NGANI JAKULIJIGANYA 37
Ana Mpaka Tulosye Chamtuli Kumpikanila Yehofa?
“Kwa mnopemnope sambano tukajenele kulipeleka kwa Atati ŵetu.”—AHEB. 12:9.
NYIMBO 9 Yehofa Ali Mwenye Jwetu
YACHITULIJIGANYE *
1. Ligongo chichi tukusosekwa kumpikanila Yehofa?
TUKUSOSEKWA kumpikanilaga * Yehofa ligongo ali Mkupanganya. Ligongo lya yeleyi jwalakwe ni jwakwete ufulu wakupeleka malamusi ku yakupanganyikwa yakwe. (Ciw. 4:11) Ligongo line lyakumpikanila Yehofa lili lyakuti ulamusi wakwe wuli wambone mnope. Kutandila kalakala maulamusi ga ŵandu gaŵele gali mkulamulila. Pakulandanya Ulamusi wa Yehofa ni wa ŵandu, Yehofa ali jwalunda mnope, jwachinonyelo, jwachanasa soni jwambone mtima kupunda ŵakulamulila wosope.—Eks. 34:6; Alo. 16:27; 1 Yoh. 4:8.
2. Ana ni magongo gapi gakututendekasya kumpikanila Yehofa gagakusimanikwa pa Ahebeli 12:9-11?
2 Yehofa akusasaka kuti tumpikanileje, ngaŵa ligongo lya kumjogopa, nambo ligongo lyakuti tukusamnonyela soni tukusamwona kuŵa Mtati jwetu jwachinonyelo. M’chikalata chakwe chakwawula kwa Ahebeli, Paulo jwasasile kuti tukusosekwa “kulipeleka kwa Atati ŵetu” ligongo ni jwakusatujiganya “kuti tupindule.”—Aŵalanje Ahebeli 12:9-11.
3. (a) Ana mpaka tulosye chamtuli kuti tukusampikanilaga Yehofa? (b) Ana chitujanje yiwusyo yapi?
3 Tukusampikanila Yehofa mwakutenda yiliyose yampaka tukombole pakumpikanila jwalakwe mwakuwambala kulidalila. (Mis. 3:5) Yikusaŵa yangasawusya kumpikanila naga tuli mkusimanyilila ndamo syakwe syambone. Ligongo chichi? Ndamo syelesi sikusalosya mwakusatendela Yehofa yindu yakwe yosope. (Sal. 145:9) Patukulijiganya mnope ya Yehofa ni patukusamnonyela mnope. Naga tukumnonyela Yehofa, ngatukusasosechela malamusi gejinji gakutusalila yampaka tutendeje soni yangatukusosekwa kutenda. Tukusalingalinga kuti kaganisye ketu kalandaneje ni ka Yehofa soni tukusaŵambala yakusakala. (Sal. 97:10) Ndaŵi sine mpaka yitusawusyeje kumpikanila Yehofa. Ligongo chichi yili myoyo? Ana achakulungwa ŵamumpingo, achatati soni mwanja mama mpaka alijiganye chichi kutyochela pa chisyasyo cha Jwakulamulila Nehemiya, Mwenye Daudi soni Maliya, mamagwe ŵa Yesu? Nganiji chijijanje yiwusyo yeleyi.
LIGONGO CHICHI KUMPIKANILA YEHOFA MPAKA KUŴE KWAKUSAWUSYA?
4-5. Mwakamulana ni Aloma 7:21-23, ligongo chichi kumpikanila Yehofa mpaka kuŵe kwakusawusya?
4 Ligongo limo lyalikusatutendekasya kuyiwona kuŵa yakusawusya kumpikanila Yehofa lili lyakuti wosopewe tuli ŵangali umlama. Myoyo tukusakola chisyoŵe changasaka kumpikanila Mlungu. Adamu ni Hawa ali amjimuchile Yehofa mwakulya chisogosi, ŵatamilikasisye malamusi gawo. (Gen. 3:22) Apano, ŵajinji ŵangampikanilaga Mlungu mpela muŵatendele Adamu ni Hawa. Jemanjaji akusasaka kuti alisagulileje jika yakutenda.
