1. Ligongo chichi tukusasosekwa kuti Mlungu atulongoleleje? Ana yeleyi yikukamulana chamtuli ni kuŵa ŵakusangalala?

 KUSANGALALA kusyesyene ngakukusagamba kuŵa kwakandaŵi kamnono, nambo kukusosekwa kuŵa kwa umi wetu wosope. Ana yeleyi mpaka yikomboleche chamtuli? Pa ulaliki wakwe wa petumbi, Yesu jwasasile kuti, “Ŵana upile ŵandu ŵakusamanyilila kuti akusosekwa Mlungu kuti ŵalongoleleje.” (Mat. 5:3) Yesu jwamanyililaga kuti ŵandu ŵapanganyidwe ni mtima wakusaka kummanyilila soni kumlambila Yehofa Mlungu. Yeleyi yikusalosya kuti tukusasosekwa kuti Mlungu atulongoleleje. Soni ligongo lyakuti Yehofa ali “Mlungu jwakusangalala,” myoyo jwalakwe akusasakasoni kuti ŵandu ŵakusamtumichila aŵeje ŵakusangalala.—1 Tim. 1:11.

2-3. (a) Mwakamulana ni maloŵe ga Yesu, ana ni ŵandu ŵane ŵapi ŵampaka asangalalejesoni? (b) Ana munganiji chitukambilane chichi? Ligongo chichi kukambilana yeleyi kuli kwakusosekwa?

² Ana tukusaŵa ŵakusangalala ligongo lyakuti ngatukusimana ni chakusawusya chilichose paumi wetu? Iyayi. Pa ulaliki wakwe wa petumbi, Yesu jwasasile chindu chinechakwe chakusimonjesya. Jwalakwe jwasasile kuti atamose “ŵandu ŵakulila” chinga ligongo lyakulagasika ni ulemwa wawo, kapena ligongo lyakusimana ni yakusawusya paumi wawo mpaka aŵe ŵakusangalala. Yesu jwasasile yakulandanayi pakwamba ya “ŵandu ŵakulagasidwa ligongo lya chilungamo” kapena ŵandu ‘ŵakunyosyedwa’ ligongo lyakuŵa ŵakumkuya ŵakwe. (Mat. 5:4, 10, 11) Ana mpaka yikomboleche uli mundu kuŵa jwakusangalala ali mkusimana ni yindu mpela yeleyi?

³ Yesu jwatujiganyisye kuti kusangalala kusyesyene kukusayika ngaŵa ligongo lyakuti ngatukusimana ni yakusawusya paumi wetu,  nambo ligongo lyakukunda kulongoleledwa ni Mlungu soni kuŵa najo paunasi wambone. (Yak. 4:8) Ana mpaka tutende chamtuli yeleyi? Munganiji, chitulole yindu yitatu yampaka yitukamuchisye kuti tusangalaleje yisyesyene.

4. Ana ni chindu chandanda chapi chatukusosekwa kutenda kuti tusangalaleje yisyesyene? (Salimo 1:1-3)

⁴ CHINDU CHANDANDA: Kuti tuŵe ŵakusangalala yisyesyene, tukusasosekwa kuŵalanga soni kulijiganya Baibulo. Kutenda yeleyi kuli mpela kulya. Ŵandu soni yinyama akusasosekwa yakulya kuti aŵe ni umi. Nambo ŵandupe ni ŵampaka asosekwe kuŵalanga soni kulijiganya Baibulo yayili mpela chakulya. Sonitu yeleyi ni yatukusasosekwa. Ni ligongo lyakwe Yesu jwasasile kuti, “Mundu ngaŵa mkutama ni umi ni chakulyape, nambo ni maloŵe gosope gakutyochela mkamwa mwa Yehofa.” (Mat. 4:4) Myoyo, ngatukusosekwa kunda kuti lisiku limale mkanituŵalanje kapena kulijiganya Baibulo. Jwamasalimo jwatite, ‘Jwana upile mundu jwakusasimana lukondwa ni malamusi ga AMBUJE, ni kugaganichisya malamusigo musi ni chilo.’—Aŵalanje Salimo 1:1-3.

