1. Ana ŵandu masiku agano akusaganichisyaga mnope ya chichi?

 MASIKU agano ŵandu ŵajinji ŵangayikosyaga ya ŵane. Mmalomwakwe akusatamila kuganichisya yawope basi. Mwachisyasyo, ŵane akusakamulichisya masengo malo gakunguluchila ga pa intaneti kuti alilapilileje soni kwalosya ŵane yakombwele kutenda. Nambope, pana ŵandu ŵakuŵalanjika ŵakusamchimbichisya Yehofa Mlungu. Mungani ajino, chitukambilane ngopolelo ja kumchimbichisya Yehofa soni ligongo lyakwe tukusosekwa kutenda yeleyi. Chitulolesoni yampaka tutende kuti tumpeje Yehofa uchimbichimbi wakusasosechela, soni yachatende jwalakwejo kusogoloku pakulichimbichisya lina lyakwe.

ANA KUMCHIMBICHISYA YEHOFA KUKUSAGOPOLELA CHICHI?

2. Ana Yehofa jwalosisye chamti uli uchimbichimbi wakwe pa Litumbi lya Sinai? (Alolesoni chiwulili cha pachikuto.)

² Baibulo jikusalosya kuti Yehofa ali Mlungu jwamkulungwa soni jwapenani mnope. Pali pagambile kumala masiku gakuŵalanjika Yehofa ali ŵakulupwisye Ayisalayeli mmyala mwa Aiguputo, jwalakwe jwalosisye jemanjajo kuti ali Mlungu jwamachili mnope. Aganichisye yayatendekwe pandaŵijo. Ayisalayeli ŵasongene mungulugulu mwa Litumbi lya Sinai kuti akapikanile yajwasakaga kwasalila Mlungu jwawo. Kaneko, liwunde lyepiliwu lyasiŵile litumbi lyosopelyo. Mwangajembecheya, kwatendekwe chifomelesi chamachili, mwamti kwatandite kulindima soni njasi. Nambosoni kwapikaniche kulila kwamachili kwa lipenga soni pasi patandite kutenganyika. (Eks. 19:​16-18; 24:17; Sal. 68:8) Kusala yisyene, Ayisalayeliwo ŵasimonjile mnope Yehofa pajwatesile yindu yakulosya uchimbichimbi wakweyi.

3. Ana ni yindu yapi yampaka tutende pakusaka kumchimbichisya Yehofa?

³ Nambi uli pakwamba ya m’weji ŵandu? Ana mpaka tukombole  kumchimbichisya Yehofa? Elo mpaka tukombole. Tukusamchimbichisya Yehofa mwakwasalila ŵane ya machili gakwe gakusimonjesya soni ya ndamo syakwe syapenani. Nambosoni tukusamchimbichisya Yehofa mwakumyamichila jwalakwejo pa yindu yatukombwele kutenda ligongo lyakutukamuchisya. (Yes. 26:12) Mwenye Daudi ali jumo mwa ŵandu ŵaŵapeleche chisyasyo chambone pangani ja kumchimbichisya Yehofa. Pandaŵi jine, Daudi ali mkupopela pameso pa Ayisalayeli jwamsalile Mlungu kuti, “Wawo Yehofa, ukulu, machili, kusalala, umbone soni kuchimbichika yili yawo, pakuŵa yiliyose yakwinani soni yapachilambo chapasi yili ya wawojo.” Daudi ali amalisisye kupopela, “ŵandu wosope ŵaŵasongenewo ŵamchimbichisye Yehofa.”—1 Mbi. 29:​11, 20.

