1. Ana ni yakulinga yapi yampaka tukole patukukula?

PATUKUKULA mwine mpaka tutande kudandawula kuti ngatukombolaga kumtumichila Yehofa mpela mwatwatendelaga pandanda. Yili yisyene kuti mundu pakukula machili gakwe gakusanandipa. Nambope ŵachikulile mpaka akamulichisye masengo lunda lwakwete, pakwakamuchisya ŵachinyamata kuti akombole kutenda mautumiki gakulekanganalekangana. Jwamkulungwa jwa mumpingo jwine jwatite, “Panatandite kuyiwona kuti nganimba ngombwele kutenda yejinji, nasangalele kuti papali ŵachinyamata ŵaŵaliji ŵakuŵajilwa kuti atendeje masengo ganakamulaga.”

2. Ana chitukambilane chichi munganiji?

² Mungani jajipite jila twakambilene yampaka alijiganye ŵachinyamata pakukunguluka ni abale ni alongo ŵachikulile. Munganiji chitukambilane yampaka atende ŵachikulile pakulosya ndamo mpela kulinandiya, kumanyilila malile getu, kuyamichila soni koloŵa magasa. Chitulolesoni kuti ŵachikulile pakulosya ndamo syelesi pandaŵi jakutenda yindu ni ŵachinyamata mpaka yikamuchisye mpingo wosope.

3. Mwakamulana ni lilemba lya Afilipi 2:3, 4, ana kulinandiya kukusagopolela chichi? Ana kulinandiya mpaka kumkamuchisye chamtuli Mklistu jwalijose?

³ Ŵachikulile akusosekwa kuŵa ŵakulinandiya kuti akombole kwakamuchisya ŵachinyamata. Mundu jwakulinandiya akusiŵawona ŵane kuŵa ŵakumpunda. (Aŵalanje Afilipi 2:3, 4.) Ŵachikulile ŵali ŵakulinandiya akusamanyilila kuti pana matala gejinji gakutendela yindu yineyakwe mwakamulana ni yajikusasala  Baibulo. Myoyo, ngakusajembecheya kuti jwalijose chatendeje yindu mpela muŵatendelaga jemanjajo. (Jwak. 7:10) Jemanjaji akwete yindu yejinji yakusosekwa yampaka ŵajiganye ŵachinyamata. Nambope akusamanyilila kuti yindu ‘mchilambochi’ yikuchenga, soni mpaka asosekwe kulijiganya katende ka yindu yine kasambano.—1 Akoli. 7:31.

4. Ana ŵakulolela madela akusalandana chamtuli ni Alefi?

⁴ Mundu jwakulinandiya, pakukula akusamanyilila kuti nganaŵa akombwele kutenda yindu yine yaŵatendaga pandanda. Mwachisyasyo, aganichisye ya ŵakulolela madela. Jemanjaji pakwanisye yaka 70, akusiŵaŵenda kuti atende utumiki wine. Yeleyitu mpaka yiŵe yakusawusya kwa jemanjaji ligongo ŵasangalalaga ni masengo gawo gakwakamuchisya abale ni alongo. Kupwatika pelepa, ŵawunonyelaga utumiki soni mmitima jawo akusasaka ali mkupitilisya. Nambope jemanjaji akusapikanichisya kuti ŵachinyamata, ni ŵampaka atende chenene utumiki welewo. Yakusatenda jemanjaji, yikusalandana ni yaŵatendaga Alefi mundaŵi ja Aisalaeli. Alefiŵa ŵalekaga kutumichila panyumba jakulambilila pakwanisye yaka 50. Alefi ŵaŵaliji ŵachikulile ŵasangalalaga mnope ni utumiki uliwose wapochele. Ŵatendaga yiliyose yampaka akombole pakwakamuchisya ŵachinyamata. (Num. 8:25, 26) Masiku agano, ŵakulolela madela ŵaŵalesile utumiki wawo ligongo lya uchikulile, ngakusatumichilaga m’mipingo jejinji mpela muyaŵelaga kala. Nambope jemanjaji akusiŵakamuchisya mnope abale ni alongo ŵa mumpingo wakusongana.

5. Ana akulijiganya chichi pa chisyasyo cha Dan ni ŵamkwakwe?

 ⁵ Aganichisye ya chisyasyo cha Dan juŵatumichile mpela jwakulolela dela kwa yaka 23. Ali akwanisye yaka 70, jwalakwe ni ŵamkwakwe ŵasalilidwe kuti akatendeje upayiniya wapajika. Ana jemanjaji ŵatesile uli kuti awunonyeleje utumiki wasambanowu? Dan jwasasile kuti apano ni pakutenda yejinji kulekangana ni kalakose. Jwalakwe akusatumichila chenene pa maudindo gakwe ga mumpingo. Akusakamuchisyasoni ŵachinyamata kuti aŵajilwe kuŵa ŵakutumichila ŵakamuchisya, soni kwakamuchisya ŵane kuti alalichileje mmalo gakusimanikwa ŵandu ŵajinji ni kundende. Jemanja ŵachikulile, chinga akutenda utumiki wandaŵi syosope kapena iyayi, mpaka atende yejinji mwakwakamuchisya ŵane. Akusosekwa kwitichisya mwayiŵelele yindu paumi wawo, kuliŵichila yakulinga soni kuganichisyaga mnope yindu yampaka akombole kutenda, mmalo mwakuganichisya yanganaŵa ayikombwele.

