Ngani Jakulijiganya 3
Ŵangondolo Sine Akusamchimbichisya Mlungu Soni Klistu
“Ukulupusyo ukusatyochela kwa Mlungu jwetu jwakusatama pa chitengu cha uchimwene, nambo soni kwa Mwanache Jwangondolo.”—CHIW. 7:10.
NYIMBO NA. 14 Amlumbeje Mwenye Jwasambano jwa Chilambo Chapasi
YACHITULIJIGANYE *
1. Ana ngani jajaŵechetedwe pamsongano wa mu 1935 jamkwayiye chamtuli mnyamata jwine?
MNYAMATA jwine jwa yaka 18 jwabatisidwe mu 1926. Achinangolo ŵakwe ŵaliji Ŵakulijiganya Baibulo, lina lyele ŵa Mboni sya Yehofa ŵamanyikaga nalyo pandaŵijo. Achinangolo ŵa mnyamataju ŵakwete ŵanache ŵatatu ŵachalume soni ŵaŵili ŵachakongwe. Achinangoloŵa ŵajiganyisye ŵanacheŵa kuti amtumichileje Yehofa soni kuti amsyasyeje Yesu Klistu. Mnyamataju jwalyaga mkate soni kumwa finyo pa Chikumbuchilo chaka chilichose mpela mwayaŵelaga ni Ŵakulijiganya Baibulo wosope pandaŵijo. Nambope yaŵajembecheyaga yachenjile mnope paŵapikanile ngani ja mtwe wakuti “Likuga Lyekulungwa lya Ŵandu.” M’bale J. F. Rutherford ni juŵaŵechete nganiji mu 1935 pamsongano wawatendekwe ku Washington, D.C., U.S.A. Ana ŵandu ŵalijiganyisye chichi pamsonganowu?
2. Ana M’bale Rutherford jwalondesisye usyesyene wapi mungani jakwe?
2 Mungani jakwe, M’bale Rutherford ŵasasile ya ŵandu ŵali mu “likuga lyekulungwa” ŵele akusakolanjidwa pa Chiwunukuko 7:9. Pandaŵiji Ŵakulijiganya Baibulo ŵakulupililaga kuti ŵandu ŵa mu likuga lyekulungwa chachijawulasoni kwinani nambo nganakola chikulupi chakulimba mpela cha ŵasagulwe. Nambo M’bale Rutherford jwakamulichisye masengo Malemba pakulondesya kuti ŵandu ŵa mu likuga lyekulungwa nganasagulidwa kuti akatame kwinani. Jemanjaji ali ŵangondolo sine * ŵele chachikulupuka pa “yisawusyo yakogoya” ni kutamaga ni umi wangamala pachilambopa. (Chiw. 7:14) Yesu jwasasile kuti, “Sipali ngondolo sine syasili syangu simkanisiŵa mwichingamu. Une nguŵajilwa kusisonganya nombe nasyo, nipo tisichipikana maloŵe gangu, nipo tipachiŵa likuga limo ni mkuchinga jumo.” (Yoh. 10:16) Ŵangondolo sineŵa ali ŵa Mboni sya Yehofa ŵakulupichika ŵakwete chembecheyo chakutama ni umi wangamala mu Paladaiso pachilambopa. (Mat. 25:31-33, 46) Ana kuchenga kwa kapikaniche ka usyesyeneku kwakwayiye chamtuli ŵakutumichila ŵa Yehofa?—Sal. 97:11; Mis. 4:18.
ŴAJINJI ŴACHENJILE PAŴAPIKANICHISYE YISYESYENE YAKWE
3-4. Ana ŵandu ŵajinji ŵamanyilile ya chichi pamsongano wa mu 1935?