4. Ana Yesu jwamchimbichisyaga chamti uli Yehofa?

⁴ Nombenajo Yesu pajwaliji pachilambopa, jwachimbichisyaga Atati ŵakwe mwakwasalila ŵandu kuti Yehofa ni juŵampaga machili gakutendela yakusimonjesya. (Maliko 5:​18-20) Yesu jwakamuchisyesoni ŵandu kumanyilila kuti Yehofa ali Mlungu jwakuchimbichika. Jwalakwe jwatesile yeleyi kupitila mu yindu yajwaŵechetaga yakwamba Yehofajo, soni yindu yambone yajwatendelaga ŵane. Mwa ŵandu ŵaŵampikanilagawo papalisoni jwamkongwe jwine juŵakamwilwe ni msimu wakusakala kwa yaka 18. Msimu wakusakalawo wamtendekasisye jwamkongwejo kupindimala mgongo mwamti nganakombolaga kwinamukuka. Yeleyitu yamtendekasisye kuti alajeje. Nambo ligongo lya chanasa, Yesu jwapite kwa jwamkongwejo. Kaneko mwachinonyelo jwamsalile kuti, “Mama, ulwele wenu umasile.” Kaneko jwalakwe ŵamsajiche makono jwamkongwejo. Mwamti ndaŵi jijojo jwajimi soni jwakombwele kwinamukuka “ni kutanda kumyamika [kumchimbichisya] Mlungu” ligongo lyakumposya. (Luk. 13:​10-13) Jwamkongweju jwakwete magongo gambone gakumtendekasya kuti amchimbichisye Yehofa, mpela mwayiŵelelesoni ni m’weji.

YAYIKUSATUTENDEKASYA KUTI TUMCHIMBICHISYEJE YEHOFA

5. Ana tukwete magongo gapi gakututendekasya kumchimbichisya Yehofa?

⁵ Tukusamchimbichisya Yehofa ligongo lyakuti tukusamwona kuŵa jwakusosekwa mnope. Tukwete magongo gejinji gakututendekasya kumchimbichisya jwalakwe. Yehofa ali jwamachili gosope, mwamti machili gakwe nganigakola malile. (Sal. 96:​4-7) Lunda lwakwe lwapenani lukusawonechela chenene mu yindu yajwapanganyisye. Jwalakwe ni juŵatupele umi soni yindu yosope yakutukamuchisya kuti tuŵe chijumi. (Chiw. 4:11) Jwalakwe ali jwakulupichika. (Chiw. 15:4) Mwamti yiliyose yakusatenda jwalakwe yikusakombolekaga soni ndaŵi syosope akusatenda yasasile. (Yos. 23:14) Ni ligongo lyakwe pakwamba ya Yehofa jwakulochesya Yelemiya jwatite, “Sikati ja ŵandu wosope ŵalunda nambosoni sikati ja ayimwene wosope ŵa pachilambo chapasi pano, pangali jwalijose jwampaka alandane ni ŵalakwe.” (Yel. 10:​6, 7) Kusala yisyene, tukwete magongo gejinji gakututendekasya kumchimbichisya Yehofa. Nambotu ngatukusagamba kumchimbichisya Yehofa mmalomwakwe tukusamnonyelasoni jwalakwejo.

6. Ligongo chichi tukusamnonyela Yehofa?

⁶ Tukusamchimbichisya Yehofa ligongo lyakuti tukusamnonyela mnope. Aganichisye ya ndamo syakwete Yehofa syasikusatutendekasya kuti tumnonyeleje mnope. Jwalakwe ali jwachanasa. (Sal. 103:13; Yes. 49:15) Yehofa akusatuganichisya, mwamti patukupikana kupweteka nombenajosoni yikusampweteka. (Sak. 2:8) Jwalakwe akusatukamuchisya kuti tuŵe najo paunasi wambone. (Sal. 25:14; Mase. 17:27) Konjechesya pelepa, Yehofa ali jwakulinandiya, mwamti “akusajinamila pasi ni kulola kwinani soni chilambo chapasi, akusamjimusya mundu jwakutuluka kutyochela ku luwundu.” (Sal. 113:​6, 7, NWT.)  Yindu yosopeyi yikusatutendekasya kusachilila mnope kumchimbichisya Mlungu jwetu jwamkulungwa.—Sal. 86:12.

7. Ana tukwete upile wapadela wakutenda chichi?

⁷ Tukusamchimbichisya Yehofa ligongo tukusasaka kuti ŵane ammanyilile. Ŵajinji ŵangamanyililaga yisyesyene yakwamba Yehofa. Yili myoyo ligongo lyakuti Satana ŵasiŵile mmeso jemanjaji mwakwasalila yaunami yakwamba Yehofajo. (2 Akoli. 4:4) Satana jwatendekasisye ŵandu kukulupilila kuti Yehofa ali jwaukali, jwangasamalaga ya jemanjajo soni kuti ni jwakusatendekasya kuti ŵandu asimaneje ni yakusawusya. Nambo m’weji tukumanyilila yisyesyene yakwamba Mlungu jwetu. Mwamti tukwete upile wakwakamuchisya ŵane kupikanichisya kuti Yehofa ali Mlungu jwambone mnope. (Yes. 43:10) Mwamti Salimo 96 jikusalondesya mnope ya kumchimbichisya Yehofa. Myoyo, pachitukambilaneje maloŵe gane ga mu salimoji, aganichisyeje yampaka atende pakumpa Yehofa uchimbichimbi wakusasosechela.

