1-2. Ana litala limo lyambone mnope lyakulijiganyila soni kuŵalanga Baibulo lili lyapi? Asale chisyasyo.

 TUWANICHISYE kuti akusaka kusuma nyumba. Ana mpaka asache kulola yindu yapi mkanaŵe kusuma nyumbajo? Ana mpaka agambe kulola chiwulili chakulosya mwajikuwonechela nyumbajo? Ngatukukayichila kuti mpaka ajawule kuti akajilole nyumbajo pameso ni pameso. Mpaka atende yeleyi kuti akalole mwajikuwonechela mkati soni pasa pakwe, nambosoni ukulu wakwe. Mpaka asachesoni kumanyilila yaŵatite pakujitaŵa nyumbajo. Mwangakayichila, mkanaŵe kusuma nyumbajo mpaka asache kujimanyilila chenene.

² Mpaka tutendesoni yakulandanayi patukuŵalanga soni kulijiganya Baibulo. Jwakulemba jwine jwasasile kuti Baibulo mpaka tujilandanye ni “chimjumba chekulungwa soni chelewu mnope chachataŵidwe pa fendeshoni jakusokoka mnope.” Sambano, ana mpaka tutende wuli kuti tumanyilile yindu yosope yayikusasimanikwa m’Baibulo? Naga kuŵalanga Baibulo mwakuwutuka mpaka tugambe kumanyilila “yijiganyo yandanda ya m’maloŵe ga Mlungu.” (Aheb. 5:12) Nambo mpela mwampaka atendele pakwinjila “mkati” mwa nyumba kuti ajimanyilile chenene, akusosekwasoni kulijiganya Baibulo mwakusokoka kuti ajipikanichisye chenene. Litala lyambone lyakulijiganyila Baibulo lili kulola yasikusati pakamulana mfundo syakwe. Alinjeje kuyipikanichisya yindu yakusakulupilila, soni magongo gagakwatendekasya kuyikulupilila yinduyo.

3. Ana ndumetume Paulo ŵalimbikasisye Aklistu achimjakwe kutenda chichi? Ligongo chichi ŵalimbikasisye kutenda yeleyi? (Aefeso 3:​14-19)

³ Kuti tujipikanichisye chenene Baibulo mbali syosope, tukusosekwa  kulijiganya yijiganyo yisyesyene yakusokoka ya m’Maloŵe ga Mlungu. Ndumetume Paulo jwalimbikasisye Aklistu achimjakwe kuti alijiganyeje Maloŵe ga Mlungu mwakulimbichila kuti ‘akombole kumanyilila chenene m’chijipi, m’chilewu, kukwela, soni kusokoka’ kwa yisyesyene. Yeleyi yikakamuchisye jemanjajo kuŵa “ŵatitimiche michiga soni ŵakutamilichika” mu chikulupi chawo. (Aŵalanje Aefeso 3:​14-19.) M’wejisoni tukusosekwa kutenda yakulandanayi. Kwende tulole yampaka tutende kuti tulijiganyeje Maloŵe ga Mlungu mwakusamala kuti tugapikanichisyeje chenene.

4. Ana tukusosekwa kutenda chichi kuti tuŵe paunasi wambone ni Yehofa? Alondesye.

⁴ M’weji Aklistu ngatukusasosekwa kwamba kwikutila ni yijiganyo yandanda ya m’Baibulo. Nambo ni chikamuchisyo cha msimu weswela wa Mlungu tukusakola mtima wakusaka kulijiganya “atamose yindu yakusisika ya Mlungu.” (1 Akoli. 2:​9, 10) Uli ngalinga kutanda kulijiganya yindu yampaka yakamuchisye kuŵa paunasi wambone ni Yehofa? Mwachisyasyo, mpaka awungunye yajwatite Yehofa pakwalosya chinonyelo ŵakutumichila ŵakwe ŵakala, yampaka yakamuchisye kumanyilila kuti nombe wawojo akusiŵanonyela. Mpaka alijiganyesoni dongosolo jaŵalinganyisye Yehofa kuti ŵandu ŵakwe amtumichileje ku Yisalayeli. Kaneko mpaka alole kukamulana kwakwe ni yayikusatendekwa mu mpingo wa Chiklistu masiku agano. Nambosoni mpaka alijiganye yakulochesya yayakwanilichikwe pa Yesu pandaŵi jaŵatendaga utumiki wakwe pachilambopa.