5 Atamose ŵandu ŵele ŵakusammanyilila soni kumnonyela Yehofa, yikusaŵa yakusawusya kumpikanila jwalakwe ndaŵi syosope. Ndumetume Paulo jwasimene ni chakusawusya mpela chelechi. (Aŵalanje Aloma 7:21-23.) Mpela Paulo, tukusasachilila kutenda yambone pameso pa Yehofa. Nambo tukusasosekwa kulimbana ni mtima wakusachilila kutenda yakusakala.
6-7. Ana ligongo line lyapi lyampaka litendekasye kuti kumpikanila Yehofa kuŵe kwakusawusya? Apeleche chisyasyo.
6 Ligongo line lyampaka litendekasye kupikanila Yehofa kuŵa kwakusawusya lili lyakuti tukusatenda yindu mwakamulana ni ndamo ja kutwakulile. Ŵandu ŵajinji akusaganisya mwakulekangana ni yakusasaka Yehofa, myoyo tukusosekwa kulingalinga kuŵambala kuganisya mpela mwakusatendela jemanjaji. Kwende tulole chisyasyo chimpepe.
7 M’madela gane yili yakuwanda kwakanganichisya ŵane kuti asachilileje kola mbiya syejinji. Mlongo jwine lina lyakwe Mary * jwasimene ni yamti mpela yeleyi. Mkanatande kulijiganya yakwamba Yehofa, jwalakwe jwalijiganyisye pa sukulu jine japenani m’chilambo chakumangwakwe. Ŵam’liŵasa lya Mary ŵamkanganichisyaga kuti aŵe pamasengo gakupochela mbiya syejinji soni gakuti apocheleje ulemu. Nombenajo jwasakaga yeleyo. Nambo paŵalijiganyisye yakwamba Yehofa nikutanda kumnonyela, jwachenjile nganisyo syakwe. Nambope yaliji yakusawusya kwa jwalakwe, mwamti jwatite, “Ndaŵi sine napataga matala gakupatila mbiya syejinji nambo namanyililaga kuti yeleyi chiyisokonasye undumetume wangu. Ligongo lya mwanakulile, yikusasawusyaga kuti nayikaneje. Payitendekwe yeleyi ngusasosekwa kumŵenda Yehofa kuti angamuchisye kutyosya mtima wakusachilila masengo gampaka gandendekasye kuti ngatenda yejinji pakumtumichila Yehofa.”—Mat. 6:24.
8. Ana sambano chitukambilane chichi?
8 Tukusapindula naga tukumpikanila Yehofa. Nambo ŵandu ŵakwete udindo mpela achakulungwa ŵa mumpingo, achatati soni mwanja mama naga akusampikanila Yehofa, akusakamuchisya ŵandu ŵane. Kwende tulole yisyasyo yine yakutyochela m’Baibulo yampaka yitujiganye kakamulichisye masengo ka udindo wetu m’litala lyalikusamsangalasya Yehofa.
YAMPAKA ACHAKULUNGWA ALIJIGANYE KUTYOCHELA KWA NEHEMIYA
Achakulungwa ŵamumpingo akukamula nawo masengo pa Nyumba ja Uchimwene mpela mwaŵatendele Nehemiya pakukamuchisya kutaŵasoni lutenje lwa Yelusalemu (Alole ndime 9-11) *
