1. Mwakamulana ni Mateyu 11:28-30, ana Yesu ŵatesile chilanga chapi?

YESU jwatesile chilanga chambone ku gulu ja ŵandu ŵaŵampikanilaga. Jwalakwe jwatite, “Myiche kwangune, nipo tinampumusye.” (Aŵalanje Mateyu 11:28-30.) Chilangachi chaliji chakusosekwa mnope. Mwachisyasyo, kwende tulole yaŵamtendele jwamkongwe juŵalwalaga ulwele wekulungwa mnope.

2. Ana Yesu jwamtendele chichi jwamkongwe jwakulwala?

² Jwamkongweju ŵasosekwaga chikamuchisyo. Jwalakwe jwaŵele ali mkwawula kwa madokotala gejinji kuti amposye. Jwaŵele juli mkulwala kwa yaka 12, nambo pangali juŵamposisye. Mwakamulana ni Chilamusi, jwalakwe jwaliji jwamsakale. (Lef. 15:25) Kaneko jwalakwe jwapikene kuti Yesu akuposya ŵakulwala, myoyo jwapite kuti akasimane najo. Paŵamsimene, jwalakwe jwakwayiye ulusi wamumbali mwa chakuwala cha Yesu chakusa, mwamti ndaŵi jijojo ulwelewo waposile. Yesu nganagamba kumposyape, nambo yaŵatesile yalosisye kumchimbichisya. Mwachisyasyo, paŵaŵechetaga ni jwalakwe, Yesu jwalosisye chinonyelo soni kumchimbichisya pakumkolanga kuti “mwanangu.” Kusala yisyene, jwamkongweju ŵalimbikasidwe soni jwapatile machili.—Luk. 8:43-48.

3. Ana chitukambilane yiwusyo yapi?

³ Amanyilile kuti jwamkongweju jwatesile yakomboleka kuja kuwonegana ni Yesu. M’wejisoni tukusosekwa kutenda yakomboleka kuti ‘tuyiche’ kwa Yesu. Mundaŵi jetuji Yesu nganaŵa aposisye mwakusimonjesya ŵandu ‘ŵayiche’ kwa jwalakwe. Nambope jwalakwe akutuŵilangape kuti “Myiche kwangune nipo tinampumusye.” Munganiji, chitupate kwanga kwa yiwusyo msano yakuti, Ana mpaka ‘tuyiche’ kwa Yesu chamtuli? Ana Yesu jwagopolelaga chichi pajwaŵechete kuti “Twichilani likongwa lyangu”? Ana mpaka tulijiganye chichi kwa Yesu? Ligongo chichi masengo gaŵatupele jwalakwe gali gakulimbikasya? Ana  mpaka tupate chamtuli chipumulisi patukunyakula likongwa lya Yesu?

4-5. Ana ni matala gane gapi ‘gakuyichila’ kwa Yesu?

⁴ Litala line lya ‘kuyichila’ kwa Yesu lili kutenda yampaka tukombole mwakulijiganya yindu yaŵatesile soni kuŵecheta. (Luk. 1:1-4) Wuli udindo wetu kutenda yeleyi soni pangali jwine jwampaka atutendele. ‘Tukusayikasoni’ kwa Yesu patusagwile kubatiswa mwakuŵa jwakulijiganya jwa Klistu.

⁵ Litala line lya ‘kuyichila’ kwa Yesu lili kwawula kwa achakulungwa ŵa mumpingo patukusaka chikamuchisyo. Yesu akusakamulichisya masengo ‘mitukaji’ pakusamalila ngondolo syakwe. (Aef. 4:7, 8, 11; Yoh. 21:16; 1 Pet. 5:1-3) Tukusosekwa kutenda yakomboleka kuti jemanjaji atukamuchisye. Tukajembecheyaga kuti achakulungwaŵa chamanyilile yatukuganisya soni yatukusaka. Aganichisye ya M’bale Julian, jwalakwe jwatite, “Nasosekwaga kuleka undumetume wa pa Beteli ligongo lyakuti nalwalaga. Mjangu jwine jwalimbikasisye kuti ngawonegane ni achakulungwa kuti akanimbikasye. Pandanda nganinganisyaga kuti ngusosechela yeleyi. Nambo kaneko naŵendile chikamuchisyo soni chaliji mtuka wapenani mnope wanganimbocheleje.” Achakulungwa ŵakulupichika mpela ŵaŵamsimene Julian, mpaka atukamuchisye kumanyilila nganisyo sya Klistu yayikugopolela kupikanichisya soni kusyasya kaganisye ni katende kakwe ka yindu. (1 Akoli. 2:16; 1 Pet. 2:21) Welewu ni mtuka wapenani mnope wampaka atupe achakulungwa ŵa mumpingo.

