NGANI JAKULIJIGANYA 39
Yampaka Tutende Jwachinasi Jwetu Palesile Kumtumichila Yehofa
‘Kaŵili kaŵili . . . ŵamdandawulisyaga [Yehofa].’—SAL. 78:40.
NYIMBO NA. 102 “Twakamuchisyeje Ŵanganakola Machili”
YACHITULIJIGANYE *
1. Ana yikusatukwaya chamtuli jwachinasi jwetu pamtyosisye mumpingo?
ANA jwachinasi jwawo pakwete patyosyedwe mumpingo? Yeleyi yikusaŵa yakupweteka mnope. Mlongo Hilda jwatite, “Paŵawile ŵamkwangu tuli tutemi mu ulombela yaka 41 nadandawile, soni nayiweni kuti pangali chindu chakupweteka chakupunda yayatendekweyo. * Nambo paŵamtyosisye mumpingo mwanache jwangu jwamlume ni kwaleka ŵamkwakwe soni ŵanache ŵakwe, pele ni payambwetechesoni mnope mumtima.”
Yehofa akusapikanichisya mwayikusapwetechela naga jwachinasi jwetu alesile kumtumichila jwalakwe (Alole ndime 2-3) *
2-3. Mwakamulana ni Salimo 78:40, 41, ana Yehofa akusapikana wuli mumtima naga mundu jwine alesile kumtumichila?
2 Agambe ganisya yayatite pakumpweteka Yehofa malayika gane gali gamjimuchile ni kutyoka m’liŵasa lyakwe. (Yud. 6) Soni aganisye muyampwetechele Yehofa mumtima paŵaweni Aisalaeli ali mkumjimuchila ndaŵi syejinji. (Aŵalanje Salimo 78:40, 41.) Myoyo akakayichilaga kuti Atati ŵawo ŵakwinani yikusiyapweteka mnope naga jwachinasi jwawo atyosyedwe. Jwalakwe akusamanyilila yayikusati pakwapweteka, mwamti ali jwakoseka kwalimbikasya soni kwakamuchisya m’litala lililyose.
3 Munganiji chitukambilane yatukusosekwa kutenda kuti Yehofa atukamuchisye jwachinasi jwetu pamtyosisye mumpingo. Chitukambilanesoni yampaka tutende pakwakamuchisya ŵane naga jwachinasi jwawo amtyosisye mumpingo. Nambo chandanda kwende tukambilane yindu yine yatukusosekwa kuŵambala kutenda.
AKALIJIMBAGA MAGAMBO
4. Ana achinangolo ŵajinji akusapikana wuli mumtima naga mwanache jwawo alesile kumtumichila Yehofa?
4 Naga mwanache alesile kumtumichila Yehofa, ndaŵi syejinji achinangolo akusaganichisyaga yakatesile pakumkamuchisya mwanache jwawojo kuti apitilisye kumtumichila Yehofa. Panyuma pakuti mwanache jwawo jwamlume amtyosisye mumpingo, M’bale Luke jwasasile kuti, “Nalijimbaga magambo, mwamti ndaŵi sine mtima wambwetekaga, kutamila kulila soni pane kusagamila yakogoya.” Mlongo Elizabeth jwelesoni mwanache jwakwe jwamlume ŵamtyosisye mumpingo jwasasile kuti, “Komboleka yipali yanalemwisye. Nalipikanaga kuti nganindenda yejinji pakumjiganya mwanache jwangu kuti amnonyeleje Yehofa.”
5. Ana akusosekwa kulijimba magambo mundu jwine palesile kumtumichila Yehofa?
5 Tukumbuchileje kuti Yehofa ŵampele jwalijose ufulu wakusagula yakutenda. Yeleyi yikugopolela kuti mpaka tusagule kumpikanila Yehofa kapena iyayi. Achinangolo ŵane nganaŵa yisyasyo yambone. Nambope ŵanache ŵawo akusasagula kumtumichila Yehofa soni kuŵa ŵakulupichika kwa jwalakwe. Achinangolo ŵane ŵaŵajiganyisye ŵanache ŵawo kuti amnonyeleje Yehofa, yikusasimanikwa kuti ŵanachewo pakusile akusaleka kumtumichila Yehofa. Nambotu jwalijose akusasosekwa kusagula jika naga akusaka kumtumichila Yehofa. (Yos. 24:15) Myoyo, achinangolo ŵakusadandawula ligongo lyakuti ŵanache ŵawo ŵalesile kumtumichila Yehofa, akaganisyaga kuti jemanjajo ni ŵatendekasisye kuti yeleyo yitendekwe.
