NGANI JAKULIJIGANYA 3
NYIMBO NA. 35 “Msaguleje Kutenda Yayili Yambone Mnope”
Asaguleje Yindu Yampaka Yimsangalasye Yehofa
“Ndandililo ja lunda ni kwajogopa AMBUJE, soni naga ukum’manyilila Jwamswela jula nikuti ukwete umanyilisi.”—MIS. 9:10.
CHAKULINGA CHA NGANIJI
Chitulijiganye yampaka tutende kuti tukamulichisyeje masengo lunda lwetu, kupikanichisya yindu, soni kuganisya chenene pakusagula yindu mwalunda.
1. Ana ni chindu chapi chakusawusya chatukusasosekwa kutenda wosopewe?
LISIKU LILILYOSE tukusasosekwa kusagula yakutenda. Yindu yine yikusaŵa yangasawusya kusagula, mpela kusagula yachitulye kundaŵi, kapena ndaŵi jatukusaka kugona. Nambope pana yindu yine yakusawusya kusagula. Yindu yeleyi mpaka yitendekasye kuti tukole chilu chambone kapena iyayi, soni kuti tusangalaleje kapena iyayi. Nambosoni mpaka yakwaye ŵandu ŵa mwiŵasa mwetu, soni unasi ŵetu ni Yehofa. Mwamti ndaŵi syosope tukusasaka kuti yakusagula yetu yitukamuchisye m’weji soni ŵandu ŵa mwiŵasa mwetu. Nambo chakupunda pa yosopeyi, tukusasaka kuti yakusagula yetu yimsangalasyeje Yehofa.—Alo. 12:1, 2.
2. Ana ni yindu yapi yampaka yakamuchisye wawojo kusagula yindu mwalunda?
2 Mpaka asagule yindu mwalunda naga (1) akuyipikanichisya chenene yakusagulayo, (2) akuganichisya mwakusayiwonela Yehofa yinduyo, soni (3) naga akuyilinga yakusaka kusagulayo. Munganiji chitukambilane yindu yeleyi, soni chijitukamuchisye kumanyilila yampaka tutende kuti tukamulichisyeje masengo machili getu gakuganisya.—Mis. 2:11.
AYIPIKANICHISYEJE CHENENE YAKUSAKA KUSAGULAYO
3. Asale chisyasyo chakulosya ligongo lyakwe akusosekwa kuyipikanichisya kaje chenene yindu yakusaka kusagula.
3 Chindu chandanda kuti asagule yindu mwalunda chili kuyipikanichisya chenene yakusaka kusagulayo. Ligongo chichi kutenda yeleyi kuli kwakusosekwa mnope? Kwende tuwanichisye kuti mundu jwakulwala ulwele wekulungwa apite kukuwonegana ni dokotala. Ana dokotalajo mpaka agambe kuyichila kumpa jwakulwalajo mtela mkanaŵe kumlinga soni kumwusya yiwusyo? Nganaŵa atesile yeleyi. Myoyo, nombe wawojo mpaka asagule yindu mwalunda naga chandanda akuyipikanichisya chenene yakusaka kusagulayo. Ana mpaka atende chamti uli yeleyi?
4. Mwakamulana ni Misyungu 18:13, ana mpaka atende wuli kuti ayipikanichisye chenene yakusaka kusagula? (Alolesoni chiwulili.)
4 Mpaka ayipikanichisye chenene yakusaka kusagulayo mwakuliwusya yiwusyo. Tuwanichisye kuti aŵilanjidwe ku chisangalalo chinechakwe. Ana chachijawulako? Naga ngakummanyilila chenene juŵaŵilasilejo, kapena yachiyikatendekwe kweleko, mpaka asosekwe kumwusya mundujo kuti, “Ana yakutendekwayi chiyikatendechele kwapi soni pandaŵi japi? Ana kuchiŵa ŵandu ŵalingwa? Ana ŵani ŵachachilongolela yakutendekwayo? Ana kuchiyika ŵandu ŵapi? Ana kuchitendekwa yamti uli? Ana kuchiŵa ukana?” Kwanga kwa yiwusyo yeleyi mpaka kwakamuchisye kusagula yindu mwalunda.—Aŵalanje Misyungu 18:13.
