, Ana pa “yisawusyo yakogoya” pachitendekwa yamtuli? Ana Yehofa chachijembecheya kuti m’weji tutende chichi pandaŵijo? Soni ana mpaka tukosechele chamtuli apano kuti payisawusyo yakogoya chitupitilisye kuŵa ŵakulupichika?—Mat. 24:21.
ANA PA “YISAWUSYO YAKOGOYA” PACHITENDEKWA YAMTULI?
3. Mwakamulana ni Ciwunukuko 17:5, 15-18, ana Mlungu chachimjonanga chamtuli “Babiloni Jwamkulungwa”?
3 Aŵalanje Ciwunukuko 17:5, 15-18. “Babiloni Jwamkulungwa” chachijonanjidwa. Mpela mwatuŵechetele, maboma ngasigakombola kuyilekasya yindu yayichitendekwa pandaŵijo. Ligongo chichi? Ligongo lyakuti, “Mlungu [chachiŵika] yeleyi mmitima jawo kuti atende yindu mwakamulana ni nganisyo syakwe.” Ana nganisyosi sili syamtuli? Nganisyosi sili syakwamba konanjidwa kwa dini jaunami, kupwatikapo Machalichi ga Chiklistu. * Mlungu chachiŵika nganisyo syakwe mmitima mwa “misengo likumi” ja “chilombo.” Misengo likumiji jikwimila maulamusi gosope gandale gagakusachikamuchisya “chilombo” chachili chiŵanja cha United Nations. (Ciw. 17:3, 11-13; 18:8) Achimlongola ŵandale pachachijonanga dini jaunami, chelecho chichiŵa chimanyilo chakulosya kuti yisawusyo yakogoya yitandite. Kusala yisyene jwalijose pachilambopa chachikola woga pandaŵijo.
4. (a) Ana ni magongo gapi gagachitendekasya maboma kwimuchila dini jaunami? (b) Ana ŵandu ŵa m’dinisyo chachitenda chichi?
4 Ngatukumanyilila magongo gagachitendekasya maboma kuganisya yakumjimuchila Babiloni Jwamkulungwa. Komboleka chachiŵechetaga kuti dini sikulepelekasya kuti pachilambopa paŵe mtendele, nambosoni kuti sikusajinjilila yandale. Kombolekasoni chachiŵechetaga kuti dinisi siliwunjichile yipanje yejinji. (Ciw. 18:3, 7) Komboleka kuti pandaŵi jele maboma gachijimuchila dini jaunami, ngayikugopolela kuti chachijonanga ŵandu wosope ŵa m’dini jaunamijo. Nambo mmalo mwakwe, gachigamba kumasya dini syosope syaunami. Pachachimalisya konanga dini syaunami, ŵandu ŵawo chachimanyilila kuti achimlongola ŵadinisyo ŵaliji ŵakulepela. Myoyo komboleka kuti ŵanduwo chachileka dinisyo.
5. Ana Yehofa ŵasasile yamtuli pakwamba ya yisawusyo yakogoya, soni ligongo chichi chachitenda yeleyo?
5 Baibulo jangasala ya ulewu wa ndaŵi ja konanjidwa kwa Babiloni Jwamkulungwa. Nambo tukumanyilila kuti yeleyi ngasiyijigala ndaŵi jelewu. (Ciw. 18:10, 21) Yehofa ŵasasile kuti ‘chachigapungula masiku’ ga yisawusyo ni chakulinga chakuti “ŵandu ŵaŵasagulidwe ni jwalakwe” chakulupuche kupwatikaposoni dini jakuwona. (Mak. 13:19, 20) Nambo ana Yehofa akwembecheya kuti tuchitenda chichi kutandila pa yisawusyo yakogoya mpaka pa Alimagedo?
TUMLAMBILEJE YEHOFA M’LITALA LYAKUSALIJITICHISYA
6. Kupwatika pa kulilekanganya ni dini jaunami, ana tukusosekwasoni kutenda chichi?
6 Mpela mujaŵechetele ngani jipite jila, Yehofa akusajembecheya kuti ŵandu ŵakusamlambila chachililekanganya ni Babiloni Jwamkulungwa. Nambope, kutenda yeleyi nganikuŵa kwakwanila. Kupwatika pelepa, tukusosekwasoni kumlambilaga Yehofa m’litala lyakusalijitichisya. Kwende tulole matala gaŵili gampaka tutendele yeleyi.