5. Ana wawojo akusasaka ali awungunyisye soni kupikanichisya ngani japi pakutenda lijiganyo lyapajika?

⁵ Ŵandu ŵane ŵakusasaka kumanyilila yejinji ŵasasile yindu yakusasaka ali ayipikanichisye chenene kutyochela m’Baibulo. Yine mwa yindu yaŵasasile jemanjaji yikusimanikwa mu libokosi lyakuti, “ Ngani Sine Syampaka Alijiganye pa Lijiganyo Lyapajika.” Mpaka asangalale mnope pakulijiganya nganisi pakamulichisya masengo Kabuku Kakamuchisya Kuwungunya Ngani ka Mboni sya Yehofa. Kulijiganya Baibulo mwakusokoka kuchilimbisya chikulupi chawo soni kuchakamuchisya kuti ‘amjogopeje Mlungu.’ (Mis. 2:​4, 5) Sambano kwende tukambilane yindu yine yakusokoka yampaka tulijiganye m’Baibulo.

6. (a) Ana pana kulekangana kwamtuli pasikati pa pulani ni chakulinga? (b) Ligongo chichi mpaka tusale kuti chakulinga cha Yehofa kwa ŵandu soni chilambochi chili “changamala”? (Aefeso 3:11)

⁶ Mwachisyasyo aganichisye yajikusasala Baibulo pakwamba ya chakulinga cha Mlungu. Pulani jikusalekangana mnope ni chakulinga. Pulani mpaka tujilandanye ni msewu wampaka ukayikasye ku malo ganegakwe gakusaka kwawula. Nambope pulaniji mpaka jilepeleche naga msewu wakupitawo uwugaliche panepakwe. Nambo chakulinga mpaka tuchilandanye ni malo gatukusaka kwawulago. Myoyo naga tukugamanyilila chenene malo gatukusaka kwawulago mpaka tupite msewu wine ni kuja kwika ku maloko. Chakusangalasya chili chakuti kupitila m’Baibulo, Yehofa aŵele ali mkutusalila mwapanandipanandi ya “chakulinga chakwe changamala.” (Aef. 3:11) Yehofa mpaka asagule kukamulichisya masengo litala lililyosye kuti akwanilisye chakulinga chakwe ligongo lyakuti “ŵapanganyisye kandu kalikose malinga ni magongo gakwe.” (Mis. 16:4) Nambosoni yindu yajwapanganyisye Yehofa yichiŵapo mpaka kalakala. Ana chakulinga cha Yehofa chili chamtuli? Ana jwalakwe jwachenjile yindu yapi pakusaka kukwanilisya chakulinga chakwecho?

7. Ana Yehofa jwachenjile chamtuli litala lyakuti akwanilisye chakulinga chakwe panyuma pakuti ŵandu ŵandanda amjimuchile? (Mateyu 25:34)

