1, 2. Ana ŵakutumicila ŵa Yehofa ali pa ngondo syatuli?

KUTANDILA ni mundu jwakulupicika jwandanda, Abele, mpaka mundaŵi jetu jino, ŵakutumicila ŵa Yehofa ŵakulupicika aŵele ali mkuputa ngondo. Ndumetume Paulo ŵasalile Aklistu ŵacihebeli kuti “ŵapilile yakulingwa yekulungwa pampepe ni yipwetesi,” paŵatendaga yakomboleka kuti Yehofa ŵajaliwe. (Ahe. 10:32-34) Paulo ŵawanicisye Aklistu ni ŵandu ŵakusatenda maseŵelo gakulimbana mpela kuwutuka soni kumenyana. (Ahe. 12:1, 4) Lelojino tuli pangondo jakucenjela umi wetu, soni tukwete acimmagongo ŵakusasaka kutusokonasya soni kututendekasya kwasa cisangalalo cetu soni majali getu gamsogolo.

² M’weji, tuli pangondo jekulungwa jakulimbana ni Satana soni cilambo cakwe cakusakalaci. (Aef. 6:12) Yili yakusosekwa mnope kuti tukaneje kujigalila “yindu yakutamilicika mnope” ya m’cilamboci. Yinduyi yikupwatikapo yijiganyo yaunami, nganisyo sya m’cilamboci, yamsese, kwemba sona, kolelwa, soni kamulicisya masengo mitela jakusokonasya mtwe. Tukusosekwasoni kulimbana ni yakulemwa yetu soni yakutengusya.—2 Akoli. 10:3-6; Akolo. 3:5-9.

3. Ana Yehofa akusatukamucisya catuli kuti twagomece acimmagongo ŵetu?

 ³ Ana yili yakomboleka kwagomeka acimmagongo ŵakusatulagasya? Elo yili yakomboleka, nambo tuli tusimene ni yakusawusya. Paulo ŵaliwanicisye ni mundu jwakutenda maseŵelo gakuputana, paŵaŵecete kuti, “Mwanguputila suŵa syangu nganiyiŵa mpela nguputa mbungo.” (1 Akoli. 9:26) Mpela mwele mundu jwakutenda maseŵelo gakuputana akusalimbana ni mmagongo jwakwe, m’wejisoni tukusosekwa kulimbana ni acimmagongo ŵetu. Yehofa akusatujiganya soni kutukamucisya pangondo jetuji. Kupitila m’Maloŵe gakwe, Yehofa akusatusalila yatukusosekwa kuya kuti tupunde pangondoji. Akusatukamucisyasoni kupitila mu yatukusalijiganya m’mabuku getu, kumisongano jaciklistu soni misongano jekulungwakulungwa. Ana akusayikamulicisya masengo yakusalijiganya? Naga akulepela kutenda yeleyo, yiciŵa mpela kuti ‘akuputa mbungo,’ nambosoni ngakwagomeka acimmagongo ŵawo.

4. Ana mpaka tutende wuli kuti yakusakala yikatugomeka?

⁴ Acimmagongo ŵetu mpaka alimbane nawe pandaŵi janganitujijembeceyaga soni patulopotwece mnope. M’yoyo tukusosekwa kuŵa ŵakoseka ndaŵi syosope. Baibulo jikusatukalamusya kuti, “Akasakunda kuti cakusakala cagomece, nambo ajendelecele kucigomeka cakusakala pakutenda yambone.” (Alo. 12:21) Maloŵe gakuti “akasakunda kuti cakusakala cagomece” gakulosya kuti mpaka tukombolece kumgomeka jwakusakalajo. Mpaka tutende yeleyi mwakwendelecela kumenyana najo. Nambope, Satana, cilambo cakusakalaci, ni ungali umlama wetu mpaka yitugomece naga tulesile kulicenjela, soni kuputa ngondo. Tukakunda kuti Satana atutendekasye kutulusya makono getu ni kutugomeka.—1 Pet. 5:9.

5. (a) Ana cici campaka citukamucisye kuti tujendelecele kuputa ngondo kuti citupocele majali ga Mlungu? (b) Ana citutagulilane yisyasyo yapi ya m’Baibulo?