3 Yaliji yakusangalasya pandaŵi jele jwakuŵecheta ngani jwaŵechete kuti, “Tukwaŵenda wosope ŵakwete chembecheyo chakutama pachilambo chapasi kuti ajime.” Pamsonganowu ŵayiche ŵandu chiŵandika 20,000. Pandaŵiji ŵandu ŵakupunda 10,000 ŵajimi. Pelepo M’bale Rutherford jwatite, “Alole!, Likuga lya ŵandu ŵangaŵalanjika.” Kaneko ŵandu ŵatandite kwatila m’miyala. Wosopeŵa ŵajimi ligongo ŵamanyilile kuti nganasagulidwa ni msimu weswela kuti chajawule kwinani. Pa lisiku lyakuyichisya lya msonganowu ŵandu ŵakwana 840 ŵabatisidwe. Ŵajinji mwa jemanjaji ŵaliji ŵangondolo sine.
4 Msonganowu pawagambile kumala, mnyamata jwatumkolasile kundanda jula pampepe ni ŵandu ŵane, ŵalesile kulya mkate soni kumwa finyo pa Chikumbuchilo. Pakwamba mwaŵapikanilaga ŵandu ŵajinji pandaŵiji, m’bale jwine jwatite, “Nalesile kulya mkate soni kumwa finyo pa Chikumbuchilo chachatendekwe mu 1935. Nalesile ligongo namanyilile kuti Yehofa nganasagula ni msimu wakwe kuti ngatame kwinani. Mmalo mwakwe, nayiweni kuti chembecheyo changu chili chakutama pachilambo chapasi soni kuchilinganya kuti chiŵe paladaiso.” (Alo. 8:16, 17; 2 Akoli. 1:21, 22) Kutandila pandaŵiji, chiŵalanjilo cha likuga lyekulungwa lya ŵandu chiŵele chili mkutupa. Soni jemanjaji aŵele mkukamula masengo mwakulipeleka ni ŵasagulwe ŵakusigala. *
5. Ana Yehofa akusiŵawona wuli ŵandu ŵalesile kulya mkate soni kumwa finyo pa Chikumbuchilo?
5 Ana Yehofa akusiŵawona chamtuli ŵandu ŵaŵalesile kulya mkate soni kumwa finyo pa Chikumbuchilo mu 1935? Nambi wuli ya ŵandu ŵakusalya mkate soni kumwa finyo pa Chikumbuchilo, nambo panyuma pakwe ni akumanyilila kuti nganasagulidwa yisyesyene? (1 Akoli. 11:28) Ŵandu ŵane akusalya mkate soni kumwa finyo ligongo lyakuti ngakusamanyilila chenene chembecheyo chawo. Jemanjaji pamanyilile kuti ŵalemwesyaga, akusasosekwa kuleka kulya mkate soni kumwa finyo ni kupitilisyagape kumtumichila Yehofa mwakulupichika. Naga akutenda yeleyi, Yehofa chachawona kuti ali mu likuga lya ŵangondolo sine. Jemanjaji akusasosekwa kusimanikwapo pa Chikumbuchilo pakusaka kulosya kuyamichila yaŵatendele Yehofa soni Yesu. Akusasosekwa kutenda yeleyi atamose kuti ngakusalyasoni mkate kapena kumwa finyo.
CHEMBECHEYO CHAMBONE MNOPE
6. Ana Yesu ŵagalamwile malayika kutenda chichi?
6 Pakuŵa yisawusyo yakogoya yisigele panandi, mpaka yiŵe yakulimbikasya kukambilana yayili m’buku ja Chiwunukuko chaputala 7. Pelepa akusasala ya Aklistu ŵasagulwe soni ya likuga lya ŵangondolo sine. Yesu agalamwile malayika kuti gakaleka kukamula mbungo mcheche syakonanga mpaka Aklistu wosope ŵasagulwe ali apochele chidindo chakumalisya kulosya kuti Yehofa ŵajitichisye. (Chiw. 7:1-4) Ligongo lya kukulupichika kwawo, ŵasagulweŵa chachiŵa ayimwene soni ŵambopesi pachachilamulilaga ni Yesu kwinani. (Chiw. 20:6) Wosope ŵali kwinani chachiŵa ŵakusangalala mnope kwawona ŵa 144,000 ali mkupochela mbote jawo kwinani.