5-6. (a) Ana mpaka tulijiganye chichi kutyochela m’Baibulo? (b) Ana kuŵalanga Baibulo mpaka kutukamuchisye mmatala gapi?

⁵ Ligongo lyakuti Yehofa akusatunonyela, jwalakwe jwatulosisye kupitila m’Baibulo yindu yatukusosekwa kutenda kuti tuŵe ŵakusangalala. Tukusalijiganya m’Baibulo chakulinga cha Mlungu pakwamba ya umi wetu. Tukusalijiganyasoni yampaka tutende kuti tuŵe paunasi ni jwalakwe, soni yampaka tutende kuti atukululuchile yakulemwa yetu. Nambosoni tukusalijiganya ya chembecheyo chambone mnope chatukwete payindu yachachitenda jwalakwe msogolo. (Yel. 29:11) Patukulijiganya yindu yeleyi, yikusatutendekasya kuti tuŵeje ŵakusangalala yisyesyene.

 ⁶ Baibulo jikwetesoni malangiso gakamuchisya mnope paumi wetu wa lisiku lililyose. Patukukuya malangisoga tuchiŵa ŵakusangalala. Patutengwiche ligongo lya yakusawusya yatukusasimana nayo paumi wetu, chindu champaka chitukamuchisye chili kuŵalanga soni kuganichisya Maloŵe ga Yehofa. Yesu jwatite, “Ŵakwete upile ali ŵandu ŵele akusagapikanila maloŵe ga Mlungu ni kugasungaga!”—Luk. 11:28.

7. Ana chichi champaka chitukamuchisye kuti tupinduleje patukuŵalanga Maloŵe ga Mlungu?

⁷ Pakuŵalanga Maloŵe ga Mlungu ajimeje ni kuganichisya yaŵalasileyo. Kuti tupikanichisye yeleyi kwende tuganichisye chisyasyo chakuyichisyachi. Tuwanichisye kuti mundu jwine ŵatelechele chakulya chakusachinonyela mnope wawojo. Nambo ligongo lyakuti ali pachitema kapena akuganichisya yine yakwe, pakulya chakulyacho ngakwima kuti apikanile kunong’a kwakwe. Kaneko pamalisisye kulya, akuyikopochela kuti alileje mwakuwutuka mnope mwamti bola yikaŵe kuti ŵalyaga panandipanandi ni kupikanilaga kunong’a kwakwe. Yeleyi mpaka yitendekwesoni patukuŵalanga Baibulo. Ndaŵi sine mpaka tuŵalanjeje mwakwanguya ni kulepela kuganichisya yatulijiganyisye. Myoyo patukuŵalanga Baibulo tujimeje kaje ni kuganichisya yayikutendekwa munganijo. Naga tukutenda yeleyi, tuchiŵa ŵakusangalala mnope.

8. Ana “kapolo jwakulupichika ni jwalunda” akusakwanilisya chamtuli udindo wakwe? (Alole maloŵe gamwiŵanda.)

⁸ Yesu ŵasagwile “kapolo jwakulupichika ni jwalunda” kuti atupeje pandaŵi jakwe yindu yakutukamuchisya kuŵa paunasi wambone ni Mlungu. Mwamti ngatukusasoŵa chilichose. * (Mat. 24:45) Baibulo jili chindu chakusosekwa mnope chakusakamulichisya masengo kapoloju pakupanganya yindu yakutukamuchisya kuŵa paunasi wambone ni Mlungu. (1 Ates. 2:13) Yindu yeleyi yikusatukamuchisya kumanyilila kaganisye ka Yehofa, mpela mwajikusaŵechetela Baibulo. Ni ligongo lyakwe tukusaŵalangaga magasini ga Sanja ja Mlonda ni Ajimuche! soni ngani sya pa jw.org. Tukusakosechela misongano josope ja mpingo. Nambosoni tukusalolela pologalamu ja mwesi uliwose ja JW Broadcasting^®. Kukamulichisya masengo yindu yeleyi kukusatukamuchisya kuti tutende chindu chaŵili chachikusatukamuchisya kuŵa ŵakusangalala yisyesyene.

