1. Ana ndaŵi sine mpaka tuliwusyeje yiwusyo yapi?

ANA ndaŵi sine akusalaga nganisyo ligongo lya yindu yine yayichitendekwa kusogoloku? Yindu yakwe yili mpela konanjidwa kwa dini jaunami, kwimuchila kwa Gogi jwa chilambo cha Magogi, soni ngondo ja Alamagedo. Ana pakwete paliwusisye kuti ‘Ana chinjikombola kuŵape jwakulupichika payichitendekwaga yindu yakogoyayi?’ Naga pakwete paganichisyepo yiwusyo yeleyi, ngani jiŵasasile Yesuji jajilisoni mulilemba lyakulongolela lijiganyoli mpaka jakamuchisye mnope. “Mitima jawo jikalagaga mnope, [akole chikulupi, NWT.]” (Yoh. 14:1) Kola chikulupi chakulimba kuchitukamuchisya kuti chitukombole kupilila mwangasamala kandu ya yakusawusya yatuchisimana nayo.

2. Ana mpaka tulimbisye chamtuli chikulupi chetu? Ana chitukambilane yamtuli munganiji?

² Kuganichisya yatukusati pakulimbana ni yakusawusya yatukusasimana nayo apano, kuchitukamuchisya kupilila yakusawusya yatuchisimana nayo msogolo. Patukuganichisya yeleyi, tuchipata yatukusosekwa kutenda kuti tulimbisye mnope chikulupi chetu. Yakusawusya yiliyose yatukusasimana nayo yikusalimbisya chikulupi chetu. Yeleyi yichitukamuchisya kuti chitukombole kupilila yakusawusya yamsogolo. Munganiji, chitukambilane yakutendekwa mcheche yaŵasimene nayo ŵakumkuya ŵa Yesu yayalosisye kuti ŵasosekwaga chikulupi chakulimba. Kaneko chitulole yampaka tutende kuti tukombole kupilila yakusawusya mpela yeleyo masiku agano. Chitulolesoni yampaka yijile kutukamuchisya yakusawusyayi pakosechela yamsogolo.

3. Mwakamulana ni Mateyu 6:30, 33, ana Yesu jwasasile mfundo japi pangani ja chikulupi?

³ Mwachipago mtwe waliŵasa ukusasaka kulipatila liŵasa lyakwe yindu mpela yakulya, yakuwala, soni malo gakutama ŵamkwakwe  ni ŵanache ŵakwe. Kutenda yeleyi kuli kwakusawusya m’masiku gakumalisya gano. Achalongo achimjetu ŵane masengo gamalile. Atamose kuti jemanjaji akulingalinga kusosa masengo gane nambope ngakugapata. Ŵane alesile masengo gakutindana ni mfundo sya m’Baibulo. Muyakutendekwa mpela yeleyi, tukusosekwa kola chikulupi chakuti Yehofa chachitupa yakusosekwa ya liŵasa lyetu. Pakulalichila kwa Petumbi, Yesu jwasasile mwakupikanika chenene mfundo jeleji kwa ŵakumkuya ŵakwe. (Aŵalanje Mateyu 6:30, 33.) Naga tukukola chikulupi chakuti Yehofa ngasatuleka, tuchipitilisya kumtumichila Yehofa. Patuyiweni kuti Yehofa akutukamuchisya, tuchimŵandichila jwalakwe soni tuchikola chikulupi chakulimba mnope.

4-5. Ana liŵasa line lyakombwele chamtuli kumalana ni kulagasika nganisyo ligongo lyakusoŵa yakusosechela yakuchilu?