YAMPAKA TUTENDE KUTI TUMPEJE YEHOFA UCHIMBICHIMBI WAKUSASOSECHELA

8. Ana ni litala limo lyapi lyampaka tumchimbichisye Yehofa? (Salimo 96:​1-3)

⁸ Aŵalanje Salimo 96:​1-3. Mpaka tumchimbichisye Yehofa kupitila mu yindu yatukusaŵecheta yakwamba jwalakwejo. Kupitila mu ndime syelesi, ŵakutumichila ŵa Yehofa akwaŵenda kuti ‘amjimbileje Yehofa,’ “alichimbichisye lina lyakwe,” “alalichileje ngani syambone syakwamba chikulupusyo chakwe,” soni kuti ‘ajenesyeje yakwamba uchimbichimbi wakwe pasikati pa mitundu ja ŵandu.’ Yosopeyi yili yindu yampaka tutende pakumchimbichisya Yehofa kupitila mu yatukusaŵecheta. Ŵakutumichila ŵa Yehofa ŵakala ŵaliji ŵakusachilila kwasalila ŵane ndamo syambone syakwete Yehofa soni yindu yambone yajwatendele jemanjajo. (Dan. 3:​16-18; Mase. 4:29) Ana m’weji mpaka twasyasye chamti uli jemanjaji?

9-10. Ana alijiganyisye chichi pa yindu yajwasimene nayo Angelena? (Alolesoni chiwulili.)

⁹ Aganichisye yayamtendechele Mlongo Angelena, a jwakusatama ku United States. Jwalakwe jwalosisye kulimba mtima mwakulichenjela lina lya Yehofa pa kampani jaŵakamulaga masengo. Mlongoju ŵaŵilanjidwe pamsongano wawalinganyidwe ni kampaniji. Chakulinga cha msonganowu chaliji kumanyigana ni ŵandu ŵaŵagambile kutanda kwene masengo pa kampanijo. Myoyo, Mlongo Angelena jwalinganyisye kuti akalosye ŵanduwo yiwulili yayalosyaga yajwatiga pakusangalala ligongo lyakuŵa jwa Mboni sya Yehofa.  Nambo mkanijikwane ndaŵi jakuti aŵechete, jwamlume jwine jwatandite kulilondesya kuti jwakulile mu liŵasa lya Mboni sya Yehofa. Kaneko jwatandite kunyosya yatukusakulupilila. Mlongo Angelena jwasasile kuti, “Mtima wangu watandite kugunda mwamti wangamwile mnope woga. Nambo naliwusisye kuti, ‘Ana yisyene ngunde kuti mundu jwine asaleje yaunami yakwamba Yehofa? Kapena chinamŵichile kunyuma?’”

¹⁰ Jwamlume jula pajwamalisisye kulilondesya, Angelena jwapopesile cha mumtima. Kaneko mwachinonyelo jwamsalile jwamlumejo kuti, “Unesoni nakulile mu liŵasa lya Mboni sya Yehofa, mwamti mpaka apano ndili jwamboni.” Atamose kuti yaliji yakusawusya, nambope Angelena jwakombwele kutenda yindu mwakuwusimana mtima. Mwamti jwakombwele kuŵichila kunyuma yakusakulupilila soni jwalosisye ŵanduwo yiwulili yaŵajambwile pandaŵi jine ali pamsongano wapadela. (1 Pet. 3:15) Ana yakuyichisya yakwe yaliji yamti uli? Mlongoju pajwamalisyaga kulilondesya, jwamlume jula nganakola chakuŵecheta chilichose. Mwamti jwamlumejo jwayikene pakusala yindu yine yambone yayamtendechele ali mwanache pajwaliji jwa Mboni sya Yehofa. Mlongo Angelena jwatite, “Tukusasosekwa kulichenjela lina lya Yehofa. Mwamti kuŵecheta yakwamba lina lyakwe uli upile wekulungwa.” Mpela muyaŵelele ni mlongoju, m’wejisoni tukwete upile wakumchimbichisya Yehofa atamose ŵane pakumnyosya.