Ngatukusosekwa kuleka kusongana pampepe, atamose pandaŵi jakusawusya (Alole ndime 7) *
7. (a) Ana mpaka tukuye chamtuli ndamo syakulungama sya Yehofa? (b) Ana lilemba lya Ahebeli 10:24, 25, likugombelechesya chamtuli kusosekwa kwa kusongana pampepe, mnopemnope apanopano?
7 Chandanda, tukusosekwa kusimichisya kuya ndamo syakulungama sya Yehofa. Ngatukusosekwa kujigalila ndamo syakusakala syakuchilamboku. Mwachisyasyo, tukusosekwa kuŵambala chikululu chamtundu wuliwose kupwatikapo kulombana kwa achalumepe kapena achakongwepe, soni ndamo sine syakusakala. (Mat. 19:4, 5; Alo. 1:26, 27) Chaŵili, tukusosekwa kupitilisya kulambilaga yimpepe ni Aklistu achimjetu. Mpaka tutende yeleyi kulikose chinga ku Nyumba sya Uchimwene, patuli kunyumba sya ŵamboni achimjetu kapena patuli pamalo gangawonechela. Mulimose mwampaka yiŵele, ngatukusosekwa kuleka kwawula kumisongano. Kusala yisyene tukusosekwa kusonganaga pampepe “mnopemnope [patukulola] kuti lisiku lya Ambuje likuŵandichila kwika.”—Aŵalanje Ahebeli 10:24, 25.
8. Ana utenga watukusalalichilaga, uchichenga chamtuli kusogoloku?
8 Pandaŵi ja yisawusyo yakogoya, utenga watukusalalichila uchichenga. Apano tukulalichila ngani syambone syakwamba Uchimwene soni kupanganya ŵakulijinganya. Nambo pandaŵijo komboleka kuti tuchilalichilaga utenga wangapita mumbali, wele Baibulo jikusawuwanichisya ni matalila gekulungwa. (Ciw. 16:21) Tuchilalichilaga kuti chilambo cha Satanachi chisigele panandi konanjidwa. Pandaŵi jakwe, tuchimanyilila chenene kuti utenga wetu tiwuchiŵa wamtuli soni kuti tuchilalichilaga mwamtuli. Ana tuchikamulichisyaga masengo matala gatuŵele tuli mkukaamulichisya kwa yaka yejinji pakulalichila? Kapena tuchikamulichisya masengo matala gane? Ngatukumanyilila. Mulimose mwayichiŵela, yikulosya kuti tuchikola upile wakulalichila mwakulimba mtima utenga wakwelusya wa Yehofa.—Esek. 2:3-5.
9. Ana maboma gachitenda yamtuli ni utenga wetu, nambo ana tuchiŵa ŵakusimichisya ya chichi?
9 Nambo utenga wetu uchitendekasya maboma kuti galinje kulekasya masengo getu gakulalichila. Pakuŵa tukusamdalila Yehofa kuti atukamuchisyeje patukumtumichila, myoyosoni tuchisosekwa kumdalila jwalakwe kuti chatukamuchisye pandaŵijo. Ngatukukayichila kuti Mlungu chachitupa machili kuti tukombole kutenda lisosa lyakwe.—Mik. 3:8.
TUKOSECHELEJE KWIMUCHILIDWA KWA ŴANDU ŴA MLUNGU
10. Mwakamulana ni Luka 21:25-28, ana ŵandu ŵajinji chachitenda yamtuli ni yindu yayichitendekwa pandaŵi ja yisawusyo yakogoya?
10 Aŵalanje Luka 21:25-28. Pandaŵi ja yisawusyo yakogoya, ŵandu chachisimonga pachachiyiwona kuti yindu yaŵayiwonaga kuti yikwenda chenene pachilambo chapasipa yitandite kulepelechekwa. Jemanjaji ‘chachilagasika’ ligongo chachitendaga woga kuti umi wawo uli pangosi jekulungwa. (Zef. 1:14, 15) Pandaŵijo umi uchiŵa wakusawusya mnope atamose kwa ŵandu ŵa Yehofa. Tuchilagasika pandaŵijo ligongo lyakuti nganituŵa mbali ja chilambochi. Komboleka tuchisoŵaga yindu yine yakusosechela.
11. (a) Ligongo chichi maboma gachaŵenga Ŵamboni sya Yehofa? (b) Ligongo chichi ngasitusosekwa kutenda woga ni yisawusyo yakogoya?