6. Ana Yesu jwagopolelaga chichi pajwatite, “Twichilani likongwa lyangu”?

⁶ Yesu pajwaŵechete kuti, “Twichilani likongwa lyangu,” komboleka jwagopolelaga kuti “Awukunde ulamusi wangu.” Kapenasoni kuti, “Twichilani likongwa pampepe ni une soni kukamula yimpepe masengo ga Yehofa.” Maloŵe gosopega gagopolelaga kukamula masengo.

7. Mwakamulana ni Mateyu 28:18-20, ana ni masengo gapi gatupochele, soni ana mpaka tuŵe ŵakusimichisya ya chichi?

⁷ Tukusakunda kuŵilanga kwa Yesu patukulipeleka kwa Yehofa soni kubatiswa. Yesu akumŵilanga jwalijose soni akusiŵapochela wosope ŵali ŵakusachilila kumtumichila Mlungu. (Yoh. 6:37, 38) Ŵakumkuya ŵa Yesu akwete upile wakamula nawo masengo gele Yehofa ŵampele Yesu. Mpaka tuŵe ŵakusimichisya kuti Yesu chachitukamuchisya patukukamula masengoga.—Aŵalanje Mateyu 28:18-20.

8-9. Ligongo chichi ŵandu ŵakulinondiya ŵaŵele paunasi ni Yesu, soni ana tukusosekwa kuliwusya yiwusyo yapi?

⁸ Ŵandu ŵakulinondiya ŵaŵele paunasi ni Yesu. (Mat. 19:13, 14; Luk. 7:37, 38) Ligongo chichi? Alole kulekangana pasikati pa Yesu ni Afalisi. Afalisiŵa ŵaliji ŵakunyada soni ŵangali chinonyelo. (Mat. 12:9-14) Nambo Yesu ŵaliji jwachinonyelo soni jwakulinondiya. Afalisi ŵasakaga kuŵa ŵakumanyika mnope nambosoni ŵanyadaga ligongo lya maudindo gawo. Nambo Yesu jwasasile kuti ngatukusosekwa kutendaga myoyo. Jwalakwe jwasalile ŵakulijiganya ŵakwe kuti aŵeje ŵakulinondiya soni ŵatumichileje ŵane. (Mat. 23:2, 6-11) Afalisi ŵatendelaga yindu yangali chilungamo ŵandu ŵane pakwajogoya ni yindu yampaka yatendechele naga ngakwapikanila jemanjaji. (Yoh. 9:13, 22) Yesu ŵapele chipumulisi ŵandu ŵane mwakutenda nawo yindu mwachinonyelo soni mwachanasa.

⁹ Ana alijiganyisye chine chakwe pa yaŵatendaga Yesuyi? Aliwusye kuti, ‘Ana ŵandu ŵane akusambona kuti ndili jwakulinondiya soni jwangatumbila chitema? Ana ngusasachilila kamula masengo gakuwoneka kuti  gakunyoseka pakusaka kwakamuchisya ŵane?’ Soni ‘ana ngusinanonyela ŵane?’

12-14. Ligongo chichi masengo gaŵatupele Yesu kuti tukamuleje gali chipumulisi?

¹² Ligongo chichi masengo gaŵatupele Yesu gakusatupa chipumulisi? Gapali magongo gejinji nambo kwende tugambe kulola gamnono.

¹³ Tukwete ŵakutulolela ŵambone mnope. Yehofa, Jwakutulamula Jwamkulungwa, ali jwakuyamichila soni jwangali ngasa. Jwalakwe akusayamichila masengo gatukusatendaga. (Aheb. 6:10) Soni jwalakwe akusatupa machili kuti tukombole kamula masengo gaŵatupele. (2 Akoli. 4:7; Aga. 6:5) Mwenye jwetu Yesu, jwatupele chisyasyo chambone chamwampaka tutendele yindu ni ŵane. (Yoh. 13:15) Nombe achakulungwa ŵakusatusamalila akusamsyasya Yesu jwali “jwakuchinga jwamkulungwa.” (Aheb. 13:20; 1 Pet. 5:2) Mwachinonyelo, jemanjaji akusatenda yampaka akombole pakutulimbikasya, kutujiganya soni kutuchenjela.