⁴ Kwende tulole yaŵatite Yehofa pakulikamuchisya liŵasa line lya ku Venezuela lyalyalagaga kupata yakusosechela ya paumi. Pandaŵi jine yindu yajendaga chenene pa liŵasali ligongo lyatendaga bisinesi ja ulimi. Kaneko yigawenga yasumwile malo gaŵalimaga gala, soni ŵasalile kuti asame pamalopo. Mtati jwa liŵasali lina lyakwe Miguel, jwasasile kuti, “Sambano tukudalila yatukusalima pa kamgunda kamwana kakwasima. Lisiku lililyosye ngusatanda ni kum’ŵenda Yehofa kuti atupe yakusosechela ya palisikulyo.” Umi uli wakusawusya mnope m’liŵasali. Nambo jemanjaji akusamkulupilila mnope Yehofa kuti chiŵape yakusosechela ya lisiku lililyose. Yeleyi yikusiyakamuchisya kuti asimanikweje pa misongano ja mpingo ndaŵi syosope soni kulalichila. Jemanjaji akusaŵika yindu ya Uchimwene pamalo gandanda paumi wawo, soni Yehofa akusiŵapaga yakusosechela yawo.

⁵ Pandaŵi josope jakusawusyaji, Miguel ni Yurai ŵali ŵamkwakwe, ŵaganichisyaga mnope yaŵatiga Yehofa pakwasamalila. Ndaŵi sine Yehofa jwakamulichisyaga masengo Aklistu achimjawo kuti apate yakusosekwa ya paumi. Jemanjaji ŵamkamuchisyagasoni Miguel kuti apate masengo gambone. Ndaŵi sine Yehofa jwakamulichisyaga masengo ofesi ja nyambi pakwapa yakusosechela ya paumi. Yehofa nganiŵaleka jemanjaji. Yeleyi yatendekasisye kuti ŵandu ŵamliŵasali akole chikulupi chakulimba. Yoselin mwanache jwamkongwe jwamliŵasali ali alondesisye yaŵatite Yehofa pakwakamuchisya kaneko jwatite, “Yili yakulimbikasya kumwona Yehofa ali mkutukamuchisya. Panguganichisya ya Yehofa ngusamwona kuti ali mjangu jwangusamdalila paumi wangu.” Jwasasilesoni kuti, “Yakusawusya yatwasimanaga nayo paliŵasa lyetu, yitukamuchisye kuti chitukombole kupilila yakusawusya yatuchisimana nayo kusogoloku.”

6. Ana mpaka alimbisye chamtuli chikulupi chawo naga akulaga ligongo lya kusoŵa kwa mbiya?

⁶ Ana akulagasika nganisyo ligongo lya kusoŵa kwa mbiya? Naga yili myoyo nikuti akusimana ni yakusawusya. Atamose kuti akusimana ni yakusawusya, yakusimana nayoyo mpaka yakamuchisye kulimbisya chikulupi chawo. Apopeleje kwa Yehofa soni aŵalanjeje ni kuganichisya maloŵe ga Yesu gagali pa Mateyu 6:25-34. Aganichisyeje yisyasyo ya ŵandu ŵamasiku agano yayikusalosya kuti Yehofa akusiŵakamuchisyaga ŵandu ŵakusalipeleka pakumtumichila. (1 Akoli. 15:58)  Kutenda yeleyi, kuchakamuchisya kola chikulupi chakuti Yehofa chachakamuchisya wawojo mpela muŵatendele ni ŵandu ŵane. Jwalakwe akusamanyilila yindu yakusasosechela wawojo, akusamanyililasoni yampaka atende pakwakamuchisya. Pakuyiwona kuti Yehofa akwakamuchisya paumi wawo, chikulupi chawo chichiŵa chakulimba soni chachikombola kupilila yakusawusya yachachisimana nayo kusogolo.—Hab. 3:17, 18.