9. Ana Nehemiya ŵasimene ni yakusawusya yamtuli?
9 Yehofa ŵapele achakulungwa ŵa mumpingo udindo wakusosekwa mnope wakwasamalila ŵandu ŵakwe. (1 Pet. 5:2) Achakulungwa ŵa mumpingo mpaka alijiganye yejinji mwakuganichisya mnope yaŵatendaga Nehemiya pakusamalila ŵandu wa Yehofa. Mpela jwakulamulila jwa ku Yuda, Nehemiya jwakwete udindo wekulungwa mnope. (Neh. 1:11; 2:7, 8; 5:14) Aganichisye yakusawusya yine yaŵasimene nayo Nehemiya. Jwalakwe jwapikene kuti Ayuda ŵasakesye nyumba jakulambilila soni kuti ŵalesile kwakamuchisya Alefi mwakwapa mbiya mpela mwachaŵechetelaga Chilamusi. Ayuda nganampikanila Yehofa mwakusunga Sabata soni achalume ŵane ŵalombele achakongwe ŵanganamlambilaga Yehofa. Jwakulamulila Nehemiya ŵasosekwaga kumalana ni chakusawusyachi.—Neh. 13:4-30.
10. Ana Nehemiya jwatesile wuli ni yakusawusya yaŵasimene nayo?
10 Nehemiya nganakamulichisya masengo udindo wakwe mwakuŵika malamusi gakwe kuti ŵandu ŵa Mlungu agakuyeje. Mmalo mwakwe jwapopesile kwa Yehofa kutyochela pasi pamtima kuti amkamuchisye soni jwajiganyisye ŵanduwo Chilamusi cha Yehofa. (Neh. 1:4-10; 13:1-3) Mwakulinondiya Nehemiya jwakamwile masengo pampepe ni ŵanduwo mwakwakamuchisya kutaŵasoni lutenje lwa Yelusalemu.—Neh. 4:15.
11. Mwakamulana ni 1 Atesalonika 2:7, 8, ana achakulungwa akusosekwa atendeje wuli yindu ni abale ni alongo?
11 Achakulungwa ŵa mumpingo komboleka kuti nganaŵa asimene ni yakusawusya yaŵasimene nayo Nehemiya, nambope jemanjaji mpaka amsyasye jwalakwe mmatala gejinji. Mwachisyasyo, akusakamula masengo mwakulipeleka pakusaka kwakamuchisya abale ni alongo. Soni jemanjaji ŵangaliwona kuŵa ŵakwapunda ŵandu ŵane ligongo lya udindo wawo. Mmalo mwakwe, akusawusamalila mpingo mwachinonyelo. (Aŵalanje 1 Atesalonika 2:7, 8.) Ligongo lyakuti ali ŵakulinandiya soni akusiŵanonyela ŵane, jemanjaji akusaŵechetaga mwakwaganichisya ŵane. Andrew jwatumichile mpela jwamkulungwa kwa yaka yejinji jwatite, “Nayiweni kuti naga jwamkulungwa jwa mumpingo ali jwachinonyelo soni jwagopoka, yikusakwayaga mnope abale ni alongo. Ndamosi sikusakamuchisya kuti yiŵe yangasawusya kwa abale kutenda yindu ni achakulungwa ŵa mumpingo.” M’bale Tony, jwatumichile mpela jwamkulungwa kwandaŵi jelewu jwatite, “Ngusalingalinga kukamulichisya masengo maloŵe ga pa Afilipi 2:3, soni ndaŵi syosope ngusawona ŵandu ŵane kuti ali ŵakumbunda. Yeleyi yikusangamuchisya kuŵambala kwakanganichisya ŵandu ŵane kuti ambikanileje.”
12. Ligongo chichi achakulungwa ŵa mumpingo akusosekwa kuŵa ŵakulinondiya?
12 Achakulungwa akusosekwa kuŵa ŵakulinondiya mpela Yehofa. Atamose kuti Yehofa ali Jwakulamulila Jwamkulungwa jwa chilambo chosope, jwalakwe “akusajinamila pasi” kuti ‘amkwesye mundu jwakulaga kutyochela ku luwundu.’ (Sal. 18:35; 113:6, 7) Mwangakayichila Yehofa akusaŵengana ni ŵandu ŵakulikwesya.—Mis. 16:5.
