1-2. Ligongo chichi ngani ja Samusoni jili jakamuchisya kwa m’weji?

 ANA munganisyo mwawo mukusayika chichi papikene lina lyakuti Samusoni? Mwangakayichila akusaganisya ya mundu juŵakwete machili mnope. Yeleyitu yili yisyene. Nambotu pandaŵi jine Samusoni jwasagwile yindu mwakulemwecheka, yayatendekasisye kuti asimane ni yakupweteka. Atamose kuti yaliji myoyo, Yehofa jwaganichisyaga ya chikulupi chaŵakwete Samusoni, mwamti jwakundile kuti mbili jakwe jilembedwe m’Baibulo kuti jitukamuchisye m’weji.

² Yehofa jwamkamulichisye masengo Samusoni pakusaka kwakulupusya Ayisalayeli. Pali papite yaka yejinji chiwile Samusoni, Yehofa ŵamsalile ndumetume Paulo kuti apwatiche lina lya Samusoni pa gulu ja ŵandu ŵaŵakwete chikulupi chakulimba. (Aheb. 11:​32-34) Kusala yisyene chisyasyo cha Samusoni mpaka chitulimbikasye mnope. Jwalakwe jwamdalilaga Yehofa atamose pandaŵi jakusawusya. Myoyo, munganiji chitukambilane yampaka tulijiganye kutyochela kwa Samusoni, soni yampaka chijile chisyasyo chakwe pakutulimbikasya.

3. Ana Samusoni jwapochele utumiki wamtuli?

³ Pajwapagwaga Samusoni, Afilisiti ni ŵaŵalamulilaga Ayisalayeli, mwamti ŵatendelaga yindu mwangasa. (Ŵak. 13:1) Ulamusi wangasa wa Afilisiti watendekasisye kuti Ayisalayeli asimane ni yakusawusya yejinji. Nambo Yehofa ŵamsagwile Samusoni kuti ‘ŵalongolele Ayisalayeli pakwakulupusya mmyala mwa Afilisiti.’ (Ŵak. 13:5) Kusala yisyene, welewutu waliji utumiki wakusawusya mnope. Mwamti Samusoni jwasosekwaga kumdalila Yehofa kuti akombole kutenda utumikiwu.

4. Ana Yehofa ŵamkamuchisye chamtuli Samusoni kuti alikulupusye mmyala mwa Afilisiti? (Ŵakulamula 15:​14-16)

 ⁴ Aganichisye ya chisyasyo cha Samusoni chachikulosya kuti jwalakwe jwamdalilaga Yehofa nambosoni yaŵatesile Yehofa pakumkamuchisya. Pandaŵi jine asilikali ŵa Afilisiti ŵapite kuti akamkamule Samusoni paŵatamaga ku Yuda mumsinda wa Lehi. Achalume ŵa ku Yuda wakamwile woga mnope, mwamti ŵalinganyisye yakumpeleka Samusoni kwa Afilisiti. Myoyo, jemanjaji ŵamkamwile Samusoni ni kumtaŵa ni ngonji siŵili syanganisikamuleje masengo ni kuja kumpeleka kwa Afilisitiwo. (Ŵak. 15:​9-13) Nambope, “msimu wa Yehofa wampele jwalakwejo machili” mwamti jwakombwele kukutula ngonji siŵamtaŵile nasyo sila. Kaneko Samusoni “ŵaliweni liwupa lyachipundi cha bulu juŵagambile kuwa pachangakaŵa,” ni jwajigele liwupalyo ni kwawulajila achalume 1,000 ŵa Chifilisiti.—Aŵalanje Ŵakulamula 15:​14-16.

5. Ana yaŵatesile Samusoni pakamulichisya masengo liwupa lya chipundi cha bulu yalosisye chamtuli kuti jwamdalilaga mnope Yehofa?

