KUSYUNGULILA pacilambo cosope capasi, acakulungwa ŵa mumpingo akusayamicila mnope upile wawo wakutumicila pasikati pa ŵandu ŵa Mlungu. Tukusayamicila ligongo lyakola ŵandu ŵeleŵa. Nambope, pacangakaŵapa, papali kucenga. Acakulungwa ŵa mumpingo ŵacekulupe ŵaŵendedwe kuti akusosekwa kupeleka maukumu gane kwa ŵacinyamata. M’litala lyamtuli?

M’litala lyakuti ŵakulolela mkuli soni ŵakwiganya masukulu ga undumetume, ŵakwete yaka 70 ngakusosekwa kwendelecela kutumicila m’maukumuga. Nambosoni, acakulungwa ŵa mumpingo ŵakwete yaka 80 akusosekwa kupeleka maukumu gakulekanganalekangana kwa acakulungwa ŵa mumpingo ŵacinyamata. Maukumu gakwe gali mpela kuŵa Jwakulondesya Masengo ga Komiti ja Nyambi soni Jwakulondesya Masengo ga Acakulungwa. Ana acakulungwa ŵa mumpingo ŵacekulupeŵa ŵatesile yamtuli ali apikene ya kucengaku? Jemanjaji aŵele mkulosya kulupicika kwa Yehofa soni ku likuga lyakwe.

M’bale jwine lina lyakwe Ken, juŵatumicile mpela Jwakulondesya Masengo ga Komiti ja Nyambi kwa yaka 49 jwaŵecete kuti, “Nakamulene ni nganisyosi. Lisiku line kundaŵi, napopesile kwa Yehofa, kumsalila nganisyo syangu pakwamba ya kusosekwa kwa abale ŵacinyamata kuti atumicile mpela Jwakulondesya Masengo ga Komiti ja Nyambi.” Yaŵaŵecete Ken, yikulandana ni nganisyo sya Aklistu ŵacekulupe ŵajinji ŵakulupicika pacilambo cosope. Kusala yisyene, ligongo lyakuti jemanjaji akusanonyela kwatumicila  abale ni alongo, pandanda yaliji yakusawusya kwiticisya kucengaku.

Esperandio jwaŵele mkutumicila mpela Jwakulondesya Masengo ga Acakulungwa jwatite, “Ndili mbikene ya kucengaku yangwayiye.” Nambope jwayamicile kuti, “Kucengaku kwangamucisye kuti mbateje ndaŵi jakusamalila cilu cangu cekalambaleci.” Esperandio akwendelecela kutumicila Yehofa mwakulupicika soni akukamucisya mnope mumpingo wakwe.

Nambi uli pakwamba ya Ŵakulolela ŵakwendajenda ŵacekulupe ŵawucenjile undumetume wawo? Allan juŵatumicile mpela jwakulolela jwakwendela mipingo kwa yaka 38 jwatite, “Ndili mbikene ya kucengaku yasokonasisye nganisyo.” Nambope jwamanyilile kuti kwajiganya abale ŵacinyamata kuti aŵajilwe ukumu winewakwe kukusaŵa ni yakuyicisya yambone soni apano jukwendelecela kutumicila mwakulupicika.

Russell, jwatumicile mpela jwakulolela jwakwendela mipingo soni jwakwiganya sukulu ja undumetume kwa yaka 40, jwasasile kuti jwalakwe yalumo ni ŵamkwakwe yakwayiye pandanda. Jemanjaji ŵatite, “Twawunonyelaga mnope undumetume wetu mwamti twayiwonaga kuti citukombole kwendelecela kutenda undumetumewu.” Russell ni ŵamkwakwe akukamulicisya masengo yaŵalijiganyisye soni yasimene nayo pakuwulimbikasya mpingo, mwamti mpingo wosope ukusangalala ni liŵasali.

Atamose kuti wawojo nganapikaneje mumtima mwawo mpela muŵapikanilaga abale ŵatwasasile pacangakaŵapa, ngani jajili pa 2 Samuele mpaka jakamucisye kupikanicisya muŵapikanilaga jemanjaji.

Aganicisye yayatendekwe pandaŵi jele mwanace jwa Mwenye Daudi, Abisalomu, jwajimucile. Daudi jwatisile ku Yelusalemu kwawula ku Mahanayimu, ca kungopoko lyuŵa kwa Lusulo lwa Yolodani. Paŵaliji kweleko, Daudi ni ŵandu ŵane ŵaŵaliji nawo ŵalajililaga kuti apate yakusosecela ya paumi. Ana akukumbucila yayatendekwe?