13. Ana ligongo chichi achakulungwa ŵamumpingo akusosekwa kusamala ni yakusaŵecheta soni ni mwakusaŵechetela?
13 Litala line lyampaka achakulungwa ŵa mumpingo alosye kuti akusampikanila Yehofa lili kusamala ni yakusaŵecheta soni ni mwakusaŵechetela. Naga ngakutenda yeleyi, mpaka aŵechete mwangali chinonyelo kwa mundu jwalosisye ungamchimbichisya. (Yak. 1:26; Aga. 5:14, 15) Andrew jwatumkolasile kundanda kula jwatite, “Ndaŵi sine ngusasaka kuŵecheta mwangali chinonyelo kwa m’bale kapena mlongo jwangananjimbichisya. Nambope, ngusaganichisya ya yisyasyo ya achalume ŵakulupichika ŵa m’Baibulo, yayikusangamuchisya kulijiganya kusosekwa kwakuŵa ŵakulinondiya soni ŵakuwusimana mtima.” Achakulungwa ŵa mumpingo akusalosya kumpikanila Yehofa mwakuŵecheta mwachinonyelo soni mwachanasa pali ni achakulungwa achimjawo kapena abale ni alongo.—Akolo. 4:6.
YAMPAKA ALIJIGANYE ACHATATI KUTYOCHELA KWA MWENYE DAUDI
14. Ana Yehofa apeleche udindo wamtuli kwa achatati, soni ana jwalakwe akusajembecheya kuti chatendeje chichi?
14 Yehofa ŵamŵisile mtati kuti aŵe mtwe wa liŵasa, soni Mlungu akusasakaga kuti achatati ŵajiganyeje ni kwajamuka ŵanache ŵawo. (1 Akoli. 11:3; Aef. 6:4) Nambo udindo wa mtati ukwete malile. Yeleyi yikugopelela kuti naga akutenda yindu yakupundanganya chachijanga kwa Yehofa juŵapanganyisye liŵasa. (Aef. 3:14, 15) Achatati mpaka alosye kuti akusampikanila Yehofa naga akusakamulichisya masengo udindo wawo m’litala lyalikusamsangalasya Mlungu. Jemanjaji mpaka alijiganye yejinji kutyochela kwa Mwenye Daudi.
Kapopele ka mtati jwa Chiklistu kalosyeje kuti ali jwakulinondiya (Alole ndime 15-16) *
15. Ligongo chichi Mwenye Daudi ali chisyasyo chambone kwa achatati?
15 Yehofa ŵamsagwile Daudi kuŵa mtwe, ngaŵa wa liŵasa lyakwepe, nambosoni wa mtundu wosope wa Aisalaeli. Mpela mwenye, Daudi ŵakwete machili gejinji. Ndaŵi sine, jwalakwe jwakamulichisyaga machili gakwe mwakulemwecheka soni jwatesile yakulemwa yekulungwa. (2 Sam. 11:14, 15) Nambo jwalakwe jwalosisye kumpikanila Yehofa mwakupochela chamuko. Pandaŵi jiŵapopelaga, ŵamsalile Yehofa muŵapikanilaga mumtima. Soni ŵalinjilile mwakakombolele pakupikanila chamuko chakutyochela kwa Yehofa. (Sal. 51:1-4) Kupwatika pelepa, Daudi ŵalosisye kulinondiya mnope mwakupochela chikamuchisyo kutyochela kwa achalume soni achakongwe. (1 Sam. 19:11, 12; 25:32, 33) Daudi jwalijiganyisye kutyochela pa yakulemwa yakwe, soni jwatandite kukuwona kutumichila Yehofa kuŵa kwakusosekwa mnope paumi wakwe.
