1-2. (a) Ligongo chichi ŵandu ŵagambile kulombana kwene akusosekwa kumdalila Yehofa? (Salimo 37:3, 4) (b) Ana munganiji chitukambilane chichi?

ANA asigele panandi kuti alombele, kapena agambile kulombela kwene? Naga yili myoyo, ngatukukayichila kuti akwembecheya kola umi wakusangalala ni mjawojo. Yili yisyene kuti ulombela ukwete yakusawusya yakwe. Soni pana yindu yakusosekwa mnope yakusasagula kutenda ŵandu ŵagambile kulombana kwene. Yakusasagula kutenda pasimene ni yakusawusya mpaka yatendekasye kuŵa ŵakusangalala kapena iyayi. Naga akumdalila mnope Yehofa, chachisagula yindu mwalunda, ulombela wawo uchiŵa wakulimba, soni chachiŵa ŵakusangalala mnope. Nambo naga akulepela kamulichisya masengo yakusasaka Mlungu, mpaka asimane ni yakusawusya yejinji mu ulombela mwawo.—Aŵalanje Salimo 37:3, 4.

² Atamose kuti nganiji jikusala ya ŵandu ŵagambile kulombana kwene, nambope chijisalesoni yakusawusya yele maŵasa gosope mpaka gasimane nayo. Chijisalesoni yampaka tulijiganye pa yisyasyo ya achalume ni achakongwe ŵakulupichika ŵakusiŵakolanga m’Baibulo. Yisyasyo yeleyi chiyitukamuchisye kumanyilila yampaka tutende pambali syejinji paumi wetu kupwatikapo mu ulombela. Chitulolesoni yampaka tulijiganye kutyochela ku maŵasa ga masiku agano.

3-4. Ana ŵandu ŵagambile kulombana kwene mpaka asimane ni yakusawusya yamtuli?

³ Ŵandu ŵane mpaka ŵalimbikasyeje ŵandu ŵagambile kulombana kwene kuti atameje ni umi mpela mwakutamilaga ŵandu  ŵajinji. Mwachisyasyo, achinangolo soni ŵachibale mpaka ŵalimbikasyeje ŵalombane kuti akachelewa kola ŵanache. Kombolekasoni achimjawo ŵa ŵandu ŵagambile kulombana kwene soni ŵachibale ŵawo mpaka ŵalimbikasyeje kuti asume nyumba ni gumbasyamo yindu yejinji.

⁴ Naga ngasamala ŵalombane mpaka asagule kutenda yindu yampaka yatendekasye kola ngongole syejinji. Yeleyi mpaka yitendekasye kuti jemanjajo akamuleje masengo kwandaŵi jelewu kuti akombole kuwusya ngongolesyo. Kaneko masengogo mpaka gatande kwajonanjila ndaŵi jakulijiganyila Baibulo pajika, kutenda kulambila kwa peŵasa, soni kulalichila. Ŵalombaneŵa mpaka ayikane pakulepela kusimanikwa pa misongano ligongo lyakamula masengo ndaŵi jakonjechesya ni chakulinga chakuti apate mbiya syejinji, kapena kuti masengo gakamalila. Yeleyi mpaka yatendekasye kuti akakola upile wakutenda yejinji pakumtumichila Yehofa.

5. Ana tukulijiganya chichi kutyochela kwa Klaus ni Marisa?

⁵ Maumboni gakusalosya kuti kusosasosa mnope yindu yakuchilu kwangatendekasyaga ŵandu kuŵa ŵakusangalala. Aganisye yaŵasimene nayo ŵalombane ŵane ŵatugambile kwakolanga kuti Klaus ni Marisa. Paŵagambile kulombana kwene, wosope ŵamalilaga ndaŵi jawo ali mkukamula masengo kuti atameje umi wakusangalala. Nambo jemanjaji nganasangalalaga ata panandi. Klaus jwatite, “Twakwete yindu yejinji kupunda yatwasosechelaga, nambo mwausimu nganitukola yakulinga yiliyose. Kusala yisyene nganitusangalalaga mwausimu soni twalagasikaga nganisyo.” Komboleka kuti wawojosoni mpaka ajitichisye kuti kusaka kola yindu yejinji kwangamtendekasyaga mundu kuŵa jwakusangalala. Naga wawojosoni akusimana ni yeleyi akadandawula. Ganichisya yisyasyo yambone ya ŵandu ŵane mpaka kwakamuchisye mnope. Chandanda kwende tulole yampaka alijiganye achalume ŵalombele kutyochela kwa Mwenye Yehosafati.