Acalume ŵatatu ŵaŵatamaga mumkuli waŵaliji mwanja Daudi, ŵayice nayo yindu mpela yagonela, yakulya yakulekanganalekangana, soni yindu yine. Balisilayi jwaliji m’likuga lya acalume ŵatatuŵa. (2 Sam. 17:27-29) Panyuma pakuti yakulingalinga ya kwimucila ya Abisalomu yilepelece, Daudi jwawujile ku Yelusalemu mwamti Balisilayi ŵampecesye mpaka ku Lusulo lwa Yolodani. Daudi ŵamlimbikasisye jwalakwe kuti ajawule yalumo ku Yelusalemu. Mwenye Daudi jwamsalile jwalakwe kuti cakampeje yakulya, atamose kuti Balisilayi jwaliji “mundu jwamsicile mnope” mwamti nganasosecelaga kumpa yakulya yine. (2 Sam. 19:31-33) Daudi jwayamicile ndamo syambone sya Balisilayi soni nganisyo silisyose syakapelece. Kwa Balisilayi, ukaliji upile kutumicila soni kamula masengo m’nyumba ja mwenye.

Kulupicika soni kulinandiya kwa Balisilayi kwawonecele pajwasasile jika kuti jwakwete yaka 80. Jwalakwe jwasasilesoni kuti, “Ana mpaka ngombole kulekanganya cambone ni cakusakala”? (2 Sam. 19:35) Ana jwagopolelaga cici? Komboleka kuti Balisilayi jwamanyililaga yejinji ligongo lyakuti jwatemi ni umi kwa ndaŵi jelewu. Soni yaliji yakomboleka kupeleka lunda lwakamucisya kwa Daudi mpela muŵatendele “acakulungwa” ŵane kwa Mwenye Lehobowamu.  (1 Ayi. 12:6, 7; Sal. 92:12-14; Mis. 16:31) M’yoyo, yaŵaŵecete Balisilayi yakuti nganaŵa akombwele kulekanganya cambone ni cakusakala, komboleka ŵagopolelaga kuti ligongo lya kucekulupa ngamkanakombola kutenda yejinji. Jwalakwe jwajiticisye kuti ucekulu wakwe waliji uli usokonasisye kala kapikane kakwe. (Jwak. 12:4, 5) M’yoyo, Balisilayi jwamsalile Daudi kuti akamjigale Cimamu kuti alongane najo ku Yelusalemu. Jweleju komboleka jwaliji mwanace jwamlume jwa Balisilayi.—2 Sam. 19:35-40.

Balisilayi jwakanile upile wakutumicila m’nyumba ja Mwenye ligongo lya ucekulu. Kucenga kwatukusasile kundanda kula kwatendekwe pa ligongo lyakulandana ni lyeleli. Kucengaku nganikuŵa kwamba ganicisya ya yakusawusya ya mundu pajika mpela muyaŵelele ni Balisilayi. Pasosekwaga ganicisya yayaliji yambone kwa acakulungwa ŵa mumpingo ŵakulupicika ŵakutumicila pa cilambo cosope.

Acalume Ŵaciklistu ŵakulinandiyaŵa mpaka ajiticisye kuti likuga lya Yehofa liciŵa lyakulimba msogolo, naga maukumu gagaŵele mkusamalilidwa kwa ndaŵi jelewu ni acakulungwa ŵacekulupeŵa gakupelecedwa kwa abale ŵacinyamata. Ndaŵi syejinji, abale ŵacekulupe ni ŵakusiŵajiganyaga abale ŵacinyamata, mpela muŵatendele Balisilayi kuti ŵamjiganyisye mwanace jwakwe soni ndumetume Paulo ŵamjiganyisye Timoteo. (1 Akoli. 4:17; Afil. 2:20-22) Abale ŵacinyamataŵa alosisye kuti ali “mituka ja acalume,” ŵakupakombola “kulimbikasya m’mpingo wele wawuli cilu ca Klistu.”—Aef. 4:8-12; awanicisye ni Numeli 11:16, 17, 29.