11 Pandaŵijo, ŵandu ŵele dini syawo sichiŵa sili sijonanjidwe ngasasangalala kwawona Ŵamboni sya Yehofa ali mkulambila Yehofa pali pangali chakusawusya. Kupitila pa intaneti jemanjaji chachitenda yakuti ŵane amanyilile kutumbila kwawo. Maboma soni jwakulamulila jwawo jwali Satana, chachituŵenga ligongo lyakuti dini jetu jichiŵape chiŵela. Jemanjaji ngasakombola kwanilisya chakulinga chawo chakumasya dini syosyope pachilambo chapasi. Myoyo chachilimbana ni m’weji. Pandaŵiji, maboma gachiŵa Gogi jwa Kuchilambo cha Magogi. * Jemanjaji chachikamulana yakuti ŵajimuchile ŵandu ŵa Yehofa ni machili gawo gosope. (Esek. 38:2, 14-16) Komboleka tuchitanda kudandawula pakwamba yayichitendekwa pa yisawusyo yakogoya, ligongo lyakuti ngatukumanyilila yisyesyene yayichitendekwa. Nambo chatukumanyilila chili chakuti, ngasitusosekwa kogopa yisawusyo yakogoya. Yehofa chachitupa malangiso gakutukamuchisya kuti chitukulupuche. (Sal. 34:19) Tuchiŵa ŵakoseka ‘kwima soni kunyakula mitwe jetu’ ligongo tuchimanyilila kuti ‘chikulupusyo chetu chiŵandichile.’ *
12. Ana “kapolo jwakulupichika ni jwalunda” atukamuchisye chamtuli kosechela yindu yayikwika msogolo?
12 “Kapolo jwakulupichika ni jwalunda” aŵele ali mkutukamuchisya kuti chitukombole kuŵa ŵakulupichika pa yisawusyo yakogoya. (Mat. 24:45) Atulimbikasisye m’matala gejinji. Mwachisyasyo atesile yeleyi kupitila m’misongano jetu jekulungwakulungwa jajatendekwe kutandila mu 2016-2018. Kupitila m’misonganoji, aŵele ali mkutulimbikasya kola ndamo syatukusosechela palikuŵandichila lisiku lya Yehofa. Kwende tukambilane mwakata ndamosi.
TUPITILISYE KUŴA ŴAKULUPICHIKA, ŴAKUPILILA, SONI ŴAKULIMBA MTIMA
Tukosecheleje apano kuti chitukulupuche pa “yisawusyo yakogoya” (Alole ndime 13-16) *
13. Ana mpaka tuŵe ŵakulupichika chamtuli kwa Yehofa, soni ligongo chichi tukusosekwa kutenda yeleyi apano?
13 Kulupichika: Mtwe wa msongano waupande wa 2016 waliji wakuti “Ajendelechele Kuŵa Ŵakulupichika kwa Yehofa!” Msonganowu watukamuchisye kumanyilila kuti naga tukuŵa paunasi wambone ni Yehofa, tuchiŵa ŵakulupichika kwa jwalakwe. Watukumbwisyesoni kuti mpaka tumŵandichile Yehofa naga tukusapopela kutyochela pasi pamtima soni kulijiganya Maloŵe gakwe ndaŵi syosope. Kutenda yeleyi kuchitupa machili gakutukamuchisya kulimbana ni yakusawusya yampaka tusimane nayo. Pajikuŵandichila mbesi ja chilambo cha Satanachi, tusimaneje ni yakusawusya yampaka yilinje kulupichika kwetu kwa Mlungu soni Uchimwene wakwe. Ŵandu chapitilisyeje kutunyosya. (2 Pet. 3:3, 4) Yeleyi yikusatutendechela ligongo lyakuti ngatukusajigala nawo mbali payakutendekwa ya m’chilambochi. Tukusosekwa kuŵa ŵakulupichika pandaŵi ajino kuti pa ndaŵi ja yisawusyo yakogoya chitukombole kuŵa ŵakulupichika.
14. (a) Ana pachiŵa kuchenga kwamtuli pakwamba ya abale ŵakulongolela yindu pachilambo chapasi? (b) Ligongo chichi pandaŵijo tuchisosekwa kuŵa ŵakulupichika?