6. Mwakamulana ni yayikusasimanikwa pa Misyungu 3:5, 6, ana Yehosafati jwamalene chamtuli ni chakusawusya chaŵasimene nacho?

⁶ Naga ali jwamlume jwamlombele, ana ndaŵi sine akusalagasika nganisyo ligongo lya maudindo gakwete? Naga yili myoyo, mpaka alijiganye yejinji kutyochela kwa Mwenye Yehosafati. Mpela mwenye, Yehosafati jwakwete udindo wakwalolela ŵandu wosope ŵaŵalamulilaga. Ana jwalakwe jwatesile wuli kuti asamalile udindo wekulungwawu? Yehosafati jwatesile yakakombwele pakusaka kwachenjela ŵandu ŵakwe. Jwalakwe jwataŵile lipupa kusyungulila msinda wa Yuda, soni ŵakwete asilikali ŵakupunda 1,160,000. (2 Mbi. 17:12-19) Pali papite ndaŵi, Yehosafati jwasimene ni chakusawusya chekulungwa. Gulu ja asilikali ŵakutyochela ku Amoni soni ku Mowabu, nambosoni ŵandu ŵane ŵakutyochela ku lisi line lya nyasa ŵayiche kukumjogoya Yehosafati yimpepe ni ŵandu ŵakwe.  (2 Mbi. 20:1, 2) Ana Yehosafati jwatesile chichi? Jwalakwe jwamŵendile Yehofa kuti amkamuchisye soni kumpa machili. Yaŵatesileyi yaliji yakamulana ni yayikusasimanikwa pa Misyungu 3:5, 6. (Aŵalanje.) Lipopelo lyakulinandiya lya Yehosafati lyalikusasimanikwa pa 2 Mbili 20:5-12, likusalosya yaŵatiga jwalakwe pakwadalila Atati ŵakwe ŵakwinani. Ana Yehofa jwajanjile chamtuli lipopelo lya Yehosafati?

7. Ana Yehofa jwajanjile chamtuli lipopelo lya Yehosafati?

⁷ Yehofa ŵaŵechete ni Yehosafati kupitila mwa m’Lefi jwine lina lyakwe Yahasiyele. Yehofa jwatite, “Mgambe kwima mmalo mwenu, nipo timkawone AMBUJE ali kumpundisya jemanja.” (2 Mbi. 20:13-17) Yeleyi yaliji yakulekangana ni yaŵatendaga ŵandu pakuputa ngondo. Nambope, malangiso gelega nganigaŵa gakutyochela kwa mundu nambo gatyochele kwa Yehofa. Ligongo lyakuti ŵamdalilaga mnope Mlungu jwakwe, Yehosafati jwatesile yaŵamsalileyo. Pajwapite kukusimana ni achimmagongo ŵakweŵa, jwalakwe nganiŵaŵika kusogolo asilikali ŵakumanyilila kuputa ngondo, nambo ŵaŵisile ŵandu ŵakwamba kumanyilila kwimba basi. Yehofa nganamleka Yehosafati, mwamti jwalakwe jwagomeche achimmagongowo.—2 Mbi. 20:18-23.

8. Ana achalume ŵalombele mpaka alijiganye chichi kutyochela kwa Yehosafati?

⁸ Chisyasyo cha Yehosafati mpaka chakamuchisye achalume ŵalombele. Jemanjaji akwete udindo wakusamalila maŵasa gawo. Myoyo akusakamula masengo mwamachili kuti apate yakusosechela ya liŵasa lyawo. Pasimene ni yakusawusya, mpaka aganisye kuti chamalane nayo jika. Nambope akusosekwa kuŵambala kulidalila mnope. Mmalo mwakwe apopeleje pajika ni kumŵenda Yehofa kuti ŵakamuchisye. Kupwatika pelepa apopelejesoni yimpepe ni ŵamkwawo. Aŵendeje lunda kwa Yehofa mwakulijiganya Baibulo soni mabuku gane gakulondesya ya Baibulo. Kaneko akamulichisyeje masengo yalijiganyisyeyo. Ŵandu ŵane nganaŵa akamulene ni yasagwile jemanja pakamulichisya masengo yajikusasala Baibulo, soni jemanjajo mpaka ŵawoneje jemanja kuti mli ŵakupwambwana. Mwine mpaka ŵasalilesoni kuti mbiya soni yindu yampaka asume mpaka yakamuchisye pa liŵasa lyawo. Nambo akusosekwa kumbuchila chisyasyo cha Yehosafati. Jwalakwe jwamdalilaga Yehofa, soni yeleyi yawoneche kupitila pa yindu yajwatendaga. Yehofa nganamleka Yehosafati, nombe wawojosoni ngasiŵaleka. (Sal. 37:28; Aheb. 13:5) Ana ni chindu chine chapi chakusosekwa kutenda ŵalombane kuti akole liŵasa lyakusangalala?