16. Ana achatati mpaka alijiganye chichi kutyochela kwa Daudi?
16 Ana achatati mpaka alijiganye chichi kutyochela kwa Mwenye Daudi? Jemanjaji ngakusosekwa kukamulichisya masengo mwakulemwecheka udindo waŵapele Yehofa. Ajitichisyeje palemwisye soni apocheleje msyungu wakutyochela m’Baibulo wakwapa ŵandu ŵane. Naga akuŵa ŵakulinondiya, ŵamwiŵasa mwawo chachapa ulemu. Pakupopela yalumo ni liŵasa lyawo mwakutyochela pasi pamtima, jemanjaji chachiyiwona kuti wawojo akusamdalila Yehofa. Chindu chakusosekwa mnope chili chakuti akuwoneje kutumichila Yehofa kuŵa kwakusosekwa mnope paumi wawo. (Det. 6:6-9) Chisyasyo chawo chambone chikusaŵa mtuka wambone mnope wampaka apeleche ku liŵasa lyawo.
YAMPAKA ALIJIGANYE MWANJA MAMA KUTYOCHELA KWA MALIYA
17. Ana Yehofa apeleche udindo wamtuli kwa mwanja mama?
17 Yehofa apeleche udindo wakusosekwa mnope kwa mama mwiŵasa. Jwalakwe ŵapelesoni udindo wakwalolela ŵanache ŵawo. (Mis. 6:20) Kusala yisyene, yakusatenda mwanja mama soni yakusaŵecheta yikusakwaya ŵanache kwa umi wawo wosope. (Mis. 22:6) Kwende tulole yampaka mwanja mama alijiganye kutyochela kwa Maliya, mamagwe ŵa Yesu.
18-19. Ana mwanja mama mpaka alijiganye chichi kutyochela kwa Maliya?
18 Maliya jwagamanyililaga chenene Malemba. Maliya ŵamchimbichisyaga mnope Yehofa soni jwaliji paunasi wakulimba ni jwalakwe. Maliya ŵaliji jwakusachilila kutenda lisosa lya Yehofa, atamose kuti yeleyi yikachenjile umi wakwe.—Luk. 1:35-38, 46-55.
Naga nangolo apesile mpaka yiŵe chenene kulinjilila kulosya chinonyelo ku liŵasa lyakwe (Alole ndime 19) *
19 Mwanja mama mpaka amsyasye Maliya m’matala gejinji. Ana mpaka atende yeleyi chamtuli? Chandanda, akusosekwa kuŵape paunasi wambone ni Yehofa, mwakola lijiganyo lya Baibulo lyapajika soni kupopela pajika. Chaŵili, aŵeje ŵakusachilila kuchenga yindu paumi wawo kuti amsangalasyeje Yehofa. Mwachisyasyo, mwine ŵaleledwe ni achinangolo ŵaŵatumbilaga mwachitema soni kuŵecheta mwaukali. Komboleka ŵakusile ali akwete nganisyo syakuti lyeleli lili litala lyambone lyakulelela ŵanache. Atamose panyuma pakulijiganya malamusi ga Yehofa, mpaka yiwepe yakusawusya kuwusimana mtima ŵanache ŵawo patesile chakulemwecheka mnopemnope wawojo papesile. (Aef. 4:31) Pandaŵi mpela syelesi, akusosekwa kumdalila mnope Yehofa kupitila mwipopelo. Nangolo jwine lina lyakwe Lidiya jwatite, “Ndaŵi sine nasosekwaga kupopela mnope kuti ngaŵecheta mwaukali pandaŵi jele mwanangu ngakumbikanila. Pane nakatichisyaga pinguŵecheta ni kupopela kaje chamumtima kwa Yehofa kuti angamuchisye. Lipopeloli lyandamikaga mtima pasi.”—Sal. 37:5.
