1. Ligongo cici wawojo ali ŵakusimicisya kuti Maloŵe ga Mlungu gali gamacili? (Alole ciwulili cacili penanipa.)

MPELA ŵandu ŵa Yehofa, ngatukusakayicila ata panandi kuti Maloŵe ga Mlungu “gali ga umi soni gamacili.” (Ahe. 4:12) Tugaweni macili ga Baibulo pa umi wetu soni wa ŵandu ŵane. Abale ni alongo ŵetu ŵane ŵaliji ŵawiyi, ŵane ŵamwaga mitela jakusokonasya mtwe, soni ŵane ŵatendaga yamsese. Ŵane ŵatendaga cenene nditu m’cilamboci, nambo ŵayiweni kuti akusoŵecela kanekakwe. (Mlal. 2:3-11) Cakusangalasya cine cili cakuti ŵanesoni ŵaŵalipikanaga mpela ŵangali cembeceyo paumi, apano ŵacipatile ligongo lyamacili ga Baibulo. Ngatukukayicila kuti pakwete paŵalasile yakutendekwa mpela yeleyi mu ngani sya mu Sanja ja Mlonda sya mtwe wakuti “Baibulo Jikusacenga Umi wa Ŵandu.” Ayiwenisoni kuti patulijiganyisye usyesyene, tukusasosekwa kwendelecela kulijiganya Malemba kuti gatucenjejepe.

2. Ana m’yaka 100 yandanda yawonecele wuli kuti Maloŵe ga Mlungu gali gamacili?

² Kusala yisyene, ŵandu ŵajinji akombwele kucenga umi wawo ligongo lyakulijiganya Baibulo. Ana kuli kutanda kupikana yeleyi? Iyayi! Yeleyi yikutukumbusya abale ni alongo ŵetu  ŵa m’yaka 100 yandanda, ŵaŵakwete cembeceyo cakwawula kwinani. (Aŵalanje 1 Akolinto 6:9-11.) Pambesi pakusala ya ŵandu ŵangasapocela Ucimwene wa Mlungu, ndumetume Paulo jwatite, “Ŵane mwa jemanja mwaliji m’yoyo.” Ŵakombwele kucenga ni cikamucisyo ca Malemba soni msimu weswela wa Mlungu. Nambo ŵane atamose pambesi pakulijiganya usyesyene, yindu yasokonecele mwausimu. Baibulo jikusasala ya Mklistu jwine jwamsagulwe juŵamtyosisye mumpingo. Mwaupile, kaneko ŵam’wucisye. (1 Akoli. 5:1-5; 2 Akoli. 2:5-8) Yili yakulimbikasya kulola cikamucisyo caŵapatile Aklistu acimjetu m’Maloŵe ga Mlungu paŵasimene ni yakusawusya yausimu.

3. Ana citulijiganye yamtuli mungani ajino?

³ Maloŵe ga Mlungu gali gamacili mnope. Ligongo lyakuti Yehofa ŵatupele maloŵega, tukusosekwa kugakamulicisya masengo cenene. (2 Tim. 2:15) Mu ngani ajino, citutagulilane yampaka tutende kuti macili ga Maloŵe ga Mlungu gawoneceleje (1) paumi wetu, (2) patuli mu undumetume, soni (3) pakwiganya pamisongano. Kutagulilana yeleyi cikutukamucisye kuti twanonyeleje mnope Atati ŵetu ŵakwinani soni kwayamicila ligongo lyakutujiganya kuti yindu yitujendeleje cenene.—Yes. 48:17.

4. (a) Kuti Maloŵe ga Mlungu gatukamucisyeje, ana tukusosekwa kutenda cici? (b) Ana wawojo akusatenda wuli kuti apate ndaŵi jakuŵalanjila Baibulo?

