1. Ana kusimanikwa pa mwambo wa Chikumbuchilo cha chiwa cha Yesu kukusatukamuchisya chamti uli?

 KUSALA YISYENE, mtuka wekulungwa waŵatupele Yehofa uli mbopesi jakutuwombola. (2 Akoli. 9:15) Ligongo lyakuti Yesu ŵapeleche umi wakwe, yili yakomboleka kuti tuŵe paunasi ni Yehofa Mlungu. Mpaka tukolesoni chembecheyo chakutama ni umi wangamala. Kusala yisyene, tukwete magongo gejinji gakututendekasya kumyamichila Yehofa juŵapeleche mbopesi Mwanache jwakwe ligongo lyakutunonyela. (Alo. 5:8) Pakusaka kutukamuchisya kuti tuyamichileje mbopesi jakutuwombolaji, Yesu jwatamilikasisye mwambo wakumbuchila chiwa chakwe wawukusatendekwa chaka chilichose.—Luk. 22:​19, 20.

2. Ana chitukambilane chichi mungani ajino?

² Chaka achino, Chikumbuchilochi chichitendekwa Lyakuŵeluka pa 12 Epulo, 2025. Ngatukukayichila kuti jwalijose akutenda yakuti chasimanikwepo. Kuti chitupindule mnope pandaŵi ja Chikumbuchilochi, tuchisosekwa kupata ndaŵi jakuganichisya mwakusokoka a yindu yaŵatutendele Yehofa soni Yesu. Mwamti mungani ajino, chitukambilane yatukulijiganya pakwamba ya Yehofa soni Yesu kutyochela pa mbopesi jakutuwombola. Ngani jakuyichisya jichitukamuchisya kupikanichisya yampaka jijile mbopesi jakutuwombola pakutukamuchisya soni yampaka tutende pakulosya kuyamichila.

ANA MBOPESI JAKUTUWOMBOLA JIKUSATUJIGANYA YAMTI ULI PAKWAMBA YA YEHOFA?

3. Ana yakomboleche chamti uli kuti chiwa cha mundu jumo chawombole ŵandu mamiliyoni gejinji? (Alolesoni chiwulili.)

³ Mbopesi jakutuwombola jikusatujiganya kuti Yehofa ali jwachilungamo. (Det. 32:4) Tukuŵecheta yeleyi ligongo lyakuti ungapikanila  wa Adamu watendekasisye kuti wosopewe tuŵe ŵakulemwa yayikusatendekasya kuti tuweje. (Alo. 5:12) Myoyo, Yehofa jwalinganyisye yakuti Yesu apeleche mbopesi jakutuwombola pakusaka kutugopola ku ulemwa soni chiwa. Nambo ana mbopesi ja mundu jumo jwamlama jikawombwele chamti uli ŵandu mamiliyoni gejinji? Ndumetume Paulo jwatite, “Pakuŵa kupitila mu ungapikanila wa mundu jumo [Adamu] wosope ŵaŵele ŵakulemwa, myoyosoni kupitila mu kupikanila kwa mundu jumo [Yesu] ŵandu wosope chachiŵa ŵakulungama.” (Alo. 5:19; 1 Tim. 2:6) Kasale kane mpaka tujile kuti, kupitila mwa ungapikanila wa mundu jumo jwamlama wosopewe twaŵele achikapolo ŵa ulemwa soni chiwa. Myoyosoni, twagopweche ku ulemwa ni chiwa kupitila mwa mundu jumo jwamlama jwakupikanila.

4. Ligongo chichi Yehofa nganagamba kwakunda ŵanache ŵa Adamu ŵakupikanila kuti atameje ni umi mpaka kalakala?

⁴ Ana nikuti Yesu jwasosekwaga kuwa basi kuti atukulupusye? Ana Yehofa ngamkanakombola kwatendekasya ŵanache ŵa Adamu ŵakupikanila kuti atameje ni umi mpaka kalakala? Kwa ŵandu ŵangali umlamawe, mpaka tuyiwoneje kuti lyeleli likaliji litala lyambone mnope lyakumachisya nganiji. Nambo yikaŵe kuti Yehofa atesile yeleyi nikuti yikaliji yakutindana ni chilungamo chakwe. Ligongo lyakuti Yehofa ali jwakulungama, jwalakwe ngamkanakunda kuti agambe kusechelela ulemwa wekulungwa wajwatesile Adamu.