6. Ligongo chichi kulinandiya kuli kwakusosekwa mnope? Apeleche chisyasyo.

⁶ Mundu jwakulinandiya akusamanyililaga yindu yanganaŵa akombwele kutenda. (Mis. 11:2) Kulinandiya kukusamtendekasya mundu kuti akaganichisyaga mnope ya yindu yanganaŵa akombwele kutenda. Yeleyi yikusamtendekasya jwalakwe kukamula masengo mwakulimbichila soni akusaŵa jwakusangalala. Munduju mpaka tumlandanye ni dalayifa jwakwendesya galimoto pachikwesya. Jwalakwe akusasosekwa “kuchenga magiya kuti ajendeje panandipanandi” pakukwela chikwesyacho. Yili yisyene kuti galimotojo ngajiwutukaga mnope, nambo ngani jili jakuti bola jikwenda. Mwakulandana ni yeleyi, mundu jwakulinandiya akusasosekwa kumanyilila ndaŵi jakuti “aŵiche giya jakwendela panandipanandi” ni chakulinga chakuti akombole kupitilisya kumtumichila Yehofa.—Afil. 4:5.

7. Ana Balisilayi jwalosisye chamtuli kuti jwaliji jwakulinandiya?

⁷ Aganichisye ya Balisilayi, juŵakwete yaka 80 pandaŵi jele Mwenye Daudi ŵamŵilasile kuti akatumichile ku nyumba ja mwenye. Ligongo lyakuti Balisilayi jwamanyililaga yindu yanganaŵa akombwele kutenda ligongo lya uchekulu, jwasasile kuti mpaka yiŵe chenene kuti Chimamu juŵaliji jwachinyamata ajawule mmalo mwa jwalakwe. (2 Sam. 19:35-37) Mwakulandana ni Balisilayi, nombe nawo abale ŵachikulile akusaŵa ŵakusangalala kwapa upile ŵachinyamata kuti atumichileje.

8. Ana Mwenye Daudi jwalosisye chamtuli kulinandiya pandaŵi jiŵasakaga kutaŵa nyumba ja Mlungu?

⁸ Nombe Mwenye Daudi ali chisyasyo chambone pangani ja kulinandiya. Jwalakwe jwasakaga ni mtima wosope kuti ataŵe nyumba ja Yehofa. Nambo Yehofa paŵasasile kuti Solomoni ni juchachitaŵa nyumbajo, Daudi ŵakamulene nayo soni ŵakamuchisye pa masengogo ni mtima wosope. (1 Mbi. 17:4; 22:5) Daudi nganaganisya kuti jwalakwe ni jwakuŵajilwa kukamula masengo pakuyiwona kuti Solomoni ŵaliji “jwamnandi soni jwangamanyilila yejinji.” (1 Mbi. 29:1) Daudi jwamanyililaga kuti masengo gakutaŵaga mpaka gajende chenene naga Yehofa akugalongolela, ngaŵa ligongo lya yaka kapena lunda lwa ŵandu ŵakukamula masengogo. Mpela Daudi, masiku aganosoni abale ŵachikulile akusapitilisya kumtumichila Yehofa mwakulupichika atamose utumiki wawo pawuchenjile. Akusamanyililasoni kuti Yehofa akusiŵapa upile ŵachinyamata pakukamula masengo gaŵatendaga jemanjajo pandanda.

9. Ana m’bale jwine jwakutumichila mu Komiti ja Nyambi jwalosisye chamtuli kulinandiya?

⁹ M’bale Shigeo ali chisyasyo chambone pangani ja kuŵa ŵakulinandiya. Mu 1976, m’baleju ali akwete yaka 30, ŵamsagwile kuti atumichileje mu Komiti ja Nyambi. Kaneko mu 2004, ŵamsagwile kuti aŵe jwakulondesya masengo mu Komiti ja Nyambi. Nambo kaneko pali papitile  yaka, jwayiweni kuti machili gatandite kunandipa soni kuti nganaŵa akombwele kutenda yejinji. Ali apopesile kwa Yehofa, jwaganichisye umbone wampaka upagwe naga masengo gaŵakamulagago akumpa m’bale jwachinyamata. Atamose kuti apano nganaŵa jwakulondesya masengogo, nambope akusatumichila mwakamulana ni achimjakwe ŵa mu Komiti ja Nyambi. Mpela mwatuyiwonele mu chisyasyo cha Balisilayi, Mwenye Daudi soni M’bale Shigeo, yikulosya kuti mundu jwakulinandiya akusaganichisyaga ya yindu yakuyimanyilila kala ŵachinyamata, mmalo mwakwawona kuti ali ŵangamanyilila yejinji. Ngakusatenda mpikisano ni ŵachinyamataŵa, nambo akusiŵawona kuti ali ŵamasengo achimjawo.—Mis. 20:29.