Aliwusyeje yiwusyo kuti ayipikanichisye chenene yakusaka kusagulayo (Alole ndime 4) a
5. Ana akusosekwa kutenda chichi panyuma pakuyipikanichisya chenene yakusaka kusagula?
5 Panyuma pakuyipikanichisya chenene yinduyo, mpaka asosekwesoni kuganichisya mwakusamala ngani josopejo. Mwachisyasyo, ana mpaka atende wuli naga amanyilile kuti kuchisangalaloko chikukaŵe ŵandu ŵane ŵangakusakuya mfundo sya m’Baibulo, kapena ŵandu chakamweje ukana mwakusachila? Ana akuyiwona kuti yakutendekwa ya pachisangalalocho chiyikayiche pakusakala? (1 Pet. 4:3) Nambi uli naga ndaŵi jakutendela chisangalalocho jikugombana ni ndaŵi ja misongano kapena jakwinjila mu utumiki? Naga amanyilile ya chakutendekwa chosopecho, yichakamuchisya kuti asagule yindu mwalunda. Nambo panasoni chindu chine chakusosekwa kutenda. Pakuŵapo wawojo ayipikanichisye yachiyikatendekwe kumaloko, myoyo mpaka asosekwe kuliwusya kuti, ‘Ana Yehofa akuyiwona chamti uli yakutendekwayo?’—Mis. 2:6.
AGANICHISYEJE MWAKUSAYIWONELA YEHOFA YINDUYO
6. Mwakamulana ni Yakobo 1:5, ligongo chichi tukusasosekwa kumŵenda Yehofa kuti atukamuchisye?
6 Amŵendeje Yehofa kuti ŵakamuchisye kumanyilila nganisyo syakwe. Yehofa jwasasile kuti chachitupa lunda lwakutukamuchisya kumanyilila naga yindu yatukusaka kusagula mpaka yimsangalasye jwalakwe. Mwamti akusatenda yeleyi “mwakoloŵa makono kwa wosope, soni akusapeleka kwa mundu mwangamnyosya.”—Aŵalanje Yakobo 1:5.
7. Ana mpaka amanyilile chamti uli nganisyo sya Yehofa? Asale chisyasyo.
7 Pamŵendile Yehofa kuti ŵakamuchisye, alolechesyeje yachajile jwalakwejo pakwajanga. Kuti tupikanichisye yeleyi, tuwanichisye myi. Naga asokonechele pali paulendo, mpaka amwusye mundu jwa kumaloko kuti ŵakamuchisye. Nambo ana mpaka anyakuche ni kuwutanda ulendo jwalakwejo mkanaŵe kwasalila kwakwinjilila? Nganaŵa atesile yeleyi. Mpaka apikanile kaje mwakusamala yakwasalila mundujo. Mwakulandana ni yeleyi, pamŵendile Yehofa kuti ŵape lunda, alinjeje kulola yatite pakwajanga mwakuwungunya malamusi soni mfundo sya m’Baibulo syasikukamulana ni nganijo. Mwachisyasyo, ana mpaka atende wuli pakuganichisya naga chakasimanikwe ku chisangalalo chatuchikolasile chila? Mpaka aganichisye yajikusasala Baibulo pakwamba ya yisangalalo yachikusa, kunguluka ni ŵandu ŵakusakala, soni kusosekwa kwakuŵika yindu ya Uchimwene pamalo gandanda mmalo mwakulongosya yakusaka yawo.—Mat. 6:33; Alo. 13:13; 1 Akoli. 15:33.
8. Ana akusosekwa kutenda chichi kuti apate mfundo syakamuchisya? (Alolesoni chiwulili.)
8 Nambope, ndaŵi sine mpaka asosekwe kwaŵenda ŵane kuti ŵakamuchisye kupata malangiso gakusosechela. Komboleka mpaka aŵende malangisoga kwa m’bale kapena mlongo jwakusamanyilila yejinji. Nambope, chindu chine champaka chakamuchisye chili kuwungunya pajika jawo. Mpaka apate mfundo syejinji pakamulichisya masengo yindu yakuwungunyila mpela Kabuku Kakamuchisya Kuwungunya Ngani ka Mboni sya Yehofa soni Malemba Gakamuchisya Paumi wa Chiklistu. Pakutenda yeleyi, akumbuchileje kuti chakulinga chawo chili kusagula yakutenda yampaka yimsangalasye Yehofa.