7. Mwakamulana ni Mateyu 8:23-26, ana “mbungo jakogoya” jalinjile chamtuli chikulupi cha ŵakulijiganya ŵa Yesu?

⁷ Pandaŵi jine Yesu ni ŵakulijiganya ŵakwe ŵasimene ni chimbungo panyasa. Yesu jwakamulichisye masengo chakutendekwachi pakwakamuchisya jemanjaji kuti alimbisye chikulupi chawo. (Aŵalanje Mateyu 8:23-26.) Pandaŵi ja chimbungochi, mesi gajinjilaga mwiboti, nambo Yesu jwaliji ali agonile. Nambo ŵakulijiganya ŵakwe ŵaŵakwete wogaŵa, ali amjimwisye Yesu kuti ŵakulupusye, jwalakwe jwasalile kuti, “Ligongo chichi mkutenda woga, ana nganimkola chikulupi?” Ŵakulijiganya ŵawogaŵa ŵasosekwaga kumanyilila kuti Yehofa akakombwele kumkulupusya Yesu pampepe ni jemanjaji. Ana tukulijiganya chichi pelepa? Chikulupi chakulimba mpaka chitukamuchisye kupilila yakusawusya yakulandana ni “mbungo jakogoya.”

8-9. Ana chikulupi cha Mlongo Anel chalinjidwe chamtuli? Ana chichi chachamkamuchisye jwalakwe?

⁸ Aganichisye yachatite pakumkamuchisya chikulupi mlongo jwine jwangalombela lina lyakwe Anel jwa ku Puerto Rico. Chakusawusya chajwasimene najo mlongoju chaliji “mbungo jakogoya.” Chakusawusyachi chatendekwe mu 2017. Pandaŵiji kwatendekwe mbungo jakolanjidwa kuti Hurricane Maria jajajonasile nyumba ja mlongoju. Chimbungochi chatendekasisyesoni kuti masengo gaŵakamulaga mlongoju gamale. Mlongoju jwatite, “Pandaŵi ja yakusawusyaji nalagasikaga nganisyo. Nambo yeleyi yangamuchisye kuti namdalileje mnope Yehofa kupitila m’lipopelo, soni nganingunda kuti kulagasika nganisyoku kujonanje chikulupi changu.”

⁹ Mlongo Anel jwasasilesoni chindu chine chachamkamuchisye kuti apilile yakusawusya yakweyi. Chindu chakwe chaliji kupikanila. Jwalakwe jwatite, “Kupikanila malangiso ga m’gulu ja Yehofa kwangamuchisye kuŵa jwakulimba. Yehofa jwangamuchisye pakamulichisya masengo abale ni alongo. Jemanjaji ŵalimbikasyaga soni kumba yindu yanasosechelaga.” Jwasasilesoni kuti, “Yehofa ŵambaga yejinji kupunda yanasosechelaga, mwamti chikulupi changu chalimbile mnope.”

10. Ana mpaka atende chichi naga akusimana ni yakusawusya?

¹⁰ Ana akusimana ni yakusawusya paumi wawo? Komboleka kuti akulaga ligongo lya ngosi syachilengedwe. Kombolekasoni akulaga ni ulwele wawukwalagasya nganisyo soni ngakumanyilila yampaka atende. Ndaŵi sine mpaka alagasicheje nganisyo, nambo akakunda kuti yeleyo yatendekasye kuleka kumdalila Yehofa. Amŵandichileje jwalakwe mwakupopela kutyochela pasi pamtima. Mpaka alimbisyesoni chikulupi chawo pakuganichisya yaŵatite Yehofa pakwakamuchisya munyumamu. (Sal. 77:11, 12) Mpaka aŵe ŵakusimichisya  kuti Yehofa ngasiŵaleka mpaka kalakala.