11. Ana ŵakutumichila ŵa Mlungu ŵasyesyene aŵele ali mkukuya chamti uli mfundo ja pa Salimo 96:8?

¹¹ Aŵalanje Salimo 96:8. Mpaka tumchimbichisye Yehofa ni yindu yetu. Ŵakutumichila ŵa Mlungu ŵasyesyene aŵele ali mkuchimbichisya jwalakwe ni yindu yawo. (Mis. 3:9) Mwachisyasyo, Ayisalayeli ŵapelekaga yindu yakamuchisya pakutaŵa soni kulinganya nyumba ja Mlungu. (2 Ayi. 12:​4, 5; 1 Mbi. 29:​3-9) Nombe ŵakulijiganya ŵa Yesu ŵapelekaga “yindu yawo” kuti yimkamuchisyeje jwalakwejo soni ŵandumetume ŵakwe. (Luk. 8:​1-3) Nombesoni Aklistu ŵa m’yaka 100 yandanda ŵapelekaga yindu yakwakamuchisya Aklistu achimjawo ŵaŵasimanaga ni yakusawusya. (Mase. 11:​27-29) Masiku agano, mpaka tumchimbichisye Yehofa mwakupeleka yindu yakamuchisya gulu ja Yehofa.

12. Ana yakupeleka yetu mpaka yimchimbichisye chamti uli Yehofa? (Alolesoni chiwulili.)

¹² Aganichisye yakutendekwa yine yayalosisye kuti yakupeleka yetu yikusiyatendekasya ŵandu kumchimbichisya Yehofa. Lipoti lya mu 2020 lyasasile yachatite chilala pakwakwaya ŵandu ŵajinji ku Zimbabwe. Ŵandu ŵajinji kupwatikapo Mlongo Prisca ŵasigele panandi kuwa ligongo lya kusoŵa kwa yakulya. Atamose  kuti kwapali salaji, mlongoju jwapitilisye kukuya ndandanda jakwe jakulalichila Lyatatu soni Lyamsano. Mwamti jwalakwe jwatendaga yeleyi atamose mundaŵi jakulima. Nambo ŵandu ŵakuŵandikana najo ŵamnyosyaga ligongo lyakwawula kukulalichila mmalo mwakwawula kumigunda. Mwamti ŵaŵechetaga kuti, “Chim’we ni sala mmwejo.” Nambo Mlongo Prisca ŵajangaga kuti, “Yehofa jwangaleka ŵakutumichila ŵakwe.” Mkanipapite ndaŵi, mlongoju jwapochele nawo yakulya yajapeleche gulu jetu. Yakulyayi yasimanikwe ligongo lyakuti wosopewe twapeleche mwakoloŵa magasa. Ŵandu ŵala ŵasimonjile mnope ni yeleyi, mwamti ŵamsalile Mlongo Prisca kuti, “Ligongo lyakuti Mlungu nganamleka mmwejo tukusaka kulijiganya yejinji yakwamba jwalakwejo.” Mwamti ŵane mwa jemanjaji ŵakwana 7 ŵatandite kusimanikwa pa misongano ja mpingo.

13. Ana tutendeje chichi kuti yitendo yetu yimchimbichisyeje Yehofa? (Salimo 96:9)

¹³ Aŵalanje Salimo 96:9. Tukusamchimbichisya Yehofa kupitila mu yitendo yetu. Jwakutaga mbopesi juŵatumichilaga m’nyumba ja Mlungu jwasosekwaga kuŵa jwamswela mwakuchilu. (Eks. 40:​30-32) Nambope, chindu chakusosekwa mnope kupunda kuŵa ŵaswela mwakuchilu chili kuŵa ŵaswela mundamo. (Sal. 24:​3, 4; 1 Pet. 1:​15, 16) Mwamti tukusasosekwa kulimbichila kuti tuwule “umundu wakala” yayili ndamo soni kaganisye kakusakala. Patutesile yeleyi tukusasosekwa kuwala “umundu wasambano,” yayili kaganisye soni katende ka yindu kakakusalosya ndamo syapenani syakwete Mlungu. (Akolo. 3:​9, 10) Mwamti ni chikamuchisyo cha Yehofa, atamose ŵandu ŵakwete ndamo syakusakala mnope soni ŵandu ŵakusatenda yachiwawa mpaka achenje ni kuwala umundu wasambano.