9. Ana mpaka tusale yamtuli pakwamba ya Yesaya ni ŵamkwakwe?

⁹ Chindu chakusosekwa mnope kwa Yesaya ni ŵamkwakwe chaliji kumtumichila Yehofa. Yesaya jwaliji jwakulochesya. Nambosoni komboleka kuti ŵamkwakwe ŵaliji jwakulochesya. (Yes. 8:1-4) Yesaya ni ŵamkwakwe ŵalipelekaga mnope pakumtumichila Yehofa. Kusala yisyene jemanjaji ŵapeleche chisyasyo chambone mnope kwa ŵalombane masiku agano.

10. Ana kulijiganya yakulochesya ya m’Baibulo mpaka kwakamuchisye chamtuli ŵalombane kuti atende yejinji pakumtumichila Yehofa?

¹⁰ Masiku agano ŵalombane mpaka amsyasye Yesaya ni ŵamkwake, mwakutenda yiliyose yampaka akombole pakumtumichila Yehofa. Jemanjaji mpaka alimbisye chikulupi chawo pa Yehofa mwakulijiganya yakulochesya ya m’Baibulo soni kulola yayikusati pakukwanilichikwa. * (Tit. 1:2) Ŵalombaneŵa mpaka aganichisye  yampaka atende kuti akamuchisye nawo pakwanilisya yakulochesya yine ya m’Baibulo. Mwachisyasyo, jemanjaji mpaka ajigale nawo mbali pakwanilisya yakulochesya yaŵasasile Yesu, yakuti ngani syambone sichilalichidwa pachilambo chosope chapasi mbesi mkanijiyiche. (Mat. 24:14) Ŵalombane pakukulupilila mnope kuti yakulochesya ya m’Baibulo yikusakwanilichikwa, akusatenda yiliyose yampaka akombole pakumtumichila Yehofa.

11. Ana Akwila ni Pulisila ŵakombwele kutenda chichi? Ligongo chichi ŵatesile yeleyi?

¹¹ Ŵachinyamata ŵagambile kulombana kwene, mpaka alijiganye yejinji kutyochela kwa Pulisila ni Akwila, liŵasa lya Chiyuda lyalyatamaga mumsinda wa Loma. Jemanjaji ŵapikene ngani syambone syakwamba Yesu kaneko ŵaŵele Aklistu. Mwangakayichila, yindu yajendelaga chenene jamanjaji. Nambo kaneko yindu yachenjile pandaŵi jele Mwenye Klaudiyo jwalamwile kuti Ayuda wosope asame ku Loma. Ana yeleyi yakwayiye chamtuli Pulisila ni Akwila? Jemanjaji ŵasosekwaga kutyoka ku malo kuŵakusyoŵelele, nikuja kutama malo gasambano, soni kuja kutanda masengo gawo gakupanganya matenti kumalo gane. Ana kuchenga kweleku kwatendekasisye kuti aleche kumtumichila Yehofa mpela muŵatendelaga pandanda? Komboleka akumanyilila kwanga kwa chiwusyochi. Akwila ni Pulisila paŵayiche ku Kolinto, ŵatandite kutenda yindu yimpepe ni mpingo wa kweleko. Jemanjaji ŵakamulaga masengo yimpepe ni ndumetume Paulo pakwalimbikasya abale ni alongo. Kaneko ŵasamilesoni mmisinda jine kukwasosechelaga ŵakulalichila ŵajinji. (Mase. 18:18-21; Alo. 16:3-5) Kusala yisyene jemanjaji ŵakwete umi wakusangalala.