⁷ Mlungu ŵasalile ŵandu ŵandanda ya chakulinga chakwe kwa jemanjajo. Jwalakwe ŵasalile kuti, “Mŵelekane soni mtupe. Mgumbalane pachilambo chosope soni mchigomeche. Mloleleje . . . chaumi chilichose” pachilambo chapasi. (Gen. 1:28) Nambo atamose kuti Adamu ni Hawa ŵamjimuchile Mlungu, ni kutendekasya kuti ulemwa ujinjile mwa ŵandu, chakulinga cha Yehofa nganichilepechekwa. Jwalakwe jwagambile kuchenga litala lyakuti akwanilisye chakulinga chakwechi. Mwamti ndaŵi jijojo jwalinganyisye yakutamalikasya Uchimwene kwinani kuti chiwukwanilisye chakulinga chakwe chaŵakwete pandanda kwa ŵandu soni chilambochi. (Aŵalanje Mateyu 25:34.) Ndaŵi pajakwanile, mwachinonyelo Yehofa jwamtumisye mwanache jwakwe juŵamnonyelaga mnope kuti ŵajiganye ŵandu yakwamba Uchimwenewu, soni kuti chapeleche umi wakwe pakutuwombola ku ulemwa ni chiwa. Kaneko Yehofa ŵamjimwisye Yesu ku chiwa ni kuwujila kwinani kuti akaŵe Mwenye jwa Uchimwene wa Mlungu. Nambo pana yindu yejinji yampaka tulijiganye yakwamba chakulinga cha Mlungu.

8. (a) Ana mfundo jekulungwa jajikusasimanikwa m’Baibulo ni japi? (b) Mwakamulana ni Aefeso 1:​8-11, ana Yehofa chachikwanilisya chamtuli chakulinga chakwe? (Alole chiwulili chapachikuto.)

⁸ Mfundo jekulungwa jajikusasimanikwa m’Baibulo jili kulichimbichisya lina lya Yehofa yayichiwonechela chenene pachachikwanilisya chakulinga chakwe pachilambopa kupitila mu Uchimwene wakwe wachachilamulaga Klistu. Chakulinga cha Yehofa nganichiŵa chichenjile. Jwalakwe jwasimichisye kuti yiliyose yajwasasile yichitendekwa. (Yes. 46:​10, 11; Aheb. 6:​17, 18) Pandaŵi jakwe, chilambochi chichiŵa paladaiso, mwamti yisukulu yakulungama ya Adamu ni Hawa yichitama ni “umi ndaŵi syosope.” (Sal. 22:26) Nambo panasoni yindu yine yachachikwanilisya Yehofa. Jwalakwe chachitendekasyasoni kuti yakupanganyikwa yakwe ya kwinani soni pachilambo chapasi yiŵe yakamulana. Kaneko yakupanganyikwa yosope yichimpikanilaga Yehofa mpela Jwakulamulila jwawo. (Aŵalanje Aefeso 1:​8-11.) Ana nganiyiŵa yakusangalasya kumanyilila litala lyambone lyakukamulichisya masengo Yehofa pakusaka kukwanilisya chakulinga chakwe?

9. Ana kuŵalanga Baibulo mpaka kutukamuchisye chamtuli kumanyilila chenene yindu yayichitendekwa msogolo?

⁹ Aganichisye yakulochesya yaŵasasile Yehofa mu mgunda wa Edeni yayikusasimanikwa pa Genesesi  3:15. b Yakulochesyayi yasalaga ya yakutendekwa yayichikwanilisya chakulinga cha Mlungu. Nambo yinduyo yaliji yakuti yichitendekwa kusogolo panyuma pa yaka yejinji. Mwachisyasyo, Mlungu ŵamsalile Abulahamu kuti panyuma pa mibado jejinji, jumo mwa yisukulu yakwe chachiŵa Klistu. (Gen. 22:​15-18) Kaneko mu 33 C.E., Yesu ŵamwulesye chindende mwakamulana ni yakulochesya yila. (Mase. 3:​13-15) Yakutendekwa yakumalisya ya yakulochesyayi, yayili kukasanya mtwe wa Satana yichitendekwa yaka yayikwika kusogoloku. (Chiw. 20:​7-10) Nambosoni Baibulo jikusasala yayichitendekwa pawuchiyika pakolasi uŵengani wa ulamusi wa Satana ni gulu ja Yehofa.

10. (a) Ana ni yindu yapi yachiyitendekwe pachangakaŵapa? (b) Ana mpaka tukosechele chamtuli? (Alole maloŵe gamwiŵanda.)