⁵ Ligongo chichi Samusoni jwakamulichisye masengo liwupa lya chipundi cha bulu, chachawonekaga kuŵa chida changakamuchisya pangondo? Ngatukukayichila kuti Samusoni jwamanyililaga kuti chapunde ngondojo ni chikamuchisyo cha Yehofa ngaŵa ligongo lya chida chachakamulichisye masengo. Samusoni jwakamulichisye masengo chida chachamŵandichile pakusaka kukwanilisya chakulinga cha Yehofa. Kusala yisyene, jwalakwe jwakombwele kwagomeka achimmagongo ŵakwe wosopeŵa ligongo lyakuti jwamdalilaga mnope Yehofa.

6. Ana mpaka tulijiganye chichi kutyochela kwa Samusoni patukutenda utumiki wetu?

⁶ Mwakulandana ni Samusoni, Yehofa mpaka atukamuchisyesoni m’weji kuti tukombole kutenda utumiki watupele atamose uli mkuwoneka kuŵa wakusawusya. Mwamti Mlungu mpaka atende yeleyi m’litala lyakusimonjesya. Myoyo tukulupilileje kuti Yehofa juŵampele machili Samusoni chachitukamuchisyasoni m’weji kuti tutende yakusasaka jwalakwejo naga tukumdalila.—Mis. 16:3.

7. Ana chisyasyo chapi chachikulosya kuti yindu mpaka yitujendele chenene patukupikanila malangiso ga Yehofa?

⁷ Abale ni alongo ŵajinji ŵakusakamula masengo gakutaŵa malo gakutendela misongano  alosisye kuti akusamdalila Yehofa. Yaka ya munyumamu, abale ŵataŵaga jika Nyumba sya Uchimwene syasambano soni yindu yine. Nambo ligongo lyakuti ŵandu ŵajinji akubatisidwa yitendekasisye kuti gulu ja Yehofa jichenje yindu yine. Abale ŵakusalongolela yindu m’guluji ŵaŵendile lunda kwa Yehofa. Mwamti ŵatandite kamulichisya masengo matala gasambano mwakusuma nyumba ni kusilinganyasoni kuti gaŵe malo gakutendela misongano. M’bale Robert juŵakamuchisyaga nawo pa masengo ga yakutaŵataŵa jwatite, “Pandanda yaliji yakusawusya kwa ŵane kupikanichisya ya litala lyasambanoli. Litalali lyaliji lyakulekangana mnope ni yatwaŵele tuli mkutenda kwa yaka yejinji. Nambope abale ŵakamulene ni kuchengaku, mwamti pana maumboni gejinji gakulosya kuti Yehofa akulongolela kuchengaku.” Chelechitu chigambile kuŵa chisyasyo chimo chachikulosya yakutenda Yehofa pakwalongolela ŵandu ŵakwe kuti akwanilisye chakulinga chakwe. Myoyo, ndaŵi syosyope jwalijose akusosekwa kuliwusyaga kuti, ‘Ana ngusasosasosa malangiso ga Yehofa ni kuŵa jwakoseka kuchenga pangumtumichila jwalakwe?’

8. Ana Samusoni jwatesile chichi pandaŵi jine jili jimkwete njota?

⁸ Komboleka kuti akukumbuchila yindu yine yakusimonjesya yaŵatesile Samusoni. Pandaŵi jine jwalakwe jwawuleje lisimba soni jwawuleje Afilisiti ŵakwana 30 mumsinda wa Asikeloni. (Ŵak. 14:​5, 6, 19) Samusoni jwamanyililaga kuti jwakombwele kutenda yindu yosopeyi ni chikamuchisyo cha Yehofa. Umboni wakuti Samusoni ŵamdalilaga Yehofa wawonechele chenene pajamkwete njota panyuma pakuti awuleje Afilisiti ŵakwana 1,000. Ana jwalakwe jwatesile chichi? Mmalo mwakusosasosa jika mesi gakuti amwe, jwamŵendile Yehofa kuti amkamuchisye.—Ŵak. 15:18.