12. Ligongo chichi ŵalombane akusosekwa kambilana yakulinga yausimu?

¹² Nombe ŵalombane masiku agano mpaka akuye chisyasyo cha Pulisila ni Akwila mwakuŵika yindu ya Uchimwene pamalo gandanda paumi wawo. Ndaŵi jambone jele ŵalombane mpaka akambilane yakulinga ya paumi wawo jili pali pachitomelo. Naga ŵalombane akusakola yakulinga yakumtumichila Yehofa soni kamusyangana kuti akwanilisye yakulingayo, jemanjaji akusakola upile wakumwona Yehofa ali  mkwakamuchisya paumi wawo. (Jwak. 4:9, 12) Aganichisye chisyasyo cha Russell ni Elizabeth. Russell jwatite, “Patwaliji pachitomelo twakambilanaga yakulinga yetu yausimu.” Nombe Elizabeth jwatite, “Twakambilanaga yeleyi ni chakulinga chakuti patuchisagulaga yakutenda, yakusagulayo yikasatulepelekasya kwanilisya yakulinga yetuyi.” Russell ni Elizabeth ŵakombwele kwawula ku Micronesia kukutumichila kudela kukwasosekwaga ŵakulalichila ŵajinji.

13. Mwakamulana ni Salimo 28:7, ana pakusaŵa yakuyichisya yambone yamtuli naga tukumdalila mnope Yehofa?

¹³ Mwakulandana ni Russell ni Elizabeth, maŵasa gejinji gasagwile kola umi wangasaka yejinji kuti apateje ndaŵi jakwanila jakulalichila soni kwiganya ngani syambone. Naga ŵalombane akukola yakulinga yakumtumichila Yehofa, soni kutendela pampepe yindu kuti akwanilisye yakulinga yawoyo yikusiyajendelaga chenene. Jemanjaji chachiyiwona kuti Yehofa akusiŵasamalilaga, chachitanda kumdalila mnope, soni chachiŵa ŵakusangalala yisyesyene.—Aŵalanje Salimo 28:7.

14. Ana ndumetume Petulo ni ŵamkwakwe ŵalosisye chamtuli kuti ŵakulupililaga maloŵe gagakusasimanikwa pa Mateyu 6:25, 31-34?

¹⁴ Ŵalombane mpaka alijiganyesoni kutyochela pa chisyasyo cha ndumetume Petulo ni ŵamkwakwe. Pali pamasile miyesi 6 chiwoneganile ni Yesu, ndumetume Petulo jwasosekwe kusagula yakutenda. Petulo jwakamulaga masengo gakuwulaga somba kuti alisamalileje liŵasa lyakwe. Myoyo Yesu paŵamŵendile jwalakwe kuti aŵe jwakumkuya jwakwe, Petulo jwasosekwaga kwaganichisya ŵamkwakwe pajwasagulaga yakutenda. (Luk. 5:1-11) Petulo jwasagwile kuti alalichileje yimpepe ni Yesu. Jwalakwe jwasagwile yindu mwalunda. Soni mpaka yiŵe yakupikanika kuŵecheta kuti ŵamkwakwe Petulo ŵakamulene ni yajwasagwile Petuloyi. Baibulo jikusasala kuti Yesu ali ajimwiche ku ŵawe, Petulo ni ŵamkwakwe ŵajesile yimpepe pa maulendo gane. (1 Akoli. 9:5) Mwangakayichila, chisyasyo cha jwamkongweju chamkamuchisye Petulo kulemba malangiso gakupikanika chenene gakwawula kwa achalume soni achakongwe ŵalombele. (1 Pet. 3:1-7) Kusala yisyene, Petulo ni ŵamkwakwe ŵakulupililaga mnope yaŵasasile Yehofa kuti chachapa yakusosekwa ya paumi wawo naga akuŵika yindu ya Uchimwene pamalo gandanda.—Aŵalanje Mateyu 6:25, 31-34.

