1. Ana ndamo sya cilamboci mpaka situkwaye camtuli?

LIGONGO cici yikusaŵa yakusawusya kukamulicisya masengo yatukusalijiganya m’Maloŵe ga Mlungu? Ligongo limo lili lyakuti, kuti tutende cindu cakuŵajilwa tukusasosekwa kuŵa ŵakulinandiya. “M’masiku ga mbesi” gano, tukutama ni ŵandu ŵele ali “ŵakulinonyela, ŵakunonyela mbiya, ŵakulipikana, ŵakulikwesya,” soni “ŵangaligosa.” (2 Tim. 3:1-3) Mpela ŵakutumicila ŵa Mlungu, tukusamanyilila kuti ndamosi sili syakusakala, nambo ndaŵi sine mpaka tuyiwoneje kuti ŵakutenda ndamosi yindu yikwajendela cenene, soni kuti akusangalala ni umi. (Sal. 37:1; 73:3) Mwine mpaka tuliwusyeje kuti, Ana kuŵika yakusaka ya ŵane pamalo gandanda pana umbone uliwose? Ana ŵandu mpaka ajendelecelepe kunjimbicisya naga nguŵa jwakulinandiya? (Luka 9:48) Naga tukukunda ndamo ja cilamboci kutukwaya, mpaka yisokonasye unasiwetu ni abale ŵetu, nambosoni mpaka yiŵe yakusawusya kwa ŵane kuti atumanyilile kuti tuli Aklistu. Nambo patukulijiganya yisyasyo ya ŵandu ŵakutumicila Mlungu ŵaŵaliji ŵakulupicika tucipata yakuyicisya yambone.

2. Ana mpaka tulijiganye cici kutyocela kwa ŵakutumicila ŵa Mlungu ŵakulupicika ŵa munyumamu?

 ² Ana cici cacakamucisye ŵakutumicila ŵakulupicika ŵa munyumamu kuti aŵe acimjakwe ŵa Mlungu? Ana ŵamsangalasyaga camtuli jwalakwe? Ana ni kwapi kuŵapataga cikamucisyo kuti apakombole kutenda yindu yambone? Patukuŵalanga yisyasyo yawo m’Baibulo soni kuyiganicisyaga yatuŵalasileyo, cikulupi cetu ciciŵa cakulimba.

3, 4. (a) Ana Yehofa akusatujiganya camtuli? (b) Kuti cikulupi cetu ciŵe cakulimba, ligongo cici tukusasosekwa yejinji m’malo mwakwamba kolape lunda?

³ Yehofa akusatupa yindu yayikusatukamucisya kuti cikulupi cetu ciŵe cakulimba. Jwalakwe akusatupa camuko cambone soni kutujiganya kupitila m’Baibulo, m’mabuku getu, pa webusayiti jetu, pa JW Broadcasting nambosoni m’misongano. Nambo mwakamulana ni maloŵe ga Yesu gagali pa Yohane 4:34, pakusasosekwa yejinji ngaŵa kwamba kolape lunda. Jwalakwe jwatite, “Cakulya cangu cili kutenda lisosa lya juŵandumile soni kuti malisye masengo gakwe.”

⁴ Kwa Yesu kutenda lisosa lya Mlungu kwaliji mpela cakulya. Mpela mwayikusaŵela kuti kulya cakulya cambone kukusatutendekasya kuti tukole cilu cambone, kutenda lisosa lya Mlungu kukusakamucisya kuti cikulupi cetu ciŵe cakulimba. Mwambone, ana pakwete papite ku msongano wakosecela undumetume ali apesile, nambo pakuwujila ku nyumba akusaŵa ali mkusangalala?

5. Ana tukusapata majali gamtuli ligongo lyakuŵa ŵalunda?

⁵ Naga tukusakamulicisya masengo yakusasaka Yehofa kuti tutendeje, nikuti tuli ŵalunda. (Sal. 107:43) Mwamti ŵandu ŵalunda akusapata maumbone gejinji. Baibulo jikusasala kuti, “Yosope yamkusayinonyela nganiyiŵa yilandene ni lunda. . . . Kwa mundu jwakusalukamula mnope lunda yiciŵa mpela citela ca umi kwa jwalakwejo, soni jwakulukamula mnope caciŵa jwakusangalala.” (Mis. 3:13-18) Yesu jwasalile ŵakulijiganya ŵakwe kuti, “Naga akumanyilila yindu yeleyi, ali ŵakusangalala naga akuyitenda.” (Yoh. 13:17) Ŵakulijiganya ŵa Yesu akaliji ŵakusangalala ligongo lyakutenda yaŵasalile Yesu. Mpela mbali ja umi wawo, jemanjaji ŵasosekwe kuti akuyeje yaŵajiganyisye Yesu soni cisyasyo cakwe.

