1. Ana ni yakusawusya yapi yaŵasimene nayo Yowashi, Usiya, soni Yosiya?

 ANA akapikene uli mumtima yikaŵe kuti ŵaŵisile kuŵa mwenye jwa ŵandu ŵa Mlungu nambo ali jwachinandipile? Ana akakamulichisye masengo chamtuli machili soni udindo wawo? Baibulo jikusatusalila ya ŵachinyamata ŵajinji ŵaŵaŵele mamwenye ga ku Yuda. Mwachisyasyo, Yowashi jwaŵele mwenye ali akwete yaka 7. Usiya jwaŵele mwenye ali akwete yaka 16. Nombe Yosiya jwaŵele mwenye ali akwete yaka 8. Ngatukukayichila kuti yaliji yakusawusya kwa jemanjaji kuti akwanilisye udindo wawo. Atamose kuti yaliji myoyo, Yehofa soni ŵandu ŵane ŵakamuchisye jemanjaji kuti akombole kutenda yindu yambone.

2. Ligongo chichi tukusosekwa kuganichisya chisyasyo cha Yowashi, Usiya, soni Yosiya?

² Atamose kuti jemanja ŵachinyamata nganaŵa aŵele mamwenye, nambope mpaka alijiganye yejinji kutyochela kwa Yowashi, Usiya soni Yosiya. Yindu yambone soni yakusakala yaŵatesile jemanjaji mpaka yajiganye yindu yakusosekwa mnope. Yaŵatesile jemanjaji chiyimjiganye jemanja kusosekwa kwakusagula achimjenu ŵambone, kuŵa ŵakulinandiya, nambosoni kusosekwa kwa kumpikanila Yehofa.

3. Ana Mwenye Yowashi jwatesile yamtuli paŵapochelaga malangiso kutyochela kwa Yehoyada?

³ Msaguleje yindu mwalunda mpela muŵatendele Yowashi. Pajwaliji jwachinandipile, Mwenye Yowashi jwasagwile yindu mwalunda. Babagwe Yowashi ŵajasiche jwalakwe ali jwachinandipile, mwamti Yehoyada juŵaliji Jwamkulungwa jwa Ŵakutaga Mbopesi ni juŵamlelite soni kumjiganya yakwamba Yehofa. Yowashi jwaliji jwalunda ligongo lyakuti jwapikanilaga malangiso gaŵampaga Yehoyada. Chisyasyo chambone cha Yehoyada chamkamuchisye Yowashi kutanda kumtumichila Yehofa soni kwakamuchisya ŵane kutenda yakulandanayo. Mwamti Yowashi jwayikene pakulinganyasoni nyumba ja Mlungu.—2 Mbi. 24:​1, 2, 4, 13, 14.

4. Ana tukusapata umbone wamtuli patukupikanila malangiso ga Yehofa? (Misyungu 2:​1, 10-12)

 ⁴ Naga achinangolo ŵenu kapena mundu jwine akumjiganya ni chakulinga chakuti mŵe paunasi wambone ni Yehofa, myiwoneje kuti uli upile wenu wekulungwa. (Aŵalanje Misyungu 2:​1, 10-12.) Pana matala gejinji gampaka akamulichisye masengo achinangolo ŵenu pakumjiganya. Aganichisye yaŵatendaga babagwe ŵa Mlongo Katya pakumkamuchisya kuti asaguleje yindu mwalunda. Lisiku lililyose mkanajawule kusukulu, babagwe mlongoju ŵalolechesyaga kuti akambilene najo lilemba lya lisiku. Mlongoju jwasasile kuti, “Yindu yatwakambilanagayo yangamuchisyaga kuti saguleje yindu mwalunda pasimene ni yakusawusya.” Nambi uli naga achinangolo ŵenu ali ampele malamusi gakamulana ni mfundo sya m’Baibulo gamkugawona kuti gakumtendekasya kuti mkagopokaga? Ana chichi champaka chimkamuchisye kuti mpikanileje malamusigo? Mlongo Anastasia akusakumbuchila kuti achinangolo ŵakwe ŵamsalilaga ligongo lyaŵatamilikachisye malamusi ganegakwe. Jwalakwe jwatite, “Yeleyi yangamuchisyaga kuti mbikanileje malamusi gaŵambaga. Mwamti nganinayiwonaga kuti akwamba kusaka kundekasya kutenda yineyakwe, nambo nayiwonaga kuti ambele malamusigo pakusaka kunjenjela.”

