Maloŵe gagali pa lilemba lya Ahebeli 4:12 gakusalosya kuti Paulo ŵaŵecetaga ya yakulinga ya Mlungu mpela yatukusayisimana m’Baibulo.

Ndaŵi syejinji, m’mabuku getu akusakamula maloŵe lilemba lya Ahebeli 4:12 pakusaka kulosya kuti Baibulo jikwete macili gakucenga umi wa ŵandu, soni yili yakuŵajilwa kusala m’yoyo. Nambope, yili yakamucisya mnope kulolasoni ngani josope jajikusimanikwa pa lilembali. Paulo ŵalimbikasyaga Aklistu ŵacihebeli kuti atendeje yindu mwakamulana ni yakulinga ya Mlungu. Yejinji mwa yakulingayi yasimanikwaga m’malemba geswela. Jwalakwe ŵakamulicisye masengo cisyasyo ca Ayisalayeli ŵaŵakulupwice ku Eguputo. Jemanjaji ŵakwete cembeceyo cakuja kwinjila m’cilambo cacilangano ‘cakwenda mkaka ni uci,’ kwele kwakasangalalaga ni cipumulisi cisyesyene.—Eks. 3:8; Deut. 12:9, 10.

Celeci ni cacaliji cakulinga ca Mlungu. Nambo kaneko Ayisalayeli ŵajumwisye mitima jawo soni nganalosya kulupicika, m’yoyo ŵajinji mwa jemanjajo ŵalepele kwinjila m’cipumulisi ca Mlungu. (Num. 14:30; Yos. 14:6-10) Nambope, Paulo ŵajonjecesye kuŵeceta kuti capalipe ‘cilanga cakwinjila m’cipumulisi ca Mlungu.’ (Ahe. 3:16-19; 4:1) Kusala yisyene “cilanga” celeco caliji mbali ja cakulinga ca Mlungu. Mpela mwaŵatendele Aklistu ŵacihebeli, m’wejisoni mpaka tuŵalanje ya cakulingaco soni kutendaga yindu mwakamulana ni cakulingaco. Pakusaka kusimicisya kuti cilangaci cili cakutyocela m’Malemba, Paulo ŵakamwile mbali sine sya maloŵe gagakusimanikwa pa Genesis 2:2 soni pa Salimo 95:11.

Kusala yisyene, yili yakulimbikasya kumanyilila kuti ‘cilanga cakwinjila m’cipumulisi ca Mlungu cipalipe.’ Tukusakulupilila kuti yajikusasala Baibulo yakwamba cembeceyo cakwinjila m’cipumulisi ca Mlungu yili yakomboleka, soni tutesile kala yakomboleka kuti tujinjile. Nganitutenda yeleyi mwakuŵa pasi pa Cilamusi ca Mose kapena kwembeceya kuti Yehofa atujiticisye ligongo lya masengo ganegakwe. M’malo mwakwe, ligongo lya cikulupi tukusaŵa ŵakusangalala kwendelecela kamulana ni cakulinga ca Mlungu cacijuwile. Konjecesya pelepa, mpela mwatuyiwonele, ŵandu ŵajinji pacilambo cosope atandite kulijiganya Baibulo soni kulijiganya cakulinga ca Mlungu. Ŵajinji mwa ŵanduŵa acenjile ndamo syawo syakusakala, kola cikulupi soni ayikene pakubatiswa. Yeleyi yikulosya kuti “maloŵe ga Mlungu gali ga umi soni gamacili.” Mpela mwajisalile Baibulo, cakulinga ca Mlungu citukamucisye kala paumi wetu, soni cicijendelecele kutupa macili.