5. Ana chichi chachikusatusimichisya kuti ndaŵi syosope Yehofa chachitenda yindu mwachilungamo?

⁵ Ana yikaliji wuli yikaŵe kuti Yehofa nganapeleka mbopesi jakutuwombola, mmalomwakwe ni gamba kwakunda ŵanache ŵa Adamu ŵangali umlama kuti atameje ni umi mpaka kalakala ngakuya chilungamo chakwe? Yikaŵe kuti Mlungu atesile yeleyi nikuti ŵandu akayiwonaga kuti jwalakwe ngasatendasoni yindu mwachilungamo pandaŵi jine. Mwachisyasyo, ŵandu akatandite kukayichila yindu yaŵasasile Yehofa kuti chachiyitenda. Nambo ngatukusosekwa kudandawula kuti yeleyi mpaka yitendekwe. Tukuŵecheta yeleyi ligongo lyakuti Yehofa jwatesile yindu yayalosisye kuti ali jwachilungamo, atamose kuti kutenda yeleyo kwasosekwaga kumpeleka mbopesi mwanache jwakwe. Mwamti welewu uli umboni wakutusimichisya kuti Yehofa chachitenda yindu mwachilungamo ndaŵi syosope.

6. Ana mbopesi jakutuwombola jikusalosya chamti uli chinonyelo chakwete Yehofa? (1 Yohane 4:​9, 10)

⁶ Yisyene kuti mbopesi jakutuwombola jikusatukamuchisya kumanyilila kuti Yehofa ali jwachilungamo. Nambope, mbopesiji jikusatukamuchisyasoni kumanyilila ya chinonyelo chekulungwa chakwete Yehofa. (Yoh 3:16; aŵalanje 1 Yohane 4:​9, 10.) Yehofa jwamtumisye mwanache jwakwe kuti awe mmalo mwa m’weji, ligongo jwasakaga kuti tutameje ni umi mpaka kalakala soni kuti tuŵe mu liŵasa lyakwe. Aganichisye ayi. Adamu ali alemwisye, jwalakwe ngaŵasoni m’liŵasa lya ŵakutumichila  ŵa Yehofa. Yeleyi yatendekasisye kuti wosopewe tupagwile kusa kwa liŵasa lya Mlungu. Nambo kupitila mu mbopesi jakutuwombola, Yehofa ŵatukululuchile yakulemwa yetu. Konjechesya pelepa, mbopesiji jikusakamuchisyasoni kuti lisiku line chiyiŵe yakomboleka kwa ŵandu wosope ŵakusamkulupilila soni kumpikanila jwalakwe kuŵa mu liŵasa lyakwe. Atamose apano, mbopesiji jikusatendekasya kuti yiŵe yakomboleka kuŵa paunasi wambone ni Yehofa soni ŵakutumichila achimjetu. Yeleyi yikusatusimichisya kuti Yehofa akusatunonyela mnope.—Alo. 5:​10, 11.

7. Ana yaŵatite Yesu pakulaga yikusatukamuchisya chamti uli kumanyilila kuti Yehofa akusatunonyela mnope?

⁷ Mpaka tupikanichisye yakusati pakutunonyela Yehofa patukuganichisya mwayampwetechele jwalakwe pajwamwonaga mwanache jwakwe ali mkulaga. Satana jwasasile kuti pangali jwakutumichila jwa Mlungu jwampaka aŵepe jwakulupichika pasimene ni yakusawusya. Pakusaka kulosya kuti yajwasalaga Satanayi yaliji yaunami, Mlungu jwakundile kuti Yesu alaje kaje mkanawe. (Yob 2:​1-5; 1 Pet. 2:21) Yehofa jwawonaga ŵandu ŵakusisya ali mkunyosya Yesu, asilikali ali mkumputa, soni kaneko ali mkumkomela pachitela chakulagasichila. Mwamti Yehofa jwamwonaga mwanache jwakwe jwakunonyelwa ali mkuwa chiwa chakupweteka mnope. (Mat. 27:​28-31, 39). Nambotu Yehofa jwakwete machili gakutendekasya kuti Yesu akasimana ni yosopeyi. Mwachisyasyo, ŵandu paŵaŵechetaga kuti “sambano Mlungujotu amkulupusye naga akumsaka,” Yehofa akomboleche kutenda yeleyo. (Mat. 27:​42, 43) Nambo yikaŵe kuti Yehofa jwatesile yeleyi, nikuti pakaliji pali pangali mbopesi jakutuwombola. Mwamti ngamkanitukola chembecheyo chilichose. Myoyo, Yehofa jwakundile kuti Yesu apilile yakupweteka yosope mpaka pajwawile.