5. Ana yitendo yenu mpaka yakwaye chamtuli achinangolo ŵenu soni Yehofa? (Misyungu 22:6; 23:​15, 24, 25)

⁵ Achinangolo ŵenu chachisangalala mnope pakumwona jemanja mli mkukamulichisya masengo malangiso ga m’Baibulo. Nambo chakusosekwa mnope, chimchimsangalasya Mlungu, mwamti timchiŵa najo paunasi wambone. (Aŵalanje Misyungu 22:6; 23:​15, 24, 25.) Ngatukukayichila kuti kuganichisya yeleyi mpaka kumtendekasye jemanja kujigalila yaŵatesile Yowashi ali jwachinandipile.

6. Ana Yowashi jwatandite kupikanila malangiso ga ŵani? Ana papali yakuyichisya yamtuli? (2 Mbili 24:​17, 18)

⁶ Yampaka mlijiganye kutyochela pa yindu yakulemwecheka yajwatesile Yowashi. Panyuma pakuti Yehoyada ajasiche, Yowashi jwatandite kunguluka ni ŵandu ŵakusakala. (Aŵalanje 2 Mbili 24:​17, 18.) Jwalakwe jwatandite kupikanila malangiso gaŵampaga achimlongola ŵa ku Yuda ŵaŵatendaga yakusakala. Nambotu yaliji yakomboleka kwa Yowashi kwaŵambala jemanjaji ligongo lyakuti ŵatendaga yakusakala. (Mis. 1:10) Nambo mmalo mwakwaŵambala, jwalakwe jwatandite kupikanila malangiso gakusakala gaŵampaga. Konjechesya pelepa, Yowashi ŵamwuleje Sakaliya juŵaliji msuŵani jwakwe. Jwatesile yeleyi ligongo lyakuti Sakaliyajo jwamjamwiche Yowashi pa yakusakala yajwatendaga. (2 Mbi. 24:​20, 21; Mat. 23:35) Kusala yisyene, yajwatesile Yowashiyi kwaliji kupwambwana kwekulungwa. Yowashi jwatandite chenene, nambo chakutesya chanasa jwalakwe jwaŵele jwampatuko soni chigaŵenga. Pambesi pakwe Yowashi jwawulajidwe ni ŵakutumichila ŵakwe. (2 Mbi. 24:​22-25) Kusala yisyene, Yowashi ngamkanasimana ni yeleyi yikaŵe kuti nganaleka kumpikanila Yehofa soni ŵandu ŵaŵakamulichisyaga masengo Yehofajo. Ana yajwatesile Yowashiyi yikumjiganya chichi jemanja?

