1. Ana lilayika likuŵecheta chichi, soni ana yeleyi yikugopolela chichi kwa m’weji?

 NAGA lilayika lili mkuŵecheta ni wawojo ana mpaka apikanile yalikwasalilayo? Masiku agano lilayika likuŵecheta ku “chilambo chilichose, chiŵecheto chilichose, soni mtundu uliwose” kuti, “Amjogope Mlungu soni ampe uchimbichimbi . . . Amtindiŵalile jwele juŵapanganyisye kwinani [soni] chilambo chapasi.” (Chiw. 14:​6, 7) Yehofa ali Mlungu jwakuwona jwele jwalijose akusasosekwa kumtumichila. Kusala yisyene, uli upile wekulungwa mnope kuti jwalakwe ŵatukundile kuti tumtumichileje mnyumba jakwe jekulungwa jausimu.

2. Ana nyumba ja Mlungu jausimu jili chichi? (Alole libokosi lyakuti “ Yanganiyiŵa.”)

² Ana nyumba jausimu ja Mlungu jili chichi, soni mpaka tupate kwapi yindu yakujilondesya nyumbaji? Nyumba jausimu ja Mlungu nganijiŵa nyumba jisyesyene jakupopelela. Nambo jili dongosolo jaŵalinganyisye Yehofa kuti ajitichisyeje kumtumichila kwetu kupitila mu mbopesi jakutuwombola ja Yesu. Ndumetume Paulo jwalondesisye chenene pakwamba ya dongosoloji m’chikalata chakwe chaŵalembele Aklistu ŵa m’yaka 100 yandanda ŵa ku Ahebeli ŵaŵatamaga ku Yudeya. b

3-4. Ana Paulo jwadandaulaga ya chichi pakwamba ya Aklistu ŵa Chihebeli ŵa ku Yuda? Nambi jwalakwe jwakamuchisye chamtuli Aklistuŵa?

³ Ligongo chichi Paulo jwalembele chikalata Aklistu ŵa Chihebeli ŵaŵatamaga ku Yudeya? Komboleka jwalakwe jwalembele jemanjaji pamagongo gaŵili gakuyichisyaga: Ligongo lyandanda, jwalakwe ŵasakaga kwalimbikasya. Ŵajinji ŵa jemanjaji mkanatande Chiklistu ŵaliji mu dini ja Chiyuda. Kombolekasoni achimlongola  ŵadini ja Chiyuda ŵasekaga ligongo lyakuti ŵaŵele Aklistu. Ŵatendaga yeleyi ligongo lyakuti Aklistu nganakola malo gakumpopelela Mlungu, malo gakupelechela mbopesi, nambosoni nganakola ŵakutaga mbopesi kuti ŵalongoleleje. Yeleyi yikatengwisye ŵakulijiganya ŵa Klistu soni chikulupi chawo chikanandipe machili. (Aheb. 2:1; 3:​12, 14) Kombolekasoni ŵane akawujile ku dini jawo ja Chiyuda.

⁴ Ligongo lyaŵili lyalyamtendekasisye Paulo kulemba chikalata chila lyaliji lyakuti Aklistu ŵa Chihebeli nganalimbichilaga kuti ayipikanichisye yijiganyo yasambano kapena kuti “yakulya yakulimba” ya m’Maloŵe ga Mlungu. (Aheb. 5:​11-14) Nambosoni ŵane ŵakuyagape Chilamusi cha Mose. Mwamti Paulo jwalondechesye kuti mbopesi syaŵasisalaga m’Chilamusi cha Mose ngaŵa mkutyosya ulemwa. Paligongo lyeleli, malamusi gakalago “ŵagatyosisye.” Kaneko Paulo jwajiganyisye jemanjajo yisyesyene yakusokoka mnope. Jwakumbwisyesoni Aklistu achimjakwe ya “chembecheyo chambone” chiŵakwete kupitila mu mbopesi ja Yesu jajikakamuchisye kuti, ‘amŵandichile Mlungu.’—Aheb. 7:​18, 19.

