“NABATISWE ndili ngwete yaka 15. Pali papitile miyesi 6 natandite upayiniya wakamucisya. Panyuma pa caka cimo, naŵele mpayiniya jwakutamilicika. Panamalisisye sukulu ja sekondale, naŵendile kuti ngatumicileje ku malo kwakusosecela ŵakulalicila ya Ucimwene ŵajinji. Nasakaga ndili ndyosile mumkuli wa kumangwetu soni kulekangana ni anganga ŵangu ŵanatamaga nawo nambo nganaŵa ŵa Mboni sya Yehofa. Nambo jwakulolela mkuli paŵasalile kuti mkuli wangu ciwuŵe mumsinda mwetu pemo, yandumbilikasisye mnope. Nalinjilile kutenda yindu yakuti jwalakwe akamanyilila kuti yindumbilikasisye. Ndili ngwisisye mtwe wangu natyosile pamalopo nikuja kutanda ganicisya yaŵaŵecete jwakulolela mkuli jula. Namsalile mjangu jwanajendaga najo mu undumetume kuti, “Nguganisya kuti ngutenda yindu mpela yona. Nambotu pambesi pakwe Yona ŵajawile kukulalicila ku Nineve. Ni ligongo lyakwe unesoni cingatende undumetume kwasalile kuti ngatende.”

“Mbele ndili mpayiniya kwa yaka mcece mu mkuli wakumagwetu. Nayiweni kuti luli lunda kupikanila yakusalile. Pandanda naganisyaga mwakulemweceka. Nambo sano ndili jwakusangalala. Kwa mwesi umpepe, nakombwele kutendesya majiganyo ga Baibulo gakwana 24. Ngusam’yamicila Yehofa ligongo natandite kulijiganya Baibulo ni anganga ŵangu ŵakongwe ŵaŵasisyaga pandanda.”

Jwamkongwe jwine jwakulijiganya Baibulo ku Fiji, ŵasosekwaga kusagula kuti ajawule ku msongano wa upande kapena ajawule ni ŵamkwakwe ku cindimba cakusangalalila lisiku lyakupagwa lya jwacibale jwa ŵamkwakwewo. Ŵamkwakwewo ŵamkundile jwalakwe kuti ajawule ku msonganowo. Jwamkongwejo ŵasalile ŵamkwakwewo kuti cayice kucindimbaco pacawuje ku msonganowo. Nambo jwalakwe ali awusile ku msonganoko, ŵalipikanaga kuti akusosekwa kuŵambala kutenda yindu yampaka yimsokonasye mwausimu, m’yoyo nganajawula kucindimbako.

Jwamlume jula ŵasalile ŵacibale ŵakwe kuti ŵamkwakwe cayice kucindimbako pacawuje ku “msongano wa mboni.” Jemanjajo ŵajanjile kuti, “ŵamkwenuwo ngayika, ligongo ŵa Mboni sya Yehofa ŵangasangalalila lisiku lyakupagwa.” *

Jwamlumejo ŵasangalele mnope ligongo lyakuti ŵamkwakwewo ŵatesile yindu yakamulana ni yakusakulupilila soni cikumbumtima cakwe. Ligongo lya kulupicika kwa jwamkongwejo yakamucisye kuti ŵalalicile ŵamkwakwewo soni ŵandu ŵane. Panyuma pakwe, ŵamkwakwewo ŵakundile kulijiganya Baibulo soni ŵatandite kwawula kumisongano yalumo.