14 Pandaŵi ja yisawusyo yakogoya, pachiŵa kuchenga pangani ja abale ŵakusatulongolela. Mwachisyayo, ŵasagulwe wosope ŵali pachilambopa chachijawula kwinani kuti akajigale nawo mbali pa ngondo ja Alimagedo. (Mat. 24:31; Ciw. 2:26, 27) Yeleyi yikulosya kuti pandaŵijo kuchiŵa kuli kwangali Likuga Lyakulongolela pachilambo chapasi. Nambope, likuga lyekulungwa lya ŵandu lichijendagape chenene. Abale ŵane ŵakuŵajilwa ŵali m’likuga lya ngondolo sine chachilongolelaga yindu. Tuchisosekwa kuŵa ŵakulupichika kwa jemanjaji mwakupikanila malangiso gawo gakutyochela kwa Yehofa. Kuti chitukulupuche tuchisosekwa kwapikanila jemanjaji.
15. Ana mpaka tukusye chamtuli ndamo jetu jakupilila, soni ligongo chichi kutenda yeleyi kuli kwakusosekwa apano?
15 Kupilila: Mtwe wa msongano waupande wa 2017 waliji wakuti, “Akawujila Munyuma!” Msonganowu watukamuchisye kusya ndamo jetu jakupilila patusimene ni yakusawusya. Twalijiganyisye kuti tukusakombola kupilila ngaŵa ligongo lyakuti yindu yikutujendela chenene. Mpaka tuŵe ŵakupilila naga tukumdalila Yehofa. (Alo. 12:12) Ngatukusosekwa kuliŵalila maloŵe gaŵaŵechete Yesu gakuti, “Jwalijose jutachipilila mpaka pambesi, ni jutachikulupuka.” (Mat. 24:13) Maloŵega gakulosya kuti tukusosekwa kuŵape ŵakulupichika atamose kuti tukusimana ni yakusawusya. Naga tukupilila chakusawusya chilichose apano, tuchikombolasoni kuŵa ŵakupilila pandaŵi ja yisawusyo yakogoya.
16. Ana chichi chachikusatutendekasya kuŵa ŵakulimba mtima, soni ana mpaka tuŵe ŵakulimba mtima chamtuli apano?
16 Kulimba mtima: Mtwe wa msongano waupande wa 2018 waliji wakuti, “Aŵeje Ŵakulimba Mtima!” Msonganowu watukumbwisye kuti kuŵa ŵakulimba mtima kwangayika ligongo lya lunda lwetu. Mwakulandana ni kupilila, kulimba mtima kusyesyene kukusayika ligongo lyakumdalila Yehofa. Ana mpaka tutende wuli kuti tumdalileje mnope Yehofa? Mpaka tutende yeleyi mwakuŵalanga Maloŵe gakwe lisiku lililyose soni ganichisya yaŵatite Yehofa pakwakulupusya ŵandu ŵakwe munyumamu. (Sal. 68:20; 2 Pet. 2:9) Pandaŵi jele maboma gachitujimuchila payisawusyo yakogoya, tuchisosekwa kulimba mtima soni kumdalila Yehofa kupundana ni kalakose. (Sal. 112:7, 8; Aheb. 13:6) Naga tukumdalila Yehofa apano, tuchiŵa ŵakulimba mtima pandaŵi jele Gogi chachitujimuchila. *
TUJEMBECHEYEJE CHIKULUPUSYO CHETU
Pachangakaŵapa Yesu ni likuga lyangondo lyakwinani chachiputa ngondo ja Alimagedo pakwajonanga achimmagongo ŵa Mlungu! (Alole ndime 17)
17. Ligongo chichi ngatukusosekwa kutenda woga ni ngondo ja Alimagedo? (Alole chiwulili chachili pa chikuto.)
17 Mpela mutwaŵechetele mungani jipite jila, ŵajinji mwa m’weji tutemi umi wetu wosope m’masiku gambesi. Nambo tukwetesoni chembecheyo chakuti tuchikulupuka pa yisawusyo yakogoya. Ngondo ja Alimagedo jichiŵa mbesi ja yindu yosope. Nambope, ngatukusosekwa kutenda woga ligongo lyakuti ngondoji jichiŵa ja Mlungu. (Mis. 1:33; Esek. 38:18-20; Sak. 14:3) Yehofa chachilamula Yesu Klistu kuti alongolele ngondoji. Jwalakwe chachiŵa yimpepe ni ŵasagulwe nambosoni malayika gejinji. Jemanjaji chachiputa ngondo jakulimbana ni Satana, yimpepe ni yiwanda yakwe, soni achimmagongo ŵa Mlungu ŵapachilambo chapasi.—Dan. 12:1; Ciw. 6:2; 17:14.
18. (a) Ana Yehofa atusimichisye yamtuli? (b) Ana lilemba lya Ciwunukuko 7:9, 13-17 likusatusimichisya yamtuli pakwamba yamsogolo?