Likuga lya ŵandu liwete mikanjo jeswela, m’miyala mwawo anyakwile nyambi sya kanjesa. Jemanjaji ajimi pameso pampando wakuchimbichika wa Mlungu soni pa mwanache jwangondolo (Alole ndime 7)
7. Ana pa Chiwunukuko 7:9, 10, pakulosya kuti Yohane ŵaweni ŵani? Ana jemanjaji ŵatendaga chichi? (Alole chiwulili cha pachikuto.)
7 Yohane ali asasile ya likuga lya ŵa 144,000, ŵaliwenisoni likuga lyekulungwa lya ŵandu ŵaŵakulupwiche pa Alamagedo. Mwakulekangana ni likuga lyandanda lila, ŵandu ŵali mu likuga lyaŵilili ali ŵajinji soni ŵangaŵalanjika. (Aŵalanje Chiwunukuko 7:9, 10.) Jemanjaji awete “mikanjo jeswela,” kulosya kuti ali ŵakuligosa “ku yangalumbana yosope” ya m’chilambo cha Satanachi soni aŵele ŵakulupichika kwa Mlungu ni Klistu. (Yak. 1:27) Jemanjaji akugumila mwakusangalala ligongo lyakuti akulupwiche, mwamti akumyamichila Mlungu soni Yesu jwali Mwanache jwangondolo. M’miyala mwawo anyakwile nyambi sya kanjesa pakulosya kwitichisya kuti Yesu ali Mwenye jwakusagulidwa ni Yehofa.—Alolesoni Yohane 12:12, 13.
8. Ana lilemba lya Chiwunukuko 7:11, 12, likutusalila yamtuli pakwamba ya wosope ŵali kwinani?
8 Aŵalanje Chiwunukuko 7:11, 12. Ana kaneko kwinani kwatendekwe chichi? Yohane ŵaliweni liŵasa lyosope lyakwinani lili mkusangalala pakuliwona likuga lyekulungwa lya ŵandu pachilambo chapasi lili kumtumichila Yehofa. Yeleyi yikulosya kuti liŵasa lyakwinanili lichiŵa lyakusangalala mnope pakuliwona likuga lyekulungwa lya ŵandu lili likulupwiche pa yisawusyo yakogoya.
9. Ana lilemba lya Chiwunukuko 7:13-15, likulosya kuti ŵalikuga lyekulungwa lya ŵandu akutenda chichi masiku agano?
9 Aŵalanje Chiwunukuko 7:13-15. Yohane ŵasasile kuti likuga lyekulungwa lya ŵandu ‘lyachapile mikanjo jawo ni kujiswejesya m’miyasi ja Mwanache Jwangondolo.’ Yeleyi yikulosya kuti jemanjaji akwete chikumbumtima chambone soni kuti ali ŵaswela pameso pa Yehofa. (Yes. 1:18) Jemanjaji ali Aklistu ŵakulipeleka soni ŵabatisidwe, ŵele ŵaŵakulupilile mbopesi jakutuwombola ja Yesu mwamti akwete unasi wambone ni Yehofa. (Yoh. 3:36; 1 Pet. 3:21) Aklistuŵa ali ŵakuŵajilwa kwima pameso pa chitengu cha Uchimwene wa Mlungu ni ‘kumtumichilaga jwalakwejo chilo ni musi.’ Soni akusamtumichila Mlungu pachilambo chapasi mu kachisi jwakwe jwamkulungwa. Jemanjaji akulipeleka mnope pakukamula masengo gakulalichila ni kwajiganya ŵandu gagakutendekwa pachilambo chosope. Akusatenda yeleyi mwakuŵika yakusaka ya Mlungu pa malo gandanda paumi wawo.—Mat. 6:33; 24:14; 28:19, 20.
Likuga lyekulungwa lya ŵandu likusangalala ligongo likulupwiche pa yisawusyo yakogoya (Alole ndime 10)
10. Ana likuga lyekulungwa lya ŵandu likusosekwa kumanyilila chichi? Ana jemanjaji chachikuwona kukwanilichikwa kwa maloŵe gapi?