11. Ligongo chichi tukusosekwa kwapikanila abale ŵakulongolela yindu m’gulu ja Yehofa?

¹¹ Ana ni chindu chine chapi champaka chakamuchisye kupilila yakusawusya? Mpela mwaŵechetele Anel, chindu chakwe chili kupikanila. Ŵapikanileje ŵandu ŵaŵasagwile Yehofa. Ndaŵi sine abale ŵakusatulongolela mpaka atusalile yindu yakuti tutende yatukuyiwona kuti nganiyiŵa yikamuchisye. Nambope, Yehofa akusiŵapa upile ŵandu ŵakusapikanila. Yatukusaŵalanga m’Maloŵe ga Mlungu soni yasimene nayo ŵakutumichila ŵakwe ŵakulupichika yikusalosya kuti kupikanila kukusakulupusya umi. (Eks. 14:1-4; 2 Mbi. 20:17) Aganichisyeje yaŵatesile jemanjajo. Kutenda yeleyi kuchakamuchisya kuti akamulaneje ni yajisagwile gulu ja Yehofa apano kapena msogolo. (Ahe. 13:17) Yeleyi yichakamuchisya kuti akajogopaga yakusawusya yayikwika kusogoloku.—Mis. 3:25.

12. Ana pa Luka 18:1-8 pakusalosya chamtuli kukamulana kwakupali pasikati pa chikulupi ni kupilila yangali chilungamo?

¹² Yesu jwamanyililaga kuti ŵakulijiganya ŵakwe chachisimana ni yindu yangali chilungamo. Pakusaka kwakamuchisya kumalana ni yeleyi, Yesu jwasalile chisyasyo chachikusasimanikwa m’buku ja Luka. Yesu jwasasile ngani ja jwamkongwe jwamasije jwine juŵaŵendaga kwa mwenye jwangali chilungamo kuti alamule magambo gakwe mwachilungamo. Jwamkongweju jwakulupililaga kuti naga akupitilisya kuŵendako chachimkamuchisya. Kaneko, mwenye jula jwatesile yajwasakaga jwamkongwe jula. Ana tukulijiganya chichi pelepa? Yehofa ali jwachilungamo. Yesu jwatite, “Nambi Mlungu ngasiŵachenjela ŵakusagulidwa ŵakwe ŵakusapopela kwa jwalakwejo musi ni chilo?” (Aŵalanje Luka 18:1-8.) Kaneko Yesu jwatite, “Nambo pitachiyikaga Mwanache jwa mundu, ana tachisimana ŵandu ali ŵana chikulupi pachilambo pano?” Patukusimana ni yangali chilungamo, tukusosekwa kuŵa ŵakuwusimana mtima soni ŵakupilila, yampaka yilosye kuti tukwete chikulupi chakulimba mpela cha jwamkongwe jwamasije jula. Chikulupi chelechi mpaka chitukamuchisye kusimichisya kuti mulimose mwachiyiŵele Yehofa chachitukamuchisya. Tukusosekwasoni kulupililaga kuti lipopelo lili lyakamuchisya mnope. Ndaŵi sine, mapopelo getu mpaka gajanjidwe m’matala ganganitujembecheyaga.

13. Ana lipopelo lyakamuchisye chamtuli liŵasa line palyasimene ni yakusawusya?

¹³ Aganichisye yaŵasimene nayo Mlongo Vero jwa ku Democratic Republic of the Congo. Vero ni ŵamkwakwe ŵanganamtumichilaga Yehofa soni mwanache jwawo jwamkongwe jwayaka 15, ŵatisile m’musi mwawo ligongo mwayiche asilikali. Paŵatilaga, jemanjaji ŵasimene ni asilikali ŵane ŵaŵakamwile soni ŵajogoyisye kuti chiŵawulaje. Mlongo Vero pajwatandite kulila, mwanache jwawo jwamkongwe jwapopesile mwakwesya maloŵe soni jwasalaga lina lya Yehofa mwakuwilisyawilisya. Jwatendaga yeleyi pakusaka kwamyalasya mamagwewo. Pajwamalisisye kupopela jwamkulungwa jwa asilikaliwo jwamwusisye msikanajo  kuti, “Ana mmwe, ŵani ŵaŵamjiganyisye kupopela?” Mwanachejo jwajanjile kuti, “Ŵanjiganyisye mama, pakamulichisya masengo lipopelo lyachisyasyo lyalikusasimanikwa pa Mateyu 6:9-13.” Jwamkulungwa jwa asilikali jula ni jwatite, “Jawulani mwamtendele ni achinangolo ŵenuwo, soni Yehofa Mlungu jwenujo amkamuchisye.”