7. Ana mpaka msagule ŵandu ŵamtuli kuti aŵe achimjenu? (Alole chiwulili.)

 ⁷ Yakulemwecheka yajwatesile Yowashi yitujiganyisye chindu chimo chakusosekwa mnope. Chindu chakwe chili chakuti, tusaguleje achimjetu ŵampaka atulimbikasye kutenda yambone, soni ŵakusamnonyela Yehofa nambosoni ŵakusasaka kumsangalasya. Tulijiganyisyesoni kuti mpaka tukungulucheje ni ŵandu atamose ŵatukulekangana nawo msingu. Pajatu Yowashi jwaliji jwachinandipile mnope kwa Yehoyada juŵaliji mjakwe jwa pamtima. Pakwamba ya ŵandu ŵamkusasagula kuŵa achimjenu mkusosekwa kuliwusyaga kuti, ‘Ana akusangamuchisya kuti namkulupilileje mnope Yehofa? Ana akusanimbikasya kuti mbikanileje malamusi ga Mlungu? Ana akusanonyela kuŵecheta yakwamba Yehofa soni Maloŵe gakwe? Ana akusachimbichisya malamusi ga Mlungu? Ana akusagamba kusalila yindu yakusangalasya, kapena akusaŵa ŵakulimba mtima kunjamuka payikusosechela?’ (Mis. 27:​5, 6, 17) Kusala yisyene, naga achimjenu ngakusamnonyela Yehofa, nikuti nganaŵa amkamuchisye, mwamti mpaka mtende chenene kuleka kunguluka nawo. Nambo naga achimjenuwo akusamnonyela Yehofa, chachimkamuchisya mwamti mkaleka kunguluka nawo.—Mis. 13:20.

8. Naga tukukamulichisya masengo malo gakunguluchila ga pa intaneti, ana tukusosekwa kumbuchilaga chichi?

⁸ Malo gakunguluchila ga pa intaneti lili litala lyambone lyakulumbikanilana ni ŵachinasi ŵetu soni achimjetu. Nambope, ŵandu ŵajinji akusakamulichisya masengo maloga pakusaka kwatendekasya achimjawo kuti ŵakumbileje. Jemanjaji akusaŵika pamalo gakunguluchilaga mafidiyo soni yiwulili ya yindu yasumile kapena yakombwele kutenda. Naga wawojo akusakamulichisya masengo malo gakunguluchila ga pa intaneti aliwusye kuti, ‘Ana chakulinga changu chikusaŵa kwatendekasya ŵane kuti akumbileje? Ana ngusakola chakulinga chakwalimbikasya ŵane kapena ngusagamba kusaka kuti ŵane ayiwoneje kuti yikunjendela chenene? Ana kaganisye kangu, kaŵechete soni katende kangu ka yindu kajigalile mwakusatendela ŵandu ŵakusakamulichisya masengo malo gakunguluchila ga pa intaneti?’ M’bale Nathan Knorr, juŵatumichile mu Likuga Lyakulongolela jwapeleche malangiso gakuyichisyaga: “Akalingaga kutenda yindu yakuti amsangalasye mundu, ligongo naga akutenda yeleyo ngasakombola kumsangalasya atamose mundu jumo. Mmalomwakwe, atendeje yindu yakumsangalasya Yehofa, pelepo chachasangalasya wosope ŵakusamnonyela Yehofajo.”

9. Ana Yehofa ŵamkamuchisye Usiya kuti akombole kutenda chichi? (2 Mbili 26:​1-5)

⁹ Msaguleje yindu mwalunda mpela muŵatendele Usiya. Mwenye Usiya pajwaliji jwachinyamata jwaliji jwakulinandiya. Jwalakwe jwalijiganyisye ‘kumpikanila Mlungu.’ Usiya jwatemi ni umi yaka 68, nambope mbali jekulungwa ja umi wakwe Yehofa ŵampaga upile. (Aŵalanje 2 Mbili 26:​1-5.) Usiya jwajigomeche misinda jejinji ja achimmagongo ŵakwe, soni jwalinganyisye yakuti achimmagongo akakombola kuwugomeka msinda wa Yelusalemu. (2 Mbi. 26:​6-15) Usiya jwayamichilaga mnope yosope yajwatendaga Mlungu pakumkamuchisya.—Jwak. 3:​12, 13.