10 Likuga lyekulungwa lya ŵandu lyalichikulupuka pa yisawusyo yakogoya likusosekwa kumanyilila kuti Mlungu chachipitilisya kulisamalila. Yili myoyo ligongo lyakuti jwali pa chitengu cha uchimwene chachiŵa ni jemanjajo. Ŵangondo sine chachikuwona kukwanilichikwa kwa maloŵe gakuti, “Jwalakwejo tachipukuta misosi josope m’meso mwawo. Ngasipapagwa chiwa, chanasa, kulila, kapena kupikana yipwetesi. Yindu yakala yosope yeneyi yimasile.”—Chiw. 21:3, 4.
11-12. (a) Ana lilemba lya Chiwunukuko 7:16, 17, likulosya kuti ŵangondolo sine chachisangalala ni yindu yapi? (b) Ana ŵangondolo sine akusakola upile wamtuli pa Chikumbuchilo?
11 Aŵalanje Chiwunukuko 7:16, 17. Ŵakutumichila ŵane ŵa Yehofa akulaga mnope ni sala ligongo lya kusoŵa kwa mbiya kapena ngondo syasikutendekwa m’yilambo yakutama. Pele ŵane ali kundende ligongo lya chikulupi chawo. Atamose yili myoyo, jemanjaji akusaŵa ŵakusangalala ligongo akumanyilila kuti chachikulupuka pandaŵi jele chilambo chakusakalachi chichijonanjidwaga. Panyuma pakwe chachikola yakulya yejinji soni Yehofa chachipitilisya kwasamalila. Yehofa chachilolechesya kuti ŵakulupwisye ŵakutumichila ŵakwe pandaŵi jachachijonangaga chilambo chakusakala cha Satanachi. Yisawusyo yakogoya payichimala, Yesu chachalongolela ŵandu ŵachachikulupukaŵa kuti ajawule ku “mesi ga umi.” Kusala yisyene ŵangondolo sine akwete chembecheyo chambone mnope. Ŵandu mabiliyoni gejinji ŵachachitama m’chilambo chasambano ngasawasoni.—Yoh. 11:26
12 Ŵangondolo sine akusamyamichila Yehofa soni Yesu ligongo lya yindu yakusangalasya yakwembecheya. Atamose kuti jemanjaji nganasagulidwa kuti akatame kwinani, nambope Yehofa akusiŵawona kuti ali ŵakusosekwa mnope. Ŵangondolo sine yimpepe ni ŵasagulwe akusamchimbichisya mnope Yehofa soni Yesu. Jemanjaji akusatenda yeleyi mwakusimanikwa pa Chikumbuchilo cha chiwa cha Yesu.
ALOSYEJE KUYAMICHILA MWAKUSIMANIKWA PA CHIKUMBUCHILO
Mkate soni finyo jwa pa Chikumbuchilo yikusatukumbusya kuti Yesu jwawile pakusaka kuti m’weji tukapate umi (Alole ndime 13-15)
13-14. Ligongo chichi jwalijose akusasosekwa kusimanikwa pa Chikumbuchilo cha chiwa cha Yesu?
13 Mu yaka yapachangakaŵapa, yilosisye kuti mundu jumo pa ŵandu 1,000 ŵaliwose ŵakusasimanikwa pa Chikumbuchilo ni jwakusalya mkate soni kumwa finyo. Pelepatu yikulosya kuti mipingo jejinji nganijikola ŵandu ŵakusalya mkate soni kumwa finyo pa Chikumbuchilo. Myoyo ŵandu ŵajinji ŵakusasimanikwa pa Chikumbuchilo akwete chembecheyo chakutama ni umi pachilambo chapasi. Sambano ligongo chichi jemanjaji akusatenda nawo Chikumbuchilo cha chiwa cha Yesu? Yakusatenda jemanjaji mpaka tuyilandanye ni ŵandu ŵapite ku ukwati wa mjawo. Jemanjaji akusajawula ku ukwatiwo pakusaka kulosya kuti akusanonyela ŵandu ŵakulombanawo soni kuti ali ŵakusachilila kwakamuchisya. Myoyo ŵangondolo sine akusasimanikwa pa Chikumbuchilo pakusaka kulosya kuti akusamnonyela Yesu soni ŵasagulwe nambosoni kuti ali ŵakusachilila kwakamuchisya jemanjaji. Ŵangondolo sineŵa akusasimanikwasoni pa Chikumbuchilo ligongo akusayamichila mbopesi jakutuwombola ja Yesu. Mbopesiji ni jajikusatendekasya kuti jemanjaji chatame ni umi wangamala pachilambopa.