6. Ana ŵanache yikusiyakwaya chamtuli naga achinangolo ŵawo alesile kumtumichila Yehofa?
6 Ndaŵi sine jwamlume kapena jwamkongwe mpaka aleche usyesyene soni kuleka liŵasa lyakwe. (Sal. 27:10) Yeleyitu mpaka yiŵe yakupweteka mnope naga ŵanache akusiŵawona achinangolo ŵawowo kuŵa chisyasyo chawo. Esther jwele babagwe ŵatyosisye mumpingo, jwasasile kuti, “Ndaŵi syejinji nalilaga ligongo namanyililaga kuti babaŵa ngaŵa kuti agambile kutyoka mu usyesyene, nambo mwamele ŵasagwile kuti aleche kumtumichila Yehofa. Nanonyelaga mnope baba ŵangu, mwamti paŵatyosisye mumpingo nadandawulaga mnope soni nalagaga nganisyo.”
7. Ana Yehofa akusapikana wuli pakwamba ya ŵanache ŵele achinangolo ŵawo ŵatyosisye mumpingo?
7 Naga nangolo amtyosisye mumpingo yikusaŵa yakupweteka mnope kwa ŵanache. Nambo ŵanachemwe mmanyilileje kuti Yehofa yikusampwetekasoni mnope. Jwalakwe akusamnonyela soni akusaŵa jwakusangalala pakumwona mli mkumtumichila mwakulupichika. Nombe abale ni alongo mumpingo akusamnonyela mnope. Mkumbuchilejesoni kuti jemanja nganimkola udindo wakwasagulila yakutenda achinangolo ŵenu. Mpela mwatuŵechetele kundanda kula, Yehofa jwapeleche ufulu kwa jwalijose wakusagula kumtumichila kapena iyayi. Myoyo mundu jwalijose juŵalipeleche soni kubatisidwa “akwenela kulitwichilila msyene” katundu jwakwe.—Agal. 6:5.
8. Ana liŵasa lyakulupichika likusosekwa kutenda chichi pakwembecheya kuti jwachinasi jwawo awujile kwa Yehofa? (Alole libokosi lyakuti “ Awujile kwa Yehofa.”)
8 Naga mundu jwine jwakusamnonyela alesile kumtumichila Yehofa, akoleje chembecheyo chakuti lisiku line chachiwujilasoni kwa jwalakwe. Ana akusosekwa kutenda chichi pandaŵi jakwembecheya kuti munduju awujile kwa Yehofa? Akusosekwa kupitilisya kuŵa paunasi wambone ni Yehofa. Naga akutenda yeleyi yichakamuchisya mnope ŵachinasi ŵawo atamose mundu jwamtyosisyejo. Nambosoni chachipata machili gakwakamuchisya kuti akombole kupilila. Kwende tukambilane yindu yine yakusosekwa kutenda kuti apitilisye kuŵa paunasi wambone ni Yehofa.
YAMPAKA ATENDE KUTI ALIMBISYE CHIKULUPI CHAWO
9. Ana akusosekwa kutenda chichi kuti aŵe paunasi wambone ni Yehofa? (Alole libokosi lyakuti “ Malemba Gakulimbikasya Naga Jwachinasi Jwawo Alesile Kumtumichila Yehofa.”)
9 Atendeje yakuti apitilisye kuŵa paunasi wambone ni Mlungu. Mpaka yiŵe yakamuchisya mnope naga akulimbisya chikulupi chawo soni kwalimbikasya ŵachinasi ŵawo. Ana mpaka atende chamtuli yeleyi? Kuti Yehofa ŵalimbikasye akusosekwa kuŵalangaga Baibulo ndaŵi syosope, ni kuganichisyaga yaŵalasileyo soni kusimanikwa pa misongano ja mpingo. Joanna jwele babagwe soni mchemwaligwe ŵatyosyedwe mumpingo jwaŵechete kuti, “Mtima wangu ukusatama mmalo pambalasile ya ŵandu ŵakusiŵakolanga m’Baibulo mpela Abigelo, Esitele, Yobu, Yosefe soni Yesu. Yisyasyo yawo yikusalimbikasya mnope soni kungamuchisya kuti ngoleje nganisyo syambone. Nombe nyimbo syetu singamuchisye mnope.”