Aganichisyeje mwakusayiwonela Yehofa yinduyo (Alole ndime 8) b
9. Ana mpaka tusimichisye chamti uli kuti yindu yatukusaka kusagula chiyimsangalasye Yehofa? (Aefeso 5:17)
9 Ana mpaka tusimichisye chamti uli kuti yindu yatukusaka kusagula chiyimsangalasye Yehofa? Chandanda, tukusasosekwa kummanyilila kaje chenene jwalakwejo. Baibulo jikusati, naga ‘ukummanyilila Jwamswelajo nikuti ukwete umanyilisi.’ (Mis. 9:10) Kusala yisyene, umanyilisi usyesyene ukusayika patukumanyilila ndamo syakwete Yehofa, chakulinga chakwe, soni yindu yakusayinonyela kapena yakusayiŵenga. Myoyo, mpaka aliwusye kuti, ‘Pakuŵa ngusammanyilila chenene Yehofa, ana ni yindu yapi yangusosekwa kusagula yampaka yimsangalasye jwalakwe?’—Aŵalanje Aefeso 5:17.
10. Ligongo chichi mfundo sya m’Baibulo sili syakusosekwa mnope kupunda kwasangalasya ŵandu ŵa mwiŵasa mwetu kapena ŵa mudela jatukusatamaga?
10 Ndaŵi sine tukusasosekwa kutenda yindu yampaka yasakalisye ŵachibale ŵetu pakusaka kumsangalasya Yehofa. Mwachisyasyo, achinangolo ŵane mpaka amkanye mwanache jwawo kulombedwa ni mundu jwakulaga. Kapena mpaka amkunde kuti alombedwe ni mundu jwele mpaka ŵape malowolo gejinji atamose ali mkumanyilila kuti jwamlumejo jwangayikosyaga mnope yakuŵa paunasi wambone ni Yehofa. Yisyene kuti achinangolo akusasaka kuti mwanache jwawo jwamkongwe asamalidweje mwakuchilu. Nambo ana ni ŵani ŵachachimkamuchisyaga kuti ajawule pasogolo mwausimu? Ana Yehofa akusajiwona wuli nganiji? Kwanga kwa chiwusyochi kukusimanikwa pa Mateyu 6:33. Palilembali, Aklistu akwalimbikasya kuti apitilisye “kusosasosa chandanda Uchimwene” wa Mlungu. Atamose kuti tukusachimbichisyaga achinangolo ŵetu soni ŵandu ŵa mudela jetu, nambo chakusosekwa mnope chikusaŵa kutenda yindu yakumsangalasya Yehofa.
AYILINJEJE YAKUSAKA KUSAGULAYO
11. Ana pa Afilipi 1:9, 10 pana ndamo japi jampaka jakamuchisye kuyilinga yakusaka kusagula?
11 Panyuma pakuganichisya mfundo sya m’Baibulo syakamulana ni yindu yakusaka kusagulayo, akusosekwa kuyilinga yinduyo. (Aŵalanje Afilipi 1:9, 10.) Kupikanichisya yindu kuchakamuchisya kuganichisya yakuyichisya yayichipagwa pa yindu yakusaka kusagulayo. Yindu yine mpaka yiŵe yangasawusya kusagula nambo yine mpaka yiŵe yakusawusya. Myoyo, kupikanichisya yindu kuchakamuchisya kuti asagule chenene atamose pa yakutendekwa yakusawusya.
12-13. Ana kupikanichisya yindu mpaka kwakamuchisye chamti uli kusagula yindu mwalunda papatile masengo?
12 Tuŵanichisye kuti wawojo akusosasosa masengo kuti akomboleje kulisamalila liŵasa lyawo. Mwaupile pakupatikana mitundu jiŵili jamasengo. Kaneko akuganichisya yindu yakwayana ni masengogo, mpela mtundu wakwe, ndaŵi jachamalileje ali kumasengoko, ndaŵi jakwawulila kumasengoko, soni yindu yine. Mwamti akuyiwona kuti masengogo nganigaŵa gakutindana ni mfundo sya m’Baibulo. Kaneko akusagula mtundu umo wamasengo ligongo lyakuti gasangalesye kapena malipilo gakwe gali gakwela. Nambope, pana yindu yinesoni yampaka asosekwe kuyiganichisya mkanatande masengogo.
13 Mwachisyasyo, ana ndaŵi jakamulila masengogo chijigombaneje ni ndaŵi jakutendela misongano ja mpingo? Ana masengogo chigatendekasyeje kuti akapataga ndaŵi jakunguluka ni liŵasa lyawo kapena jakutendela kulambila kwa peŵasa? Kuliwusya yiwusyo yeleyi, mpaka kwakamuchisye kuti aŵiche pandanda yindu “yayili yakusosekwa mnope.” Yindu yakwe yili kumtumichila Mlungu soni kulikamuchisya liŵasa lyawo mwausimu. Naga akutenda yeleyi, mpaka akombole kusagula yindu yampaka yimtendekasye Yehofa kwapa upile.