9. Ana Yehofa jwatesile chichi Samusoni pajwamŵendile kuti amkamuchisye? (Ŵakulamula 15:19)

⁹ Yehofa jwajanjile kuŵenda kwa Samusoni mwamti jwatendekasisye kuti malo ganegakwe gakopoche mesi mwakusimonjesya. Samusoni ali amwele mesigo “machili gakwe gawujile mwamti ŵaŵele chenene.” (Aŵalanje Ŵakulamula 15:19.) Mwamti kwa yaka yejinji malo gagakopweche mesigo galiji chiŵela mpaka pandaŵi jele jwakulochesya Samuele jwasalilidwe kulemba buku ja Ŵakulamula. Komboleka kuti Ayisalayeli paŵagawonaga mesiga gakumbusyaga kuti Yehofa akusiŵakamuchisyaga ŵakutumichila ŵakwe pandaŵi jakusawusya.

10. Ana tukusasosekwa kutenda chichi kuti Yehofa atukamuchisye? (Alole chiwulili.)

¹⁰ M’wejisoni tukusosekwa kumdalilaga Yehofa kuti atukamuchisyeje. Tukusosekwa kutenda yeleyi mwangasamala kandu ya winji wa yindu yatukusamanyilila soni yatukombwele kutenda pakumtumichila jwalakwe. Ndaŵi syosope tujitichisyeje mwakulinandiya kuti yindu yikusatujendela chenene patukumdalila Yehofa. Samusoni jwapatile machili pajwamwele mesi gaŵampele Yehofa. Myoyo, m’wejisoni tukusasosekwa kukamulichisyaga masengo yindu yosope yakusatupa Yehofa kuti tupitilisyepe kuŵa ŵakulupichika kwa jwalakwe.—Mat. 11:28.

11. Ana ni yindu yine yapi yatukusosekwa kutenda kuti Yehofa atukamuchisyeje? Apeleche chisyasyo.

¹¹ Kwende tuganichisye chisyasyo cha M’bale Aleksey. Jwalakweju ali jumo mwa abale ŵakupilila kulagasidwa m’chilambo cha Russia. Ana ni chichi chachikumkamuchisya m’baleju kupilila yakusawusya yakusimana nayo? Ndaŵi syosope jwalakwe ni ŵamkwakwe akusatenda yindu yakwakamuchisya kuŵa paunasi wambone ni Yehofa. Jwalakwe jwasasile kuti, “Ngusalolechesya kuti ngutenda lijiganyo lyapajika soni kuŵalanga Baibulo lisiku lililyose. Kundaŵi kulikose une ni ŵamkwangu tukusakambilana lilemba lya lisiku soni kupopela yimpepe.” Ana yeleyi yikutujiganya chichi? Mmalo mwakuŵa ŵakulidalila tukusosekwa kumdalilaga Yehofa. Ana mpaka tutende yeleyi chamtuli? Mpaka tutende yeleyi mwakutenda ndaŵi syosope yindu yakulimbisya chikulupi chetu mpela kulijiganya Baibulo, kupopela, kusongana  soni kulalichila. Kaneko Yehofa chachitukamuchisya kuti tukombole kupitilisya kumtumichila jwalakwe. Yehofa jwampele machili Samusoni, mwamti jwalakwe mpaka atupesoni machili m’weji.

12. Ana ni yindu yakulemwecheka yapi yajwatesile Samusoni? Ana kulombana kwa Samusoni ni Delila kwalekanganaga chamtuli ni achakongwe ŵane ŵala?

¹² Ndaŵi sine Samusoni jwasagulaga yindu mwakulemwecheka ligongo jwaliji jwangali umlama. Mwamti pandaŵi jine jwalakwe jwasagwile yindu yayatendekasisye kuti asimane ni yakusawusya. Panyuma pakuti Samusoni atumichile mpela jwakulamula kwakandaŵi, jwatandite “kumnonyela jwamkongwe jwine juŵatamaga m’Chiŵata cha Soleki. Jwamkongweju lina lyakwe lyaliji Delila.” (Ŵak. 16:4) Mkaniyitendekwe yeleyi, Samusoni jwalombele jwamkongwe jwine jwa Chifilisiti. Nambo “juŵatendekasyaga yeleyi ŵaliji Yehofa, pakuŵa ŵasosagasosaga mpata wakuti atande kumenyana ni Afilisiti.” Kaneko Samusoni jwagonile kunyumba ja lihule mumsinda wa Afilisiti wa Gasa. Pandaŵi jelejo, Mlungu jwampele machili Samusoni kuti akombole kuchuŵanya matanga ga pageti pakusaka kuwugomeka msindawo. (Ŵak. 14:​1-4; 16:​1-3) Nambope komboleka kuti Delila jwaliji jwamkongwe jwa Chiyisalayeli, mwamti nganituŵa tusasile kuti Samusoni jwalombele jwamkongweju ni chakulinga chakuti ŵagomeche Afilisiti.