14 Ligongo lyekulungwa lyele ŵangondolo sine akusasimanikwa pa Chikumbuchilo lili lyakuti akusasaka kupikanila lilamusi lyaŵapeleche Yesu. Pandaŵi jele Yesu ŵatandikasyaga mwambo wakukumbuchila chiwa chakwe, ŵasalile ŵakulijiganya ŵakwe kuti, “Mtendeje yeleyi kuti mungumbuchileje.” (1 Akoli. 11:23-26) Myoyo pandaŵi jele ŵasagulwe ali chiŵela pachilambopa, ŵangondolo sine chapitilisyepe kutenda chikumbuchilo cha chiwa cha Yesu. Sonitu jemanjaji akusiŵaŵilanjila ŵandu ŵane kuti asimanikwe nawo pa Chikumbuchilochi.
15. Ana mpaka tumchimbichisye chamtuli Mlungu soni Yesu patuli pa Chikumbuchilo?
15 Patuli pa Chikumbuchilo tukusakola upile ŵakumchimbichisya Mlungu soni Klistu mwakwimba nyimbo soni kupopela. Ngani ja Chikumbuchilo ja chaka achino jili ja mtwe wakuti, “Ayamichileje Yaŵatendele Mlungu Soni Klistu.” Nganiji jichitukamuchisya kuti tumyamichileje mnope Yehofa soni Klistu. Pandaŵi jachachijendesyaga mkate soni finyo tuchikumbuchila kuti yindu yeleyi yikusajimila chilu soni miyasi ja Yesu. Tuchikumbuchilasoni kuti Yehofa ŵakundile kuti mwanache jwakwe awe ligongo lya m’weji. (Mat. 20:28) Myoyo jwalijose jwakusanonyela Atati ŵetu ŵakwinani soni Yesu Klistu, chachiŵa jwakusachilila kuti chasimanikwe pa Chikumbuchilochi.
AMYAMICHILEJE YEHOFA LIGONGO LYA CHEMBECHEYO CHAKWETE
16. Ana ŵasagulwe soni ŵangondolo sine akusalandana chamtuli?
16 Yehofa akusiŵawona ŵasagulwe soni ŵangondolo sine kuti ali ŵakulandana. Jwalakwe akusiŵawona wosopeŵa kuti ali ŵakusosekwa. Yili myoyo ligongo lyakuti Yehofa ŵapeleche mwanache jwakwe kuti ŵawombole wosopeŵa. Nambope ŵasagulwe ni ŵangondolo sine akusalekangana pangani ja chembecheyo chakwete. Wosopeŵa akusasosekwa kuŵa ŵakulupichika kwa Yehofa soni Klistu kuti chapochele yindu yakwembecheya. (Sal. 31:23) Tukusosekwa kukumbuchila kuti msimu wa Mlungu mpaka ukamule masengo pa mundu jwalijose chinga ali jwamsagulwe kapena jwangondolo sine. Yeleyi yikulosya kuti Yehofa akusapeleka msimu wakwe kwa jwalijose mwakamulana ni yakusosechela mundujo.
17. Ana ŵasagulwe ŵakusigala akwembecheya chichi?
17 Aklistu ŵasagulwe ngakusapagwa ali akwete chembecheyo chakuja kutama kwinani. Mmalo mwakwe, Yehofa ni jwakusiŵapa chembecheyochi. Jemanjaji akusaganichisya mnope ya chembecheyo chawo. Akusapopela pakwamba ya chembecheyochi soni akusaŵa ŵakusachilila kupochela mbote jawo kwinani. Jemanjaji ngakusamanyilila kuti chilu chawo chichiwonekaga mwamtuli. (Afil. 3:20, 21; 1 Yoh. 3:2) Nambopetu akusajembecheya kuti chakawonegane ni Yehofa, Yesu, malayika soni ŵasagulwe wosope ŵali kwinani. Ali ŵakusachilila kuja kulamulila yimpepe ni jemanjaji mu Uchimwene wa kwinani.