14. Ana chichi champaka chilinje chikulupi chetu? Ana chichi champaka chitukamuchisye kuti tukombole kupilila?

¹⁴ Yisyasyo yeleyi yikusatujiganya kuti tuliwoneje lipopelo kuti lili lyakusosekwa mnope. Nambi wuli naga mapopelo gawo ngagakwanjidwa mwachitema? Mwakulandana ni jwamkongwe jwamasije jwaŵamkolasile Yesu jula, apopeleje mwangalechesya. Kupwatika pelepa akoleje chikulupi chakuti Mlungu ngasiŵaleka soni kuti chachijanga mapopelo gawo pandaŵi jilijose. Ndaŵi syosyope amŵendeje Yehofa msimu wakwe weswela. (Afil. 4:13) Akumbuchileje kuti pachangakaŵapa Yehofa chiŵape upile wejinji, mwamti chachiliŵalila yakusawusya yaŵele ali mkusimana nayo. Patukupilila yakusawusya ni chikamuchisyo cha Yehofa, tuchikola chikulupi chakulimba soni tuchikombola kupilila yakusawusya yatuchisimana nayo kusogolo.—1 Pet. 1:6, 7.

15. Mwakamulana ni Mateyu 17:19, 20, ana ŵakulijiganya ŵa Yesu ŵasimene ni yakusawusya yamtuli?

¹⁵ Yesu jwajiganyisye ŵakulijiganya ŵakwe kuti chikulupi mpaka chakamuchisye kulimbana ni yakusawusya. (Aŵalanje Mateyu 17:19, 20.) Pachakutendekwa chine, jemanjaji ŵalepele kukoposya misimu jakusakala atamose kuti pandaŵi jine ŵakombwele kutenda yeleyo. Ana chakusawusya chaliji chichi? Yesu jwasasile kuti jemanjaji ŵasosekwaga kola chikulupi chejinji. Jwalakwe jwasalile kuti naga akukola chikulupi chejinji mpaka akombole kumalana ni yakusawusya yayikuwoneka mpela litumbi. Nombe m’weji masiku agano, mpaka tusimane ni yakusawusya yayikuwoneka kuti nganituŵa tukombwele kumalana nayo.

16. Ana chikulupi chamkamuchisye chamtuli Mlongo Geydi kulimbana ni yakusawusya?

¹⁶ Aganichisye yaŵasimene nayo Mlongo Geydi, jwakusatama ku Guatemala. Ŵamkwakwe mlongoju, ŵawulajidwe paŵawujilaga kunyumba kutyochela kumisongano. Ana chikulupi chamkamuchisye chamtuli mlongoju kuti akombole kupilila yakusawusyayi? Jwalakwe jwatite, “Lipopelo ni lyalyangamuchisye mnope kuti ngole mtendele wamumtima. Yehofa jwakamulichisyaga masengo ŵam’liŵasa lyangu soni abale ni alongo pakungamuchisya. Kutenda yejinji pakumtumichila Yehofa kungamuchisye kuti ngalagasikaga nganisyo mnope. Kungamuchisyesoni kuti ngadandawulaga ni ya malaŵi. Yakusawusya yanasimene nayoyi, yinjiganyisye kuti chinga chisimane ni yakusawusya yamtuli msogolomu, chinjikombola kuyipilila ligongo lya chikamuchisyo cha Yehofa, Yesu, soni abale ni alongo.”