8. Ana Yehofa yampweteche pajwamwonaga Mwanache jwakwe ali mkulagasika? Alondesye. (Alolesoni chiwulili.)

⁸ Tukaganisyaga kuti pakuŵa Mlungu ali jwamachiligosope, nikuti jwangapikanaga kupweteka. Yehofa ŵatupanganyisye m’chiwanichisyo chakwe. Mwamti ligongo lyakuti m’weji tukusapikana kupweteka, yili yakupikanikasoni kusala kuti nombenajo akusapikana kupweteka. Baibulo jikusamlondesya Yehofa kuti ‘akusadandawula’ soni kutenda ‘chanasa.’ (Sal. 78:​40, 41) Aganichisyesoni yaŵasimene nayo Abulahamu soni Isaki. Mwine akukumbuchila kuti pandaŵi jine Mlungu ŵamŵendile Abulahamu kuti ampeleche mbopesi mwanache jumopejo jujwakwete. (Gen. 22:​9-12; Aheb. 11:​17-19) Ngatukukayichila kuti Abulahamu yampweteche mnope pajwalinganyaga yakumwulaga Isaki ni chipula. Naga Abulahamu yampweteche myoyo, ana akuganisya kuti Yehofa yampweteche chamti uli pajwawonaga ŵandu ali mkumlagasya soni kumwulaga Mwanache jwakwe?—Ajawule pa jw.org kuti alolele fidiyo jakuti Asyasyeje Chikulupi Chawo—Abulahamu, Mbali 2.

9. Ana lilemba lya Aloma 8:​32, 38, 39 lyakamuchisye chamti uli kupikanichisya yakusati Yehofa pakwanonyela wawojo soni Aklistu achimjawo?

⁹ Mbopesi jakutuwombola jikusatukamuchisya kumanyilila kuti Yehofa akusatunonyela mnope  kupunda yampaka ajile pakutunonyela achimjetu kapena ŵachinasi ŵetu. (Aŵalanje Aloma 8:​32, 38, 39.) Ngatukukayichilasoni kuti Yehofa akusatunonyela kupunda yatukusati pakulinonyela achimsyewe. Ana wawojo akusasaka kutama ni umi wangamala? Naga yili myoyo, amanyilile kuti Yehofa ni jwakusasachilila mnope yeleyi. Ana akusasaka ali ŵakululuchile yakulemwa yawo? Yehofa ni jwakusasachilila mnope kwakululuchila. Jwalakwe akusagamba kusaka kuti tuyamichileje mbopesi jakutuwombola soni tumkulupilileje. Kusala yisyene, mbopesi jakutuwombola jikusatusimichisya kuti Mlungu akusatunonyela. Mwamti patuchijinjila m’chilambo chasambano, tuchilijiganya yejinji pakwamba ya chinonyelo chakwete Yehofa.—Jwak. 3:11.

ANA MBOPESI JAKUTUWOMBOLA JIKUSATUJIGANYA YAMTI ULI PAKWAMBA YA YESU?

10. (a) Ana chichi chachamtendekasisye Yesu kola chanasa chekulungwa pangani ja kuwulajidwa kwakwe? (b) Ana Yesu jwaswejesye lina lya Yehofa m’litala lyapi? (Alolesoni libokosi lyakuti “ Kulupichika kwa Yesu Kwakamuchisye Kuswejesya Lina lya Yehofa.”)

¹⁰ Yesu ŵajiwonaga ngani jakuswejesya lina lya Atati ŵakwe kuŵa jakusosekwa mnope. (Yoh. 14:31) Yesu jwakwete chanasa chekulungwa ligongo jwamanyililaga kuti chiwa chakwe chichatendekasya ŵandu kola nganisyo syakulemwecheka pakwamba ya Atati ŵakwe. Yaliji myoyo ligongo jwajembecheyaga kuwulajidwa mpela chigaŵenga soni mundu jwakumnyosya Mlungu. Ni ligongo lyakwe Yesu jwapopesile kuti, “Atati, naga yili yakomboleka, akunde kuti chikapuchi chimbelenganye.” (Mat. 26:39) Ligongo lyakuti Yesu jwaŵelepe jwakulupichika kwa Yehofa mpaka pajwawile, yakamuchisye kuti aliswejesye lina lya Atati ŵakwe.