6. Ligongo cici tukusosekwa kwendelecela kamulicisya masengo yatukusalijiganya?

⁶ Masiku agano, tukusosekwa kamulicisyaga masengo yatukusalijiganya. Tuwanicisye m’yi. Jwakulinganya magalimoto mpaka akole yida yakamulila masengo, lunda soni yindu yine. Nambo pangali campaka apate naga ngakukamulicisya masengo yinduyi. Atamose kuti pakwete pakamwile masengoga, akusosekwa kwendelecela kamulicisya masengo lundalo kuti ajendelecele kuŵa jwakulinganya magalimoto jwambone. Mwakulandana ni yeleyi, patwalijiganyisye usyesyene kandanda twaliji ŵakusangalala ligongo lyakamulicisya masengo yatwalijiganyisyeyo. Nambope kuti tujendelecele kuŵa ŵakusangalala, lisiku lililyose tukusosekwa kwendelecela kamulicisya masengo yakusatujiganya Yehofa.

7. Ana mpaka tulijiganye cici kutyocela pa yisyasyo ya m’Baibulo?

⁷ Mu ngani ajino citulijiganye mbali syakulekanganalekangana syampaka silinje kulinandiya kwetu. Citulijiganyesoni yayakamucisye ŵakutumicila ŵakulupicika ŵakala kwendelecela kuŵa ŵakulinandiya. Kupwatika pa kuŵalanga Baibulo, tukusosekwa kutenda yejinji. Tukusosekwa kuyiganicisyaga yatukuŵalangayo soni kuyikamulicisya masengo.

8, 9. Ana tukulijiganya cici pa kulinandiya kwa Paulo kutyocela pa lilemba lya Masengo 14:8-15, (Alole ciwulili cacili kundanda kwa nganiji.)

⁸ Cakulinga ca Mlungu cili cakuti “ŵandu, cinga aŵe ŵamtundu wamtuli, akulupuce ni kuŵa ŵakumanyilila cenene usyesyene.” (1 Tim. 2:4) Ana ŵandu ŵanganalijiganye usyesyene akusiŵawona camtuli? Atamose kuti ndumetume Paulo jwalalicilaga m’nyumba syakupopelela kwa ŵandu ŵaŵaliji ali amanyilile panandi ya Mlungu, nambope jwalakwe jwalalicilagasoni kwa ŵandu ŵaŵalambilaga milungu jaunami. Kwalalicila ŵandu ŵeleŵa kwalinjile kulinandiya kwa Paulo.

⁹ Mwambone, paulendo wandanda wa umishonale wa Paulo, ŵandu ŵa ku Lukawoniya ŵam’wonaga Paulo soni Banaba kuŵa milungu, mwamti ŵatandite kwakolanga mena ga milungu jawo mpela, Seu soni Heme. Ana Paulo ni Banaba jwajigalice ni yeleyi? Ana kwacemelelaku kukaliji mpela cakwatamika mtima pasi, kutyocela pa yakusawusya yaŵaliji ali asimene nayo m’misinda jiŵili jaŵaliji ali alalicile munyumamu? Ana ŵaganisisye kuti ŵanduŵa akakamucisye kuwandisya utenga wambone? Ata panandi. Ndaŵi jijojo Paulo ni Banaba ŵapapwile yakuwala yawo ni kuwutucila kuŵaliji ŵanduko kaneko ŵagumisile kuti, “Ligongo cici mkutenda yeleyi? M’wejisoni tuli ŵandu mpela jemanja.”—Mase. 14:8-15.

10. Ana ligongo cici Paulo ni Banaba, nganaliwona kuŵa ŵakusosekwa mnope kwapunda ŵandu ŵa ku Lukawoniya?

¹⁰ Atamose kuti Paulo ni Banaba ŵaŵecete kuti nombenawo ŵaliji ŵangali umlama, nganagopolelaga kuti kalambile kawo kaliji kakulandana ni ka ŵandu ŵa ku Lukawoniya. Mlungu ŵatumisye Paulo ni Banaba mpela amishonale. (Mase. 13:2) Jemanjaji ŵasagulidwe ni msimu weswela soni ŵakwete cembeceyo cambone. Nambo lyeleli nganiliŵa ligongo lyakuliwona kuŵa ŵakusosekwa mnope kwapunda ŵane. Jemanjaji ŵamanyililaga kuti ŵandu ŵeleŵa ŵakwetesoni upile wakola cembeceyo cakwinani naga akapikanile utenga wambone.

