1. Ligongo cici ŵakulambila ŵa Yehofa akusaŵa ŵakusangalala? (Alole ciwulili cacili penanipa.)

ŴAMBONI SYA YEHOFA ali ŵandu ŵakusangalala. Kulikose kwali jemanjaji, cinga kumisongano ja mpingo, misongano jekulungwa soni payakutendekwa yine akusakunguluka mwakusangalala. Ana ligongo cici akusaŵaga ŵakusangalala? Ligongo lyekulungwa lili lyakuti akusammanyilila Yehofa “Mlungu jwakusangalala.” Jemanjaji akusamtumicila, soni akusalingalinga kumsyasya Yehofa. (1 Tim. 1:11; Sal. 16:11) Ligongo lyakuti Mlungu ali msyene kusangalala, jwalakwe akusaka kuti m’wejisoni tuŵeje ŵakusangalala, soni akusatupa magongo gejinji gakututendekasya kuŵa ŵakusangalala.—Det. 12:7; Jwak. 3:12, 13.

2, 3. (a) Ana kuŵa jwakusangalala kukusagopolela cici? (b) Ana ligongo cici kuŵa ŵakusangalala kukusaŵa kwakusawusya?

² Nambi wuli wawojo? Ana ali ŵakusangalala? Ana mpaka atende yamtuli kuti ajendelecele kuŵa ŵakusangalala? Kuŵa ŵakusangalala kukusagopolela kulipikana cenene, kuŵa jwakwikutila ni umi. Baibulo jikusalosya kuti ŵandu ŵali paunasi ni Yehofa ni ŵakusaŵa ŵakusangalala yisyesyene. Masiku agano, kuŵa ŵakusangalala kukusaŵa kwakusawusya. Ligongo cici?

 ³ Yikusaŵa yakusawusya kuŵa ŵakusangalala naga jwakunonyelwa jwetu ajasice kapena amtyosisye mumpingo, ulombela wetu paumasile nambosoni pagatumalile masengo. Yikusaŵasoni yakusawusya kuŵa ŵakusangalala naga pangali mtendele mwiŵasa, naga acimjetu ŵakumasengo kapena ŵakusukulu akutulagasya, nambosoni naga akutuŵika kundende ligongo lyakuŵa ŵakulupicika kwa Yehofa. Yeleyi mpaka yitendekasye kuti cilu cetu cigambeje kulwalalwala kapena kulagasika nganisyo. Nambope, Yesu Klistu, jwakusasangalala, jwalisoni Mwenye, jwanonyelaga kwatondoya ŵandu soni kwatendekasya ŵanduwo kuŵa ŵakusangalala. (1 Tim. 6:15; Mat. 11:28-30) Pa Kulalicila kwa Petumbi, Yesu jwasasile ndamo syejinji syampaka situtendekasye kuŵa ŵakusangalala mwangasamala kandu ni yakulingwa m’cilambo ca Satanaci.

4, 5. Ana mpaka tutende cici kuti tujendelecele kuŵa ŵakusangalala?

⁴ Yesu jwasasile cindu candanda soni cakusosekwa mnope. Jwalakwe jwatite, “Ŵakusangalala ali ŵandu ŵakusamanyilila yakusosecela yawo yausimu, pakuŵa Ucimwene wakwinani uli wa jemanjajo.” (Mat. 5:3) Ana tukusalosya camtuli kuti tukusosecela yindu yausimu? Tukusatenda yeleyi mwakulya cakulya causimu, kuyiwona yindu yausimu kuŵa yakusosekwa, soni kuŵika kulambila Mlungu jwakusangalala pamalo gandanda. Naga tukutenda yeleyi, tuciŵa ŵakusangalala mnope. Tucilimbisya cikulupi cetu pakukwanilicikwa kwa yindu yatulagucisye Mlungu. Soni “cembeceyo cakusangalasya” catukusacipata m’Baibulo cicitukamucisya kupilila patusimene ni yakusawusya.—Tit. 2:13.