9. Ana chindu chaŵili chapi champaka chitukamuchisye kuŵa ŵakusangalala yisyesyene?

⁹ CHINDU CHAŴILI: Kuti tuŵe ŵakusangalala yisyesyene, tukusasosekwa kupikanila malamusi ga Yehofa. Jwamasalimo jwalembile kuti, “Jwana upile mundu jwalijose jwakwajogopa AMBUJE, mundu jwakwenda m’matala gakwe.” (Sal. 128:1) Kumjogopa Yehofa kukusagopolela kumchimbichisya soni kuŵambala kutenda chilichose champaka chimtumbilikasye. (Mis. 16:6) Ni ligongo lyakwe ndaŵi syosope, tukusatenda yampaka tukombole pakupitilisya kukuya malamusi ga Mlungu pangani ja chambone soni chakusakala mpela mwajikusaŵechetela Baibulo. (2 Akoli. 7:1) Myoyo tuchiŵa ŵakusangalala naga tukutenda yindu yakusayinonyela Yehofa soni kuŵambala yindu yakusaŵengana nayo.—Sal. 37:27; 97:10; Alo. 12:9.

10. Mwakamulana ni Aloma 12:2, ana udindo wetu uli wamtuli?

¹⁰ Aŵalanje Aloma 12:2. Mundu mpaka amanyilile kuti Yehofa ni jwakwete udindo wakusagula chachili chambone soni chakusakala, nambope akusasosekwa kukuya malamusi ga Yehofa. Mwachisyasyo, mundu mpaka amanyilile kuti boma jikwete udindo wakupeleka malamusi ga kajende ka pamsewu. Nambo mundujo ni kusagula kuti akakuyaga malamusigo. Mwamti akwamba kuwutusya galimoto jakwe mwakusachila. Yatukusatenda paumi wetu yikusalosya kuti tukusakulupilila kuti kukuya malamusi ga Yehofa kukusamtendekasya mundu kola umi wambone. (Mis. 12:28)  Nombe Daudi jwapikanaga myoyo, ni ligongo lyakwe jwasasile kuti, “Ŵalakwe akusandosya une litala lya ku umi, ngusasimana lukondwa pakuŵa ŵalakwe ali chiŵandika ni une.”—Sal. 16:11.

11-12. (a) Ana tukusosekwa kusamala ni chichi patusimene ni yakusawusya kapena patutengwiche? (b) Ana maloŵe ga pa Afilipi 4:8 mpaka gatukamuchisye chamtuli patukusagula yakusangalasya?

¹¹ Naga tusimene ni yakusawusya kapena tutengwiche, ndaŵi sine mpaka tusosekwe kutenda chinechakwe champaka chitukamuchisye kumalana ni yakusawusyayo. Sonitu yeleyi yili yakupikanika. Nambope tukusosekwa kusamala kuti tukatenda yindu yakusaŵengana nayo Yehofa.—Aef. 5: 10-12, 15-17.

¹² Mu chikalata chakwe chakwawula kwa Afilipi, ndumetume Paulo jwalimbikasisye Aklistu kuti apitilisye kutenda yindu yayili “yakuŵajilwa pameso pa Mlungu, . . . yeswela, . . . yakunonyelesya, [soni] yambone.” (Aŵalanje Afilipi 4:8.) Atamose kuti pelepa Paulo nganasalaga mnopemnope yakwamba yakusangalasya, nambope maloŵe gakwega mpaka gatukamuchisyesoni patukusagula yakusangalasya. Ana nyimbo syakusapikanila, mafidiyo gakusalolela, mabuku gakusaŵalanga soni magemu gakusanonyela yikusakamulana ni yaŵasasile Pauloyi? Kuganichisya yeleyi mpaka kwakamuchisye kumanyilila yindu yampaka yimsangalasye Mlungu soni yanganiyiŵa yimsangalesye. Ndaŵi syosope tukusasaka kupikanila malamusi ga Yehofa. (Sal. 119:1-3) Mwamti patukwete chikumbumtima chambone mpaka tutende chindu chatatu champaka chitukamuchisye kuŵa ŵakusangalala yisyesyene.—Mase. 23:1.