10. Ana yindu yammalile uli Usiya?

¹⁰ Yampaka alijiganye kutyochela ku yindu yakulemwecheka yajwatesile Usiya. Mwenye Usiya jwakwete udindo wakwasalila ŵane yakutenda. Komboleka yeleyi yamtendekasisye mwenyeju kuganisya kuti mpaka atende yiliyose yakusaka. Lisiku line Usiya jwajinjile m’nyumba ja Yehofa, mwamti ligongo lya kunyada jwatandite kocha ubani pamalo gakupelechela mbopesi, yindu yele mamwenye nganigakundidwaga kutenda. (2 Mbi. 26:​16-18) Asaliya juŵaliji Jwamkulungwa jwa Ŵakutaga Mbopesi pajwalinjile kumjamuka, mwenyeju jwatumbile mnope. Chakutesya chanasa chaliji chakuti Usiya nganapitilisya kuŵa jwakulupichika, mwamti Yehofa ŵampele chilango mwakumtendekasya kuŵa jwamatana. (2 Mbi. 26:​19-21) Kusala yisyene, yindu yikamjendele chenene Usiya yikaŵe kuti jwapitilisye kuŵa jwakulinandiya.

11. Ana ni yitendo yapi yampaka yilosye kuti tuli ŵakulinandiya? (Alole chiwulili.)

¹¹ Usiya pajwaŵele jwamachili mnope, jwaliŵalile kuti Yehofa ni juŵamkamuchisyaga kuti yindu yimjendeleje chenene. Ana tukulijiganya chichi pelepa? Ndaŵi syosope tukumbuchileje kuti Yehofa ni jwakusatupa yindu yosope yambone soni utumiki watukusatendaga. Myoyo, mmalo mwakulilapilila pa yindu  yatukombwele kutenda, tukusosekwa kupelekaga uchimbichimbi wosope kwa Yehofa. b (1 Akoli. 4:7) Mwakulinandiya tukumbuchileje kuti tuli ŵangali umlama mwamti tukusasosekwa ŵane kutujamuka. M’bale jwine jwakwete yaka ya mma 60 jwalembile kuti, “Nalijiganyisye kuti ngangusosekwa kutumbila kapena kutenguka ŵane pasalile yakulepela yangu. Ŵane panjamwiche ligongo lyakutenda yindu mwakupwambwana, ngusagamba kongolela yinduyo ni kupitilisya kumtumichila Yehofa.” Kusala yisyene, patukupitilisya kumpikanila Yehofa soni kuŵa ŵakulinandiya tukusakola umi wakusangalala.—Mis. 22:4.

12. Ana Yosiya jwalosisye chamtuli kumsosasosa Yehofa pajwaliji jwachinyamata? (2 Mbili 34:​1-3)

¹² Msaguleje yindu mwalunda mpela muŵatendele Yosiya. Yosiya jwatandite kumsosasosa Yehofa ali jwachinyamata. Jwalakwe jwasakaga kulijiganya yejinji yakwamba Yehofa soni kutenda yakusasaka jwalakwe. Nambope mwenye jwachinyamataju jwasimene ni yakusawusya paumi wakwe. Pandaŵi jelejo ŵandu ŵajinji ŵatumichilaga milungu jaunami. Myoyo, Yosiya jwasosekwaga kutenda yindu mwakulimba mtima kuti akombole kwalekasya jemanjajo kutumichila milungu jaunamijo. Mwamti mwakulimba mtima jwakombwele kutenda yeleyo. Yosiya mkanaŵe kwanisya yaka 20, jwaliji ali atandite kutyosya milungu jaunami jaŵajitumichilaga ŵandu pandaŵijo.—Aŵalanje 2 Mbili 34:​1-3.

13. Ana kulipeleka kwa Yehofa kukusagopolela chichi paumi wenu?

¹³ Atamose kuti mli jwachinandipile, mpaka mtende chenene kumsyasya Yosiya mwakulijiganya yejinji yakwamba Yehofa soni ndamo syakwe. Naga mkutenda yeleyi chimchikola mtima wakusaka kulipeleka kwa jwalakwe. Ana kulipelekaku kuchikwaya chamtuli umi wenu? M’bale Luke juŵabatisidwe ali akwete yaka 14 jwatite, “Kutandila pelepa, chimbicheje kumtumichila Yehofa pamalo gandanda paumi wangu soni chilinjejelinjeje kutenda yindu yakumsangalasya jwalakwe.” (Maliko 12:30) Kusala yisyene, nombe jemanja chimchipata upile wekulungwa naga mkutenda yakulandanayi.