⁴ Kuti Maloŵe ga Mlungu gatukamucisyeje, tukusosekwa kugaŵalanga ndaŵi syosope. (Yos. 1:8) Yili yakupikanika kuti jwalijose akusakola yakutenda yejinji palisiku. Nambo tukusasacilila kuti cilicose cikatulepelekasya kuŵalanga Baibulo. (Aŵalanje Aefeso 5:15, 16.) Ŵamboni ŵajinji akusalingalinga kupata ndaŵi jambone jakuŵalanjila Baibulo. Ŵane akusasagula kuŵalanga kundaŵi, ŵane ligulo, soni ŵane mkati mwa lisiku. Nganisyo sya jemanjaji sili syakulandana ni sya jwamasalimo, juŵalembile kuti, “Ngusacinonyela cilamusi cawo! Ngusaciganicisya lisiku lyosope.”—Sal. 119:97.

5, 6. (a) Ligongo cici kuganicisya mwakusokoka Maloŵe ga Mlungu kuli kwakusosekwa? (b) Ana tutendeje wuli paganicisya mwakusokoka? (c) Ana kuŵalanga Baibulo ni kuganicisya mwakusokoka kwakamucisye wuli wawojo?

⁵ Patuŵalasile Baibulo, tukusosekwa kuganicisya mwakusokoka yatuŵalasileyo. (Sal. 1:1-3) Kutenda yeleyipe ni kwampaka kutukamucisye kupata matala gakamulicisya masengo lunda lwa m’Baibulo. Cinga tukujiŵalanjila pa foni kapena pa tabuleti, cakulinga cetu ciŵeje cakuti maloŵego gatuyiceje pamtima.

⁶ Ana tutendeje wuli paganicisya mwakusokoka? Ŵajinji ayiweni kuti yikusaŵa cenene paŵalasile ndime syamnono sya Malemba,  kwima kaje ni ganicisya yiwusyo mpela ayi, ‘Ana yambalasileyi yikunjiganya cici ya Yehofa? Ana yeleyi ni yangutenda paumi wangu? Ana pana yinesoni yangusosekwa kongolela?’ Kuganicisya mwakusokoka yatuŵalasile m’Maloŵe ga Mlungu nambosoni kuyipopelela mpaka kutulimbikasye kuti tuyikamulicisyeje masengo. Kusala yisyene, kutenda yeleyi kucikamucisya kuti macili ga Maloŵe ga Mlungu gawoneceleje paumi wetu.—2 Akoli. 10:4, 5.

7. Patuli mu undumetume, ana tutendeje wuli kuti macili ga Maloŵe ga Mlungu gawoneceleje?

⁷ Ana mpaka tutende wuli kuti macili ga Maloŵe ga Mlungu gawoneceleje patukulalicila? Cindu candanda cili kugaŵalanga kwa ŵandu. M’bale jwine jwawusisye kuti, “Tuwanicisye kuti wawojo akulalicila ku nyumba ni nyumba pampepe ni Yehofa, ana mpaka agambeje kuŵeceta jikape, kapena Yehofa mpaka ampejesoni upile wakuŵeceta?” Nganisyo sya M’baleju syaliji syakuti, patum’ŵalanjile mundu Maloŵe ga Mlungu, nikuti Yehofa akuŵeceta ni mundujo. Maloŵe ga m’Baibulo mpaka gaŵe gakamucisya mnope kupunda yakuŵeceta yetu. (1 Ates. 2:13) M’yoyo, jwalijose akusosekwa kuliwusya kuti, ‘Pangulalicila, ana ngusakamulicisya masengo upile wuliwose waupatikene kum’ŵalanjila mundu Maloŵe ga Mlungu?’