18. Ana ŵangondolo sine akwembecheya chichi?
18 Ŵangondolo sine akwembecheya kutama ni umi wangamala pachilambopa. Mwachipago yeleyi ni yakusajembecheya mundu jwalijose. (Jwak. 3:11) Jemanjaji akwembecheya ndaŵi jele chachikamulaga masengo gakuchisamalila chilambochi kuti chiŵe paladaiso. Akusasachilila kujiwona ndaŵi jele chachitaŵa majumba gawo, kulima mbeju, soni kwalela ŵanache ŵawo mwakusangalala. (Yes. 65:21-23) Akusasachililasoni ali mkupita mchilola yindu yakusalala yayili pachilambochi mpela matumbi, ngalango, nyasa soni yindu yine yejinji yaŵapanganyisye Yehofa. Kupunda yosope jemanjaji akusasachilila kuwuwona unasi ŵawo ni Yehofa uli ŵakulimba mnope kupundana ni kala kose.
19. Ana lisiku lya Chikumbuchilo likusatupa mpata ŵakutenda chichi? Ana lisiku lyapi lya tuchitenda Chikumbuchilo chaka achino?
19 Yehofa ampele jwakutumichila jwakwe jwalijose chembecheyo chambone mnope. (Yel. 29:11) Kusimanikwa pa Chikumbuchilo cha chiwa cha Klistu kukusatupa upile wosopewe wa kumchimbichisya Mlungu soni Klistu. Jemanjaji akusatenda yeleyi pakulosya kuyamichila chembecheyo chakwete chakutama ni umi mpaka kalakala. Lisiku lya Chikumbuchilo likusapeleka mpata wakuti Aklistu ŵasyesyene asimane pampepe. Chikumbuchilochi chichitendekwa Lyakuŵeluka pa Malichi 27, 2021, lyuŵa lili likapile. Chaka achino ŵane chakombole kutenda Chikumbuchilochi pali pangali chakusokonasya chilichose. Pele ŵane chachitenda Chikumbuchilochi atamose kuti ŵandu akwasisya. Ŵanesoni chachitenda ali mundende. Yehofa, Yesu soni wosope ŵali kwinani chachiŵa ŵakusangalala mnope kumwona mundu jwalijose ali mkutenda nawo Chikumbuchilochi.
NYIMBO NA. 150 Amsoseje Mlungu Kuti Akulupuche
^ ndime 5 Lyakuŵeluka pa Malichi 27, 2021, lichiŵa lisiku lyapajika kwa ŵa Mboni sya Yehofa. Palisikuli, ligulo tuchikola mwambo wakukumbuchila chiwa cha Klistu. Ŵandu ŵajinji ŵachachisimanikwa pachakutendekwachi, ali ŵele Yesu ŵakolasile kuti “ŵangondolo sine.” Ana uli usyesyene wapi wawamanyiche mu 1935 pakwamba ya ŵandu ŵeleŵa? Ana ŵangondolo sine akwembecheya yindu yapi panyuma pa yisawusyo yakogoya? Ana jemanjaji mpaka alosye chamtuli kuti akusamchimbichisya Mlungu soni Klistu pandaŵi jakusimanikwa pa Chikumbuchilo?
^ ndime 2 YAGAKUGOPOLELA MALOŴEGA: Ŵangondolo sine ali ŵandu ŵakusamkuya Yesu soni akwete chembecheyo chakutama ni umi wangamala pachilambo chapasichi. Ŵane mwa jemanjaji ŵatandite kumtumichila Yehofa m’masiku gambesi. Likuga lyekulungwa likwimila ŵangondolo sine ŵachachikulupuka pa yisawusyo yakogoya pandaŵi jele Yesu chachajelusyaga ŵandu pachilambopa.
^ ndime 4 YAGAKUGOPOLELA MALOŴEGA: Maloŵe gakuti “ŵasagulwe ŵakusigala” gakugopolela Aklistu wosope ŵasagulwe ŵali chiŵela pachilambo chapasi, ŵele akusalya mkate soni kumwa finyo pa Chikumbuchilo.