18 Yehofa ŵasimichisye kuti, “Pangali chida chepanganyidwe ni m’magongo tichichimpweteka.” (Yes. 54:17) “Likuga lya ŵandu” ŵakulupichika ŵa Yehofa, ‘tilichipunda pa yisawusyo yakogoya.’ Kaneko lichipitilisya kumtumichila jwalakwe. (Aŵalanje Ciwunukuko 7:9, 13-17.) Kusala yisyene Baibulo jikutupa magongo gakupikanika gakututendekasya kuŵa ŵakusimichisya kuti kusogoloku tuchikulupuka. Tukusamanyilila kuti “Ambuje akwasunga ŵakulupichika.” (Sal. 31:23) Ŵandu wosope ŵakusamnonyela soni kumlumba Yehofa chachisangalala kumwona jwalakwe ali mkuswejesya lina lyakwe.—Esek. 38:23.
19. Ana ni chembecheyo chakusangalasya chapi chatukwembecheya pachangakaŵapa?
19 Yikaŵe kuti lilemba lya 2 Timoteo 3:2-5 likusala ya ŵandu ali m’chilambo chasambano changasokonasidwa ni Satana, ana likaŵechete yamtuli? (Alole libokosi lyakuti “Muchachiŵela Ŵandu Pandaŵijo.”) M’bale George Gangas, * juŵatumichile m’Likuga Lyakulongolela jwasasile mwayichiŵela yindu pandaŵijo, jwalakwe jwatite, “Chilambochi chichiŵa chakusangalasya pandaŵi jele jwalijose chachilambilaga Yehofa. Pachangakaŵapa tuchikola upile wakutama m’chilambo chasambano. Tuchitamaga kwandaŵi jelewu mpela mwakusatamila Yehofa. Tuchikola umi mpaka kalakala.” Kusala yisyene tukwete chembecheyo chakusangalasya.
NYIMBO 122 Tuŵeje Ŵakulimbangana Soni Ŵangatenganyika
^ ndime 5 Pachangakaŵapa ŵandu chasimane ni “yisawusyo yakogoya.” Ana pandaŵijo ŵakutumichila ŵa Yehofa yichatendechela yamtuli? Ana Yehofa akwembecheya kuti m’weji tuchitenda chichi? Ana tukusosekwa kola ndamo syapi, ni chakulinga chakuti chituŵe ŵakulupichika pandaŵijo? Munganiji chitupate kwanga kwa yiwusyoyi.
^ ndime 3 Machalichi ga Chiklistu gelega, gakwimila dini syasikusaŵecheta kuti sikusamkuya Klistu nambo syangalambila mwakamulana ni mwakusasachila Yehofa.
^ ndime 11 NGOPOLELO JA MALOŴEGA: Maloŵe gakuti Gogi jwa Kuchilambo cha Magogi (kapena kuti Gogi) gakusagopolela mkamulano wagachitenda maboma pakusaka kulimbana ni ŵakutumichila ŵa Yehofa pandaŵi ja yisawusyo yakogoya.
^ ndime 11 Kuti amanyilile yejinji yakwamba yayichitendekwa Alimagedo mkanijitande alole mtwe 21 m’buku jakuti Uchimwene wa Mlungu Ukulamulila. Kuti amanyilile yejinji yakwamba kwimuchila kwa Gogi Jwakuchilambo cha Magogi soni yachachitenda Yehofa pakwachenjela ŵandu ŵakwe pangondo ja Alimagedo, alole Sanja ja Mlonda ja Julayi 1 2015 papeji 16-21.
^ ndime 16 Msongano waupande wa chaka cha 2019 wa mtwe wakuti, “Chinonyelo Chili Changamala!” ukutulimbikasya kumanyilila kuti Yehofa chachituchenjela naga tukuŵa pasi pa chinonyelo chakwe changamala.—1 Akoli. 13:8.
^ ndime 19 Alole mtwe wakuti “zochita zake zimtsata” mu Sanja ja Mlonda ja Disemba 1, 1994.
^ ndime 65 KULONDESYA YIWULILI: Pandaŵi ja yisawusyo yakogoya, kagulu kamnono kakulimba mtima ka Mboni, kachingangene mungalango kuti katende misongano.
^ ndime 67 KULONDESYA YIWULILI: Likuga lya ŵandu ŵakulupichika ŵa Yehofa likulupwiche payisawusyo yakogoya ni likusangalala.