10. Ana ŵachikulile akusiŵawona chamtuli ŵachinyamata ŵali mumpingo mwawo?

¹⁰ Ŵachikulile akusasangalala mnope pakwawona ŵachinyamata kuti ali mtuka wakutyochela kwa Yehofa. Ŵachikulileŵa machili gawo pagakumala, akusasangalala mnope pakwawona ŵachinyamata ali mkulosya kuti akusachilila kukamula masengo gakuwukamuchisya mpingo.

11. Ana pa Lute 4:13-16, pakusalosya chamtuli umbone wakupochela chikamuchisyo kutyochela kwa ŵachinyamata?

¹¹ Naomi jwakusamkolanga m’Baibulo, ali chisyasyo chambone cha mundu jwachikulile juŵalosisye kuyamichila chikamuchisyo chakutyochela kwa jwachinyamata. Pandanda, Naomi ŵamsalile Lute juŵaliji akwegwe ŵakwe kuti akamkuya paŵawujilaga kumangwakwe. Nambope Lute jwakanile yakuti alekangane, mwamti ŵaliji yimpepe pakwawula ku Betelehemu. Naomi jwasangalalaga ni yaŵatendaga Lute pakumkamuchisya. (Lut. 1:7, 8, 18) Kusala yisyene, achakongwe ŵaŵiliŵa ŵakamusyanaga mnope. (Aŵalanje Lute 4:13-16.) Kulinandiya mpaka kwatendekasye ŵachikulile kusyasya chisyasyo cha Naomi.

12. Ana ndumetume Paulo jwalosisye chamtuli mtima wakuyamichila?

 ¹² Ndumetume Paulo jwayamichilaga mnope yaŵatendaga ŵane pakumkamuchisya. Mwachisyasyo, jwayamichile Aklistu ŵa ku Filipi pa yindu yiŵampele. (Afil. 4:16) Jwayamichilesoni yaŵatesile Timoteyo pakumkamuchisya. (Afil. 2:19-22) Jwalakwe ŵamyamichilesoni Mlungu ligongo lya ŵandu ŵaŵayiche kukumlimbikasya pandaŵi jiŵamtumisyaga ku Loma mpela mkayidi. (Mase. 28:15) Paulo jwaliji mundu jwamachili juŵajesile maulendo gelewu kukulalichila soni kukujilimbikasya mipingo. Nambotu yeleyi nganiyimtendekasya jwalakwe kuŵa jwakunyada ni ngakunda kuti abale ni alongo amkamuchisye.

13. Ana ŵachikulile mpaka alosye chamtuli kwayamichila ŵachinyamata?

¹³ Ŵachikulile mpaka alosye kwayamichila ŵachinyamata ŵamumpingo mwawo m’matala gejinji. Naga ŵachinyamata akusaka kuti ŵakamuchisye pakajende, kusuma yindu kapena kupata yindu yine yakusosekwa, akakanaga yakusaka kwatendelayo. Yakutenda ŵachinyamatawo ayiwoneje kuti chili chinonyelo cha Yehofa. Naga akukunda kuti ŵachinyamata ŵakamuchisyeje, jemanjajo chachiŵa achimjawo ŵapamtima. Ndaŵi syosope ŵakamuchisyeje ŵachinyamataŵa kuti aŵe paunasi wambone ni Yehofa. Nambosoni ŵasalileje kuti akusangalala mnope pakwawona ali mkukamuchisya mumpingo. Apatejesoni ndaŵi jakwasalila ŵachinyamataŵa yindu yakusangalasya yasimene nayo paumi wawo. Pakutenda yeleyi chachilosya “kutogolela” kapena kuti kumyamichila Yehofa ligongo lyakwapa ŵachinyamata ŵali mumpingo mwawo.—Akolo. 3:15; Yoh. 6:44; 1 Ates. 5:18.