¹⁴ Tukwete achimjetu ŵambone mnope. Pangali ŵandu ŵakwete achimjawo ŵambone soni masengo gambone mpela gatukwete m’weji. Agambe ganichisya, tukwete upile wakukamula masengo ni ŵandu ŵakwete ndamo syambone mnope nambo ŵali ŵakulinondiya. Jemanjaji akusamanyilila yindu yejinji, nambo akusiŵawona ŵane kuŵa ŵakwapunda. Jemanjaji akusatuwona ngaŵape mpela ŵakamula nawo masengo nambo mpelasoni achimjawo. Soni chinonyelo chawo chikusaŵa chekulungwa mnope, mwamti akusaŵa ŵakusachilila kutuwila.

15. Ana tulipikaneje uli ni masengo gatukusakamula?

¹⁵ Tukwete masengo gambone mnope. Tukusajiganya ŵandu usyesyene wakwamba Yehofa soni kulosya kuti Satana ali jwaunami. (Yoh. 8:44) Satana akusiŵasalila ŵandu yaunami yayikusiyatendekasya kuti akakola chembecheyo. Mwachisyasyo, jwalakwe, akusasaka kuti tukulupilileje kuti Yehofa jwangatukululuchila yakulemwa yetu, soni kuti jwangatunonyela. Kusala yisyene, welewu uli unami wekulungwa. ‘Patuyiche’ kwa Klistu yakulemwa yetu yikusakululuchidwa. Soni yisyesyene yakwe yili yakuti Yehofa akusatunonyela mnope. (Alo. 8:32, 38, 39) Kusala yisyene, yili yakusangalasya mnope kwajiganya ŵandu kumdalila Yehofa soni kwawona pakuchenga umi wawo.

16. Ana masengo gaŵatupele Yesu gali gakulekangana chamtuli ni masengo gane gatukwete?

¹⁶ Masengo gaŵatupele Yesu gali gangasawusya pakulandanya ni masengo galigose.  Mwachisyasyo, patuŵelwiche kumasengo getu gakuchilu ngatukusagamba kupelape, nambo tukusaŵasoni ŵangasangalala. Nambo mwakulekangana ni yeleyi, panyuma pakumtumichila Yehofa soni Klistu, tukusaŵa ŵakusangalala mnope. Mwine mpaka tupele mnope panyuma pakuŵeluka ku masengo, nambope mpaka tulinjelinje kwawula ku misongano. Nambo patuwusile kumisongano tukusaŵa tulimbikasidwe soni kola machili. Yeleyi yikusatendekwasoni patukulingalinga kuti tukalalichile soni kutenda lijiganyo lyapajika, panyuma pakwe tukusalimbikasidwa soni kupata machili.

17. Ligongo chichi tukusosekwa kuŵa ŵakusamala?

¹⁷ Tukusosekwa kumanyilila kuti mundu jwalijose akwete machili gampaka agakamulichisye masengo. Myoyo tukusosekwa kuŵa ŵakusamala ni mwatukusakamulichisya masengo machiligo. Mwachisyasyo, mpaka tumalileje ndaŵi jejinji pakusosasosa yindu yakuchilu. Alole yaŵamjanjile Yesu mundu jwine jwakusichila jwele juŵawusisye kuti, “Ana ngwenela kutenda chichi kuti ngapochele umi wangamala?” Munduju jwapikanilaga yachasalaga Chilamusi. Jwalakwe jwaliji mundu jwambone ligongo Ngani Syambone sya Maliko syasasile kuti Yesu “ŵamnonyele” jwalakwe. Yesu ŵamsalile munduju kuti, “Mjawule mkasumisye yindu yosope yimkwete  . . . kaneko myiche munguyeje.” Munduju ŵasakaga ali amkuyiye Yesu, nambo yamsawisye ligongo “jwaliji jwakusichila mnope.” (Mak. 10:17-22) Yakuyichisya yakwe jwalakwe ŵakanile kunyakula likongwa lya Yesu soni jwapitilisye kuŵa kapolo jwa “Chipanje.” (Mat. 6:24) Ana wawojo akasagwile kutende chichi?

18. Ana ndaŵi syejinji tukusosekwa kutendaga chichi, soni ligongo chichi?

¹⁸ Ndaŵi syosope tukusosekwa tuganichisyeje ya yindu yatukusaŵika pamalo gandanda paumi wetu. Ligongo chichi? Yeleyi ni yampaka yitutendekasye kumanyilila kuti tukukamulichisya masengo machili getu mwalunda. Aganichisye yaŵaŵechete mnyamata jwine lina lyakwe Mark, jwalakwe jwatite, “Kwa yaka yejinji naganisyaga kuti ngutama ni umi wangasaka yejinji. Natendaga upayiniya nambo ndaŵi syosope naganichisyaga mnope ya mbiya soni yampaka ndende kuti ndameje ni umi wambone. Naliwusyaga kuti ligongo chichi ngangusangalala. Kaneko nayiweni kuti naŵikaga yindu yangusaka pandanda ni ndaŵi jakusigalajo nampaga Yehofa.” Mark jwachenjile kaganisye soni muŵatendelaga yindu kuti atendeje yejinji pakumtumichila Yehofa. Jwalakwe jwatite, “Ndaŵi sine ngusaganisyaga ya mbiya, nambope ni chikamuchisyo cha Yehofa soni Yesu ngusakombola kumalana ni yakusawusya yangu.”

