“M’ŵe Ŵakulimba Mtima, Soni Mkamule Masengo”
“M’ŵe ŵakulimba mtima, soni mkamule masengo mwamacili. Mkajogopa kapena kutenda woga, pakuŵa Yehofa . . . ali ni m’mwejo.”—1 MBIRI 28:20.
NYIMBO: 23, 29
1, 2. (a) Ana Solomoni ŵapocele masengo gakusosekwa mnope gapi? (b) Ligongo cici Daudi ŵamganicisyaga mnope Solomoni?
SOLOMONI ŵapocele masengo gakusosekwa mnope. Yehofa ŵamsagwile kuti alongolele masengo gakutaŵa nyumba jakulambilila ku Yelusalemu. Nyumbajo jasosekwaga ‘kuŵa jakusalala mnope, ni cakulinga cakuti kusalala kwakwe kumanyice ku yilambo yosope.’ Soni cindu cakusosekwa mnope caliji cakuti nyumbajo jaliji ja “Yehofa Mlungu jwakuwona.”—1 Mbiri 22:1, 5, 9-11.
2 Mwenye Daudi ŵakwete cikulupi cakuti Mlungu camkamucisye Solomoni. Nambo Solomoni jwaliji ‘mwanace soni nganamanyililaga yejinji.’ Ana jwalakwe akaŵele jwakulimba mtima kukamula masengo gakutaŵa nyumba jakulambililaji? Ana kuliwona kuti ali mwanace soni jwangamanyilila yejinji kukamtendekasisye kulipikana kuti ngakombola? Solomoni ŵasosekwaga kuŵa jwakulimba mtima.
3. Ana Solomoni ŵalijiganyisye cici kwa babagwe?
3 Solomoni ŵalijiganyisye kulimba mtima kutyocela kwa babagwe. Daudi paŵaliji mnyamata, ŵalimbene ni yinyama ya kwitinji yayakamwile ngondolo sya babagwe. (1 Sam. 17:34, 35) Jwalakwe ŵalosisye ndamo jakulimba mtima paŵaputene ni mundu jwamacili mnope. Ni cikamucisyo ca Mlungu, Daudi ŵakombwele kum’wulaga Goliati ni liganga limo.—1 Sam. 17:45, 49, 50.
4. Ligongo cici Solomoni ŵasosekwaga cikamucisyo?
4 Yaliji yakusosekwa mnope kwa Daudi kumkamucisya Solomoni kuŵa jwakulimba mtima kuti akombole kutaŵa nyumba ja Mlungu. (Aŵalanje 1 Mbiri 28:20.) Solomoni ŵasosekwaga cikamucisyo ligongo woga ukamlepelekasisye kamula cenene masengo.
5. Ligongo cici tukusosekwa kuŵa ŵakulimba mtima?
5 Mwakulandana ni Solomoni, kuti tuŵe ŵakulimba mtima soni kukamula cenene masengo tukusosekwa cikamucisyo cakutyocela kwa Yehofa. Kutenda yeleyi kucitukamucisya kuti tujigalileje yisyasyo ya ŵandu ŵakala ŵaŵalosisye kulimba mtima. Yicitukamucisyasoni kuganicisya mwampaka tulocesye kulimba mtima soni kwanilisya masengo gatupele Yehofa.
YISYASYO YA ŴANDU ŴAŴALOSISYE KULIMBA MTIMA
6. Ana cici cacikwatendekasya lung’wanu ni kulimba mtima kwa Yosefe?
6 Aganicisye muŵalocesye kulimba mtima Yosefe, ŵamkwakwe Potifala paŵamnyenjelelaga kuti atende najo yamsese. Yosefe ŵamanyililaga kuti casimane ni yakusawusya naga akukana. Nambope jwalosisye kulimba mtima mwamti jwakanile.—Gen. 39:10, 12.