11. Ana Yesu jwalosisye chamti uli kuti jwanonyelaga mnope ŵandu? (Yohane 13:1)

¹¹ Yesu jwalosisye kuti akusiŵaganichisya ŵandu, mnopemnope ŵakulijiganya ŵakwe. Yeleyi yawonechele kupitila mu mbopesi jakutuwombola. (Mis. 8:31; aŵalanje Yohane 13:1.) Mwachisyasyo, Yesu jwamanyililaga kuti pachachitendaga  utumiki wakwe pachilambopa, chachisimana ni yakusawusya yine kupwatikapo chiwa chakupweteka mnope. Nambotu, jwalakwe jwakundile kusimana ni yakusawusya yosopeyi ngaŵaga pakwamba kusaka kumsangalasya Mlungu, nambo ligongo lyakwanonyela ŵandu. Yesu jwalipeleche mnope pamasengo gakulalichila, kwajiganya ŵandu, soni kwatumichila ŵane. Atamose palisiku lyajwawulajidwe, Yesu jwajojesye sajo sya ŵandumetume ŵakwe, soni jwasalile yindu yejinji yakwakamuchisya nambosoni jwalimbikasisye. (Yoh. 13:​12-15) Kaneko ali akolechedwe pachitela, Yesu jwaŵechete maloŵe gagapeleche chembecheyo kwa chigaŵenga chine chachasigele panandi kuwa. Nambosoni jwaŵendile ŵane kuti ŵasamalileje mamagwe. (Luk. 23:​42, 43; Yoh. 19:​26, 27) Kusala yisyene, yakuti Yesu akusiŵanonyela ŵandu nganiyigamba kuwonechela kupitila mu chiwa chakwe basi, nambo yawonechelesoni mu yindu yosope yaŵatendelaga ŵandu.

12. Ligongo chichi yili yakupikanika kusala kuti Yesu akupitilisyape kututumichila?

¹² Yili yisyene kuti Klistu “ŵawile kampepe . . . mwamti ngasawasoni,” nambope jwalakwe akutendape yejinji pakusaka kutukamuchisya. (Alo. 6:10) Ana akutenda chamti uli yeleyi? Jwalakwe akupitilisya kutupa yindu yejinji yayikusakomboleka ligongo lya mbopesi jakutuwombola. Aganichisye yindu yakutenda apano Yesu. Jwalakwe akutumichila mpela Mwenye jwetu, Jwamkulungwa jwa Ŵakutaga Mbopesi, soni jwakulongolela mpingo. (1 Akoli. 15:25; Aef. 5:23; Aheb. 2:17) Yesu akulongolela masengo gakwasonganganya ŵasagulwe soni ŵandu ŵali mu gulu jekulungwa. Mwamti masengo gelega gachiyika kumbesi mkaniyimale yakusawusya yekulungwa. b (Mat. 25:32; Maliko 13:27) Konjechesya pelepa, Yesu akusalolechesyasoni kuti ŵakutumichila ŵakwe ŵakulupichika ŵakutama mmasiku gakumalisyaga akupochela yindu yakwakamuchisya kuŵa paunasi wambone ni Yehofa. (Mat. 24:45) Nambosoni pandaŵi josope ja Ulamusi Wakwe wa Yaka 1000, jwalakwe chachipitilisya kututumichila. Yeleyitu, yikwamba kulosya kuti Yehofa ŵampeleche Mwanache jwakweju kuti atutumichile m’weji.

AKALEKA KULIJIGANYA YINDU YASAMBANO

13. Ana mpaka atende wuli kuti akaleka kulijiganya yakwamba chinonyelo chaŵatulosisye Mlungu soni Klistu?

¹³ Mpaka apitilisye kulijiganya yejinji pakwamba ya chinonyelo chiŵatulosisye Yehofa soni Klistu Yesu, pakupitilisya kuganichisya ya chinonyelochi. Mwine pandaŵi ja Chikumbuchilo cha chaka achino, mpaka alinganye yakuŵalanga mwakusamala mabuku ga Ngani Syambone, chinga jimpepe kapena kupunda pelepo. Pandaŵiji, mpaka yiŵe chenene kuŵambala kuŵalanga yindu yejinji pandaŵi jimo. Mmalomwakwe, chaŵalanjeje panandipanandi  kwineku ali mkuganichisya magongo gakututendekasya kuti tumnonyeleje Yehofa soni Yesu. Konjechesya pelepa, akusosekwasoni kwasalila ŵane yalijiganyisyeyo.