5. Ana tukusosekwa kupikanichisya chichi kutyochela m’buku ja Ahebeli, soni ligongo chichi?

⁵ Paulo jwalondechesyesoni Aklistu ŵa Chihebeli kuti litala lyaŵakuyaga pakumtumichila Yehofa lyaliji lyambone mnope kulekangana ni lyaŵakuyaga pandanda. Litala lyaŵakuyaga Ayuda pakupopela mwakamulana ni Chilamusi lyaliji “chiwulili cha yindu yayaliji mkwika, nambo yisyesyene yakwe yili mwa Klistu.” (Akolo. 2:17) Chiwulili changaŵaga chindu chisyesyenecho, nambo chikusagamba kulosya mwachikusawonechela chindu chisyesyenecho. Mwakulandanamo, yaŵatendaga Ayuda pakumtumichila Mlungu yaliji chiwulili cha yisyesyene yayaliji yakuti yichitendekwa kusogolo. Myoyo tukusasosekwa kupikanichisya ya dongosolo jaŵalinganyisye Yehofa pakusaka kutukululuchila ulemwa wetu kuti tumtumichileje mulitala lyakusalijitichisya. Sambano kwende tukambilane kulandana kwa “chiwulili” (yaŵatendaga Ayuda kala pakumtumichila Mlungu) ni “yisyesyene” (yakutenda Aklistu masiku agano pakumtumichila Mlungu) yayilondesisye chenene m’buku ja Ahebeli. Yeleyi chiyitukamuchisye kupikanichisya chenene ya nyumba ja Mlungu jausimu soni yatukusosekwa kutenda.

6. Ana chitenti cha Mlungu chakamulaga masengo chamtuli?

⁶ Yaŵatendaga Ayuda pakumtumichila Mlungu. Paulo jwalondesisye mnope ya chitenti chiŵalinganyisye Mose m’chaka cha 1512 B.C.E.  (Alole chati chakuti, “Yaŵatendaga Ayuda Pakumtumichila Mlungu—Yakusatenda Aklistu Pakumtumichila Mlungu.”) Chitenti cha Mlungu chawonekaga mpela mwajikusaŵela tenti jisyesyene, yayakamuchisyaga Ayisalayeli kwendaga nacho malo gakulekanganalekangana. Jemanjaji ŵakamulichisye masengo chitentichi chiŵandika yaka 500 mpaka paŵataŵile nyumba ja Mlungu ku Yelusalemu. (Eks. 25:​8, 9; Num. 9:22) “Chitenti chakusimanilana” galiji malo gele Ayisalayeli ŵampopelelaga Mlungu soni kupelechela mbopesi syawo. (Eks. 29:​43-46) Nambope, chitentichi chajimilagasoni chindu chine chakusosekwa mnope kwa Aklistu.

7. Ana nyumba ja Mlungu jausimu jatandite kuwonechela chakachi?

⁷ Yakusatenda Aklistu pakumtumichila Mlungu. Chitenti chakala chaliji “chisyasyo cha yindu yakwinani,” soni chajimilaga nyumba ja Mlungu jausimu. Paulo jwasasile kuti, “chitenti chelecho chikwimila yindu yayipali apano.” (Aheb. 8:5; 9:9) Pandaŵi jiŵalembelaga Ahebeliŵa, nyumba ja Mlungu jausimu jaliji jili jipali soni jaliji jisyesyene. Nyumba ja Mlungu jausimuji jawonechele m’chaka cha 29 C.E. Chakachi ni chele Yesu ŵabatisidwe, soni ŵasagulidwe ni msimu weswela nikutanda kumtumichila Yehofa mpela “jwamkulungwa jwa ŵakutaga mbopesi” m’nyumba ja Mlungu jausimu. c—Aheb. 4:14; Mase. 10:​37, 38.

8-9. Mwakamulana ni Ahebeli 7:​23-27, ana ni kulekangana kwapi kwakupali pasikati pa achakulungwa ŵa ŵakutaga mbopesi ŵa ku Isalayeli ni Jwamkulungwa jwa Ŵakutaga Mbopesi,Yesu Klistu?

⁸ Yaŵatendaga Ayuda pakumtumichila Mlungu. Jwamkulungwa jwa ŵakutaga mbopesi jwakwete udindo wakwajimila ŵandu pameso pa Mlungu. Aloni jwaliji jwamkulungwa jwa ŵakutaga mbopesi jwandanda mu mtundu wa Ayisalayeli. Jwalakwe jwasagulidwe ni Yehofa pandaŵi jiŵachiwugulilaga chitenti cha Mlungu. Nambope, mpela muŵaŵechetele Paulo, “pasosekwaga ŵakutaga mbopesi ŵane kuti ajinjileje mmalo mwa achimjawo, ligongo chiwa chalepelekasyaga kupitilisya kutumichila mpela ŵakutaga mbopesi.” d (Aŵalanje Ahebeli 7:​23-27.) Nambosoni ligongo lyakuti ŵaliji ŵangali umlama, achakulungwa ŵa ŵakutaga mbopesi ŵeleŵa ŵasosekwaga kupeleka mbopesi sya ulemwa wawo. Kweleku kuli kulekangana kwekulungwa kwakupali pasikati pa jwamkulungwa jwa ŵakutaga mbopesi jwa Ayisalayeli ni Jwamkulungwa jwa Ŵakutaga Mbopesi, Yesu Klistu.