20. Ana mwanja mama ŵane akusasimana ni chakusawusya chamtuli, soni ana mpaka amalane nacho chamtuli?
20 Chakusawusya chine champaka asimane nacho mwanja mama chili kuyiwona kuŵa yakusawusya kwalosya ŵanache ŵawo chinonyelo. (Tit. 2:3, 4) Achakongwe ŵane ŵakulile m’liŵasa lyele yaliji yakusawusya kwa achinangolo kuŵa paunasi wambone ni ŵanache ŵawo. Naga wawojo ŵakulile m’liŵasa mpela lyeleli ngakusosekwa kutenda yindu mpela yaŵatesile achinangolo ŵawo. Nangolo jwakusatenda lisosa lya Yehofa, akusosekwa kulijiganya mwampaka alochesye chinonyelo kwa ŵanache ŵakwe. Mpaka yiŵe yakusawusya kuchenga mwakusaganichisya, mwakusapikanila soni mwakusatendela yindu. Nambope yili yakomboleka kuchenga soni yeleyi yichikamuchisya liŵasa lyawo kuŵa lyakusangalala.
APITILISYE KUMPIKANILA YEHOFA
21-22. Mwakamulana ni Yesaya 65:13, 14, ana tukupata maumbone gapi ligongo lyakumpikanila Yehofa?
21 Mwenye Daudi jwamanyililaga umbone wakumpikanila Yehofa. Jwalakwe jwalembile kuti, “Malamusi ga Ambuje gali gagoloka, gakusengwasya mtima, malamusi ga Ambuje gali gasyene, gakusapeleka mtima wakupikanichisya. Malamusi genu gakungombelesya une jwakutumichila jwenu, pangugasunga ngusapochela mbote jajikulungwa.” (Sal. 19:8, 11) Masiku agano, mpaka tukuwone kulekangana kwa ŵandu ŵakusampikanila Yehofa ni ŵangakusampikanila. Ŵandu ŵakusampikanila Yehofa “tachijimba mwakondwa.”—Aŵalanje Yesaya 65:13, 14.
22 Naga achakulungwa, achatati soni mwanja mama akumpikanila Yehofa, akusakola umi wambone, maŵasa gawo gakusaŵa gakusangalala soni mpingo wosope ukusaŵa wakamulana. Kupunda yosopeyi, jemanjaji akusasangalasya mtima wa Yehofa. (Mis. 27:11) Kusala yisyene, tuchiŵa ŵakusangalala mnope.
NYIMBO 123 Tupikanileje Mwakulupichika Mwakusajendechesya Yindu Yehofa
^ ndime 5 Munganiji chitukambilane ligongo lyakwe tukusosekwa kumpikanila Yehofa. Chitulolesoni yampaka atende achakulungwa ŵa mumpingo, achatati soni mwanja mama pakukamulichisya masengo udindo waŵapele Yehofa. Jemanjaji mpaka alijiganye yejinji kutyochela ku chisyasyo cha Jwakulamulila Nehemiya, Mwenye Daudi soni Maliya, mamagwe ŵa Yesu
^ ndime 1 NGOPOLELO JA MALOŴEGA: Maloŵe gakuti kupikanila, akusagapikana mwakulemwecheka ŵandu ŵangakusasaka kupikanila. Nambope, ŵandu ŵa Mlungu akusasagula kumpikanila jwalakwe, myoyo jemanjaji ngakusakuwona kupikanila kuŵa kwangaŵajilwa.
^ ndime 7 Mena gane munganiji tugachenjile.
^ ndime 62 KULONDESYA YIWULILI: Jwamkulungwa jwa mumpingo akukamula masengo gakulinganya Nyumba ja Uchimwene pampepe ni mwanache jwakwe, mpela mwaŵatendele Nehemiya pakwakamuchisya ŵandu kutaŵasoni lutenje lwa Yelusalemu.
^ ndime 64 KULONDESYA YIWULILI: Mtati jukupopela pampepe ni liŵasa lyakwe mwakutyochela pasi pamtima.
^ ndime 66 KULONDESYA YIWULILI: Kamnyamata kamalile ndaŵi kali mkutenda mang’asi ga pa kompyuta soni nganikakamula masengo ga panyumba soni ga kusukulu. Mamagwe ŵapesile kutyochela kumasengo akumjamuka mwangatumbila soni mwangaŵecheta mwaukali.