⁵ Kuti tupunde pangondo jetu tukusosekwa kumbucilaga ligongo lyakwe tukuputa ngondoji. Tukusaka kuti Mlungu asangalaleje nawe soni catupe majali. Lilemba lya Ahebeli 11:6 likusaŵeceta kuti, “Jwalijose jwakwika kwa Mlungu akusosekwa kulupilila kuti jwalakwe apali soni kuti akusapeleka mbote kwa ŵandu ŵakumsosasosa ni mtima wosope.” Maloŵe gacigiliki gaŵagagopolele kuti ‘kusosasosa ni mtima wosope’ gakusalosya kuti mundu akusosekwa kutenda mtawu. (Mase. 15:17) Malemba gakusatusalila yisyasyo yambone ya ŵandu ŵaŵatesile mtawu mnope kuti apate majali ga Yehofa. Yakobo, Lakelo, Yosefe, soni Paulo ŵasimene ni yindu yakusawusya mnope, nambo ŵapundile. Yisyasyo yawo yikusalosya kuti kutenda yindu mwamtawu mpaka kutukamucisye kuti tupocele majali. Ana mpaka twasyasye catuli jemanjaji?

6. Ana cici cacamkamucisye Yakobo kuti apilile, soni ana ŵapocele mbote jatuli? (Alole ciwulili cacili kundanda kwa nganiji)

⁶ Yakobo ŵasimene ni yakusawusya yejinji soni ŵapilile ligongo lyakuti ŵamnonyelaga Yehofa, ŵasangalalaga ni unasi wakwe ni jwalakwe soni ŵakulupililaga cilanga cakwe cakuti cacajaliwa ŵanace ŵakwe. (Gen. 28:3, 4) Ligongo lya yeleyi, Yakobo paŵakwete yaka 100 ŵayikene pakulimbana ni lilayika kuti limpe majali gakutyocela kwa Mlungu. (Aŵalanje Genesis 32:24-28.) Ana Yakobo pajika ŵakwete macili gakulimbana ni lilayika lyamacili mnopelyo? Iyayi. Nambo jwalakwe ŵaliji jwakusimicisya kuti alimbane nalyo soni nganakunda kuwujila munyuma. Pambesi pakwe jwalakwe ŵapocele majali ligongo lya kulimbicila kwakwe.  Jwalakwe ŵapocele lina lyakum’ŵajila lyakuti Yisalayeli, (lyalikusagopolela, “Jwakulimbana ni Mlungu.”) Yakobo ŵapocele mbote jekulungwa mnope jele m’wejisoni tukujisosasosa. Mboteji jili kuŵa paunasi ni Yehofa soni kupocela majali.

7. (a) Ana Lakelo ŵakwete cakusawusya catuli? (b) Ana ŵajendelecele kutenda cici kuti apate majali?

⁷ Ŵamkwakwe ŵa Yakobo ŵakunonyelwa, Lakelo, ŵasacililaga kulola Yehofa ali mkutenda yaŵalagwisye ŵamkwakwe. Nambo cakusawusya caliji cakuti Lakelo ŵaliji jwangaŵeleka. Masiku gelego, ŵandu ŵam’wonaga mundu jwangaŵeleka kuŵa jwamlwesece. Ana Lakelo ŵapatile catuli macili gakulimbana ni cakusawusya cakweci? Jwalakwe nganajasa mtima. M’malo mwakwe ŵapitilisye kupopela kwa Yehofa. Yehofa ŵapikene lipopelo lyakwe lyakutyocela pasi pa mtima soni pambesi pakwe ŵamjaliwe mwakumpa ŵanace. Ni ligongo lyakwe, Lakelo ndaŵi jine ŵaŵecete mwagumila kuti, “Limbene mwamacili . . . ni mbundilesoni!”—Gen. 30:8, 20-24

8. Ana Yosefe ŵasimene ni yakusawusya yapi, soni ana cisyasyo cakwe mpaka citukamucisye catuli?

⁸ Mwangakayicila, kulupicika kwa Yakobo ni Lakelo kwamkwayiye mnope mwanace jwawo Yosefe, soni kwamkamucisye paŵasimene ni yakulinga cikulupi cakwe. Yosefe paŵakwete yaka 17, umi wakwe wacenjile mnope. Acakulugwe ŵamtendelaga wiwu mnope, mwati ŵamsumisye ku ukapolo. Kaneko jwalakwe ŵatemi mu ukayidi kwa yaka yejinji, atamose kuti nganaleŵa cilicose. (Gen. 37:23-28; 39:7-9, 20,21) Nambo Yosefe nganatenguka, soni nganasunga magongo mumtima mwakwe kuti cawucisye yakusakala yaŵamtendeleyo. M’malo mwakwe, jwalakwe ŵaŵisile nganisyo syakwe syosope pa unasi wakwe ni Yehofa. (Lev. 19:18; Alo. 12:17-21) Cisyasyo ca Yosefe mpaka citukamucisye. Mwambone, naga twasimene ni yakusawusya yejinji patwaliji ŵacinandipile kapena naga apanopano tuli mu ndamo jakusawusya mnope, tukusosekwa kwendelecela kuŵa ŵakulimba soni ŵakupilila. Mpaka tuŵe ŵakusimicisya kuti patukutenda yeleyi, Yehofa cacitujaliwa.—Aŵalanje Genesis 39:21-23.