7. Atagulile kulimba mtima kwaŵalosisye Lahabu. (Alole ciwulili cacili kundanda kwa nganiji.)
7 Lahabu alisoni cisyasyo cambone ca mundu jwakulimba mtima. Ŵakusonda ŵaciyisalayeli paŵayicile m’nyumba mwakwe ku Yeliko, yikakombolece kutenda woga ni kwasalila kuti awuje. Nambo ligongo lyakumkulupilila Yehofa, Lahabu ŵalosisye kulimba mtima paŵasisile acalumewo soni kwakamucisya kuti akopoce cenene mumsindamo. (Yos. 2:4, 5, 9, 12-16) Lahabu ŵamanyilile kuti Yehofa ali Mlungu jwakuwona, soni ŵakulupililaga kuti mpaka akombole kwapa Ayisalayeli msinda wa Yeliko. Jwalakwe nganakunda kuti kogopa ŵandu, kupwatikapo mwenye jwa ku Yeliko ni ŵakumtumicila ŵakwe, kumtengusye. Nambo, ŵatesile yindu yele pambesi pakwe yamkulupwisye jwalakwejo soni ŵamwiŵasa mwakwe.—Yos. 6:22, 23.
8. Ana kulimba mtima kwa Yesu kwakamucisye wuli ŵandumetume ŵakwe?
8 Nombe nawo ŵandumetume ŵa Yesu ŵalosisye cisyasyo cambone ca kulimba mtima. Jemanjaji ŵam’wonaga Yesu ali mkutenda yindu mwakulimba mtima. (Mat. 8:28-32; Yoh. 2:13-17; 18:3-5) Cisyasyo ca Yesu ni cacakamucisye kuti aŵe ŵakulimba mtima. Asaduki paŵasisyaga, ŵandumetumeŵa nganaleka kwiganya mu lina lya Yesu.—Mase. 5:17, 18, 27-29.
9. Ana lilemba lya 2 Timoteo 1:7 likutukamucisya wuli pa ngani ja kulimba mtima?
9 Yosefe, Lahabu, Yesu, soni ŵandumetume ŵalosisye kulimba mtima. Yeleyi yakamucisye kuti akombole kukamula masengo gaŵapele Yehofa. Ŵakombwele kuŵa ŵakulimba mtima ligongo ŵamjegamilaga Mlungu. M’wejisoni mpaka tusimane ni yindu yine yakusosekwa kulimba mtima. Mmalo mwakulijegamila jika tumjegamileje Yehofa. (Aŵalanje 2 Timoteo 1:7.) Kwende tulole yampaka tutende pakulosya kulimba mtima mwiŵasa soni mumpingo.
YAKUTENDEKWA YAKUSOSEKWA KULOSYA KULIMBA MTIMA
10. Ligongo cici Aklistu ŵacinyamata akusosekwa kuŵa ŵakulimba mtima?
10 Aklistu ŵacinyamata akusasimana ni yindu yakusosekwa kulimba mtima pakumtumicila Yehofa. Mpaka alijiganye yejinji pakujigalila cisyasyo ca Solomoni, juŵalosisye kulimba mtima kuti akamule masengo gakutaŵa. Atamose kuti Aklistu ŵacinyamata akusasosekwa kulongoleledwa ni acinangolo ŵawo, nambo ŵacinyamatawo akwete ukumu wakusagula yakutenda acimsyene. (Miy. 27:11) Akusasosekwa kulosya kulimba mtima pakusagula acimjawo ŵambone, yakusangalasya, kutenda yambone, soni pakusaka kubatiswa. Kulimba mtimaku kuli kwakusosekwa ligongo akusaŵa ali mkukana yakusaka ya Satana, jwakusamnyosya Mlungu.
11, 12. (a) Ana Mose ŵalosisye mwamtuli kulimba mtima? (b) Ana ŵacinyamata mpaka ajigalile camtuli cisyasyo ca Mose?
11 Ŵacinyamata akusosekwa kusagula cenene yakutenda ya pa umi wawo. M’yilambo yine, acinangolo akusiŵasagulila ŵanace ŵawo yakutenda pa umi. Ŵane akusiŵakanganicisya ŵanacewo kutenda majiganyo gapenani ni cakulinga cakuti capate masengo ga mbiya syejinji. M’yilambo yinesoni, kupata kwa mbiya kuli kwakusawusya. Yeleyi yikusatendekasya ŵacinyamata kulipikana kuti akusosekwa kutenda mtawu kuti alipatileje liŵasa lya acinangolo ŵawo yakusosecela pa umi. Naga wawojo yikwatendecela yakulandana ni yeleyi, aganicisyeje cisyasyo ca Mose. Jwalakwe ŵaleledwe ni mwanace jwamkongwe jwa Falao mwamti ŵakwete upile wakuŵa jwakumanyika mnope soni jwakusicila. Ŵamwiŵasa lya mwenye, soni ŵakwiganya komboleka kuti ŵamkanganicisyaga kuti atende yeleyi. Nambo Mose mwakulimba mtima ŵasagwile kumtumicila Yehofa. Paŵakanile cipanje ca ku Iguputo, ŵaŵisile cikulupi cakwe pa Yehofa. (Ahe. 11:24-26) Yeleyi yamtendekasisye Mose kupocela majali pandaŵijo, soni majali gejinji cacipocela msogolomu.