19. Ana ligongo chichi kuyiwona yindu mwakuŵajilwa kuli kwakusosekwa?

¹⁹ Mpaka tupitilisye kupata chipumulisi patukunyakula likongwa lya Yesu naga tukutenda yindu yitatu. Chandanda, tuyiwoneje yindu mwakuŵajilwa. Tukukamula masengo ga Yehofa, myoyo tukamuleje masengoga mwakusachila jwalakwe. M’we tuli wamasengo, Yehofa ni jwakulongolela masengoga. (Luk. 17:10) Naga tukukamula masengo ga Yehofaga mwakamulana ni mwatukusachila m’wejo, nikuti tuchilisawusya achimsyewe. Ligongo atamose ng’ombe jamachili, jikusaliwulasya jika naga jili mkulinga kwinjilila kwajikusaka soni kulimbana ni yakusaka ambujegwe. Nambo naga tukukamula masengo ga Yehofa mwakamulana ni mwakusasachila jwalakwe, tuchikombola kutenda atamose yindu yakusawusya. Tukumbuchileje kuti pangali jwampaka alepelekasye yakulinga ya Yehofa.—Alo. 8:31; 1 Yoh. 4:4.

20. Ana chakulinga chetu patukunyakula likongwa lya Yesu chiŵeje chamtuli?

²⁰ Chaŵili, tukamuleje masengo ni chakulinga  chambone. Chakulinga chetu chili kumchimbichisya Yehofa. Ŵandu ŵa mundaŵi ja Yesu ŵele ŵaliji ŵakutunduka, panyuma pakwe nganasangalala soni ŵakanile kunyakula likongwa lya Yesu. (Yoh. 6:25-27, 51, 60, 66; Afil. 3:18, 19) Mwakulekangana ni jemanjaji, ŵandu ŵaŵamnonyelaga Yehofa soni achimjawo, ŵanyakwile likongwa lya Yesu mwakusangalala. Ŵatesile yeleyi kwa umi wawo wosope wapachilambo chapasi ali ni chembecheyo chakuja kutama kwinani ni Klistu. Mpela jemanjaji tuchiŵa ŵakusangalala naga tukunyakula likongwa lya Yesu ni chakulinga chambone.

21. Mwakamulana ni Mateyu 6: 31-33, ana mpaka tujembecheye kuti Yehofa chachitenda chichi?

²¹ Chatatu, tujembecheyeje kuti Yehofa chatukamuchisye. Twasagwile kutama umi wakulipeleka soni kukamula masengo mwamachili. Yesu watukalamwisye kuti ŵandu chachitulagasya. Nambo mpaka tujembecheye kuti Yehofa chachitupa machili kuti tukombole kupilila yakusawusya yiliyose. Patukupilila ni patukusalimbangana. (Yak. 1:2-4) Mpaka tujembecheyesoni kuti Yehofa chachitupa yatukusosechela, soni kuti Yesu chachitusamalila, nambosoni kuti abale ni alongo wetu chachitulimbikasya. (Aŵalanje Mateyu 6: 31-33; Yoh. 10:14; 1 Ates. 5:11) Kusala yisyene, tukwete yosope yakutukamuchisya kupilila yakusawusya yiliyose.

22. Ana mpaka tuyamichile chichi, soni ligongo chichi?

²² Jwamkongwe jwele Yesu ŵamposisye jwapatile chipumulisi palisiku lilyolyo lyaŵamposisye. Kuti jwalakwe apitilisyepe kupata chipumulisichi jwasosekwe kuŵa jwakulijiganya jwa Klistu jwakulupichika. Ana akuganisya kuti jwalakwe jwatesile chichi? Aganichisye ya mbote jakapatile jwalakwe akaŵe jwakulijiganya jwa Yesu. Jwalakwe akaliji ni Yesu kwinani. Yiliyose yakayilesile jwalakwe ni chakulinga chakuti amkuye Yesu ngamkaniyipunda upile wakapatile. Chinga chembecheyo chetu chili chakwawula kwinani kapena kutama pachilambo chapasi, mpaka tuŵe ŵakuyamichila kuti twakundile kuŵilanga kwa Yesu kwakuti, “Myiche kwangune.”