11. Patukulalicila, ana mpaka tusyasye camtuli cisyasyo cambone ca Paulo cakuŵa jwakulinandiya?

¹¹ Kwende tulole litala lyandanda lyampaka tulosye kuti tuli ŵakulinandiya. Mwakulandana ni Paulo, masengo getu gakulalicila kapena yatuyikombwele kutenda ligongo lya cikamucisyo ca Yehofa yikatutendekasyaga kuliwona kuŵa ŵakusosekwa mnope kwapunda ŵane. Mwambone, mpaka tuliwusyeje kuti, ‘Ana ŵandu ŵa mumkuli wangu ngusinawona camtuli? Ana ndili mundu jwalusagu pakwamba yamtundu wine wa ŵandu?’ Kusyungulila pacilambo cosope capasi, Ŵamboni sya Yehofa akusasosa ŵandu ŵalung’wanu ŵampaka apikanile utenga wambone. Mwambone, ŵandu ŵane akusalijiganya ciŵeceto cine kapena ndamo ja ŵandu ŵele ŵandu ŵane akusiŵawona kuŵa ŵangasosekwa. Nambo ŵangalipikana kuti ali ŵakusosekwa mnope kwapunda ŵakwalalicilawo. M’malo mwakwe, akusalinjilila kumpikanicisya jwalijose ni cakulinga cakuti amkamucisye kupikanicisya Utenga wa Ucimwene.

12. Ana Epafula jwalosisye camtuli kuti jwaganicisya ŵane?

¹² Litala lyaŵili lyampaka tulosye kuti tuli ŵakulinandiya lili kwapopelela abale ni alongo ŵetu ‘ŵakwete cikulupi mpela cetu.’ (2 Pet. 1:1) Yeleyi ni yajwatesile Epafula. Paulo paŵaliji pa ukayidi wa panyumba ku Loma, jwalembele Aklistu ŵa ku Kolose pakwamba ya Epafula kuti, “Jwalakwe akusiŵapopelela jemanja mwamtawu.” (Akolo. 4:12) Epafula ŵamanyililaga cenene abaleŵa soni ŵanonyelaga mnope. Atamose  kuti Epafula jwaliji mu ukayidi ni Paulo, nambo nganaleka kuganicisya yakusosekwa yausimu ya ŵandu ŵane, mwamti jwatesilepo kandu. (Fil. 23) Yeleyi yikulosya kuti jwalakwe jwaliji jwangalinonyela. Kwapopelela ŵakutumicila acimjetu kukusakamucisya, mnopemnope naga tukusala mena gawo m’lipopelo.—2 Akoli. 1:11; Yak. 5:16.

13. Pangani jakwapopelela ŵane, ana mpaka tumsyasye camtuli Epafula?

¹³ Aganicisye ya ŵandu ŵakusaka kwapopelela. Mpaka atende cenene kwasala mena gawo. Mpela muŵatendele Epafula, abale ni alongo ŵajinji akusiŵapopelela abale ni alongo ŵa mumpingo mwawo soni maŵasa gagakusimana ni yakusawusya yejinji. Ŵajinji akusiŵapopelela abale ni alongo ŵele mena gawo gakusasimanikwa pa jw.org pa mtwe wakuti “Mayiko Amene a Mboni za Yehova Akumangidwa Chifukwa Chotsatira Zimene Amakhulupirira.” (Alole pasi pa mtwe wakuti MALO A NKHANI > ZOKHUDZANA NDI MALAMULO.) Kupwatika pelepa, tukusosekwa kwapopelelaga abale ni alongo ŵele acalongo acimjawo ŵajasice, ŵaŵakulupwice pa ngosi sya m’cipago soni ŵakulaga ligongo lyakusoŵa kwa mbiya. Kusala yisyene pana abale ni alongo ŵakusosekwa kwapopelelaga. Patukwapopelela ŵandu mpela ŵeleŵa, tukusalosya kuti ngatukusaganicisya yakusoŵa yetupe, nambo tukusaganicisyasoni ya ŵane. (Afil. 2:4) Yehofa akusapikana mapopelo mpela gelega.

14. Ana Yehofa alosisye cisyasyo camtuli pangani jakupikanila?

¹⁴ Litala line lili kuŵa ŵakupikanila jwine pakuŵeceta. Pa Yakobo 1:19 pakusati tukusosekwa ‘tuŵeje ŵacitema pakupikana.’ Yehofa ali cisyasyo cambone mnope pa ngani jeleji. (Gen. 18:32; Yos. 10:14) Alole kukambilana kukwapali kutyocela pa Ekisodo 32:11-14. (Aŵalanje.) Atamose kuti Yehofa nganasosekwaga cikamucisyo ca Mose, nambo jwalakwe jwakundile kuti Mose aŵecete nganisyo syakwe. Ana mpaka apikanile nganisyo sya mundu jwakusanonyela kutenda yakulemweceka? Nambo Yehofa akusapikanila mwakulitimalika kwa ŵandu ŵakusapopela kwa jwalakwe mwakulupicika.