13. Ana ni yindu yapi yajwatesile Delila yayatendekasisye kuti Samusoni asimane ni yakusawusya?

¹³ Delila jwapochele mbiya syejinji kutyochela kwa Afilisiti ni chakulinga chakuti ampeleche Samusoni. Ana Samusoni jwalepele kumanyilila chiwembuchi ligongo lyakuti ŵamdalilaga soni kumnonyela mnope Delila? Mulimose muyaŵelele, mwakuwilisyawilisya Delila ŵamkanganichisyaga Samusoni kuti asale kugatyochelaga machili gakwe. Mwamti yaliji yakutesya chanasa kuti Samusoni jwalijinjisye mundamo jajatendekasisye kuti machili gakwe gamale soni kuti Yehofa aleche  kumkamulichisya masengo kwakandaŵi.—Ŵak. 16:​16-20.

14. Ana Samusoni jwasimene ni yakusawusya yamtuli ligongo lyakumdalila Delila?

¹⁴ Samusoni jwasimene ni yakupweteka ligongo lyakumdalila Delila mmalo mwakumdalila Yehofa. Mwamti Afilisiti ŵamkamwile jwalakwe ni kumkolotola meso. Kaneko ŵajile kumŵika mundende ku Gasa, kwele ndaŵi jine munyumamo jwachuŵenye matanga ga pageti. Kaneko Afilisiti ŵamjigele Samusoni ni kumjawusya pamalo gaŵatendelaga chisangalalo chawo. Jemanjaji ŵayikene pakupeleka mbopesi syejinji kwa mlungu jwawo jwaunami Dagoni. Ŵatesile yeleyi paganisya kuti mlungu jwawojo ni juŵakamuchisye kuti amkamule Samusoni. Chakulinga chaŵamjigalile Samusoni pachisangalalochi chaliji chakuti jwalakwejo aŵe “chakwasekasya.”—Ŵak. 16:​21-25.

15. Ana Samusoni jwalosisye chamtuli kuti jwatandilesoni kumdalila Yehofa? (Ŵakulamula 16:​28-30) (Alole chiwulili cha pachikuto.)

¹⁵ Atamose kuti Samusoni jwasagwile yindu mwakulemwecheka, nambope jwalakwe nganaleka kumtumichila Yehofa. Jwalakwe jwapatile litala lyakuti akwanilisye utumiki wakwe waŵampele Mlungu wakwagomeka Afilisiti. (Aŵalanje Ŵakulamula 16:​28-30.) Mwamti Samusoni jwamŵendile Yehofa kuti, “Angunde nawuchisye Afilisitiŵa.” Yehofa jwajanjile lipopelo lya Samusoni mwamti ŵamwuchisyesoni machili gakwe gakusimonjesya. Yakuyichisya yakwe, Samusoni jwakombwele kwawulaga Afilisiti ŵajinji kupunda ŵaŵawuleje munyumamo.

16. Ana mpaka tulijiganye chichi pa yakulemwa yajwatesile Samusoni?

¹⁶ Atamose kuti Samusoni jwasimene ni yakupweteka ligongo lyakuti jwasagwile yindu mwakulemwecheka, nambope jwalakwe nganaleka kumtumichila Yehofa. Myoyo naga tutesile yakulemwecheka yayitendekasisye kuti atujamuche kapena kutujimika utumiki watwatendaga, ngatukusosekwa kuwujila munyuma. Tukumbuchileje kuti Yehofa ali jwakoseka kutukululuchila. (Sal. 103:​8-10) Mwangasamala kandu ni yakulemwa yetu, Yehofa mpaka apitilisyepe kutukamulichisya masengo mpela muŵatendele ni Samusoni.