14. Ana tukulijiganya chichi pa yindu yayamtendechele Jack? (Alolesoni chiwulili.)

¹⁴ Aganichisye yayamtendechele Jack. Jwalakweju jwaliji jwachiwawa soni jwakogoya mnope. Mwamti ŵandu ŵagambaga kumkolanga kuti Chiwanda. Ligongo lya magambo gajwakwete, jwalakwe jwalamulidwe kuti awulajidwe. Nambope, pajwajembecheyaga lisiku lyakuwulajidwa, Jack jwatandite kulijiganya Baibulo ni m’bale jwine juŵapite kukulalichila kundendeko. Atamose kuti Jack jwakwete ndamo syakusakala, jwalakwe jwakombwele kuwula umundu wakala. Mwamti pali papitile ndaŵi jwabatisidwe. Jack jwachenjile mnope, mwamti palyayiche lisiku lyakuti awulajidwe, asilikali ŵane ŵakulondela ndende ŵagwisisye misosi paŵalanganganaga najo. Jwamkulungwa jwa asilikali jwa pandendepo jwaŵechete kuti, “Pandanda Jack jwaliji mundu  jwakusawusya mnope pandende pano. Nambo apano ali mundu jwambone.” Pali papitile wiki jimo Jack ali awulajidwe, abale ŵaŵapite kundendeko kukutendesya misongano, ŵasimene ni mkayidi jwine jwele kaliji kandanda kusimanikwa pa misonganojo. Ana chichi chachamtendekasisye kuti asimanikwepo? Chindu chachamkamuchisye jwalakweju chaliji kuyiwona yajwatite pakuchenga Jack. Mwamti nombenajo jwasakaga kumanyilila yampaka atende kuti amtumichileje Yehofa. Kusala yisyene, yitendo yetu mpaka yimchimbichisye Yehofa.—1 Pet. 2:12.

YACHATENDE YEHOFA KUSOGOLOKU PAKULICHIMBICHISYA LINA LYAKWE

15. Ana kusogoloku Yehofa chachilichimbichisya chamti uli lina lyakwe? (Salimo 96:​10-13)

¹⁵ Aŵalanje Salimo 96:​10-13. Ndime syakumalisya sya mu Salimo 96 sikusalondesya kuti Yehofa ali Jwakuwelusya soni Mwenye jwachilungamo. Ana kusogoloku Yehofa chachilichimbichisya chamti uli lina lyakwe? Chachitenda yeleyi mwakwawelusya ŵandu. Pachangakaŵapa, jwalakwe chamjonanje Babulo Jwamkulungwa jwakusatendekasya kuti ŵandu alinyosyeje lina lya Mlungu lyeswela. (Chiw. 17:​5, 16; 19:​1, 2) Komboleka ŵandu ŵane ŵachachilola konanjidwa kwa Babulo Jwamkulungwa chachitanda kumtumichila Yehofa. Kaneko pa ngondo ja Alamagedo, Yehofa chachijonanga chilambo cha Satanachi mwakwajonanga ŵandu wosope ŵakusamsisya jwalakwejo soni kusakasya lina lyakwe. Nambo Yehofa chachakulupusya wosope ŵakusamnonyela, kumpikanila, soni ŵakusamchimbichisya jwalakwejo mwakusangalala. (Maliko 8:38; 2 Ates. 1:​6-10) Mwamti ŵandu pachachilinjidwaga kakumalisya panyuma pa Yaka 1000 ya Ulamusi wa Yesu, Yehofa chachiŵa ali aliswejesye lina lyakwe. (Chiw. 20:​7-10) Pandaŵi jelejo, “chilambo chapasi tichichigumbala ni lumbili lwa AMBUJE mpela nyasa syegumbale mesi.”—Hab. 2:14.

16. Ana wawojo ali ŵakusimichisya kutenda chichi? (Alolesoni chiwulili.)

¹⁶ Kusala yisyene, yichiŵa yakusangalasya mnope kutama mundaŵi jele jwalijose chachimchimbichisyaga Yehofa mwakamulana ni lina lyakwe. Nambope, patukwembecheya ndaŵi jeleji, mpaka tutende yampaka tukombole pakamulichisya masengo upile uliwose mwakumchimbichisya Mlungu jwetu. Pakusaka kugombelechesya mfundo jakusosekwa mnopeji, Likuga Lyakulongolela lisagwile lilemba lya Salimo 96:8 kuŵa lilemba lya chaka cha 2025: “Mpeleche kwa Yehofa uchimbichimbi mwakamulana ni lina lyakwe.”