Liŵasa lyetu lyatamaga ku musi wine wakolanjikwa Tellancourt wawaliji kumpoto cakungopoko lyuŵa kwa cilambo ca France. Baba ŵangu ŵaliji ŵa ku France kukoko, nambo mama ali ŵa ku Italy. Ndili ngwanisye yaka 8, twasamile ku musi wine ciŵandika msinda wa Rome, ku Italy. Ŵandu ŵajinji mmusiwu ŵaliji ŵakulaga. Ni m’we ŵakwe yindu yatusawusyaga mwati acinangolo ŵangu ŵakanganaga ndaŵi syosope ligongo lyakusawusya kwa mbiya.

Pinaliji ni yaka 15, mama ŵangu ŵasalile kuti ngagambaga kutama panyumba nambo ngakunguluceje ni acimjangu. M’yoyo natandite kutyoka panyumba mwati ndaŵi sine nawujaga mwakucelewa mnope. Kaneko natandite kunguluka ni ŵandu ŵakusakala. Ngukumbucila kuti lisiku line, mundu jwine juŵawonekaga mpela mundu jwambone, ŵambele mtela wakusokonasya mtwe. Namwele mtelawu ligongo sacileje kuwoneka mpela mundu jwamkulungwa. Pali papite ndaŵi, natandite kamulicisya masengo mnope mitela jakusokonasya mtwe, soni natandite kutenda yamsese. Ndaŵi syejinji ŵandu ŵanganganicisyaga kutenda yagonana. Natandite kuwuwona umi wangu kuŵa wangasosekwa, soni naliwonaga kuti ndili jikape. Lisiku line, ndili ni yaka 16, namwele ukana ni kuliponya m’nyasa kuti ngambe kuwa. Naŵele cikomocele kwa masiku gatatu.

Panaŵele cenene, natandite ganisya kuti ngaŵa cenene ng’andila umi. Nambope, natandite kutenda yakusakala. Nagonanaga ni ŵandu msimangwawo, kaneko namwesyaga mtela wakusokonasya mtwe ni kwajiŵila yindu m’nyumba mwawo. Makuga gane gakusakala gangamulicisyaga masengo kuti nagasumicisyeje mitela jakusokonasya mtwe m’cilambo cosope ca Italy. Yeleyi yatendekasyaga kuti ŵapolisi andaŵeje ndaŵi ni katema. Umi wangu wasakele mnope mwati nawuwonaga kuti uli wangali mate. Nambope nakulupililaga kuti Mlungu ŵambanganyisye ni cakulinga cambone, mwati ndaŵi sine napopelaga kwa Mlungujo. Nam’ŵendaga kuti ambe caka cimope cakutama mwamtendele, soni mwakusangalala.

Ligongo lyakamulicisya masengo mitela jakusokonasya mtwe, soni kujisumisyaga, umi wangu waliji pangosi. M’yoyo, ndili ni yaka 24, naganicisye yakuti samile ku England. Pinajawile kwa mama kuti ngalanje, nasimene ali mkutagulilana ya m’Baibulo ni jwamlume jwine lina lyakwe Annunziato Lugarà. * Nasimonjile  mnope ligongo munduju pandanda ŵakamulicisyagasoni masengo mitela jakusokonasya mtwe. Nambo jwalakwe ŵasalile kuti apano ali jwamboni sya Yehofa. Ŵasasile yaŵatesile kuti acenje ndamo syakwe, soni ŵalimbikasisye kuti pacisamile ku England ngaŵende ŵamboni kuti akanjiganyeje Baibulo. Namsimicisye kuti cingatende yeleyi. Nambo pinasamile, natandilesoni ndamo syakusakala sila.

Lisiku line ndili mkwenda mu msewu wine mumsinda wa London, nasimene ni jwamboni ali mkugaŵila magasini ga Sanja ja Mlonda ni Galamukani! Pakumbucila yanatagulilene ni Annunziato, nam’ŵendile jwamboniju kuti anjiganyeje Baibulo.

M’Baibulo nalijiganyisye yindu yejinji yakusangalasya. Mwambone, nasangalele ni ngani jajili pa 1 Yohane 1:9, jajikusati, ‘Naga tukwiticisya ulemwa wetu, Mlungu jwali jwakulupicika ni jwakulungama cacitukululucila ulemwa wetuwo, soni cacituswejesya.’ Lilembali lyangamwile mtima ligongo naliwonaga kuŵa jwakusakala mnope. Mwangakaŵa, natandite kusongana ni Mboni sya Yehofa. Ŵamboniwo ŵambocelaga mwacinonyelo. Pakuŵa ni kala kose nasacililaga ndili mkutama ni ŵandu ŵacinonyelo mpela ŵeleŵa, natamilicice mumpingo wawo.

Atamose kuti nganiyisawusya kuleka kamulicisya masengo mitela jakusokonasya mtwe, soni kutenda yamsese, nambo yalemile mnope kucenga umundu wangu. Nalepelaga kwacimbicisya ŵane, soni kutenda yindu mwakwaganicisya. Mpaka apano ngulingalingape kumalana ni umundu wakusakalawu. Nambo Yehofa angamucisye kuti njenje panandi pajakwe. Pali papite miyesi 6 ndili mkulijiganya Baibulo, nabatiswe ni kuŵa jwamboni sya Yehofa. Yeleyi yatendekwe mu 1997.

Panabatiswe, nalombene ni jwamkongwe jwine lina lyakwe Barbara juŵaliji ali abatiswe kwene ni kuŵa jwamboni sya Yehofa. Mundu jwine junakungulukaga najo kalakala paŵayiweni kuti umi wangu ucenjile, nombe najo ŵatandite kulijiganya Baibulo. Mkupita kwa ndaŵi, jwalakwejo ni mcemwaligwe ŵaŵele ŵamboni. Kaneko anganga ŵangu ŵakongwe, ŵaŵaliji ni yaka 80, ŵatandite kulijiganya Baibulo mwati ŵabatiswe mkanawe.

Apano ngutumicila mpela jwamkulungwa jwa mumpingo, soni yimpepe ni ŵamkwangu tukusalalicila kwa maawala 70 mwesi wuliwose. Tukusajiganya Baibulo ŵandu ŵakuŵeceta Citaliyana ŵakutama ku London. Ndaŵi sine pangumbucile umi wangu wakala ngusatenguka mnope, nambo Barbara akusangamucisya kuti ndiŵalileje yeleyi. Ngusangalala kwejinji ligongo lyakuti ngwete liŵasa lyambone lyanalisacililaga, soni mbatile Atati ŵacinonyelo ŵanasakaga. Nam’ŵendile Mlungu kuti ambe caka cimope cakutama mwamtendele, soni mwakusangalala, nambo ambele yaka yejinji, soni yindu yine!