¹⁰ Aganichisye yindu yakogoya yajikusasala Baibulo kuti chiyitendekwe. Chandanda maboma gachigumila kuti “sambano tuli pamtendele soni pangali chakutujogoya!” (1 Ates. 5:​2, 3.) “Pandaŵi jijojo” yakusawusya yekulungwa yichitanda pele maboma gachijimuchila madini gaunami. (Chiw. 17:16) Panyuma pa yeleyi, pachitendekwa chindu chakusimonjesya ligongo pachiwoneka “Mwanache jwa mundu ali mkwika m’mawunde ni machili soni uchimbichimbi wekulungwa.” (Mat. 24:30) Kaneko Yesu chachalamula ŵandu mwakulekanganya ngondolo ni mbusi. (Mat. 25:​31-33, 46) Pandaŵi jeleji Satana chachiŵa ali mkupitilisya kulimbana ni Yehofa. Soni ligongo lyakuti akusaŵengana mnope ni ŵakutumichila ŵa Mlungu, jwalakwe chachitendekasya mkamulano wa yilambo kwajimuchila ŵakutumichila ŵa Yehofa. M’Baibulo mkamulanowu akusawukolanga kuti Gogi jwa chilambo cha Magogi. (Esek. 38:​2, 10, 11) Nambosoni ŵasagulwe ŵachachiŵa chiŵela pachilambopa, chachasonganganya kuti chaŵe ni Klistu pampepe ni gulu jakwe jangondo kwinani pakuputa ngondo ja Alamagedo. Pelepa pachiŵa pakolasi pa yakusawusya yekulungwa. c (Mat. 24:31; Chiw. 16:​14, 16) Kaneko Ulamusi wa Yaka 1,000 wa Klistu uchitanda.—Chiw. 20:6.

11. Ana akuganisya kuti yindu yichiŵa uli pachachikola umi wangamala? (Alole chiwulili.)

¹¹ Sambano aganichisye yayichitendekwa kusogolo mnope. Baibulo jikusasala kuti Mlungu jwetu, “jwatupele mtima wakusaka kutama ni umi  mpaka kalakala.” (Jwak. 3:​11, NWT.) Ana yeleyi yikugopolela chichi kwa wawojo soni unasi wawo ni Yehofa. Buku jakuti Amŵandichile Yehofa papeji 319 pana mfundo jakusangalasya jakuyichisyaji. “Panyuma pakutama ni umi yaka mahandiledi, masawusandi, mamiliyoni atamose mabiliyoni, tuchimanyilila yejinji yakwamba Yehofa kupunda apano. Nambo tuchilipikanagape kuti pana yindu yejinji yangaŵalanjika yatukusosekwa kulijiganya. . . . Umi wangamala uchiŵa wakupindulisya soni wuchikola yindu yakulekanganalekangana. Chindu chakusosekwa mnope chichiŵa chakuti ndaŵi syosope tuchimŵandichilaga Yehofa.” Nambo pandaŵi ajino ana mpaka tumanyililesoni chichi patukupitilisya kulijiganya Maloŵe ga Mlungu mwakusokoka mnope?

12. Ana mpaka tutende uli kuti tuganichisyeje mnope yindu yakwinani? Apeleche chisyasyo.

¹² Maloŵe ga Mlungu gakusatusalila kuti Yehofa “akutama pachanya” kapena kuti pamalo gapenani mnope. (Yes. 33:5) Baibulo jikusasala yindu yakusimonjesya yakwamba Yehofa soni mbali ja gulu jakwe ja kwinani. (Yes. 6:​1-4; Dan. 7:​9, 10; Chiw. 4:​1-6) Mwachisyasyo, mpaka tuŵalanje yindu yakusimonjesya yaŵayiweni Esekiele pandaŵi jele ‘kwinani kwawugwiche, ni [jwalakwe] ŵam’weni Mlungu m’mesomkulola.’—Esek. 1:1.