17. Ana tukusosekwa kutenda chichi patusimene ni yakusawusya yekulungwa mpela litumbi?

¹⁷ Ana akulila ligongo lya chiwa cha jwakunonyelwa jwawo? Aŵalanjeje m’Baibulo ngani syakwamba chembecheyo cha kwimuka kuŵawe. Yeleyi yichakamuchisya kuti alimbisye chikulupi  chawo. Ana akudandawula mnope ligongo lyakuti jwachinasi jwawo amtyosisye mumpingo? Alijiganyeje Maloŵe ga Mlungu kuti gakamuchisye kumanyilila kuti ndaŵi syosope chamuko cha Yehofa chikusaŵaga chambone. Chinga asimene ni yakusawusya yamtuli, awuwoneje kuŵa upile wakulimbisya chikulupi chawo. Amsalileje Yehofa yosope yayikwalagasya nganisyo. Akalipatulaga, mmalo mwakwe atendeje yindu yimpepe ni abale soni alongo ŵawo. (Mis. 18:1) Atendeje yindu yampaka yakamuchisye kuŵa ŵakupilila, atamose yili mkuti kutenda yeleyo kuli kwakusawusya mnope. (Sal. 126:5, 6) Apitilisyeje kutenda yindu yakwayana ni kulambila mpela kusongana, kulalichila soni kuŵalanga Baibulo. Aganichisyejesoni yindu yambone yaŵasunjile Yehofa kusogoloku. Pakulola yakuti Yehofa pakwakamuchisya wawojo, chachitanda kumkulupilila mnope.

18. Naga chikulupi chawo chinandipe, ana akusosekwa kutenda chichi?

¹⁸ Naga yakusawusya yaŵasimene nayo munyumamu kapena yakusimana nayo apano yatendekasisye kuti chikulupi chawo chinandipe ngakusosekwa kudandawula mnope. Awuwoneje welewo kuŵa upile wakulimbisya chikulupi chawo. Nombe wawojo atendeje mpela muŵatendele ŵandumetume ŵa Yesu ŵaŵaŵendile kuti, “Achitende chikulupi chetu kuti chiŵe chakulimbangana.” (Luk. 17:5) Aganichisyejesoni yisyasyo yatukambilene munganiji. Mpela muyaŵelele ni Miguel ni ŵamkwakwe lina lyawo Yurai, akumbuchileje ndaŵi jaŵele Yehofa ali mkwakamuchisya munyumamu. Apopeleje mwakutyochela pasi pamtima pasimene ni yakusawusya mpela muŵatendele mwanache jwamkongwe jwa Mlongo Vero soni Anel. Akumbuchilejesoni kuti Yehofa mpaka ŵakamulichisye masengo ŵachinasi ŵawo soni achimjawo pakwakamuchisya mpela muŵatendele ni Mlongo Geydi. Naga akumkunda Yehofa kuti ŵakamuchisye kupilila yakusawusya yakusimana nayo apano, chachiŵa ŵakusimichisya kuti jwalakwe chachakamuchisya kupilila pachachisimana ni yakusawusya msogolo.

19. Ana Yesu jwakwete chikulupi chamtuli? Ana wawojo akwete chikulupi chamtuli?

¹⁹ Yesu jwakamuchisye ŵakulijiganya ŵakwe kumanyilila mbali siŵasosekwaga kulimbisya chikulupi chawo. Nambope, jwalakwe nganakayichilaga yakuti mwachikamuchisyo cha Yehofa jemanjaji chachikombola kupilila yakusawusya yachachisimana nayo msogolo. (Yoh. 14:1; 16:33) Jwalakwe jwakulupililaga kuti chikulupi chichakamuchisya ŵangondolo sine kuti akulupuche pa yisawusyo yekulungwa. (Chiw. 7:9, 14) Ana wawojo chachikulupuka nawo? Ligongo lya umbone mtima wekulungwa wa Yehofa, yichiŵa yakomboleka kulupuka naga apano akutenda yakomboleka kuti alimbisye chikulupi chawo.—Ahe. 10:39.