10. Ana lilemba lya Salimo 32:6-8, likusatukamuchisya chamtuli kupilila yakusawusya?
10 Amsalileje Yehofa yindu yiliyose yayikwatendekasya kuti adandawuleje. Naga akudandawula ni yindu yine yakwe akasaleka kupopela kwa Yehofa. Amŵendeje Mlungu kuti ŵakamuchisye kuyiwona yindu mpela mwakusayiwonela jwalakwe. Soni kuti ‘ŵamanyisye ni kwajiganya litala lyakuŵajilwa kwendamo.’ (Aŵalanje Salimo 32:6-8.) Yisyene kuti yikusaŵa yakusawusya kuti amsalile Yehofa mwakupikanila. Nambo jwalakwe akusamanyilila mwakupikanila mumtima. Jwalakwe akusiŵanonyela mnope nambosoni akusiŵalimbikasya kuti amsalileje yindu yosope yakudandawula.—Eks. 34:6; Sal 62:7, 8.
11. Mwakamulana ni Ahebeli 12:11, ligongo chichi tukusosekwa kuchimbichisya chilango chakusapeleka Yehofa mwachinonyelo? (Alolesoni libokosi lyakuti “ Kumtyosya Mundu Mumpingo Kukusalosya Kuti Yehofa Akusatunonyela.”)
11 Akamulaneje ni yasagwile achakulungwa ŵa mumpingo. Kumtyosya mundu mumpingo jili dongosolo jiŵaŵisile Yehofa. Naga mundu jwangapitikuka mtima atyosyedwe yikusamkamuchisya jwalakwejo soni ŵandu ŵane. (Aŵalanje Ahebeli 12:11.) Mundu jwine pamtyosisye, ŵandu ŵane mpaka amŵichileje kunyuma kapena kuŵechetaga kuti achakulungwa nganatenda chenene pakumtyosya. Nambo akumbuchileje kuti ngakumanyilila ngani josopejo. Soni yampaka aŵecheteyo nganiyiŵa yimkamuchisye jwamtyosisye mumpingojo. Myoyo tukusosekwa kwakulupilila achakulungwa ŵaŵaliji mu komiti jakwelusya. Ligongo jemanjaji akusakamulichisya masengo yajikusasala Baibulo kuti alamule mmalo mwa “AMBUJE.”—2 Mbi. 19:6.
12. Ana ŵane apatile maumbone gamtuli ligongo lyakamulana ni chamuko chakusapeleka Yehofa mwakumtyosya mundu mumpingo?
12 Naga akukamulana soni kuchimbichisya yasagwile achakulungwa ŵamumpingo mwakumtyosya jwachinasi jwawo, yichikamuchisya kuti mundujo awujile kwa Yehofa. Mlongo Elizabeth jwatumkolasile kundanda kula jwasasile kuti, “Yaliji yakusawusya kuleka kunguluka soni kutendela yindu yimpepe ni mwanache jwangu jwamlume juŵamtyosisye mumpingo. Nambo ali awujile kwa Yehofa jwalakwe jwayamichile kuti ŵatesile chenene kumtyosya mumpingo. Kaneko jwasalaga yindu yejinji yaŵalijiganyisye pandaŵi jiŵaliji kusa kwa gulu. Yeleyi yangamuchisye kumanyilila kuti chamuko chakusapeleka Yehofa chikusaŵa chambone mnope.” Nombe ŵamkwakwe mlongoju ŵatite, “Mwanache jwetuju ŵasalile kuti jwakumbilaga kuwujila kwa Yehofa ligongo lyakuti twalesile kutenda najo chine chilichose. Ngusangalala mnope kuti Yehofa ŵatukamuchisye kuŵa ŵakupikanila.”
13. Ana chichi champaka chakamuchisye kuti amalane ni kulagasika nganisyo?
13 Ŵasalileje mwakupikanila mumtima ŵandu ŵampaka ŵapikanichisye. Akungulucheje ni Aklistu ŵakomangale mwausimu ŵampaka ŵakamuchisye kola nganisyo syambone. (Mis. 12:25; 17:17) Joanna jwatumkolasile kundanda kula jwasasile kuti, “Nalipikanaga kuti ndili jika, nambo kunguluka ni achimjangu ŵakulupichika kwangamuchisye kuti malane ni nganisyo syelesi.” Ana mpaka atende uli naga ŵane mumpingo akuŵecheta yindu yangalimbikasya?