12 Yehofa cacapasoni majali ŵacinyamata ŵakulosya kulimba mtima pakuŵika nganisyo syawo pa yindu yausimu soni kuŵika Ucimwene wa Mlungu pandanda. Jwalakwe cacakamucisya kuti apateje yakusosecela ya maŵasa gawo. Timoteyo jwa m’yaka 100 yandanda, ŵaŵisile umi wakwe pa kumtumicila Yehofa. Masiku agano ŵacinyamata mpaka akombolesoni kutenda yeleyi. *—Aŵalanje Afilipi 2:19-22.
Ana ali ŵakusacilila kutenda yindu mwakulimba mtima? (Alole ndime 13-17)
13. Ligongo cici Mlongo jwine jwasosekwaga kuŵa jwakulimba mtima kuti akwanilisye yakulinga yakwe?
13 Mlongo jwine jwa ku Alabama m’cilambo ca U.S.A., ŵasosekwaga kuŵa jwakulimba mtima kuti akole yakulinga yausimu. Jwalakwe jwalembile kuti, “Panakulaga naliji jwasooni. Nalepelaga kuŵecetana ni ŵandu ku Nyumba ja Ucimwene soni kulalicila kwa ŵandu ŵacilendo.” Nambo ni cikamucisyo ca acinangologwe ni ŵane ku mpingo, mlongoju ŵakombwele kwanilisya yakulinga yakwe yausimu mwamti jwaŵele mpayiniya jwakutamilicika. Jwalakwe ŵatite, “Cilambo ca Satanaci cikusalimbikasya ŵandu kuti ayiwoneje yindu mpela majiganyo gapenani, kuŵa ŵakumanyika, kola mbiya syejinji, soni cipanje kuŵa yakusosekwa mnope. Nambo ndaŵi syejinji yindu yeleyi ŵandu akusalepela kuyipata soni yikusagamba kwatendekasya kulaga nganisyo. Kumtumicila Yehofa kundendekasisye kuŵa jwakusangalala mnope soni kungamucisye kuŵa jwakwikutila.”
14. Ana acinangolo Ŵaciklistu akusosekwa kuŵa ŵakulimba mtima muyakutendekwa mpela yapi?
14 Nombe nawo acinangolo ŵaciklistu akusosekwa kuŵa ŵakulimba mtima. Mwambone, abwana ŵawo mpaka ŵasalile kuti akamuleje masengo mpaka cilo soni kumbesi kwa cijuma. Nambo masiku gelego komboleka kuti akusatenda kulambila kwa peŵasa, kwawula mu undumetume, soni kumisongano. Kulimba mtima kukusasosekwa mu yakutendekwa mpela yeleyi kuti tulosye cisyasyo cambone kwa ŵanace ŵetu. Kombolekasoni kuti acinangolo ŵane mu mpingo mpaka ŵakundeje ŵanace ŵawo kutenda yindu yele wawojo nganaŵa ŵakundile ŵanace ŵawo kuti atendeje. Acinangolowo mpaka ŵawusyeje wawojo ligongo lyakwe ŵanace ŵawo ngakutenda yeleyi. Ana taciŵa ŵakulimba mtima ni kwasalila mwaulemu ligongo lyangakutendela yeleyi?