14. Asale yatesile ŵachinyamata ŵane pakumsyasya Mwenye Yosiya.

¹⁴ Ana jwakutumichila jwa Yehofa jwachinyamata mpaka asimane ni yakusawusya mpela yapi? M’bale Johan juŵabatisidwe ali akwete yaka 12 jwasasile  kuti achimjakwe ŵa mkalasi ŵamkanganichisyaga kuti akwembeje soona pakamulichisya masengo machini ganegakwe. Kuti aŵambale kutenda yeleyi, jwalakwe jwakumbuchile kuti kukwemba soona mpaka kujonanje umi wakwe soni unasi wakwe ni Yehofa. Nombe Mlongo Rachel juŵabatisidwe ali akwete yaka 14 jwasasile yayikusamkamuchisya kuti akombole kupilila pakumlagasya achimjakwe ŵakusukulu. Jwalakwe jwatite, “Ngusalinga kuganichisya yajikusasala Baibulo soni yakwamba Yehofa. Mwachisyasyo, patukulijiganya ya mbili jakala ngusaganichisyaga ngani jinejakwe ja m’Baibulo kapena yakulochesya. Nambosoni panguŵechetana ni mundu jwine pandili ku sukulu, ngusaganichisyaga ya lilemba lyampaka ngambilane najo.” Yisyene kuti yakusawusya yampaka msimane nayo mpaka yilekangane ni yajwasimene nayo Mwenye Yosiya. Nambope mpaka mŵe ŵalunda soni ŵakulupichika mpela jwalakwejo. Pamkulimbana ni yakusawusya yeleyi pamli jwachinyamata, mpaka yimkamuchisye kukosechela yakusawusya yachimchisimana nayo kusogoloku.

15. Ana chichi chachamkamuchisye Yosiya kuti amtumichileje Yehofa mwakulupichika? (2 Mbili 34:​14, 18-21)

¹⁵ Mwenye Yosiya ali akwete yaka 26 jwatandite kukamula masengo gakulinganya nyumba ja Mlungu. Paŵakamulaga masengoga, ŵajisimene “buku ja Malamusi giŵapeleche AMBUJE Mlungu kwa Mose.” Mwenye Yosiya pajwapikene yayalembedwe m’bukujo, mwachitema jwapikanile ni kutenda yindu mwakamulana ni yayalembedweyo. (Aŵalanje 2 Mbili 34:​14, 18-21.) Ana mkusanonyela kuŵalanga Baibulo ndaŵi syosope? Naga mwatandite kala kuŵalanga Baibulo lisiku lililyose, ana mkusasangalala pamkujiŵalanga? Ana mkusasunjila Malemba gampaka gamkamuchisye paumi wenu? M’bale Luke jwatumkolasile jula, akusalemba panepakwe mfundo syasimsangalesye pakuŵalanga Baibulo. Kutenda yeleyi mpaka kumkamuchisye kuti mkumbuchileje yindu yamlijiganyisye. Pamkujimanyilila chenene soni kujinonyela Baibulo ni pachimchikola mtima wakusaka kumtumichila Yehofa. Mwamti mpela muŵatendele Mwenye Yosiya, nombe jemanja pamkuŵalanga Baibulo chimchitenda yindu yakamulana ni yamŵalasileyo.