8. Patukulalicila, ligongo cici kwamba kwaŵalanjila ŵandu malemba nganikuŵa kwakwanila?

⁸ Nambope kwamba kuŵalanga Baibulo kwa ŵandu nganikuŵa kwakwanila. Ligongo ŵajinji ŵangajipikanicisya mnope. Mwelemu ni muyaŵelagasoni m’yaka 100 yandanda. (Alo. 10:2) M’yoyo ngatukusosekwa ganisya kuti kwamba kum’ŵalanjila mundu lilemba nikuti basi calipikanicisye. Patuŵalasile, tupateje maloŵe gatukugasaka mwelemo ni kugatagulila cenene. Atamose kugawilisya maloŵego nganikuŵa kulemwa.  Kutagulila cenene malemba kukusakamucisya mnope kuti Maloŵe ga Mlungu gayice pamtima ŵakutupikanila.—Aŵalanje Luka 24:32.

9. Ana tuŵeceteje maloŵe mpela gapi pakusaka kum’ŵalanjila mundu Baibulo? Apelece yisyasyo.

⁹ Maloŵe gatukusaŵeceta pakusaka kum’ŵalanjila mundu lilemba mpaka gamkamucisyesoni kuti ajicimbicisyeje Baibulo. Mwambone, mpaka tujileje kuti, “Kwende tulole nganisyo sya Mlungu panganiji.” Kwa mundu jwanganaŵa mu dini ja Ciklistu, mpaka tujile kuti, “Alole yagakusala Maloŵe ga Mlungu.” Kapena pakulalicila kwa mundu jwanganonyela mnope ya dini, tujileje kuti, “Ana pakwete papikene msyungu wakala awu?” Pelepatu yikulosya kuti mpaka tucenjeje kasale ka maloŵe mwakamulana ni ŵandu.—1 Akoli. 9:22, 23.

10. (a) Atagulile yayatendekwe m’bale jwine ali apite ku ulendo wakuwilisya. (b) Ana wawojo agaweni wuli macili ga Maloŵe ga Mlungu pa undumetume wawo?

¹⁰ Ŵajinji awuweni umbone wakamulicisya masengo Maloŵe ga Mlungu mu undumetume. Kwende tulole cisyasyo aci. M’bale jwine jwapite ku ulendo wakuwilisya kwa mundu jwacikulile jwine jwaŵele ali mkuŵalanga magasini getu kwa yaka yejinji. M’malo mwakwamba kumpa Sanja ja Mlonda jasambano, m’baleju jwaŵalasile kaje lilemba limo lya mu Sanjajo. Lilemba lyakwe lyaliji lya 2 Akolinto 1:3, 4, lyalikusati, “Atati ŵacanasa cekulungwa soni Mlungu jwakusatutondoya m’litala lililyose, akusatutondoya mu yakulingwa yetu yosope.” Lilembali lyam’yice pamtima msyenenyumbajo mwamti ŵamsalile M’bale jula kuti aliŵalanjesoni. Mundujo jwasasile kuti jwalakwejo pampepe ni ŵamkwakwe akusosekwa citondoyo. Yayatendekweyi yamkamucisye kuti atande kujinonyela Baibulo. Ana ngakwiticisya kuti patuli mu undumetume macili ga Maloŵe ga Mlungu gakusawonecela?—Mase. 19:20.

11. Ana abale ŵakusaŵeceta ngani ku pulatifomu akwete ukumu wamtuli?

¹¹ Wosopewe tukusasangalala patuyice pamisongano ja mpingo kapena pamisongano jekulungwakulungwa. Cakulinga cetu cekulungwa cikusaŵa kuti tumlambile Yehofa. Tukusalijiganyasoni yejinji kutyocela m’Maloŵe ga Mlungu. Kuŵeceta ngani pamisonganoji uli upile wekulungwa. Nambo abale ŵakusatenda mbalisi akusosekwa kumanyilila kuti akwete ukumu wekulungwa. (Yak. 3:1) Akusosekwa kulolecesya kuti yakwiganya yikutyocela m’Maloŵe ga Mlungu. Naga akuŵeceta ngani ku pulatifomu, ana mpaka alosye camtuli macili ga Maloŵe ga Mlungu mu ngani jawo?

