Yiwusyo Yakutyochela kwa Ŵakuŵalanga
Ana Ayisalayeli paŵaliji mchipululu ŵagambaga kulya mana ni yiwuti?
Mana galiji chakulya chaŵadalilaga mnope Ayisalayeli paŵaliji mchipululu kwa yaka 40. (Eks. 16:35) Kwa maulendo gaŵili Yehofa jwapele Ayisalayeli yiwuti kuŵa yakulya yawo. (Eks. 16:12, 13; Num. 11:31) Nambope, papalisoni yakulya yamitundu jine yaŵalyaga Ayisalayeliŵa.
Mwachisyasyo, ndaŵi sine Yehofa ŵalongolelaga ŵandu ŵakwe ku malo gakuti “akapumulepo” gagakolaga yakulya soni mesi. (Num. 10:33) Gamo mwa maloga galiji ku Elimu, “kwele kwaliji yisima ya mesi yakwana 12 soni yitela ya kanjesa yakwana 70.” Komboleka kuti yitelayi yasogolaga yisogosi yakusalya ŵandu. (Eks. 15:27) Buku jine (Plants of the Bible) jasasile kuti yitelayi “yamelaga mmalo gejinji soni yasogolaga yisogosi yaŵalyaga mnope ŵandu mchipululu. Kupwatika pa kulya, yisogosiyi ŵatendelagasoni mawuta. Nambosoni yitelayi ŵayikamulichisyaga masengo kuŵa malo gakutama ŵandu ligongo lya m’bulili wakwe.”
Kombolekasoni Ayisalayeli ŵajimi pamalo gane gagakwete mesi gejinji gele apano akusagakolanga kuti Feiran. Maloga gagambile kuŵa kambali kamwana ka mbali jekulungwa jajakwete mesiga jakolanjidwa kuti Wadi Feiran. Buku jine (Discovering the World of the Bible) jasasile kuti malo gagakwete mesiga “galiji gelewu makilomita 130, galiji gakusalala soni gakumanyika mnope ku Sinai.” Bukuji jasasilesoni kuti, “Kutyochela pamalo pagakutagana mesi ga pamaloga ni ga mnyasa jekulungwa pana lutando lwa makilomita 45 kuja kwika pamalo paŵajimi Ayisalayeli pala. Malo gaŵajimi Ayisalayeliga galiji pamalo gakwela chiŵandika mamita 610 kutyochela ku nyasa jekulungwa, soni galiji gelewu chiŵandika makilomita 5. Maloga gakwete yitela yejinji ya mgwalangwa soni galiji gakusalala mnope mwamti kusalala kwakwe ŵakulandanyaga ni mgunda wa Edeni. Mwamti kwa yaka yejinji ŵandu ŵajawulaga pamaloga pakusaka kupata yisogosi ya mgwalangwa.”
Yisogosi ya mgwalangwa ya ku Feiran
Ayisalayeli paŵasamaga ku Iguputo ŵajigele utandi wa tiligu, yakulinganyila mikate, nambosoni tiligu ni mawuta. Nambope, komboleka kuti yindu yeleyi nganiyitama kwandaŵi jelewu. Jemanjaji ŵajigelesoni “ngondolo soni ng’ombe. Yilango yawo yaliji yejinji mnope.” (Eks. 12:34-39) Komboleka kuti yilango yejinji yawile ligongo lya nyengo ja m’chipululumo. Mwinesoni yilango yine ŵalile, yine ŵayipelekaga mbopesi atamosesoni kwa milungu jaunami. a (Mase. 7:39-43) Nambope komboleka kuti Ayisalayeliŵa ŵasigele ni yilango yine yaŵalangagape. Yeleyi yikusawonechela pa maloŵe gajwaŵechete Yehofa kwa jemanjaji. Jwalakwe jwatite, “Ŵanache ŵenu chachiŵa ŵakuchinga m’chipululu kwa yaka 40.” (Num. 14:33, NWT.) Komboleka kuti jemanjaji ŵapataga mkaka soni nyama kutyochela ku yilango yawoyi. Nambo mwine yaliji yangakwanila kuyikamulichisya masengo kwa ŵandu chiŵandika 3 miliyoni kwa yaka 40 yaŵajendaga m’chipululu. b
Ana yilangoyi yapataga kwapi yakulya soni mesi? c Komboleka kuti pandaŵi jelejo kwagwaga ula jejinji mwamti m’chipululu mwasimanikwaga yakumela yejinji. Buku ja Insight on the Scriptures, Volume 1, jikusasala kuti yaka 3,500 yipiteyo, “mmalo muŵatamaga Ayisalayeli mwasimanikwaga mesi gejinji kulekangana ni masiku agano. Tukumanyilila yeleyi ligongo lyakuti, apano mmalo gaŵatamaga Ayisalayeliŵa mwana sulo syejinji syasyajumwile yayikusalosya kuti kalakala kwagwaga ula jejinji yayatendekasyaga kuti sulosyo siŵeje ni mesi.” Atamose yaliji myoyo, m’chipululumu mwaliji mwangasangalasya soni mwakogoya. (Det. 8:14-16) Mwamti yikaŵe kuti Yehofa nganiŵapaga Ayisalayeli mesi mwakusimonjesya jemanjaji pampepe ni yilango yawo akawile.—Eks. 15:22-25; 17:1-6; Num. 20:2, 11.
Mose ŵasalile Ayisalayeli kuti Yehofa ŵapaga mana jemanjaji “kuti [ŵajiganye] kuti mundu ngakukola umi ligongo lya chakulyape, nambo akulama ni maloŵe gosope gakuŵecheta jwalakwe.”—Det. 8:3.
a Baibulo jikusasala ya maulendo gaŵili gele Ayisalayeli ŵapeleche yilango yawo mbopesi kwa Yehofa paŵaliji mchipululu. Ndaŵi jandanda jaliji paŵaŵikaga ŵandu ŵane kuŵa ŵakutaga mbopesi soni pandaŵi ja Pasika. Yosopeyi yatendekwe mu 1512 B.C.E., pali pamasile chaka chityochele Ayisalayeli ku Iguputo.—Lef. 8:14–9:24; Num. 9:1-5.
b Chakumbesi kwa yaka 40 yaŵajendaga m’chipululu, Ayisalayeli ŵasumwile yilango yejinji kungondo. (Num. 31:32-34) Atamose yaliji myoyo, jemanjaji ŵapitilisye kulya mana mpaka paŵajinjile mchilambo chaŵasalile Mlungu kuti chachapa.—Yos. 5:10-12.
c Pangali umboni wawukusalosya kuti yinyamayi yalyaga mana, ligongo lyakuti Yehofa ŵasalile Ayisalayeli kuti alokoteje mana gampaka akwane kulya mundu jwalijose nambo yinyama nganayikolanga.—Eks. 16:15, 16.