Ŵandu ŵajinji mumpingo wa Mlungu pa cilambo cosope capasi ŵaŵaŵendedwe kuti alece maukumu gane, sambano akwete upile wakutenda maundumetume gasambano.

Marco jwaŵaliji jwakulolela jwakwendela mipingo kwa yaka 19 jwatite, “Sambano ngwete upile wakwakamucisya acalume ŵangakulupilila ŵele aciŵamkwawo ali alongo, mumpingo wetu.”

Geraldo jwatumicileje mpela jwakwendajenda kwa yaka 28 jwatite, “Apano cakulinga cetu cili kwakamucisya abale ni alongo ŵaŵalesile kutenda yindu ni mpingo nambosoni kutendesya majiganyo ga Baibulo gejinji.” Jwasasilesoni kuti jwalakwe pampepe ni ŵamkwakwe akutendesya majiganyo ga Baibulo gakwana 15 soni abale ni alongo ŵaŵalesile kutenda yindu ni mpingo ŵala, apano ŵajinji atandite kusimanikwa pa misongano.

Allan, jwatumsasile jula jwatite, “Sambano tukwete upile wakutenda yejinji mu masengo gakulalicila. Tukusangalala kulalicila ku malo gakusimanikwa ŵandu ŵajinji, kulalicila malo gamalonda, soni kwalalicila acimjetu ŵakuŵandikana nawo nyumba, mwamti ŵaŵili mwa jemanjaji pakwete payice kumisongano.”

Naga wawojo ali m’bale jwakulupicika apocele undumetume wasambano pasikati pa ŵandu ŵa Mlungu, pana litala line lyapajika lyampaka akamucisye. Mpaka akamucisye masengo ga Yehofa mwakwasalila abale ŵacinyamata ŵa mumpingo mwawo, yindu yakamucisya yaŵele ali mkusimana nayo. Russell, jwatumsasile jula jwatite, “Yehofa akwajiganya soni kwakamulicisya masengo anyamata ŵakwete lunda. Mkamulano wa Ciklistu ukomboleka ligongo lya masengo gakukamula gakwiganya soni kucinga.”—Alole libokosi lya mtwe wakuti “Ŵakamucisyeje Ŵacinyamata Kuti Akamulicisye Masengo Lunda Lwawo Pakumtumicila Mlungu.”

Naga pacangakaŵapa apocele undumetume wasambano, akadandawula. Akamucisye kala ma umi ga ŵandu ŵajinji ligongo lya masengo gakamwile mwakutyocela pasi pa mtima, soni mpaka ajendelecele kutenda yeleyi. Yehofa ŵaliji mkwanonyela soni cajendelecele kwanonyela.

Kupunda yosopeyi, atendekasisye kuti Yehofa aŵe jwakusangalala. Jwalakwe “ngasaliŵalila masengo gawo soni cinonyelo cawo caŵacilosisye pa lina lyakwe, mwakwatumicila soni pakwendelecela kwatumicila ŵaswelawo.” (Aheb. 6:10) Yaŵecete Yehofayi yikwasimicisya wosope kuti jwalakwe cacitenda yejinji mwangajigalila winji wa masengo gatukamwile. Jemanja ali ŵakusosekwa  kwa Yehofa mwamti jwalakwe ngaŵa mkwaliŵalila soni ngasaliŵalila masengo gakamwile soni pakwendelecela kulingalinga kutenda yakumsangalasya jwalakwe.

Nambi uli naga wawojo nganasimana ni kucenga kulikose kwakusasile penanipa? Nganiji mpaka jakamucisyepe. M’litala lyamtuli?

Naga mumpingo mwawo mwana abale ŵane ŵacikulile ŵaŵacenjile undumetume wawo, jemanja ŵacinyamata mpaka alijiganye yejinji kutyocela kwa jemanjaji. Aŵendeje cikamucisyo kwa abale ŵacekulupeŵa soni apikanileje nganisyo syawo. Alole yaŵatite pakamulicisya masengo mwakulupicika yaŵasimene nayo pa undumetume wawo.

Cinga ali ŵacekulupe ŵakutumicila m’litala lyasambano kapena ali m’bale kapena mlongo jwampaka apate cikamucisyo kutyocela kwa abale ŵacekulupe, akumbucileje kuti Yehofa akusayamicila kulupicika kwa abale ŵatumicile Yehofa kwa yaka yejinji soni ŵakwendelecela kumtumicilape.