15. Ana lilemba lya Salimo 37:25 ni lya Ahebeli 13:5 mpaka lyakamucisye wuli acinangolo?
15 Tukusalosyasoni kulimba mtima patukwakamucisya ŵanace ŵetu kola yakulinga yausimu soni kuyikwanilisya. Mwambone, acinangolo ŵane ŵangasaka kwalimbikasya ŵanace ŵawo kutenda upayiniya, kuja kutumicila ku mkuli wakusosecela ŵakulalicila ŵajinji, kutumicila pa Beteli, kapena kamula nawo masengo ga yakutaŵataŵa. Jemanjaji akusaganisya kuti ŵanacewo ngasakombola kwasamalila pacacikalambala. Nambo, acinangolo ŵakulimba mtima akusaŵika cikulupi cawo pa yaŵalagucisye Yehofa. (Aŵalanje Salimo 37:25; Ahebeli 13:5.) Litala line lyakulosya kuti ali ŵakulimba mtima soni kuti akusamjegamila Yehofa lili kwakamucisya ŵanace ŵawo kuti nombe nawo atendeje yeleyi.—1 Sam. 1:27, 28; 2 Tim. 3:14, 15.
16. Ana acinangolo ŵane ŵakamucisye wuli ŵanace ŵawo kukwanilisya yakulinga yausimu, soni ligongo cici yeleyi yili yakamucisya?
16 Liŵasa line lya ku United States lyakamucisye ŵanace ŵawo kuti akole yakulinga yausimu. Jwamlume jwa mu liŵasali jwatite, “Ŵanace ŵetu mkanakule, twasalilaga cisangalalo campaka apate naga akutenda upayiniya soni kutumicila mumpingo. Apano yakulinga yawo ni yeleyi. Kola yakulinga yausimu soni kuyikwanilisya kukamucisye ŵanace ŵetu kulimbana ni yakulingwa ya m’cilambo ca Satanaci soni kuŵika nganisyo syawo pa kumtumicila Yehofa.” M’bale jwine jwakwete ŵanace ŵaŵili jwatite, “Acinangolo ŵajinji akusamalila macili soni cipanje cawo pakwakamucisya ŵanace kola yakulinga mpela kutenda maung’asi, soni kutenda majiganyo gapenani. Luli lunda kumalila macili getu soni cipanje cetu pakwakamucisya ŵanace kwanilisya yakulinga yausimu, yampaka yakamucisye kuŵa pa unasi wambone ni Yehofa. Yiŵele yakusangalasya kwakamucisya ŵanace ŵetu kwanilisya yakulinga yawo yausimu.” Tacisimicisyasoni kuti Mlungu akusiŵapa majali acinangolo ŵakusakamucisya ŵanace ŵawo kola yakulinga yausimu soni kuyikwanilisya.
KULIMBA MTIMA KULI KWAKUSOSEKWA MUMPINGO
17. Ana mpaka tulosye kulimba mtima mumpingo mu yakutendekwa mpela yapi?
17 Mumpingo tukusasosekwasoni kulosya kulimba mtima. Mwambone, acakulungwa ŵa mumpingo akusasosekwa kulimba mtima kuti asamalile ngani syekulungwakulungwa soni pakwakamucisya ŵandu ŵakusosekwa cikamucisyo ca ku cipatala. Acakulungwa ŵane akusajawula kukwakamucisya mwausimu ŵandu ŵali mu ndende. Nambi wuli pakwamba ya alongo ŵanganaŵa pa ulombela? Nombe nawo akwete upile wakutenda yejinji mu undumetume. Mpaka atende upayiniya, kwawula ku mkuli wakusosecela ŵakulalicila ŵajinji, kamula masengo ga yakutaŵataŵa, soni kwinjila Sukulu ja Ŵakulalicila ya Ucimwene. Ŵanesoni akusakola upile wakwawula kukutenda Sukulu ja Gileadi.
18. Ana alongo ŵacikulile mpaka alosye camtuli kulimba mtima?
18 Kola alongo ŵacikulile mumpingo uli upile wekulungwa. Tukusitwanonyela mnope jemanjaji! Komboleka kuti ŵane ngakutenda mwakulandana ni muŵatendelaga kala pakutumicila. Nambo akwendelecelape kulosya kulimba mtima pakamula masengo ga Yehofa. (Aŵalanje Tito 2:3-5.) Mwambone, mlongo jwacikulile mpaka asosekwe kulimba mtima kuti amsalile mlongo jwacisikana pakwamba ya kawale. Ngakusosekwa kumsalila mwakalipa, nambo mpaka amlimbikasye kuti pakusagula yakuwala aganicisyeje mwampaka yakwayile ŵane. (1 Tim. 2:9, 10) Kuŵeceta mwacinonyelo mpela kweleku mpaka kukole yakuyicisya yambone.