⁵ Kulimbisya unasi wetu ni Yehofa kuli kwakusosekwa mnope ligongo mpaka kutukamucisye kuŵa ŵakusangalala mpaka kalakala. Ndumetume Paulo mwakusalilidwa jwalembile kuti, “Ndaŵi syosope asangalaleje mwa Ambuje [Yehofa]. Nguwilisyasoni, asangalaleje!” (Afil. 4:4) Kuti tusangalaleje ni unasi welewu, tukusosekwa kola lunda lwa Mlungu. Baibulo jikusati, “Jwakusangalala ali mundu jwapatile lunda soni mundu jwapatile umanyilisi. Kwa mundu jwakusalukamula mnope lunda yiciŵa mpela citela ca umi kwa jwalakwejo, soni jwakulukamula mnope caciŵa jwakusangalala.”—Mis. 3:13, 18.

6. Ana tukusosekwa kutendasoni cici kuti tuŵeje ŵakusangalala?

⁶ Nambope, kuti tuŵe ŵakusangalala mpaka kalakala, tukusosekwa kuŵalangaga Maloŵe ga Mlungu soni kugakamulicisyaga masengo. Yesu jwasasile mwakusimicisya kusosekwa kwakutenda yeleyi. Jwalakwe jwatite, “Naga akumanyilila yindu yeleyi, ali ŵakusangalala naga akuyitenda.” (Yoh. 13:17; aŵalanje Yakobo 1:25.) Yeleyi yili yakusosekwa mnope naga tukusaka kumanyilila yakusosecela yetu yausimu soni kuŵa ŵakusangalala mpaka kalakala. Nambo ana mpaka tutende yamtuli kuti tuŵeje ŵakusangalala atamose pali pana yindu yakututendekasya kuŵa ŵangasangalala? Kwende sambano tukambilane cindu cine caŵasasile Yesu pa Kulalicila kwa Petumbi.

7. Ana ŵandu ŵakulila mpaka aŵe camtuli ŵakusangalala?

⁷ “Ŵakusangalala ali ŵandu ŵakulila, ligongo tacatondoya.” (Mat. 5:4) Mwine mpaka tuliwusyeje kuti, ‘Ana mpaka yikombolece camtuli kwa ŵandu ŵakulila kuŵa ŵakusangalala?’ Yesu nganasalaga ya wosope ŵakulila. Ŵandu ŵajinji akulila ligongo lyakuti akusimana ni yakusawusya mu “ndaŵi japajika soni jakusawusya” jino. (2 Tim. 3:1) Nambo kulila kwawo ngakukwatendekasya kuŵa paunasi ni Yehofa. Ligongo lya  yeleyi ngakusaŵa ŵakusangalala. Yesu jwasalaga ya ŵandu ŵakusamanyilila yakusosecela yawo yausimu. Jemanjaji akusalila ligongo lyakwawona ŵandu ŵajinji ali mkutenda yindu yangamsangalasya Mlungu. Akusamanyililasoni kuti ali ŵakulemwa, soni akuyiwona yindu yakusawusya yayikutendekwa m’cilamboci. Yehofa akusiŵamanyilila ŵakusalila kutyocela pasi pamtimaŵa, mwamti akusiŵatondoya kupitila m’Maloŵe gakwe soni kola cembeceyo cakutama ni umi mpaka kalakala.—Aŵalanje Esekiele 5:11; 9:4.

8. Ligongo cici kuŵa ŵakulinandiya kukusakamucisya kuŵa ŵakusangalala?

⁸ “Ŵakusangalala ali ŵandu ŵakulinandiya, pakuŵa cacipocela cilambo capasi.” (Mat. 5:5) Ana kuŵa ŵakulinandiya mpaka kututendekasye camtuli kuŵa ŵakusangalala? Panyuma pakumanyilila cenene usyesyene, ŵandu akusacengaga ndamo syawo. Ndaŵi sine ŵaliji ŵangalwe, ŵaciwawa, ŵangakaŵa kutumbila. Nambo apano awete “umundu wasambano” soni akulosya “canasa cekulungwa, umbone mtima, kulinandiya, kufasa, ni kupilila.” (Akolo. 3:9-12) Yakuyicisya yakwe, jemanjaji akusaŵa ni umi wakusangalala, wamtendele soni cinonyelo. Konjecesya pelepa, Maloŵe ga Mlungu gakusasala kuti ŵandu ŵeleŵa “cacipocela cilambo capasi.”—Sal. 37:8-10, 29.