14. Ana Mwenye Daudi jwalosisye chamtuli koloŵa magasa?

¹⁴ Yaŵatesile Mwenye Daudi mpaka yakamuchisye ŵachikulile kumanyilila kusosekwa kwakuŵa ŵakoloŵa magasa. Jwalakwe jwapeleche chipanje chakwe pakukamuchisya kutaŵa nyumba ja Mlungu. (1 Mbi. 22:11-16; 29:3, 4) Daudi jwatesile yeleyi atamose jwamanyililaga kuti Solomoni juŵaliji mwanache jwakwe ni jutachimanyika kuti jwataŵile nyumbajo. Ndaŵi sine mpaka yisimanikwe kuti nganitukola machili gakamuchisya pamasengo ga yakutaŵataŵa. Nambope mpaka tukamuchisye mwakupeleka mbiya syetu mwampaka tukombolele. Nambosoni mpaka twakamuchisye ŵachinyamata mwakwasalila yindu yatukumanyilila yatuŵele tuli mkulijiganya kwa yaka yejinji.

15. Ana ndumetume Paulo ŵamkamuchisye Timoteyo m’matala gapi?

¹⁵ Aganichisyesoni yaŵatesile ndumetume Paulo pakulosya ndamo ja koloŵa magasa. Jwalakwe ŵamŵendile Timoteyo kuti aŵe yimpepe pamaulendo gakwe ga umishonale. Paulo ŵamsalile Timoteyo yampaka atende pakwiganya soni kulalichila m’matala gakulekanganalekangana. (Mase. 16:1-3) Yaŵalijiganyisye Timoteyo kwa Paulo, yamkamuchisye kuti alalichileje soni kwiganya ngani syambone mwakamula mtima. (1 Akoli. 4:17) Nombe Timoteyo jwajiganyisye ŵane yindu yaŵalijiganyisye kwa Paulo.

16. Ligongo chichi M’bale Shigeo ŵajiganyaga ŵane?

¹⁶ Masiku agano ŵachikulile akusiŵajiganya ŵachinyamata masengo gakusakamula mumpingo. Jemanjaji ŵangajogopa kuti mwine naga akwajiganya ŵane chiyitendekasye kuti asoŵeje yakutenda mumpingo. Mwachisyasyo, kwa yaka yejinji, M’bale Shigeo jwatumkolasile jula ŵajiganyaga ŵachinyamata ŵaŵatumichilaga mu Komiti ja Nyambi. Jwalakwe jwatesile yeleyi, ni chakulinga chakuti masengo gakulalichila gakawujila panyuma m’chilambo chiŵatumichilagacho. Yeleyi yakamuchisye kuti papatikane mundu jwine jwakwinjila mmalo, pandaŵi jiŵalekaga m’baleju udindo wakuŵa jwakulondesya masengo. M’bale Shigeo jwapitilisyepe kwajiganya ŵachinyamata yindu yiŵalijiganyisye mu Komiti ja Nyambi kwa yaka yakupunda 45. Abale  ŵakwete mtima mpela welewu ali ŵakusosekwa mnope m’gulu ja Yehofaji.

17. Mwakamulana ni Luka 6:38, ana ŵachikulile mpaka apeleche yindu yine yapi kwa ŵane?

¹⁷ Jemanja abale ni alongo ŵachikulile mli chisyasyo chambone mnope chakulosya kuti mundu akusaŵa jwakusangalala naga akumtumichila Yehofa mwakulupichika. Chisyasyo chawo chikulosyasoni kuti yindu mpaka yitujendele chenene naga tukusalijiganya mfundo sya m’Baibulo ni kusikuyaga. Jemanja akumanyilila mwayijendeleje yindu munyumamu, soni akuweni kusosekwa kwa kwitichisya yindu payichenjile paumi wawo. Nombe ŵachikulile ŵagambile kubatisidwa kwene mpaka ŵakamuchisye ŵane mmatala gejinji. Mpaka ŵasalile ŵane mwele kulijiganya ya Yehofa kwakamuchisye kuti aŵe ŵakusangalala paumi wawo. Ŵachinyamata mpaka ayamichile mnope kupikana yindu yaŵasimene nayo soni yindu yalijiganyisye. Naga ‘akwapa ŵane’ yindu yakumanyilila, Yehofa chachapasoni upile wekulungwa.—Aŵalanje Luka 6:38.

18. Ana pana umbone wamtuli naga ŵachikulile soni ŵachinyamata akuŵa ŵakamulana?

¹⁸ Naga ŵachikulile akuŵa paunasi wambone ni ŵachinyamata, nikuti jwalijose chachimkamuchisya mjakwe. (Alo. 1:12) Jwalijose akwete chindu chakusosekwa mnope changanakola mjakwe. Ŵachikulile akwete lunda, soni akusamanyilila yindu yejinji yalijiganyisye munyumamu. Pele ŵachinyamata, akwete machili. Yehofa akusasangalala pakwawona ŵachinyamata soni ŵachikulile ali mkukamulila masengo yimpepe soni yikusakamuchisya kwa ŵandu wosope mumpingo.