9. Pakumsyasya Yakobo, Lakelo ni Yosefe, ana tukwenela kutenda cici kuti citupocele majali ga Yehofa?

⁹ Aganicisye ya yakulingwa yakusimana nayo. Mwinemwakwe akusimana ni yindu yangali cilungamo kapena ŵane akusiŵacembulusya. Kapenasoni akusimana ni yakulingwa ligongo lyakuti jwine jwakwe jwalambucisye, mwine ligongo lyakwatendela wiwu. Akatulusya makono pakulosya kulepela. Akwenela kumbucila yele yaŵatesile Yakobo, Lakelo nambosoni Yosefe pakupitilisya kumtumicila Yehofa mwakusangalala. Mlungu ŵapele macili nambosoni ŵajaliwe jemanjaji ligongo ŵalosisye kuti ŵaliji ŵakulupicika. Nambosoni ŵapopelaga kwa Yehofa kuti amalane ni yakusawusya yawo. M’wejisoni patukuŵandicila mbesi ja cilambo cakusakalaci, tukusosekwa kola cikulupi cakulimba. Ana ali ŵakusacilila kutenda yakomboleka kuti Yehofa ŵanonyeleje?

10, 11. (a) Ana yindu yapi yampaka yitutendekasye kuputa ngondo kuti tupocele majali ga Mlungu? (b) Ana cici campaka citukamucisye kuti tutendeje yindu yakuŵajilwa?

¹⁰ Ana yindu yapi yampaka yitutendekasye kuputa ngondo kuti tupocele majali ga Mlungu? Cindu cimo cele ŵandu akusalimbana naco cili kumasya nganisyo syakulemweceka. Ŵandu ŵane aŵele ali mkulingalinga mwamtawu kuti awuwoneje undumetume mwakuŵajilwa. Ŵanesoni akusalaga ligongo lya yakusawusya yam’cilu soni kutenda lipowo. Panasoni ŵandu ŵane ŵele yikusiyalema kwakululucila ŵane. Cinga tuŵele tuli mkutumicila Yehofa  kwa ndaŵi jelewu catuli, wosopewe tukusosekwa kuputa ngondo kuti tumalane ni yindu yampaka yitusokonasye patukutumicila Mlungu, jwakusapeleka mbote kwa ŵandu ŵakulupicika.

¹¹ Kusala yisyene, mpaka yiŵe yakusawusya kuŵa Mklistu soni kusagula yindu mwakuŵajilwa mnopemnope patukulimbana ni nganisyo syakulemweceka. (Yer. 17:9) Naga yeleyi yikwatendecela wawojo, akusosekwa kupopela kwa Yehofa kuti ŵape msimu weswela. Lipopelo soni msimu weswela mpaka yape macili gakuti atende yindu yakuŵajilwa, soni Yehofa mpaka ŵape majali. Aŵeje ŵakusimicisya kutenda yindu mwakamulana ni lipopelo lyawo. Aŵalanjeje Baibulo lisiku lililyose soni kutenda lijiganyo lyapajika nambosoni kulambila kwa peŵasa mwakutamilicika.—Aŵalanje Salimo 119:32.

12, 13. Ana cici cakamucisye Aklistu ŵaŵili kulimbana ni nganisyo syakulemweceka?

¹² Pana yisyasyo yejinji yakulosya kuti Maloŵe ga Mlungu, msimu wakwe, nambosoni mabuku getu mpaka yakamucisya Aklistu kumalana ni nganisyo syakulemweceka. Mwambone, mcanda jwine jwakwete yaka 17 jwaŵalasile ngani jakuti, “Kodi Mungalimbane Bwanji ndi Zilakolako Zoipa?” mu Ajimuce! ja December 8, 2003. Ana jwalakwe ŵatesile cici? Jwalakwe ŵatite, “Mbele ndili mkulingalinga kuti ngole nganisyo syambone. Panaŵalasile munganijo kuti ‘yikusaŵa yakusawusya mnope kwa ŵandu ŵajinji kuti amalane ni nganisyo syakulemweceka, yandendekasisye kulipikana kuti nganimba jika.” Mcanda jweleju ŵapatilesoni yindu yakamucisya mu ngani jine jakuti “Kodi Mulungu  Amavomereza Makhalidwe a Kugonana Kwachilendo?” jajakopwece mu Ajimuce! ja October 8, 2003. Jwalakwe ŵapikene mu nganijo kuti kwa ŵane ngondoji jili mpela ‘miŵa m’cilu.’ (2 Akoli. 12:7) Jemanjaji pakupitilisya kuputa ngondo kuti ajendelecele kola ndamo syambone, akusakola cembeceyo cambone camsogolo. Mcandajo ŵatite, “Paligongo lyeleli nguganisya kuti masiku pagakwala mpaka mbe jwakulupilika. Ngum’yamicila Yehofa pakamulicisya masengo likuga lyakwe kuti litukamucisyeje kuŵa ni umi lisiku lililyose mundaŵi jakusawusya jino.”