19. (a) Ana m’bale jwam’batiswe mpaka atende wuli kuti aŵe jwakulimba mtima? (b) Ana lilemba lya Afilipi 2:13 ni 4:13 mpaka lyakamucisye camtuli abale kuti aŵe ŵakulimba mtima?
19 Abale ŵabatiswe akusosekwasoni kulosya kulimba mtima pakukamula masengo ga Yehofa. Yikusaŵa yambone abale pakulosya kulimba mtima pakusaka kupocela maukumu gakonjecesya mumpingo. (1 Tim. 3:1) Nambope, ŵane ŵangasaka kutenda yeleyi. Abale ŵane mwine ŵatesile yakulemweceka kalakala, ni akusalipikana kuti ngakuŵajilwa kuŵa jwakutumicila jwakamucisya kapena jwamkulungwa jwa mumpingo. Kombolekasoni kuti abale ŵane akusalipikana kuti nganaŵa akombwele kutenda cenene maukumugo. Naga wawojo akusaganisyasoni m’yiyi, Yehofa mpaka ŵakamucisye kuŵa ŵakulimba mtima. (Aŵalanje Afilipi 2:13; 4:13.) Akumbucileje kuti, pandanda Mose ŵalipikanaga kuti nganaŵa akombwele kutenda cenene ukumu waŵapocele. (Eks. 3:11) Nambo Yehofa ŵamkamucisye, mwamti jwalimbile mtima mpaka kukwanilisya masengo gaŵampele. M’yoyo, kupopela kwa Yehofa ni kuŵalanga Baibulo lisiku lililyose mpaka kumkamucisyesoni m’bale jwam’batiswe kuti aŵe jwakulimba mtima. Kuganicisyasoni yisyasyo ya ŵandu ŵa m’Baibulo ŵaŵalosisye kulimba mtima mpaka kumkamucisye. Kombolekasoni kwasalila acakulungwa ŵa mumpingo kuti amkamucisyeje soni kwaŵenda kuti naga pakusosecela mpaka ampeje yakutenda. Tukwalimbikasya abale wosope ŵabatiswe kuti aŵe ŵakulimba mtima kuti akamuleje mwamtawu masengo ga mumpingo!
“YEHOFA . . . ALI NI M’MWEJO”
20, 21. (a) Ana Daudi ŵamsalile cici Solomoni? (b) Ana mpaka tuŵe ŵakusimicisya ya cici?
20 Mwenye Daudi ŵamsalile Solomoni kuti Yehofa caciŵa ni jwalakwe mpaka kumalisya masengo gakutaŵa nyumba ja Mlungu. (1 Mbiri 28:20) Maloŵe ga babagwega gamlimbisye mtima Solomoni. Jwalakwe nganakunda kuti alepele masengogo ligongo lyakuti ŵaliji mwanace soni jwangamanyilila yejinji. Solomoni jwalosisye kulimba mtima pakukamula masengo, mwamti Yehofa ŵamkamucisye kuti amalisye masengo gakutaŵa nyumba jakusalala mnopeji kwa yaka 7 ni hafu.
21 Mpela muŵatendele Yehofa pakumkamucisya Solomoni, m’wejisoni mpaka atukamucisye kuŵa ŵakulimba mtima pakukwanilisya masengo gatupele mwiŵasa soni mumpingo. (Yes. 41:10, 13) Naga tukulosya kulimba mtima pakumlambila Yehofa, mpaka tuŵe ŵakusimicisya kuti catupe majali apano soni msogolo. M’yoyo, kwende tuŵeje ‘ŵakulimba mtima soni tukamule masengo mwamacili.’
^ ndime 12 Mpaka apatesoni matala gane gakamucisya kuti akole yakulinga yausimu mu ngani ja mtwe wakuti “Khalani ndi Zolinga Zauzimu Kuti Mulemekeze Nazo Mlengi Wanu” mu Sanja ja Mlonda ja July 15, 2004.