13. Ana ni litala lyatatu lyapi lyampaka litukamuchisye kuŵa ŵakusangalala yisyesyene? (Yohane. 4:23, 24)

¹³ CHINDU CHATATU: Alolechesyeje kuti paumi wawo akuŵika pandanda yindu yakwayana ni kumtumichila Yehofa. Ligongo lyakuti Yehofa ni juŵatupanganyisye, tukusasosekwa kumtindiŵalila. (Chiw. 4:11; 14:6, 7) Yeleyi, yikugopolela kuti tukusasosekwa kumtindiŵalila jwalakwe m’litala lyakusalijitichisya, soni mwakulongoleledwa ni “msimu soni mwakamulana ni yayili yisyene.” (Aŵalanje Yohane 4:23, 24.) Tukusasaka kuti msimu weswela wa Mlungu utulongoleleje patukumtumichila jwalakwe ni chakulinga chakuti yikamulaneje ni yisyesyene yayikusasimanikwa m’Maloŵe gakwe. Kumtumichila Yehofa kukusasosekwa kuŵeje pamalo gandanda atamose tuli mkutama m’chilambo chele masengo getu ŵagalekasisye. Patukuŵecheta pano, abale ni alongo ŵetu ŵakupunda 100 awugalilidwe mundende ligongo lyakuti ali ŵa Mboni sya Yehofa. * Atamose yili myoyo, jemanjaji akusasangalalaga pakupopela, kulijiganya, nambosoni kwasalila ŵane yakwamba Mlungu soni Uchimwene wakwe. Ŵane pakutunyosya kapena kutulagasya, mpaka tuŵepe ŵakusangalala pakumanyilila kuti Yehofa ali ni m’weji soni kuti chachitupa mbote.—Yak. 1:12; 1 Pet. 4:14.

14. Ana m’bale jwine jwachinyamata jwa ku Tajikistan jwasimene ni yamtuli? Ligongo chichi jwasimene ni yeleyi?

¹⁴ Abale ni alongo ŵetu ŵane ŵasimene ni yakusawusya yekulungwakulungwa, nambope ŵaliji ŵakusangalala yisyesyene ligongo lyakuya yindu yitatu yatulijiganyisye munganiji. Aganichisye yayamtendechele mnyamata jwine jwa yaka 19 jwakusatama ku Tajikistan lina lyakwe Jovidon Bobojonov. Mnyamataju jwakanile kwinjila usilikali, myoyo pa 4 Okotoba 2019, ŵamkamwile ni kumjawusya kundende kuŵatemi kwa myesi jejinji. Pajwaliji kweleko, ŵamtendelaga yindu mpela mundu jwakwimuchila. Yindu yangali chilungamo yayamtendechele mnyamataju yamanyiche m’yilambo yejinji. Yikuwoneka kuti mnyamataju jwayikene pakuputidwa ni chakulinga chakuti akunde kwinjila usilikali. Panyuma pa yeleyi,  ŵakoti ŵamlamwile kuti ali jwakulemwa, mwamti ŵamtumisye kundende kuti akakamuleje ukayidi. Jwalakwe jwatemi kundendeko mpaka pandaŵi jele pulesidenti jwa chilambocho jwalamwile kuti amkoposye. Kwandaŵi josopeji, Jovidon jwapitilisye kuŵa jwakulupichika soni jwakusangalala. Yeleyi yakomboleche ligongo jwamanyililaga yakusosekwa kutenda kuti aŵe paunasi wambone ni Mlungu.