¹³ Aganicisyesoni yayamtendecele Mlongo jwine jwa ku United States. Jwalakwe ŵalembile kuti, “Nasakaga kwayamicila ligongo lyakutupa cakulya causimu pandaŵi jakwe. Ndaŵi syejinji ngusinalipikana kuti ngani syosopesi silembedwe ligongo lya une. Kwa yaka yejinji mbele ndili mkulingalinga kuti masye nganisyo syele Yehofa ngakusasinonyela. Ndaŵi sine ngusasaka kutulusya makono gangu kuti ndece kuputa ngondo. Ngumanyilila kuti Yehofa ali jwacanasa nambosoni jwakululucila. Nambo ligongo lyakuti ngwete nganisyo syakulemweceka, soni mumtima mwangu jwangasiŵenga nganisyosyo, ngusalipikana kuti ndili jwangasosekwa kupocela cikamucisyo cakwe. Kwendelecela kwa ngondo kweleku kukwayiye umi wangu. . . . Panaŵalasile ngani jakuti, ‘Kodi Muli Ndi “Mtima Wodziwa” Yehova?’ mu Sanja ja Mlonda ja March 15, 2013, nayiweni kuti Yehofa ali jwakusacilila kungamucisya.”

14. (a) Ana Paulo ŵapikanaga wuli ni yakulingwa yakwe? (b) Ana mpaka tupunde catuli ngondo jakulimbana ni cilu cetu celopotoce?

¹⁴ Aŵalanje Aloma 7:21-25. Paulo ŵamanyililaga mwampaka yiŵele yakusawusya pakulimbana ni nganisyo nambosoni kulopotoka kwa cilu. Nambope, jwalakwe ŵakulupililaga kuti mpaka apakombole kupunda ngondo mwakwegamila Yehofa mwipopelo nambosoni kulupilila mbopesi ja Yesu. Nambi wuli m’weji? Patukulingalinga kuti tumalane ni yakulopotoka ya cilu cetu, mpaka tupunde. Mwatuli? Mwakulandana ni Paulo, tujegamileje Yehofa ngaŵaga macili getu nambosoni tukulupilileje mbopesi ja Yesu.

15. Ana lipopelo mpaka litukamucisye catuli kwendelecela kuŵa ŵakulupicika soni kupilila?

¹⁵ Ndaŵi sine Mlungu mpaka akunde kuti tulosye mwatukupikanila mumtima ligongo lya cindu cine cakwe. Mwambone, naga m’weji kapena jwamwiŵasa mwetu alwasile ulwele wekulungwa kapena tusimene ni yangali cilungamo, ana mpaka tutende wuli? Mpaka tulosye kuti tukusamkulupilila mnope Yehofa mwakupopela kwa jwalakwe kuti atupe macili gakutukamucisya kwendelecela kuŵa ŵakulupicika soni ŵakusangalala, nambosoni kulimbisya unasi wetu ni jwalakwe. (Afi. 4:13) Yisyasyo ya Aklistu ŵajinji mundaŵi ja Paulo soni masiku agano, yikulosya kuti lipopelo mpaka litukamucisye kola macili soni kwendelecela kupilila.

16, 17. Ana ali ŵakusacilila kutenda cici?

¹⁶ Satana akusasacilila kwawona wawojo ali atulwisye makono gawo pakulosya kuti alepele. Nambo aŵe ŵakusimicisya “kamula mwamacili cacili cambone.” (1 Ates. 5:21) Akulupilileje kuti mpaka apunde pangondo jakulimbana ni Satana, cilambo cakwe cakusakalaci, soni nganisyo syakulemweceka. Mpaka akombole kutenda yeleyi mwakulupilila kuti Mlungu ciŵalimbisye soni kwakamucisya.—2 Akoli. 4:7-9; Aga. 6:9.

¹⁷ M’yoyo kwende wosope tujendelecele kuputa ngondo soni kupilila. Tukulupilile ni mtima wosope kuti Yehofa ‘cacitupa majali soni ngasitusoŵa kalikose.’—Mal. 3: 10.