9. (a) Ana Yesu ŵagopolelaga cici paŵaŵecete kuti ŵandu ŵakulinandiya “cacipocela cilambo capasi”? (b) Ligongo cici ŵa ‘sala ni njota ja cilungamo akusaŵa ŵakusangalala?

⁹ Ana Yesu ŵagopolelaga cici paŵasasile kuti ŵandu ŵakulinandiya “cacipocela cilambo capasi”? Ŵasagulwe cacipocela cilambo capasi pacacilamulilaga cilamboci mpela mayimwene soni ŵambopesi. (Ciw. 20:6) Nambo ŵandu ŵajinji ŵanganakola cembeceyo cakwawula kwinani cacipocela cilambo capasi mu litala lyakuti jemanjaji cacitama pacilambo capasici mpaka kalakala ali ŵamlama, ŵamtendele, soni ŵakusangalala. Ŵasagulwe soni ŵangondolo sine akusaŵa ŵakusangalala ligongo lyakuŵa ‘ŵasala ni njota ja cilungamo.’ (Mat. 5:6) Sala ni njota jawo ja cilungamo jicimala m’cilambo casambano. (2 Pet. 3:13) Pandaŵi jele Mlungu cacimasya yakusawusya yosope, ŵandu ŵakulungama caciŵa ŵakusangalala soni ngasalila ligongo lya yitendo yakusakala.—Sal. 37:17.

10. Ana canasa cikusagopolela cici?

¹⁰ “Ŵakusangalala ali ŵandu ŵacanasa, ligongo cacitendeledwa canasa.” (Mat. 5:7) Kuŵa ŵacanasa kukusagopolela kwanonyela ŵane soni kwatendela canasa ŵandu ŵakulaga. Nambope, canasa nganiciŵa gamba kulosya mwaukupikanila mumtima. Baibulo jikusatujiganya kuti kuŵa jwacanasa kukusapwatikapo kutenda yindu yakwakamucisya ŵane.

11. Ana tukulijiganya cici pangani jakwatendela ŵane canasa kutyocela m’citagu ca Msamaliya jwacanasa?

¹¹ Aŵalanje Luka 10:30-37. M’citagu ca Yesu cakwamba Msamaliya jwacanasa cikusasala mwakupikanika cenene gopolela kwa canasa. Msamaliyaju camkamwile mnope canasa mwamti yamtendekasisye kuti amkamucisye mundu juŵawulele ni ŵaciswamba. Panyuma pakusala citaguci, jwalakwe jwatite, “Mmwejosoni, mjawule, mkatendeje m’yoyo.” Paligongo lyeleli, mpaka tuliwusyeje kuti, ‘Ana ngusatendaga yakulandana ni yeleyi? Ana ngusatendaga mpela muŵatendele Msamaliya jwacanasa jula? Naga ŵane akulaga, ana ngusinatendelaga canasa? Ana mpaka ndende cinecakwe kuti nakamucisye?’ Mwambone, ana mpaka nakamucisye ŵakalambale mumpingo, acakongwe ŵamasije, kapena ŵanace ŵele acinangolo ŵawo ngakumtumicila Yehofa? Ana mpaka ‘mbeceteje yakulimbikasya kwa ŵakasice mtima’?’—1 Ates. 5:14; Yak. 1:27.

12. Ana kwatendela ŵane canasa kukusatukamucisya camtuli kuŵa ŵakusangalala?

¹² Nambope, ana kuŵa jwacanasa kukusamtendekasya wuli mundu kuŵa jwakusangalala? Kwatendela ŵane canasa, jili mbali jakupeleka,  yakuyicisya yakwe tukusaŵaga ŵakusangalala. Konjecesya pelepa, tukumanyilila kuti tukumsangalasya Yehofa. (Mase. 20:35; aŵalanje Ahebeli 13:16.) Pakwamba ya mundu jwakusiŵaganicisya ŵane, Mwenye Daudi, jwatite, “Yehofa cacimcenjela soni kumkulupusya. Jwalakwe caciŵa jwakusangalala pacilambo capasi.” (Sal. 41:1, 2) Naga tukwatendela ŵane canasa, nombe najo Yehofa cacitutendela canasa soni tuciŵa ŵakusangalala mpaka kalakala.—Yak. 2:13.