16. Ligongo chichi Yosiya jwatesile chakulemwa chekulungwa? Ana tukulijiganya chichi pelepa?

¹⁶ Yampaka alijiganye kutyochela ku yindu yakulemwecheka yajwatesile Yosiya. Yosiya ali akwete yaka chiŵandika 39 jwatesile chindu chakulemwecheka chachatendekasisye kuti awe. Jwalakwe jwatesile yindu  mwakulidalila mmalo mwakuŵenda lunda kwa Yehofa. (2 Mbi. 35:​20-25) Ana tukulijiganya chichi pelepa? Mwangasamala kandu ya yaka yatukwete kapena ulewu wa ndaŵi jatuŵele tuli mkulijiganya Baibulo, tukusosekwa kupitilisya kumsosasosa Yehofa. Yeleyi yikupwatikapo kupopelaga ndaŵi syosope, kulijiganya Maloŵe gakwe, nambosoni kukamulichisyaga masengo malangiso gampaka atupe Aklistu ŵakumanyilila yejinji. Yeleyi yichitukamuchisya kuti tuŵambaleje kutenda yakulemwa yekulungwakulungwa mwamti tuchiŵa ŵakusangalala.—Yak. 1:25.

17. Ana tulijiganyisye chichi kutyochela kwa mamwenye gatatu gagalamulile ku Yuda?

¹⁷ Kusala yisyene pana yakusangalasya yejinji yampaka mtende pamli ŵachinyamata. Ngani ja Yowashi, Usiya nambosoni Yosiya jilosisye kuti ŵachinyamata mpaka msagule yindu mwalunda nikutendaga yindu yakumsangalasya Yehofa. Yisyene kuti mamwenye gachinyamataga galemwesyaga pa yindu yine. Nambope naga jemanja ŵachinyamata mkusyasya yambone yaŵatesile jemanjajo mpaka mkole umi wambone.

18. Ana ni yisyasyo yapi yayikusimanikwa m’Baibulo yayikulosya kuti yindu mpaka yajendele chenene paumi wawo? (Alole chiwulili.)

¹⁸ Baibulo jikwete ngani sya ŵachinyamata ŵane ŵaŵaliji paunasi wambone ni Yehofa. Mwamti Mlungu ŵanonyelaga jemanjaji soni yindu yajendelaga chenene paumi wawo. Daudi jwaliji jumo mwa jemanjaji. Pajwaliji jwachinyamata, Daudi jwasagwile kumtumichila Mlungu mwamti kaneko jwaŵele mwenye jwakulupichika. Yisyene kuti ndaŵi sine jwalakwe jwalemwesyaga pa yindu yine, nambo Mlungu jwamwonaga jwalakwe kuŵa mundu jwakulupichika. (1 Ayi. 3:6; 9:​4, 5; 14:8) Naga mkulijiganya ngani ja Daudi soni chisyasyo chakwe mpaka yimlimbikasye kuti mtumichileje Yehofa mwakulupichika. Mpaka mlinganyesoni yakulijiganya ngani jakwamba Maliko kapena Timoteyo. Jemanjaji ŵatandite kumtumichila Yehofa ali ŵachinyamata soni ŵapitilisye kumtumichila mwakulupichika. Yehofa jwasangalele ni utumiki wa jemanjaji soni jemanjaji ŵaliji ŵakusangalala.

19. Ana mpaka mtende uli kuti yindu yimjendeleje chenene paumi wenu?

¹⁹ Yamkutenda pakamulichisya masengo umi wenu apano yichimlongolela ku yindu yachimchitenda kusogolo. Naga mkumdalila Yehofa mmalo mwakulidalila, jwalakwe chachimkamuchisya kuti msaguleje yindu mwalunda. (Mis. 20:24) Mpaka mŵe ŵakusangalala apano soni yindu mpaka yimjendeleje chenene naga mkusagula kumtumichila Yehofa. Mkumbuchileje kuti Yehofa akusayamichila mnope yindu yiliyose yamkusatendaga pakumtumichila. Kusala yisyene, kumtumichila Yehofa chili chindu chambone mnope champaka msagule kutenda paumi wenu.