⁹ Yakusatenda Aklistu pakumtumichila Mlungu. Jwamkulungwa jwa Ŵakutaga Mbopesi jwetu, Yesu Klistu “ali jwakutumichila . . . mu chitenti chisyesyene chiŵataŵile Yehofa ngaŵaga ŵandu.” (Aheb. 8:​1, 2) Paulo jwasasile kuti “pakuŵa [Yesu] chachitama ni umi mpaka kalakala, ngapakusosekwasoni ŵakutaga mbopesi ŵane ŵakuti ajinjile mmalomwakwe.” Jwalakwe jwasasilesoni kuti Yesu ali “jwangali chakumsakasya, jwakulekangana ni ŵakulemwa” mwamti mwakulekangana ni achakulungwa ŵa ŵakutaga mbopesi ŵa Chiyisalayeli, jwalakwe “ngakusosekwa kupeleka mbopesi lisiku lililyose” ligongo lya yakulemwa yakwe. Sambano kwende tukambilane kulekangana kwakupali pasikati pa mbopesi soni malo gakupelechela mbopesi. Chitumanyilile yeleyi mwakulola yaŵatendaga Ayuda pakumtumichila Mlungu ni yakusatenda Aklistu pakumtumichila Mlungu.

10. Ana mbopesi sisyapelechedwaga pamalo gakupelechela mbopesi ga kopa syajimilaga chichi?

¹⁰ Yaŵatendaga Ayuda pakumtumichila Mlungu. Kusa kwa mlango wakwinjilila mu chitenti ŵalinganyisye malo gepache ni kopa gaŵapelechelaga  nyama syambopesi kwa Yehofa. (Eks. 27:​1, 2; 40:29) Nambope mbopesi syelesi nganisikola machili gakululuchila yisyesyene yakulemwa ya ŵandu. (Aheb. 10:​1-4) Kupelechedwa kwa mbopesi sya nyama syelesi kwajimilaga mbopesi jajichikululuchila yisyesyene yakulemwa ya ŵandu.

11. Ana ni malo gakupelechela mbopesi gapi gele Yesu ŵalipeleche msyene mpela mbopesi? (Ahebeli 10:​5-7, 10)

¹¹ Yakusatenda Aklistu pakumtumichila Mlungu. Yesu jwamanyililaga kuti Yehofa jwamtumisye jwalakwe pachilambopa kuti apeleche umi wakwe mbopesi jakuwombola ku mtundu wa ŵandu. (Mat. 20:28) Myoyo, pa ubatiso wakwe, Yesu jwalipeleche kuti atende yakusaka ya Yehofa. (Yoh. 6:38; Agal. 1:4) Yesu jwalipeleche pa malo gakuwanichisya gakupelechela mbopesi yayikwimila “yakusaka” ya Mlungu yakuti Mwanache jwakwe apeleche mbopesi umi wakwe wamlama. Umi wa Yesu “wapelechedwe kampepe basi” kuti usimasye kwangamala yakulemwa ya jwalijose jwakusakulupilila mwa Klistu. (Aŵalanje Ahebeli 10:​5-7, 10.) Sambano kwende tukambilane mbali sisyapali mkati mwa chitenti cha Mlungu soni yisyajimilaga.