14. Ligongo chichi tukusosekwa ‘kutendelana chanasa soni kululuchilana jwine ni mjakwe’?
14 Atendeje yindu mwakuwusimana mtima ni abale ni alongo. Tukajembecheyaga kuti mundu jwalijose chaŵecheteje yindu yakutusangalasya. (Yak. 3:2) Wosopewe tuli ŵangali umlama, myoyo tukasimongaga naga jwine aŵechete kapena kutenda yindu yakutukuŵasya. Tukumbuchileje yaŵasasile Paulo. Paja jwalakwe jwatite, “Mtendelaneje chanasa nipo mkululuchilaneje jwine ni mjakwe naga jwine amlemwechesye mjakwe.” (Akolo. 3:13) Mlongo jwine jwele jwachinasi jwakwe jwatyosyedwe mumpingo jwatite, “Yehofa angamuchisye kuti nakululuchileje abale ni alongo ŵakusasaka kuti alimbikasye nambo nikusimanikwa kuti alemwechesye mwangamanyilila.” Ana mpingo mpaka utende chichi pakwakamuchisya ŵa m’liŵasa lya mundu jwamtyosisye mumpingo?
YAMPAKA UTENDE MPINGO PAKAMUCHISYA
15. Ana chichi champaka chakamuchisye ŵandu ŵele jwachinasi jwawo jwatyosyedwe mumpingo?
15 Ŵanonyeleje soni kwatendela yambone ŵandu ŵa m’liŵasa lya mundu juŵamtyosisye mumpingo. Mlongo Miriam jwayiwonaga kuŵa yakusawusya kuti ajawule kumisongano mlumbugwe paŵamtyosisye mumpingo. Jwalakwe jwatite, “Natendaga sooni ni yampaka akaŵechete ŵandu. Nambo abale ni alongo ŵajinji yakwayiye yayatendekweyi. Soni jemanjaji nganaŵechetaga yindu yakusakala yakwamba mlumbugwangu jwaŵamtyosisye mumpingojo. Ngusinayamichila mnope jemanjaji ligongo lyakuti nganandeka jika pandaŵi jakusawusyaji.” Nombe mlongo jwine jwasasile kuti, “Mwanache jwetu jwamlume paŵamtyosisye mumpingo, achimjetu ŵayiche kukutulimbikasya. Ŵane ŵatiga ngakumanyilila yampaka aŵechete. Pele ŵane ŵalilaga yimpepe ni une, ŵane ŵanembelaga yikalata. Kusala yisyene yaŵatesile jemanjaji yangamuchisye mnope.”
Abale ni alongo mpaka alosye chinonyelo mwakwakamuchisya ŵandu ŵele jwachinasi jwawo amtyosisye mumpingo (Alole ndime 17) *
16. Ana mpingo mpaka utende uli pakusaka kwakamuchisya soni kwalimbikasya ŵandu ŵele jwachinasi jwawo amtyosisye mumpingo?
16 Apitilisyeje kwakamuchisya ŵandu ŵa m’liŵasa lyele mundu jwine ŵamtyosisye mumpingo. Mnopemnope pandaŵi jakusawusyaji ni pakusasosekwa kwanonyela soni kwalimbikasya ŵandu ŵeleŵa. (Aheb. 10:24, 25) Ndaŵi sine, ŵachinasi ŵa mundu jwamtyosisye mumpingo akusayiwona kuti ŵandu ŵane ngakwaŵechetekasya mpela kuti nombe nawosoni ŵatyosisye mumpingo. Tukatendaga yakuti jemanjaji alipikaneje myoyo. Ŵachinyamata ŵele achinangolo ŵawo ŵatyosisye mumpingo, akusasosekwa kwayamichila soni kwalimbikasya. Maria jwele ŵamkwakwe ŵatyosisye mumpingo soni ŵatyosile pamlango jwasasile kuti, “Achimjangu ŵane ŵayikaga kunyumba kukundelechela yakulya soni kungamuchisya kutenda kulambila kwa peŵasa. Nombe jemanjaji yapwetekaga mpela muyambwetechelaga unejo. Ŵanjenjelaga ŵandu ŵane paŵaŵechetaga yaunami yakwamba une. Kusala yisyene jemanjaji ŵalimbikasisye mnope.”—Alo. 12:13, 15.
17. Ana achakulungwa ŵamumpingo mpaka ŵalimbikasye chamtuli ŵandu ŵakulagasika nganisyo ligongo lyakuti jwachinasi jwawo ŵamtyosisye mumpingo?