15. Ana mpaka tumsyasye camtuli Yehofa pangani jakwacimbicisya ŵane?

¹⁵ Jwalijose mpaka atende cenene kuliwusya kuti, ‘Naga Yehofa akusayikana pakulitulusya pakutenda yindu ni ŵandu soni kwapikanila mpela muŵatendele ni Abulahamu, Lakele, Mose, Yoswa, Manowa, Eliya soni Hesekiya, ana ngangusosekwa kwacimbicisya abale ni alongo, kupikanila nganisyo syawo atamose kukamulicisya masengo nganisyo syawo syambone?’ Ana mumpingo mwangu soni m’liŵasa lyangu pana ŵakusosecela cikamucisyo cangu? Naga yili m’yoyo, ana ngusosekwa kutenda cici?—Gen. 30:6; Ŵak. 13:9; 1 Ayi. 17:22; 2 Mbi. 30:20.

16. Ana Mwenye Daudi jwatesile uli Simeyi ali amjimucile?

¹⁶ Litala lyamcece lyakulosya kuti tuli ŵakulinandiya lili kuwusimana mtima jwine patutumbilikasisye. (Aef. 4:2) Cisyasyo cambone panganiji cikusimanikwa pa 2 Samuele 16:5-13. (Aŵalanje.) Daudi ni ŵakutumicila ŵakwe ŵapilile ni kwimucila kuŵatesile Simeyi, juŵaliji mlongo mjakwe jwa Mwenye Sauli. Atamose kuti Daudi jwakwete macili gakuti akamasisye yeleyi, nambo jwalakwe nganayikosya. Ana Daudi jwapakombwele camtuli kuŵa jwakuwusimana mtima? Kuti tupikane yejinji tukusosekwa kulola yayili m’buku ja Masalimo nambala 3.

17. Ana cici cacamkamucisye Daudi kuti apakombole kuwusimana mtima soni ana mpaka tumsyasye camtuli?

¹⁷ Yikuwoneka kuti buku ja Masalimo nambala  3 jalembedwe pandaŵi jele Daudi ‘ŵamtilaga mwanace jwakwe, Abisalomu.’ Ndime 1 ni 2 sikamulana ni yakuyitagulila mu caputala 16 ca buku ja Samuele jaŵili. Kaneko Salimo 3:4 jikutagulila cikulupi caŵakwete Daudi. Lilembali likusati, “Cinjigumilila kwa Yehofa mwakwesya maloŵe, soni cacinjanga kutyocela m’litumbi lyakwe lyeswela.” M’wejisoni mpaka tupopeleje kwa Yehofa patusimene ni yakusawusya. Yehofa akusatujanga mapopelo getu mwakutupa msimu wakwe weswela, wampaka wutukamucisye kuti tupilile. Ana ni muyakutendekwa yapi yakusasaka kuti alosyeje kuwusimana mtima kapena kwakululucila ŵane paŵalemwecesye? Ana akwete cikulupi cakuti Yehofa akusayiwona yakusawusya yakusimana nayo soni kuti mpaka ŵape majali?

18. Ana kukamulicisya masengo yakusatujiganya Yehofa mpaka kutukamucisye camtuli?

¹⁸ Naga tukutenda yindu yatukumanyilila kuti yili yambone, tuciŵa ŵalunda soni Yehofa cacitujaliwa. Pa Misyungu 4:7 pakusati “lunda luli cindu cakusosekwa mnope.” Atamose kuti lunda lukusayika ligongo lyakumanyilila yindu, nambope lukusapwatikapo yejinji ngaŵape kwamba kumanyilila yindu. Atamose mbamba, sikusalosya lunda. Mbamba sikusalosya lunda lwa m’cipago mwakukosecela yakulya yakwe m’cawu. (Mis. 30:24, 25) Klistu akusamkolanga kuti “lunda lwa Mlungu” ligongo ndaŵi syosope akusatenda yindu yakwasangalasya Atatigwe (1 Akoli. 1:24; Yoh. 8:29) Mlungu cacitujaliwa naga tukwendelecela kuŵa ŵakulinandiya soni patukusagula yindu yayili yambone. (Aŵalanje Mateyu 7:21-23.) M’yoyo, tukusosekwa kutenda yiliyose yampaka tukombole kuti tuwutendekasye mpingo kuti gaŵe malo gakuti jwalijose atumicileje Yehofa mwakulinandiya. Nambo yikusajigala ndaŵi soni kulitimalika kuti atendeje yindu yakuŵajilwa. Nambope, kutenda yeleyi kukusalosya kulinandiya soni kulinandiyaku kucitukamucisya kuti tuŵe ŵakusangalala apanopano soni mpaka kalakala.