13, 14. Ana pana kamulana kwamtuli pasikati pa kuŵa ŵaswela mtima soni kuŵa ŵakusangalala?

¹³ Yesu jwatite, “Ŵakusangalala ali ŵandu ŵaswela mtima, ligongo tacim’wona Mlungu.” (Mat. 5:8) Kuti tuŵe ŵaswela mtima, tukusosekwa kola nganisyo syeswela soni tukumbileje yindu yambone. Kutenda yeleyi kuli kwakusosekwa mnope naga tukusaka kuti Yehofa akujiticisyeje kulambila kwetu.—Aŵalanje 2 Akolinto 4:2; 1 Tim. 1:5.

¹⁴ Ŵandu ŵaswela mtima akusaŵa paunasi wambone ni Yehofa. Jwalakwe ŵatite, “Ŵakusangalala ali ŵandu ŵakusacapa mikanjo jawo.” (Ciw. 22:14) Ana jemanjaji ‘akucapa mikanjo jawo’ m’litala lyapi? Aklistu ŵasagulwe ‘akusacapa mikanjo jawo’ m’litala lyakuti Yehofa akusiŵawona kuŵa ŵaswela soni cacapa umi wangawa nambosoni cacisangalala ni umi wangamala kwinani. Likuga lyekulungwa lyalikwete cembeceyo cakutama ni umi pacilambo capasi, likusasangalalasoni kuŵa paunasi ni Mlungu. Jemanjaji atamose apano ‘akusacapa mikanjo jawo kuŵa jeswela kupitila m’miyasi ja Mwanace jwa ngongolo.’—Ciw. 7:9, 13, 14.

15, 16. Ana ŵaswela mtima mpaka yikombolece camtuli ‘kum’wona Mlungu’?

¹⁵ Yehofa ŵatite, “Pangali mundu jwampaka ambone nikuŵa ni umi.” (Eks. 33:20) Sambano, ana yikusakomboleka camtuli ŵandu ŵaswela mtima “kum’wona Mlungu”? Maloŵe ga Cigiliki gaŵagagopolele kuti “kum’wona” mpaka gagopolele kum’wona munganisyo, kumpikanicisya soni kummanyilila. M’yoyo, kum’wona Mlungu kukusagopolela kupikanicisya mwaŵelele Mlungujo soni kusinonyela ndamo syakwe. (Aef. 1:18) Yesu jwalosisye ndamo sya Mlungusi paŵaliji pacilambo capasi. Jwalakwe jwatite, “Mundu jwambweni une ŵawenisoni Atati.”—Yoh. 14:7-9.

¹⁶ Konjecesya pakumanyilila ndamo sya Mlungu, ŵakulambila ŵasyesyene mpaka ‘am’wone Mlungu’ mwakulola yakusati pakutukamucisya. (Yob. 42:5) Jemanjajisoni akusaŵikaga nganisyo syawo pa majali gasunjile Mlungu kwa ŵandu ŵakwendelecela kuŵa ŵaswela soni kumtumicila jwalakwe mwakulupicika. Nambo ŵasagulwe cacim’wona Yehofa pacacijimuka ku ŵawe ni kwawula kwinani.—1 Yoh. 3:2.

17. Ligongo cici ŵandu ŵakuyikasya mtendele akusaŵa ŵakusangalala?

¹⁷ Kaneko Yesu ŵasasile kuti, “Ŵakusangalala ali ŵakuyikasya mtendele.” (Mat. 5:9) Ŵandu ŵakusatenda yakomboleka kuti ayikasye mtendele akusaŵa ŵakusangalala. Ndumetume Yakobo jwalembile kuti, “Cilungamo cili cisogosi ca mbeju syele ŵandu ŵakuyikasya mtendele akusapanda mumtendele.” (Yak. 3:18) Naga tutindene nganisyo ni mundu jwine, cinga mumpingo kapena mwiŵasa, mpaka tumcondelele Yehofa kuti atukamucisye kuti tuyikasye mtendele. Kaneko, Yehofa cacitupa msimu wakwe weswela, wampaka utukamucisye kulosya ndamo sya Ciklistu, soni kuŵa ŵakusangalala. Yesu jwagombelecesye kusosekwa kwakutendapo kandu mwacitema kuti tuyikasye mtendele. Jwalakwe jwatite, “Naga ayice ni mtuka wawo pamalo pakupelecela mbopesi, nambo ali pelepo akumbucile kuti mlongo mjawo akwete nawo magongo alece mtukawo pasogolo pamalo gakupelecela mbopesigo. Ajawule akajilane ni mlongo mjawojo, kaneko ayice ni kupeleka mtuka wawowo.”—Mat. 5:23, 24.