17 Achakulungwa ŵamumpingo akusosekwa kwakamuchisya soni kwalimbikasya ŵandu ŵele jwachinasi jwawo jwatyosyedwe mumpingo. Jemanjaji akwete udindo wakusosekwa mnope wakwalimbikasya ŵandu ŵele jwachinasi jwawo alesile kumtumichila Yehofa. (1 Ates. 5:14) Ŵalimbikasyeje jemanjaji misongano mkanijitande kapena pajimasile. Ŵajendeleje mnyumba syawo soni kupopela nawo yimpepe. Ajendeje nawo pakwawula kukulalichila soni ŵaŵilanjileje kuti chatende nawo yimpepe kulambila kwa peŵasa. Achakulungwa ŵa mumpingo akusosekwa kwasamalila soni kwakamuchisya ŵandu ŵakulagasika nganisyo.—1 Ates. 2:7, 8.
AMDALILEJE YEHOFA NDAŴI SYOSOPE
18. Mwakamulana ni 2 Petulo 3:9, ana Mlungu akusasaka kuti ŵandu ŵatesile chakulemwa atende chichi?
18 Yehofa “ngakusaka kuti ŵane ajonanjidwe, nambo kuti apitikuche mtima.” (Aŵalanje 2 Petulo 3:9.) Atamose mundu ali atesile chakulemwa chekulungwa umi wakwe ukusaŵa ŵakusosekwa mnope kwa Yehofa. Akumbuchileje kuti Yehofa jwapeleche Mwanache jwakwe juŵamnonyelaga mnope kuti atuwombole wosopewe. Jwalakwe akusiŵakamuchisya mwachinonyelo ŵandu ŵaŵalesile kumtumichila kuti awujile kwa jwalakwe. Yehofa akusamanyilila kuti jemanjaji chachisagula kuwujila mpela muyaŵelele ni mwanache jwamsokonechele jwa m’chiwanichisyo chaŵasasile Yesu. (Luk. 15:11-32) Ŵandu ŵajinji ŵaŵalesile kumtumichila Yehofa ŵawujile pali papitile ndaŵi ni kutandilasoni kumtumichila. Soni mpingo wosope wapochele jemanjaji ni magasa gaŵili. Mlongo Elizabeth jwatumkolasile kundanda kula jwasangalele mwanache jwakwe jwamlume pajwawujile mumpingo. Jwalakwe jwatite, “Ngwayamichila mnope ŵandu wosope ŵaŵayikaga kukutulimbikasya.”
19. Ligongo chichi tukusosekwa kupitilisya kumdalila Yehofa?
19 Tukusamdalila mnope Yehofa ligongo yakusatusalila yikusatukamuchisya ndaŵi syosope. Jwalakwe ali jwakoloŵa magasa soni jwambone mtima jwakusiŵanonyela ŵakutumichila ŵakwe wosope. Akakayichilaga yakuti Yehofa ngasiŵaleka pandaŵi jakusimana ni yakusawusya. (Aheb. 13:5, 6) Mark jwatumkolasile kundanda kula jwasasile kuti, “Yehofa nganaŵa atulesile, soni jwalakwe ngakusaŵa kwakutalika ni m’weji pandaŵi jatukusimana ni yakusawusya.” Yehofa chachipitilisya kwapa “machili gekulungwa.” (2 Akoli. 4:7) Kusala yisyene, yili yakomboleka kuŵape ŵakulupichika soni kola chembecheyo atamose jwachinasi jwawo palesile kumtumichila Yehofa.
NYIMBO NA. 44 Lipopelo lya Mundu Jwakulaga
^ ndime 5 Naga mundu jwine alesile kumtumichila Yehofa yikusatukwaya mnope. Munganiji chitukambilane mwakusapikanila Yehofa payitendekwe yeleyi. Chitulijiganye yampaka atende ŵachibale ŵa mundu jwamtyosisye mumpingo kuti akombole kupilila soni kuŵa paunasi wambone ni Yehofa. Chitulolesoni yampaka utende mpingo wosope pakusaka kulilimbikasya soni kulikamuchisya liŵasalyo.
^ ndime 1 Mena gane munganiji tugachenjile.
^ ndime 79 KULONDESYA CHIWULILI: M’bale palesile kumtumichila Yehofa soni kulileka liŵasa lyakwe, ŵamkwakwe pampepe ni ŵanache ŵakwe akudandawula.
^ ndime 81 KULONDESYA CHIWULILI: Achakulungwa ŵa mumpingo ŵaŵili apite kukulilimbikasya liŵasali.