13. Ana akusapikana uli mumtima pakuganichisya ya udindo wakwete Yesu kwinani wakusawulondesya pa Ahebeli 4:​14-16?

¹³ Aganichisyesoni ya udindo wakwete Yesu kwinani mpela Mwenye jwetu soni Jwamkulungwa jwa Ŵakutaga Mbopesi. Kupitila mwa jwalakwe mpaka tuŵandichile “mpando waumwenye wa umbone mtima wekulungwa” wa Mlungu mwakupopela kuti atutendele chanasa soni kutukamuchisya “pandaŵi jatukusosechela.” (Aŵalanje Ahebeli 4:​14-16.) Myoyo tukakundaga kuti lisiku limale mkanituganichisye yatesile Yehofa ni Yesu soni yakututendela m’weji. Tuganichisyeje mnope ya chinonyelo cha jemanjaji soni chitutendekasyeje kusachilila kumtumichila Yehofa.—2 Akoli. 5:​14, 15.

14. Ana ni chindu chimo chambone mnope chapi champaka tutende pakulosya kumyamichila Yehofa soni Yesu? (Alole chiwulili.)

 ¹⁴ Litala limo lyampaka tulosye kumyamichila Mlungu soni Mwanache jwakwe lili kwakamuchisya ŵane kuti aŵe ŵakutumichila ŵa Yehofa soni ŵakulijiganya ŵa Yesu. (Mat. 28:​19, 20) Yeleyi ni yajwatesile ndumetume Paulo pakusaka kumyamichila Mlungu soni Klistu. Jwalakwe jwamanyililaga kuti chakulinga cha Mlungu chili chakuti, “ŵandu ŵamtundu uliwose akulupuche ni kuŵa ŵakumanyilila chenene yayili yisyesyene.” (1 Tim. 2:​3, 4) Mwamti jwalakwe jwalimbichilaga mnope kwakamuchisya ŵane ni chakulinga chakuti atende ‘yiliyose yakakombwele kuti ŵakulupusye ŵane.’—1 Akoli. 9:​22, 23.

15. Mwakamulana ni Salimo 1:​2, ana chichi champaka chitutendekasye kuŵa ŵakusangalala?

¹⁵ Juŵalembile Salimo jandanda jwasasile kuti mundu jwakusasangalala soni jwayikusamjendela chenene yindu ali ‘jwakusimana lukondwa pakugapikanila Malamusi ga AMBUJE’ nambosoni ‘jwakusaganichisya malamusigo musi ni chilo.’ (Sal. 1:​1-3) Pakulondesya ya lilembali, jwagopolela Baibulo jwine jwatite, “Kuti mundu akombole kuwungunya, kulijiganya soni kupata ndaŵi jakwanila jakuganichisya yalijiganyisyeyo akusasosekwa kola mtima wakusachilila mnope kulongoleledwa ni Mlungu.” Jwasasilesoni kuti, “naga lisiku likupita mundu ngaŵalanga Baibulo nikuti lisikulyo ligambile konasika.” Mpaka asangalalejesoni pakulijiganya Baibulo mwakutenda chidwi ni mfundo syakusosekewa mnope soni kulola yasikuti pakamulana. Kusala yisyene yikusaŵa yakusangalasya mnope kulijiganya mwakusokoka Maloŵe ga Mlungu.

16. Ana tuchilijiganya chichi mungani jakuyichisya?

¹⁶ Yindu yakusangalasya yakusatujiganya Yehofa kupitila m’Maloŵe gakwe nganiyiŵa yakusawusya kuyipikanichisya. Mungani jakuyichisya, tuchikambilana chindu chimo chekulungwa chakusachilondesya m’Baibulo. Chinduchi chili nyumba ja Mlungu jausimu jiŵajikolasile Paulo mu chikalata chakwe chakwawula kwa Aklistu ŵa Chihebeli. Chachisangalala mnope patuchikambilana ngani jeleji.