18, 19. Ligongo cici Aklistu mpaka aŵe ŵakusangalala atamose kuti akulagasidwa?

¹⁸ “Mŵeje ŵakusangalala ŵandu pakumnyosya soni pakumlagasya ni kumlambucisyaga yakusakala ya mtundu wuliwose ligongo lya une.” Ana Yesu ŵagopolelaga cici? Jwajendelecele kuŵeceta kuti, “Msangalaleje mnope ligongo mbote jenu jili jekulungwa kwinani, pakuŵa mwelemu ni muŵatendelesoni pakwalagasya ŵakulocesya ŵaŵapali jemanja mkanimpagwe.” (Mat. 5:11, 12) Pandaŵi jele ŵandumetume ŵaputidwaga soni kwalamula kuti alece kulalicila, “ŵatyosile pameso pa Luŵala Lwekulungwa lwa Ayuda ali mkusangalala.” Atamose kuti nganasangalalaga ni kulagasidwaku, nambope, jemanjaji ŵasangalalaga “ligongo Mlungu ŵaweni kuti ali ŵakuŵajilwa kutendeledwa cipongwe ligongo lya lina lya Yesu.”—Mase. 5:41.

¹⁹ Masiku agano, ŵandu ŵa Yehofa nombe nawo akupilila mwakusangalala pakulagasidwa ligongo lyakumtumicila jwalakwe. (Aŵalanje Yakobo 1:2-4.) Mwakulandana ni ŵandumetume, ngatukusasangalala ligongo lyakulagasidwa kapena kutendeledwa ya ngalwe. Nambo naga tukwendelecela kuŵa ŵakulupicika kwa Yehofa, jwalakwe cacitupa macili gakuti tukombole kupilila. Kwende tulole yayamtendecele Henryk Dornik ni mkulugwe. Mwambone, mu August 1944, jemanjaji ŵatumisye ku ndende jakulagacisya ŵandu. Ŵandu ŵakusisya ŵatite, “Yili yangakomboleka kwakanganicisya kuti atendeje cilicose. Yakusawusya yakusasimana nayo yikusiyatendekasya kuti aŵeje ŵakusangalala.” M’bale Dornik, jwatite, “Atamose kuti kusimana ni yakusawusyaku nganikuŵa kwakusangalasya, kulimba mtima soni kulupicika kwangu kwa Yehofa kwangamucisye kuŵa jwakusangalala. . . . Mapopelo gakutyocela pasi pamtima gangamucisye kumŵandicila mnope Yehofa soni yaŵatesile pakungamucisya yasimicisye kuti jwalakwe ali jwakungamucisya jwangu jwakudalilicika.”

20. Ligongo cici tukusaŵa ŵakusangalala ligongo lyamkutumicila “Mlungu jwakusangalala”?

²⁰ Naga Yehofa, “Mlungu jwakusangalala,” akusatunonyela, mpaka tuŵe ŵakusangalala atamose patusimene ni yakusawusya, cinga tukulagasidwa, ŵamwiŵasa mwetu akutusisya, kulwala, kapena tukalambele. (1 Tim. 1:11) Tukusaŵagasoni ŵakusangalala ligongo lya yindu yaŵatusalile Mlungu kuti cacitutendela, “jwanganaŵa alambwisye.” (Tit. 1:2) Mlungu pacacikwanilisya yaŵatusalile kuti cacitutendelayi, ngasitukumbucilasoni yakusawusya yatukusimana nayo apano. Mu Paladaiso, majali gakutyocela kwa Yehofa gaciŵa gejinji kupundana ni mwatukusaganicisya soni tuciŵa ŵakusangalala mnope. Kusala yisyene, ‘tucisangalala ni mtendele wejinji.’—Sal. 37:11.