17-18. Ana chisyasyo cha Michael chalimbikasisye chamtuli? (Alole chiwulili.)

¹⁷ Aganichisye ya chisyasyo cha m’bale jwine jwachinyamata lina lyakwe Michael. Jwalakwe jwakwete yakutenda yejinji paŵamtumichilaga Yehofa. Jwaliji jwakutumichila jwakamuchisya soni mpayiniya jwakutamilichika. Nambo chakutesya chanasa chili chakuti jwalakwe jwatesile chakulemwa chachatendekasisye kuti akaŵajilwasoni kutumichila pa maudindoga. Jwalakwe jwasasile kuti, “Natanganidwaga kumtumichila Yehofa mpaka payatendekwaga yeleyi. Nambo mwangajembecheya,  yasimanikwe kuti ngangutenda chilichose pakumtumichila Yehofa. Nganinganisyaga kuti Yehofa mpaka andeche, nambo nakayichilaga naga unasi wangu ni jwalakwe chiwuŵepe chiŵela mpela muyaŵelele pandanda. Nakayichilagasoni naga chinjitendaga yejinji pakutumichila mumpingo mpela munatendelaga pandanda.”

¹⁸ Chakusangalasya chili chakuti Michael nganawujila munyuma. Jwalakwe jwasasile kuti, “Natendaga yindu yakungamuchisya kuŵasoni paunasi wambone ni Yehofa. Natendaga yeleyi mwakupopela, kulijiganya Maloŵe gakwe, soni kuganichisya mwakusokoka yanalijiganyagayo.” Kaneko, Michael jwawujilesoni pa maudindo gakwe gala. Mwamti apano akutumichila mpela jwamkulungwa jwa mumpingo soni mpayiniya jwakutamilichika. M’baleju jwasasile kuti, “Yaŵatendaga abale ni alongo pakunimbikasya mnopemnope achakulungwa ŵa mumpingo, yangamuchisye kumanyilila kuti Yehofa akunonyelape. Mwamti apano ngutumichila mumpingo ndili ngwete chikumbumtima chambone. Yayandendecheleyi yanjiganyisye kuti Yehofa akusamkululuchila jwalijose jwapitikwiche mtima yisyesyene.” Yayamtendechele m’baleju, yikutusimichisya kuti Yehofa chachitukamulichisya masengo soni kutupa upile patutesile yakulemwa naga tukutenda yampaka tukombole pakulinganya yatulemwisyeyo soni kupitilisya kumdalila jwalakwe.—Sal. 86:5; Mis. 28:13.

19. Ana chisyasyo cha Samusoni chalimbikasisye chamtuli?

¹⁹ Munganiji, tugambile kukambilana yindu yamnono yayatendekwe pa umi wa Samusoni. Jwalakwe jwaliji jwangali umlama, nambope nganawujila munyuma pakumtumichila Yehofa atamose kuti jwalemwisye pakulombela Delila. Nambotu Yehofa nganaleka kumkamulichisya masengo. Mwamti pandaŵi jine, Mlungu jwamkamulichisye masengo Samusoni m’litala lyakusimonjesya mnope. Yehofa ŵamwonagape jwalakwe kuŵa mundu jwa chikulupi chakulimba. Mwamti jwayikene pakupwatika lina lyakwe pa gulu ja ŵandu ŵakulupichika ŵakusasimanikwa m’buku ja Ahebeli chaputala 11. Kusala yisyene, yili yakulimbikasya mnope kumanyilila kuti Yehofa akusaŵa jwakusachilila kutupa machili mnopemnope pandaŵi jakusawusya soni patukusosechela chikamuchisyo. Myoyo mpela muŵatendele Samusoni, kwende tumŵendeje Yehofa kuti, ‘Angumbuchile, Wawo Mlungu, ambe machili chonde.’—Ŵak. 16:28.