15. Ana Jovidon pajwaliji kundende jwapitilisye chamtuli kulijiganya yakwamba Yehofa?

¹⁵ M’bale Jovidon pajwaliji kundende kula, jwapitilisye kulijiganya yakwamba Yehofa atamose kuti nganakola Baibulo soni mabuku getu. Ana yeleyi yakombolekaga chamtuli? Abale ni alongo ŵaŵapelekaga yakulya ŵalembaga lilemba lyesiku pa yipepala yaŵanyakulilaga yakulyayo. Yeleyi, yamkamuchisyaga m’baleju kuti aŵalanjeje Baibulo soni kuganichisya yaŵalasileyo lisiku lililyose. Ali akopweche kundendeku, m’baleju jwapeleche malangiso gakuyichisyaga kwa ŵandu ŵele nganasimaneje ni yakusawusya. Jwalakwe jwatite, “Mpaka atende chenene kukamulichisya masengo ufulu wakwete kuti ammanyilile chenene Yehofa mwakuŵalanga Maloŵe gakwe soni mabuku getu.”

16. Ana Jovidon jwaganichisyaga mnope ya chichi?

¹⁶ M’bale jwetuju jwapikanilaga malamusi ga Yehofa. Mmalo mwakuganichisya mnope yindu yakusakala soni kutenda yakulemwecheka, m’baleju  jwaganichisyaga mnope yindu yakusayiwona Yehofa kuti yili yakusosekwa. Kupwatika pelepa, jwaganichisyagasoni ya yindu yakusimonjesya yajwapanganyisye Mlungu. Kundaŵi kulikose jwajimukaga kuti apikane kulila kwa yijuni. Pele chilo jwalolechesyaga lwesi soni ndondwa. Jwalakwe jwatite, “Yindu yaŵatupele Yehofayi yandendekasyaga kuŵa jwakusangalala mnope soni yalimbikasyaga.” Patukuyamichila yindu yosope yakusatupa Yehofa, tukusaŵa ŵakusangalala, soni kusangalala kweleko mpaka kutukamuchisye kuti tukombole kupilila.

17. Ana maloŵe ga pa 1 Petulo 1:6, 7 mpaka gamkamuchisye chamtuli mundu jwasimene ni yakusawusya mpela yaŵasimene nayo Jovidon?

¹⁷ M’bale Jovidon jwaŵikagasoni pamalo gandanda yindu yakwayana ni kumtumichila Yehofa. Jwalakwe jwamanyililaga kusosekwa kwakuŵa jwakulupichika kwa Mlungu. Yesu jwatite, “Yehofa Mlungu jwenu ni jwamkusosekwa kumtindiŵalila soni jwalakwe jika ni jwamkusosekwa kumtumichila.” (Luk. 4:8) Asilikali ŵasakaga kuti Jovidon aleche dini jakwe. Nambo mmalomwakwe, jwalakwe jwapopelaga mnope chilo ni musi lisiku lililyose. Jwalakwe jwamŵendaga Yehofa kuti amkamuchisye kuti akawujila munyuma soni kuti akasokonasya chikulupi chakwe. Atamose kuti m’baleju jwatendeledwe yangali chilungamo, jwalakwe jwapitilisyepe kuŵa jwakulupichika. Yakuyichisya yakwe, apano jwalakwe ali jwakusangalala mnope ligongo lyakola chindu chele nganakola mkanaŵe kutaŵidwa, kuputidwa soni kuŵichidwa mundende. Apano jwalakwe akwete chikulupi chakulimba mnope ligongo lyakuti jwasimene ni yakusawusya.—Aŵalanje 1 Petulo 1:6, 7.

18. Ana mpaka tutende chichi kuti tupitilisye kuŵa ŵakusangalala?

¹⁸ Yehofa akusamanyilila yindu yampaka yitutendekasye kuŵa ŵakusangalala yisyesyene. Naga akukuya yindu yitatu yatukambilene munganiji yayikusakamuchisya kuŵa ŵakusangalala yisyesyene, chachisangalala yisyesyene atamose ali mkusimana ni yakusawusya. Pelepo chachiŵecheta maloŵe gakuti, “Ŵana upile ŵandu ŵele Mlungu jwawo ali [Yehofa].”—Sal. 144:15.