12. Ana ŵakuŵeceta ngani mpaka atende wuli kuti Malemba gaŵeje mbali jekulungwa ja ngani jawo?

¹² Alolecesyeje kuti Malemba gali mbali jekulungwa ja ngani jawo. (Yoh. 7:16) Ana mpaka atende wuli yeleyi? Pakuŵeceta ngani, kaŵecete kawo kapena yisyasyo yakukamulicisya masengo yikatendekasyaga ŵandu kuliŵalila kuti akuŵeceta ya m’Malemba. Akumbucilejesoni kuti kwamba kuŵalanga malemba nganikuŵa kwiganya kwakwanila. Nambosoni naga tukuŵalanga malemba gejinji, ŵakupikanila akusalepela kugakumbucila, atamose limpepe. M’yoyo, asaguleje cenene malemba. Paŵalasile lilemba, alitagulileje cenene, kupeleka cisyasyo cakamucisya kulipikanicisya, soni kusala yampaka tutende pakamulicisya masengo lilembalyo. (Neh. 8:8) Naga ngani jawo jikutyocela pa autilayini jaŵapele kala, ajikosecele cenene. Alolecesye kuti akupikanicisya kamulana kwa nganijo ni malemba gagali mwelemo. Kaneko asagule malemba gakusaka kuŵalanga pakwiganya songa  jilijose. (Mpaka apate yine yakamucisya pambaliji mu lijiganyo 21 mpaka 23 m’buku jakuti Pindulani ndi Sukulu ya Utumiki wa Mulungu.) Cakusosekwasoni mnope cili kupopela kwa Yehofa, kum’ŵenda kuti ŵakamucisye kutagulila cenene Maloŵe gakwe.—Aŵalanje Ezara 7:10; Miyambo 3:13, 14.

13. (a) Ana kutagulila cenene malemba mu ngani kwamkamucisye uli mlongo jwine? (b) Ana kutagulila cenene malemba pamisongano kwakamucisye wuli wawojo?

¹³ Mlongo jwine jwa ku Australia jwasangalele mnope ni muŵatendele m’bale jwine pakutagulila cenene malemba pamisongano ja mpingo. Ali mwanace, mlongoju jwasimene ni yakusawusya yejinji. Kaneko jwalijiganyisye Baibulo mpaka jwalipelece kwa Yehofa. Nambope jwakayicilaga naga Yehofa akusamnonyela. Lisiku line yeleyi yacenjile. Ana catendekwe cici kuti asimicisye yakuti Yehofa akusamnonyela? Paŵapite kumisongano jwapikene kutagulila kwa lilemba line mu ngani. Kaneko jwaliganicisye lilembali mwakusokoka ni kulikamulanya ni malemba gane. * M’wejisoni komboleka kuti yatutendeceleje yampela yeleyi ligongo lyakutagulila cenene kwa Maloŵe ga Mlungu pamisongano ja mpingo kapena jekulungwa.—Neh. 8:12.

14. Ana mpaka tulosye camtuli kuti tukuyamicila Maloŵe ga Yehofa?

¹⁴ Kusala yisyene, tukusam’yamicila Yehofa ligongo lya Maloŵe gakwe, Baibulo. Yili yakusangalasya kuti jwatupele Baibulo ni kutulagusya kuti jicitama kwa ndaŵi josope. (1 Pet. 1:24, 25) M’yoyo, mpaka yiŵe cenene kuti tugaŵalanjeje Maloŵe ga Mlungu ndaŵi syosope, kugakamulicisya masengo paumi wetu, soni pakwakamucisya ŵane. Kutenda yeleyi mpaka kulosye kuti tukuganonyela soni kugayamicila. Soni cakusosekwa mnope cili cakuti mpaka tulosye kuti tukusamnonyela msyene Maloŵego, Yehofa Mlungu.