12. Ana ŵani ŵaŵapitaga mu yipinda yosope ya chitenti cha Mlungu?

¹² Yaŵatendaga Ayuda pakumtumichila Mlungu. Chitenti soni nyumba ja Mlungu ku Yelusalemu ŵayitaŵaga ni pulani jakulandana. Mkati mwakwe mwapali mbali siŵili “Malo Geswela” ni “Malo Geswela Mnope.” Likatani ni lyalyagaŵenye malo gaŵiliga. (Aheb. 9:​2-5; Eks. 26:​31-33) Mkati mwa Malo Geswela mwapali chakuŵikapo nyali chagolide, malo gakupelechela mbopesi soni tebulo ja mikate jakulosya kwa Mlungu.  “Ŵakutaga mbopesi” ni ŵaŵakundidwaga kwinjila m’Malo Geswela kuti akatende utumiki wawo. (Num. 3:​3, 7, 10) Malo Geswela Mnope gakwete libokosi lya Umboni lyagolide lya chilanga lilyajimilaga kusimanikwapo kwa Yehofa. (Eks. 25:​21, 22) Jwamkulungwa jwa ŵakutaga mbopesipe ni juŵakundidwaga kupita pa likatani lyeleli kwinjila ku Malo Geswela Mnope pa Lisiku Lyakululuchila Ulemwa. (Lef. 16:​2, 17) Chaka chilichose jwalakwe jwajinjilaga ni myasi ja yinyama kuti apeleche mbopesi jakusimasya ulemwa wakwe ni wa Ayisalayeli wosope. Mwapanandipanandi, Yehofa pakukamulichisya masengo msimu wakwe weswela jwasasile yayikwimila mbalisi.—Aheb. 9:​6-8.

13. Ana Malo Geswela soni Malo Geswela Mnope mu chitenti cha Mlungu gakwimila chichi ni yakusatenda Aklistu pakumtumichila Mlungu?

¹³ Yakusatenda Aklistu pakumtumichila Mlungu. Ŵakulijiganya ŵa Klistu ŵakuŵalanjikape ni ŵakusasagulidwa ni msimu weswela soni jemanjaji akusakola upile wapajika wakuŵa paunasi ni Yehofa. Jemanjaji apali 144,000 mwamti chakatumichileje mpela ŵakutaga mbopesi kwinani yalumo ni Yesu. (Chiw. 1:6; 14:1) Uswela wa malo gakupelechela mbopesi ukusajimila kuti jemanjaji ŵapochele msimu wa Mlungu wakwatendekasya kuŵa ŵanache ŵa Mlungu pandaŵi jakutama pachilambo chapasichi. (Alo. 8:​15-17) Malo Geswela Mnope m’chitentichi gakwimila kwinani kwele Yehofa akusatama. “Nguwo” jajalekanganyaga Malo Geswela ni Malo Geswela Mnope jajimilaga chilu chisyesyene cha Yesu changanajinjila nacho kwinani mpela Jwamkulungwa jwa Ŵakutaga Mbopesi mnyumba ja Mlungu jausimu. Mwakupeleka chilu chakwe mpela mbopesi, Yesu jwawugwile litala lyakuti Aklistu ŵasagulwe wosope chakatame ni umi kwinani. Nombe jemanjajisoni akusapeleka yilu yawo ya umundu ni chakulinga chakuti chakapochele mbote jawo kwinani. (Aheb. 10:​19, 20; 1 Akoli. 15:50) Yesu ali ajimwiche ku chiwa, jwajinjile m’Malo Geswela Mnope m’nyumba ja Mlungu jausimu, kwakusajawula ŵasagulwe wosope.

14. Mwakamulana ni Ahebeli 9:​12, 24-26, ana chichi chachikusatendekasya dongosolo jakumtumichila Yehofa mnyumba jakwe jausimu kuŵa jambone mnope?

¹⁴ Apatu mpaka tumanyilile chenene ukulungwa wa Yehofa, soni dongosolo jiŵajitamilikasisye pa kulambila kweswela kupitila mu mbopesi jakutuwombola soni umbopesi wa Yesu Klistu. Jwamkulungwa jwa ŵakutaga mbopesi ku Isalayeli jwajinjilaga m’Malo Geswela Mnope gakulinganyidwa ni ŵandu ali ajigele myasi ja nyama syakupelechedwa mbopesi. Nambo Yesu “ŵajinjile kwinani kusyesyeneko” gagali malo geswela mnope ni kuja kuwonechela pa meso pa Yehofa. Kweleko ŵajile kupeleka umi wakwe wapenani mnope mmalo mwetu “ni chakulinga chakuti atyosye ulemwa kupitila mu mbopesi jakwe.” (Aŵalanje Ahebeli 9:​12, 24-26.) Mbopesi jaŵapeleche Yesu jikusamasya ulemwa wetu mpaka kalakala. Myoyo, mpela mwachituyiwonele, chinga tukwete chembecheyo chakwawula kwinani kapena chakutama ni umi pachilambo chapasichi, wosopewe mpaka tumtumichileje Yehofa m’nyumba jakwe jausimu.