15. Ana alijiganyisye yamtuli kutyochela kwa Tiago ni Esther?

¹⁵ Naga papitile yaka yamnono kutyochela paŵalombene, ana mpaka atende wuli kuti apitilisye kola mtima wakusaka kumtumichila Yehofa? Litala limo lili kulola yaŵasimene nayo maŵasa gane. Mwachisyasyo, mpaka aŵalanje ngani syakola mtwe wakuti, “Ŵalipeleche ni Mtima Wosope.” Ngani syelesi syakamuchisye Tiago ni Esther, liŵasa lya ku Brazil, kuti akole chakulinga cha kuja kutumichila kukwasosekwaga ŵakulalichila ŵajinji. Tiago jwatite, “Patwaŵalangaga yakutendekwa yayalosyaga yatite Yehofa pakwakamuchisya ŵakutumichila ŵakwe masiku agano, ni patwasakaga kutenda yakomboleka kuti tuliwone ligasa lya Yehofa lili mkutukamuchisya.” Kaneko jemanjaji ŵasamile ku Paraguay kwaŵele ali mkutumichila mu dela ja Chipwitikisi kutandila mu 2014. Esther jwatite, “Lilemba lyatukusalinonyela mnope lili lya Aefeso 3:20. Ndaŵi syejinji tuŵele tuli mkugawona maloŵe ga palilembali gali mkukwanilichikwa pa utumiki wetu.” M’chikalata chakwawula ku Aefesochi, Paulo  jwasasile kuti Yehofa chachitupa yindu yejinji kupunda yatukusamŵendaga. Kusala yisyene maloŵe gelega gaŵele gali mkukwanilichikwa ndaŵi syejinji.

16. Ana maŵasa ga ŵachinyamata mpaka gapate kwapi malangiso gakwakamuchisya kuti akombole kwanilisya yakulinga yawo?

¹⁶ Masiku agano maŵasa ga ŵachinyamata mpaka gapindule kutyochela ku yisyasyo ya ŵandu ŵane ŵalosisye kumdalila mnope Yehofa. Maŵasa gane gamalile yaka yejinji gali mkutenda utumiki wandaŵi syosope. Naga akusaka kwanilisya yakulinga yakwete mpaka atende chenene kwawusya jemanjaji. Naga akutenda yeleyi mpaka alosye kuti akusamdalila Yehofa . (Mis. 22:17, 19) Nombe achakulungwa ŵa mumpingo mpaka ŵakamuchisye ŵachinyamata ŵagambile kulombana kwene kuti akole soni kwanilisya yakulinga yausimu.

17. Ana Klaus ni Marisa ŵasimene ni yamtuli? Ana tukulijiganya chichi pa chisyasyo chawo?

¹⁷ Ndaŵi sine, mpaka yitendekwe kuti akutupa utumiki wakulekangana ni watwasakaga. Kwende tuwanichisye ni yaŵasimene nayo Klaus ni Marisa ŵatwakolasile kundanda kula. Pali papitile yaka yitatu ali alombene, jemanjaji ŵasamile kwawula kuja kamuchisya pa masengo ga yakutaŵataŵa pa ofesi ja nyambi ja ku Finland. Nambo kaneko ŵasalile kuti ngakusosekwa kutama m’chilambocho kwandaŵi jakupunda miyesi 6. Pandanda jemanjaji ŵadandawile mnope ni yeleyi. Nambo mkanipapite ndaŵi, jemanjaji ŵaŵilanjidwe kuti akajinjile kalasi jakulijiganya chiŵecheto cha Chialebiki. Apano jemanjaji akusangalala mnope kulalichila mudela ja ŵandu ŵakusaŵecheta chiŵechetochi. Pakuganichisya ya munyuma Marisa jwatite, “Natendaga woga kutenda yindu yanganindendeje, mwamti nasosekwaga kumdalila mnope Yehofa. Nayiweni yatite Yehofa pakutukamuchisya mmatala gakusimonjesya mnope. Yeleyi yitendekasisye kuti namdalileje mnope Yehofa.” Mpela mwatuyiwonele m’chisyasyochi, ngakusosekwa kayichila yakuti Yehofa chachakamuchisya naga akumdalila mnope.

18. Ana ŵalombane mpaka atende chichi kuti apitilisye kumdalila Yehofa?

¹⁸ Ulombela uli mtuka wakutyochela kwa Yehofa. (Mat. 19:5, 6) Jwalakwe akusasaka kuti ŵandu ŵalombane asangalaleje mnope. (Mis. 5:18) Ŵachinyamata ŵagambile kulombana kwene, akusosekwa akoleje yakulinga paumi wawo. Ana akutenda yampaka akombole pakulosya kumyamichila Yehofa ligongo lya yindu yambone yaŵatendeleyi? Apopeleje kwa Yehofa ni kumsalila yakusaka. Aloleje m’Maloŵe gakwe mfundo syampaka syakamuchisya kumalana ni yakusawusya yawo. Kaneko akamulichisyeje masengo malangiso gakwapa Yehofajo. Kusala yisyene akakayichilaga yakuti chachiŵa ŵakusangalala naga akulipeleka mnope mu ulombela wawo pakumtumichila Yehofa.