14. Mwakamulana ni Salimo 119:​97, ana kuwungunya mpaka kutukamuchisye chamti uli kupitilisya kulijiganya yakwamba mbopesi jakutuwombola soni yindu yine? (Alolesoni chiwulili.)

¹⁴ Kwa ŵandu ŵaŵatandite kala kumtumichila Yehofa, mwine mpaka aganisyeje kuti nganaŵa apatile mfundo syasambano pakulijiganya ngani syakumanyika mpela syakwamba chilungamo cha Mlungu, chinonyelo chakwe, soni mbopesi jakutuwombola. Yisyesyene yakwe panganiji yili yakuti, nganituŵa tulijiganyisye ngani syelesi kapena sine mpaka kwika pambesi. Sambano, ana akusosekwa kutenda chichi? Ndaŵi syosope aŵalanjeje Baibulo soni ngani syasikusasimanikwa m’mabuku getu. Naga akulepela kupikanichisya ngani jaŵalasile, mpaka atende chenene kuwungunya. Patesile yeleyi, mkati mwa lisikulyo mpaka aganichisyeje yapatileyo, soni yalijiganyisye pakwamba ya Yehofa, Mwanache jwakwe soni yakusati jemanjaji pakwanonyela wawojo.—Aŵalanje Salimo 119:97.

15. Ligongo chichi tukusosekwa kupitilisya kuwungunya mfundo sya m’Baibulo?

¹⁵ Akatengukaga naga ndaŵi jilijose jakuŵalanga kapena kuwungunya ngakupata mfundo syasambano kapena yindu yakusangalasya yakuti ayipikanichisye. Wawojo aliwoneje mpela mundu jwakusaka kupata maganga gapenani. Munduju akusasosekwa kutenda yindu mwakuwusimana mtima, soni akusamalila ndaŵi jejinji kuti apate kaganga kamwana. Nambope, munduju jwangapela ligongo kaganga kalikose kapatile kakusaŵa kakusosekwa mnope kwa jwalakwejo. Ni aganichisye ayi, ana mfundo jilijose ja m’Baibulo jampaka apate jikusaŵa jakusosekwa chamti uli? (Sal. 119:127; Mis. 8:10) Myoyo, atendeje yindu mwakuwusimana mtima, soni akuyeje ndandanda jawo jakuŵalanjila Baibulo.—Sal. 1:2.

16. Ana mpaka tumsyasye chamti uli Yehofa soni Yesu?

¹⁶ Palijiganyisye yineyakwe, apateje matala gakuyikamulichisya masengo. Mwachisyasyo, mpaka asyasye chilungamo chakusalosya Yehofa mwakuŵambala kutenda lusagu. Mpaka asyasye chinonyelo chakusalosya Yesu pa Atati ŵakwe soni pa ŵandu, mwakukunda kusimana ni yakusawusya ligongo lya lina lya Yehofa. Nambosoni mwakulipeleka mnope pakusaka kwakamuchisya Aklistu achimjetu. Mpaka tumsyasye Yesu, mwakwalalichila ŵane kuti nombenawo akole upile wakupindula ni mbopesi jakutuwombola.

17. Ana tuchikambilana chichi mungani jakuyichisya?

¹⁷ Patukupikanichisya mnope soni kuyamichila mbopesi jakutuwombola, ni patukusatandasoni kumnonyela mnope Yehofa ni Mwanache jwakwe. Patukutenda yeleyi, nombe jemanjaji chachitunonyela mnope. (Yoh. 14:21; Yak. 4:8) Myoyo, kwende tukaleka kukamulichisya masengo yiliyose yatupele Yehofa yakutukamuchisya kulijiganya yakwamba mbopesi jakutuwombola. Mungani jakuyichisya tuchikambilana maumbone gane gatukusapata ligongo lya mbopesi jakutuwombola, soni yampaka tutende pakulosya kuyamichila.