14. Ana kupikanichisya yindu soni chinonyelo mpaka yitukamuchisye chamti uli kuŵambala kutenda yindu yakwakuŵasya ŵane?
14 Kupikanichisya yindu kuchitukamuchisyasoni kuganichisya yampaka yijile pakwakwaya ŵane yakusagula yetu. Kutenda yeleyi mpaka kukamuchisye kuti tuŵambale ‘kwakuŵasya ŵane.’ (Afil. 1:10) Yeleyi yili yakusosekwa mnopemnope patukusagula yindu yine mpela kawale soni kalisalalisye. Mwachisyayo, komboleka mpaka tunonyele kawale soni kalisalalisye kanekakwe. Nambi uli naga yeleyo mpaka yakuŵasye Aklistu achimjetu kapena ŵandu ŵa mudela jetu? Kupikanichisya yindu kuchitukamuchisya kuti tuchimbichisye nganisyo syawo. Mwamti chinonyelo chichitutendekasya kuti tuganichisyeje yakusaka ya ‘achimjetu’ soni kuŵa ŵakulinandiya. (1 Akoli. 10:23, 24, 32; 1 Tim. 2:9, 10) Kutenda yeleyi kuchitukamuchisya kuti tusagule yindu yampaka yilosye kuti tukusitwanonyela soni kwachimbichisya ŵane.
15. Ana akusosekwa kutenda chichi mkanaŵe kusagula yindu yekulungwa?
15 Naga akusaka kusagula kutenda yindu yekulungwa, aganichisyejesoni yampaka asosekwe kutenda kuti ayikwanilisye. Yesu jwatusalile kuti ‘tuŵalanjileje chenene’ mkanitutende chindu. (Luk. 14:28) Myoyo, akusosekwa kuganichisya ya ndaŵi, yindu, soni machili gachachisosekwa kuti akombole kukwanilisya yasagwileyo. Ndaŵi sine, mpaka asosekwesoni kwasalila ŵandu wosope ŵa mwiŵasa mwawo, kuti jwalijose alole yampaka atende pakukamuchisya kuti yasagwileyo yikomboleche. Ligongo chichi kutenda yeleyi kuli kwakamuchisya? Yeleyi mpaka yakamuchisye kumanyilila naga akusosekwa kuchenga yindu yine, kapena kusagula yindu yine yampaka akombole kuyikwanilisya. Mwamti naga akukambilana ni ŵandu ŵa mwiŵasa mwawo soni kupikanila nganisyo syawo, jemanjajo chachiŵa ŵakoseka kwakamuchisya kuti akwanilisye yasagwileyo.—Mis. 15:22.
ASAGULEJE YINDU YAMPAKA AYIKWANILISYE
16. Ana chichi champaka chakamuchisye kuti ayikwanilisye yakusaka kusagula? (Alolesoni libokosi lyakuti “ Yampaka Atende Kuti Asagule Yindu Mwalunda.”)
16 Naga atesile yindu yosope yatukambilene munganiji, nikuti mpaka akombole kusagula yindu mwalunda. Akusosekwa kuyipikanichisya chenene yakusaka kusagulayo, soni kupata mfundo sya m’Baibulo syakwakamuchisya kuti asagule yakumsangalasya Yehofa. Patesile yeleyi mpaka amŵende Yehofa kuti ŵakamuchisye kukwanilisya yasagwileyo.
17. Ana chindu chakusosekwa mnope kuti tusaguleje yindu mwalunda chili chichi?
17 Chinga munyumamu yindu yasagwileje yiŵele yili mkwajendela chenene, akusosekwa kukumbuchila kuti chindu chakusosekwa mnope kuti asaguleje mwalunda chili kuŵambala kulidalila. Mmalomwakwe adalileje lunda lwa Yehofa. Jwalakwe jikape ni jwampaka ŵape lunda lusyesyene soni kwakamuchisya kuti apikanichisyeje yindu. (Mis. 2:1-5) Mwamti Yehofa chachakamuchisya kuti asaguleje yindu yampaka yimsangalasye.—Sal. 23:2, 3.
NYIMBO NA. 28 Kuŵa Mjakwe jwa Yehofa