15. Ana ŵani ŵaŵatumichilaga mu luŵala lwa chitenti cha Mlungu?

¹⁵ Yaŵatendaga Ayuda pakumtumichila Mlungu. Chitenti chakwete luŵala lumo lwalwakwete lutenje, kuŵatendelaga utumiki wawo ŵakutaga mbopesi. Pa luŵalalu ŵaŵisilepo libeseni lyekulungwa lya kopa muŵaŵikagamo mesi gakuti ŵambopesi akamulichisyeje masengo pakuliswejesya mkanaŵe kupeleka mbopesi. (Eks. 30:​17-20; 40:​6-8) Mkupita kwandaŵi nyumba syakumtumichilila Mlungu siŵasitaŵaga syakolagasoni luŵala lwakusa kuŵaŵaga ŵandu ŵanganaŵa ŵakutaga mbopesi ni kupopelaga kwa Mlungu.

16. Ana ŵani ŵakusatumichilaga m’maluŵala gosope ga m’nyumba ja Mlungu jausimu?

¹⁶ Yakusatenda Aklistu pakumtumichila Mlungu.  Ŵasagulwe mkanaŵe kwawula kwinani kutumichila mpela ŵakutaga mbopesi ni Yesu, akusatumichila mwakulupichika pachilambopa mu luŵala lwa mkati m’nyumba ja Mlungu jausimu. Libeseni lyekulungwa lya mesi lyalyaŵaga pa chitenti likusilyakumbusya jemanjajo mfundo jakusosekwa mnope jakuti akusosekwa kupitilisya kuŵa ŵaswela mundamo soni mwausimu mpela mwayiŵelele kwa Aklistu wosope. Sambano ana ŵandu ŵa mu “gulu jekulungwa” ŵakusiŵakamuchisya mwakulupichika Aklistu ŵasagulwe akusamtumichila Mlungu ali m’luŵala lwapi m’nyumba ja Mlunguji? Ndumetume Yohane ŵaweni jemanjaji ali ‘ajimi pasogolo pa mpando waumwenye,’ yele pachilambopa yikulandana nikwima mu luŵala lwakusa ali ‘mkumtumichila [Mlungu] musi ni chilo m’nyumba jakwe.’ (Chiw. 7:​9, 13-15) Kusala yisyene, uli upile wekulungwa mnope kuti Yehofa atukundile kumtumichila mnyumba jakwe jausimu.

17. Ana ni mbopesi syapi syampaka tupeleche kwa Yehofa?

¹⁷ Masiku aganosoni Aklistu wosope akwete upile wakumtumichila Yehofa pakamulichisya masengo ndaŵi jawo, machili gawo soni yindu yakwete. Mpela yaŵatite Paulo pakwasalila Aklistu wa Chihebeli m’wejisoni “kwende tumchimbichisyeje Mlungu ndaŵi syosope, yayili mpela kupeleka mbopesi. Tukusapeleka mbopesi syelesi patukukamulichisya masengo ngomo syetu pakulalichila kwa wosope yakwamba lina lyakwe.” (Aheb. 13:15) Mpaka tulosye kuyamichila upile watukwete wakumtumichila Yehofa mwakumpa jwalakwe yindu yambone yampaka tukombole.

18. Mwakamulana ni Ahebeli 10:​22-25, ana ni yindu yapi yangatukusosekwa kuleka kutenda, soni ngatukusosekwa kuliŵalila chichi?

¹⁸ Aŵalanje Ahebeli 10:​22-25. Chakumbesi kwa chikalata chiŵalembele Ahebeli, Paulo jwasasile yindu yatukusosekwa kutenda patukumtumichila Yehofa. Yindu yakwe yili kupopela, kulalichila, kusongana nambosoni kulimbikasyana jwine ni mjakwe. Jwalakwe jwasasilesoni kuti ‘tulimbichile kutenda yeleyi, mnopemnope patukuliwona lisiku [lya Yehofa] kuti likuŵandichila.’ Chakumbesi kwa buku ja Chiwunukuko, lilayika lya Yehofa lyasasile kwa maulendo gaŵili pagombelechesya maloŵe gakuti, “Mumtindiŵalileje Mlungu.” (Chiw. 19:10; 22:9) Myoyo kwende wosopewe tukaliŵalilaga yindu yakusokoka mnopeyi yakwamba nyumba ja Mlungu jausimu soni upile watukwete wakumtumichila Mlungu jwetu jwamkulungwa.